Канон святому преподобному Николе Святоше, князю Черниговскому, Ближние пещеры

Пе́снь 1.

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Отве́рзи мне́ устне́, Христе́ мо́й, посли́ Паракли́та, да Твоего́ уго́дника пе́ти возмогу́ стихосло́вии высоту́ доброде́телей, на ню́же в чистоте́ се́рдца смире́нием взы́де.

В пра́вду наре́клся еси́ Свято́ша: испо́лнь бо сы́й святы́ни, вся́каго непреподо́бнаго де́йства удали́лся еси́, и к Богови́дению у́м сво́й впери́в, отту́ду позна́л еси́ вся́, я́же в ми́ре су́етная бы́ти.

Пре́жде тебе́ бы́вших помяну́л еси́, от коли́кия сла́вы напра́сно отпадо́ша, и с безче́стием пожа́т се́рп сме́рти; сего́ ты́ да изба́вишися, престо́л на земли́ кня́жий оста́вил еси́, и прия́л еси́ на Небеси́ престо́л, и́же пребыва́ет вы́ну со святы́ми.

Блаже́нному Иоаса́фу Инди́йскому поревнова́л еси́: я́коже бо то́й оста́ви ца́рство земно́е и взыска́ Небе́сное, та́ко и ты́, блаже́нне, вре́менное княже́ние оста́вль, прия́л еси́ ве́чное.

Богоро́дичен: Вы́шняго Ца́рствия не лиши́ мя́, Небе́сными и земны́ми Влады́чествующая Госпоже́, сего́ бо ища́, удаля́юся, облада́ем вою́ющими всегда́ на мя́ страстьми́, оба́че к Тебе́ несумне́нною наде́ждою прибега́ю.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве, венце́в сла́вы сподо́би.

Ра́б Еди́ному Бо́гу да бу́деши, не восхоте́л еси́ рабо́тати ми́ру, от него́же изше́д, а́ки вторы́й Авраа́м, до́м и зе́млю свою́ оста́вил еси́ и прише́д, а́ки в Харра́нь, в пречестну́ю Бо́жия Ма́тере Пече́рскую оби́тель, ви́дел еси́ ле́ствицею дея́ния и ве́дения блаже́нных оте́ц к Небеси́ восходя́щих.

Господи́н сы́й иногда́ княже́нию своему́, за любо́вь Го́спода своего́ сотвори́лся еси́ ра́б, служа́ рабо́м Христо́вым в пова́рни, да бы́вшему на́с ра́ди Послушли́ву до сме́рти после́дуеши.

Порфи́рою оде́ян и в руце́ име́яй ски́петр, не устыде́лся еси́ на ра́менах дрова́ носи́ти и сещи́ рука́ма свои́ма; да вся́ у́ды в порабоще́ние преда́си Вы́шнему Влады́це, от Него́же возме́здие прия́л еси́ живо́т ве́чный.

Мирсти́и мирска́я му́дрствующе, бра́тия твоя́, блаже́нне, мня́ху дея́ние твое́ в пова́рне безче́стно бы́ти, те́м и развраща́ху тя́, да оста́виши сие́. Но ты́, любя́ послуша́ние сие́, еще́ еди́но ле́то испроси́л еси́ себе́ в то́м пребыва́ти.

Богоро́дичен: За́поведем Го́спода моего́ не повину́ющася, ни храня́щаго послуша́ния уста́вы, убеди́ мя́, Влады́чице моя́, к де́ланию те́х и укрепи́ в про́чее вре́мя в обои́х соверше́нно испра́витися, да не в ле́ности сконча́вся, с непотре́бными рабы́ ка́знь прииму́ по дело́м.

Седа́лен, гла́с 8:

Я́ко и́стиннаго послу́шателя Ева́нгельскаго сло́ва, и и́ноков люби́теля, и ревни́теля преподо́бным, прииди́те, бра́тие, пе́сненными хвала́ми воспое́м блаже́ннаго Нико́лу: то́й бо те́ло свое́ порабо́ти Бо́гу, да ду́шу свободи́т от страсте́й, и а́ки со́лнце, возсия́в луча́ми доброде́телей свои́х, все́х на́с озаря́ет, пою́щих: сла́ва Бо́гу, призыва́ющему рабы́ Своя́ в ве́чное спасе́ние.

Богоро́дичен: Вы́шняго мя́ граждани́на покажи́, Чи́стая Де́во, прибега́ющаго к Твоему́ покро́ву и прося́щаго от Тебе́ те́плаго заступле́ния, я́ко, да Тобо́ю обре́т благода́ть, воспою́: сла́ва Бо́гу, спаса́ющему ро́д челове́ческий.

Пе́снь 4.

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Седя́й во сла́ве пре́жде на престо́ле и вельмо́жам предстоя́щим ти́, не устыде́лся еси́, блаже́нне, седе́ти при врате́х монасты́рских три́ ле́та, я́ко ве́рно храня́й си́х вхо́д от безде́льно влазя́щих.

Председя́щу ти́ пе́рвее на трапе́зе любопи́щней и мно́гим рабо́м служа́щим я́ко влады́це, не возгнуша́лся еси́ последи́, свя́те, ра́б бы́ти рабо́м Христо́вым, те́м служа́ и представля́я бра́шна от Бо́жияго дарова́ния.

Я́коже степе́ньми на высоту́ мирски́я сла́вы возше́дши, и́мут упокое́ние по труде́х, та́ко и ты́, преподо́бне, сове́том игу́мена и бра́тии вся́ послуша́ния чи́ны проше́д, принужде́н с ми́ром в ке́ллии безмо́лвствовати и внима́ти спасе́нию своему́.

Я́ко трудолюби́вый ра́б, умножа́я Влады́це своему́ тала́нт, не да́л еси́ упокое́ния многотру́дному твоему́ те́лу, но рука́ма свои́ма насади́л еси́ вертогра́д; и ви́деша бра́тия трудо́в твои́х плоды́.

Богоро́дичен: Леня́щася мя́, на доброде́тели пону́ди, Богоро́дице, и да́ждь ми́ вертогра́д душе́вный мы́сленными древесы́ насади́ти, слеза́ми умиле́ния напая́ти, и принести́ Влады́це моему́ стори́чный пло́д, да и а́з с ве́рными рабы́ Его́ прииму́ от руку́ Его́ мзду́ трудо́в мои́х.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Дивля́хуся вси́ трудолю́бию твоему́, блаже́нне, я́ко никогда́же ви́ден бы́л еси́ пра́зден, но в рука́х де́ло, в усте́х же име́л еси́ вы́ну моли́тву Иису́сову и се́ю отрази́л еси́ бе́са, празднолю́бием напа́дающаго.

Да пи́щи Небе́сныя прича́стник бу́деши, сластолю́бия отве́рглся еси́: ничто́же бо ядя́ше, кроме́ от ово́щия монасты́рскаго ма́ло, и та́ко соблю́л еси́ чистоту́ души́ и те́ла.

По мно́гих твои́х по́стнических труде́х прия́л еси́ от Бо́га да́р еди́нем сло́вом неду́ги исцеля́ти и посо́бствовати в ско́рбех. Молю́ся ти́, и мене́ от одержа́щаго неду́га в здра́вие премени́ ско́ро.

Многоплете́нными сетьми́ тща́ся вра́г отврати́ти Боголюби́вую ду́шу твою́ от до́браго трудолю́бия пути́, наусти́ не́когда служа́щаго тебе́ врача́; ты́ же, свя́те, увеща́нием увеща́л еси́ того́, я́ко да не тебе́, но своему́ спасе́нию внима́ет.

Богоро́дичен: Се́рдцем и душе́ю разврати́хся, и отве́ргшися да́нныя ми́ благода́ти, в неподо́бныя хожду́ пути́, но, пре́жде да́же не впаду́ в ру́це враго́м, Ты́, Ма́ти Бо́жия, упра́ви мя́ на пе́рвое блаже́нство: овча́ бо е́смь спасе́нныя Твоея́ огра́ды.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те рука́ми воспле́щем, от Нея́ ро́ждшагося Бо́га сла́вим.

Боже́ственным жела́нием к Бо́жией любви́ устреми́вся, вся́ находя́щия ти́ ско́рби, блаже́нне, сла́дце терпе́л еси́, разсужда́я рече́нное: я́ко недосто́йны су́ть стра́сти ве́ка сего́ к хотя́щей яви́тися в на́с сла́ве.

Увещава́ющему тя́ Петру́ врачу́ от трудо́в и́ноческих преста́ти, целому́дренно отвеща́л еси́ мно́гажды, свя́те: преста́ни, отвраща́я мя́ от сицева́го начина́ния, ни ско́рбь бо, ни гла́д, ни теснота́ отлучи́т мя́ от любве́ Христо́вы, ея́же ра́ди терплю́ вся́ находя́щая на мя́.

Да во Христе́ Живо́т Ве́чный обря́щеши, умертви́л еси́ те́ло твое́ мно́гим воздержа́нием и трудо́м и не лиши́лся еси́, его́же жела́л: се́ бо ны́не живе́ши со святы́ми во дво́рех Небе́сных.

Еди́наго име́я врача́ Христа́, никогда́же попусти́л еси́ себе́ в боле́зни врачева́ти, но глаго́лал еси́ со Апо́столом: мне́ е́же жи́ти Христо́с, а е́же умре́ти приобре́тение; и си́м сло́вом са́м сво́й неду́г исцеля́л еси́.

