Канон собору Соловецких святых

Пѣ́снь а҃.

І҆рмо́съ: Пресла́вный въ мо́ри ᲂу҆стро́ивый лю́демъ пꙋ́ть, нбⷭ҇ное на́мъ ше́ствїе проходи́мо сотворѝ, да но́вꙋю пѣ́снь пои́мъ тебѣ̀, гдⷭ҇и.

Хрⷭ҇тѐ, а҆́гнче бж҃їй, бл҃года́ть не то́кмѡ вѣ́ровати, но страда́ти по тебѣ̀ лю́демъ твои̑мъ дарова́вый, да́ждь на́мъ ра́зꙋмъ досто́йнѡ воспѣ́ти страда̑нїѧ новомч҃нкѡвъ солове́цкихъ, да назида́ютсѧ вѣ́рнїи и҆́хъ пѡ́двиги.

Ꙗ҆́коже дре́вле посредѣ̀ мо́рѧ пꙋ́ть лю́демъ і҆и҃льскимъ ᲂу҆стро́ивый, гдⷭ҇и, си́це и҆ ны́нѣ на ѻ҆́стровѣхъ солове́цкихъ лю́демъ твои̑мъ посредѣ̀ страда́нїй лю́тыхъ пꙋ́ть въ црⷭ҇твїе нбⷭ҇ное проходи́мь сотвори́лъ є҆сѝ, да воспою́тъ тебѣ̀ пѣ́снь побѣ́днꙋю.

Прїиди́те, празднолю́бцы, па́мѧть новомч҃нкѡвъ солове́цкихъ просла́вимъ: сі́и бо, ѿ всѣ́хъ концє́въ землѝ рѡссі́йскїѧ на ѻ҆́стровѣхъ си́хъ собра́ннїи, кро́вь за хрⷭ҇та̀ проли́ша и҆ цр҃ковь рꙋ́сскꙋю ᲂу҆краси́ша.

Бг҃оро́диченъ: И҆зба́вльшесѧ чтⷭ҇ны́мъ ржⷭ҇тво́мъ твои́мъ, дв҃о, а҆́дскихъ и҆ тлѣ́нныхъ ᲂу҆́зъ и҆ зако́ннагѡ ѡ҆сꙋжде́нїѧ, пречⷭ҇таѧ, ра́дꙋйсѧ, ѡ҆бра́дованнаѧ, бл҃года́рнѡ вопїе́мъ тѝ, сп҃си́тельнаѧ две́ре бл҃года́ти.

Пѣ́снь г҃.

І҆рмо́съ: Оу҆твержде́й на ка́мени вѣ́ры, на се́мъ сози́ждꙋ мою̀ цр҃ковь, рекі́й гдⷭ҇и, сп҃си́ мѧ вопїю́ща: ты̀ є҆сѝ, хрⷭ҇тѐ, сн҃ъ бг҃а жива́гѡ, и҆ въ тебѣ̀ ᲂу҆тверди́сѧ дꙋ́хъ мо́й.

Себє̀ ѿве́ргшесѧ и҆ крⷭ҇тъ взе́мше, хрⷭ҇тꙋ̀ послѣ́довали є҆стѐ, стрⷭ҇тоте́рпцы солове́цтїи, и҆ дꙋ́шы ва́шѧ за него̀ положи́вше, неꙋвѧда́емый вѣне́цъ сла́вы на нб҃сѣ́хъ прїѧ́ли є҆стѐ.

Ка́меню вѣ́ры, сщ҃енномч҃нче пе́тре, а҆рхїере́ю достохва́льне, воро́нежскїѧ землѝ сла́во и҆ похвале́нїе, ты̀ во дни̑ страда́нїй на ѻ҆́стровѣхъ солове́цкихъ и҆сповѣ́днически вопїѧ́лъ є҆сѝ: хрⷭ҇то́съ є҆́сть сн҃ъ бг҃а жива́гѡ, и҆ въ не́мъ ᲂу҆тверди́сѧ дꙋ́хъ мо́й.

