Канон святому преподобному благоверному князю Олегу Брянскому

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Застꙋ́пника те́плаго брѧ́нскїѧ землѝ, кнѧзе́й похвалꙋ̀ и҆ мона́хѡвъ ᲂу҆добре́нїе, прпⷣбнаго ѻ҆ле́га воспои́мъ, то́й бо си́лою крⷭ҇та̀ стра̑сти и҆ безплѡ́тныѧ врагѝ побѣди́лъ є҆́сть.

А҆́гг҃льски на землѝ пожи́лъ є҆сѝ, кнѧ́же ѻ҆ле́же, бл҃га́гѡ ко́рене кнѧзе́й черни́говскихъ добропло́днаѧ ѻ҆́трасль бы́въ, и҆ ꙗ҆́кѡ воево́да нбⷭ҇нагѡ цр҃ѧ̀, ѻ҆те́чество на́ше ны́нѣ ѡ҆гражда́еши.

Смире́нїю цр҃ѧ̀ ца́рствꙋющихъ подража́ѧ, вла́сть и҆ че́сть, сла́вꙋ и҆ бога́тство хрⷭ҇та̀ ра́ди во ᲂу҆ме́ты вмѣни́лъ є҆сѝ, и҆ слеза́ми по́стническими велїа́ровꙋ горды́ню потопи́лъ є҆сѝ.

Бг҃оро́диченъ: Твоегѡ̀ пече́рскагѡ ѻ҆́браза въ предѣ́лы брѧ̑нскїѧ пренесе́нїе вѣ́даѧ и҆ роди́телѧ своегѡ̀ ѿ слѣпоты̀ и҆сцѣле́нїе зрѧ̀, кнѧ́зь ѻ҆ле́гъ воспѣва́ше бл҃года́ть твою̀, пречⷭ҇таѧ.

Пѣ́снь г҃.

І҆рмо́съ: Весели́тсѧ ѡ҆ тебє̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Оу҆тверди́лъ є҆сѝ зе́млю и҆ лю́ди твоѧ̑ въ вѣ́рѣ правосла́внѣй, прпⷣбне, кнѧже́нїемъ бл҃гозако́ннымъ и҆ пѡ́двиги мона́шескими.

Пе́рвꙋю въ землѝ брѧ́нстѣй ѻ҆би́тель ѡ҆снова́лъ є҆сѝ, ст҃е ѻ҆ле́же, ꙗ҆́кѡ ка́мень краеꙋго́льный вѣ́ры, во и҆́мѧ а҆пⷭ҇лъ первоверхо́вныхъ.

Ни́вы новонасажде́нныѧ дѣ́латель ᲂу҆се́рдный ꙗ҆ви́лсѧ є҆сѝ, бл҃же́нне, тѣ́мже доны́нѣ плода́ми трꙋдѡ́въ твои́хъ ѡ҆сщ҃а́емсѧ.

Бг҃оро́диченъ: И҆сто́чникъ и҆сцѣле́нїй бли́з̾ све́ны рѣкѝ ѿкры́сѧ чꙋдотво́рнаѧ і҆кѡ́на бг҃омт҃ре. є҆ѧ́же бл҃года́тїю ᲂу҆крѣплѧ́емь, кнѧ́зь ѻ҆ле́гъ мі́ръ коне́чнѣ ѡ҆ста́вилъ є҆́сть.

Сѣда́ленъ, гла́съ и҃:

Смиренномꙋ́дреннѡ ца́рства земна́гѡ ᲂу҆дали́выйсѧ, во и҆́ноцѣхъ тезоиме́нствомъ ца́рскимъ нарече́нъ бы́лъ є҆сѝ, кнѧ́же ѻ҆ле́же, во зна́менїе ᲂу҆гото́ваннагѡ тѝ нбⷭ҇нагѡ ца́рствїѧ, и҆дѣ́же ны́нѣ, ꙗ҆́кѡ црⷭ҇кое сщ҃е́нїе, добродѣ́тєли возвѣща́еши хрⷭ҇та̀ бг҃а, призва́вшагѡ тѧ̀ въ чꙋ́дный сво́й свѣ́тъ.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Крⷭ҇тъ сво́й взе́мъ, себє̀ и҆ мі́ра ѿве́рглсѧ є҆сѝ, прпⷣбне, и҆ всѧ̑ кѡ́зни вра̑жїѧ си́лою возлюби́вшагѡ тѧ̀ хрⷭ҇та̀ побѣди́лъ є҆сѝ.

