Канон святому благоверному князю Даниилу Московскому (иной)

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

А́гнче непоро́чный, Иису́се Бо́же, в Твое́й си́ле кре́пкой победи́в душетли́тельныя стра́сти, блаже́нный уго́дник Тво́й оте́ц Дании́л, спа́сшеся же от грехопото́пнаго мо́ря, в Небе́сней су́ши ве́село пое́т Тебе́ пе́снь побе́дную.

Ревнова́в Богому́дрым отце́м в доброде́телех, Ева́нгельское се́мя – Бо́жия словеса́ кре́пце вперси́л еси́, преподо́бне о́тче Дании́ле, богоуго́ден Влады́це Христу́ бы́в, пое́ши пе́снь побе́дную.

Иерихо́н стра́стных помысло́в и вся́кое вра́жие кова́рство разори́в, о́тче всече́стне, немо́кренно жития́ сего́ волну́емое су́етное мо́ре проше́д, дости́гл еси́ тишины́ ве́чныя жи́зни, поя́ пе́сни побе́дныя.

О Ца́рстве Небе́снем всегда́ помышля́я, все́ твое́ жела́ние воспери́л еси́ ко Христу́ Го́споду, непреста́нно в моли́тве, и посте́ и в вели́цем воздержа́нии вопия́ богоуго́дныя пе́сни.

Богоро́дичен: Нетле́нная Отрокови́це, Богома́ти Влады́чице, при́зри на рабы́ Твоя́, притека́ющия под кро́в Тво́й, и от вся́ких бе́д изба́ви на́с, да в благоду́шии Сы́ну Твоему́ и Бо́гу на́шему Иису́су благода́рныя пе́сни воспое́м.

Пе́снь 3.

Ирмо́с: Над язы́ки Бо́г воцари́ся, Бо́г седи́т на Престо́ле Святе́м Свое́м, и пое́м Ему́ разу́мно, я́ко Царю́ и Бо́гу.

Име́ющему престо́л Не́бо, ты́, о́тче всече́стне, себе́ сама́го в седе́ние царю́ющему все́ми Бо́гу предста́вил еси́, благоразу́мне угожда́я и при́сно поя́: свя́т еси́, Го́споди.

Щито́м облеки́йся ве́ры, благоче́стие содержа́в, бы́л еси́, блаже́нне, о́браз лю́дем Госпо́дним в добронача́льстве княже́ния и в мона́шеском пребыва́нии, те́м вси́ пою́т Царя́ и Бо́га.

Иису́с, Бо́г воплоще́нный, ви́дя твое́, о́тче, благо́е произволе́ние и равноа́нгельное житие́, подаде́ тебе́ че́сть и сла́ву, на земли́ бо чудесы́, и в Не́бе пое́ши ро́ждшагося Царя́ и Бо́га.

Богоро́дичен: Иму́щи, Всецари́це, Пречи́стая Де́во, дерзнове́ние ко Христу́ Го́споду, моли́ Его́, Человеколю́бца, ми́лостивно в на́с ца́рствовати, да на земли́ и в Не́бе всежела́нне пое́м Его́, Царя́ и Бо́га.

Седа́лен, гла́с 3.

Вре́менное великонача́льство и бога́тство тле́нное и сла́ву мимотеку́щую оста́вив, Небе́сное бога́тство и сла́ву, и́стинно ве́чнующую, о́тче блаже́нне, восприя́л еси́. Те́мже блажи́м свято́е твое́ успе́ние и, торжеству́юще в не́м, вопие́м тебе́: помяни́ на́с ко Го́споду, Дании́ле, спасти́ и в Не́бо всели́ти ду́ши на́ша.

Сла́ва: Блаже́н еси́, о́тче Дании́ле, и добро́ тебе́ бы́сть от Христа́ Го́спода. Бо́дрствуя бо де́нь и но́щь, на ни́ща и убо́га и на подвла́стныя твоя́ лю́ди призира́л еси́ ми́лостию и благоразсу́дством. Не́нависти же и вражды́ и похище́ния чужа́го насле́дия весьма́ оша́явся, в любо́вь и смире́ние вся́ враждотво́рцы и злове́рники приклони́в, богоуго́дне пожи́л еси́. Те́м моли́ Го́спода, да пода́ст душа́м на́шим ми́р и ве́лию ми́лость.

