Канон святителю Ионе, епископу Ханькоускому

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Твоемꙋ̀, хрⷭ҇тѐ, ᲂу҆го́дникꙋ хвалꙋ̀ досто́йнꙋ воспѣ́ти да́рꙋй мѝ, влⷣко, ѿ ᲂу҆сте́нъ нечи́стыхъ и҆ ра́зꙋма помраче́нна, и҆ мл҃твами є҆гѡ̀ воздви́гни ѿ разслабле́нїѧ грѣхо́внагѡ дꙋ́шꙋ мою̀.

Каза́нскїѧ землѝ ᲂу҆краше́нїе пресла́вное ꙗ҆ви́лсѧ є҆сѝ, ѻ҆́тче і҆ѡ́но, слꙋже́нїемъ па́стырства и҆ ᲂу҆чи́тельства подви́гсѧ, тѣ́мже, свѣ́томъ є҆ѵⷢ҇льскимъ ю҆́ныѧ просвѣща́ѧ, мра́къ невѣ́дѣнїѧ дале́че ѿ ни́хъ ѿгна́лъ є҆сѝ.

Ѽ гла́са пла́ча твоегѡ̀, бл҃же́нне і҆ѡ́но, ѡ҆ лю́дехъ рꙋсѝ, во ѻ҆те́чествїи и҆ въ разсѣ́ѧнїи сꙋ́щихъ! и҆́мже и҆ на́съ покаѧ́нїю и҆ и҆справле́нїю наꙋча́еши и҆ и҆з̾ се́рдца ѡ҆каменѣ́вшагѡ сле́зы и҆зво́диши, ꙗ҆́коже дре́вле мѡѷсе́й и҆з̾ ка́мене во́дꙋ, да всѝ съ ни́мъ зове́мъ бг҃ꙋ, сп҃са́ющемꙋ на́съ: сла́внѡ бо просла́висѧ.

Бг҃оро́диченъ: Чтⷭ҇на́ѧ і҆кѡ́на твоѧ̀ каза́нскаѧ, влⷣчце бцⷣе, ѻ҆те́чествꙋ на́шемꙋ въ покро́въ и҆ застꙋпле́нїе дарова́сѧ, ꙗ҆́кѡ любо́вїю твое́ю сїѐ при́снѡ ѡ҆зарѧ́еши, застꙋ́пнице ᲂу҆се́рднаѧ. тѣ́мже и҆ къ жи́зни дꙋхо́внѣй, въ бз҃ѣ сокрове́ннѣй, лю́ди твоѧ̑ недостѡ́йныѧ ᲂу҆пра́ви.

Пѣ́снь г҃.

І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Ѧ҆зы́къ тво́й, дх҃омъ бжⷭ҇твеннымъ дви́жимь, вои́стиннꙋ тро́сть кни́жника ꙗ҆ви́сѧ, сказꙋ́етъ бо пресла́внѡ писа́нїй сокровє́ннаѧ и҆ ѻ҆те́ческихъ слове́съ потає́ннаѧ, є҆реті́чествꙋющихъ и҆ безбо́жныхъ писа̑нїѧ посрамлѧ́етъ, весели́тъ же дꙋхо́внѡ пою́щыѧ всечтⷭ҇нꙋ́ю па́мѧть твою̀, ст҃и́телю і҆ѡ́но.

Ꙗ҆́кѡ а҆пⷭ҇лѡмъ и҆ ѻ҆тцє́мъ дрє́внимъ наслѣ́дникъ и҆́стинный, и҆сповѣ́данїе пра́вое вѣ́ры до́брѣ свидѣ́тельствовалъ є҆сѝ, и҆ во ᲂу҆чи́тельствѣ подвиза́ѧсѧ, ю҆́ныѧ ᲂу҆ченикѝ твоѧ̑ ᲂу҆крѣплѧ́лъ є҆сѝ въ вѣ́трѣхъ сꙋемꙋ́дрїй не вла́ѧтисѧ ѿню́дъ, ѻ҆ба́че къ свѣ́тꙋ бжⷭ҇твенныхъ догма́тѡвъ взира́ти.

Ꙗ҆ви́лсѧ є҆сѝ дре́внихъ ѻ҆тцє́въ житїѧ̀ подража́тель и҆́стиненъ, слꙋже́нїемъ бли̑жнимъ дѣ́ланїе мл҃твенное раствори́въ, во ѻ҆бою̀ же стра́хомъ сыно́внимъ гдⷭ҇еви предстоѧ̀, ᲂу҆сн҃овле́нїе же и҆ ѡ҆боже́нїе во хрⷭ҇тѣ̀ ᲂу҆лꙋчи́лъ є҆сѝ.