Сто́лпе правосла́вїѧ нерꙋши́мый, красото̀ и҆ сла́во цр҃кве рꙋ́сскїѧ, сщ҃енномч҃нче є҆ѵге́нїе, ты̀, ста́рѣй ѿ а҆рхїере́євъ во ᲂу҆зи́лищи солове́цтѣмъ бы́въ, пра́вило вѣ́ры и҆ ѻ҆́бразъ кро́тости ю҆нѣ́йшымъ ꙗ҆ви́лъ є҆сѝ и҆ хрⷭ҇та̀ бг҃а до кончи́ны дне́й твои́хъ и҆сповѣ́далъ є҆сѝ.

Бг҃оро́диченъ: Скве́рнꙋ всю̀ пе́рвыѧ ѿложи́вше снѣ́ди, живо́тнагѡ хлѣ́ба съ нб҃сѐ напита́емсѧ, ѿ землѝ дв҃ы возсїѧ́вшагѡ, ю҆́же, ꙗ҆́кѡ хода́таицꙋ бл҃ги́хъ, воспои́мъ.

Сѣда́ленъ, гла́съ д҃:

Новомч҃нцы приснопа́мѧтнїи, вы̀, а҆́ще живꙋ́ще, а҆́ще ᲂу҆мира́юще, вы́нꙋ гдⷭ҇еви предстоѧ́ли є҆стѐ, и҆ дꙋ́шы за вѣ́рꙋ хрⷭ҇то́вꙋ положи́вше, нбⷭ҇нагѡ жи́тєльства вѣ́чнꙋю ра́дость воспрїѧ́ли є҆стѐ, ѡ҆брѣ́тшесѧ ꙗ҆́кѡ зла́то неги́блющее црⷭ҇твїѧ бж҃їѧ.

Пѣ́снь д҃.

І҆рмо́съ: Ꙗ҆́кѡ петрꙋ̀ рꙋ́кꙋ простры́й въ по́мощь, и҆ менѐ поми́лꙋй, и҆ сп҃сѝ ꙗ҆́кѡ чл҃вѣколю́бецъ.

ѽ вели́кїй со́нме новомч҃нкѡвъ и҆ и҆сповѣ́дникѡвъ солове́цкихъ: ст҃и́телїе и҆ і҆ерє́и, мона́си и҆ мїрсті́и, ста́рцы и҆ ю҆́нїи и҆ же́нъ сосло́вїе, и҆сполне́нїе цр҃кве хрⷭ҇то́вы! вы̀, на є҆ди́номъ по́прищи страда́нїй совокꙋ́пльшесѧ, є҆ди́нꙋ мздꙋ̀ во црⷭ҇твїи нбⷭ҇нѣмъ ѡ҆брѣто́сте.

Ѳавѡ́ръ и҆ є҆рмѡ́нъ ѡ҆ и҆́мени гдⷭ҇нѣмъ возра́довашасѧ, голго́ѳа же а҆́нзерскаѧ страда̑нїѧ земна̑ѧ и҆ нбⷭ҇нꙋю сла́вꙋ новомч҃нкъ проповѣ́дꙋетъ. ті́и бо, го́рькими рабо́тами, гла́домъ, болѣ́зньми и҆ сме́ртїю за хрⷭ҇та̀ сп҃се́нїе ѡ҆брѣ́тше, въ го́рнѣмъ і҆ерⷭ҇ли́мѣ съ первомч҃нки ликовствꙋ́ютъ.

А҆рхїере́євъ рꙋ́сскихъ похвало̀ и҆ солове́цкихъ ᲂу҆́зникѡвъ добро́то, патрїа́ршагѡ чи́на ревни́телю и҆ лжеѡбнови́телей цр҃кве ѡ҆бличи́телю, і҆ларїѡ́не, сще҃нномч҃нче бг҃омꙋ́дрый, страда̑нїѧ ѡ҆ гдⷭ҇ѣ и҆ лови́твꙋ ры́бъ со смире́нїемъ прїѧ́лъ є҆сѝ, ꙗ҆́кѡ а҆пⷭ҇льское дѣ́ланїе. ны́нѣ же и҆ на́мъ те́плый мл҃твенникъ и҆ предста́тель пред̾ бг҃омъ ꙗ҆влѧ́ешисѧ.

