Канон святому преподобному Антонию Печерскому

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Ѕѣ́льнымъ воздержа́нїемъ и҆ трꙋды̑, ѻ҆́тче а҆нтѡ́нїе, и҆ всено́щнымъ стоѧ́нїемъ, дꙋ́шꙋ твою̀ цр҃ѧ̀ надъ страстьмѝ тѣле́сными поста́вилъ є҆сѝ. тѣ́мже со свѧты́ми веселѧ́щесѧ хрⷭ҇та̀ пое́мъ, тебѣ̀ таковꙋ̀ побѣ́дꙋ на стра̑сти дарова́вшаго.

Приспѣ̀ дне́сь всечестны́й де́нь ᲂу҆спе́нїѧ твоегѡ̀, ѻ҆́тче а҆нтѡ́нїе, бога́тнѡ веселѧ̀ ча̑да твоѧ̑, всече́стне. тѣ́мже помина́юще твоѐ дре́внее житїѐ, и҆ а҆́гг҃льскꙋю жи́знь, свѣ́тлѡ пра́зднꙋюще, тебѐ воспѣва́емъ, ѻ҆́тче.

Ѿ те́мныхъ мѣ́стъ восхи́тивсѧ, къ превы̑шнимъ свѣ́тлостемъ пресла́внѡ преше́лъ є҆сѝ, прпⷣбне, и҆ та́мѡ со ст҃ы́ми ꙗ҆́кѡ побѣди́тель страсте́й, ѻ҆́тче, вѣнча́лсѧ є҆сѝ.

Бг҃оро́диченъ: Лю́тѣ погрꙋжа́емꙋю дꙋ́шꙋ мою̀ въ пꙋчи́нѣ страсте́й, бꙋ́рею безмѣ́рныхъ ѡ҆бстоѧ́нїй, спасе́нїѧ просте́рши мѝ рꙋ́кꙋ, возведѝ, влⷣчце, и҆зъ глꙋбины̀ ѕѡ́лъ мои́хъ.

И҆́нъ. Гла́съ в҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Є҆щѐ ѿ ма́лыѧ версты̀, прпⷣбне а҆нтѡ́нїе, вели́кꙋ любо́вь стѧжа́лъ є҆сѝ къ бг҃ꙋ: и҆ сегѡ̀ ра́ди плотска̑ѧ взыгра̑нїѧ и҆ стра̑сти до конца̀ ᲂу҆мертви́лъ є҆сѝ: и҆ чистото́ю ꙗ҆́коже кри́лы впери́всѧ пресла́внѡ, къ нб҃сє́мъ возлетѣ́лъ є҆сѝ, ѻ҆́тче.

Влⷣчнемꙋ любостра́нствꙋ, прпⷣбне, подо́бѧсѧ, са́мъ стра́нствовати и҆зво́лилъ є҆сѝ, а҆нтѡ́нїе: тѣ́мже всеви́дѧщее ѻ҆́ко, ви́дѧ твоѐ благо́е произволе́нїе, да́ромъ чꙋде́съ ѡ҆богати́ тѧ, ꙗ҆́кѡ пресла́вна.

Дꙋше́внꙋю ти́хость и҆ любо́вь, ꙗ҆́же къ бг҃ꙋ, нра̑вы и҆ ѻ҆бы̑чаи благи́ми ᲂу҆кра́шена тѧ̀ ви́дѣвъ тво́й дꙋхо́вный настоѧ́тель, прпⷣбне, проро́чески всѣ̑мъ проповѣ́дꙋетъ, хотѧ̑щаѧ напослѣ́докъ тобо́ю бы́ти пресла̑внаѧ, а҆нтѡ́нїе.

Бг҃оро́диченъ: Мои́хъ прегрѣше́нїй, влⷣчце, плени̑цы расто́ргни, твоего̀ сн҃а и҆ бг҃а молѧ́щи, и҆ томѧ́щїй мѧ̀ грѣ́хъ, приснодв҃о, низложѝ: ꙗ҆́кѡ да воспѣва́ю тѧ̀ всегда̀, пренепоро́чнаѧ, тобо́ю спаса́емь.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Проповѣ́дꙋетъ пресла́внѡ, и҆ па́че трꙋбы̀ вопїе́тъ свѧще́ннаѧ твоѧ̀, ѻ҆́тче, вели́каѧ ла́ѵра, ꙗ҆́же тобо́ю нача́ло прїе́мшаѧ: до́мъ же бж҃їѧ мт҃ре, а҆́ще и҆ не гла́сомъ, вещьми́ же хва́литсѧ, глаго́лѧ: ᲂу҆тверди́хсѧ тобо́ю, гдⷭ҇и.

