Канон святому преподобному Варнаве Гефсиманскому

Пѣ́снь а҃.

І҆рмо́съ: Твоѧ̀ побѣди́тєльнаѧ десни́ца бг҃олѣ́пнѡ въ крѣ́пости просла́висѧ: та̀ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ..

Бл҃года́тнꙋю по́мощь твою̀, гдⷭ҇и, низпослѝ на́мъ, воспѣ́ти ᲂу҆го́дника твоегѡ̀, варна́вꙋ геѳсїма́нскаго, бл҃гоче́стїѧ подви́жника и҆ ѻ҆би́тели се́ргїевы ᲂу҆краше́нїе.

Ча́до млⷭ҇ти гдⷭ҇ни роди́телємъ твои́мъ бы́лъ є҆сѝ, ст҃ѣ. тѣ́мже и҆ лю́ди, ѻ҆́крестъ сꙋ́щїи, ви́дѧще сїѐ, ѕѣлѡ̀ ра́довахꙋсѧ, бл҃годарѧ́ще бг҃а.

А҆́ще и҆ на́йде на тѧ̀ болѣ́знь тѧ̑жкаѧ во ю҆́ности твое́й, ѻ҆́тче, ѻ҆ба́че десни́цею гдⷭ҇нею ѡ҆хранѧ́емь, ꙗ҆́кѡ и҆збра́нникъ бж҃їй, здра́въ ꙗ҆ви́лсѧ є҆сѝ.

Бг҃оро́диченъ: Мт҃и дв҃о, всемлⷭ҇тиваѧ влⷣчце, вѣ́дꙋщаѧ на́шѧ не́мощи дꙋшє́вныѧ и҆ тѣлє́сныѧ, сохранѝ на́съ под̾ кро́вомъ твои́мъ.

Пѣ́снь г҃.

І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь и҆ млⷭ҇тивно въ не воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀, чл҃вѣколю́бче.

Призва́нїе ко и҆́ночествꙋ предзре́сѧ въ тебѣ̀, бл҃же́нне, є҆щѐ ѻ҆́трокꙋ сꙋ́щꙋ, є҆гда̀ пе́рвѣе ᲂу҆ гро́ба прпⷣбнаго се́ргїа моли́лсѧ є҆сѝ.

Жела́нїе послꙋжи́ти бг҃ꙋ и҆мѣ́ѧ, ѻ҆́тче, во ѻ҆би́тель ст҃ы́ѧ тро́ицы прише́лъ є҆сѝ, и҆дѣ́же нача́ло сп҃се́нїѧ твоегѡ̀ положѝ.

Ви́дѧще любо́вь твою̀ къ ᲂу҆едине́нномꙋ житїю̀, прпⷣбне, и҆ предзрѧ́ще слꙋже́нїе твоѐ наро́дꙋ бж҃їю, а҆́вва а҆нтѡ́нїй со ста́рцы посла́ша тѧ̀ во ѻ҆би́тель прест҃ы́ѧ бцⷣы, геѳсїма́нїѧ нарица́емꙋю.

Бг҃оро́диченъ: Ѽ прест҃а́ѧ дв҃о, пꙋтеводи́тельнице вѣ́рныхъ! ко стезѝ покаѧ́нїѧ на́съ напра́ви и҆ сп҃сѝ дꙋ́ши на́шѧ.

Сѣда́ленъ, гла́съ в҃:

Любо́вь хрⷭ҇то́вꙋ ве́лїимъ смире́нїемъ стѧжа́лъ є҆сѝ, прпⷣбне ѻ҆́тче варна́во, тече́нїе живота̀ твоегѡ̀ бг҃ꙋ ввѣрѧ́ѧ и҆ при́снѡ смотре́нїю гдⷭ҇ню ра́дꙋѧсѧ.

Бг҃оро́диченъ: Мт҃и бж҃їѧ, бл҃гослове́ннаѧ мр҃і́е, лю́ди твоѧ̑, во ско́рби сꙋ́щыѧ, млⷭ҇тїю твое́ю не ѡ҆ста́ви.