Богоро́дичен: Изнемо́гшую мою́ ду́шу от грехо́в мно́гих, посеще́нием Твои́м исцели́, Госпоже́, и водо́ю благода́ти Твоея́ напо́й мя́, да свобо́дь сы́й душе́вных и теле́сных неду́гов, порабо́таю Тебе́, Влады́чице мое́й, со усе́рдием всегда́.

Конда́к, гла́с 8:

Вся́ кра́сная ми́ра сего́ и тле́нное бога́тство нивочто́же вмени́в, обогати́лся еси́ мно́гими чудесы́ и зна́мении от Христа́ Бо́га, Ему́же в весе́лии предстоя́, помина́й на́с, чту́щих любо́вию па́мять твою́, да зове́м ти́: ра́дуйся, Нико́ло пречу́дне.

И́кос:

А́нгельски на земле́ пожи́вша и со А́нгельскими чи́нми ны́не све́тло на Небесе́х лику́юща, тя́, блаже́нне, си́ми ублажа́ем пе́сньми: ра́дуйся, ро́да све́тлость и княже́ние презре́вый; ра́дуйся, бога́тство и сла́ву тще́тную попра́вый; ра́дуйся, ни́щ и убо́г, вся́ оста́вль, Го́сподеви после́довавый; ра́дуйся, го́рдость низложи́вый и смире́нию прилежа́вый; ра́дуйся, вся́ послуша́ния монасты́рская проше́дый; ра́дуйся, в те́х со вся́ким смире́нием пребы́вый; ра́дуйся, пова́рства и вра́тарства невозгнуша́выйся; ра́дуйся, бра́тий твои́х, князе́й, отверги́йся сожи́тельства; ра́дуйся, са́м от не́мощи возмоги́й и врача́ исцели́вый; ра́дуйся, спасе́ние враче́ви моли́твами твои́ми исхода́тайствовавый и свою́, и о́наго сме́рть прозре́вый; ра́дуйся, бра́ту твоему́ по уме́ртвии твое́м исцеле́ние пода́вый; ра́дуйся, все́м те́пле тя́ призыва́ющим чу́дный и ско́рый помо́щниче; ра́дуйся, Нико́ло пречу́дне.

Пе́снь 7.

Ирмо́с: Не послужи́ша тва́ри Богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

От коли́кия сла́вы преше́л еси́, кня́же, глаго́лаше ти́ Пе́тр, и укоря́ше тя́, блаже́нне, я́ко все́м рабо́таеши и сме́тищу приседи́ши, но ты́ отвеща́л еси́ ему́: не погуби́х че́сти моея́, па́че же си́м прославля́юся, после́дуя все́м прише́дшему послужи́ти Христу́, Ему́же и зову́, благослове́н Бо́г оте́ц на́ших.

Тебе́ хотя́й в боле́зни Пе́тр уврачева́ти, са́м разболе́ся, его́же не зе́лием, но моли́твою исцели́л еси́ и наказа́л того́ не наде́ятися на враче́бную хи́трость, но то́кмо на Бо́га упова́ти, зову́щи: препе́тый отце́в Бо́же, благослове́н еси́.

Послуша́ние твое́ у вра́т скончава́я, прови́дел еси́, свя́те, по трие́х ме́сяцех и живота́ твоего́ кончи́ну, те́м призва́л еси́ Петра́ и увещава́л еси́, да восприи́мет зде́ и́ноческий о́браз и вме́сто тебе́ послу́жит Бо́гу, И́же е́сть благослове́нный во ве́ки.

Измене́ние жи́зни твоея́ слы́шав Пе́тр, припаде́ со слеза́ми к нога́м твои́м, преподо́бне, рыда́ющи, я́ко лиша́ется господи́на своего́; ты́ же воздви́г его́, утеша́л и увещава́л еси́ не скорбе́ти о се́м, но зва́ти: благослове́н Бо́г оте́ц на́ших.

Богоро́дичен: Измене́ния жи́зни моея́ скве́рных ра́ди де́л не иму́ща, кто́ мя́ не воспла́чет, отхожду́ бо в пу́ть неве́дом. От пути́ за́поведей Сы́на Твоего́ уклони́хся, те́мже, слезя́, призыва́ю Тя́, Влады́чице, скажи́ мне́ пу́ть, и пойду́ во и́стине, поя́: Препе́тая еси́, Богоро́дице, и Благослове́нная от ро́да в ро́д.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Благочестному́дренне пожи́в и при́сно прови́дя исхо́д сво́й, преподо́бне Нико́ло, са́м себе́ угото́вал еси́ ме́сто во святе́й пеще́ре, е́же Петру́ на моле́ние его́ дарова́л еси́, глаго́ля: бу́ди тебе́, а́ще хо́щеши и я́коже Госпо́дь восхо́щет, превозноси́мый во ве́ки.