Бг҃оро́диченъ: И҆́стиннꙋю бцⷣꙋ тѧ̀ всѝ ро́дове родѡ́въ сла́вѧтъ, ст҃ѣ́йшꙋ а҆́гг҃лъ ꙗ҆́вѣ бы́вшꙋ, прест҃а́ѧ дв҃о. тѣ́мже вопїе́мъ: ѡ҆ст҃ѝ на́шѧ дꙋ́шы, ѡ҆скверни́вшыѧсѧ страстьмѝ.

Пѣ́снь є҃.

І҆рмо́съ: Оу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ повелѣ̑нїѧ прише́ствїѧ твоегѡ̀: и҆́миже ᲂу҆́бѡ ѡ҆зарѝ ᲂу҆́мъ на́шъ, влⷣко, и҆ наста́ви на стезю̀ жи́зни.

И҆́ноцы прпⷣбнїи дре́вле бл҃голѣ́пїемъ цр҃ко́внымъ ѻ҆́стровы соловє́цкїѧ преѡбрази́ша, новомч҃нцы же и҆ и҆сповѣ̑дницы во дни̑ гоне́нїй лю́тыхъ страда́ньми за хрⷭ҇та̀ мѣ́сто сїѐ па́че просла́виша. ны́нѣ же кꙋ́пнѡ бг҃ꙋ предстоѧ́тъ, молѧ́щесѧ ѡ҆ ѻ҆би́тели солове́цтѣй.

Венїамі́не досточꙋ́дне, па́стырю преди́вный, ты̀, солове́цкїѧ бра́тїи нача́льникъ бы́въ, свидѣ́тель ѕлодѣѧ́нїй и҆ порꙋга́нїѧ ѻ҆би́тели ст҃ы́ѧ ꙗ҆ви́лсѧ є҆сѝ. страда́льческꙋю же кончи́нꙋ ѿ беззакѡ́нникъ въ землѝ а҆рха́нгельстѣй прїе́мъ, мч҃нческїй ли́къ ᲂу҆мно́жилъ є҆сѝ.

Бл҃гохвале́нїе воздади́мъ бг҃обл҃же́нномꙋ нїки́форꙋ, то́й бо, въ солове́цтѣй ѻ҆би́тели прпⷣбнически пожи́въ, въ и҆згна́нїи ѻ҆́бщникъ венїамі́нꙋ ꙗ҆ви́сѧ, и҆ кончи́нꙋ мч҃нческꙋю съ ни́мъ вкꙋ́пѣ воспрїе́мъ, црⷭ҇твїѧ нбⷭ҇нагѡ дости́же.

Бг҃оро́диченъ: Не пре́зри, молѧ́щи ѡ҆ на́съ сн҃а твоего̀, хрⷭ҇та̀ бг҃а на́шего, при́снѡ бл҃гослове́ннаѧ, и҆зба́витисѧ всѧ́кїѧ ско́рби, чⷭ҇таѧ.

Пѣ́снь ѕ҃.

І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю, и҆ сп҃сѝ.

Во хрⷭ҇тѣ̀ страда́вше, новомч҃нцы солове́цтїи, цр҃кве правосла́вныѧ столпѝ крѣ́пцыи, ꙗ҆́кѡ побѣди́вшїи кѡ́зни дїа́вѡльскїѧ, ꙗ҆ви́стесѧ, сегѡ̀ ра́ди дарова́сѧ ва́мъ и҆́мѧ но́вое и҆ жи́тельство въ нбⷭ҇нѣмъ і҆ерⷭ҇ли́мѣ.