Пѣ́снь д҃.

І҆рмо́съ: Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѣ̀ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе.

Въ мі́рѣ ско́рбни бꙋ́дете, но дерза́йте, ꙗ҆́кѡ а҆́зъ побѣди́хъ мі́ръ, ре́клъ є҆сѝ, гдⷭ҇и, твои́мъ ᲂу҆ченикѡ́мъ. сегѡ̀ ра́ди скорбѧ́щымъ ᲂу҆тѣ́шители ди̑вныѧ ѿ и҆збра́нныхъ твои́хъ да́рꙋеши.

Ско́рби наро́да бж҃їѧ позна́въ, ᲂу҆тѣ́шитель при́сный и҆ ско́рый лю́демъ ꙗ҆ви́лсѧ є҆сѝ, ѻ҆́тче варна́во премлⷭ҇тиве, тѣ́мже тѧ̀ любо́вїю ᲂу҆блажа́емъ.

Мно́го болѣ́зновалъ є҆сѝ ѡ҆ приходѧ́щихъ къ тебѣ̀, прпⷣбне ѻ҆́тче, тѣ́мже и҆ си́хъ призыва́лъ є҆сѝ непра́вды и҆ прегрѣшє́нїѧ своѧ̑ слеза́ми покаѧ́нїѧ ѡ҆мыва́ти и҆ во всѧ́цѣмъ бл҃гоче́стїи и҆ чистотѣ̀ пребыва́ти.

Бг҃оро́диченъ: Мт҃и пречⷭ҇таѧ, ѻ҆́гнь бжⷭ҇твенный во чре́вѣ прїи́мшаѧ несказа́нно, непра́вды и҆ прегрѣшє́нїѧ на́ша попалѝ бл҃года́тїю сн҃а твоегѡ̀.

Пѣ́снь є҃

І҆рмо́съ: Тво́й ми́ръ да́ждь на́мъ, сн҃е бж҃їй, и҆но́гѡ бо, ра́звѣ тебѐ, бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Еѵⷢ҇льскаѧ словеса̀ ѡ҆ до́бромъ па́стырѣ въ се́рдцѣ твое́мъ слага́ѧ, прпⷣбне, мно́гое попече́нїе ѡ҆ приходѧ́щихъ къ тебѣ̀ и҆мѣ́лъ є҆сѝ и҆, ꙗ҆́кѡ чадолюби́вый ѻ҆те́цъ, си́хъ ᲂу҆тѣша́лъ є҆сѝ.

Си́рыхъ, болѣ́знꙋющихъ и҆ ѡ҆ грѣсѣ́хъ свои́хъ скорбѧ́щихъ во мно́жествѣ привле́клъ є҆сѝ, ѻ҆́тче пресла́вне варна́во, и҆ си́хъ сло́вомъ кро́ткимъ твои́мъ врачева́лъ є҆сѝ.

Та̑йнаѧ человѣ́кѡвъ прозрева́лъ є҆сѝ, ѻ҆́тче прпⷣбне, и҆ ꙗ҆́звы грѣхѡ́вныѧ цѣли́лъ є҆сѝ да́нною тебѣ̀ бл҃года́тїю, та́же, бꙋ̑дꙋщаѧ прови́дѧ, лю́ди ко и҆́стинѣ направлѧ́лъ є҆сѝ.

Бг҃оро́диченъ: Ско́рби и҆ печа̑ли человѣ́кѡвъ вѣ́си, мт҃и прест҃а́ѧ, тѣ́мже и҆ нбⷭ҇ною любо́вїю твое́ю вѣ́рнѡ сїѧ̑ врачꙋ́еши.

Пѣ́снь ѕ҃.

І҆рмо́съ: Ѡ҆бы́де на́съ послѣ̑днѧѧ бе́здна, нѣ́сть и҆збавлѧ́ѧй, вмѣни́хомсѧ, ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑, бж҃е на́шъ, ты̀ бо крѣ́пость немощствꙋ́ющихъ и҆ и҆справле́нїе..