И ны́не: Арха́нгел Гаврии́л, красоте́ де́вства Твоего́ и пресве́тлой чистоте́ удиви́вся, Всенепоро́чная Де́во Мари́е, возопи́ ве́село: ра́дуйся, Благода́тная, Госпо́дь с Тобо́ю, из Тебе́ бо пло́ть прие́мшаго Емману́ила, Ипоста́сное Сло́во Бо́га Отца́, и Небе́сныя чи́ни узре́ша я́вственне. Мы́ же, ве́дуще Тя́ и́стинную Богома́терь всежела́нне про́сим: зре́ния Иису́са Христа́ сподо́би рабы́ Твоя́ предста́тельством Твои́м.

Пе́снь 4.

Ирмо́с: Дела́ смотре́ния Твоего́, Го́споди, ужаси́ша проро́ка Авваку́ма, изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.

Моли́твенная твоя́ вопие́ния внидо́ша во у́ши Го́спода Савао́фа, о́тче досточу́дне, пома́заннаго бо тя́ благове́рнаго кня́зя смотри́тельне Госпо́дь спасти́ прише́л е́сть.

Огне́м любве́ Бо́жия непреста́нно содержа́вся, оста́вль ми́р, во оби́тели мона́шествовати изво́лил еси́, всече́стне. Дарова́ньми бо Ду́ха Бо́жия пома́зався, чудоде́лием лю́ди спаса́еши.

На Христа́ Го́спода возложи́в наде́жду, Дании́ле о́тче, не убоя́лся еси́ вра́жиих наве́тов, отвсю́ду напа́дающих на тя́: изше́л бо Христо́с и спасе́ние христиа́нскому ро́ду дарова́.

А́лчуща и жа́ждуща Христа́ пра́вды, воспита́ тя́ Небе́сныя Трапе́зы Хле́бом и напои́ Пречи́стыя Кро́ве вино́м в та́инстве святе́м, в се́м спа́сшеся, ве́чно ублажи́лся еси́.

Богоро́дичен: Христа́ ро́ждшая, Де́во Влады́чице, смотре́нием Его́, по духопрови́дению проро́ка, моли́ Го́спода, да изы́дет спасти́ ны́, де́ло ру́к Свои́х, Влады́ка Госпо́дь, я́коже благоизво́ли.

Пе́снь 5.

Ирмо́с: Све́те И́стинный, Христе́ Бо́же, к Тебе́ у́тренюет ду́х мо́й от но́щи, яви́ на мя́ лице́ Твое́.

Све́т Триипоста́снаго Божества́ осия́ тя́, о́тче Дании́ле: у́треневав бо Богому́дрием, но́щь грехо́в отгна́в, сподо́бился еси́ зре́ния лица́ Христо́ва.

Све́т зако́на Бо́жия богомы́сленне прие́мь, испра́вил еси́, всече́стне, пути́ твоя́ пред Бо́гом. Ему́же моли́ся, да освяти́т ны́ ми́лостивным явле́нием лица́ Своего́.

Све́том озаре́нным бы́ти Богонача́лия Тро́ическаго испроси́ на́м, Богоблаже́нне, у Христа́, да к Нему́ у́тренююще, безно́щие всера́достне восприи́мем.

Богоро́дичен: Све́т ро́ждшая – Иису́са Го́спода, просвеща́ющий вся́каго челове́ка, Де́во Богома́ти, вся́ пою́щия Тя́ изба́ви грехоно́шества и сподо́би ве́чныя све́тлости лица́ Его́.

Пе́снь 6.

Ирмо́с: Я́коже проро́ка от зве́ря изба́вил еси́, Го́споди, и мене́ из глубины́ несодержи́мых страсте́й возведи́, молю́ся, да приложу́ призре́ти ми́ ко хра́му свято́му Твоему́.

Я́коже проро́к от тьмомра́чнаго зве́ря а́дскаго всемо́ществом Всетворца́ Бо́га изба́влься, невреди́вся бо глубиностра́стием, в небесора́йском хра́ме обита́еши, о́тче Дании́ле блаже́нне.

Возведи́, мо́лимся Тебе́, Вседержа́вный Го́споди, от душепотопля́ющаго мо́ря жития́, и в приста́нище небу́рное Небе́снаго Твоего́ хра́ма моли́твами досточу́днаго отца́ Дании́ла всели́ ны́, и зре́ти Тя́ при́сно сотвори́.

В духоправи́тельство Христа́ Го́спода вда́лся еси́ вози́тися во все́й твое́й жи́зни, о́тче преподо́бне, те́мже волне́нии непра́вды боготво́рнаго тя́ корабля́ вся́чески не потопи́ша, в Небе́снем ны́не хра́ме моли́ Го́спода ви́дети на́м.