Бг҃оро́диченъ: А҆́ще и҆ ѡ҆скꙋдѣ́ша во дни̑ послѣ̑днїѧ наста̑вницы дх҃оно́снїи, но ты̀, пречⷭ҇таѧ влⷣчце, сама̀ наста́вница ко сп҃се́нїю рабѡ́мъ твои̑мъ бꙋ́ди, смоле́бники прїи́мши ѻ҆тцы̀ бг҃омꙋ̑дрыѧ, и҆́хже писа́ньми назида́емсѧ.

Сѣда́ленъ, гла́съ є҃:

Вѣ́ры ра́ди ꙗ҆́тъ бы́въ, въ темни́цꙋ всажде́нъ бы́лъ є҆сѝ, но бг҃ъ и҆́нъ пꙋ́ть тебѣ̀ предначерта̀, рꙋ̑сскимъ лю́демъ во бл҃га̑ѧ. тѣ́мже мо́лимъ тѧ̀: молѝ хрⷭ҇та̀ бг҃а на́мъ въ вѣ́рѣ ᲂу҆тверди́тисѧ во сп҃се́нїе дꙋ́шъ на́шихъ.

Бг҃оро́диченъ: Сла́досте а҆́гг҃лѡвъ, скорбѧ́щихъ ра́досте, хрⷭ҇тїа́нъ предста́тельнице, дв҃о, мт҃и гдⷭ҇нѧ, застꙋпѝ ны̀ ѿ всѧ́кїѧ напа́сти и҆ сп҃сѝ дꙋ́шы на́шѧ.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

Ѻ҆те́ческихъ писа́нїй храни́тель и҆ и҆спо́лнитель тѣ́хъ, ст҃и́телю і҆ѡ́но, ꙗ҆ви́лсѧ є҆сѝ, ꙗ҆̀же ю҆́ношамъ бл҃гоговѣ́йнѣ препода́лъ є҆сѝ, бг҃оꙋго́днымъ же житїе́мъ си́лꙋ слове́съ и҆́хъ ꙗ҆ви́лъ є҆сѝ.

Хрⷭ҇то́во смире́нїе стѧжа́въ и҆ мꙋ́жествомъ препоѧ́санъ, и҆схо́диши на слꙋже́нїе но́во, и҆ ꙗ҆́кѡ ле́въ, ᲂу҆пова́ѧ на гдⷭ҇а, пред̾ скѵ̑мны рыка́ющими пра́вѡ ходи́лъ є҆сѝ.

Е҆ди́наго сꙋ́щаго на нб҃сѣ́хъ па́че всѧ́кагѡ стра́ха ᲂу҆боѧ́всѧ, томꙋ̀ є҆ди́номꙋ всѧ́кимъ ᲂу҆се́рдїемъ порабо́талъ є҆сѝ, и҆ кова̑рствїѧ бг҃обо́рцєвъ ѡ҆плева́въ, со хрⷭ҇то́мъ, побѣди́телемъ сме́рти, на вѣ́ки воцр҃и́лсѧ є҆сѝ.

Бг҃оро́диченъ: На тѧ̀ всю̀ наде́ждꙋ сп҃се́нїѧ на́шегѡ возложи́хомъ, бг҃омт҃и неискꙋсобра́чнаѧ, на по́мощь при́снѡ призыва́емъ тѧ̀: сп҃сѝ ны̀ ѿ напа́стей и҆ печа́ли и҆ вѣ́чнагѡ ѡ҆сꙋжде́нїѧ и҆зба́ви.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Млⷭ҇тїю къ скорбѧ́щымъ ᲂу҆краси́лсѧ є҆сѝ, раздава́ѧй а҆́лчꙋщымъ хлѣ́бъ тво́й, болѧ́щымъ же всеꙋсе́рднѡ послꙋжи́лъ є҆сѝ сло́вомъ па́стырскимъ, мл҃твою и҆ ᲂу҆вѣща́нїемъ.

Гра́дъ москва̀ хва́литсѧ ю҆́ностїю твое́ю, калꙋ́га же и҆ каза́нь ᲂу҆че́нїемъ твои́мъ, ѻ҆́птина пꙋ́стынь мона́шествомъ, но па́че всѣ́хъ маньчжꙋ́рїа тобо́ю сла́витсѧ, ꙗ҆́кѡ па́стыремъ ре́вностнымъ и҆ предстоѧ́телемъ любвеѻби́льнымъ.

