Канон собору Санкт-Петербургских святых

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̀, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Прїиди́те, въ пѣ́снехъ воспои́мъ собо́ръ сщ҃е́ннѣйшїй, всѣ́хъ ст҃ы́хъ, въ землѝ петербꙋ́ржстѣй просїѧ́вшихъ, и҆ свои́ми пѡ́двиги всю̀ зе́млю на́шꙋ ѡ҆ст҃и́вшихъ.

Восхва́лимъ а҆ндре́а первозва́ннаго и҆ ст҃а́го равноапⷭ҇льнагѡ влади́мїра, вкꙋ́пѣ же и҆ вели́кꙋю кнѧги́ню ѻ҆́льгꙋ, ꙗ҆́кѡ тѣ́хъ трꙋда́ми въ землѝ рѡссі́йстѣй вѣ́ра насади́сѧ, и҆ доны́нѣ бл҃года́тїю бж҃їею напаѧ́етсѧ и҆ пло́дъ стори́чный прино́ситъ.

Дне́сь соше́дшесѧ, вѣ́рнїи, восхва́лимъ по достоѧ́нїю бл҃говѣ́рнаго и҆ вѣнцено́снаго кнѧ́зѧ а҆леѯа́ндра, ꙗ҆́кѡ защи́тника землѝ рꙋ́сскїѧ и҆ чꙋде́съ пода́телѧ ѻ҆би́льнаго, при́снѡ гдⷭ҇ꙋ ѡ҆ всѣ́хъ на́съ молѧ́щасѧ.

Всемогꙋ́щїй гдⷭ҇ь си́лою на бра́нь вѣ̑рныѧ своѧ̀ препоѧсꙋ́ѧй, ѡ҆ кнѧ́же а҆леѯа́ндре, ѕлочести̑выѧ врагѝ под̾ но́зѣ твоѝ покорѝ и҆ на свѣ́щницѣ высо́цѣ поста́ви тѧ̀, тѣ́мже гра́дъ петра̀ тобо́ю хва́литсѧ и҆ ст҃а́ѧ ла́ѵра велича́етсѧ.

Бл҃говѣ́рный кнѧ́же а҆леѯа́ндре, прⷭ҇то́лꙋ бж҃їю со всѣ́ми ст҃ы́ми ны́нѣ предстоѧ̀, прославлѧ́еши трїѷпоста́снагѡ бг҃а, сегѡ̀ ра́ди подава́й на́мъ бл҃года́ть и҆сцѣле́нїй и҆ моли́сѧ ѡ҆ сп҃се́нїи дꙋ́шъ на́шихъ.

Свѣти́льниче землѝ рѡссі́йскїѧ пресвѣ́тлый, чꙋдесы̀ мно́гими сїѧ́ѧ, просвѣща́еши ди́внѡ дꙋ́шы соверша́ющихъ любо́вїю па́мѧть твою̀, а҆леѯа́ндре бл҃же́нне.

Прїиди́те, лю́дїе бл҃гочести́вїи, а҆рхїерє́и и҆ сщ҃е́нницы, мона́си и҆ мїрсті́и, ста́рїи и҆ младі́и, просла́вимъ кнѧ́зѧ бл҃говѣ́рнаго а҆леѯа́ндра, и҆́же всѧ́комꙋ во́зрастꙋ и҆ чи́нꙋ застꙋ́пникъ вѣ́рный и҆ наста́вникъ до́брый бы́сть.

Пѣ́сньми и҆ пѣ̑нїи дꙋхо́вными восхва́лимъ бл҃же́ннаго кнѧ́зѧ а҆леѯа́ндра, и҆ припа́дающе къ чтⷭ҇нѣ́й и҆ многоцѣле́бнѣй ра́цѣ є҆гѡ̀, съ любо́вїю ѡ҆блобыза́имъ ю҆̀ и҆ си́це воспои́мъ: ра́дꙋйсѧ, ѡ҆ ѻ҆те́чествѣ на́шемъ преди́вный мл҃твенниче.

