Канон святому преподобному Севастиану Сохотскому, Пошехонскому

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Земна́ѧ и҆ мимотекꙋ̑щаѧ, ꙗ҆́кѡ ᲂу҆ме́ты, вмѣни́въ, хрⷭ҇та̀ є҆ди́наго приѡбрѣ́лъ є҆сѝ, є҆гѡ́же любо́вїю ᲂу҆ѧзви́въ дꙋ́шꙋ свою̀, севастїа́не прпⷣбне, моли́сѧ ко гдⷭ҇ꙋ на́съ просвѣти́ти.

Возше́дъ на высотꙋ̀ добродѣ́телей, до́лꙋ влекꙋ́щыѧ сла̑сти ѡ҆плева́лъ є҆сѝ, сла́дость показа́лъ є҆сѝ сп҃се́нїѧ, ѻ҆́тче прпⷣбне, ста́дꙋ твоемꙋ̀.

Нахожде́нїѧ вра̑жїѧ лꙋка́выхъ дꙋхѡ́въ ѿ бг҃а сокрꙋше́ннымъ се́рдцемъ прїе́мъ по́мощь, севастїа́не бл҃же́нне, и҆ воздержа́нїемъ ѡ҆гради́всѧ, побѣди́лъ є҆сѝ и҆́хъ.

Бг҃оро́диченъ: Премꙋ́дрость бж҃їю, вои́стиннꙋ сло́во ѻ҆́ч҃ее несказа́ннѡ ро́ждшаѧ, дꙋшѝ моеѧ̀ лю́тꙋю ꙗ҆́звꙋ и҆сцѣлѝ и҆ серде́чнꙋю болѣ́знь, мт҃и бж҃їѧ, ᲂу҆кротѝ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Попали́лъ є҆сѝ ᲂу҆́глїемъ воздержа́нїѧ страсте́й те́рнїе, прпⷣбне, и҆ прогна́лъ нечи̑стыѧ дꙋ́хи, бг҃обл҃же́нне.

Ꙗ҆́кѡ свѣти́льникъ, свою̀ дꙋ́шꙋ сле́зными потѡ́ки ᲂу҆краша́ѧ, прпⷣбне, и҆ се́рдце своѐ поже́рлъ є҆сѝ бг҃ови.

Стра́сти дꙋшетлѣ̑нныѧ ᲂу҆спи́лъ є҆сѝ бо́дростными мл҃твами и҆ бдѣ́ньми, всебл҃же́нне, тѣ́мже въ нбⷭ҇ный черто́гъ всели́лсѧ є҆сѝ, ра́дꙋѧсѧ.

Бг҃оро́диченъ: Оу҆ста́ви неꙋста́вное помышле́нїй мои́хъ, чⷭ҇таѧ, смꙋще́нїе, мт҃и бж҃їѧ, є҆́же къ сн҃ꙋ твоемꙋ̀ направлѧ́ющи моѧ̑ движє́нїѧ.

Сѣда́ленъ, гла́съ є҃.

Ра́дꙋйсѧ, прпⷣбне, прине́слъ є҆сѝ себє̀ хрⷭ҇то́ви же́ртвꙋ жи́вꙋ, ѿ ю҆́ности ᲂу҆се́рднѡ рабо́таѧ хрⷭ҇тꙋ̀ бг҃ꙋ пѣ́сньми, посто́мъ и҆ воздержа́нїемъ, и҆ водвори́сѧ въ пꙋсты́ни, є҆ди́нъ ко є҆ди́номꙋ бесѣ́дꙋѧ. Тє́мъ ви́дѣвъ гдⷭ҇ь твоѐ до́брое и҆зволе́нїе, со всѣ́ми ᲂу҆чини́ тѧ првⷣными и҆ прпⷣбными, водвори́ тѧ въ нбⷭ҇номъ црⷭ҇твїи со а҆́гг҃лы хрⷭ҇тꙋ̀ пѣ́ти пѣ́снь немо́лчнꙋю, но ꙗ҆́коже и҆́маши дерзнове́нїе къ немꙋ̀, молѝ, мо́лимсѧ, сп҃сти́сѧ дꙋша́мъ на́шимъ.

