Канон святому преподобному Моисею Угрину

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Гряди́те, лю́дие, принесе́м хвале́ние Бо́гу, прославля́ющему уго́дника Своего́ и показа́вшему того́ во все́х искуше́ниих непреодоле́нна, и воспои́м Ему́ пе́снь: сла́вно просла́вися.

Наве́д вра́г всезло́бный на господи́на твоего́, блаже́ннаго кня́зя Бори́са, сме́рть окая́нным братоуби́йцею, и тебе́ с ни́м восхоте́ погуби́ти, но ты́, спасе́н от злы́х, воспе́л еси́: сла́ва Бо́гу о все́м, бу́ди И́мя Госпо́дне благослове́нно.

Руко́ю Бо́жиею спасе́н бы́в от сме́рти, прише́л еси́ в Ки́ев к Предисла́ве, сестре́ Яросла́вли, иде́же жа́лостию по господи́не свое́м одержи́м, сказа́л еси́ о не́м вся́, ели́ко пострада́, а́ки а́гнец безгла́сен, не проти́вяся предаде́ себе́ в ру́це и́щущих его́ кро́ве, и пе́л еси́: Бо́г на́ш сла́вно просла́вися.

Вре́мя не́кое стра́ха ра́ди сокры́лся еси́, преподо́бне, челове́ческое по себе́ показу́я, до́ндеже откры́ тя́ Госпо́дь, а́ки свети́ло, все́м те́сный пу́ть теку́щим во о́браз, его́же мно́гими искуше́нии чи́ст соблю́л еси́, поя́: Бо́же мо́й, в немощне́й пло́ти мое́й сла́вно просла́вися.

Богоро́дичен: Вся́ могу́щая о Бо́зе, Цари́це, предста́ни ско́ро мольбу́ Тебе́ принося́щим и ви́ждь, коли́ко воста́ша на ны́ душеуби́йцы, и́хже стрела́ми си́лы Твое́я до конца́ погуби́, да непреста́нно Тебе́ вопие́м: я́ко вели́ко и стра́шно враго́м на́шим и́мя Твое́, сла́вно просла́вися.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся́ ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

На тве́рдем ка́мени ве́ры душе́вная чу́вства твоя́ утверди́в, ше́л еси́ в пле́н, упова́ние име́я на Еди́наго, тяжча́йшия ра́ны и кре́ст претерпе́вшаго Иису́са, я́ко То́й изба́вит тя́ от се́ти ловца́; те́мже на вся́ком ме́сте пе́л еси́: не́сть пра́веден, па́че Тебе́, Го́споди.

Тя́жкими по ру́ку и по но́гу обложе́н желе́зы и пятоле́тнюю пре́жде подъе́м тесноту́, не разби́лся еси́ умо́м, но, несвя́зан име́яй язы́к, о все́х приклю́чшихся на ме́стех благодари́л еси́ Бо́га, поя́: пра́ведно вся́ сия́ наве́л еси́ на мя́, не́сть бо пра́ведника, па́че Тебе́, Го́споди.

Кра́сна тя́ лице́м, светле́йша же душе́ю ви́дящи во у́зах, не́кая ю́на от благоро́дных же́н вдови́ца стрело́ю любве́ твоея́ уязви́ся и прельща́ше тя́ мно́го, свя́те; ты́ же е́й отвеща́л еси́: ника́коже во́ли твое́й повину́ся, я́ко Бо́г изво́ли та́ко, Ему́же пою́: не́сть пра́веден, па́че Тебе́, Го́споди.

Красоте́ твое́й теле́сней, наипа́че же целому́дренным словесе́м любоде́йца чудя́щися, мно́жицею покуша́шеся ласка́тельными свои́ми словесы́ улови́ти тя́, но ты́, блаже́нне, тверде́йший име́яй ра́зум, му́дре глаго́лал еси́: кто́, когда́, послу́шав жены́, спасе́ся? И взыва́л еси́ к Бо́гу: спаси́ мя́, Бо́же, от напа́сти сея́, не́сть бо пра́веден, па́че Тебе́, Го́споди.

