Канон святому преподобному Савве Крыпецкому Чудотворцу, Псковскому

Пе́снь 1.

Ирмо́с: Я́ко по су́ху, пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Наста́ви мя́, Го́споди Бо́же мо́й, да возмогу́ благоче́стно уго́дника Твоего́, преподо́бнаго Са́ввы, сла́вное и честно́е восхвали́ти успе́ние.

Му́жески подвиза́вся во пло́ти, преподо́бне о́тче Са́вво, и быстроту́ духо́вную восприи́м, взя́лся еси́ на высоте́ Небе́сней, иде́же ны́не со А́нгелы прославля́ешися. Та́мо и на́с помина́й.

На высоте́ Небе́сней сы́й, преподо́бне, на́м испроси́ от Бо́га благода́ть, и ми́лость, и согреше́нием оставле́ние.

Зако́ны Боже́ственныя соблюда́я, са́м бра́тии твое́й законополо́жник бы́л еси́ и, победи́в ко́зни лука́ваго, то́йжде побе́де и́х научи́л еси́. Моли́твами твои́ми защити́ и на́с от наве́тов сего́.

Богоро́дичен: Пресу́щное Сло́во, естество́ плотско́е прии́м от чи́стых крове́й Твои́х, плотска́го тле́ния на́с изба́ви, Чи́стая. сего́ ра́ди Тя́ при́сно сла́вим.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Вы́спреннею моли́твою, о́тче Са́вво, я́ко крила́ми, возлете́л еси́ к преми́рному наслажде́нию с ли́ки оте́ц, с ни́миже водворя́ешися в неизрече́нней ра́дости Го́спода своего́, на́м же от честны́я своея́ ра́ки чуде́с сия́ния, а́ки луча́, излива́я, сердца́ восхища́еши зову́щих: ра́дуйся, светоно́сне о́тче на́ш.

Вои́стинну блаже́нныя жи́зни сподо́бился еси́, преподо́бне о́тче Са́вво, целому́дрием и поще́нием освяти́в ду́шу и пло́ть свою́, на́с же к славосло́вию тя́ дви́жеши, зову́щих: ра́дуйся, светоно́сне о́тче на́ш.

Я́коже честны́й би́сер твоя́ мо́щи, гро́б и честна́я пе́рсть твоя́ на́м обрето́шася, Са́вво о́тче преподо́бне, шестьдеся́т бо ле́т пребы́вше сокрове́ни, ны́не все́ми ви́димы предлежа́т, разли́чна исцеле́ния неоску́дно подаю́ще. Те́мже вопие́м ти́: ра́дуйся, светоно́сне о́тче на́ш.

Богоро́дичен: Из ложе́сн Твои́х, Пречи́стая, пра́вды Со́лнце, Христо́с, возсия́, Его́же Боже́ственными заря́ми и мое́ окая́нство просвети́, омраче́нное грехи́.

Седа́лен, гла́с 3:

Боже́ственным жела́нием к безсме́ртию воспаря́я, о́тче Са́вво, кресто́м Христо́вым умерщвле́нное те́ло свое́ обрати́л еси́ в нетле́ние, пусты́ню же свою́ гра́д Небе́сный сотвори́л еси́ и, пло́тяных бра́тий собра́в, во ангелоподо́бных претвори́л еси́, с ни́миже сла́вя в Тре́х Ипоста́сех Единосу́щную и Нераздели́мую Тро́ицу, са́м просла́вился еси́. Мы́ же тя́ моли́твенника те́пла стяжа́хом к Бо́гу.

Богоро́дичен: Ми́лости исто́чниче, чистоты́ храни́лище, еди́на Пречи́стая Ма́ти Де́во, чистото́ю А́нгелы превосходя́щи, очи́сти мене́, па́че все́х оскверне́на плотски́ми прегреше́нии, и вку́пе с преподо́бным отце́м на́шим Са́ввою пода́ждь ми́ сле́зы умиле́ния, да омы́юся и́ми, стра́стный, и сподо́блюся Твоея́ ве́лия ми́лости.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста о Го́споде пра́зднующи.

Безме́рное смире́ние восприи́м, к Боже́ственней высоте́ возне́слся еси́, и ны́не, в ра́йских селе́ниих водворя́яся, о́тче Са́вво, помина́й и на́с в моли́твах твои́х.

Благоуха́нный сосу́д яви́лся еси́ Боже́ственному Ду́ху и все́х сердца́ услажда́еши Боже́ственными арома́ты доброде́телей твои́х. Ны́не же, в ра́йских селе́ниих водворя́яся, помина́й и на́с в моли́твах твои́х.

Ста́до твое́, преподо́бне, му́дре упра́вил еси́ и от жи́зни се́й к Небеси́ упа́сл еси́ благоче́стно. Ны́не же, в ра́йских селе́ниих с ни́м водворя́яся, помина́й и на́с в моли́твах твои́х.

Богоро́дичен: Чистоты́ селе́ние, жили́ще Влады́ки все́х, Хода́таице о все́х ми́лостивная, Богора́дованная Де́во Ма́ти Мари́е, пою́щия Тя́ уще́дри.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Бо́дренными бде́нии и ча́стыми воздыха́нии благода́ть Ду́ха возрасте́ в тебе́, о́тче на́ш Са́вво, те́мже сла́вна тя́ показа́ и по преставле́нии.

Благода́ть целе́ния от Бо́га прии́м, о́тче Са́вво, хотя́ща челове́ка я́звою умре́ти и жи́зни отча́явшася, моли́твами ученико́в твои́х к тебе́ о не́м и водо́ю с честны́я твоея́ пе́рсти вско́ре исцели́л еси́.

Боле́зньми зу́бными, и тряса́вицею, и огневи́цею, и беснова́нии, и ра́нами стра́ждущих, я́ко вра́ч преесте́ственный, мгнове́ние врачева́л еси́, исцеля́я и ду́ши от я́звы грехо́вныя.

Богоро́дичен: По рождестве́ Боже́ственнем пребыла́ еси́, Де́во, я́коже пре́жде, Бо́г бо, Тобо́ю рожде́йся, сохрани́ Тя́ непоро́чну. Те́мже: ра́дуйся, Де́во Неневе́стная,— взыва́ем Ти́.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

По́двиги твои́ми духо́вную и теле́сную ни́ву в пусты́ни твое́й возде́лал еси́ и в насыще́ние ду́ш и теле́с бра́тии твое́й кла́сы многопло́дны возрасти́л еси́, и́миже и пита́еши благоче́стно восхваля́ющих тя́ и по твое́м отше́ствии к Бо́гу, Са́вво, преподо́бне о́тче на́ш.

Не́когда, преподо́бне о́тче Са́вво, по преставле́нии твое́м приидо́ша разбо́йницы но́щию ко оби́тели твое́й, хотя́ще озло́бити ученики́ твоя́ и мня́ще восхи́тити сокро́вище некра́домое, ты́ же еди́ным явле́нием свои́м устраши́л еси́ и́х и сокро́вище спасе́ния покая́нием и́м дарова́л еси́ ту́не.

Ка́плями по́тов твои́х, преподо́бне, пусты́ню ороси́л еси́, от ни́хже сия́ процвете́ кри́ны благоуха́нными, услажда́ющими населя́ющия и посеща́ющия ю́ и сла́вящия тя́ при́сно.

Честна́ сме́рть яви́ся пред Тобо́ю блаже́ннаго отца́ Са́ввы, Го́споди вся́ческих, просла́вил бо еси́ его́ пред А́нгелы и челове́ки и оста́нки моще́й его́ исто́чник исцеле́ний ми́ру яви́л еси́.

Богоро́дичен: Преблага́я Влады́чице, Я́же Всеблага́го Бо́га пло́тию ро́ждшая, тле́нное страстьми́ мое́ се́рдце изреши́ сете́й, да ве́рою и любо́вию пою́ и велича́ю Тя́.

Конда́к, гла́с 1:

Возсия́ от пусты́ни сла́вному гра́ду Пско́ву но́вое све́тлое со́лнце, чуде́с луча́ми все́х озаря́ющее и благода́тне согрева́ющее, тьму́ же вся́ких искуше́ний и наве́тов и хла́д грехо́вный отженя́ющее. Прииди́те у́бо, пра́зднующе Блаже́нную па́мять сего́ свети́льника на́шего, воспои́м: сла́ва Бо́гу, та́ко промышля́ющему о на́с, сла́ва уго́днику Его́, сохраня́ющу на́с! Ты́ же, преподо́бне о́тче Са́вво, о и́же твою́ при́сно па́мять почита́ющих моли́ Христа́ Бо́га, я́ко да ми́лостив бу́дет на́м и в Де́нь су́дный.

И́кос:

Всеси́льное Ду́ха Свята́го де́йство и бу́яя ми́ра избира́ет, да прему́дрыя посрами́т, и не́мощная ми́ра, да посрами́т кре́пкая, и худоро́дная ми́ра, и уничиже́нная, и не су́щая, да су́щая упраздни́т, я́ко да не похва́лится вся́ка пло́ть пред Бо́гом, рече́ апо́стол. Си́це блаже́нный на́ш оте́ц Са́вва, не велему́дрствуя, мудре́ц яви́ся мудре́йший ве́ка сего́, немощству́яй, посрами́ кре́пкая, неве́домый ро́дом, превзы́де сла́вою благоро́дных, уничиже́н, превознесе́ся па́че го́рдых и, я́ко ничто́же сы́й в ми́ре, покори́ себе́ су́щая, оста́вив сро́дники своя́ по пло́ти, сниска́ мно́жайшия по ду́ху, покори́вся науче́нию преподо́бнаго Евфроси́на, са́м сравни́ся ему́ во учи́тельстве, удали́вся от ми́ра, ве́сь ми́р привлече́ к себе́, и безпло́дная пусты́ня его́ произрасти́ оби́льную жа́тву спасе́ния все́м. Те́мже пра́зднующе дне́сь пресла́вную па́мять его́, бра́тия и ученицы́, соше́дшеся, возопие́м ему́: о́тче и наста́вниче на́ш, преподо́бне Са́вво, спаса́й на́с при́сно и моли́ Христа́ Бо́га, я́ко да ми́лостив бу́дет на́м и в Де́нь су́дный.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

К све́ту незаходи́мому заше́л еси́, блаже́нне, лучеза́рне же па́ки возше́д, озари́л еси́, я́ко со́лнце, зе́млю Росси́йскую и гра́д Пско́в. Те́мже прославля́юще Бо́га, тобо́ю на́с просвети́вшаго, при́сно пое́м, я́коже и ты́ са́м воспева́л еси́: благослове́н Бо́г оте́ц на́ших.

Чу́дным житие́м, преподо́бне, благода́ть Боже́ственнаго Ду́ха стяжа́л еси́ и, блаже́н бы́в в животе́ свое́м, блаже́нную кончи́ну прия́л еси́ о Христе́, к Нему́же, ра́дующеся о тебе́, тебе́ же подража́юще, взыва́ем: оте́ц на́ших Бо́же, благослове́н еси́.

Неконча́емым блаже́нством с ли́ки святы́х ны́не наслажда́яся, блажи́ши и на́с, преподо́бне, то́ками исцеле́ний от честна́го гро́ба и пе́рсти твоея́. Те́мже, тебе́ я́коже Боже́ственное сокро́вище стяжа́вше, до́ндеже в животе́ есмы́, тебе́ же подража́юще, при́сно вопие́м: благослове́н Бо́г оте́ц на́ших.

Богоро́дичен: Пресвята́я Де́во, Све́та Незаходи́маго, Бо́га ро́ждшая, пою́щия Тя́ прича́стники покажи́ све́та и вся́каго вре́да изба́ви, моля́щися о на́с со отце́м на́шим, при́сно воспева́вшим: благослове́н Бо́г оте́ц на́ших.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Стра́сти душе́вныя и боле́зни теле́сныя врачу́еши, о́тче Са́вво, приступа́ющих к тебе́ от всея́ души́, исцели́ и на́ша неду́ги ду́ш и теле́с, да, тобо́ю сохраня́еми, тя́ превозно́сим во вся́ ве́ки.

Мирска́го и пусты́ннаго диа́вола посрами́вый и победи́вый, огражда́й и на́с при́сно от наве́тов его́ и искуше́ний, да, тобо́ю сохраня́еми, тя́ превозно́сим во вся́ ве́ки.

Чистоты́ и целому́дрия наста́вниче, не обину́лся еси́ воспрети́ти вхо́д и княги́не во оби́тель твою́, сохрани́ и на́с несобла́знены в чистоте́ и целому́дрии, да, тобо́ю сохраня́еми, тя́ превозно́сим во вся́ ве́ки.

Нельсти́вый пропове́дниче покая́ния, жесто́це облича́л еси́ от ми́ра в пусты́ню к тебе́ приходя́щия, наказу́й обличи́тельне и на́ше жестокосе́рдие, да, тобо́ю к покая́нию обраща́еми, тя́ превозно́сим во вся́ ве́ки.

Богоро́дичен: Изба́вльшеся пе́рвыя кля́твы рождество́м Твои́м, Всеблагослове́нная Отрокови́це Богора́дованная, мо́лим: изба́ви на́с и ве́чнаго осужде́ния, да, Тобо́ю избавля́еми, Тя́ превозно́сим во вся́ ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Са́м в пусты́ни посто́м изнури́вый пло́ть свою́ и пе́рвее я́годинами, во И́мя Святы́я Тро́ицы дарова́нными тебе́, пита́выйся, научи́ и на́с посту́ твоему́, блаже́нне, па́че же насыща́й на́с духо́вныя пи́щи.

Спасы́й оби́тель свою́ от нахожде́ния враго́в, испроси́ от Го́спода правосла́вным лю́дем кре́пость на проти́вныя, па́стырем же му́дрость и сове́т проти́ву все́х наве́тов вну́тренних.

Смертоно́сную я́зву теле́сную притека́ющих к свяще́нней ра́це твое́й еди́ным прикоснове́нием и пе́рстию гро́ба твоего́ исцели́вый, уврачу́й смертоно́снейшую я́зву ду́ш на́ших моли́твами твои́ми.

Разбо́йников, зломы́сливших на оби́тель твою́, пощади́вый, и к покая́нию обрати́вый, и спасы́й, пощади́ и на́с, припа́дающих ти́ ве́рою и любо́вию, обрати́в и на́ша ду́ши к покая́нию, и спаси́ моли́твами твои́ми.

Богоро́дичен: Све́том Твои́м мя́, Богора́дованная в жена́х Де́во, просвети́, молю́ся, и огня́ ве́чнаго изба́ви, я́ко да велича́ю Тя́ и по до́лгу воспою́ вели́чия Твоя́.

Свети́лен:

Поревнова́в, блаже́нне, преподо́бному Евфроси́ну и от него́же наста́влен бы́в на духо́вныя по́двиги, с ни́м во свя́тости сравни́лся еси́ и, мно́го ле́т в пусты́ни Кры́петстей потруди́вся в безмо́лвии, посте́, воздержа́нии и в злострада́ниих, ны́не, во све́те Святы́я Тро́ицы водворя́яся, блаже́нствуеши.

Сла́ва, и ны́не: Тя́ пе́сньми немо́лчными ублажа́ем, Де́во, я́ко от Тро́ицы Еди́наго родила́ еси́, Богоро́дице, и носи́ла еси́ на руку́ Боже́ственное Сло́во, Его́же пе́сньми досто́йно с Тобо́ю сла́вим.