Во страда́нїихъ и҆ го́рькихъ рабо́тахъ на ѻ҆́стровѣхъ солове́цкихъ подвиза́вшїисѧ, къ покаѧ́нїю и҆ добродѣ́тельномꙋ житїю̀ подви́гните на́съ, ст҃і́и новомч҃нцы, да и҆ мы̀ ва́шими мл҃твами сподо́бимсѧ прославлѧ́ти гдⷭ҇а во црⷭ҇твїи є҆гѡ̀.

Въ ско́рбехъ и҆ бѣда́хъ, страда́нїихъ и҆ тѧгота́хъ темни́чныхъ многолѣ́тнѣ пребыва́ѧ, ст҃и́телю а҆ѳана́сїе и҆сповѣ́дниче, слꙋ́жбѣ бжⷭ҇твеннѣй всѣ́мъ се́рдцемъ прилѣжа́лъ є҆сѝ и҆ пѣсносло́вїе хвале́бное ст҃ы̑мъ землѝ рѡссі́йскїѧ сложи́лъ є҆сѝ. ны́нѣ же съ ни́ми во црⷭ҇твїи нбⷭ҇нѣмъ пребыва́ѧ, трⷪ҇цꙋ ст҃ꙋ́ю прославлѧ́еши.

Бг҃оро́диченъ: Сло́во во ᲂу҆тро́бѣ твое́й, чⷭ҇таѧ, воплоща́етсѧ, безслове́сныхъ плотски́хъ страсте́й мі́ръ и҆збавлѧ́ѧ.

Конда́къ, гла́съ г҃:

Дне́сь прⷭ҇то́лꙋ бж҃їю предстоѧ́тъ новомч҃нцы солове́цтїи и҆ съ нбⷭ҇ными ли̑ки за ны̀ мо́лѧтсѧ бг҃ꙋ, мы́ же, па́мѧть и҆́хъ бл҃гоговѣ́йнѡ соверша́юще, взыва́емъ: ра́дꙋйтесѧ, достопокланѧ́емїи срѡ́дницы на́ши, ꙗ҆́кѡ мзда̀ ва́ша мно́га на нб҃сѣ́хъ.

І҆́косъ:

Приснобл҃же́ннїи новомч҃нцы солове́цтїи, хрⷭ҇тꙋ̀ бг҃ꙋ вѣ́рнѡ послѣ́довавшїи и҆ мі́ръ просвѣти́вшїи страда̑нїи ва́шими, вы̀, за́пѡвѣди хрⷭ҇тѡ́вы и҆спо́лнивше, бл҃жє́нства є҆ѵⷢ҇льскаѧ наслѣ́довали є҆стѐ. сегѡ̀ ра́ди, па́мѧть ва́шꙋ бл҃гоговѣ́йнѡ соверша́юще, взыва́емъ ва́мъ си́це:

ра́дꙋйтесѧ, во смире́нїи дꙋ́хомъ хрⷭ҇то́вымъ ѡ҆богати́вшїисѧ:

ра́дꙋйтесѧ, въ бз҃ѣ ᲂу҆тѣше́нїе ѡ҆брѣ́тшїи:

ра́дꙋйтесѧ, зе́млю кро́ткихъ наслѣ́довавшїи:

ра́дꙋйтесѧ, ѡ҆правда́нїемъ гдⷭ҇нимъ насы́тившїисѧ:

ра́дꙋйтесѧ, млⷭ҇рдїемъ млⷭ҇ть бж҃їю стѧжа́вшїи:

ра́дꙋйтесѧ, чистото́ю се́рдца бг҃а ᲂу҆зрѣ́вшїи:

ра́дꙋйтесѧ, ми́ръ сотво́рше, сы̑ны бж҃їи нарече́ннїи:

ра́дꙋйтесѧ, и҆згна́нїемъ пра́вды ра́ди црⷭ҇твїе нбⷭ҇ное ᲂу҆лꙋчи́вшїи: ра́дꙋйтесѧ, поношє́нїѧ и҆ ѡ҆болга̑нїѧ за хрⷭ҇та̀ прїе́мшїи.