Ѡ҆бы́детъ бе́здна беззакѡ́нїѧ рѡссі́йскꙋю зе́млю, нѣ́сть и҆збавлѧ́ѧй и҆ мно́зи вѣ́рнїи вмѣнѧ́тсѧ ꙗ҆́кѡ ѻ҆́вцы заколе́нїѧ, ѻ҆ба́че да́стъ гдⷭ҇ь крѣ́пость немощствꙋ́ющымъ и҆ и҆збавле́нїе, прⷪ҇ро́чески ре́клъ є҆сѝ, прпⷣбне.

Дні́е грѧдꙋ́тъ, є҆гда̀ напа́стьми тьмы̀ безбо́жїѧ цр҃ковь рѡссі́йскаѧ ѡ҆бꙋрева́ема бꙋ́детъ, но, сама́го хрⷭ҇та̀ и҆мꙋ́щи ко́рмчаго, ти́хое приста́нище ѡ҆брѧ́щетъ, возсїѧ́вшꙋ со́лнцꙋ вѣ́ры, прⷪ҇ро́чески ᲂу҆тѣша́лъ є҆сѝ вѣ̑рныѧ, бл҃же́нне варна́во.

Грѧдꙋ́щее гꙋби́тельство цр҃кве хрⷭ҇то́вы предста́нетъ, вѣща́лъ є҆сѝ, ѻ҆́тче, ме́рзость и҆ запꙋстѣ́нїе во хра́мѣхъ бж҃їихъ и҆стоща́тсѧ, го́ре и҆ мра́къ въ сердца́хъ люде́й, ꙗ҆́кѡ ды́мъ, и҆сче́знꙋтъ, є҆гда̀ ті́и къ бг҃ꙋ съ покаѧ́нїемъ ѡ҆братѧ́тсѧ, занѐ гдⷭ҇ь, крѣ́пость немощствꙋ́ющихъ, да́рꙋетъ и҆̀мъ и҆збавле́нїе.

Бг҃оро́диченъ: Цр҃ковь на́шꙋ во дни̑ гоне́нїй и҆ странꙋ̀ рѡссі́йскꙋю во дни̑ нестрое́нїй держа́вою твое́ю сохрани́ла є҆сѝ, мт҃и дв҃о. сегѡ̀ ра́ди и҆ на бꙋ́дꙋщее вре́мѧ ѿ вра̑гъ ви́димыхъ и҆ неви́димыхъ бꙋ́ди на́мъ при́снаѧ застꙋ́пница.

Конда́къ, гла́съ в҃:

Печа́льникꙋ землѝ рѡссі́йскїѧ, прпⷣбномꙋ се́ргїю, ѿ ю҆́ности послѣ́довалъ є҆сѝ, ст҃е варна́во, и҆ завѣ́тъ ста́рца твоегѡ̀, си́це ре́кшагѡ: та́кѡ хо́щетъ бг҃ъ: сло́вомъ и҆ хлѣ́бомъ пита́й а҆́лчꙋщихъ, пои́стинѣ до конца̀ и҆спо́лнилъ є҆сѝ. сегѡ̀ ра́ди и҆ ны́нѣ мо́лимъ тѧ̀, не ѡ҆ста́ви на́съ, ᲂу҆тѣ́шительный ѻ҆́тче, нбⷭ҇ною любо́вїю твое́ю.

І҆́косъ:

Возлюби́въ, прпⷣбне, хрⷭ҇то́вы бжⷭ҇твенныѧ за́пѡвѣди и҆ возненави́дѣвъ мі́ра сегѡ̀ наслажде́нїе, прише́лъ є҆сѝ ᲂу҆се́рднѡ къ томꙋ̀ и҆ бы́лъ є҆сѝ свѣти́льникъ, просвѣща́ѧ концы̀ блиста́нїемъ дꙋхо́внымъ. тѣ́мъ припа́даѧ молю̀ тѧ̀: просвѣтѝ моѝ ѻ҆́чи дꙋше́внѣи воспѣ́ти твоѧ̑ по́двиги, поще́нїе, и҆ бдѣ́нїе, и҆ сле́зы, болѣ̑зни, и҆ и҆зможде́нїе тѣ́ла, бл҃же́нныѧ ра́ди бꙋ́дꙋщїѧ жи́зни, є҆ѧ́же ны́нѣ наслажда́ешисѧ. молѝ непреста́нно ѡ҆ всѣ́хъ на́съ.