Богоро́дичен: Хра́м Богоприя́тный Ты́ еси́, Пречи́стая Богома́ти, изба́ви на́с от трегла́внаго вредоно́сных страсте́й потопле́ния, созерца́ти же хра́м святы́й приложи́ на́м и наслади́тися в не́м Боже́ственныя ра́дости да́руй.

Конда́к, гла́с 8.

Я́ко Богонасажде́нное и Богоразу́мное дре́во в Росси́и возра́сл еси́ и многопло́дием Богоподо́бных доброде́телей твои́х утучня́еши сердца́ благочести́вых. Те́мже в кре́пости по́мощи твоея́, преблаже́нне Дании́ле, от вся́ких на́с бе́д свободи́, да пое́м при́сно: Аллилу́ия.

И́кос:

А́нгел на земли́ показа́лся еси́, сла́вя непреста́нно Не́ба и земли́ Творца́ Го́спода Бо́га, вся́ким бо о́бразом во́лю Его́ во все́й твое́й жи́зни испо́лнити потща́лся еси́, все́м благотворя́, прия́л еси́ от Христа́, я́ко апо́стол, благода́ть вся́кия бедоско́рбныя неду́ги и боле́зни цели́ти. Те́мже вопие́м ти́: ра́дуйся, о́тче, от младе́нчества Бо́гом избра́нный; ра́дуйся, Дании́ле, в гражда́нство Небе́сное зва́нный; ра́дуйся, Тро́ичным Све́том от купе́ли святы́я просвети́вся; ра́дуйся, ева́нгельский христоподража́тель и́стинне яви́вся; ра́дуйся, оте́чественнаго всеру́сска престо́ла насле́дник бы́вый; ра́дуйся, держа́ву вла́сти твоея́ благоче́стием и пра́вдою украси́вый; ра́дуйся, на враги́ злове́рцы и на враждотво́рцы от Бо́га получи́в побе́ды; ра́дуйся, оста́вль ми́р преле́стный и восприя́в отце́в святы́х сле́ды; ра́дуйся, в мона́шестве испо́лнився поста́, моли́тв, воздержа́ния; ра́дуйся, сподо́бився от Христа́ благода́ти чуде́с дарова́ния; ра́дуйся, я́ко в Не́бе со святы́ми Богонача́льную Тро́ицу зри́ши; ра́дуйся, оста́вль твоя́ мо́щи, по́мощь все́м твори́ши. Ра́дуйся, мы́ тебе́ принося́ще, пое́м Бо́гу: Аллилу́ия.

Пе́снь 7.

Ирмо́с: Огня́ гаси́лище – отроко́в моли́твы, ороша́ющая пе́щь, пропове́дница чудесе́, не опаля́ющи, ниже́ сожига́ющи песносло́вцы Бо́га оте́ц на́ших.

О́гнь юновеще́ственныя пло́ти твоея́ невеще́ственным пла́менем Бо́жия любве́, в моли́твах бо́дрствуя, погаси́л еси́, о́тче всече́стне. Моли́ и на́м не опали́тися огнестра́стием, да песносло́вим Бо́га оте́ц на́ших.

О́гнь присногоря́щия ве́ры ты́, досточу́дне, в се́рдце твое́м содержа́в, восте́кл еси́ на высоту́ доброде́телей. В пещи́ жегобе́дства мирска́го ороси́ на́с благода́тию Христо́вою, песносло́вити Бо́га оте́ц на́ших.

Огня́ свере́пство ви́димых враго́в и неви́димых, востаю́щих на гра́д и насле́дие твое́, богоприя́тных твои́х моли́тв, Дании́ле блаже́нне, зале́й вода́ми, да, спа́сшеся от ни́х, воспесносло́вим Бо́га оте́ц на́ших.

Богоро́дичен: О́гнь Боже́ственный во чре́ве Твое́м прие́мши, Всечи́стая Де́во, родила́ еси́ всему́ ми́ру жи́зни Исто́чника – Христа́ Иису́са. Моли́, е́же небото́чными благода́ти Бо́жия вода́ми огнепа́льному угаси́тися пла́мени прегреше́ний на́ших.

Пе́снь 8.

Ирмо́с: А́нгелов со́нм, челове́ков собо́р, Царя́ и Зижди́теля все́х, свяще́нницы, по́йте, благослови́те, леви́ти, лю́дие, превозноси́те во вся́ ве́ки.

А́нгелы святы́я, во́лю Го́спода Бо́га сотворя́ющия, подража́я, схимона́шеский вели́кий о́браз восприе́м, о́тче Дании́ле, а́нгельски пожи́л еси́ во оби́тели святе́й, благохвали́ти вся́ лю́ди научи́в Го́спода во вся́ ве́ки.

А́нгелом небе́сным богомы́сленный собесе́дниче, боговенча́нный а́дских а́нгелов победи́телю, всеблаже́нне Дании́ле, удосто́ивыйся зре́ти Всецаря́ Иису́са, удосто́и на́с зре́ти и хвали́ти Его́ во вся́ ве́ки.

А́нгела Сове́та Вели́каго, Бо́га воплоще́нна, пропове́дал еси́ богочести́вым твои́м житие́м, о́тче, в концы́ земли́. И ны́не твоя́ святы́я мо́щи, су́ще в созерца́нии, воздви́жут ве́рныя вся́ лю́ди воспева́ти Го́спода во ве́ки.

Богоро́дичен: А́нгела Гаврии́ла гла́с ра́дованен услы́шавши, Де́во Боговлады́чице, ве́сь ро́д челове́ческий обра́довала еси́ рождество́м Твои́м, изба́вльши на́с от грехо́в на́ших, сподо́би ра́достне хвали́ти Го́спода во ве́ки.

Пе́снь 9.

Ирмо́с: Велича́ем, Христе́, Твою́ Всенепоро́чную Ма́терь Чи́стую, я́ко роди́ Тя́ преесте́ственно пло́тию, от вся́кия льсти́ и тли́ на́с избавля́яй.

Иерусали́м Го́рний, иде́же девятогу́бая иера́рхия святы́х А́нгелов богозри́тельне торжеству́ет, насле́довав, Богоблаже́нне Дании́ле о́тче, моли́ся, да, изба́вльшеся ле́сти и тли́, Христа́ и Ма́терь Его́ Мари́ю ве́чно возвелича́ем.

Еди́но Божество́ в Трие́х Ипоста́сех, Богонача́льную и Всетворя́щую Вину́, при́сно велича́л еси́, ясносия́тельным Боготро́ическим Све́том облиста́я, испроси́ на́м, о́тче, богомы́сленне Боготро́ицу велича́ти.

Ре́вность ве́лию показа́л еси́ в Богоче́стии, Дании́ле блаже́нне, преизря́ден ре́снотив о́браз бы́в лю́дем твои́м, и во ангелочи́нстве бо схимона́шества благове́рне учи́л еси́ вся́ Бо́га и Богома́терь велича́ти.

Ели́ко вели́к в православнокня́жестве, Богому́дре о́тче, бы́в, наипа́че смири́л еси́ себе́ схимонахогове́инством, те́мже Всеблаги́й Бо́г тя́ превознесе́ и дарова́ тебе́ Небе́сное насле́дие и чуде́с благода́ть, е́юже исцеля́й души́ и телеса́ от вся́ких скорбе́й Иису́са и Мари́ю Де́ву велича́ющих.

Богоро́дичен: Избавле́ние от тли́ и вся́кия ле́сти – Плотоно́сца Христа́ – родила́ еси́ на́м, Всенепоро́чная Де́во. Моли́ Его́ изба́вити на́с от прегреше́ний и прекра́снаго рая́ сподо́бити насле́дства, да Тя́ при́сно велича́ем.

Свети́лен.

Благоле́пною удо́бренный простото́ю, мы́сленный оре́л, небопа́рными доброде́телей кри́лы в Небе́сное возлете́л еси́ жили́ще, в не́мже, преподо́бне Дании́ле, жи́знию блаже́нною живя́й, Триипоста́сна Всеблага́го Жизнода́вца Бо́га мо́лиши жи́знь нетле́нную на́м дарова́ти, тя́ всеусе́рдно блажа́щим.

Сла́ва: Богонача́льныя Всебоже́ственныя Тро́ицы све́том осия́вся, све́т добротосия́ющий и чудоде́ющий благода́тию Иису́с Христо́вою, Дании́ле о́тче, всему́ ми́ру яви́лся еси́. Осия́тися на́м Пребоже́ственным Све́том в неконча́емую жи́знь всера́достную святы́х сподо́би, да глаго́лем непреста́нно: сла́ва Бо́гу, на́с сотво́ршему.

И ны́не: Всея́ прему́дрости до́м, Ду́ха Всесвята́го седмодарова́ньми утвержде́нный, Богоблаже́нная Цари́це, Де́во Мари́е Влады́чице, сла́вою в пресветлонебесове́чности почте́на, богоуго́ждшему отцу́ Дании́лу по́мощь в блаже́нство ева́нгельское пода́вшая, сотвори́ ны́ до́мы на вселе́ние Боже́ственное, во е́же его́ Всеправи́теля и Тя́, Богома́терь, на земли́ и на Небеси́ сла́вити непреста́нно.