Возлюби́лъ є҆сѝ гдⷭ҇а и҆ все́ю крѣ́постїю томꙋ̀ порабо́талъ є҆сѝ, мнѡ́ги скѡ́рби претерпѣва́ѧ, дꙋ́шы мно́гихъ, ст҃и́телю, ко хрⷭ҇тꙋ̀ наста́вилъ є҆сѝ. є҆мꙋ́же моли́сѧ сп҃сти́сѧ на́мъ.

Бг҃оро́диченъ: Просвѣтѝ, дв҃о чⷭ҇таѧ, любо́вїю чтꙋ́щихъ тѧ̀ и҆ велича́ющихъ, разрѣшѝ стра̑сти на́шѧ, ᲂу҆ста́ви и҆́хъ бꙋ́рю и҆ лꙋка́вагѡ собла́зны ѿ среды̀ на́шеѧ ѿженѝ мл҃твами твои́ми.

Пѣ́снь ѕ҃.

І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю̀ тѝ: возведѝ ѿ тлѝ живо́тъ мо́й, многомлⷭ҇тиве.

Бг҃обо́рцємъ и҆ и҆новѣ̑рнымъ вѣ́рою крѣ́пкою, ст҃и́телю, противꙋста́лъ є҆сѝ, па́ствꙋ твою̀ ѿ волкѡ́въ гꙋби́тельныхъ ѡ҆гради́ти тща́сѧ, гнѣ́ва ѕло́бствꙋющихъ ника́коже ᲂу҆боѧ́лсѧ є҆сѝ, нижѐ ѡ҆сꙋжде́нїѧ человѣ́ческа.

Долготерпѣ́нїю твоемꙋ̀ нб҃са̀ и҆ землѧ̀ подиви́шасѧ, ꙗ҆́кѡ въ са́мыхъ когте́хъ ѕвѣри́ныхъ пло́тїю держи́мь, не преста́лъ є҆сѝ ᲂу҆пова́ти на гдⷭ҇а и҆ возвѣща́ти и҆́стинꙋ є҆гѡ̀, пресла́внѡ тѧ̀, ꙗ҆́коже прⷪ҇ро́ка ѿ чре́ва ки́това, свободи́вшаго.

Ст҃и́тельства и҆́стиннагѡ ѻ҆́бразъ бы́лъ є҆сѝ, страсте́й взыгра̑нїѧ пе́рвѣе ѡ҆бꙋзда́въ на стра́жи се́рдца твоегѡ̀, тѣ́мже и҆ ѻ҆́вцы хрⷭ҇тѡ́вы ко приста́нищꙋ небꙋ́рномꙋ мꙋ́дрѣ ᲂу҆пра́вилъ є҆сѝ.

Бг҃оро́диченъ: И҆́стины свидѣ́телїе и҆ сн҃а твоегѡ̀ слꙋжи́телїе вѣ́рнїи на тѧ̀, бг҃омт҃и, ᲂу҆пова́нїе своѐ возложи́ша, и҆ под̾ кро́вомъ твои́мъ сохранѧ́еми, на ѻ҆́гнь и҆ сме́рть дерза́хꙋ. и҆́хже мл҃твами и҆ на́съ ᲂу҆крѣпѝ, влⷣчце на́ша всепѣ́таѧ.

Конда́къ, гла́съ г҃:

Дѣ́темъ не возбрани́лъ є҆сѝ приходи́ти къ тебѣ̀, бг҃обл҃же́нне, пекі́йсѧ ѡ҆ насꙋ́щныхъ и҆́хъ, и҆ хра́минꙋ и҆̀мъ созда́лъ є҆сѝ, по кончи́нѣ же твое́й си́хъ не ѡ҆ста́вилъ є҆сѝ, ѻ҆́трока бо разсла́бленна въ со́нномъ видѣ́нїи и҆сцѣли́въ. сегѡ̀ ра́ди вопїе́мъ тѝ: ра́дꙋйсѧ, чꙋдодѣ́йственниче і҆ѡ́но пресла́вный.