Бг҃оро́диченъ: Къ бцⷣе возопїи́мъ любо́вїю: ра́дꙋйсѧ, гра́де гдⷭ҇ень; ра́дꙋйсѧ, ски́птре дв҃довъ. ра́дꙋйсѧ, пала́то ѡ҆дꙋшевле́ннаѧ; ра́дꙋйсѧ, рꙋ́чко бжⷭ҇твєнныѧ ма́нны. ра́дꙋйсѧ, неѡпали́маѧ кꙋпино̀; ра́дꙋйсѧ, свѣщѐ пресвѣ́тлаѧ и҆ свѣти́льниче златы́й. ра́дꙋйсѧ, гора̀ бж҃їѧ прїѡсѣне́ннаѧ; ра́дꙋйсѧ, ѻ҆гнено́сный прⷭ҇то́ле. ра́дꙋйсѧ, лѣ́ствице и҆ две́рь нбⷭ҇наѧ; ра́дꙋйсѧ, же́зле, невла́жнѡ прозѧ́бшїй. ра́дꙋйсѧ, всѧ̀ сп҃са́ющи ѿ всѧ́кихъ бѣ́дъ и҆ скорбе́й; ра́дꙋйсѧ, бцⷣе, ми́рꙋ сп҃се́нїе.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бжⷭ҇тво̀.

Ꙗ҆́кѡ въ поро́дѣ благово́ннѣй и҆ добродѣ́тели въ раѝ ѡ҆дꙋшевле́ннѣмъ, воздержа́нїемъ процвѣ́лъ є҆сѝ, и҆́мже пита́еши чтꙋ́щыѧ тѧ̀.

Мі́ра любвѐ ра́ди ѿре́ксѧ, дости́же го́рнѧгѡ і҆ерⷭ҇ли́ма, и҆дѣ́же хрⷭ҇то́съ со ѻ҆ц҃е́мъ и҆ дх҃омъ, и҆ вѣнца̀ ѿ негѡ̀ сподо́бисѧ, со безпло́тными ли̑ки поѧ̀: сла́ва си́лѣ твое́й, гдⷭ҇и.

Законополо́жника воздержа́ннꙋю и҆́нокѡмъ и҆ пра́вило кро́тости, ꙗ҆́кѡ мѡѷсе́а тѧ̀ и҆ дв҃да, вои́стиннꙋ стѧжа́вше, ѻ҆́тче, ᲂу҆блажа́емъ.

Бг҃оро́диченъ: Под̾ лѣ́томъ бы́вша, и҆́же ѿ ѻ҆ц҃а̀ безлѣ́тнѡ возсїѧ́вшаго, бг҃омт҃и, на́мъ родила̀ є҆сѝ. є҆гѡ́же молѝ сп҃стѝ пою́щыѧ тѧ̀.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый; и҆ покры́ла мѧ̀ є҆́сть чꙋжда́ѧ тьма̀, ѻ҆каѧ́ннаго: но ѡ҆брати́ мѧ и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Страсте́й мглꙋ̀ ѿгна́въ, прпⷣбне, зарѧ́ми, ѻ҆́тче, по́двигъ твои́хъ, просвѣще́нїе дх҃а въ се́рдцы воспрїи́мъ, севастїа́не, и҆́мже попали́лъ всѧ̑ бѣсѡ́вскаѧ ѡ҆полчє́нїѧ и҆ ликѡ́мъ по́стническимъ причте́сѧ.

Погаси́въ стра́сти росо́ю воздержа́нїѧ, ѻ҆́тче бл҃же́нне, бога́тнѡ вже́глъ є҆сѝ ѻ҆́гнь любвѐ и҆ вѣ́ры и҆ поще́нїѧ свѣти́льникъ, просвѣща́лсѧ безсме́ртїемъ, и҆ днѐ сы́нъ, ѻ҆́тче, бы́лъ є҆сѝ.

Оу҆добри́въ сщ҃е́ннꙋю свою̀ дꙋ́шꙋ, ѻ҆́тче всебл҃же́нне севастїа́не, и҆зволе́нїемъ простоты̀, и҆ хꙋ́дость ри́знꙋю и҆мѣ́лъ є҆сѝ, тѣ́мже ᲂу҆краше́нїе добродѣ́тельно показа́лсѧ є҆сѝ, чтꙋ́щымъ всечⷭ҇тнꙋ́ю па́мѧть твою̀.