Дерзнове́ние име́яй к Бо́гу и упова́ние по ве́ре непоколеби́мо, прия́л еси́ прозре́ния да́р, и́мже уве́дав по трие́х дне́х отше́ствие Петро́во к Бо́гу, повеле́л еси́ тому́ угото́витися к сицево́му исхо́ду; о́н же по словеси́ твоему́ Свята́я Святы́х прие́м, оты́де ра́дуяся и поя́: превозноси́мый Бо́г во ве́ки.

Три́десят ле́т по сме́рти врача́ свя́то пожи́в и ве́рно Го́сподеви порабо́тав, стори́чныя израсти́л еси́ плоды́, с ни́миже отше́л еси́, блаже́нне, ко святы́х Святе́йшему Го́споду Иису́су, поя́ и превознося́ Его́ во ве́ки.

Твое́ сла́вное и честно́е успе́ние лю́дие слы́шаще, стеко́шася от всего́ гра́да, да́ти тебе́ после́днее целова́ние и погребо́ша тя́ со слеза́ми, несе́ннаго с ра́достию А́нгелов на ло́но Авраа́мле, да та́мо со все́ми святы́ми предстои́ши Го́сподеви во ве́ки.

Богоро́дичен: Жи́знь вре́менная скончава́ется, увы́ мне́! ка́мо несе́н бу́ду, все́х челове́к окая́ннейший: Судия́ жде́т, Кни́ги разгну́шася и по дело́м мои́м злы́х ча́сть насле́дити ми́ е́сть изве́стно; но пре́жде да́же не отыду́ отсю́ду со уго́дником Твои́м Нико́лою, моли́ся, Госпоже́, Сы́ну Твоему́ благи́х ча́сти мне́ насле́дити.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́ем, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Вся́к от земноро́дных да подража́ет житию́ Богохва́льнаго отца́, то́й бо сла́ву вре́менную на земли́ презре́л, и во сла́ву ве́чную преше́д, ны́не ра́дуется, име́яй престо́л недви́жим в Небе́сных селе́ниих, иде́же и о на́с мо́лит, да бу́дем насле́дницы блаже́нныя жи́зни.

Вся́к, любя́й Мя́, Мне́ после́дует, да бу́дет со Мно́ю. Сия́ Ева́нгельская внуши́в словеса́, преблаже́нный Свято́ша, возлюби́в Бо́га, Тому́ после́дова и ничто́же па́че Того́ любве́ стяжа́ в ми́ре, те́мже ны́не живе́т со Христо́м в Све́те непристу́пнем.

Реки́й: прославля́ющаго Мя́ просла́влю,— испо́лни обеща́ние на тебе́, свя́те; не то́кмо бо тя́ просла́ви сама́го дароноше́ньми, но и кре́ст тво́й, возгла́вница и власяни́ца сла́вятся от бра́та твоего́ и воспомина́ются да́же досе́ле, я́ко сла́вная от ни́х сотвори́шася.

От ро́да в ро́ды па́мять твоя́ сла́вится, преподо́бне о́тче: труды́ же и по́двиги твоя́ хва́лит Це́рковь с на́ми, но и мо́щи твоя́, содержа́щияся во святе́й пеще́ре, явля́ет ра́ка и созыва́ет все́х моли́ти тя́ ны́не я́ко те́плаго предста́теля и засту́пника в неможе́нии на́шем.

Богоро́дичен: От все́х племе́н сла́вимая и почте́нная от Тро́ицы Пресвяты́я, на́м, в пе́снех хва́лящим Тя́, Чи́стая Де́во, Предста́тельница бу́ди и Засту́пница ско́рая от вра́жиих наве́т, да вы́ну пое́м ти́: ра́дуйся, Богоро́дице Присноде́во.

Свети́лен:

Хра́м Ду́ха Пресвята́го бы́л еси́, и, прише́д Оте́ц с Сы́ном, оби́тель в тебе́ сотвори́, и те́м Боже́ственных прича́стием ра́йскаго тя́ граждани́на показа́; в не́мже ны́не от Разу́мнаго дре́ва пита́яся и нетле́нныя сла́вы наслажда́яся, помяни́ и на́с, ве́рою кла́няющихся ра́це моще́й твои́х, о́тче преподо́бне.

Сла́ва, и ны́не: Хра́м пречи́стый вопло́щшемуся из Тебе́ Сло́ву была́ еси́, Де́во; хра́м мя́ вся́каго беззако́ния су́ща, сотвори́ хра́м узаконе́нных повеле́ний Сы́на Твоего́ предста́тельством Твои́м, да селе́ние Бо́жия благода́ти бы́в, досто́йно воспою́ Тя́, я́ко вся́ о Бо́зе могу́щую, Богоотрокови́це.