І҆́косъ:

Къ бг҃ꙋ и҆ лю́демъ стѧжа́въ любо́вь и҆́стиннꙋю и҆ нелицемѣ́рнꙋю, ст҃и́телю, да лю́бите дрꙋ́гъ дрꙋ́га, дѣ́темъ взыва́лъ є҆сѝ, и҆̀мже ѻ҆́бразъ бы́лъ є҆сѝ сло́вомъ и҆ житїе́мъ, любо́вїю, дꙋ́хомъ, вѣ́рою и҆ чистото́ю. сегѡ̀ ра́ди чꙋдотворє́нїѧ мнѡ́га и҆ зна́мєнїѧ бж҃їѧ си́лы вѣ̑рнымъ ѡ҆ тебѣ̀ ꙗ҆ви́шасѧ, и҆ со безпло́тными ны́нѣ ликовствꙋ́ѧ, неѿлꙋче́нъ ѿ ча̑дъ свои́хъ пребыва́еши. ѽ соприча́стниче ст҃ы̑мъ! ѿ бѣсо́вскихъ наси́лїй свои́мъ предста́тельствомъ на́съ ѡ҆градѝ и҆ къ го́рнѣй любвѝ сердца̀ ᲂу҆ѧзвѝ, бл҃года́рственнѡ тѧ̀ воспѣва́ющихъ: ра́дꙋйсѧ, чꙋдодѣ́йственниче і҆ѡ́но пресла́вный.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Во́инъ хрⷭ҇то́въ непобѣди́мь показа́лсѧ є҆сѝ, проти́вꙋ безбо́жныхъ тве́рдымъ и҆сповѣ́данїемъ воѻрꙋжи́всѧ и҆ ѿстꙋ́пльшымъ па́лицею слове́съ твои́хъ противꙋста́въ, вѣнце́мъ и҆сповѣ́дника ѿ гдⷭ҇а ᲂу҆вѣнча́лсѧ є҆сѝ.

Е҆ди́наго на потре́бꙋ ᲂу҆се́рднѡ взыска́въ, житїѧ̀ сегѡ̀ сластьмѝ не прельсти́лсѧ є҆сѝ, тѣ́мже и҆ поставлѧ́етъ тѧ̀ на свѣ́щницѣ а҆рхїере́йства гдⷭ҇ь, да свѣтонаста́вникъ бꙋ́деши лю́демъ є҆гѡ̀.

Дне́сь, вѣ̑рнаѧ ѻ҆вча́та хрⷭ҇тѡ́ва, па́стырѧ до́браго прославлѧ́емъ, пред̾ ѻ҆вца́ми свои́ми дерзнове́ннѡ ходи́вшаго и҆ тѣ́хъ по и҆́мени глаша́вшаго и҆ ко ѻ҆би́телемъ нбⷭ҇нымъ ди́внѡ наста́вльшаго.

Бг҃оро́диченъ: Пое́мъ тѧ̀, бг҃оневѣ́сто, мт҃и хрⷭ҇та̀ бг҃а, сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ всѧ́кїѧ бѣды̀, влⷣчце, и҆ вѣ́рнѡ вопїе́мъ: поми́лꙋй ста́до твоѐ, є҆ди́на всепѣ́таѧ.

Пѣ́снь и҃.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Ра́дости присносꙋ́щныѧ наде́ждею препоѧ́савсѧ, терпѣ́нїемъ въ по́двигъ страда́льческїй вше́лъ є҆сѝ, тѣ́мже не посрамѝ гдⷭ҇ь ᲂу҆пова́нїѧ твоегѡ̀, съ ли̑ки ст҃ы́хъ сочета́въ тѧ̀, пою́щаго: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Є҆ли́цы писа́нїй бжⷭ҇твенныхъ разꙋмѣ́нїе прїѧ́сте, прїиди́те, кꙋ́пнѡ восхвали́те тѣ́хъ сказа́телѧ бг҃омꙋ́драго і҆ѡ́нꙋ, вопїю́ще ᲂу҆стѡ́мъ є҆гѡ̀ сло́во пода́вшемꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Вои́стиннꙋ ни є҆ди́нъ же ѿ ма́лыхъ си́хъ забве́нъ бы́сть ᲂу҆ тебє̀, бл҃же́нне і҆ѡ́но, ко всѣ̑мъ бо любы̀ твоѧ̀ распростре́сѧ, ни́щымъ и҆ простецє́мъ, наипа́че же си̑рымъ и҆ ᲂу҆бѡ́гимъ. тѣ́мже и҆ дне́сь и҆сто́чникъ неѡскꙋдѣва́ющїй сло́ва бж҃їѧ на́мъ ѿверза́еши, взыва́ющымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Бг҃оро́диченъ: А҆́ще и҆ ѻ҆те́чества земна́гѡ лише́нїе попꙋще́нїемъ бж҃їимъ прїи́де вѣ̑рнымъ твои̑мъ, ѻ҆ба́че ꙗ҆ви́ласѧ є҆сѝ млⷭ҇тиваѧ ᲂу҆тѣ́шительница и҆̀мъ въ зна́менїи ѡ҆бновле́нїѧ і҆кѡ́нъ твои́хъ, ѿ ни́хже чꙋдеса̀ и҆сточи́ла є҆сѝ. тѣ́мже и҆ мы̀ вопїе́мъ тѝ: нбⷭ҇нагѡ ѻ҆те́чества прича́стники содѣ́лай на́съ, ꙗ҆́кѡ бл҃га́ѧ врата́рница є҆сѝ, двє́ри ра̑йскїѧ вѣ̑рнымъ ѿверза́ющаѧ.

