Канон святому преподобному Димитрию Прилуцкому (второй)

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Да́ждь мѝ, хрⷭ҇тѐ мо́й сп҃се, проще́нїе мно́гихъ мѝ согрѣше́нїй, ꙗ҆́кѡ да и҆ мы̀ почита́емъ па́мѧть твоегѡ̀ ᲂу҆го́дника преподо́бнагѡ дими́трїѧ: є҆гѡ́же мл҃твами, бж҃е, сп҃сѝ на́съ.

Твои́ми моли́твами же и҆ мольба́ми ми́лостиваго ᲂу҆молѧ́й бг҃а, преподо́бне ѻ҆́тче на́шъ дими́трїе, и҆ грѣхо́вный мра́къ печа́ли на́шеѧ разорѝ, и҆ благодꙋ́шїѧ ᲂу҆тѣше́нїѧ на́съ дꙋхо́внагѡ и҆спо́лни.

Ѿ младе́нства ты̀, блаже́нне дими́трїе, позна́нъ бы́сть бг҃омъ, и҆ на него̀ надѣ́ѧсѧ наставлѧ́емь на спаси́тєльнаѧ є҆гѡ̀ повелѣ̑нїѧ: є҆мꙋ́же ны́нѣ предстоѧ̀ со дерзнове́нїемъ ѡ҆ на́съ помоли́сѧ.

Бг҃оро́диченъ: Є҆ди́наго ѿ ст҃ы́ѧ трⷪ҇цы, сло́ва и҆ сн҃а родила̀ є҆сѝ, дв҃о пречⷭ҇таѧ, є҆го́же съ преподо́бными и҆ пра́ведными молѝ ѡ҆ рабѣ́хъ твои́хъ, вѣ́рою просѧ́щихъ грѣхѡ́въ проще́нїѧ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ты̀ є҆сѝ, преподо́бне ѻ҆́тче дими́трїе, послꙋ́шатель є҆ѵⷢ҇льскихъ слове́съ, самагѡ̀ гдⷭ҇а рече́нїю, всѧ̑ любы̀ мі́ра сегѡ̀ ѿве́ргъ, и҆ послѣ́довалъ є҆сѝ стопа́мъ хрⷭ҇тѡ́вымъ: є҆мꙋ́же съ ли́ки а҆́гг҃лъ ны́нѣ слꙋжѧ̀, и҆ ѡ҆ на́съ моли́сѧ чтꙋ́щихъ тѧ̀.

Въ зако́нѣхъ по́стныхъ поꙋча́ѧсѧ преподо́бный, не ѡ҆сла́бисѧ въ нача́льныхъ соверше́нныхъ нача́лѣхъ, хотѧ̀ ᲂу҆годи́ти своемꙋ̀ гдⷭ҇ꙋ: є҆мꙋ́же жела́тельнѣ ѡ҆бѣща́сѧ ᲂу҆се́рднѡ да́же и҆ до кончи́ны, до́ндеже сы́нъ црⷭ҇твїѧ є҆гѡ̀ показа́сѧ.

Воздержа́нїемъ кра́йнимъ пло́ть твою̀ ᲂу҆мертви́лъ є҆сѝ, дими́трїе: сегѡ̀ ра́ди дх҃омъ бжⷭ҇твеннымъ ѡ҆крыли́всѧ, дости́глъ є҆сѝ свѧщеннонача́льныхъ слꙋжи́телей, и҆дѣ́же нбⷭ҇ныхъ бж҃їихъ слꙋ́гъ безпло́тныхъ ра́дѡванїѧ.

Бг҃оро́диченъ: Бл҃гослове́ннаѧ, всенепоро́чнаѧ бцⷣе дв҃о мр҃і́е, сло́во бж҃їе на́мъ ро́ждшаѧ, свобожда́ющаго свои́хъ преподо́бныхъ ѿ тлѣ́ннагѡ мі́ра, и҆́хже ра́ди на́съ спаса́ющаго.

