Канон святителю Игнатию, епископу Ростовскому

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ѻ҆́ч҃е бг҃омꙋ́дре ст҃и́телю і҆гна́тїе, ѿве́рзи мѝ недосто́йномꙋ ᲂу҆стнѣ̀ воспѣ́ти тѧ̀, и҆ прїимѝ, ꙗ҆́кѡ кади́ло ѿ ᲂу҆бо́жества моегѡ̀, є҆́же тѝ принесо́хъ недосто́йный.

Воспое́мъ всѝ свѧще́ннаго ст҃и́телѧ і҆гна́тїа, почти́мъ застꙋ́пника, и҆ ᲂу҆твержде́нїе гра́дꙋ на́шемꙋ росто́вꙋ, и҆ храни́телѧ неꙋсы́пна.

Спаси́тєльнымъ хрⷭ҇тѡ́вымъ за́повѣдемъ послѣ́довалъ є҆сѝ, премꙋ́дре ст҃и́телю і҆гна́тїе: вдови́цамъ и҆ си̑рымъ бы́лъ є҆сѝ застꙋ́пникъ, и҆ гра́дꙋ на́шемꙋ вели́кое защище́нїе.

Бг҃оро́диченъ: Пречⷭ҇таѧ бцⷣе, содѣ́телѧ и҆ сп҃са поро́ждши всѣ̑мъ пою́щымъ тѧ̀, спасѝ ѿ бѣ́дъ гра́дъ тво́й росто́въ, непреста́ннѡ молѧ́щи сн҃а твоего̀ за ны̀, и҆ бг҃а на́шего.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Сокрꙋшѝ сꙋпоста́ты безбѡ́жныѧ, прпⷣбне, моле́нїемъ твои́мъ къ творцꙋ̀ и҆ бг҃ꙋ, и҆ си́лꙋ и҆́хъ, воѡрꙋже́ннꙋю на ны̀, пога̑нскаѧ нашє́ствїѧ покорѝ подъ но́ги вѣ́рномꙋ во́инствꙋ на́шемꙋ.

Ты̀ проѧви́лъ є҆сѝ, влⷣко, послѣ́днемꙋ ро́дꙋ на́шемꙋ чꙋдотво́рца ст҃и́телѧ і҆гна́тїа, гра́дꙋ росто́вꙋ ᲂу҆твержде́нїе цр҃кви твое́й и҆́стовое пра́вило, і҆ере́йскомꙋ же чи́нꙋ наста́вника.

Прикоснꙋ́вшꙋсѧ, свѧ́те, пречестна́гѡ тѣ́ла твоегѡ̀ стефа́нꙋ а҆рхїмандрі́тꙋ, пе́рстꙋ рꙋчно́мꙋ къ дла́ни прико́рчившꙋсѧ ѿ рожде́нїѧ, бж҃їею благода́тїю да́лъ є҆сѝ простира́тисѧ.

Бг҃оро́диченъ: Бꙋ́ди мѝ, дв҃о, прибѣ́жище, и҆ приста́нище и҆ стѣна̀ неѡбори́ма, и҆ застꙋ́пница, ꙗ҆́же бг҃а поро́ждши пло́тїю, пречⷭ҇таѧ, и҆зба́вителѧ всеще́драго, и҆ сп҃са пою́щымъ тѧ̀, бг҃оневѣ́стнаѧ.

Сѣда́ленъ, гла́съ и҃.

Оу҆краша́ѧсѧ премꙋ́дростїю ра́зꙋма, горды́ню низложи́лъ є҆сѝ плотскі́ѧ тѧготы̀, и҆ бы́лъ є҆сѝ ѻ҆би́телище дх҃а прест҃а́гѡ, непремѣ́ннымъ простира́ѧсѧ ра́зꙋмомъ къ лю́бѧщемꙋ тѧ̀. тѣ́мъ ре́вностїю бжⷭ҇твенною разгара́ѧсѧ, сла́вне, си́рыхъ и҆ ᲂу҆бо́гихъ, и҆ вдови́цъ бы́лъ є҆сѝ застꙋ́пникъ, гра́да же росто́ва ᲂу҆твержде́нїе, ꙗ҆ви́всѧ а҆́гг҃лѡмъ собесѣ́дникъ, ст҃и́телю і҆гна́тїе, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ: Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Благода́тїю бг҃оно́сецъ нарица́емь вои́стиннꙋ, і҆гна́тїе, во хрⷭ҇та̀ ѡ҆бле́клсѧ є҆сѝ житїѧ̀ ра́ди чистоты̀, и҆ наꙋчи́лъ є҆сѝ сла́вити въ трⷪ҇цѣ є҆ди́наго бг҃а.