Пѣ́снь з҃.

І҆рмо́съ: Тебѐ, ᲂу҆́мнꙋю, бцⷣе, пе́щь разсмотрѧ́емъ, вѣ́рнїи, ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.

Дꙋ́хомъ кро́тости врачꙋ́ѧ дꙋшє́вныѧ недꙋ́ги, прпⷣбне, приходѧ́щыѧ къ тебѣ̀ приводи́лъ є҆сѝ къ покаѧ́нїю и҆ є҆ѵⷢ҇льскимъ за́повѣдемъ наꙋча́лъ є҆сѝ.

Словесє́мъ твои̑мъ и҆ наставле́нїемъ послѣ́дꙋюще, прпⷣбне ѻ҆́тче варна́во, вѣ́рнїи лю́дїе ѻ҆те́чества твоегѡ̀ ми́ръ мно́гъ стѧжава́хꙋ и҆ та́кѡ житїѐ своѐ во сла́вꙋ бж҃їю ᲂу҆строѧ́хꙋ.

Да́ромъ врачева́нїѧ ѡ҆богатѝ тѧ̀ гдⷭ҇ь, прпⷣбне ѻ҆́тче варна́во, тѣ́мже и҆ сло́вомъ твои́мъ смире́ннымъ во сла́вꙋ бж҃їю недꙋ̑жныѧ цѣли́лъ є҆сѝ.

Бг҃оро́диченъ: Болѣ̑зни на́ша дꙋшє́вныѧ и҆ тѣлє́сныѧ застꙋпле́нїемъ твои́мъ ᲂу҆врачꙋ́й, пречⷭ҇таѧ, и҆ ѿ сме́рти дꙋхо́вныѧ и҆зба́ви на́съ.

Пѣ́снь и҃.

І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Вѣ́ра крѣ́пкаѧ, любы̀ нелицеме́рнаѧ и҆ ᲂу҆пова́нїе тве́рдое чистѣ́е зла́та блеща́хꙋсѧ въ тебѣ̀, прпⷣбне ѻ҆́тче. сегѡ̀ ра́ди ѿ бг҃а да́ръ разсꙋжде́нїѧ и҆ прозрѣ́нїѧ прїѧ́ти сподо́билсѧ є҆сѝ. тѣ́мже мно́зи, взыску́ющий во́лю бж҃їю, къ тебѣ̀ притека́хꙋ.

Печа́льникъ и҆ наста́вникъ бы́лъ є҆сѝ, прпⷣбне ѻ҆́тче, не то́чїю про́стымъ, но и҆ во вла́сти сꙋ́щымъ. тѣ́мже и҆ вели́каго госꙋда́рѧ всерѡссі́йскагѡ въ ке́ллїи твое́й дꙋхо́внѣ ᲂу҆тѣша́лъ є҆сѝ, грѧдꙋ̑щаѧ страда́нїѧ и҆ сме́рть мꙋ́ченическꙋю тогѡ̀ предꙋзрева́ѧ.

Пома́занникꙋ бж҃їю проре́клъ є҆сѝ, прпⷣбне варна́во, претерпѣ́ти страда̑нїѧ во сла́вꙋ бж҃їю: то́й бо ꙗ҆ви́сѧ же́ртва за грѣхѝ на́шѧ, посрамле́нїе гꙋби́телей землѝ рѡссі́йскїѧ и҆ сла́ва цр҃кве.