Сѣда́ленъ, гла́съ г҃.

И҆справле́нїѧ житїѧ̀ твоегѡ̀ всѣ̑мъ просвѣща́етъ стопы̑, дими́трїе ѻ҆́тче, вои́стиннꙋ вѣ́рою подо́бѧщымтисѧ: тѣ́мже и҆̀же любо́вїю блажа́тъ тѧ̀ всегда̀, спаса́й моли́твами твои́ми ѿ всѧ́кїѧ тѣсноты̀, хрⷭ҇та̀ пребл҃га́го молѧ̀, преподо́бне блаже́нне досточꙋ́дне.

Бг҃оро́диченъ: Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, благода́тнаѧ.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Рачи́тель сы́й ми́лостивагѡ сп҃си́телѧ хрⷭ҇та̀ твоегѡ̀, є҆́же ми́лостивнѡ къ немꙋ̀ наказꙋ́ѧ не ктомꙋ̀ согрѣша́ти, разсла́бленнꙋю женꙋ̀ и҆сцѣли́лъ є҆сѝ, ꙗ҆́коже при кꙋпѣ́ли и҆ногда̀.

Ꙗ҆́коже дре́во воздержа́нїѧ при вода́хъ насажде́нъ бы́лъ є҆сѝ, ѻ҆́тче бл҃же́нне, и҆ бл҃гора́слена лоза̀ ꙗ҆ви́лсѧ є҆сѝ, и҆зносѧ̀ бл҃гоче́стїѧ гро́зды.

Не восхотѣ̀ сла́вы сеѧ̀ тлѣ́нныѧ, па́че кнѧ́зѧ всѧ́чески благочести́вагѡ, цр҃ю̀ нбⷭ҇номꙋ хотѧ̀ ᲂу҆годи́ти, ѿ негѡ́же по́честь трꙋдѡ́въ свои́хъ прїѧ́тъ нетлѣ́ннꙋю.

Бг҃оро́диченъ: Бы́вшее подъ лѣ́томъ сло́во, возсїѧ́вшаго ѿ ѻ҆ц҃а̀ безлѣ́тнѡ, бг҃ома́ти, на́мъ родила̀ є҆сѝ: є҆го́же молѝ спастѝ пою́щыѧ тѧ̀.

Пѣ́снь є҃.

І҆рмо́съ: Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀, и҆но́гѡ не вѣ́мы.

А҆́ще и҆ земно́е ѻ҆те́чество, бл҃же́нне дими́трїе, ѡ҆ста́вилъ є҆сѝ, всѧ́чески бг҃оимени́тнꙋ ѻ҆би́тель совокꙋпи́лъ є҆сѝ: тѣ́мже пе́рвое ѻ҆ч҃ество нбⷭ҇ное прїѧ́тъ, со дерзнове́нїемъ хрⷭ҇тꙋ̀ за ны̀ моли́сѧ.

Бл҃гоче́стїѧ па́ки на стезю̀, дими́трїе, наста́вленъ бы́лъ є҆сѝ, ѻ҆́тче, ѿ бг҃а къ неги́блемомꙋ наслажде́нїю, посто́мъ и҆ моли́твою въ вы̑шнѧѧ приве́дсѧ.

Ѕѣлѡ̀ ми́лостива и҆ страннопрїи́мца показа́ тѧ сп҃съ на́шъ мі́рови, ѻ҆́тче, врача̀ болѧ́щымъ, дими́трїе, си̑рымъ и҆ ᲂу҆бѡ́гимъ застꙋ́пника любе́зна.

Бг҃оро́диченъ: Вои́стиннꙋ тѧ̀ мт҃рь бж҃їю и҆сповѣ́дꙋемъ и҆́стиннꙋю бцⷣꙋ, твои́мъ ржⷭ҇тво́мъ тлѣ́ннагѡ ѡ҆сꙋжде́нїѧ и҆зба́вльшїисѧ, милосе́рдїѧ ра́ди чл҃вѣколю́бца бг҃а, къ жи́зни нетлѣ́ннѣй по́звани бы́хомъ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ, бж҃е на́шъ.