И҆зба́ви ста́до твоѐ ѿ грѣхо́вныѧ бꙋ́ри, і҆гна́тїе ст҃и́телю, бѣ́дъ же и҆ скорбе́й, приводѧ̀ въ приста́нище бж҃е́ственныѧ во́ли є҆гѡ̀.

Ꙗ҆ви́лсѧ є҆сѝ вои́стиннꙋ хрⷭ҇то́въ ᲂу҆го́дникъ, ѻ҆́ч҃е і҆гна́тїе, молѧ́сѧ не преста́й, ѿ напа́стей и҆ бѣ́дъ и҆ скорбе́й и҆зба́вити ста́до твоѐ ѿ нꙋ́жды и҆ печа́ли.

Бг҃оро́диченъ: Свѧще́ннѡ сла́вѧтъ тѧ̀ ст҃и́тельстїи собо́ри, и҆ всѣ́хъ преподо́бныхъ ли́цы: зижди́телѧ бо и҆́хъ, ꙗ҆́кѡ млⷣнца на рꙋкꙋ̀ твоє́ю понесла̀ є҆сѝ, бцⷣе.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ѻ҆́крестъ стоѧ́ще ра́ки твоеѧ̀, ст҃и́телю і҆гна́тїе, тѧ̀ и҆мѣ́емъ къ бг҃ꙋ хода́таѧ, и҆ застꙋпле́нїе гра́да твоегѡ̀ росто́ва, и҆ ᲂу҆твержде́нїе неѡбори́мо.

Ми́лостивъ бы́въ ᲂу҆бѡ́гимъ, ми́лость дꙋше́внꙋю и҆спросѝ, прехва́льне, ми́лостыню стѧжа́въ, ѻ҆́ч҃е і҆гна́тїе, свѣщꙋ̀ свѣ́тлꙋ ᲂу҆стро́илъ є҆сѝ.

Жили́ще бы́въ прест҃а́гѡ дх҃а, вои́стиннꙋ, бл҃же́нне і҆гна́тїе, тогѡ̀ ꙗ҆вле́нными бжⷭ҇твенными дармѝ до́брѣ ѡ҆богати́лсѧ є҆сѝ.

Бг҃оро́диченъ: Мѵ́ро та́йное тѧ̀ и҆менꙋ́емъ, пречⷭ҇таѧ, ꙗ҆́кѡ ро́ждши бг҃а пло́тїю, и҆сточа́ющаго бжⷭ҇твенное мѵ́ро, всѣ̑мъ притека́ющымъ подъ кро́въ тво́й.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Житїѐ твоѐ цѣломꙋ́дренно, свѧщенноѧвле́нне, соверши́въ, пра́вдою ᲂу҆краси́лсѧ є҆сѝ, и҆ мꙋ́жествомъ смы́сла, добродѣ́тєли сочта́въ себѣ̀, преблаже́нне ст҃и́телю і҆гна́тїе.

Сохранѝ гра́дъ тво́й росто́въ, пребл҃же́нне ст҃и́телю і҆гна́тїе, ѿ безбо́жныхъ, и҆ чꙋжевѣ́рныхъ нахожде́нїй, и҆ ᲂу҆со́бныѧ ра́ти, молѧ́сѧ не преста́й влⷣцѣ хрⷭ҇тꙋ̀ ѡ҆ ста́дѣ твое́мъ.

Ты̀ ᲂу҆́бѡ по сме́рти ꙗ҆́кѡ жи́въ, на погребе́нїи твое́мъ прїе́мь сви́тки твои́ма рꙋка́ма, и҆̀хже свѧще́нники въ животѣ̀ твое́мъ ѡ҆свѧти́лъ є҆сѝ бг҃ꙋ, рече́ бо гдⷭ҇ь: прославлѧ́ющаго мѧ̀ просла́влю.