Бг҃оро́диченъ: Чꙋ́днѡ ᲂу҆краси́сѧ гра́дъ на́шъ і҆кѡ́ною твое́ю, бцⷣе влⷣчце, скоропослꙋ́шницею и҆менꙋ́емою, ю҆́же бл҃говоли́ла є҆сѝ да́ти вѣ̑рнымъ въ по́мощь и҆ ᲂу҆тѣше́нїе, ско́рѡ бо слы́шиши мольбы̑ въ ско́рбехъ тѧ̀ призыва́ющихъ и҆ па́че лꙋче́й со́лнечныхъ всѣ́хъ ѡ҆свѣща́еши бл҃года́тїю твое́ю.

Пѣ́снь г҃.

І҆рмо́съ: Твоѧ̀ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Вмѣни́стесѧ ꙗ҆́кѡ ѻ҆́вцы заколе́нїѧ, ѡ҆ ца́рственнїи стрⷭ҇тоте́рпцы, и҆ ꙗ҆́коже а҆́гнцы непоро́чнїи, бг҃ꙋ поже́ршесѧ, за ᲂу҆бі̑йцы ва́шѧ кро́ткѡ моли́стесѧ. сегѡ̀ ра́ди и҆ а҆́гнецъ бж҃їй, взе́млѧй грѣхѝ мі́ра, прїѧ́тъ ва́съ во дворы̀ своѧ̀.

Ѽ стрⷭ҇тоте́рпче ст҃ы́й царю̀ нїко́лае, ро́да ца́рскагѡ вѣ́нче и҆ похвало̀! беззако́ннїи лю́дїе ѡ҆болга́ша и҆ преда́ша тѧ̀ на сме́рть лю́тꙋю, си́лою же бж҃їею ᲂу҆крѣплѧ́емь, всѧ̀ мꙋ́жественнѣ претерпѣ́лъ є҆сѝ.

Ѽ стрⷭ҇тоте́рпице цари́це а҆леѯа́ндро, смире́нїемъ свои́мъ всю̀ зе́млю рꙋ́сскꙋю ᲂу҆диви́вшаѧ! ты̀ болѧ́щыѧ и҆ стра́ждꙋщыѧ во́ины ᲂу҆тѣша́ющи и҆ ра̑ны и҆́хъ, ꙗ҆́кѡ ма́ти чадолюби́ваѧ, ѡ҆мыва́ющи, ꙗ҆́кѡ самомꙋ̀ хрⷭ҇тꙋ̀ бг҃ꙋ послꙋжи́ла є҆сѝ.

Ѽ ст҃і́и царю̀ нїко́лае и҆ цари́це а҆леѯа́ндро! вы̀ до́брагѡ сꙋпрꙋ́жества и҆ дѣте́й воспита́нїѧ бл҃гочести́вагѡ ѻ҆́бразъ ꙗ҆ви́сте и҆ до́мъ сво́й, ꙗ҆́кѡ цвѣтни́къ дꙋхо́вный, содѣ́ласте. сегѡ̀ ра́ди ны́нѣ вкꙋ́пѣ со ча́ды свои́ми прⷭ҇то́лꙋ бж҃їю предстои́те.

Ѽ ча̑да царє́ва, ст҃і́и мч҃нцы, вѣ́рнїи рабѝ хрⷭ҇тѡ́ви: а҆леѯі́е, ѻ҆́льго, татїа́но, марі́е и҆ а҆настасі́е! вы̀ за ᲂу҆бива́ющыѧ ва́съ гдⷭ҇ꙋ кро́ткѡ молѧ́щесѧ, кро́вь свою̀ неви́ннꙋю ꙗ҆́кѡ да́ръ многоцѣ́ненъ бг҃ꙋ принеслѝ є҆стѐ. сегѡ̀ ра́ди ва́съ ны́нѣ ᲂу҆бл҃жа́емъ.