А҆га́рѧнъ дре́вле и҆ ѕловѣ́рныхъ нахожде́нїе па́че меча̀ мл҃твою ѿража́лъ є҆сѝ, и҆ ны́нѣ ѻ҆те́чество на́ше ѿ ѕлы́хъ застꙋпле́нїемъ твои́мъ и҆зба́ви.

Землѧ̀ брѧ́нскаѧ красꙋ́етсѧ дре́вомъ, тобо́ю насажде́ннымъ при и҆схо́дищихъ во́дъ правосла́вїѧ, пита́ющимъ на́съ и҆ покрыва́ющимъ.

Бг҃оро́диченъ: Є҆гда̀ и҆́ноцы созда̑нныѧ тобо́ю, кнѧ́же, ст҃ы́ѧ ѻ҆би́тели принесо́ша ѿ кі́ева і҆кѡ́нꙋ пречⷭ҇тыѧ, тогда̀ си́ла є҆ѧ̀ въ чꙋдесѣ́хъ ꙗ҆ви́сѧ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.

Ме́чь бж҃їй ѻ҆боюдꙋѻ́стрый и҆менꙋ́емъ тѧ̀, ст҃е, дꙋшеврє́днаѧ бо посѣка́еши: въ кнѧже́нїи бл҃говѣ́рїемъ, во и҆́ночествѣ же преподо́бїемъ.

Лицѐ твоѐ въ ча́съ кончи́ны просвѣти́сѧ, бг҃обл҃же́нне ѻ҆ле́же, и҆ ꙗ҆́кѡ бл҃гі́й ра́бъ и҆ вѣ́рный въ ра́дость гдⷭ҇а твоегѡ̀ вше́лъ є҆сѝ.

И҆збавлѧ́еши ѿ бѣ́дъ въ нощѝ грѣхо́внѣй блꙋжда́ющихъ, ст҃че, нб҃а цр҃ко́внагѡ кро́ткаѧ ѕвѣздо̀ и҆ къ свѣ́тꙋ невече́рнемꙋ пꙋтеводи́телю.

Бг҃оро́диченъ: Бл҃гослове́ннаѧ влⷣчце, просвѣтѝ на́съ свѣ́томъ сн҃а твоегѡ̀, ꙗ҆́коже дре́вле ѻ҆́чи бл҃говѣ́рнагѡ кнѧ́зѧ рѡма́на.

Пѣ́снь ѕ҃.

І҆рмо́съ: Пожрꙋ̀ тѝ со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти и҆з̾ ре́бръ твои́хъ и҆сте́кшею кро́вїю.

Рꙋ́сскаѧ цр҃ковь дне́сь всѣ́хъ созыва́етъ къ похвалѣ̀ ᲂу҆го́дника хрⷭ҇то́ва, прпⷣбнагѡ кнѧ́зѧ ѻ҆ле́га, ѿ землѝ брѧ́нскїѧ ѻ҆те́чествꙋ на́шемꙋ возсїѧ́вшагѡ.

Ꙗ҆ви́лсѧ є҆сѝ, прпⷣбне ѻ҆ле́же, правосла́вныѧ вѣ́ры пра́вило, мона́хѡмъ ѻ҆́бразъ, лю́демъ предста́тель те́плый, гра́дꙋ и҆ ѻ҆би́тели твое́й ѡ҆гражде́нїе.

Наслѣ́дїе нбⷭ҇ное и҆ чꙋде́съ бл҃года́ть, воздаѧ́нїе ѿ бг҃а прїѧ́лъ є҆сѝ, ст҃е ѻ҆ле́же, тѣ́мже не преста́й млⷭ҇тивнѡ посѣща́ти тѧ̀ почита́ющыѧ.

Бг҃оро́диченъ: Све́нскїѧ і҆кѡ́ны бг҃омт҃ре ꙗ҆вле́нїе чꙋ́дное ви́дѣвъ, бл҃же, кꙋ́пнѡ со ѻ҆тце́мъ твои́мъ, ѡ҆сщ҃е́ннымъ собо́ромъ и҆ людьмѝ мно́гими бл҃годаре́нїе бг҃ꙋ возсыла́ше.

Конда́къ, гла́съ в҃:

Застꙋ́пниче те́плый брѧ́нскїѧ землѝ, прпⷣбне кнѧ́же ѻ҆ле́же, кꙋ́пнѡ со ст҃ы́ми сро́дники твои́ми прⷭ҇то́лꙋ бж҃їю ны́нѣ предстоѧ̀, мл҃твами твои́ми правосла́вїе ᲂу҆твердѝ, є҆́рєси и҆ раско́лы разорѝ, ѻ҆те́чествꙋ на́шемꙋ ми́ръ и҆ дꙋша́мъ на́шымъ полє́знаѧ и҆спросѝ.

І҆́косъ:

Ѿве́рзи чтⷭ҇на̑ѧ ᲂу҆ста̀ твоѧ̑, ѻ҆ле́же бл҃горо́дне, и҆ та́йнѡ глаго́ли во ᲂу҆шеса̀ серде́цъ на́шихъ: ка́кѡ трꙋдѡ́мъ равноапⷭ҇льнагѡ влади́мїра ревнꙋ́ѧ, ѻ҆би́тель первоверхо́вныхъ а҆пⷭ҇лъ во гра́дѣ брѧ́нскѣ ѡ҆снова́лъ є҆сѝ; ка́кѡ, нїко́лѣ свѧто́ши и҆ и҆́горю стрⷭ҇тоте́рпцꙋ подо́бѧсѧ, мі́ра ѿве́рглсѧ є҆сѝ; ка́кѡ послѣ́дꙋѧ пра́дѣдꙋ мїхаи́лꙋ, безкро́вное мч҃нчество въ по́двизѣхъ мона́шескихъ воспрїѧ́лъ є҆сѝ и҆ бл҃гоче́стїе роди́телѧ твоегѡ̀ наслѣ́довалъ є҆сѝ; ѽ цвѣ́те кра́сный дре́ва вели́кагѡ кнѧзе́й рꙋ́сскихъ! мл҃твами твои́ми правосла́вїе въ землѝ на́шей ᲂу҆твердѝ, є҆́рєси и҆ раско́лы разорѝ, ѻ҆те́чествꙋ на́шемꙋ ми́ръ и҆ дꙋша́мъ на́шымъ полє́знаѧ и҆спросѝ.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Кнѧже́нїе и҆ ро́дъ ѡ҆ста́вилъ є҆сѝ, ѻ҆гне́мъ любвѐ бж҃їѧ распала́ѧсѧ и҆ крѣ́пкѡ подвиза́ѧсѧ въ чи́нѣ мона́шестѣмъ, бл҃же. тѣ́мже и҆ ны́нѣ съ прпⷣбныхъ ли̑ки ра́дꙋешисѧ.

И҆зба́витисѧ є҆́зера ѻ҆́гненнагѡ чл҃вѣколю́бца бг҃а молѝ, прпⷣбне, почита́ющымъ любо́вїю ст҃ꙋ́ю па́мѧть твою̀ и҆ добродѣ́телемъ твои̑мъ подража́ющымъ.

Ꙗ҆́коже зла́то ѻ҆гне́мъ, дꙋ́шꙋ и҆ тѣ́ло и҆скꙋси́въ воздержа́нїемъ и҆ мл҃твою, прпⷣбне, въ порфѵ́рѣ чистоты̀ над̾ страстьмѝ водвори́лсѧ є҆сѝ.

Бг҃оро́диченъ: Всѧ̑ ѡ҆крє́стныѧ зе́мли, є҆ли̑ка ви́дѣ и҆сцѣле́нныма ѻ҆чи́ма кнѧ́зь рѡма́нъ, ѻ҆би́тели твое́й, влⷣчце, дарова̀, сы́нъ же є҆гѡ̀ себѐ сама́го въ же́ртвꙋ сн҃ꙋ твоемꙋ̀ принесѐ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Є҆ли́кѡ вели́къ въ правосла́вномъ кнѧже́нїи бы́лъ є҆сѝ, толи́кѡ въ мона́шестѣмъ дѣ́ланїи смири́лъ є҆сѝ себѐ, прпⷣбне ѻ҆ле́же, тѣ́мже и҆ бг҃ъ тѧ̀ превознесѐ и҆ дарова́ тѝ чꙋде́съ бл҃года́ть.