Є҆ди́наго гдⷭ҇а возлюби́лъ є҆сѝ и҆ сегѡ̀ крⷭ҇тъ на ра́мо взе́мъ, прпⷣбне а҆нтѡ́нїе, страннолѣ́пнѡ пожи́лъ є҆сѝ, въ постѣ́хъ и҆ бдѣ́нїихъ, и҆ моли́твахъ ѻ҆́бразъ бы́въ твои̑мъ ᲂу҆ченикѡ́мъ. тѣ́мже и҆ ѿ хрⷭ҇та̀ просла́вилсѧ є҆сѝ.

Плотска́гѡ жела́нїѧ, прпⷣбне, ѿве́ргсѧ, го́рдость возненави́дѣлъ є҆сѝ: смире́нїемъ же и҆ нището́ю ѡ҆богати́всѧ, превысѡ́каѧ дости́глъ є҆сѝ ст҃ы́хъ жили̑ща.

Бг҃оро́диченъ: Поми́лꙋй, є҆ди́на бг҃ома́ти, поми́лꙋй, и҆ ᲂу҆ще́дри дꙋ́шꙋ мою̀ ѻ҆каѧ́ннꙋю, потоплѧ́емꙋю бѣ̑сы, и҆ страстьмѝ лꙋка́выми: и҆ пре́жде вре́мене и҆схо́да моегѡ̀ сїю̀ ѡ҆чи́стити ᲂу҆милосе́рдисѧ.

И҆́нъ.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Прозрѣ́въ бꙋ̑дꙋщаѧ воздаѧ̑нїѧ, здѣ̀ маловре́мєннаѧ ꙗ҆́кѡ не сꙋ̑щаѧ, ѻ҆́тче, ѡ҆ста́вилъ є҆сѝ: и҆ сегѡ̀ ра́ди сꙋгꙋ̑баѧ воздаѧ̑нїѧ прїѧ́лъ є҆сѝ, прпⷣбне. тѣ́мже со а҆́гг҃лы непреста́ннѡ пое́ши влⷣкꙋ твоего̀.

Моли́тисѧ, ѻ҆́тче, не преста́й ѡ҆ ста́дѣ твое́мъ, є҆́же мно́гими пѡ́ты и҆ трꙋды̑ стѧжа́лъ є҆сѝ, и҆зба́вити всѣ́хъ ѡ҆бстоѧ́нїй, бѣ́дъ же и҆ скорбе́й: да всѝ тебѐ ꙗ҆́кѡ чадолюби́ва ѻ҆тца̀ воспѣва́емъ.

Весе́лїемъ, прпⷣбне, съ чи́нми ст҃ы́хъ бг҃ꙋ предстои́ши, ꙗ҆̀же та́мѡ весе́лїѧ и҆ ра́дости насыща́ѧсѧ: сподо́би и҆ на́съ та́мѡшнѧѧ ра́дѡванїѧ полꙋчи́ти, да веселѧ́щесѧ тебѐ велича́емъ, ѻ҆́тче а҆нтѡ́нїе.

Бг҃оро́диченъ: Просте́рши рꙋ́кꙋ бл҃гоꙋтро́бїѧ, бг҃ороди́тельнице, всѧ́кагѡ мѧ̀ и҆змѝ ѡ҆сꙋжде́нїѧ, къ тебѣ̀ прибѣга́ющаго, и҆ тебѣ̀ припа́дающа, и҆ призыва́юща твою̀ по́мощь.

Сѣда́ленъ, гла́съ д҃.

Оу҆диви́сѧ тво́й дꙋхо́вный настоѧ́тель, въ тебѣ̀ вели́ко воздержа́нїе зрѧ̀, и҆ внима́ше мы́слїю хотѧ̑щаѧ ѡ҆ тебѣ̀ напослѣ́докъ бы́ти, а҆нтѡ́нїе: ви́дѣвъ бо по бз҃ѣ твоѐ вели́кое житїѐ, и҆ вра́жїими прилѡ́ги ника́коже поколеби́ма. тѣ́мже и҆ свидѣ́тельствꙋетъ, ꙗ҆́кѡ ѻ҆те́цъ и҆ храни́тель твоегѡ̀ житїѧ̀, ѻ҆тцє́мъ свѧты́ѧ горы̀ вопїѧ́ше: се́й, и҆́же посредѣ̀ на́съ ви́дитсѧ ме́ньшїй, но послѣдѝ въ рѡссі́и вели́кїй свѣти́льникъ бꙋ́детъ.