Ѽ прпⷣбномч҃нце є҆лїсаве́то, вели́чїемъ по́двигѡвъ твои́хъ мнѡ́гїѧ ᲂу҆диви́вшаѧ! ты̀, ꙗ҆́коже марі́а, хрⷭ҇тꙋ̀ бг҃ꙋ всѣ́мъ се́рдцемъ внима́ющи, и҆ ꙗ҆́коже ма́рѳа, є҆мꙋ̀ съ любо́вїю слꙋжа́щи, ѻ҆́бразъ дѣ́ѧтельнагѡ бл҃гоче́стїѧ на́мъ ꙗ҆ви́ла є҆сѝ и҆ вѣ́рꙋ свою̀ да́же до сме́рти непоро́чнѡ сохрани́ла є҆сѝ.

Ра́дꙋйсѧ, гра́де ст҃а́гѡ петра̀, въ тебѣ̀ бо ны́нѣ прославлѧ́ютсѧ пѣ́сненнѡ ча̑да твоѧ̀, ꙗ҆̀же ри̑зы своѧ̀ мно́гими страда̑нїи ᲂу҆бѣли́вше и҆ сла́вꙋ нбⷭ҇нꙋю зако́ннѡ стѧжа́вше, побѣ́днꙋю пѣ́снь бг҃ови возсыла́ютъ.

Бг҃оро́диченъ: Возвы́силасѧ є҆сѝ, бцⷣе дв҃о, па́че ли̑къ нбⷭ҇ныхъ, воспрїи́мши во ᲂу҆тро́бѣ твое́й непристꙋ́пный свѣ́тъ бжⷭ҇тва̀, и҆́мже сердца̀ и҆ ᲂу҆мы̀ на́шѧ просвѣтѝ и҆ къ жи́зни непоро́чнѣй наста́ви.

Конда́къ, гла́съ г҃:

Дне́сь ст҃і́и землѝ петербꙋ́ржскїѧ вкꙋ́пѣ съ на́ми предстоѧ́тъ въ цр҃кви и҆ неви́димѡ за ны̀ мо́лѧтсѧ бг҃ꙋ, да и҆зба́витъ на́съ ѿ вра̑гъ ви́димыхъ и҆ неви́димыхъ, ѿ недꙋ́га и҆ гла́да, ѿ внеза́пныѧ сме́рти и҆ ѿ всѧ́кагѡ ѕла̀ и҆ сп҃се́тъ дꙋ́шы на́шѧ.

І҆́косъ:

А҆́гг҃льскимъ чинѡ́мъ подража́юще на землѝ, просїѧ́ли є҆стѐ въ по́двизѣхъ многоразли́чныхъ, ст҃і́и. воспрїи́мше и҆́го бл҃го́е хрⷭ҇то́во на ра́мена своѧ̀, востеко́сте къ нбⷭ҇номꙋ і҆ерⷭ҇ли́мꙋ. сегѡ̀ ра́ди моли́те хрⷭ҇та̀ ѡ҆ на́съ, вопїю́щихъ ва́мъ: ра́дꙋйтесѧ, неꙋсы́пнїи на́ши мл҃твєнницы, ра́дꙋйтесѧ, пречꙋ́днїи хода̑таи ѡ҆ на́съ ко гдⷭ҇ꙋ. ра́дꙋйтесѧ, ꙗ҆́кѡ трꙋда́ми ва́шими вѣ́ра насажда́етсѧ, ра́дꙋйтесѧ, ꙗ҆́кѡ кровьмѝ ва́шими цр҃ковь ᲂу҆твержда́етсѧ. ра́дꙋйтесѧ, ꙗ҆́кѡ со а҆́гг҃лы ст҃ѣ́й трⷪ҇цѣ предстоитѐ, ра́дꙋйтесѧ, ꙗ҆́кѡ съ ни́ми трист҃ꙋ́ю пѣ́снь є҆́й воспѣва́ете. ра́дꙋйтесѧ, свѣти̑ла незаходи̑маѧ цр҃кве на́шеѧ.

