Канон святому преподобному Савве Вишерскому, Новгородскому

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Смири́лсѧ є҆сѝ хрⷭ҇та̀ ра́ди, ѻ҆́тче, и҆ крⷭ҇тъ взе́мъ, ѿ ѻ҆те́чества и҆ сро́дникѡвъ ꙗ҆́кѡ ѿ ѕмі́ѧ бѣ́галъ є҆сѝ: ѿню́дꙋже въ пꙋсты́ню вше́дъ, и҆ въ не́й трꙋдолю́бнѡ подвиза́лсѧ є҆сѝ, прпⷣбне.

Ѿ ю҆́ности твоеѧ̀, ѻ҆́тче са́вво, ᲂу҆́мъ къ бг҃ꙋ впери́въ, и҆ тлѣ́нными нетлѣ̑ннаѧ ꙗ҆́кѡ до́брый кꙋпе́цъ кꙋпи́лъ є҆сѝ: тѣ́мже ны́нѣ сше́дшесѧ па́мѧть твою̀ почита́емъ.

Хрⷭ҇то́вымъ раче́нїемъ, ѻ҆́тче са́вво, па́че ѻ҆гнѧ̀ распала́емь, настоѧ̑щаѧ ꙗ҆́кѡ ничто́же сꙋ̑щаѧ презрѣ́лъ є҆сѝ, и҆ сегѡ̀ ра́ди въ покѡ́ища всели́лсѧ є҆сѝ и҆дѣ́же пра́ведныхъ дꙋ́шы веселѧ́тсѧ.

Бг҃оро́диченъ: Болѧ́ща и҆сцѣлѝ дꙋше́ю и҆ тѣ́ломъ влⷣчце, раба̀ твоего̀, бл҃же́ннагѡ са́ввы моле́нїемъ: тебе́ бо предста́тельницꙋ всѝ сꙋ́щїи въ печа́лехъ стѧжа́хомъ, ꙗ҆́кѡ ро́ждшꙋю спасе́нїе на́ше.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ, сла́вы сподо́би.

Сна̀ твои̑мъ ѻ҆чесє́мъ не да́лъ є҆сѝ, бл҃же́нне са́вво, ни вѣ́ждѡмъ дрема́нїѧ, до́ндеже сподо́билсѧ є҆сѝ првⷣныхъ селе́нїѧ, ꙗ҆̀же ᲂу҆гото́ва бг҃ъ, прпⷣбне, лю́бѧщымъ є҆го̀.

Бо́дренными твои́ми моли́твами, ѻ҆́тче са́вво, и҆ жесто́кимъ воздержа́нїемъ, бг҃ꙋ на землѝ до́брѣ ᲂу҆годи́лъ є҆сѝ: сегѡ̀ ра́ди стра́шенъ врагѡ́мъ, и҆ сла́венъ человѣ́кѡмъ бы́лъ є҆сѝ.

Ра́йскꙋю жи́знь, и҆ та́мѡ ст҃ы́хъ селе́нїе всегда̀ во ᲂу҆мѣ̀ твое́мъ пожина́лъ є҆сѝ, прпⷣбне. тѣ́мже во слеза́хъ и҆ воздыха́нїихъ всю̀ твою̀ жи́знь, ѻ҆́тче са́вво, преше́лъ є҆сѝ. сегѡ̀ ра́ди и҆ по сме́рти хрⷭ҇то́съ чꙋдесы́ тѧ просла́ви.

Бг҃оро́диченъ: И҆сточа́еши и҆сцѣле́нїй стрꙋи̑ болѧ́щымъ, дв҃о, всю́дꙋ. тѧ́ бо и҆сто́чникъ показа̀ милосе́рдїѧ влⷣчце, и҆́же ми́лости и҆сто́чникъ и҆зъ тебѐ рожде́йсѧ па́че ᲂу҆ма̀.

Сѣда́ленъ, гла́съ д҃.