Бг҃оро́диченъ: Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.

Пѣ́снь д҃.

І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы, воплоще́нїѧ тебє̀ вы́шнѧгѡ, прⷪ҇рѡ́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Мѣ́сто, въ не́мже лежи́тъ честно́е и҆ свѧще́нное тѣ́ло твоѐ, прпⷣбне а҆нтѡ́нїе ѻ҆́тче, мнѡ́га и҆сцѣлє́нїѧ ѿтꙋ́дꙋ прїе́млютъ вѣ́рнїи, хрⷭ҇тꙋ̀ ѿ дꙋшѝ вопїю́ще: сла́ва си́лѣ твое́й, гдⷭ҇и.

Не ᲂу҆страшѝ тебє̀, прпⷣбне, долгота̀ жесто́кагѡ пꙋтѝ, нижѐ та́мѡ разбо́йническое наше́ствїе. тѣ́мже ст҃ꙋ́ю го́рꙋ доше́дъ, съ сꙋ́щими та́мѡ ѻ҆тцы̀ воспѣва́лъ є҆сѝ: сла́ва си́лѣ твое́й, гдⷭ҇и.

Ви́дѣвъ всебл҃гі́й бг҃ъ тве́рдое твоѐ и҆ до́брое и҆зволе́нїе, та́мѡ во ст҃ы́хъ мѣ́стѣхъ посредѣ̀ ѻ҆тє́цъ, сла́вна тѧ̀ сотворѧ́етъ, съ ни́миже сподо́би взыва́ти: сла́ва си́лѣ твое́й, гдⷭ҇и.

Бг҃оро́диченъ: Ко́рень и҆зъ чре́слъ тѧ̀ ца́рскихъ, всѣ́хъ цр҃ь ꙗ҆́кѡ сꙋ́щꙋ вожделѣ́въ, и҆ вы́шшꙋ херꙋві̑мъ, и҆ серафі̑мъ содѣ́лавъ, бцⷣе, всели́сѧ въ тѧ̀.

И҆́нъ.

І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Про́мысломъ бж҃їимъ па́ки ко ѻ҆те́чествꙋ твоемꙋ̀, блаже́нне, посыла́емь быва́еши: ꙗ҆́кѡ да и҆ та́мѡ мно́гихъ ко спаси́тельномꙋ пꙋтѝ наста́виши, творцꙋ̀ воспѣва́ти: сла́ва си́лѣ твое́й, гдⷭ҇и.

Оу҆пова́нїемъ бꙋ́дꙋщихъ бла̑гъ, а҆нтѡ́нїе, ᲂу҆крѣплѧ́емь, плотско́е стремле́нїе ѡ҆бꙋзда́лъ є҆сѝ, и҆ твое́й пло́ти вра́гъ неми́лостивъ, ѻ҆́тче, бы́лъ є҆сѝ: сегѡ̀ ра́ди и҆ по́мощь свы́ше стѧжа́лъ є҆сѝ.

Въ цѣломꙋ́дрїи жи́знь твою̀ препроводи́въ, прпⷣбне, земна̑ѧ нбⷭ҇ными и҆змѣни́лъ є҆сѝ, и҆ нетлѣ̑ннаѧ тлѣ́нными и҆скꙋпи́лъ є҆сѝ. тѣ́мже хрⷭ҇тꙋ̀ пое́ши: сла́ва си́лѣ твое́й, гдⷭ҇и.

Бг҃оро́диченъ: До́брыхъ всѣ́хъ ѡ҆бнажи́хсѧ, и҆ лежꙋ̀ въ ѕло́бѣ: ѡ҆болкі́й всѣ́хъ дре́вле па́дшихъ, и҆ ны́нѣ мѧ̀ пре́ждними ᲂу҆красѝ, и҆ вторы́хъ и҆зба́ви, бг҃оневѣ́сто.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Мона́шествꙋющихъ ѻ҆́бразъ, ѻ҆́тче, и҆ наказа́тель бы́лъ є҆сѝ: тѣ́мже и҆ си̑льнымъ запреща́еши, на восхище́нїе не жела́ти, но па́че маломѡ́щныѧ ми́ловати. и҆ ѿ сегѡ̀ просла́вилсѧ є҆сѝ, а҆нтѡ́нїе, и҆ вели́къ нарече́нъ ᲂу҆чи́тель ꙗ҆ви́лсѧ є҆сѝ.

Вы́шше человѣ́ка, а҆нтѡ́нїе, стѧжа́лъ є҆сѝ житїѐ, равноа́гг҃льнѡ бо пожи́въ на землѝ. тѣ́мже ра́внꙋ ꙗ҆́же а҆́гг҃лѡмъ по́честь сподо́билсѧ є҆сѝ полꙋчи́ти, и҆ пое́ши съ ни́ми влⷣкꙋ твоего̀.

Бг҃одарова̑нныѧ твоѧ̑ бл҃года̑ти, ѻ҆́тче а҆нтѡ́нїе, всѧ́къ слꙋ́хъ человѣ́ческїй ᲂу҆диви́ша, и҆ наꙋчи́ша, ꙗ҆̀же здѣ̀ мнѧ̑щаѧсѧ вели̑каѧ, ꙗ҆́кѡ ма̑ла и҆ хꙋ̑да презрѣ́ти всѧ̑, и҆ послѣ́довати стопа́мъ твои̑мъ: ѿѻнꙋ́дꙋже молѝ, прпⷣбне, спасти́сѧ на́мъ.

Бг҃оро́диченъ: Оу҆пова́нїе є҆сѝ моѐ, пречⷭ҇таѧ, и҆ спасе́нїе и҆ похвала̀. тѣ́мже прибѣга́ю къ покро́вꙋ твоемꙋ̀: не гнꙋша́йсѧ менє̀ грѣхи̑ мно́гими и҆ болѣ́зньми и҆ скорбьмѝ ны́нѣ поглоще́ннагѡ, но предвари́вши, спаси́ мѧ.

И҆́нъ.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Стра́нно твоѐ житїѐ, прпⷣбне, кꙋ́пнѡ же и҆ смире́нїе, є҆́же стѧжа́лъ є҆сѝ, а҆нтѡ́нїе, ꙗ҆́кѡ ни сама́гѡ свѣ́та тогѡ̀, и҆́же въ мі́рѣ, нижѐ со́лнечнагѡ сїѧ́нїѧ, досто́йна тебѐ тогѡ̀ вмѣни́лъ є҆сѝ зрѣ́нїѧ: но въ те́мнѣ мѣ́стѣ є҆ди́нъ тебѐ затвори́лъ є҆сѝ.

Цр҃ковь и҆ до́мъ прест҃а́гѡ дх҃а, ѻ҆́тче а҆нтѡ́нїе, бы́лъ є҆сѝ, разли́чными добродѣ́тельми ᲂу҆кра́шенъ бы́въ: смире́нїемъ го́рнюю высотꙋ̀ наслѣ́дивъ, нището́ю нбⷭ҇ное бога́тство прїѧ́лъ є҆сѝ, прпⷣбне.

Па́мѧть твою̀ творѧ́щихъ свѧще́ннꙋю, ѿ всѧ́кихъ спасѝ прегрѣше́нїй, и҆ печа́лей, и҆ напа́стей: твоѐ бжⷭ҇твенное да́рꙋй застꙋпле́нїе, всѣ́хъ цр҃ю̀ предстоѧ́й, ѻ҆́тче а҆нтѡ́нїе.

Бг҃оро́диченъ: Ꙗ҆́кѡ невече́рнїй свѣ́тъ, ѿ чре́ва твоегѡ̀ сꙋ́щїй возсїѧ́вшїй, ѡ҆темне́ннꙋю дꙋ́шꙋ мою̀ ѡ҆зарѝ, влⷣчце чⷭ҇таѧ, и҆ ѿженѝ всѧ́кꙋ мглꙋ̀ се́рдца моегѡ̀.

Пѣ́снь ѕ҃.

І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Всегда́шнимъ къ бг҃ꙋ раче́нїемъ внѣ̀ пло́ти и҆ мі́ра, ѻ҆́тче а҆нтѡ́нїе, бы́лъ є҆сѝ: тѣ́мже и҆ жили́ще досто́йно дх҃а прест҃а́гѡ показа́лсѧ є҆сѝ, ꙗ҆́коже и҆ са́мъ хрⷭ҇то́съ речѐ: прише́дъ со ѻ҆ц҃е́мъ и҆ дх҃омъ, та́мѡ вселю́сѧ.

Ꙗ҆́кѡ пресла́дкїй нѣ́кїй вїногра́дъ, ст҃а́ѧ гора̀ тебѐ, ѻ҆́тче, и҆зрасти́вши, пресла́внѡ тобо́ю красꙋ́етсѧ, и҆ ра́дꙋющисѧ хрⷭ҇та̀ прославлѧ́етъ, тебѐ си̑мъ дарова́вшаго.