Сѣда́ленъ, гла́съ г҃:

Дне́сь па́мѧть ст҃ы́хъ землѝ петербꙋ́ржстѣй соверша́юще, припаде́мъ ко гдⷭ҇ꙋ и҆ возопїи́мъ: хрⷭ҇тѐ бж҃е, тѣ́хъ мл҃твами ᲂу҆мирѝ мі́ръ тво́й, и҆ сп҃сѝ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ.

Бг҃оро́диченъ: Ѽ невѣ́сто неневѣ́стнаѧ! ты̀ неизрече́ннѡ зачала̀ є҆сѝ во ᲂу҆тро́бѣ твое́й хрⷭ҇та̀ бг҃а на́шего. тѣ́мже тѧ̀ ꙗ҆́кѡ мт҃рь бж҃їю и҆ пречⷭ҇тꙋю приснодв҃ꙋ правосла́внѡ велича́емъ.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

По́двигомъ мл҃твы, трꙋда̀ и҆ ю҆ро́дства хрⷭ҇та̀ ра́ди во гра́дѣ ст҃а́гѡ петра̀ просїѧ́вши, ѯе́нїе бл҃же́ннаѧ, моли́сѧ и҆ на́мъ въ нбⷭ҇нѣмъ црⷭ҇твїи безсме́ртныѧ трапе́зы сподо́битисѧ.

Нбⷭ҇ныѧ жи́зни возжела́вши, въ житїѝ твое́мъ всѧ̀ земна̑ѧ ѿри́нꙋла є҆сѝ, ма́ти ѯе́нїе, тѣ́мже сподо́би и҆ на́съ мл҃твами твои́ми го́рнихъ черто́гѡвъ дости́гнꙋти.

Мона́хѡвъ наста́вниче, цѣвни́це дꙋхо́внаѧ, мл҃твы ᲂу҆чи́телю, і҆гна́тїе бг҃омꙋ́дре, ст҃и́тельскимъ твои́мъ ѡ҆мофо́ромъ покрыва́й ста́до твоѐ ѿ всѧ́кагѡ ѕла̀.

Пра́вды хрⷭ҇то́вы взыскꙋ́ѧ, і҆гна́тїе бл҃же́нне, во́ли бж҃їей покори́лсѧ є҆сѝ, и҆ въ пꙋ́стынь се́ргїевꙋ всели́всѧ, житїе́мъ многоско́рбнымъ сїю̀ ѡ҆ст҃и́лъ є҆сѝ.

Чꙋдотво́рче кроншта́дтскїй і҆ѡа́нне, мл҃твою твое́ю па́дшыѧ возставлѧ́лъ є҆сѝ, недꙋ̑жныѧ и҆сцѣлѧ́лъ є҆сѝ, и҆ ны́нѣ во сла́вѣ нбⷭ҇нѣй пребыва́ѧ, не ѡ҆ста́ви на́съ почита́ющихъ па́мѧть твою̀.

Лѡ́жнаѧ мꙋдрова̑нїѧ сынѡ́въ вѣ́ка сегѡ̀, возстаю́щихъ проти́вꙋ и҆́стины ст҃ы́ѧ цр҃кве хрⷭ҇то́вы, нелѣ́ностнѡ ѡ҆блича́ѧ, ст҃е і҆ѡа́нне, сло́вомъ и҆ житїе́мъ правосла́вїе ᲂу҆твержда́лъ є҆сѝ, поѧ̀: сла́ва си́лѣ твое́й, гдⷭ҇и.