Бг҃оро́диченъ: Є҆ди́на ро́ждши дв҃ою, є҆ди́на неискꙋсомꙋ́жнаѧ ꙗ҆ви́сѧ, всенепоро́чнаѧ, во ᲂу҆тро́бѣ бо сло́во ѻ҆́ч҃ее прїе́мши безнача́льное, и҆ млеко́мъ дои́ши, дѣви́це, чꙋ́до стра́нное и҆, дѣ́вствꙋющи, зако́ны ѡ҆бновлѧ́еши є҆стєства̀.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̀, и҆ и҆з̾ глꙋбины̀ ѕѡ́лъ возведѝ, молю́сѧ, къ тебе́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

Собра́лъ є҆сѝ въ дꙋшѝ свое́й бжⷭ҇твєнныѧ плоды̀ дꙋ́ха: непоро́чнꙋ мл҃твꙋ, чистотꙋ̀ же кра́снꙋ и҆ бдѣ́нїе тве́рдо, воздержа́нїѧ болѣ̑зни, и҆́миже хра́мъ показа́лсѧ бг҃ꙋ вседержи́телю.

Дꙋше́вный ра́зꙋмъ впери́въ, сла́вне, и҆ чꙋ̑вствїѧ ѡ҆корми́въ, мꙋ́дре, ст҃ы̑ни бл҃гоче́стїѧ сꙋ́щымъ на землѝ возвѣща́ѧ и҆ є҆́же къ нб҃сѝ восхожде́нїе.

Земны́хъ веще́й хꙋ́дость мимоте́клъ є҆сѝ, мꙋ́дре, невеще́ственною же мл҃твою на нб҃са̀ возлетѣ̀, вы́шнѧгѡ воспрїѧ́тїѧ наслѣ́дникъ ꙗ҆ви́сѧ житїѧ̀ соверше́нїемъ.

Бг҃оро́диченъ: Прїѧ́ла є҆сѝ вои́стиннꙋ бжⷭ҇твенное сло́во въ ложесна̀ твоѧ̑ и҆ сегѡ̀ па́че є҆стества̀, пречⷭ҇таѧ, родила̀ є҆сѝ, є҆гѡ́же мольба́ми твои́ми ᲂу҆молѝ ѿ бѣ́дъ и҆зба́вити рабы̑ твоѧ̑.

Конда́къ, гла́съ г҃.

Сїѧ́нїемъ дх҃а прест҃а́гѡ, мꙋ́дре севастїа́не, просвѣ́щсѧ, ѡ҆ста́вилъ є҆сѝ ꙗ҆́же въ житїѝ молвы̑, пꙋсты́ню же дости́гъ, прпⷣбне ѻ҆́тче, возвесели́лъ є҆сѝ и҆́же над̾ всѣ́ми бг҃а и҆ зижди́телѧ. сегѡ̀ ра́ди прославлѧ́етъ тѧ̀ хрⷭ҇то́съ, бл҃же́нне, вели́кїй дарода́тель.

І҆́косъ:

Оу҆ѧсни́ ми ѧ҆зы́къ и҆ ᲂу҆крѣпи́ ми ᲂу҆́мъ, хрⷭ҇тѣ̀ бж҃е, мл҃твами пречⷭ҇тыѧ твоеѧ̀ мт҃ре, ѧ҆зы́къ мѝ благоглаго́лати пода́ждь на похвалꙋ̀ и҆ на ᲂу҆моле́нїе твоегѡ̀ ᲂу҆го́дника, свѣщꙋ̀ дꙋшѝ моеѧ̀ ᲂу҆ны́лꙋю, ю҆́же, воздрема́въ, ᲂу҆гаси́хъ, мл҃твами прпⷣбнаго севастїа́на просвѣтѝ и҆ не ѿлꙋчѝ менѐ, хрⷭ҇тѣ̀, мно́гѡ согрѣши́вша, ли́ка прпⷣбныхъ твои́хъ, ты́ бо сп҃са́еши всѣ́хъ, ꙗ҆́кѡ вели́кїй дарода́тель.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Всѣ́мъ жела́нїемъ прилѣпи́лсѧ є҆сѝ, воздержа́нїемъ тве́рдымъ своемꙋ̀ влⷣце, тогѡ̀ ны́нѣ пита́ешисѧ сїѧ́нїи, зовы́й: ѻ҆тє́цъ на́шихъ бж҃е, бл҃гослове́нъ є҆сѝ.

Ѕѣ́льнымъ поще́нїемъ, ꙗ҆́кѡ благово́нною пи́щею, пита́ѧ дꙋ́шꙋ свою̀, прпⷣбне севастїа́не, тѣ́мже и҆ трисо́лнечномꙋ бжⷭ҇твꙋ̀ предста́ти сподо́билсѧ, со а҆́гг҃лы поѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Въ приста́нище ти́хое вше́дъ, бг҃омꙋ́дре, жите́йскихъ пла́ванїй ѿбѣ́гъ и҆ волнꙋ́ємымъ въ бꙋ́ри стра́шнѣй сп҃си́тельное ѡ҆кормле́нїе бы́въ, воспѣва́ѧ: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: И҆зба́вихомсѧ всѝ ѿ страсте́й и҆ бѣ́дъ, ѡ҆бстоѧ́нїй и҆ недꙋ́гъ многоѻбра́зныхъ мл҃твами твои́ми, бг҃омт҃и, сн҃ꙋ твоемꙋ̀ зовꙋ́ще: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Въ поще́нїихъ крѣ́пкое и҆ въ мл҃твахъ нелѣ́ностное, терпѣ́нїе во и҆скꙋше́нїихъ, севастїа́не прпⷣбне, на землѝ показа́въ, бг҃ови предстоѧ̀, зове́ши: хвали́те и҆ превозноси́те є҆го̀ во вѣ́ки.

Оу҆ѧзви́сѧ бжⷭ҇твеннымъ жела́нїемъ, всебл҃же́нне, тѣ́мже непоро́чно и҆ пра́ведно житїѐ про́йде, до́ндеже дости́же црⷭ҇кагѡ прⷭ҇то́ла, со а҆́гг҃лы поѧ̀: хвали́те и҆ превозноси́те є҆го̀ во вѣ́ки.

Оу҆кра́шенъ добродѣ́тельми и҆ въ по́стницѣхъ, ꙗ҆́кѡ а҆́гг҃лъ, показа́сѧ, во свѣ́тѣ неизрече́нныѧ сла́вы почива́еши, пѣ́снь воспѣва́ѧ хрⷭ҇тꙋ̀ бг҃ꙋ: хвали́те, по́йте и҆ превозноси́те є҆го̀ во вѣ́ки.

Бг҃оро́диченъ: Поглоще́ннаго болѣ́зньми и҆ па́дшаго возста́ви, бг҃омт҃и, ꙗ҆́кѡ да тѧ̀ сла́влю во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дѣви́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бг҃оро́дицꙋ, вѣ́рнїи, велича́емъ.

Дꙋшетлѣ́нныѧ стра̑сти побѣди́въ, ꙗ҆́кѡ па́стырь и҆́стинный ᲂу҆па́слъ є҆сѝ слове́сное ста́до, ꙗ҆́кѡ цвѣ̑ты ра́йскими, напитава́ѧ си́хъ бл҃года́тїю, бл҃же́нне.

Оу҆́зкїй и҆ приско́рбный ше́ствовавъ пꙋ́ть, ѻ҆́тче севастїа́не, тѣле́снѣ ᲂу҆́бѡ преста́висѧ, дꙋ́хомъ же жи́въ бг҃ови предстои́ши, но ꙗ҆́кѡ и҆мѣ́ѧ дерзнове́нїе къ бг҃ꙋ, молѝ спⷭ҇ти́сѧ на́мъ.

Предѣ́лъ неꙋкло́ненъ вѣ́ры и҆ ѻ҆́бразъ воздержа́нїѧ и҆мꙋ́ще по́двиги твоѧ̑, прпⷣбне, вои́стиннꙋ зижди́телѧ пѣ́сньми велича́емъ.

Бг҃оро́диченъ: Въ тѧ̀ всели́всѧ, всенепоро́чнаѧ, и҆ и҆́же пе́рвѣе родонача́льныѧ ѕлоѻбра́знѡ запе́нша человѣкоꙋбі́йцꙋ низложи́въ, роди́выйсѧ и҆з̾ тебє̀ всѧ̑ ны̀ сп҃слъ є҆́сть.

Свѣти́ленъ:

А҆́гг҃льское житїѐ жела́ѧ, ᲂу҆да́лилъ є҆сѝ себѐ въ пꙋсты́ню и҆, стра̑сти покори́въ плотскі̑ѧ, ра́венъ а҆́гг҃лѡмъ ꙗ҆ви́сѧ, ѻ҆́тче на́шъ бг҃оно́се севастїа́не.

Бг҃оро́диченъ: Держа́внымъ твои́мъ покро́вомъ ѿ врагѡ́въ навѣ́та на́съ, чⷭ҇таѧ, своѧ̑ рабы̑, соблюдѝ невре́дны, тѧ́ бо є҆ди́нꙋ и҆́мамы прибѣ́жище въ нꙋ́ждахъ.