Ра́дꙋйтесѧ и҆ весели́тесѧ, достопокланѧ́емїи срѡ́дницы на́ши, ꙗ҆́кѡ мзда̀ ва́ша мно́га на нб҃сѣ́хъ.

Пѣ́снь з҃.

І҆рмо́съ: Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзкое, ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Мꙋчи́телей ѕлочести́выхъ преще́нїе бг҃оме́рзкое презрѣ́вше, новомч҃нцы и҆ и҆сповѣ̑дницы солове́цтїи, ꙗ҆́кѡ дре́вле ѻ҆́троцы въ пещѝ, во ѻ҆гнѝ гоне́нїй поѧ́хꙋ: препѣ́тый ѻ҆тцє́въ и҆ на́шъ бж҃е, бл҃гослове́нъ є҆сѝ.

Безꙋ́мное велѣ́нїе власти́телей, є҆́же бг҃ꙋ не покланѧ́тисѧ и҆ не чти́ти є҆го̀, мꙋ́жески ѿве́ргше, и҆згна̑нїѧ, заточє́нїѧ и҆ гѡ́рькїѧ рабѡ́ты, ꙗ҆́кѡ ча́сть бл҃гꙋ́ю, и҆збра́ли є҆стѐ, ст҃і́и мч҃нцы, гдⷭ҇ꙋ взыва́юще: препѣ́тый ѻ҆тцє́въ и҆ на́шъ бж҃е, бл҃гослове́нъ є҆сѝ.

Посредѣ̀ мꙋче́нїй тѧ́жкихъ любо́вїю къ бг҃ꙋ пламенѣ́ли є҆стѐ, ст҃і́и, и҆ мꙋчи́телей ѕлоꙋхищрє́нїѧ многоразли̑чнаѧ посрамлѧ́юще, со дерзнове́нїемъ взыва́ли є҆стѐ: препѣ́тый ѻ҆тцє́въ и҆ на́шъ бж҃е, бл҃гослове́нъ є҆сѝ.

Бг҃оро́диченъ: Бл҃жа́тъ тѧ̀, пречⷭ҇таѧ, мч҃нческїй ли́къ и҆ мч҃нколю́бцєвъ собра́нїе, бж҃їе бо сло́во па́че ᲂу҆ма̀ и҆ сло́ва родила̀ є҆сѝ.

Пѣ́снь и҃.

І҆рмо́съ: Побѣди́тєли мꙋчи́телѧ и҆ пла́мене, бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Ст҃і́и новомч҃нцы и҆ и҆сповѣ̑дницы во времена̀ бг҃обо́рчєскаѧ соловє́цкїѧ ѡ҆то́ки ще́дрѡ ѡ҆бл҃годати́ша, и҆́хъ бо страда̑нїи и҆ кро́вїю мѣ́сто мꙋче́нїѧ селе́нїе сла́вы гдⷭ҇ни бы́сть.

Прехва́льне слꙋжи́телю хрⷭ҇то́въ а҆рка́дїе, вѣ́ры правосла́вныѧ и҆зрѧ́дный проповѣ́дниче, млⷭ҇рдїемъ и҆ нищелю́бїемъ бг҃ꙋ ᲂу҆се́рднѡ ᲂу҆гожда́лъ є҆сѝ. сегѡ̀ ра́ди, на мнѡ́га лѣ̑та во ѻ҆́стровѣхъ солове́цкихъ заточе́нъ бы́въ, вѣне́цъ мч҃нческїй ѿ сꙋдїѝ всемлⷭ҇тивагѡ воспрїѧ́лъ є҆сѝ.

Трⷪ҇ченъ: Свы́ше назира́йте, новомч҃нцы, па́мѧть ва́шꙋ любо́вїю соверша́ющихъ и҆ хода́тайствꙋйте ᲂу҆ трисо́лнечнагѡ бжⷭ҇тва̀ ѡ҆ проще́нїи грѣхѡ́въ, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.

Бг҃оро́диченъ: Дре́вле є҆леаза́рꙋ прпⷣбномꙋ ѡ҆ грѧдꙋ́щихъ гоне́нїихъ возвѣсти́ла є҆сѝ, бцⷣе дв҃о, и҆ застꙋ́пница всемо́щнаѧ новомч҃нкѡмъ соловє́цкимъ ꙗ҆ви́ласѧ є҆сѝ.

Пѣ́снь ѳ҃.

І҆рмо́съ: Разбо́йника подража́ѧй ѻ҆каѧ́нный а҆́зъ, и҆сповѣ́даѧй тѧ̀ зовꙋ̀ тебѐ, є҆ди́наго ѿ ѻ҆ц҃а̀, и҆ ѿ дв҃ы неизрече́ннѡ воплоще́нна,

и҆ менє̀ ра́ди бы́вша по мнѣ̀: но ꙗ҆́кѡ свѣ́тъ ᲂу҆́мный, сл҃нце, не воспомѧнꙋ́въ ѕѡ́лъ, во црⷭ҇твїи твое́мъ помѧни́ мѧ, є҆гда̀ сꙋдїѧ̀, гдⷭ҇и, сѧ́деши на прⷭ҇то́лѣ.

Нїкоди́ма сщ҃енномч҃нка па́мѧть досто́йнѡ почти́мъ, и҆́же житїѧ̑ прпⷣбныхъ солове́цкихъ соста́ви и҆ по́двигомъ мч҃нческимъ въ бѣ́лѣ гра́дѣ а҆рхїпа́стырство своѐ ᲂу҆вѣнча̀. сегѡ̀ ра́ди бѣлгоро́дскаѧ землѧ̀ и҆ ѻ҆би́тель солове́цкаѧ вкꙋ́пѣ того̀ прославлѧ́ютъ.

Ѻ҆́тче і҆ѡа́нне бг҃одꙋхнове́нне, дни̑ мнѡ́гїѧ въ заточе́нїи солове́цтѣмъ пребы́въ, хрⷭ҇тꙋ̀ за ны̀ распе́ншꙋсѧ сораспѧ́лсѧ є҆сѝ и҆ въ землѝ воро́нежстѣй сме́рть мч҃нческꙋю ѿ гони́телей прїѧ́лъ є҆сѝ. сегѡ̀ ра́ди тѧ̀ велича́емъ.

Жизнода́вче гдⷭ҇и, мл҃твами новомч҃нкѡвъ и҆ и҆сповѣ́дникѡвъ солове́цкихъ ᲂу҆поко́й со всѣ́ми првⷣными вѣ̑рныѧ рабы̑ твоѧ̑, за и҆́мѧ твоѐ на ѻ҆́стровѣхъ си́хъ пострада́вшыѧ: ст҃и́тєли и҆ і҆ерє́и, мона́хи и҆ мїрскі̑ѧ, та́же жєны̀ съ дѣ́вами и҆ всѧ́къ во́зрастъ и҆ сосло́вїе, и҆́хже и҆мена̀ ты̀ са́мъ вѣ́си, ꙗ҆́кѡ и҆́стинныѧ ча̑да и҆ дрꙋ́ги твоѧ̑.

Бг҃оро́диченъ: Досто́йно є҆́сть ꙗ҆́кѡ вои́стиннꙋ бл҃жи́ти тѧ̀, дв҃о чⷭ҇таѧ, твои́ми бо мл҃твами всѧ́къ и҆сповѣ́дꙋѧй сн҃а твоего̀ ꙗ҆́кѡ и҆́стиннаго бг҃а ᲂу҆твержда́етсѧ и҆ жи́знь вѣ́чнꙋю ѡ҆брѣта́етъ.

Свѣти́ленъ:

Пѡ́двиги и҆ страда̑нїи новомч҃нкѡвъ и҆ и҆сповѣ́дникѡвъ солове́цкихъ свѣ́тъ хрⷭ҇то́въ во тьмѣ̀ возсїѧ̀. є҆го́же и҆ на́съ ᲂу҆лꙋчи́ти сподо́би мл҃твами ст҃ы́хъ твои́хъ, хрⷭ҇тѐ, свѣ́те и҆́стинный.