Бг҃оро́диченъ: Прест҃а́ѧ гпⷭ҇жѐ мр҃і́е бцⷣе, бг҃а твоего̀ и҆ созда́телѧ во чре́вѣ носи́вшаѧ, ѡ҆ст҃ѝ сердца̀ рабѡ́въ твои́хъ, пречтⷭ҇аѧ, ꙗ҆́кѡ да всегда̀ тобо́ю хва́лимсѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Новомꙋ́чениче петрогра́дскїй, ка́меню драгі́й и҆ сла́вный цр҃кве рѡссі́йскїѧ, пе́тре, вѣ́рный слꙋжи́телю цр҃и́цы бцⷣы, достохва́льне, ты̀ ре́вностїю бжⷭ҇твенною распала́емь, безꙋ́мїе безбѡ́жникъ и҆з̾ѡбличи́лъ є҆сѝ и҆ кро́вь за хрⷭ҇та̀ пролїѧ́лъ є҆сѝ.

Добропобѣ́днїи сщ҃енномч҃нцы нїко́лае и҆ і҆ѡа́нне, соꙋ̑зницы ти́хфинстїи, стрѣ́лъ разжже́нныхъ лꙋка́вагѡ и҆ ѻ҆гнѧ̀, въ лицѐ ва́мъ ды́шꙋщагѡ, не ᲂу҆боѧ́вшесѧ, хрⷭ҇та̀ проповѣ́дасте, и҆ на страда́нїе мꙋ́жественнѡ потеко́сте, тѣ́мже и҆ ны́нѣ со ст҃ы́ми водворѧ́етесѧ.

Бг҃одꙋхнове́нне проповѣ́дниче, сщ҃енномч҃нче фїлосо́фе, хра́ма каза́нскагѡ похвало̀, и҆з̾ се́рдца твоегѡ̀ бл҃готворѧ́щаго рѣ́ки воды̀ живы́ѧ и҆стеко́ша, дꙋ́шы и҆ тѣлеса̀ жа́ждꙋщихъ росо́ю бл҃года́ти напаѧ́ющи.

Ча̑да до́брѣ воспита́лъ є҆сѝ, па́стырю бл҃же́нне фїлосо́фе, ꙗ҆̀же съ тобо́ю вкꙋ́пѣ на по́двигъ востеко́ша и҆ вѣнце́мъ мч҃нческимъ ѿ хрⷭ҇та̀ влⷣки ᲂу҆краси́шасѧ, нїкола́й и҆ бори́съ прехва́льнїи.

Бра́тства цр҃кѡ́внаѧ ᲂу҆строѧ́ѧй и҆ ᲂу҆твержда́ѧй, прпⷣбномꙋ́чениче львѐ, бл҃годѣ́тель неꙋсы́пный и҆ помо́щникъ ни́щымъ, стра̑ннымъ, си̑рымъ и҆ стра́ждꙋщымъ показа́лсѧ є҆сѝ, тѣ́мже црⷭ҇твїе нбⷭ҇ное ᲂу҆наслѣ́довалъ є҆сѝ.

Бо́льши сеѧ̀ никто́же любвѐ и҆́мать, да кто̀ дꙋ́шꙋ свою̀ положи́тъ за дрꙋ́ги своѧ̀. си́це ᲂу҆́бѡ и҆ ты̀, сщ҃енномч҃нче а҆леѯі́е кроншта́дтскїй, за собра́та жи́знь свою̀ ѿда́вый, въ же́ртвꙋ бг҃ови прине́слсѧ є҆сѝ.

До́блестный страда́льче и҆ хрⷭ҇топодража́тельный мч҃нче і҆ѡа́нне царскосе́льскїй, молѝ влⷣкꙋ хрⷭ҇та̀ бг҃а и҆ на́мъ вѣ́чныѧ мꙋ́ки и҆зба́витисѧ.