Ю҆́ность твою̀, прпⷣбне, воздержа́нїемъ ᲂу҆вѧди́лъ є҆сѝ, стра̑сти тѣлє́сныѧ, ꙗ҆́кѡ плѣ́нника хꙋ́да свѧза́въ, дꙋ́хꙋ повинꙋ́лъ є҆сѝ: и҆ сегѡ̀ ра́ди, ѻ҆́тче са́вво, хрⷭ҇то́съ чꙋдесы̀ пресла́внѡ тебѐ вѣнча́етъ, є҆ди́нъ прославлѧ́ѧй ст҃ы̑ѧ своѧ̑.

Бг҃оро́диченъ: Оу҆мертви́сѧ всѧ̀ крѣ́пость моѧ̀ ѿ мно́жества безмѣ́рныхъ мои́хъ ѕѡ́лъ, и҆ мно́гими скорбьмѝ ѡ҆держи́мь ᲂу҆жѐ ѿча́ѧхсѧ: но помози́ ми влⷣчце, са́ввы бл҃же́ннагѡ предста́тельствомъ, ꙗ҆́кѡ ра́дость ро́ждшаѧ пла́чꙋщымъ и҆ ᲂу҆тѣше́нїе.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Житїѐ твоѐ, ѻ҆́тче са́вво, чꙋ́дно на землѝ показа́лъ є҆сѝ, вели́ко поще́нїе и҆ смире́нїе: и҆ сегѡ̀ ра́ди та́мошнѧгѡ житїѧ̀ вели́чество наслѣ́дилъ є҆сѝ. молѝ спасти́сѧ ѿ бѣ́дъ пою́щымъ тѧ̀.

Сѷмеѡ́на вели́кагѡ, на столпѣ̀ жи́вшагѡ, житїю̀ послѣ́дꙋѧ, прпⷣбне: тѣ́мже томꙋ̀ є҆ли́кѡ мо́щно и҆менова́нїе ѿ житїѧ̀ стѧжа́лъ є҆сѝ, са́вво пребога́те.

Посто́мъ и҆ моли́твами тѣ́ло твоѐ, ѻ҆́тче са́вво, и҆знꙋри́лъ є҆сѝ: и҆ сегѡ̀ ра́ди сподо́билсѧ є҆сѝ ви́дѣти неизречє́ннаѧ бл҃га̑ѧ, ꙗ҆̀же ст҃ы̑мъ ᲂу҆готѡ́вана. съ ни́миже, ѻ҆́тче са́вво, ѡ҆ на́съ моли́сѧ.

Бг҃оро́диченъ: Кро́въ и҆ застꙋпле́нїе, и҆ прибѣ́жище бꙋ́ди мѝ, дв҃о, рабꙋ̀ твоемꙋ̀, и҆сцѣли́ мѧ ѿ безмѣ́рныхъ ѕѡ́лъ воспѣва́ти, пречⷭ҇таѧ: сла́ва ржⷭ҇твꙋ̀ твоемꙋ̀.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Чи́сто житїѐ твоѐ ѿ ю҆́ности потща́лсѧ є҆сѝ прпⷣбне, сохрани́ти: тѣ́мже чистотꙋ̀ твою̀ ви́дѣвъ прест҃ы́й дх҃ъ, въ тѧ̀ всели́сѧ.

Ꙗ҆́кѡ преѡби́дѣвъ тлѣ̑ннаѧ, вѣ̑чнаѧ ѻ҆́тче, сподо́билсѧ є҆сѝ прїѧ́ти по нело́жномꙋ словесѝ: проси́те и҆ прїи́мете. тѣ́мже ꙗ҆́кѡ проси́лъ є҆сѝ, сїѧ̑ по досто́инствꙋ прїѧ́лъ є҆сѝ.

Мѣ́сто, є҆́же сподо́бисѧ прїѧ́ти честны̑ѧ мо́щи твоѧ̑, прпⷣбне, ѡ҆свѧти́сѧ, и҆ по мнѡ́гимъ страна́мъ прославлѧ́емо є҆́сть, ꙗ҆́кѡ въ себѣ̀ мо́щи твоѧ̑ и҆мꙋ́щее.