Въ дꙋшѝ свое́й бжⷭ҇твєннаѧ бога̑тства дх҃а ст҃а́гѡ собра́въ, непоро́чнꙋ мл҃твꙋ, и҆ чистотꙋ̀ краснолѣ́пнꙋ, бдѣ́нїе и҆ воздержа́нїе: сегѡ̀ ра́ди жили́ще ст҃ѣ́й трⷪ҇цѣ ꙗ҆ви́сѧ.

Ри́знꙋю хꙋ́дость и҆мѣ́лъ є҆сѝ, пребога́те, въ зимѣ́ же и҆ лѣ́тѣ не премѣнѧ́ѧ, болѣ́зненнѡ претерпѣ́лъ є҆сѝ бг҃а ра́ди соверше́ннѡ: тѣ́мже нбⷭ҇нагѡ прїѧ́тїѧ наслѣ́дникъ бы́ти сподо́билсѧ є҆сѝ.

На землѝ ꙗ҆́кѡ а҆́гг҃лъ бг҃ꙋ послꙋжи́лъ є҆сѝ всѧ́чески, и҆ ны́нѣ ᲂу҆ негѡ̀ со безпло́тными и҆ съ преподо́бными ра́достнѡ ликꙋ́еши, преблаже́нне дими́трїе, бл҃гоꙋха̑нїѧ же чꙋде́съ на́мъ и҆спꙋсти́лъ є҆сѝ.

Бг҃оро́диченъ: Бжⷭ҇твенное сло́во въ ложесна́хъ твои́хъ прїѧ́ла є҆сѝ, бцⷣе дв҃о мр҃і́е, и҆ па́че є҆стества̀ родила̀ є҆сѝ: є҆го́же молѝ, ѿ бѣ́дъ всѧ́кихъ на́съ и҆зба́вити, рабы̑ твоѧ̑ пою́щыѧ тѧ̀.

Конда́къ, гла́съ и҃.

Ѿ ю҆́ности, прпⷣбне, крⷭ҇тъ тво́й взе́мъ, хрⷭ҇тꙋ̀ послѣ́довалъ є҆сѝ, въ моли́твахъ и҆ поще́нїихъ, во бдѣ́нїихъ же и҆ ѕлострада́нїихъ пло́ть твою̀ и҆знꙋрѧ́ѧ: тѣ́мже и҆ всеви́дѧщее ѻ҆́ко твоѧ̑ трꙋды̀ ви́дѣвъ, чꙋдесы́ тѧ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, преподо́бне ѻ҆́тче дими́трїе, по́стникѡвъ ᲂу҆добре́нїе.

І҆́косъ:

Бжⷭ҇твенными добродѣ́тельми твои́ми себѐ, мꙋ́дре, ᲂу҆краси́лъ є҆сѝ, сп҃сꙋ хрⷭ҇тꙋ̀ жили́ще содѣ́лавъ, ѻ҆́тче мꙋ́жественнѣ: ꙗ҆́коже зла́то и҆скꙋси́лсѧ є҆сѝ вѣ́рою къ бг҃ꙋ, и҆ наде́ждею и҆ любо́вїю ѻ҆бѣ́ты полага́ѧ, воздержа́нїемъ пости́всѧ ꙗ҆́кѡ безпло́тенъ, въ цѣломꙋ́дрїи и҆ во смире́нїи возне́слсѧ є҆сѝ. тѣ́мже и҆ мы̀ моли́твами твои́ми просвѣ́щшесѧ, прпⷣбне дими́трїе, вопїе́мъ тѝ: ра́дꙋйсѧ, ꙗ҆́кѡ и҆зъ мла́да бг҃ꙋ послꙋжи́лъ є҆сѝ: ра́дꙋйсѧ, притека́ющымъ къ тебѣ̀ спасе́нїѧ хода́таю: ра́дꙋйсѧ, хрⷭ҇тоимени̑тымъ лю́демъ похвала̀ и҆ ᲂу҆твержде́нїе: ра́дꙋйсѧ, ꙗ҆́кѡ твои́ми моли́твами сопроти́внїи побѣжда́ютсѧ: ра́дꙋйсѧ, ꙗ҆́кѡ всѣ̑мъ просѧ́щымъ дае́ши да́ръ, ѿ гдⷭ҇а дарова́нный тѝ и҆сцѣле́нїй: ра́дꙋйсѧ, ꙗ҆́кѡ и҆ чꙋдесы́ тѧ бг҃ъ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, прпⷣбне ѻ҆́тче дими́трїе, по́стникѡвъ ᲂу҆добре́нїе.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ.