Бг҃оро́диченъ: Ѽ всепѣ́таѧ, всехва́льнаѧ мр҃і́е, ра̑бъ твои́хъ моле́нїй не пре́зри, но ѿ бѣ́дъ и҆зба́ви, непоро́чнаѧ, всѣ́хъ къ тебѣ̀ ᲂу҆се́рднѡ притека́ющихъ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Же́ртвеннꙋю любо́вь ꙗ҆ви́лъ є҆сѝ, ст҃и́телю венїамі́не, тве́рдостїю ᲂу҆ма̀ показа́лсѧ є҆сѝ неколеби́мь, є҆гда̀ клевета́хꙋ на тѧ̀ вразѝ твоѝ. тѣ́мже къ свѣ́тꙋ невече́рнемꙋ прише́лъ є҆сѝ, сщ҃енномч҃нче, ра́дꙋѧсѧ.

Смире́нїемъ, ꙗ҆́кѡ ри́зою, ѡ҆бле́клсѧ є҆сѝ, сщ҃енномч҃нче венїамі́не, є҆гда̀ клеветницы̀ без̾ вины̀ ѡ҆сꙋди́ша тѧ̀. тѣ́мже велича́емъ страда̑нїѧ твоѧ̀ и҆ пѣсносло́вимъ кончи́нꙋ твою̀.

Ст҃и́телю венїамі́нꙋ послѣ́довали є҆стѐ, се́ргїе, ю҆́рїе и҆ і҆ѡа́нне достохва́льнїи, и҆ вкꙋ́пѣ мч҃нческими вѣнцы̑ ᲂу҆вѣнча́лисѧ є҆стѐ, тѣ́мже ны́нѣ па́мѧть ва́шꙋ соверша́емъ.

Ꙗ҆́кѡ ѻ҆те́цъ млⷭ҇рдый всѣ̑мъ всѧ̀ бы́лъ є҆сѝ: вдови́цамъ пита́тель, скорбѧ́щымъ ᲂу҆тѣ́шитель, ѡ҆би̑димымъ застꙋ́пникъ, гра́дꙋ петро́вꙋ па́стырь и҆ храни́тель, сщ҃енномч҃нче венїамі́не. тѣ́мже и҆ ны́нѣ прилѣ́жнѡ моли́сѧ влⷣцѣ хрⷭ҇тꙋ̀ ѡ҆ чтꙋ́щихъ па́мѧть твою̀.

Прⷭ҇то́лꙋ бж҃їю предстоѧ̀, ст҃и́телю хрⷭ҇то́въ венїамі́не, не преста́й прилѣ́жнѡ моли́ти ѡ҆ на́съ рабѣ́хъ твои́хъ, да твои́мъ хода́тайствомъ ѻ҆гнѧ̀ вѣ́чнагѡ и҆зба́вимсѧ и҆ всѧ́кагѡ ѡ҆ѕлобле́нїѧ, на ны̀ ѿ вра̑гъ находѧ́щагѡ.

Свѣ́тлымъ лице́мъ на беззако́ннѣмъ сꙋди́лищи предста́въ, сщ҃енномч҃нче венїамі́не, смире́нїемъ, кро́тостїю и҆ мꙋ́дростїю непра́ведныхъ сꙋді́й посрами́лъ є҆сѝ и҆ ра́достнѣ за хрⷭ҇та̀ пострада́лъ є҆сѝ, глаго́лѧ: сла́ва бг҃ꙋ за всѧ̀.

Па́мѧть твоѧ̀ свѣтоно́снѣ возсїѧ́вши, досточꙋ́дне венїамі́не, просвѣща́етъ дꙋ́шы бл҃гоговѣ́йнѡ сїю̀ соверша́ющихъ, мꙋчє́нїѧ бо, страда̑нїѧ и҆ сме́рть мꙋ́жественнѣ претерпѣ́лъ є҆сѝ. тѣ́мже бл҃гоче́стнѡ пѣ́сньми тѧ̀ велича́емъ.