Бг҃оро́диченъ: Не преста́й молѧ́щи, є҆го́же родила̀ є҆сѝ бг҃оневѣ́сто, ꙗ҆́кѡ сп҃са и҆ влⷣкꙋ, разрѣше́нїе мѝ пода́ти скорбе́й, и҆ болѣ́зней ѡ҆блегче́нїе, ꙗ҆́кѡ да прїимꙋ̀ проще́нїе, пѣсносло́вѧ тѧ̀ во вѣ́ки.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Твоѐ вели́кое житїѐ и҆ чистотꙋ̀, къ си̑мъ же безмѣ́рное смире́нїе, прови́дѣвъ прест҃ы́й дх҃ъ, сла́вна тѧ̀ всѣ̑мъ, ѻ҆́тче, показа̀. тѣ́мже ѿ сегѡ̀ житїѧ̀ ко ѻ҆́номꙋ преше́дъ, полꙋчи́лъ є҆сѝ съ пра́ведными та́мѡ весе́лїе.

Дне́сь наста́вши свѧще́ннаѧ па́мѧть твоѧ̀, прпⷣбне са́вво, весели́тъ ᲂу҆ченикѝ твоѧ̑, воспѣва́ющыѧ любо́вїю по́двиги твоѧ̑, и҆̀же честно́е твоѐ ᲂу҆спе́нїе сла́вѧще торжествꙋ́ютъ, ꙗ҆̀же моли́твами твои́ми, ѻ҆́тче, соблюдѝ.

Разбо́йницы пе́рвѣе прише́дше тебѐ ѡ҆скорби́ти, прпⷣбне, но тѣ́хъ разꙋмѣ́въ лꙋка́вство, воздви́гнꙋти тѣ̑мъ дре́во ре́клъ є҆сѝ: не могꙋ́щымъ же мнѡ́гимъ тебѣ̀ є҆ди́номꙋ проти́витисѧ. тѣ́мже ꙗ҆́кѡ посра́млени про́чее со стра́хомъ ѿбѣжа́ша, па́че побѣжде́ни бы́вше, не́жели побѣди́ша.

Бг҃оро́диченъ: Твою̀ по́мощь да́ждь мѝ, и҆ и҆зба́ви мѧ̀ ѿ бѣ́дъ и҆ скорбе́й и҆ прегрѣше́нїй мои́хъ, ꙗ҆́же всѣ́хъ ро́ждши и҆збавле́нїе.

Конда́къ, гла́съ и҃.

Ѻ҆те́чества прпⷣбне, ᲂу҆дали́всѧ, и҆ всели́всѧ въ пꙋсты́ню, и҆ та́мѡ на сто́лпъ вше́дъ, и҆дѣ́же жесто́кое житїѐ показа́лъ є҆сѝ: и҆ мно́гихъ житїе́мъ ᲂу҆диви́въ, ѿню́дꙋже дарова́нїе чꙋде́съ ѿ хрⷭ҇та̀ прїѧ́лъ є҆сѝ, помина́й на́съ чествꙋ́ющихъ па́мѧть твою̀, да зове́мъ тѝ: ра́дꙋйсѧ, са́вво ѻ҆́тче на́шъ.

І҆́косъ:

