Канон святому преподобному Иову Анзерскому

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

І҆́ѡве прпⷣбне, проле́й мл҃твꙋ твою̀ ко хрⷭ҇тꙋ̀ бг҃ꙋ, да сподо́битъ мѧ̀, недосто́йнаго, пѣ́снь хвале́бнꙋю тебѣ̀ воспѣ́ти и҆ по́двиги твоѧ̑ досто́йнѡ просла́вити.

Ѿ ю҆́ности бг҃а возлюби́въ, бл҃же́нне, до конца̀ томꙋ̀ порабо́талъ є҆сѝ, и҆ бл҃года́тїю тогѡ̀ ѡ҆богати́всѧ, мнѡ́гїѧ дꙋхѡ́вныѧ да́ры приходѧ́щымъ раздава́лъ є҆сѝ.

Ви́дѧ гдⷭ҇ь ѿ младе́нства ре́вность твою̀, чи́на і҆ере́йскагѡ ᲂу҆досто́и тѧ̀, прпⷣбне, и҆ па́ствѣ твое́й во сп҃се́нїе дарова̀, ꙗ҆́кѡ слꙋжи́телѧ бл҃гоговѣ́йна и҆ мл҃твенника те́пла.

Бг҃оро́диченъ: Не и҆́мамъ словесѐ досто́йнагѡ просла́вити тѧ̀, бцⷣе, ни ра́зꙋма воспѣ́ти тѧ̀, влⷣчце, но то́кмѡ въ ско́рбехъ ᲂу҆се́рднѡ вопїю̀ тѝ: и҆зба́ви мѧ̀ рабо́ты вра́жїѧ и҆ въ не́мощи мое́й помо́щница мѝ бꙋ́ди.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Є҆щѐ сы́й въ мі́рѣ, по́стническомꙋ житїю̀, мл҃твѣ и҆ бг҃омы́слїю прилѣжа́лъ є҆сѝ, досточꙋ́дне, цѣломꙋ́дрїемъ же ᲂу҆кра́шенъ, чистото́ю дꙋшѝ твоеѧ̀ бг҃ови прибли́жилсѧ є҆сѝ. молѝ того̀ ᲂу҆се́рднѡ, всѧ́кїѧ скве́рны на́мъ и҆зба́витисѧ.

Бл҃года́ть смире́нїемъ и҆ вѣ́рою стѧжа́въ, тишинꙋ̀ и҆ ра́дость дꙋшѝ твое́й ѡ҆брѣ́лъ є҆сѝ, и҆ бл҃годаре́нїе возносѧ̀ цр҃ю̀ нбⷭ҇номꙋ, ѿ си́лы въ си́лꙋ восходи́лъ є҆сѝ, прпⷣбне.

Пѣ́нїемъ бл҃голѣ́пнымъ гдⷭ҇а прославлѧ́ѧ, мнѡ́гїѧ лю́ди сла́дкимъ гла́сомъ твои́мъ во ᲂу҆миле́нїе приводи́лъ є҆сѝ, і҆́ѡве пребл҃же́нне, и҆ ᲂу҆се́рднѣ бжⷭ҇твеннꙋю слꙋ́жбꙋ соверша́ѧ, тє́плыѧ мл҃твы за па́ствꙋ твою̀ возноси́лъ є҆сѝ.

Бг҃оро́диченъ: Мт҃и бж҃їѧ пречⷭ҇таѧ, прпⷣбнымъ похвало̀ и҆ ᲂу҆твержде́нїе, дꙋ́шъ ст҃ы́хъ невѣстокраси́тельнице сла́внаѧ, молѝ со прпⷣбнымъ і҆́ѡвомъ сн҃а твоего̀, хрⷭ҇та̀ бг҃а на́шего, всѧ́кїѧ грѣхо́вныѧ скве́рны на́мъ совлещи́сѧ и҆ слеза́ми покаѧ́нїѧ ѡ҆мы́тисѧ.