Мно́жицею прельще́нии належа́щей жене́ скве́рней, мно́жицею отвещава́л еси́: иску́плен сы́й кро́вию Христа́ моего́, ника́коже ра́б жене́ безсту́дней сотворю́ся, ея́же не позна́х от рожде́ния моего́, и не бу́ди ми́ погуби́ти труда́ во у́зах си́х, и́хже ра́ди упова́ю избы́ти ве́чных у́з, а́ще пребу́ду та́ко, терпя́ и благода́рне поя́: не́сть пра́веден, па́че Тебе́, Го́споди.

Богоро́дичен: Плени́цами лю́тых грехопаде́ний от врага́ мя́ уловле́нна и в темни́це омраче́ния у́мнаго затворе́нна ви́дящи, Влады́чице, разреши́ вско́ре Твои́м предста́тельством, луча́ми же благосе́рдия Твоего́ просвети́ у́м мо́й и обрати́ пе́ти: не́сть ины́я скоре́йшия в по́мощь, ра́зве Тебе́, Святе́йшая Мари́е Де́во.

Седа́лен, гла́с 5:

Огне́м красоты́ твоея́ любоде́йца вы́ну опаля́ющися, на лука́вый сове́т устреми́ся, помы́сли бо, а́ще тя́ цено́ю у плени́вшаго иску́пит, удо́бь во́ли свое́й преклони́ти возмо́жет; ты́ же, преподо́бне, имы́й стра́х Бо́жий в се́рдце, непреста́нно взыва́л еси́: спаси́ мя́, Бо́же, от такова́го неи́стовства, к Тебе́ бо, Влады́це моему́, прибега́ю.

Богоро́дичен: О́гнь Боже́ственный неопа́льно в пречи́стое чре́во прие́мшая, огне́м мя́ страсте́й вы́ну пали́ма, ороси́ поне́ ка́плею благода́ти Твоея́, Госпоже́, да непреста́нно пою́: спаси́ мя́, я́ко к Тебе́, Влады́чице моя́, прибега́ю.

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м, Го́споди, вопло́щся, и спа́сл еси́ всего́ мя́, челове́ка. Те́м зову́ Ти́: сла́ва си́ле Твое́й, Го́споди.

Прише́дши жена́, стра́стию плене́на, к плени́вшему тя́, блаже́нне, даде́ це́ну за тя́ и, пое́мши, разреши́, хотя́щи грехо́вными у́зы связа́ти ду́шу твою́, но ты́, кресто́м себе́ огради́в, ше́л еси́ в до́м тоя́, псало́мски поя́: а́ще пойду́ посреде́ се́ни сме́ртныя, не убою́ся зла́, я́ко со мно́ю Бо́г, Его́же си́ле сла́ва бу́ди.

Влады́це твоему́ уподо́бился еси́, я́коже бо Того́, купи́вше, иуде́е на стра́сть гото́вяху, та́ко и тебе́ скве́рная любоде́йца гото́вяше, а́ще души́ твоея́ не урани́т страстьми́, то́ те́ло страда́нием обложи́т. Ты́ же лу́чше те́лом изво́лил еси́ страда́ти, не́жели душе́ю, поя́: сла́ва си́ле Твое́й, Го́споди.

Разжже́ния стра́стнаго в те́ле твое́м да не ощути́ши, вся́кую сла́стную пи́щу и мя́гкия ри́зы отри́нул еси́ от тебе́, вме́сто же о́нех в по́ст и моли́тву обле́кл еси́ себе́, изволя́я хле́б су́х и во́ду с чистото́ю, не́жели разли́чная бра́шна и вино́ со скве́рною я́сти, и, не побежде́н бы́в от врага́, пе́л еси́: сла́ва си́ле Твое́й, Го́споди.