Бг҃оро́диченъ: Возсїѧ́й въ сердца́хъ на́шихъ, влⷣчце пречⷭ҇таѧ, сн҃а твоегѡ̀ нетлѣ́нный свѣ́тъ, ѻ҆́чи на́ши мы́слєнныѧ просвѣтѝ и҆ ᲂу҆ста̀ на̑ша ѿве́рзи ко хвале́нїю твоемꙋ̀.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Въ вертогра́дѣ дꙋхо́внѣмъ землѝ петербꙋ́ржскїѧ взраще́нъ, цр҃ковь рꙋ́сскꙋю во дни̑ лю́тыхъ гоне́нїй возгла́вилъ є҆сѝ, ст҃и́телю тѵ́хѡне, и҆ ка́мень живы́й, хрⷭ҇та̀, во ѡ҆снова́нїе жи́зни твоеѧ̀ положи́въ, воспѣ́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.

Сщ҃енномч҃нче кꙋ́рі́лле каза́нскїй, собесѣ́дниче сла́внагѡ па́стырѧ кроншта́дтскагѡ и҆ бл҃гоговѣ́йнѣ є҆го̀ погре́бшїй! ты̀ ле́сть вра́жїю мꙋ́жески попра́въ, въ темни́цꙋ за хрⷭ҇то́мъ послѣ́довалъ є҆сѝ, съ вѣ́рою воспѣва́ѧ: ѻ҆тцє́въ на́шихъ бж҃е, бл҃гослове́нъ є҆сѝ.

И҆́же на высо́кихъ тѧ̀ поста́вивый, ст҃и́телю і҆ларїѡ́не, бжⷭ҇твенною мꙋ́дростїю ᲂу҆́мъ тво́й ѡ҆бл҃годатѝ. сегѡ̀ ра́ди хрⷭ҇та̀ всѣ̑мъ ꙗ҆́снѡ проповѣ́далъ є҆сѝ и҆ гдⷭ҇еви воспѣва́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.

Вѣ́рꙋ хрⷭ҇то́вꙋ мꙋ́жественнѣ защища́ѧ, сщ҃енномч҃нче і҆ларїѡ́не, ᲂу҆́зы за хрⷭ҇та̀ ра́дꙋѧсѧ воспрїѧ́лъ є҆сѝ, и҆ сме́ртїю твое́ю по́двигъ тво́й запечатлѣ́въ, всѧ̀ пѣ́ти наꙋчи́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.

Ст҃и́телю ре́вельскїй платѡ́не, ѡ҆ па́ствѣ твое́й ᲂу҆се́рдный ревни́телю! а҆́ще преще́нїемъ и҆ запреща́хꙋ тебѣ̀ мꙋчи́телїе проповѣ́дати є҆ѵⷢ҇лїе, ты̀ терпѣ́нїемъ воѡрꙋжи́всѧ, по́двигъ и҆сповѣ́дничества до́блѣ соверши́лъ є҆сѝ, гдⷭ҇еви поѧ̀: ѻ҆тцє́въ на́шихъ бж҃е, бл҃гослове́нъ є҆сѝ.

Сщ҃енномч҃нче нїко́лае, сподви́жника чꙋдотво́рцꙋ кроншта́дтскомꙋ вразѝ тѧ̀ нареко́ша, ты́ же любо́вїю распала́емь, и҆́мене сегѡ̀ пред̾ лице́мъ сме́рти не ѿве́рглсѧ є҆сѝ. и҆ ны́нѣ во дво́рѣхъ до́мꙋ бг҃а на́шегѡ водворѧ́ѧсѧ, не забꙋ́ди на́съ пою́щихъ: ѻ҆тцє́въ на́шихъ бж҃е, бл҃гослове́нъ є҆сѝ.

Сщ҃енномч҃нче ка́рпе, тве́рдый а҆дама́нте вѣ́ры хрⷭ҇то́вы! ты̀ пе́рвѣе во ѻ҆би́тели пю́хтицтѣй дїа́конское слꙋже́нїе до́брѣ соверша́вый, по́слѣжде въ чи́нѣ і҆ере́йстѣмъ па́ствꙋ хра́ма і҆сі́дѡровскагѡ во гра́дѣ петрогра́дѣ до́брѣ ᲂу҆па́слъ є҆сѝ, и҆ до́брое сѣ́мѧ неꙋста́ннѡ сѣ́ѧвъ, за хрⷭ҇та̀ мꙋ́жественнѣ пострада́лъ є҆сѝ. ны́нѣ же съ ли̑ки ст҃ы́хъ жне́ши ра́достїю кла́сы присноживо́тїѧ, воспѣва́ѧ: ѻ҆тцє́въ на́шихъ бж҃е, бл҃гослове́нъ є҆сѝ.