Сѣда́ленъ, гла́съ в҃:

Земна̑ѧ ѡ҆ста́вль, нбⷭ҇наѧ ѡ҆брѣ́лъ є҆сѝ, пло́тїю ѡ҆бложе́нъ, безплѡ́тнымъ подо́билсѧ є҆сѝ, ст҃е і҆́ѡве, бжⷭ҇твеннымъ же дх҃омъ просвѣще́нъ, сердца̀ человѣ́кѡвъ прозрѣва́лъ є҆сѝ. ны́нѣ ꙗ҆́кѡ ѕвѣзда̀, сїѧ́еши на нб҃сѝ и҆ зри́ши сла́вꙋ ст҃ы́ѧ трⷪ҇цы, ю҆́же молѝ, прпⷣбне, да и҆сцѣли́тъ не́мѡщи на́шѧ и҆ сподо́битъ црⷭ҇твїѧ своегѡ̀.

Бг҃оро́диченъ: И҆стаѧва́етъ се́рдце моѐ, пречⷭ҇таѧ, тща́щеесѧ воспѣ́ти непости́жнꙋю та́йнꙋ ржⷭ҇тва̀ твоегѡ̀, сло́во бо ѻ҆́ч҃ее несказа́ннѡ во ᲂу҆тро́бꙋ твою̀ вмѣсти́ла є҆сѝ, и҆ мт҃и сп҃се́нїѧ ꙗ҆ви́ласѧ є҆сѝ на́мъ.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Мл҃твенниче пла́менный, та́йный съ бг҃омъ собесѣ́дниче и҆ дх҃а бжⷭ҇твеннагѡ соприча́стниче, прпⷣбне ѻ҆́тче і҆́ѡве! ты̀ слеза́ми лицѐ своѐ ѡ҆роша́ѧ, и҆з̾ глꙋбины̀ серде́чныѧ взыва́лъ є҆сѝ: гдⷭ҇и, поми́лꙋй мѧ̀! и҆спросѝ и҆ на́мъ твое́ю мл҃твою бл҃года́ть є҆гѡ̀ и҆ млⷭ҇ть.

Любвѐ хрⷭ҇то́вы и҆спо́лнено бѣ̀ чи́стое се́рдце твоѐ, досточꙋ́дне, бли̑жнїѧ твоѧ̑ па́че себє̀ возлюби́вый, ѕло́бы чꙋ́ждь бы́въ и҆ мще́нїѧ, бл҃годѣѧ̑нїи мно́гими лю́демъ ᲂу҆гожда́лъ є҆сѝ, ра́дꙋѧсѧ ѡ҆ всѧ́кой дꙋшѝ хрⷭ҇тїа́нстѣй.

Не ѡ҆скꙋдѣ̀ десни́ца твоѧ̀, пита́вшаѧ а҆́лчꙋщихъ, нижѐ преста̀ по́мощь твоѧ̀ стра́ждꙋщымъ и҆ ѡ҆бременє́ннымъ, сло́во твоѐ бл҃года́тное малодꙋ̑шнымъ вѣ́ры ᲂу҆твержде́нїе бы́сть, всѣ̑мъ бо подава́лъ є҆сѝ, ѻ҆́тче, дꙋшеполє́знаѧ.

Бг҃оро́диченъ: Къ тебѣ̀ простира́ю рꙋ́цѣ моѝ, предста́тельнице всѣ̑мъ хрⷭ҇тїа́нѡмъ, и҆ и҆з̾ глꙋбины̀ взыва́ю: ᲂу҆тѣ́ши мѧ̀ въ печа́ли мое́й, мꙋчи́тельства страсте́й и҆зба́ви, свѣ́томъ бжⷭ҇твеннымъ мра́къ дꙋшѝ моеѧ̀ просвѣтѝ и҆ прегрѣшє́нїѧ моѧ̑ простѝ мѝ, мт҃и дв҃о.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.

Оу҆вѣ́дѣвъ ца́рь земны́й добро́тꙋ твою̀ дꙋхо́внꙋю, ѻ҆́тче і҆́ѡве, и҆збра̀ тѧ̀ наста́вника себѣ̀, мꙋ́дростїю твое́ю назида́ѧсѧ, ты́ же со смире́нїемъ ца́рское повелѣ́нїе прїе́мъ, си́рыхъ и҆ ᲂу҆бо́гихъ попече́нїемъ свои́мъ не ѡ҆ста́вилъ є҆сѝ, въ простотѣ̀ се́рдца слꙋже́нїе своѐ соверша́ѧ.