Бг҃оро́диченъ: Ѻ҆би̑тели мнѡ́ги, во и҆́мѧ твоѐ, пречⷭ҇таѧ, на ст҃ѣ́й рꙋсѝ воздви́гнꙋтыѧ, ѻ҆ба́че за грѣхѝ на́шѧ ѿ безбо́жныхъ порꙋга̑нныѧ, ны́нѣ же со ᲂу҆се́рдїемъ вѣ́рными возставлѧ̑емыѧ, млⷭ҇тїю твое́ю не ѡ҆ста́ви и҆ въ ни́хъ живꙋ́щыѧ ѿ всѧ́ческихъ напа́стей и҆ ѕлы́хъ ѡ҆бстоѧ́нїй сохранѝ.

Пѣ́снь ѳ҃.

І҆рмо́съ: Ѻ҆́бразъ чи́стаго ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́нно велича́емъ.

Велѣ́нїе ста́рца, є҆́же пита́ти ча̑да бж҃їѧ хлѣ́бомъ и҆ сло́вомъ, да́же до часа̀ сме́ртнагѡ со тща́нїемъ соблюда́ѧ, во́лю бж҃їю и҆спо́лнилъ є҆сѝ, ѻ҆́тче варна́во. тѣ́мже и҆ сподо́бисѧ ᲂу҆ ѻ҆лтарѧ̀ ми́рнѣ дꙋ́хъ тво́й гдⷭ҇ꙋ преда́ти.

За́повѣдь хрⷭ҇то́вꙋ, да лю́бите дрꙋ́гъ дрꙋ́га, потща́лсѧ є҆сѝ и҆спо́лнити до конца̀, прпⷣбне варна́во, и҆ сегѡ̀ ра́ди въ черто́ги нбⷭ҇ныѧ ꙗ҆́кѡ возлю́бленный и҆ бл҃гослове́нный бг҃омъ возше́лъ є҆сѝ.

Живѧ̀ во сла́вꙋ бж҃їю, мл҃твою ꙗ҆́кѡ серафі́мъ, дѣѧ́нїемъ ꙗ҆́кѡ херꙋві́мъ, слꙋже́нїемъ же ꙗ҆́кѡ а҆́гг҃лъ бы́лъ є҆сѝ, прпⷣбне ѻ҆́тче варна́во. сегѡ̀ ра́ди и҆ ны́нѣ съ ли́ки нбⷭ҇ными бг҃а ра́достнѣ прославлѧ́еши.

Бг҃оро́диченъ: Строи́телѧ ѻ҆би́тели і҆́верскїѧ, прпⷣбнаго варна́вꙋ, хода́таѧ пред̾ тобо́ю и҆́мамы, пречⷭ҇таѧ мт҃и дв҃о, съ ни́мже сподо́би и҆ на́съ досто́йнѡ взыва́ти тебѣ̀: ра́дꙋйсѧ, бл҃га́ѧ врата́рнице, две́ри ра̑йскїѧ вѣ̑рнымъ ѿверза́ющаѧ.

Свѣти́ленъ:

Свѣти́льника вѣ́ры и҆ ѻ҆́бразъ бл҃гоче́стїѧ ꙗ҆ви́лъ є҆сѝ на́мъ, гдⷭ҇и, варна́вꙋ прпⷣбнаго. се́й бо, првⷣнѡ пожи́въ, мнѡ́гїѧ лю́ди къ покаѧ́нїю приведѐ и҆ свѣ́томъ є҆ѵⷢ҇льскимъ просвѣтѝ. є҆го́же мл҃твами, хрⷭ҇тѐ бж҃е, да́рꙋй на́мъ ве́лїю млⷭ҇ть.

Бг҃оро́диченъ: Просвѣтѝ на́съ свѣ́томъ сн҃а твоегѡ̀, бл҃гослове́ннаѧ влⷣчце, къ не́мощемъ на́шымъ милосе́рдна бꙋ́ди, про́чее вре́мѧ живота̀ на́шегѡ въ ми́рѣ и҆ покаѧ́нїи сподо́би сконча́ти и҆ на стра́шнѣмъ сꙋди́щи хрⷭ҇то́вѣ хода́таица неѿстꙋ́пна ꙗ҆ви́сѧ.