Бг҃оро́диченъ: Превы́шши бы́сть вы́шнихъ си́лъ, бг҃облагода́тнаѧ, заче́ншаѧ сло́во бж҃їе неизрече́ннѡ, всѧ́чєскаѧ сло́вомъ сотво́ршее, ѿ ѻ҆ц҃а̀ пре́жде вѣ̑къ ро́ждшеесѧ, того̀ чⷭ҇таѧ ро́ждшаѧ неизрече́ннѡ.

Конда́къ, гла́съ д҃.

Ꙗ҆ви́сѧ дне́сь пресвѣ́тлаѧ па́мѧть твоѧ̀, ст҃и́телю пребл҃же́нне і҆гна́тїе, въ мі́рѣ свѣ́тлѡ сїѧ́ющи, и҆ ꙗ҆влѧ́ющи всѣ̑мъ бжⷭ҇твенное сїѧ́нїе.

І҆́косъ:

И҆зъ чре́ва ма́тернѧ ѡ҆свѧще́ннаго ст҃и́телѧ гдⷭ҇нѧ похва́лимъ ны́нѣ всѝ, прпⷣбнаго і҆гна́тїа, гра́да росто́ва ᲂу҆твержде́нїе, благода́тныѧ да́ры прїи́мша бжⷭ҇твенныѧ сла́вы, и҆ въ чꙋдесѣ́хъ сла́внаго, всѝ вѣ́рою те́плою притека́юще къ ра́цѣ моще́й є҆гѡ̀. тѣ́мъ и҆ а҆́зъ недосто́йный и҆ грѣ́шный надѣ́юсѧ, моли́твами є҆гѡ̀ ко влⷣцѣ и҆ пречⷭ҇тѣй є҆гѡ̀ мт҃ри, ми́лость прїѧ́ти въ де́нь сꙋ́дный, содѣ́ѧнныхъ мно́ю ѕѡ́лъ, и҆ проще́нїе полꙋчи́ти, ꙗ҆влѧ́ющи всѣ̑мъ бж҃е́ственное сїѧ́нїе.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.

Ѿве́рзи мѝ две́рь покаѧ́нїѧ, ст҃и́телю і҆гна́тїе, да ѡ҆мы́ю скве́рнꙋ ѻ҆каѧ́нныѧ моеѧ̀ дꙋшѝ, и҆ тѣ́ла моегѡ̀ всѧ̑ чꙋ̑вства, да приношꙋ̀ пѣ́снь гдⷭ҇еви свѣ́тлѡ, зовѧ̀, ѻ҆те́цъ на́шихъ бж҃е, бл҃гослове́нъ є҆сѝ.

И҆мꙋ́ще тѧ̀ твоѝ рабѝ застꙋ́пника те́пла, и҆ стѣ́нꙋ неѡбори́мꙋ, гра́да росто́ва ᲂу҆твержде́нїе, не ᲂу҆бои́мсѧ сꙋпоста́тныхъ врагѡ́въ, но побѣжда́емъ си́лою хрⷭ҇то́вою, взыва́юще: ѻ҆те́цъ на́шихъ бж҃е, бл҃гослове́нъ є҆сѝ.

Оу҆ста́вы ѻ҆те́ческими ᲂу҆тверди́лъ є҆сѝ, мꙋ́дре, цр҃ковь пречⷭ҇тыѧ мт҃ре бж҃їѧ, и҆ свѧще́нства лѣ́потою преꙋкра́шеннѡ сохрани́лъ є҆сѝ, и҆ ᲂу҆че́ньми твои́ми наказа́лъ є҆сѝ взыва́ти: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Спаси́тельное приста́нище, бцⷣе дв҃о, тѧ̀ и҆мꙋ́ще, жите́йскихъ бѣ́дъ и҆ бꙋ́ри и҆збѣга́емъ, къ приста́нищꙋ тишины̀ твоеѧ̀ приходѧ́ще, и҆ сн҃ꙋ твоемꙋ̀ вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Побѣжде́нъ бы́въ врагѡ́мъ прегрѣше́ньми мно́гими, мо́лвъ жите́йскихъ, вѣ́рою прихождꙋ̀, и҆ ꙗ҆́кѡ манассі́а вопїю́ ти, хрⷭ҇тѐ, ст҃и́телѧ моле́нїемъ спаса́емь зовꙋ̀: гдⷭ҇а по́йте, и҆ превозноси́те є҆го̀ во вѣ́ки.

Воѡрꙋжа́ютсѧ на ны̀ смирє́нныѧ лю́ди твоѧ̑, ст҃и́телю пречестны́й і҆гна́тїе, сы́нове а҆га́рины: но сокрꙋшѝ и҆́хъ неви́димою си́лою, моле́нїемъ твои́мъ ко влⷣцѣ за при̑сныѧ рабы̑, пою́щыѧ: гдⷭ҇а по́йте, и҆ превозноси́те є҆го̀ во вѣ́ки.

Мѡли́твы, пребл҃же́нне, и҆ молє́нїѧ творѧ́ща, тебѐ прилѣ́жнѡ къ бг҃ꙋ при́снѡ за рабы̑ твоѧ̑, въ печа́лехъ застꙋ́пника и҆ побо́рника и҆мꙋ́ще тѧ̀ къ бг҃ꙋ, ѿ всѣ́хъ бѣ́дъ спаса́емсѧ, гдⷭ҇а пою́ще, и҆ превозносѧ́ще є҆го̀ во вѣ́ки.

Бг҃оро́диченъ: Влⷣчце дв҃о чⷭ҇таѧ препросла́вленнаѧ, со ст҃и́телемъ къ сн҃ꙋ твоемꙋ̀ цр҃ю̀ моли́сѧ прилѣ́жнѡ, ѿ всѧ́кїѧ нꙋ́жды и҆ бѣды̀ и҆зба́витисѧ гра́дꙋ твоемꙋ̀ росто́вꙋ, тебѐ, гпⷭ҇жѐ, вѣ́рою блажа́щꙋ, и҆ пою́щꙋ и҆ превозносѧ́щꙋ во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Вельмѝ ра́дꙋетсѧ ѡ҆ тебѣ̀, честны́й ѻ҆́ч҃е, ст҃и́телю і҆гна́тїе, при́сный тво́й гра́дъ росто́въ, и҆мѣ́ѧ тѧ̀ на всѧ́ко вре́мѧ помо́щника и҆ застꙋ́пника, и҆ ны́нѣ не ѿходѝ ѿ на́съ, моли́твы творѧ̀ за ны̀ къ бг҃ꙋ, ꙗ҆́кѡ да ѿ безбо́жныхъ ва̑рваръ на́съ и҆зба́виши, тѧ̀ велича́ющихъ.

Ꙗ҆́кѡ блꙋдни́ца и҆ мыта́рь и҆ разбо́йникъ вопїю̀ тѝ ѿ се́рдца: согрѣши́хъ, прости́ мѧ, влⷣко, мно́гихъ мои́хъ ѕлы́хъ прегрѣше́нїй, и҆ и҆зба́ви ѿ всѧ́кагѡ ѕла̀, ст҃и́телѧ моле́нїемъ і҆гна́тїа, ꙗ҆́кѡ да твою̀ ми́лость непреста́ннѡ велича́емъ.

Прїиди́те, собере́мсѧ всѝ росто́встїи наро́ди, къ блаже́ннѣй ра́цѣ прпⷣбнагѡ і҆гна́тїа, и҆ со слеза́ми возопїе́мъ къ бг҃ꙋ молѧ́щесѧ: и҆зба́ви, гдⷭ҇и, лю́ди твоѧ̑, и҆ не да́ждь достоѧ́нїѧ твоегѡ̀ ро́дꙋ і҆сма́ильтескомꙋ, ꙗ҆́кѡ да возвели́чимъ ми́лость твою̀ во вѣ́ки.

Марі́е бг҃оневѣ́сто влⷣчце, ѡ҆мраче́нное моѐ се́рдце съ дꙋше́ю мольба́ми твои́ми просвѣтѝ, и҆ жи́зни вѣ́чныѧ сподо́би мѧ̀, гпⷭ҇жѐ, не помина́ющи мои́хъ безчи́сленныхъ ѕѡ́лъ, сн҃а и҆ бг҃а твоего̀ молѝ за мѧ̀ ѻ҆каѧ́ннаго, и҆ пѣвцы̀ твоѧ̀ сохранѝ, пречⷭ҇таѧ.

Свѣти́ленъ.

Чꙋ́днаго и҆ сла́внаго ст҃и́телѧ і҆гна́тїа вели́каго, прїиди́те, пѣ́сньми свѧще́нными да похва́лимъ, ꙗ҆́кѡ росто́вцємъ па́стырѧ, и҆ а҆́гг҃льскимъ чинѡ́мъ сослꙋже́бника бы́вша.