Є҆ѵⷢ҇льскїй гла́съ, ѻ҆́тче, ᲂу҆слы́шавъ, всѧ̑ ѡ҆ста́вилъ є҆сѝ плотска̑ѧ мꙋдрова̑нїѧ, бога́тство и҆ сла́вꙋ въ ничто́же вмѣни́въ, на стра̑сти ꙗ҆́кѡ безпло́тенъ подвиза́лсѧ є҆сѝ, и҆ безпло́тныхъ ликостоѧ́нїѧ чистото́ю сподо́билсѧ є҆сѝ, и҆ ра́зꙋма дарова́нїе ѿ бг҃а прїѧ́лъ є҆сѝ, є҆́же пода́ждь въ пѣ́снехъ пою́щемꙋ тѝ си́це: ра́дꙋйсѧ, са́вво прпⷣбне и҆ бг҃оно́сне, нбⷭ҇ный человѣ́че, и҆ земны́й а҆́гг҃ле. ра́дꙋйсѧ, дх҃а ст҃а́гѡ прекра́сное ѻ҆би́телище. ра́дꙋйсѧ, бг҃облаже́нне, вельмѝ подвиза́всѧ во вре́меннѣй жи́зни, по достоѧ́нїю ѡ҆богати́лсѧ є҆сѝ бл҃года́тїю дх҃а, є҆ѧ́же дарова́нїе пода́ждь на́мъ ча́дѡмъ твои̑мъ, да зове́мъ тѝ: ра́дꙋйсѧ прпⷣбне, са́вво, ѻ҆́тче на́шъ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

И҆сточа́етъ чꙋдеса̀ честна́ѧ ра́ка твоѧ̀, прпⷣбне, преиз̾ѡби́лꙋющи бл҃года́тїю, вѣ́рою приходѧ́щымъ здра́вїе да́рꙋетъ, хрⷭ҇тꙋ̀ ѿ дꙋшѝ вопїю́щымъ: бл҃гослове́нъ бг҃ъ ѻ҆тцє́въ на́шихъ.

Дрє́внимъ ѻ҆́нѣмъ и҆ вели́кимъ ѻ҆тцє́мъ въ постѣ̀ просїѧ́вшымъ, житїе́мъ подо́бѧсѧ, прпⷣбне, въ пꙋсты́ню всели́лсѧ є҆сѝ, и҆ та́мѡ въ поще́нїихъ мнѡ́га лѣ̑та пребы́лъ є҆сѝ, са́вво ѻ҆́тче на́шъ.

Ꙗ҆́кѡ и҆́стиннагѡ и҆ кро́ткагѡ пастыренача́льника хрⷭ҇та̀, неѕло́бивое ѻ҆вча̀, ѻ҆́тче са́вво, бы́лъ є҆сѝ. тѣ́мже неѕло́бивъ хотѧ́щымъ тебѐ ѡ҆ѕло́бити бы́лъ є҆сѝ, хрⷭ҇тꙋ̀ вопїѧ́лъ є҆сѝ: бл҃гослове́нъ бг҃ъ ѻ҆тцє́въ на́шихъ.

Бг҃оро́диченъ: Ѡ҆бощре́ны болѣ̑зни ра́намъ мои̑мъ ѿ безмѣ́рныхъ мои́хъ прегрѣше́нїй влⷣчце, ведꙋ́тъ въ сме́рть дꙋше́внꙋю и҆ тѣле́снꙋю: но и҆схи́ти ꙗ҆́кѡ си́льна всѧ́кихъ скорбе́й и҆ недꙋ̑гъ.

Пѣ́снь и҃.

І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

И҆здѣ́тска, прпⷣбне ѻ҆́тче, потща́лсѧ є҆сѝ свою̀ со́вѣсть и҆ се́рдце съ дꙋше́ю чи́стѡ гдⷭ҇ꙋ предста́вити. тѣ́мъ и҆ хрⷭ҇то́съ чꙋдесы̀ тебѐ прославлѧ́етъ, томꙋ̀ вопїю́ща: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.

Ны́нѣ пꙋсты́нѧ весе́лїемъ красꙋ́етсѧ, ѻ҆́тче, и҆мꙋ́щи мо́щи твоѧ̑ въ себѣ̀, са́вво прпⷣбне. ᲂу҆ч҃ницы́ же твоѝ твоемꙋ̀ житїю̀ ревнꙋ́юще, ѡ҆ твое́й па́мѧти ра́дꙋющесѧ творцꙋ̀ вопїю́тъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.