Пѣ́снь ѳ҃.

І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечтⷭ҇аѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и, тѧ̀ ᲂу҆бл҃жа́емъ.

Ѻ҆́тче ст҃и́телю і҆ѡ́но! ты̀ кончи́нꙋ свою̀ предзрѧ̀, со ᲂу҆миле́нїемъ и҆схо́дное пѣ́нїе приноси́лъ є҆сѝ влⷣчцѣ, во ᲂу҆спе́нїи свое́мъ мі́ра не ѡ҆ста́вльшей. тѣ́мже и҆ на́съ, бѣ́дствꙋющихъ скорбьмѝ, не ѡ҆ста́ви, вѣнце́мъ ᲂу҆вѧ́зсѧ ѿ гдⷭ҇а нетлѣ́ннымъ во вѣ́ки.

Сме́рти предстоѧ̀, кро́тостїю и҆ неѕло́бїемъ всѣ́хъ прости́лъ є҆сѝ, ча́дѡмъ же твои̑мъ, любо́вь хрⷭ҇то́вꙋ простира́ѧ, дѣ́ти, да лю́бите дрꙋ́гъ дрꙋ́га, ре́клъ є҆сѝ. тѣ́мже и҆ на́съ съ высоты̀ сла́вы бж҃їѧ бл҃гословѝ, да въ є҆дине́нїи и҆ любвѝ сп҃се́мсѧ.

И҆́стинныѧ сла́вы взыскꙋ́ѧ, ѻ҆́тче і҆ѡ́но, тлѣ́ннꙋю и҆ земнꙋ́ю нивочто́же вмѣни́лъ є҆сѝ. тѣ́мже и҆ на́мъ коемꙋ́ждо помозѝ рꙋ́цѣ разсла́бленнѣи на мл҃твꙋ воздѣ́ти и҆ ѻ҆́чи дꙋше́внѣи горѣ̀ возвѣстѝ, да грѧдꙋ́щаго во сла́вѣ гдⷭ҇а бо́дреннымъ се́рдцемъ ᲂу҆срѧ́щемъ и҆ сла́вы є҆гѡ̀ прича̑стницы бꙋ́демъ.

Бг҃оро́диченъ: Млⷭ҇тива на́мъ сн҃а твоего̀ покажѝ, пребл҃гослове́ннаѧ мт҃и, въ ча́съ сꙋ́дный, вѣ́рнаго ᲂу҆го́дника твоего̀ і҆ѡ́нꙋ смоле́бника и҆ застꙋ́пника те́пла прїи́мши, да грѧдꙋ́щаго во сла́вѣ гдⷭ҇а бо́дреннымъ се́рдцемъ ᲂу҆срѧ́щемъ и҆ сла́вы є҆гѡ̀ прича̑стницы бꙋ́демъ.

Свѣти́ленъ:

Въ пѣ́снехъ досто́йныхъ почти́мъ сла́внаго і҆ера́рха ханько́ꙋскаго і҆ѡ́нꙋ, добродѣ́тельми ᲂу҆краси́вшагосѧ, ѿ восто́ка да́льнѧгѡ дне́сь возсїѧ́вшаго и҆ въ разсѣ́ѧнїи сꙋ́щихъ свѣ́томъ хрⷭ҇то́вымъ просвѣти́вшаго.

Сла́ва, и҆ ны́нѣ: Щедрѡ́ты твоѧ̑, бж҃е, на лю́ди и҆ ста́до твоѐ низпослѝ, мл҃твами пречⷭ҇тыѧ твоеѧ̀ мт҃ре и҆ всѣ́хъ ст҃ы́хъ твои́хъ, и҆ на́мъ да́рꙋй ве́лїю твою̀ млⷭ҇ть.