Втора́го Ио́сифа ви́дите, бра́тие, я́коже бо то́й, оста́вль ри́зу в руку́ любоде́йцы, бежа́ греха́, та́ко и се́й, красоты́ ри́з себе́ обнажи́в, избежа́ от руки́, влеку́щия его́ к скве́рному смеше́нию, и си́м посрами́ неви́димаго врага́, хотя́щаго ду́шу и те́ло страда́льца оскверни́ти, но ничто́же успе́, поя́ше бо: сла́ва си́ле Твое́й, Го́споди.

Втору́ю еги́птяныню обре́т, вра́г покуша́шеся блаже́ннаго улови́ти, не терпя́ше бо серде́чныя чистоты́, ни добро́ты лица́ зре́ти, е́йже и А́нгели дивля́хуся, зову́ще: сла́ва си́ле Твое́й, Го́споди.

Богоро́дичен: Добро́ты Твоея́ вожделе́в, Ца́рь Вы́шний, Сове́том О́тчим и осене́нием Пресвята́го Ду́ха, я́ко до́ждь на руно́, сни́де в пречи́стое чре́во Твое́, Де́во. Па́дшую добро́ту ума́ моего́ возста́ви па́ки, Влады́чице, да пою́ Ти́ непреста́нно: сла́ва си́ле Твое́й, Госпоже́ Богоро́дице.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Све́та мы́сленнаго лиши́ти тя́ безу́мная не возмо́гши, чу́вственный покуси́ся отъя́ти, преподо́бне, те́мже вве́рже тя́ в мра́чную темни́цу, иде́же гла́дом и жа́ждею моря́ше тя́, ты́ же взыва́л еси́: Бо́же мо́й, не оста́ви мене́, ра́зве бо Тебе́ ино́го не зна́ю.

И́же Илию́ и Па́вла Фиве́йскаго препита́вый иногда́ в пусты́ни, То́й и на тебе́ удиви́ Свою́ ми́лость, преклони́ бо О́н еди́наго раба́ жены́ тоя́ на милосе́рдие и повеле́ пита́ти тя́ та́йно, ты́ же, а́ки посеще́ние Бо́жие бы́ти вменя́я, взыва́л еси́: кроме́ Тебе́, ино́го Бо́га не зна́ю.

Мно́зи, неве́дуще в тебе́, свя́те, де́йствуемыя Бо́жия благода́ти, увещава́ху тя́, да повине́шися во́ли госпожи́ твоея́ и бу́деши господи́н то́й и всему́ име́нию ея́. Ты́ же вся́ сия́ презре́л еси́, любве́ ра́ди Бо́жия, глаго́ля: кроме́ тоя́, не хощу́ ины́я позна́ти.

Не влады́чества тле́ннаго, но е́же над страстьми́ плотски́ми госпо́дствовати взыска́л еси́, преблаже́нне о́тче на́ш Моисе́е, те́мже дарова́ тебе́ Бо́г, я́ко не то́кмо твоя́ стра́сти порабо́тил еси́ ду́ху, но и про́чим во искуше́ниих посо́бствовати прия́л еси́ вла́сть, сего́ ра́ди взыва́л еси́: ничто́же ина́го, кроме́ любве́ Бо́жия, не хощу́ позна́ти.

Посмея́лся еси́ безу́мию любоде́йцы, я́ко повеле́ тя́ рабо́м со сла́вою гра́ды своя́ и ве́си обводи́ти и покланя́тися тебе́, а́ки своему́ господи́ну, но ты́ велегла́сно целому́дрия глаго́лы изре́кл еси́: всу́е тружда́етеся с повеле́вшею ва́м сие́ твори́ти, а́з бо, ра́зве Бо́га, ничто́же хощу́ зна́ти.

Богоро́дичен: Ра́дующагося врага́, я́ко улови́ ны́ грехолю́бия сластьми́, посрами́, Госпоже́, на́с же, в бу́ри жите́йския молвы́ бе́дствующих, обвесели́ и к ти́хому приста́нищу покро́ва Твоего́ дости́гнути по́мощь да́руй: ра́зве бо Тебе́ ины́я в печа́ли Помо́щницы не зна́ем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

В бе́здне страсте́й не погрузи́лся еси́, ни ри́зы твоея́ в скве́рны омочи́л еси́, преподо́бне, те́мже, жела́юща тя́, Бо́гом наставля́емый чернори́зец та́йно облече́ во а́нгельскую оде́жду и научи́, ка́ко соблюсти́ ту́ непоро́чну, ниже́ убоя́тися стра́ха, ни врагу́ плещи́ да́ти: я́ко Бо́г е́сть, И́же рабы́ Своя́ от тли́ избавля́ет.

В бе́здне грехо́внаго разжже́ния погружа́ема любоде́йца, отча́явшися о тебе́ наде́жды своея́, ра́ны тя́жкия возложи́ на тя́, преподо́бне, повеле́ бо, растя́гши тя́, же́злием кре́пко би́ти, я́ко и земли́ напо́лнитися кро́ве твоея́, ты́ же, благода́рственно сия́ терпя́, взыва́л еси́: от тли́, Бо́же мо́й, возведи́ мя́.

Устраши́ти тя́ неустраши́маго хотя́ще, изве́ствоваху, коли́ка муче́ния име́л еси́, блаже́нне, претерпе́ти, а́ще не сотвори́ши во́ли госпожи́ твоея́, ты́ же, на вся́ гото́в сы́й, отвеща́л еси́ дерзнове́нно: ни о́гнь, ни ра́ны возмо́гут мя́ разлучи́ти от любве́ Бо́жия, На́ньже упова́ю, я́ко от тли́ мя́ изба́вит.

Не покори́лся еси́ жене́, безсту́дством омраче́нней, но па́че обличи́л еси́ ту́, преподо́бне, я́ко преоби́девшую стра́х Бо́жий, и безсту́дне к скве́рному смеше́нию ну́дившую поплева́л еси́, не боя́ся я́рости тоя́, ни гне́ва, име́л бо еси́, о́тче, наде́жду на Бо́га, я́ко То́й тя́ от руки́ ея́ изба́вит.

Ви́дящи жена́ себе́ тобо́ю, о́тче, посра́млену, предста́ви тя́ кня́зю, от него́же су́д прия́ коне́чный, да, е́же хо́щет, на тебе́ твори́т, иму́щая вла́сть по мно́гих му́ках и сме́рти преда́ти тя́. Но ты́, проро́чески предви́дя о́ных поги́бель, отвеща́л еси́: са́ми ско́ро оты́дете в ве́чную поги́бель, мене́ же Христо́с, Бо́г мо́й, от тоя́ изба́вит.

Богоро́дичен: Предстою́ миролю́бному кня́зю вы́ну и, а́ки пле́нник, слы́шу су́д на ся́, да е́же хо́щут любоде́йныя стра́сти, творя́т на мне́, я́же, прие́мше о́бласть на мя́, обнажа́ются в чу́вствех мои́х и ну́ждею влеку́т мя́ при́сно любоде́йствовати мы́слию с ни́ми. Но до́ндеже в се́м ми́ре сме́ртная секи́ра не посече́ мя́, Ты́, ми́рнаго Царя́ Небе́снаго су́щи Ма́ти, прожени́ ты́я и от тли́, Богоро́дице, мя́ изба́ви.

Конда́к, гла́с 3:

В Вы́шних еди́наго Бо́га ища́, земна́я вся́ презре́л еси́, о телеси́ свое́м неради́в, на му́ки му́жески себе́ вда́л еси́, гла́д, жа́жду, у́зы, в темни́це затворя́емь, до́блественно претерпе́л еси́, бие́ния, кро́ве излия́ние и удо́в отре́зание, чи́стаго ра́ди де́вства твоего́, му́жески поне́сл еси́. И ны́не с де́вственными ли́ки предстоя́ Пресвяте́й Тро́ице, от все́х искуше́ний моли́ изба́витися вопию́щим ти́: ра́дуйся, Моисе́е, о́тче блаже́ннейший.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть. Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

Богопроти́вное веле́ние от кня́зя любоде́йца прие́мши, без студа́ влеча́ше тя́ к скве́рному смеше́нию, жела́ше бо насы́титися твоея́ красоты́, преиспещре́нныя чистото́ю, е́йже и А́нгели удивля́хуся, зову́ще ко устро́ившему в тебе́ сию́: Созда́телю Бо́же, благослове́н еси́.

Вся́ стре́лы стра́стныя вра́г пусти́ на тя́, свя́те, хотя́ уязви́ти тя́, но, са́м уя́звен, стеня́ше, я́ко ви́де неодоле́нна тебе́ су́ща, но па́че зову́ща: Бо́же, благослове́н еси́.

Всу́е труди́шися, о же́но! – ре́кл еси́, преблаже́нне, – ника́коже нечистоте́ твое́й косну́ся, предзря́ одесну́ю мене́ вы́ну Бо́га, ниже́ взыгра́ется пло́ть моя́, я́ко стра́х Госпо́день ко́сти ми́ пояда́ет, те́м зову́: Бо́же, благослове́н еси́.

Тве́рдость ума́ твоего́ любоде́йца хотя́щи умягчи́ти, повеле́ па́лицами би́ти тя́ и на вся́к де́нь по сто́ ра́н налага́ти, но ни та́ко поколеба́ся, я́ко одебеле́ пло́ть твоя́ в любо́вь Бо́жию, Ему́же стори́чествующий пло́д прине́сл еси́, зовы́й: Бо́же, благослове́н еси́.

Лю́тая бие́ния и удо́в отре́зание прие́м, свя́те, бы́л еси́ а́ки ме́ртв и е́ли жи́в лежа́, но стоя́щему врагу́ отре́зал еси́ главу́, ме́ртва же и неде́йственна того́ показа́в, взыва́л еси́: Бо́же мо́й, кре́пость моя́, благослове́н еси́.

Богоро́дичен: В лю́тыя напа́сти впа́д, ника́коже восклони́тися могу́, Ты́, Влады́чице моя́, пода́ждь ми́ кре́пкую Свою́ ру́ку и возста́ви мя́ па́ки на но́зе, да хожду́ в пути́ Госпо́дни пра́вы, зовы́й к Тебе́: от ро́да в ро́д благослове́нно и́мя Твое́ бу́ди.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га по́йте, дела́, я́ко Го́спода и превозноси́те во вся́ ве́ки.

В пе́щь о́гненную любостра́стнаго греха́ влеко́м, Бо́га еди́наго призва́л еси́, блаже́нне, дави́дски глаго́ля: Бо́же, в по́мощь мою́ вонми́, и, вше́д на пла́мень, неопали́м пребы́л еси́, врага́ па́че опали́в многоко́зненную главу́, не хотя́щаго пе́ти Го́спода во ве́ки.

Огне́м любодея́ния не моги́й вра́г опали́ти чистоты́ твоея́, воздви́же лю́тое гоне́ние на и́ночествующих полки́, и изгна́ни бы́ша от о́бласти неми́лостиваго кня́зя вси́, его́же пости́же ско́ро гне́в Бо́жий, по проро́честву твоему́, свя́те, я́ко не хотя́ше во все́й держа́ве свое́й име́ти пою́щих Го́спода во ве́ки.

Кня́зю внеза́пу зле́ ду́шу изве́ргшу, бы́сть мяте́ж и молва́ в лю́дех, воста́ша бо раби́ и изби́ша господе́й свои́х, с ни́миже и му́чившая тя́ любоде́йца поги́бе, и взы́де кро́вь на главу́ ея́. Ты́ же, преподо́бне, воспе́л еси́: о все́х де́лех благословлю́ Го́спода во ве́ки.

Возда́в хвалу́ свободи́вшему тя́ Бо́гу, прише́л еси́ в пеще́ру к преподо́бному Анто́нию, нося́ му́ченическия на те́ле свое́м я́звы, и́хже вси́ ви́девшии зва́ху: по́йте, вся́ дела́, Го́спода и превозноси́те Его́ во ве́ки.

Скры́ти хотя́ светле́йшую па́че со́лнца чистоту́ твою́, о́тче, в те́мную всели́лся еси́ пеще́ру, в не́йже украси́л еси́ сию́ поще́нием и всено́щными стоя́нии, те́мже яви́ о тебе́ Бо́г, коли́ку и́маши благода́ть все́м в искуше́ниих посо́бствовати, да сла́вится И́мя Его́ во ве́ки.

Богоро́дичен: Скры́ти мня́йся пред О́ком Всеви́дящим сту́д греха́ моего́, на вся́к де́нь разжже́нием плотски́м пали́м, беззако́ние к беззако́нию прилага́ю. Но пре́жде да́же не откры́ются пред а́нгельским и челове́ческим позо́ром дела́ моя́, помози́ ми́, Чи́стая, избы́ти сицева́го неи́стовства, да сла́влю и́мя Твое́ во ве́ки.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

От Бо́га Бо́г, соше́дшее Сло́во, просла́ви тя́ еще́ в жи́зни се́й, свя́те, чудотво́рными да́ры: не́коему бо любодея́нием бори́му прикоснове́нием жезла́ твоего́ омертве́ша стра́сти, и, прие́м от тебе́ за́поведь никогда́же бесе́довати с жено́ю, е́же сотвори́в, про́чая ле́та поживе́ ми́рно, тебе́ велича́я.

От ро́да в ро́д чистота́ твоя́ сла́вится, ея́же ра́ди мно́го пострада́в, прия́л еси́ блаже́нство чи́стых се́рдцем, преста́вився же от вре́менныя жи́зни сея́, чи́сте зри́ши Пресвяту́ю Тро́ицу. Помина́й и на́с, преподо́бне, па́мять твою́ почита́ющих.

Мертвеца́ тя́ нарече́ Госпо́дь, я́ко умертви́л еси́ по́хоти плотски́я терпе́нием чу́дным, и и́маши си́лу прикаса́ющимся моще́м твои́м стра́сти умерщвля́ти, я́ко сотвори́л еси́ многотерпели́вому Иоа́нну, и́же, прие́м ми́р в косте́х свои́х, возвели́чи Бо́га, прославля́ющаго святы́х Свои́х.

Возвесели́ся, горо́, иму́щая в пеще́ре нетле́нныя мо́щи чу́днаго Моисе́я, воспо́йте хвала́ми, и́ночествующих собо́ри, се́ бо и́мате посо́бника и предста́теля в ско́рбех, кла́няйтеся ра́це его́, прикаса́ющеся устна́ми, и обря́щете поко́й во удесе́х ва́ших.

Сла́вим Тро́ицу Пресвяту́ю, я́ко даде́ на́м свети́льника ми́ра, отца́ на́шего Моисе́я, его́же пра́зднующе ле́тнюю па́мять, Отца́, и Сы́на, и Свята́го Ду́ха в Еди́ном Божестве́, ве́рнии, единому́дренно велича́ем.

Богоро́дичен: Всегда́ сла́вим Тя́, Чи́стая Де́во, я́ко собрала́ еси́ ве́рныя рабы́ Своя́ на ме́сто сие́, иде́же мно́зи прие́млют исцеле́ние, покланя́ющиися о́бразу Твоему́ несумне́нно и призыва́ющии в моли́тву оте́ц на́ших Пече́рских.

Свети́лен:

Све́те Трисоста́вный, Соде́телю, И́стинный Бо́же, просвети́ мра́к ду́ш на́ших, се́ бо приво́дим Тебе́ в моли́тву уго́дника Твоего́ и с ни́м мо́лимся: ути́ши бу́рю грехо́в на́ших и от печа́ли все́х на́с изба́ви.

Богоро́дичен: Светле́йшая па́че со́лнца Мари́е Богоро́дице, просвети́ благода́тию все́х, кла́няющихся пред Тобо́ю и призыва́ющих и́мя Твое́, и соблюди́ оби́тель сию́ от вся́каго зла́, живу́щих же в не́й присносу́щнаго весе́лия и ра́дости духо́вныя испо́лни, Ты́ бо еси́ Хода́таица ра́дости на́шея.