И҆̀же и҆ногда̀ притека́ющихъ, прпⷣбне дими́трїе, къ твоемꙋ̀ чꙋдотво́рномꙋ гро́бꙋ съ вѣ́рою, ка́ющихсѧ къ бг҃ꙋ грѣхѡ́въ свои́хъ, мольба́ми твои́ми ско́рченыхъ человѣ̑къ рꙋ́цѣ и҆спра́вилъ є҆сѝ, бл҃же́нне.

И҆́же и҆ногда̀ ѕлочести́ваго ра́тника бжⷭ҇твенною си́лою ѿри́нꙋлъ є҆сѝ ѿ ст҃а́гѡ твоегѡ̀ гро́ба, и҆ не ᲂу҆лꙋчи́вшъ поми́лованїѧ вско́рѣ ѻ҆бою̀ животꙋ̀ лиши́сѧ таковы́й.

И҆̀же и҆ногда̀ бл҃гоче́стнѡ бл҃гоговѣ́йнїи лю́дїе, твои́ми, свѧ́те дими́трїе, моли́твами, и҆ногда́ же кропле́нїемъ ст҃ы́ѧ воды̀ сщ҃е́нныѧ, разли̑чныѧ и҆сцѣлє́нїѧ прїе́млютъ припа́дающїи къ чꙋдотво́рномꙋ твоемꙋ̀ гро́бꙋ.

Бг҃оро́диченъ: И҆зба́вихомсѧ всѝ ѿ страсте́й и҆ бѣ́дъ, и҆ ѡ҆бстоѧ́нїй и҆ недꙋ́гѡвъ многоѻбра́зныхъ, мольба́ми твои́ми, пречⷭ҇таѧ бг҃ома́ти, сп҃сꙋ хрⷭ҇тꙋ̀ зовꙋ́ще: ѻ҆тє́цъ на́шихъ бж҃е, благослове́нъ є҆сѝ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Сто́лпъ ѡ҆дꙋшевле́нный, ѻ҆́тче дими́трїе, и҆ и҆сто́чникъ неѡскꙋ́дный вои́стиннꙋ, слѣпы̑ѧ просвѣща́ѧ, разсла́блєнныѧ ᲂу҆крѣплѧ́ѧ, и҆ бѣ́сы прогонѧ́ѧ, не то́кмѡ ᲂу҆ гро́ба, но и҆ на мѣ́стѣхъ, и҆дѣ́же и҆́мѧ твоѐ нарица́ютъ съ любо́вїю.

Ꙗ҆́коже дрꙋгі́й и҆лїа̀ ꙗ҆ви́всѧ, сꙋгꙋ́бꙋ благода́ть на́мъ да́лъ є҆сѝ, твоѧ̑ честны̑ѧ мо́щи, точи́ти и҆сцѣлє́нїѧ тре́бꙋющымъ, ꙗ҆вле́нїемъ же твои́мъ и҆ по сме́рти, преподо́бне ѻ҆́тче дими́трїе, и҆ны́хъ ѕлы́хъ ᲂу҆страша́ѧ, и҆ па́че и҆ны̑мъ и҆сцѣлє́нїѧ творѧ̀ вѣ̑рнымъ.

И҆ногда̀ прⷪ҇ро́ческимъ да́ромъ ѿ бг҃а, блаже́нне, почте́нъ бы́лъ є҆сѝ, всѧ́чески же тре́бꙋющымъ ми́лостивъ пока́зовалсѧ є҆сѝ: и҆ ны́нѣ, ѻ҆́тче дими́трїе, ми́лостивомꙋ сп҃сꙋ за ны̀ моли́сѧ, воспѣва́ющыѧ и҆ превозносѧ́щыѧ є҆го̀ во вѣ́ки.

Бг҃оро́диченъ: Ра́дꙋйсѧ, прⷭ҇то́ле гдⷭ҇ень ѻ҆гнезра́чный, ра́дꙋйсѧ, две́ре невеще́ственнагѡ блиста́нїѧ: ра́дꙋйсѧ, ѻ҆́блаче, сл҃нце возсїѧ́вшїй пра́ведное хрⷭ҇та̀ сп҃са на́шего: є҆го́же превозно́симъ во вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

Ꙗ҆вле́нїемъ бжⷭ҇твеннымъ сїѧ́еши, ѻ҆́тче дими́трїе преподо́бне, ꙗ҆́коже ѡ҆бѣща́лсѧ є҆сѝ, блаже́нне, моли́твою гра́дъ тво́й сохрани́лъ є҆сѝ ѿ хотѧ́щихъ воева́ти безъ вины̀ лю́ди твоѧ̑, свѧ́те.

Ѿ бг҃а показа́лсѧ є҆сѝ на́мъ цѣли́тель недꙋ́гꙋющымъ въ паде́нїихъ, ѡ҆чи́стникъ же, блаже́нне, и҆ прогони́тель лꙋка́выхъ дꙋхѡ́въ: тѣ́мъ тѧ̀ всѝ велича́емъ.

А҆́ще и҆ преста́вилсѧ є҆сѝ ѿ на́съ, ѻ҆́тче дими́трїе, въ хра́мѣхъ бжⷭ҇твенныхъ ст҃ѣ́й трⷪ҇цѣ предстоѧ̀, хра́мъ дх҃ꙋ ст҃о́мꙋ бы́лъ є҆сѝ: моли́сѧ за всѧ̑ хрїстїа́ны, и҆́ноки же и҆ простцы̀, тебѐ велича́ющыѧ.

Бг҃оро́диченъ: Вои́стиннꙋ, бцⷣе, тобо́ю спа́сшїисѧ и҆сповѣ́дꙋемъ тѧ̀, дв҃о влⷣчце, ꙗ҆́кѡ родила̀ є҆сѝ на́мъ бг҃а сп҃си́телѧ, є҆ди́наго ѿ трⷪ҇цы сн҃а и҆ сло́ва, крⷭ҇то́мъ разо́ршаго сме́рть: є҆го́же ѡ҆ на́съ съ преподо́бнымъ дими́трїемъ молѝ тебѐ велича́ющихъ.

Свѣти́ленъ.

Мїрска́гѡ пристра́стїѧ ꙗ҆́кѡ ѿ скве́рны ᲂу҆клони́лсѧ є҆сѝ, и҆ а҆́лчбою пло́ть ᲂу҆вѧди́лъ є҆сѝ, ѻ҆́тче, и҆ нбⷭ҇ною сла́вою со а҆́гг҃лы ѡ҆богати́лсѧ є҆сѝ: тѣ́мже непреста́ннѡ молѝ ѡ҆ на́съ хрⷭ҇та̀ бг҃а, преподо́бне дими́трїе.

Бг҃оро́диченъ: Тѧ̀ предста́тельницꙋ и҆́мамы всѝ грѣ́шнїи ѽ прест҃а́ѧ дв҃о! ты̀ благопремѣ́нна сотворѝ сн҃а твоего̀ ма́терними твои́ми моли́твами.