Канон собору святых преподобных отцов Псково-Печерских

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Прииди́те, и́нок мно́жества, прииди́те, духо́вное сосло́вие и лю́дие ве́рнии, соста́вим ли́к пра́зднующих, дне́сь духо́вная на́ша трапе́за, дне́сь на́м Небе́сное ра́дование, соверша́ющим святу́ю па́мять оте́ц на́ших.

Све́тло соверша́ем торжество́ ва́ше сие́ и досто́йно почита́ем вы́, преподо́бнии Ма́рко, Ио́но, Корни́лие, ма́ти Ва́ссо, Вассиа́не и Дорофе́е, Бо́гу угоди́вшии и на Небесе́х со все́ми святы́ми просла́вленнии.

Ничто́же возлюби́в на земли́ па́че Зижди́теля, прия́ли есте́ труды́ и по́двиги любве́ ра́ди Христо́вы, те́мже сподо́билися есте́ насле́дия пра́ведных, моли́те Христа́ о на́с, почита́ющих па́мять ва́шу.

Богоро́дичен: Досто́йно е́сть хвали́ти Тя́, ми́ра Влады́чицу, я́ко и ме́сту сему́ до́льнему дарова́ла еси́ Небе́с велеле́пие, мы́ же, веселя́щеся, прославля́ем Тя́, Ма́ти щедро́т, ми́р подаю́щую оби́тели се́й и ве́лию ми́лость.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Притеце́м ны́не, ве́рнии, первонасе́льника Пече́рскаго Ма́рка воспои́м велегла́сно и о благоче́стнем Ио́не благода́рне возра́дуемся, и́х бо моли́твами смире́нными и во тьме́ земне́й пеще́р богозда́нных излия́ся благода́ти Небе́сныя светоли́тие Трисия́нное.

Пе́сньми свяще́нными воспросла́вим и тя́, преподо́бная Ва́ссо, я́ко ми́ра сего́ пре́лести возгнуша́вшися, возжеле́ла еси́ о́браза и́ноческаго, во е́же еди́ному Христу́ послужи́ти, те́мже и вене́ц бра́чный на Небе́сныя сла́вы вене́ц премени́ла еси́.

Досто́йную похвалу́ принесе́м преподобному́ченику Корни́лию, игу́мену прему́дрому, и́же и дне́сь умудря́ет сердца́ на́ша до́бре, направля́я на́с ко спасе́нию.

Богоро́дичен: Благода́тию Твое́ю, о Богома́ти, на́с, скве́рны вся́кия испо́лненных, очи́сти и укрепи́, я́ко, ко о́бразу Успе́ния Твоего́ Пече́рскому припа́дающе, взыва́ем си́це: не оста́ви на́с, гре́шных, но поми́луй вся́ моли́твами преподо́бных оте́ц на́ших.

Конда́к, гла́с 2.

Тебе́, Богоро́дице и Де́ве Чи́стей, за вся́ лю́ди Бо́га умоля́ющей, оби́тель Пско́во-Пече́рская святы́х свои́х, я́ко да́р, дне́сь прино́сит, Твои́х же даро́в бога́тство кто́ испове́сть, я́ко и в ра́й возвела́ еси́ отцы́ на́ша.

И́кос:

Я́ко са́д благоуха́нный, процвела́ е́сть оби́тель Пско́во-Пече́рская святы́ми Твои́ми, Го́споди, и́хже моли́твами оби́лие ми́лости Бо́жия источи́ся на ме́сте се́м, по словеси́ прему́драго: ели́ка а́ще помо́лится Тебе́ на ме́сте се́м, и Ты́ услы́шиши на ме́сте жили́ща Твоего́ на Небеси́, и сотвори́ши, и ми́лостив бу́деши и́м. Сея́ ми́лости прича́стницы бы́вше, смире́нно мо́лим Тя́, Христе́: ми́лостив бу́ди ны́не и при́сно ко святе́й оби́тели се́й, моли́твами преподо́бных отце́в на́ших, и́хже Пречи́стая Богоро́дица в ра́й введе́.

Седа́лен, гла́с 4:

Пско́во-Пече́рская похвало́, отцы́ преподо́бнии, яви́лися есте́ я́ко ору́жницы Христо́вы, моли́твы бо ва́ша я́ко ме́ч духо́вный, грехи́ посека́яй, не преста́йте хода́тайствовати о чту́щих па́мять ва́шу све́тло.

Богоро́дичен: Де́во, Ма́ти блага́я, ми́ру покро́ве и заступле́ние, не оста́ви оби́тель Пско́во-Пече́рскую, я́коже во Успе́нии ми́ра не оста́вила еси́, но спаса́й на Тя́ упова́ющия.

Пе́снь 4.

Ирмо́с: Прише́л еси́ от Де́вы, не хода́тай, ни А́нгел, но Са́м, Го́споди, вопло́щься, и спа́сл еси́ всего́ мя́ челове́ка. Те́м зову́ Ти́: сла́ва си́ле Твое́й, Го́споди.

Воспева́ем дне́сь ва́с любо́вию, подви́жницы Христо́вы: преподобному́чениче Вассиа́не, преподо́бне о́тче Дорофе́е и Ла́заре, ста́рче пра́ведный, и́же процвели́ есте́ во оби́тели се́й, я́ко кри́ни ра́йстии.

Ра́дуйся, Це́рковь Росси́йская, возрасте́ бо в тебе́ апо́стольское се́яние Андре́ево, земли́ Ру́сския украше́ние, оби́тели чу́дныя Пече́рския, еди́на во стране́ Ки́евстей, во Пско́встей же друга́я: и та́ о Бо́зе лику́ет, и сия́ весели́тся, воспева́юще собо́ры святы́х свои́х.

Све́т спаси́тельный возсия́ живу́щим о́крест оби́тели Пско́во-Пече́рския, гла́с слове́с Боже́ственных и хвалы́ Творцу́ потрясе́ возду́х пре́жде непло́дныя пусты́ни, подви́гнув ве́рныя непреста́нно славосло́вити Христа́ Жизнода́вца.

Богоро́дичен: Богоро́дице Де́во, упова́ние на́ше, моли́ Сы́на Твоего́ и Го́спода на́шего сохрани́ти от все́х бе́д и напа́стей оби́тель сию́, ю́же преподо́бный Корни́лий вку́пе с подвиза́вшимися зде́ созда́, да вси́ почерпа́ющии по́мощь неоску́дную от святы́нь ея́ во вся́ дни́ сла́вят и ублажа́ют Тя́, в пе́снех велича́юще.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же, Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Жития́ треволне́ния ни во что́ же вмени́в, преподо́бне о́тче на́ш Ма́рко преблаже́нне, в пусты́ню Пско́вскую всели́лся еси́ и в пеще́ре, Бо́гом зда́нней, в по́двизех мно́зех сокрове́нно пожи́л еси́, того́ ра́ди па́мять твоя́ пребыва́ет во ве́ки.

Храня́ ве́ру Правосла́вную, лати́няном не покори́лся еси́ и, от Ю́рьева гра́да изше́д, Иоа́нне, иере́е Бо́га Жива́го, хра́м Пречи́стыя в горе́ ископа́л еси́, возжада́в То́й послужи́ти во о́бразе и́ночестем, нарече́н бы́в Ио́на, в души́ свое́й бога́тство Ду́ха Свята́го собра́л еси́, преблаже́нне.

Егда́ боле́знь сме́ртная пости́же тя́, прия́ла еси́ о́браз а́нгельский, преподо́бная ма́ти Ва́ссо, гро́б же тво́й по кончи́не си́лою Бо́жиею изнесе́н бы́сть двукра́ты из земли́, да притека́ют лю́дие ве́рнии к ра́це моще́й твои́х.

Богоро́дичен: Вся́ упова́ния на́ша в Тебе́, Ма́ти Де́во, иму́ще, мо́лим Тя́, я́ко святы́х сла́ву и Влады́чицу милосе́рдную: да́руй на́м, преподо́бных Твои́х ра́ди, грехо́в исправле́ние и и́ноческому житию́ споспе́шествуй при́сно, подаю́щи благода́ть Свою́ неоску́дну.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Яви́лся еси́, преподобному́чениче Корни́лие, благоче́стия ди́вный наста́вник и оби́тели Пече́рския строи́тель изря́дный, украси́л еси́ ю́ хра́мы святы́ми, та́кожде и о́крест воздвиза́л еси́ и́х, чудь просвеща́я, ны́не же в оби́тели пребыва́я Небе́сней и Тро́ице Святе́й предстоя́ вы́ну, моли́ спасти́ся душа́м на́шим.

Оболга́ша тя́, о́тче Корни́лие, льстецы́ зло́бнии, к безу́мию склони́ся ца́рь Гро́зный и сме́рти тя́ предаде́, те́мже и освяти́ся твое́ю кро́вию оби́тель Пско́во-Пече́рская, и обогати́шася тобо́ю ча́да твоя́, ту́ и́ночествующая, я́ко засту́пником пред Бо́гом.

Па́мятующе по́двиги твоя́ и боре́ния и кончи́ну от руки́ самоде́ржца Росси́йскаго, скорбя́щая бра́тия Пско́во-Пече́рская хра́м устро́иша во и́мя твое́, преподобному́чениче Корни́лие, в не́мже безкро́вную же́ртву прино́сят, хва́ляще и благословя́ще Бо́га.

Богоро́дичен: Я́же снабде́нием пско́вич благове́рных и труды́ преподо́бных созда́нныя, почита́ем пречестны́я ико́ны Твоя́, Богоро́дице, просия́вшия во оби́тели Пско́во-Пече́рстей: Одиги́трии, Звезды́ путево́дныя, Успе́ния и Умиле́ния чу́дна, и, духо́вно веселя́щеся, я́ко Саму́ Тя́ лобыза́ем, христиа́ном похвало́, спасе́ния утвержде́ние.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть. Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Времена́ и ле́та Це́ркве Пско́вския изъяви́л еси́ на́м, преподобному́чениче Вассиа́не, Корни́лию богому́дрому в летописа́нии помога́я изря́дно, та́же и дело́м его́ ревни́тель бы́в сла́вный, ны́не же с ни́м во Све́те Трисия́ннем вопие́ши согла́сно: благослове́н еси́, Бо́же оте́ц на́ших.

В труде́х по́стнических я́ко благода́ти ро́су испива́л еси́ вку́пе со отце́м на́шим Корни́лием, Вассиа́не преподобному́чениче, та́кожде и ча́шу сме́ртную испи́л еси́ с ни́м безви́нно, и от царя́ земна́го к Царю́ Небе́сному предпо́сланы бы́сте, Тому́ вопию́ще: благослове́н еси́, Бо́же оте́ц на́ших.

Преподобному́чениче Корни́лие, не оста́ви и ны́не моли́твами твои́ми ча́да твоя́, я́коже и пре́жде ты́, защи́тниче страны́ Пско́вския, не оста́вил еси́ ю́ в наше́ствие Бато́риево, но, бы́в ко Пречи́стей те́плый хода́тай, пред Не́ю предста́л еси́ в виде́нии чу́днем над Пско́вом гра́дом, со святы́ми вопия́: благослове́н еси́, Бо́же оте́ц на́ших.

Богоро́дичен: Показа́ Не́бо Правосла́вия сла́ву, егда́ яви́ся на возду́се Ма́ти все́х ве́рных, от наше́ствия же во́ев Бато́риевых Пско́в гра́д и оби́тель Пече́рскую изба́вльши, Горе́ бо святи́и со Корни́лием Ю́ умоля́ху, до́лу же и́ноцы Пече́рстии со пско́вичи ко о́бразу Ея́ со слеза́ми припа́даху, Бо́гу вопию́ще: благослове́н еси́, Бо́же оте́ц на́ших.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

По́стнических по́двигов жела́я сподо́битися, преподо́бне о́тче на́ш Дорофе́е, во оби́тель Пско́во-Пече́рскую прише́д, ве́тхаго челове́ка совле́клся еси́, доброде́телей мно́жеством украси́вся, те́мже и избра́ тя́ Пречи́стая Де́ва пренести́ о́браз Сво́й светоза́рный из преде́л Пече́рских в зе́млю Яросла́вскую, да и та́мо возсия́ет сугу́бо благода́ть Богоро́дицы Пресла́вныя.

О́трасле духо́вная оби́тели Пече́рския, богоно́се смире́нне Дорофе́е, издре́вле страна́ Пско́вская и страна́ Яросла́вская ве́лию ве́ру к тебе́ и́мут, я́ко в пе́рвей са́м духо́вно умудри́ся, во друзе́й же ины́я умудря́л еси́, в пусты́ню Ю́гскую приходя́щия, те́мже тя́, уго́дника Христо́ва, велича́ем.

Ла́заре, благоче́стия подви́жниче, равноа́нгельным и пра́ведным житие́м твои́м в затво́ре яви́лся еси́ насле́дник бла́г ве́чных, та́кожде и на́с, гре́шных, в покая́нии утверди́, да и мы́ моли́твами твои́ми просвети́мся и изба́вимся от се́тей вра́жиих, о́тче на́ш преблаже́нне.

Богоро́дичен: Богоро́дицу и Ма́терь Све́та Тя́ при́сно велича́юще, ны́не гла́сы умиле́нными Тя́ воспева́ем, я́ко дарова́ла еси́ на́м собо́р преподо́бных Пско́во-Пече́рских сла́вный, еди́на Чи́стая и благослове́нная.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Не́дра земна́я не сокры́ша сокро́вища моще́й ва́ших, преподо́бнии Пско́во-Пече́рстии, и́миже источа́ете струи́ благода́ти, освяща́юще ду́ши на́ша, да и мы́ вни́дем ко трапе́зе Христа́ Бо́га и Небе́снаго весе́лия прича́стницы бу́дем, ва́ш собо́р почита́юще.

Велича́ет ва́с, преподо́бнии, оби́тель Пско́во-Пече́рская, на Святе́й горе́ во и́мя ва́ше хра́м созда́вшая, я́ко спобо́рником кре́пким в труде́х и моли́твах, и про́сит уми́льно: моли́те Христа́ Бо́га согреше́нием оставле́ние дарова́ти чту́щим любо́вию святу́ю па́мять ва́шу.

Тро́ичен: Триипоста́сный Бо́же, Живонача́льная Тро́ице, сохраня́й оби́тель святу́ю сию́, моли́тв ра́ди преподо́бных ея́, во вся́ дни́ до сконча́ния ве́ка.

Богоро́дичен: Ра́дуйся, Обра́дованная, во Успе́нии Твое́м на́с не оставля́ющая и моли́твы преподо́бных оте́ц Пско́во-Пече́рских к Сы́ну Твоему́ принося́щая о спасе́нии ду́ш на́ших.