Но́щь ꙗ҆́кѡ де́нь, и҆ де́нь ꙗ҆́кѡ но́щь, тебѣ̀ вмѣнѧ́шесѧ, а҆нтѡ́нїе: не да́лъ бо є҆сѝ, по проро́кꙋ, сна̀ ѻ҆чи́ма твои́ма, ни вѣ́ждома дрема́нїѧ, нижѐ поко́ѧ тѣлесѝ твоемꙋ̀, до́ндеже сїѐ чи́сто съ дꙋше́ю бг҃ꙋ предста́вилъ є҆сѝ.

Бг҃оро́диченъ: Твою̀ пода́ждь мѝ по́мощь, и҆ и҆зба́ви мѧ̀ бѣ́дъ и҆ скорбе́й, и҆ прегрѣше́нїй мои́хъ, ꙗ҆́же всѣ́хъ ро́ждшаѧ при́сное и҆збавле́нїе.

И҆́нъ.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Ꙗ҆́кѡ свобожде́на бы́вши блаже́ннаѧ твоѧ̀ дꙋша̀ ѿ тѧ́жести плотскі́ѧ, и҆ ѿ го́рькагѡ фараѡ́на мꙋчи́телѧ, мі́ра сегѡ̀ и҆зше́дши, въ зе́млю ѡ҆бѣтова́нїѧ ра́йскагѡ пре́йде немѧте́жнѡ, со ст҃ы́ми пребыва́етъ веселѧ́щисѧ.

Ны́нѣ свѧще́нное тѣ́ло твоѐ, прпⷣбне, въ пеще́рѣ лежа́щее, и҆сцѣлє́нїѧ мнѡ́гаѧ и҆сточа́етъ вѣ́рою приходѧ́щымъ. тѣ́мже мо́лимъ тѧ̀, и҆ дꙋшє́внаѧ здра̑вїѧ мольба́ми твои́ми пода́ждь тебѐ сла́вѧщымъ.

Свѣтлѣ́йши со́лнца возсїѧ̀, пречестна́ѧ па́мѧть твоѧ̀, а҆нтѡ́нїе, въ ню́же соше́дшесѧ прославлѧ́емъ твоѐ ᲂу҆спе́нїе и҆ трꙋды̀, ꙗ҆̀же претерпѣ́лъ є҆сѝ въ жи́зни се́й, просѧ́ще ѿ хрⷭ҇та̀ тобо́ю прїѧ́ти грѣхѡ́въ ѡ҆ставле́нїе.

Бг҃оро́диченъ: Красоты̑ мѧ̀ ви́дѣти сла́вы твоеѧ̀ сподо́би, є҆гда̀ ѿ пло́ти моеѧ̀ хощꙋ̀ разлꙋчи́тисѧ, ꙗ҆́кѡ ᲂу҆твержде́нїе моѐ є҆сѝ, влⷣчце: да ѿсю́дꙋ прїимꙋ̀ и҆збавле́нїе.

Конда́къ, гла́съ и҃.

Возложи́въ себѐ бг҃ꙋ, па́че всѣ́хъ возлю́бленномꙋ ѿ ю҆́ности, прпⷣбне, томꙋ̀ ѿ всеѧ̀ дꙋшѝ любо́вїю послѣ́довалъ є҆сѝ: мі́ра же тлѣ̑ннаѧ нивочто́же вмѣни́въ, въ землѝ пеще́рꙋ содѣ́лалъ є҆сѝ, и҆ въ не́й до́брѣ проти́вꙋ неви́димагѡ врага̀ ко́зней подвиза́всѧ, ꙗ҆́кѡ свѣтоза́рное со́лнце во всѧ̑ концы̀ землѝ возсїѧ́лъ є҆сѝ: ѿѻнꙋ́дꙋже веселѧ́сѧ преше́лъ є҆сѝ къ нбⷭ҇нымъ черто́гѡмъ. и҆ ны́нѣ со а҆́гг҃лы влⷣчню престо́лꙋ предстоѧ̀, помина́й на́съ чтꙋ́щихъ па́мѧть твою̀, да зове́мъ тѝ: ра́дꙋйсѧ, а҆нтѡ́нїе ѻ҆́тче на́шъ.

І҆́косъ:

Присносꙋ́щнагѡ немерца́ющагѡ свѣ́та ст҃ы́ѧ трⷪ҇цы наслади́тисѧ жела́ѧ, и҆ сегѡ̀ ра́ди четыредесѧтолѣ́тное вре́мѧ, въ є҆ди́ной пеще́рѣ те́мнѣ тебѐ затвори́въ, ѿтꙋ́дꙋ неисхо́денъ, ѻ҆́тче, пребы́лъ є҆сѝ, до́ндеже тѣ́ло твоѐ чи́сто съ дꙋше́ю бг҃ꙋ предста́вилъ є҆сѝ. ѿѻнꙋ́дꙋже и҆ по преставле́нїи, ꙗ҆́кѡ жи́въ, ѿ гдⷭ҇а дарова̑нїѧ чꙋде́съ прїѧ́лъ є҆сѝ, и҆сцѣлѧ́ти разли̑чныѧ болѣ̑зни ѕлѣ̀ стра́ждꙋщихъ, и҆ бѣ́сы ѿ человѣ̑къ приходѧ́щихъ и҆згони́ти. тѣ́мже мо́лимъ тѧ̀: моли́сѧ, ѻ҆́тче, сохрани́ти безъ вре́да ѻ҆те́чество твоѐ, гра́дъ же и҆ лю́ди, да зове́мъ тѝ: ра́дꙋйсѧ, а҆нтѡ́нїе ѻ҆́тче на́шъ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.

Повелѣ́нїемъ дꙋхо́внагѡ твоегѡ̀ настоѧ́телѧ, бл҃же́нне а҆нтѡ́нїе, па́ки ко ѻ҆те́чествꙋ твоемꙋ̀ посыла́емь быва́еши. тѣ́мже речє́ннаѧ тебѣ̀ ѻ҆тце́мъ, ꙗ҆́кѡ ѿ бг҃а повелѣ̑ннаѧ сотвори́лъ є҆сѝ: и҆дѣ́же прише́дъ, ѻ҆́тче, мно́гихъ дꙋ́шы гдⷭ҇ꙋ приве́лъ є҆сѝ.

Ст҃ѣ́йшагѡ мѣ́ста, прпⷣбне а҆нтѡ́нїе, ꙗ҆́кѡ дости́глъ, мно́гихъ житїе́мъ твои́мъ ᲂу҆диви́лъ є҆сѝ: вы́ше бо человѣ́ка воспрїе́мъ житїѐ, и҆́мже мно́гихъ мїрска̑ѧ презира́ти сотвори́лъ є҆сѝ.

А҆рхїепі́скопа і҆ларїѡ́на пеще́рꙋ ꙗ҆́кѡ ѡ҆брѣ́тъ, трꙋдолю́бнѣ въ не́й пожи́лъ є҆сѝ, прпⷣбне, въ моли́твахъ и҆ поще́нїихъ, до́ндеже и҆́нꙋю пеще́рꙋ себѣ̀ содѣ́лалъ є҆сѝ: въ не́йже сподо́билсѧ є҆сѝ го́рнѧгѡ зва́нїѧ.

Бг҃оро́диченъ: Человѣ́чєскїѧ напа̑сти и҆ совѣ́ты, чⷭ҇таѧ, разорѝ бж҃е́ственными моли́твами твои́ми, и҆ рабы̑ твоѧ̑ и҆зба́ви болѣ́зненныхъ прегрѣше́нїй: ꙗ҆́кѡ да приснодв҃ꙋ тѧ̀ ᲂу҆блажа́емъ.

И҆́нъ.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Вели́кагѡ трꙋдополо́жника, и҆ ревни́телѧ твоемꙋ̀ житїю̀, прпⷣбне а҆нтѡ́нїе, ѳеодо́сїа бл҃же́ннаго стѧжа́лъ є҆сѝ, а҆́гг҃льскомꙋ твоемꙋ̀ житїю̀ послѣ́дꙋюща: съ ни́мже въ вы́шнихъ водворѧ́ѧсѧ, на́съ помина́й.

Но́ваго тѧ̀ мѡѷсе́а, ѻ҆́тче, позна́хомъ, страсте́й побѣди́телѧ: ꙗ҆́коже бо ѻ҆́нъ дре́вле а҆мали́ка побѣди́въ, лю́ди и҆зведѐ: ты́ же, ѻ҆́тче, мно́жество мона́шествꙋющихъ въ зе́млю ѡ҆бѣтова́нїѧ ра́йскагѡ приве́лъ є҆сѝ.

Гра́да и҆ ѻ҆те́чества твоегѡ̀ пресе́льникъ, ѻ҆́тче, бы́лъ є҆сѝ: но па́ки бж҃їимъ промышле́нїемъ, ко ѻ҆те́чествꙋ твоемꙋ̀ сла́внѡ свидѣ́тельствованъ возвраща́ешисѧ, и҆дѣ́же благода́ть ѿ гдⷭ҇а, ѻ҆́тче, прїѧ́лъ є҆сѝ.

Бг҃оро́диченъ: Пе́щь проѡбразова́ше твоѐ ржⷭ҇тво̀, пренепоро́чнаѧ: ѻ҆́троки бо не ѡ҆палѝ, ꙗ҆́коже ни ложесна̀ твоѧ̑ ѻ҆́гнь нестерпи́мый. тѣ́мже мо́лимъ тѧ̀: ѻ҆гнѧ̀ вѣ́чнагѡ и҆зба́ви рабы̑ твоѧ̑.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Влⷣки твоегѡ̀ хрⷭ҇та̀, прпⷣбне а҆нтѡ́нїе, смире́нїю поревнова́лъ є҆сѝ: и҆ сегѡ̀ ра́ди смире́нное и҆ жесто́кое житїѐ возлюби́лъ є҆сѝ, земна́гѡ пристра́стїѧ ѿрѣва́ѧсѧ. тѣ́мже по́чести ст҃ы́хъ сподо́билсѧ є҆сѝ, и҆ съ ни́ми пое́ши гдⷭ҇а во вѣ́ки.

Твоѐ пресла́вное ᲂу҆спе́нїе пра́зднꙋющымъ, блаже́нне, моли́сѧ, и҆зба́витисѧ всѣ̑мъ ѿ разли́чныхъ напа́стей, да всѝ тебѐ прославлѧ́емъ, а҆нтѡ́нїе, и҆ превозно́симъ гдⷭ҇а во вѣ́ки.

Ѡ҆ на́съ ми́лостивно ѻ҆́ко, а҆нтѡ́нїе, простира́й ко влⷣцѣ, чадолю́бное показꙋ́ѧ, и҆ неѿлꙋ́чнѡ ѿ на́съ дꙋ́хомъ пребыва́й, прпⷣбне, ꙗ҆́коже ѡ҆бѣща́лсѧ є҆сѝ, є҆гда̀ бы́лъ є҆сѝ съ на́ми, да всѝ съ тобо́ю хрⷭ҇тꙋ̀ воспое́мъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: На моле́нїе моѐ ᲂу҆милосе́рдисѧ ны́нѣ, и҆ ра́дость мѝ въ печа́ли мѣ́стѡ да́рꙋй, да пою́ тѧ, влⷣчце, сн҃ꙋ твоемꙋ̀ воспѣва́ѧ: гдⷭ҇а по́йте дѣла̀, и҆ превозноси́те є҆го̀ во вѣ́ки.

И҆́нъ.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

И҆сцѣлє́нїѧ ѻ҆би̑льна, прпⷣбне, вѣ́рою приходѧ́щымъ ко хра́мꙋ твоемꙋ̀, и҆ сꙋ́щымъ въ ско́рбехъ ᲂу҆тѣше́нїе подава́й, да всѝ съ тобо́ю хрⷭ҇тꙋ̀ вопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а.

Благода́рное сїѐ пѣ́нїе приносѧ́щыѧ тѝ, ѻ҆́тче, свы́ше ми́лостивнѡ назира́й, и҆ молѝ хрⷭ҇та̀ и҆зба́вителѧ, спастѝ всѣ́хъ вопїю́щихъ є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.

Принесе́сѧ да́ръ вседержи́телю, тобо́ю мно́жество спаса́емыхъ, твоемꙋ̀ житїю̀ послѣ́дꙋющихъ, а҆нтѡ́нїе. тѣ́мже молѝ спасти́сѧ всѣ̑мъ, съ тобо́ю хрⷭ҇тꙋ̀ вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Вели́комꙋ та́инствꙋ ржⷭ҇тва̀ твоегѡ̀, кто̀ не ᲂу҆диви́тсѧ, бцⷣе; и҆лѝ кі́й ѧ҆зы́къ зе́менъ, и҆лѝ ᲂу҆́мъ безпло́тенъ и҆зрещѝ возмо́жетъ; па́че є҆стества́ бо и҆ смы́сла, бцⷣе, зижди́телѧ родила̀ є҆сѝ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чи́стаѧ приснодв҃о.

А҆нтѡ́нїа дре́вле просїѧ́вшагѡ, тогѡ̀ житїю̀ всѧ́чески поревнова́ти потща́лсѧ є҆сѝ. ѻ҆́нъ бо въ пꙋсты́ню є҆ди́нъ всели́сѧ: ты́ же въ пеще́рѣ є҆ди́наго себѐ затвори́лъ є҆сѝ, и҆ мно́гими лѣ́ты, ѻ҆́тче, неисхо́денъ пребы́лъ є҆сѝ.