Ре́вность ве́лїю показа́лъ є҆сѝ ко бл҃гоче́стїю, преизрѧ́денъ бы́въ ѻ҆́бразъ лю́демъ и҆ ᲂу҆ченикѡ́мъ твои̑мъ, ѿ младе́нства бо воспита́всѧ въ зако́нѣ гдⷭ҇ни, чрез̾ всѐ житїѐ во́лю бж҃їю и҆спо́лнити тща́лсѧ є҆сѝ.

Ѡ҆дѣѧ́нїѧ хꙋ́дость не ѡ҆мрачѝ дѣ́вственныѧ красоты̀ дꙋшѝ твоеѧ̀, бл҃же́нне, бдѣ́нїе же дꙋше́внѣи твоѝ ѻ҆́чи просвѣтѝ, и҆ трꙋды̀ тѧ́жцыи пло́ть твою̀ дꙋ́хꙋ покори́ша.

Бг҃оро́диченъ: Ю҆́же дре́вле и҆збра́ла є҆сѝ го́рꙋ въ предѣ́лѣхъ брѧ́нскихъ во ѻ҆би́тель и҆́нокѡмъ и҆ ѻ҆́бразомъ твои́мъ све́нскимъ ѡ҆ст҃и́ла є҆сѝ, пренепоро́чнаѧ, невреди́мꙋ сохранѝ, да воспѣва́етсѧ въ не́й и҆́мѧ сн҃а твоегѡ̀ во вѣ́ки.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Ча́ѧнїемъ бꙋ́дꙋщихъ бла̑гъ веселѧ́сѧ, тѣ́снымъ и҆ приско́рбнымъ пꙋте́мъ ше́ствовалъ є҆сѝ, воздержа́нїю же, кро́тости, смире́нїю и҆ послꙋша́нїю навы́кнꙋвъ, ли́кꙋ ст҃ы́хъ совокꙋпи́лсѧ є҆сѝ.

Трꙋдолю́бное по бз҃ѣ житїѐ ѿ ю҆́ности возлюби́въ, прпⷣбне кнѧ́же, въ мѣ́рꙋ во́зраста хрⷭ҇то́ва дости́глъ є҆сѝ, и҆ ꙗ҆́кѡ кла́съ зрѣ́лый, въ нбⷭ҇ныѧ жи̑тницы пожа́лсѧ є҆сѝ.

И҆́мамы ст҃ы̑ѧ мо́щи твоѧ̑, бг҃оно́сне кнѧ́же, ꙗ҆́кѡ сокро́вище неистощи́мое и҆ ᲂу҆тѣше́нїе ве́лїе дꙋша́мъ и҆ тѣлесє́мъ на́шымъ, тѣ́мже тѧ̀ велича́емъ.

Бг҃оро́диченъ: Мт҃и бж҃їѧ пречⷭ҇таѧ, мл҃твами прпⷣбнагѡ кнѧ́зѧ ѻ҆ле́га и҆ ст҃ы́хъ срѡ́дникъ є҆гѡ̀ сп҃сѝ зе́млю рꙋ́сскꙋю и҆ вѣ̑рныѧ лю́ди твоѧ̑ ᲂу҆тѣ́ши, и҆̀же тѧ̀ досто́йнѡ велича́ютъ.

Свѣти́ленъ:

Оу҆́треневавъ къ бг҃ꙋ вы́нꙋ, тьмы̀ вѣ́чныѧ и҆збѣ́глъ є҆сѝ, прпⷣбне кнѧ́же ѻ҆ле́же, сегѡ̀ ра́ди въ ча́съ кончи́ны лицѐ твоѐ просвѣти́сѧ, и҆ мо́щи твоѧ̑ чтⷭ҇ны̑ѧ доны́нѣ сїѧ́ютъ нетлѣ́нїемъ и҆ чꙋдесы̀.