Цр҃ю̀ нбⷭ҇номꙋ ѕѣлѡ̀ че́стенъ дрꙋ́гъ ꙗ҆ви́лсѧ є҆сѝ, прпⷣбне, то́й бо, ꙗ҆́кѡ зла́то въ горни́лѣ, ѡ҆чи́сти тѧ̀ и҆спыта̑нїи крѣ́пкими. за словеса̀ гдⷭ҇нѧ вѣ́рою тве́рдою сохрани́лъ є҆сѝ пꙋти̑ же́стѡки, ѻ҆́тче, и҆сполнѧ́ѧсѧ бл҃ги́хъ преиз̾ѻби́льнѡ.

За́вистїю вра́жїею, ᲂу҆ничиже́нъ бы́лъ є҆сѝ клевето́ю человѣ́ческою, і҆́ѡве, и҆згна́нъ бо ѿ ѻ҆те́ческагѡ гра́да бы́въ, во странѣ̀ полꙋ́нощнѣй ѡ҆брѣ́лъ є҆сѝ приста́нище во ѻ҆би́тель и҆́ноческꙋю пресели́всѧ.

Бг҃оро́диченъ: Ѿ ю҆́ности моеѧ̀ гдⷭ҇а грѣхопадє́нїи прогнѣ́вахъ, не и҆́мамъ дерзнове́нїѧ къ томꙋ̀, дѣ́лъ бо, досто́йныхъ покаѧ́нїѧ, не сотвори́хъ, ѻ҆ба́че є҆ди́нꙋ тебѐ стѧжа́хъ спорꙋ́чницꙋ сп҃се́нїѧ моегѡ̀, пренепоро́чнаѧ, ты̀ въ тѣснотѣ̀ и҆ ско́рби помозѝ мѝ, да скѡ́рби вре́мєнныѧ прїе́млѧ въ житїѝ мое́мъ, мꙋче́нїѧ вѣ́чнагѡ и҆збѣ́гнꙋ.

Пѣ́снь ѕ҃.

І҆рмо́съ: Пожрꙋ̀ тѝ со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Є҆гда̀ всели́лсѧ є҆сѝ въ кїнові́ю, ѻ҆́тче і҆́ѡве, по́стническимъ житїе́мъ бра́тїю ᲂу҆диви́лъ є҆сѝ, и҆́гꙋ хрⷭ҇то́вꙋ смире́ннѡ подклонѧ́ѧсѧ, тѣ́мже хрⷭ҇то́съ ри́зою ра́дованїѧ ᲂу҆красѝ тѧ̀, пꙋ́ть преподо́бїѧ и҆ кончи́нꙋ чтⷭ҇нꙋ тѝ ᲂу҆готовлѧ́ѧ.

Словесѝ гдⷭ҇ню неꙋста́ннѡ поꙋча́шесѧ се́рдце твоѐ чи́стое, дх҃омъ бо ст҃ы́мъ дꙋша̀ твоѧ̀ при́снѡ жива̀ бѣ̀, бл҃года́ть смире́нїемъ стѧжа́лъ є҆сѝ, премꙋ́дре, црⷭ҇твꙋ бж҃їю, є҆щѐ на землѝ сы́й, ꙗ҆́кѡ нб҃ожи́тель прїѡбща́ѧсѧ.

Безмо́лвїѧ ча́ѧше дꙋша̀ твоѧ̀, бл҃же́нне, и҆ бг҃ꙋ предстоѧ́нїѧ несмꙋща́емагѡ. сегѡ̀ ра́ди во ѡ҆то́къ а҆́нзерскїй всели́лсѧ є҆сѝ, и҆дѣ́же предте́ча тво́й, є҆леаза́ръ бг҃омꙋ́дрый, первонача́льникъ ски́тскїй, вдохновє́нныѧ бг҃ꙋ мл҃твы приносѧ̀, дара́ми бжⷭ҇твенныѧ бл҃года́ти пꙋсты́ню ѡ҆ст҃и́лъ є҆́сть.

Бг҃оро́диченъ: Пꙋчи́нꙋ беззако́нїй мои́хъ въ пꙋчи́нѣ млⷭ҇рдїѧ твоегѡ̀ потопѝ, пречⷭ҇таѧ, бꙋ́рю страсте́й мои́хъ разгонѧ́ющи, и҆ на стєзѝ покаѧ́нїѧ наста́ви мѧ̀.

Конда́къ, гла́съ и҃:

Бжⷭ҇твєннаѧ восхождє́нїѧ въ се́рдцѣ стѧжа́въ, и҆́хже ра́ди мнѡ́ги скѡ́рби претерпѣ́лъ є҆сѝ, приста́нище ѡ҆брѣ́лъ є҆сѝ въ морстѣ́мъ ѡ҆то́цѣ, прпⷣбнагѡ є҆леаза́ра прее́мникъ завѣ́тѡвъ бы́въ, покро́вомъ бж҃їѧ мт҃ре ѡ҆сѣнѧ́емь, достобл҃же́нне ѻ҆́тче і҆́ѡве, помина́й на́съ, чтꙋ́щихъ ст҃ꙋ́ю па́мѧть твою̀.

І҆́косъ:

Ѿ ю҆́ности и҆збра́нникъ бж҃їй ꙗ҆ви́лсѧ є҆сѝ, и҆ тогѡ̀ пꙋте́мъ послѣ́довалъ є҆сѝ невозбра́ннѡ, гонє́нїѧ, поношє́нїѧ и҆ скѡ́рби не поколеба́ша тѧ̀, прпⷣбне, вѣ́рою хрⷭ҇то́вою ѡ҆крилѧ́ема. тѣ́мже ѿ ца́рскихъ черто́гѡвъ ѿве́рженъ бы́въ, во ѻ҆би́тель солове́цкꙋю преселе́нїе ꙗ҆́кѡ ѿ десни́цы бж҃їѧ воспрїѧ́лъ є҆сѝ, ᲂу҆стреми́лсѧ є҆сѝ къ пꙋсты́нномꙋ ѡ҆то́кꙋ а҆́нзерскомꙋ, и҆дѣ́же дꙋ́хъ тво́й, безмо́лвїѧ ча́ѧ, жела́емое ѡ҆брѣ́те. та́можде и҆ повелѣ́нїе бж҃їѧ мт҃ре прїе́мъ, ѻ҆би́тель распѧ́тїю сн҃а є҆ѧ̀, хрⷭ҇та̀ бг҃а на́шегѡ, воздви́глъ є҆сѝ. сегѡ̀ ра́ди по́двигъ любвѐ и҆ млⷭ҇рдїѧ въ подража́нїе гдⷭ҇ꙋ до конца̀ и҆спо́лнивый, во ѻ҆би́телехъ бжⷭ҇твенныѧ любвѐ ны́нѣ пребыва́еши, достобл҃же́нне ѻ҆́тче і҆́ѡве, помина́й на́съ, чтꙋ́щихъ ст҃ꙋ́ю па́мѧть твою̀.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ски́тскагѡ житїѧ̀ нача́льникъ ꙗ҆ви́лсѧ є҆сѝ, прпⷣбне ѻ҆́тче і҆́ѡве, въ добродѣ́телехъ и҆́нокѡвъ наставлѧ́ѧ, наипа́че ст҃о́е послꙋша́нїе блюстѝ ᲂу҆вѣщава́ѧ: и҆ та́кѡ ѻ҆те́ческою любо́вїю ча̑дъ дꙋхо́вныхъ ѡ҆кормлѧ́лъ є҆сѝ, попече́нїемъ ѡ҆ па́ствѣ твое́й завѣ́тъ хрⷭ҇то́въ и҆сполнѧ́ѧй.

Покаѧ́нїѧ проповѣ́дниче и҆ црⷭ҇твїѧ нбⷭ҇нагѡ наслѣ́дниче! ты̀ на кончи́нꙋ житїѧ̀ своегѡ̀ и҆ на ча́съ стра́шнагѡ сꙋда̀ взира́ѧ, сокрꙋшє́нныѧ мл҃твы распѧ́томꙋ за ны̀ возноси́лъ є҆сѝ, смире́нными слеза́ми дꙋ́шꙋ ѡ҆мыва́ѧй.

Слꙋже́нїю лю́демъ па́че пре́жнѧгѡ посвѧти́лъ є҆сѝ себѐ, прпⷣбне, попече́нїю ѡ҆ болѧ́щихъ вельмѝ прилѣжа́въ, на ра̑ны и҆́хъ є҆ле́й возлива́ѧ, любо́вїю хрⷭ҇то́вою недꙋ́ги цѣли́лъ є҆сѝ. тѣ́мже и҆ мы̀, грѣхо́вными ꙗ҆́звами ᲂу҆ра́нени, во бл҃говре́меннꙋю по́мощь тѧ̀ призыва́емъ.

Бг҃оро́диченъ: Напа́стьми лю́тыми бори́мь, и҆ стрѣла́ми вра́жїими ᲂу҆ѧзвлѧ́емь, во гно́ищи грѣхѡ́въ мои́хъ лежꙋ̀, стенѧ́й, но ты̀, влⷣчце, терпѣ́нїе моѐ и҆ ᲂу҆пова́нїе, ѿ во́лнъ безмѣ́рныхъ и҆скꙋше́нїй и҆змѝ мѧ̀ и҆ во страда́нїихъ пода́ждь мѝ ᲂу҆тѣше́нїе.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Дꙋ́хомъ прїѡбща́ѧсѧ страда́нїємъ гдⷭ҇нимъ, посто́мъ и҆ бдѣ́нїемъ мл҃твеннымъ пло́ть свою̀ ᲂу҆дрꙋча́лъ є҆сѝ, прпⷣбне, и҆ се́рдце всено́щными молє́нїи ᲂу҆соверша́лъ є҆сѝ, ѻ҆́комъ же приснобо́дреннымъ та̑йны бжⷭ҇твєнныѧ созерца́ѧ, дх҃ꙋ ст҃о́мꙋ ѻ҆би́тель непоро́чнꙋ себѐ сотвори́лъ є҆сѝ.

Вострепета̀ дꙋша̀ твоѧ̀ ст҃а́ѧ, и҆ возра́довашасѧ смирє́нныѧ кѡ́сти твоѧ̑, бл҃же́нне, є҆гда̀ влⷣчца всепѣ́таѧ въ видѣ́нїи ꙗ҆ви́сѧ тѝ вкꙋ́пѣ съ є҆леаза́ромъ чꙋ́днымъ, повелѣва́ющи ѻ҆би́тель распѧ́тїю сн҃а є҆ѧ̀, хрⷭ҇та̀ бг҃а на́шегѡ, воздви́гнꙋти и҆ сп҃си́тєльныѧ стрⷭ҇ти є҆гѡ̀ всечтⷭ҇нѡ просла́вити.

Дрꙋга́ѧ голго́ѳа гора̀ нарече́сѧ, и҆дѣ́же ю҆до́ль послѣ́днѧѧ земна́гѡ по́прища твоегѡ̀ бы́сть, і҆́ѡве премꙋ́дре, сїѧ̑ бо трꙋды̑ ᲂу҆се́рдными твои́ми и҆ воздыха̑нїи сле́зными, попече́нїемъ прест҃ы́ѧ бцⷣы храни́ма, во всѧ́кой ст҃ы́ни и҆ пра́вдѣ процвѣла̀ є҆́сть.

Бг҃оро́диченъ: Же́злъ си́лы стѧжа́вше, крⷭ҇тъ сн҃а твоегѡ̀, бцⷣе, тѣ́мъ низлага́емъ вра̑жїѧ шата̑нїѧ, любо́вїю тѧ̀ непреста́ннѡ велича́ющїи.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Бл҃гоче́стнагѡ житїѧ̀ твоегѡ̀, ѻ҆́тче, ра́ди, и҆сто́чникъ воды̀ преиз̾ѻби́ленъ даде́сѧ на потре́бꙋ ѻ҆би́тели твое́й ѿ прест҃ы́ѧ бцⷣы, кꙋ́пнѡ же и҆ да́ръ прозрѣ́нїѧ и҆ недꙋ́гѡвъ и҆сцѣле́нїѧ тебѣ̀ ѿ бг҃а да́нъ бы́сть. тѣ́мже мо́лимъ тѧ̀: и҆сцѣлѝ не́мѡщи на́шѧ дꙋшє́вныѧ вкꙋ́пѣ и҆ тѣлє́сныѧ.

Любо́вїю хрⷭ҇то́вою и҆спо́лнено бы́сть се́рдце твоѐ, прпⷣбне і҆́ѡве, є҆́юже вы́нꙋ мꙋ́дрѡ врачева́лъ є҆сѝ поро́ки людскі̑ѧ. є҆гда̀ бо та́тїе прїидо́ша восхи́тити плоды̀ трꙋдѡ́въ бра́тскихъ, и҆ бг҃омъ нака́зани бы́ша, того̀ ᲂу҆моли́въ, разрѣше́нїе и҆̀мъ и҆спроси́лъ є҆сѝ, и҆ трꙋдо́мъ покаѧ́ннымъ на пꙋ́ть пра́веднагѡ житїѧ̀ наста́вилъ є҆сѝ ѧ҆̀.

Во гла́сѣ ра́дованїѧ а҆́гг҃льскагѡ прехожда́ше дꙋша̀ твоѧ̀, бл҃же́нне, ѿ ѻ҆би́тели земны́ѧ во ѻ҆би́тєли вѣ̑чныѧ, всѧ̑ бо и҆спо́лнилъ є҆сѝ ѿ гдⷭ҇а тѝ повелѣ̑ннаѧ, никогда́же во́ли є҆гѡ̀ преслꙋ́шавъ. и҆ ны́нѣ предстоѧ̀ прⷭ҇то́лꙋ всест҃ы́ѧ трⷪ҇цы, вкꙋ́пѣ съ новомч҃нки солове́цкими, возносѝ ѡ҆ на́съ молє́нїѧ ᲂу҆се́рднѡ.

Бг҃оро́диченъ: Ꙗ҆́кѡ и҆спра́вила є҆сѝ пре́жде разсла́бленнаго, та́кѡ и҆ на́съ, дꙋше́ю и҆ тѣ́ломъ разсла́бленныхъ, те́плымъ твои́мъ предста́тельствомъ и҆спра́ви, да пое́мъ при́снѡ вели̑чїѧ твоѧ̑.

Свѣти́ленъ:

Свѣти́льниче, дх҃омъ ст҃ы́мъ возжже́нный, въ по́двизѣхъ сла́вныхъ пожи́лъ є҆сѝ, ѻ҆́тче, мі́рꙋ свѣтѧ̀, прича́стники свѣ́та бжⷭ҇твеннагѡ ᲂу҆ченикѝ твоѧ̑ сотворѧ́ѧ, молѝ, прпⷣбне, свѣтода́телѧ гдⷭ҇а тьмы̀ грѣха̀ и҆ невѣ́дѣнїѧ на́мъ и҆збѣжа́ти, и҆ во свѣ́тлостехъ повелѣ́нїй гдⷭ҇нихъ ходи́ти.

Сла́ва, и҆ ны́нѣ: Мт҃и свѣ́та невече́рнѧгѡ, свѣти́ло свѣтоза́рнагѡ сїѧ́нїѧ, бг҃овѣ́дѣнїѧ свѣ́томъ сердє́чнаѧ ѻ҆чеса̀ на̑ша просвѣтѝ, да и҆мꙋ́ще свѣти́льники при́снѡ горѧ́щыѧ, ᲂу҆гото́вимъ себѐ въ срѣ́тенїе женихꙋ̀ хрⷭ҇тꙋ̀, и҆́же мра́ка нощна́гѡ на́съ и҆зба́витъ, де́нь незаходи́мый на́мъ да́рꙋетъ, и҆ сы́ны свѣ́та своегѡ̀ сотвори́тъ.