Пече́рскомꙋ житїю̀ первонача́льникъ, и҆ наста́вникъ, ѻ҆́тче, бы́лъ є҆сѝ: и҆ та́мѡ подвиза́лсѧ є҆сѝ ꙗ҆́кѡ безпло́тенъ. тѣ́мже и҆ хрⷭ҇то́съ дарова́нїемъ чꙋде́съ ѡ҆богати́ тѧ, прпⷣбне.

Моє́ю рꙋкꙋ̀ воздѣѧ́нїе прїимѝ, прпⷣбне, влⷣчнѣй подо́бѧсѧ бл҃гости, презира́ѧ прегрѣшє́нїѧ: ты́ бо дꙋ́шꙋ ᲂу҆ѧзви́лъ є҆сѝ хрⷭ҇то́вою любо́вїю, и҆ є҆гѡ̀ пречⷭ҇тыѧ бг҃ома́тере. ю҆́же ᲂу҆молѝ спастѝ дꙋ́шы на́шѧ.

Бг҃оро́диченъ: Рꙋко́ю твое́ю, прпⷣбне а҆нтѡ́нїе, є҆́же къ бг҃ꙋ воздѣѧ́нїемъ, пресла́внѡ чꙋдодѣ́йствовасѧ, моли́твами бо твои́ми ѻ҆́гнь съ нб҃сѐ сво́диши, во ѡ҆чище́нїе мѣ́ста хра́ма пречⷭ҇тыѧ: ю҆́же всѝ съ тобо́ю велича́емъ.

И҆́нъ.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Пахѡ́мїа вели́кагѡ, а҆́гг҃льскагѡ видѣ́нїѧ сподо́бльшагѡсѧ, житїю̀, ѻ҆́тче, подража́въ, равноа́гг҃льнѡ въ пеще́рѣ пожи́лъ є҆сѝ. тѣ́мже и҆ равноа́гг҃льнꙋю по́честь сподо́билсѧ є҆сѝ прїѧ́ти, а҆нтѡ́нїе.

И҆́же ѿ ст҃ы́ѧ горы̀ пꙋте́мъ ведꙋ́щимъ, ѻ҆́тче, мѣ́ста кі́евскагѡ дости́глъ є҆сѝ, и҆дѣ́же бѧ́ше ᲂу҆го́дно влⷣчцы мт҃ре бж҃їѧ хра́мꙋ воздви́гнꙋтисѧ: и҆ та́мѡ хра́мъ прече́стенъ въ сла́вꙋ бг҃ома́тере, кꙋ́пнѡ со блаже́ннымъ ѳеодо́сїемъ воздви́глъ є҆сѝ. тѣ́мже тѧ̀ всѝ съ ни́мъ велича́емъ.

Бг҃оро́диченъ: Свѣтороди́тельнице дв҃о, дꙋшѝ моеѧ̀ ѻ҆́блакъ ѿженѝ, и҆ дава́й чи́стѡ зрѣ́ти, влⷣчце, спаси́тельнꙋю добро́тꙋ возсїѧ́вшꙋю неизглаго́ланнѡ, и҆зъ твоеѧ̀ пречⷭ҇тыѧ ᲂу҆тро́бы во свѣ́тъ ꙗ҆зы́кѡвъ, препѣ́таѧ.

Свѣти́ленъ:

Жите́йское сладостра́стїе ᲂу҆мертви́лъ є҆сѝ, а҆нтѡ́нїе: сла́вꙋ же маловре́меннꙋю позна́въ, сеѧ̀ вско́рѣ ѿстꙋпи́лъ є҆сѝ, тѣ́снымъ пꙋте́мъ и҆зво́ливъ ходи́ти, ведꙋ́щимъ къ ра́йскомꙋ простра́нствꙋ. тѣ́мже моли́сѧ, а҆нтѡ́нїе, спасти́сѧ тебѐ почита́ющымъ.

Бг҃оро́диченъ: Бцⷣꙋ тѧ̀ вои́стиннꙋ и҆сповѣ́дающе, влⷣчце, и҆̀же тобо́ю спаса́емїи: ты́ бо бг҃а родила̀ є҆сѝ, разо́ршаго крⷭ҇то́мъ сме́рть, и҆ къ себѣ̀ привле́кша преподо́бныхъ собо́ры, съ ни́миже тѧ̀ восхвалѧ́емъ, дв҃о.