Въ пꙋсты́ни, прпⷣбне, и҆дѣ́же селе́нїе и҆мѣ́лъ є҆сѝ, та́мѡ прече́стенъ хра́мъ въ сла́вꙋ хрⷭ҇та̀ воздви́глъ є҆сѝ, въ не́мъ прославлѧ́тисѧ пречⷭ҇томꙋ тогѡ̀ и҆́мени, и҆ всѣ̑мъ вопи́ти: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.

Бг҃оро́диченъ: Свѣти́льниче свѣ́та трисо́лнечнагѡ сꙋ́щи, заре́ю бл҃гоꙋтро́бїѧ твоегѡ̀ тмꙋ̀ ѿимѝ прегрѣше́нїй мои́хъ бг҃ороди́тельнице, и҆збавле́нїе нꙋ́жныхъ болѣ́зней подаю́щи, вѣ́рою превозносѧ́щемꙋ пречⷭ҇тое твоѐ ржⷭ҇тво̀.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.

Ѿ пꙋсты́ннагѡ житїѧ̀, къ премі́рнѣй и҆ вѣ́чнѣй жи́зни, ꙗ҆́кѡ преше́дъ бл҃же́нне, не преста́й молѧ̀ и҆зба́вителѧ, ѿ разли́чныхъ напа́стей и҆ бѣ́дъ и҆зба́вити, любо́вїю честно́е твоѐ ᲂу҆спе́нїе ны́нѣ пѣ́сньми сла́вѧщыѧ.

Пѣвцє́въ и҆́скренною любо́вїю пою́щихъ, и҆ вѣ́рою тебѣ̀ пѣ́нїе хвале́нїѧ приноша́ющихъ, требл҃же́нне са́вво, ѿ всѧ́кихъ бѣ́дъ и҆ скорбе́й и҆збавлѧ́й, да тѧ̀ всѝ велича́емъ.

Ѿ рꙋ́къ недосто́йныхъ ма́лое сїѐ пѣ́сней хвале́нїе, приносѧ́щагѡ тебѣ̀, прїимѝ, бл҃же́нне са́вво: не бо̀ возмого́хъ проти́вꙋ твоегѡ̀ вели́чества ᲂу҆краси́ти: но ма́лое сїѐ ꙗ҆́кѡ вели́ко прїимѝ, да тебѐ всегда̀ въ пѣ́снехъ велича́ю.

Бг҃оро́диченъ: Пѣ́нїе съ пѣ́снїю, и҆ хвале́нїе и҆сплете́нное, ѿ болѣ́зненныѧ дꙋшѝ приноша́ю съ любо́вїю, тебѣ̀ ро́ждшей хрⷭ҇та̀, є҆стество́мъ бг҃а, є҆́же благопрїѧ́тнѡ прїе́мши, прошє́нїѧ на̑ша, бцⷣе, и҆спо́лни, и҆ моли́твами твои́ми мѧ̀ соблюдѝ.

Свѣти́ленъ.

Процвѣ́лъ є҆сѝ ꙗ҆́кѡ фі́нїѯъ дв҃дски, ѻ҆́тче, и҆ ѻ҆би́тель ꙗ҆ви́лсѧ є҆сѝ дх҃а прест҃а́гѡ, и҆́же сла́вна тѧ̀ вселе́ннѣй показа̀. того̀ ѡ҆ на́съ непреста́ннѡ молѝ, почита́ющихъ вѣ́рою пречестнꙋ́ю твою̀, прпⷣбне са́вво.

Бг҃оро́диченъ: Тѧ̀ пѣ́сньми немо́лчными ᲂу҆блажа́емъ, дв҃о, ꙗ҆́кѡ трⷪ҇цы є҆ди́наго родила̀ є҆сѝ, бцⷣе, и҆ но́сиши на бжⷭ҇твеннꙋю рꙋкꙋ̀, пребога́тое сло́во, непремѣ́ннѡ и҆ неизмѣ́ннѡ.