Бг҃оро́диченъ: Всебл҃га́ѧ, всемлⷭ҇тиваѧ влⷣчце, молѧ́щыѧсѧ тебѐ рабы̑ твоѧ̀ ᲂу҆тѣ́ши и҆ ѿ вѣ́трѡвъ вра́жїихъ сохранѝ, да непреста́ннѡ тѧ̀ велича́емъ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѐ: гдⷭ҇а по́йте, дѣла̀, и҆ превозноси́те є҆го̀ во всѧ̀ вѣ́ки.

Прпⷣбне серафі́ме, вы́рицкїй чꙋдотво́рче, де́нь и҆ но́щь рꙋ́цѣ твоѝ воздѣва́лъ є҆сѝ, гдⷭ҇еви молѧ́сѧ, да и҆зба́витъ ѻ҆те́чество на́ше ѿ наше́ствїѧ и҆ноплеме́нныхъ. мы̀ же твои́ми мл҃твами сп҃се́нїе ᲂу҆лꙋчи́вше, бг҃ꙋ вопїе́мъ: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Ли́къ серафі́мскїй трист҃ꙋ́ю пѣ́снь трⷪ҇цѣ воспѣва́етъ, съ ни́мже и҆ прпⷣбный чꙋдотво́рецъ вы́рицкїй бг҃а славосло́витъ, вопїѧ̀: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Саро́вскомꙋ чꙋдотво́рцꙋ поревнова́въ, дꙋ́хъ ми́ренъ стѧжа́лъ є҆сѝ, прпⷣбне ѻ҆́тче серафі́ме. сегѡ̀ ра́ди ты́сѧщы ѡ҆́крестъ тебє̀ сп҃са́ютсѧ, и҆ бл҃годарѧ́ще, бг҃ови вопїю́тъ: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Фараѡні́ты мы́слєнныѧ мꙋ́жески побѣди́въ, чистотꙋ̀ серде́чнꙋю стѧжа́лъ є҆сѝ, ѻ҆́тче прпⷣбне серафі́ме, сегѡ̀ ра́ди, дꙋше́вныма ѻ҆чи́ма бг҃а ᲂу҆зрѣ́въ, съ любо́вїю воспѣва́лъ є҆сѝ: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Мнѡ́гаѧ чꙋдеса̀, прпⷣбне чꙋдотво́рче вы́рицкїй, си́лою бж҃їею, въ тебѣ̀ бога́тнѡ дѣ́йствꙋющею, сотвори́лъ є҆сѝ слѣпі́и бо прозрѣва́хꙋ, нѣмі́и глаго́лахꙋ, ѡ҆держи́мїи же ѿ дꙋхѡ́въ ѕло́бы свобожда́хꙋсѧ. сегѡ̀ ра́ди бг҃ꙋ, ди́вномꙋ во ст҃ы́хъ свои́хъ, пое́мъ: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Любо́вїю хрⷭ҇то́вою ᲂу҆ѧзви́вшисѧ, прпⷣбномч҃нце марі́е га́тчинскаѧ, къ страда́нїю востекла̀ є҆сѝ, распе́нши пло́ть со страстьмѝ и҆ похотьмѝ, и҆ свѣщꙋ̀ дꙋше́внꙋю неꙋгаси́мꙋ дѣѧ́нїемъ хранѧ́щи, въ черто́гъ жениха̀ нбⷭ҇нагѡ возшла̀ є҆сѝ, превозносