Канон святому преподобному Пимену Печерскому, Многоболезненному

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Глубино́ю недоуме́ния содержи́м, молю́ Тя́, прему́дрости глубино́, Иису́се: возведи́ у́м мо́й и подви́гни язы́к восхвали́ти уго́дника Твоего́, Пи́мена, вели́кое терпе́ние.

Во глубине́ безстра́стия стра́сти, преподо́бне, потопи́в, преше́л еси́ мо́ре ми́ра немо́крыми нога́ми, я́ко ни у́м тво́й тиме́нию грехо́вному не прикосну́ся, от него́же и мене́ сохрани́ моли́твами твои́ми.

Во глубине́ сле́з твои́х потопи́л еси́ мы́сленнаго фарао́на, ны́не же в приста́нищи Небе́снем пое́ши пе́снь побе́дную, иде́же и о мне́, преподо́бне, моли́ся.

Богоро́дичен: Во глубине́ зо́л потопля́ему ми́, Влады́чице, пода́ждь ру́ку по́мощи, я́коже Сы́н Тво́й Петро́ви, и приведи́ к приста́нищу спасе́ния.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая, Це́рковь, прише́ствием Твои́м, в не́йже утверди́ся мое́ се́рдце.

Процвела́ е́сть оби́тель Пече́рская преподо́бными отцы́, я́коже вертогра́д благово́нными кри́ны, посреде́ же и́х и ты́, преподо́бне, в житии́ святы́нею, по преставле́нии же нетле́нием кра́сно процве́л еси́.

Процве́л еси́ богоуго́дным твои́м житие́м, я́коже цве́т по́льный, преподо́бне, ны́не же святы́я твоя́ мо́щи в пеще́ре издаю́т благоуха́ние, я́ко кри́н удо́льный, и источа́ют благода́ть с ве́рою притека́ющим.

Кри́н в те́рнии, Пи́мен в терпе́нии боле́зней процвете́ чистото́ю, и́же в ра́йския пресажде́н вертогра́ды, облагоуха́ет на́с ны́не моли́твами свои́ми.

Богоро́дичен: Цве́те благово́нный, Пречи́стая Де́во, отжени́ смра́д греха́ моего́ и яви́ мя́ благоуха́ние Христо́во моли́твами Твои́ми.

Седа́лен, гла́с 2:

Сильне́е бе́ моли́тва твоя́, свя́те, к Бо́гу, егда́ отцы́ Пече́рстии о исцеле́нии твое́м моля́хуся, ты́ же приложе́ния боле́зней себе́ у Го́спода проси́л еси́ и преодолева́ше моле́ние твое́ еди́наго все́х мольбы́. Ве́руем у́бо, я́ко и ны́не мно́го мо́гут святы́я твоя́ моли́твы.

Богоро́дичен: Мно́го мо́жет моли́тва Ма́терняя на умоле́ние Влады́ки, моли́ у́бо Его́ о на́с, Де́во Ма́ти, и печа́ль на́шу возвести́ Ему́, да, послу́шав Тя́, ми́лостив на́м бу́дет, и печа́ль в ра́дость претвори́в, пода́ст живо́т ве́чный.

Пе́снь 4.

Ирмо́с: Пою́ Тя́, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Пе́ти и сла́вити Бо́га досто́йно, пода́ждь на́м о́тче преподо́бне, моли́твами твои́ми, да всегда́ ублажа́ем тя́.

Пе́ния а́нгельская в полу́нощи слы́шаша бли́з су́щии отцы́, егда́ в ри́зу тя́ спасе́ния облека́ху. И на́с у́бо а́нгельских пе́ний наслажда́тися сподо́би хода́тайством твои́м, блаже́нне.

Пою́ тебе́, о́тче, усе́рдно, ублажа́ю преподо́бие твое́, велича́ю незло́бие и кро́тость твою́, хвалю́ терпе́ние, удивля́юся нетле́нию твоему́ и покланя́юся целе́бным моще́м твои́м.

Богоро́дичен: Певцы́ Твоя́ спаси́, о Всепе́тая Ма́ти, пла́ча ве́чнаго избавля́ющи, ми́лостию Твое́ю отри́ вся́ку сле́зу от о́чию мое́ю и ра́дости ве́чныя сподо́би.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Хода́тайством твои́м, свя́те, от вся́каго наве́та вра́жия соблюда́й оби́тель, в не́йже са́м богоуго́дне пожи́л еси́, и и́ночествующим помо́щник бу́ди, на твоя́ бо моли́твы упова́ем.

Хода́тай бу́ди мне́ к Пра́ведному Судии́, блаже́нне: е́смь бо неради́в, я́коже о́ный схи́мник, его́же бра́тии при кончи́не свое́й показа́л еси́, и́же о́браз вели́к име́яше, де́ла же ни ма́ла. Сего́ ра́ди схи́ма его́ нетле́нна на обличе́ние и осужде́ние ему́ блюде́тся.

Хода́тайствуй ми́ спасе́ние отча́янному, блаже́нне, наста́ви на покая́ние гре́шнаго, преподо́бне, пода́ждь исправле́ние развраще́нному, о́тче, да не постыжду́ся, наде́яся на твоя́ моли́твы.

Богоро́дичен: Хода́таице ко Творцу́, Пречи́стая Де́во, всего́ мя́, грехми́ оскверне́ннаго, очи́сти моли́твами Твои́ми, на Тя́ бо все́ упова́ние мое́ возлага́я, не постыжду́ся во ве́к.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

В бе́здне злы́х ве́сь ми́р лежи́т, сего́ ра́ди отве́рглся еси́ его́, да Благо́му благоугожда́еши Бо́гу; Ему́же благоугоди́ти и мене́ сподо́би, уго́дниче Бо́жий.

В бе́здне боле́зней тя́жких лежа́, мно́гажды от служа́щих небрего́мый и оставля́емый бы́в, Бо́га то́чию посеща́ющаго тя́ име́л еси́; не оста́ви на́с, о́тче, присеще́нием моли́тв твои́х, я́ко вы́ну боле́знуем.

В бе́здну а́дскую мно́жества ра́ди грехо́в мои́х да не осужде́н бу́ду; ты́, о́тче, Пра́ведному Судии́ предста́ни и умоли́ Его́, да изба́вит мя́ пра́веднаго суда́ Своего́.

Богоро́дичен: Я́ко бе́здну ми́лости ро́ждшая, от бе́здны безме́рных беззако́ний мои́х исхи́ти мя́, милосе́рдия Ма́ти, молю́ся Ти́.

Конда́к, гла́с 6:

Долговре́менную боле́знь благода́рне претерпе́вшаго, прииди́те, соше́дшеся, восхва́лим Пи́мена многотерпели́ваго, и́же бо иногда́ за смра́д в боле́зни бе́ гнуша́емь, се́й ны́не благоуха́ние испуща́ет, с ве́рою к ра́це моще́й его́ приходя́щим, и прого́нит злосмра́дие страсте́й от вопию́щих: прииди́, Пи́мене, к на́м, и ничто́же успе́ет вра́г на ны́.

И́кос:

Вси́, и́же разли́чными боле́зньми и страстьми́ одержи́мии, соше́дшеся к многоболе́зненному Пи́мену, почуди́теся терпе́нию его́: то́й бо, мно́гажды гла́ден и жа́жден пребы́в, не поскорбе́ на служа́щих ему́, но с ра́достию вся́ терпя́ше, благодаря́ Бо́га; два́десять же ле́т в страда́нии свое́м препроводи́в, я́ко зла́то в горни́ле искуси́ся, и обре́теся досто́ин Бо́гови, и прия́т от Него́ да́р цели́ти неду́ги и прогоня́ти стра́сти от притека́ющих к нему́ с ве́рою. К тому́ у́бо и мы́ притеце́м и того́ призове́м, вопию́ще: прииди́, Пи́мене, к на́м, и ничто́же успе́ет вра́г на ны́.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть, Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

Богопроти́внаго ми́ра возненави́дел еси́, о́тче, ве́дый Глаго́лющаго: хотя́й бы́ти ми́ру дру́г, вра́г Бо́жий быва́ет. Пода́ждь у́бо и на́м бе́гати ми́ра и все́х его́ по́хотей.

Богопроти́вный зако́н зла́го моего́ обы́чая ну́ждею влече́т мя́ на дела́ зла́я, и не е́же хощу́, сие́ творю́, но е́же не хощу́, сие́ содева́ю. Ты́ у́бо, преподо́бне, моли́твами твои́ми от того́ мя́ зла́ свободи́.

Богопроти́вное веле́ние ца́рствующаго греха́ во удесе́х мои́х принужда́ет мя́ ча́сто прогне́вати Бо́га, к тебе́ прибега́ю, о́тче, от ну́ждных мя́ грехо́в изба́ви.

Богоро́дичен: Бо́га ро́ждшая, Де́во, да́ждь на́м испо́лнити повеле́ния Сы́на Твоего́, и да ни в че́м же проти́вни Ему́ обря́щемся по́мощию Твое́ю.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Пе́щь страсте́й да угаси́ши, о́тче, умноже́ния боле́зней от Бо́га проси́л еси́, в ни́хже прохла́да тебе́ бы́сть, о́тче, чистота́ душе́вная и теле́сная, ю́же и на́м храни́ти моли́твами твои́ми да́ждь, да с тобо́ю Пречи́стому Бо́гу пое́м: благослови́те, вся́ дела́ Госпо́дня, Го́спода.

Пе́щь многоле́тных боле́зней а́ще опаля́ше ти́ те́ло, но святы́я души́ твоея́ ничи́мже вреди́ти можа́ше: во все́х бо си́х приклю́чшихся не согреши́л еси́, но посреде́ искуше́ний, а́ки посреде́ пла́мене, неопали́м пребыва́я, со о́троки воспева́л еси́: благослови́те, вся́ дела́ Госпо́дня, Го́спода.

А́ки в пещи́, в пло́ти мое́й возжего́х о́гнь по́хотей и умно́жих нечистоты́ пла́мень невоздержа́нием мои́м; Ты́, о́гнь пояда́яй, Бо́же, прохлади́ пла́мень, угаси́ о́гнь и ороси́ пе́щь страсте́й мои́х моли́твами уго́дника Твоего́, Пи́мена, да с ни́м Тебе́, в Тро́ице сла́вимому Бо́гу, пою́: благослови́те, вся́ дела́ Госпо́дня, Го́спода.

Богоро́дичен: Пе́щь иногда́ о́гненная, отроко́в неопали́вшая, прообрази́ рождество́ Твое́, Пречи́стая: О́гнь бо заче́нши Боже́ственный, пребыла́ еси́ неопали́ма, и а́з у́бо молю́ Тя́, о Влады́чице, неопали́ма мя́ соблюди́ от огня́ сопроти́внаго, да, ра́дуяся, пою́ Ти́: вся́ дела́ Госпо́дня, Госпожу́ Богоро́дицу по́йте и превозноси́те, прославля́юще пресвято́е и́мя Ея́ во ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Безнача́льне Роди́телю, приво́дим Ти́ в моли́тву уго́дника Твоего́ Пи́мена, и́же от нача́ла и́ночества своего́ все́ю душе́ю возлюби́ Тя́, и все́ю кре́постию порабо́та Тебе́; при́зри на его́ по́двиги, и те́х ра́ди послу́шай о на́с его́ моле́ния, и благи́й коне́ц да́руй на́м.

Собезнача́льный Отцу́ и Ду́ху, Сы́не, представля́ем Ти́ в моли́тву блага́го и ве́рнаго раба́ Твоего́ Пи́мена; при́зри на его́ многоле́тныя и тя́жкия боле́зни, и те́х ра́ди послу́шай о на́с его́ моле́ния, и ми́лостив на́м бу́ди.

Соприсносу́щный Отцу́ и Сы́ну, Ду́ше Святы́й, предлага́ем Ти́ усе́рдныя моли́твы Пи́мена блаже́ннаго, того́ послу́шай, и на́с, его́ ра́ди, поми́луй.

Богоро́дичен: Ма́ти Бо́жия, с блаже́нным Пи́меном и со все́ми преподо́бными отцы́ Пече́рскими, Бо́гу угоди́вшими, моли́ Пресвяту́ю и Неразде́льную Тро́ицу поми́ловати рабы́ Своя́, Тя́ при́сно сла́вящия.

Свети́лен:

Черто́г Спа́сов отве́рст тебе́, преподо́бне Пи́мене, и́маши бо бра́чну а́нгельскаго о́браза от А́нгел на тя́ возложе́нную оде́жду, в не́йже вше́д на бра́к А́гнчий, не забу́ди на́с, тя́ почита́ющих.

Сла́ва, и ны́не: Черто́же нескве́рный, Пречи́стая Де́во, на́с, одея́ния бра́чнаго неиму́щих, покры́й честно́ю ри́зою Твое́ю и введи́ в Черто́г Небе́сный.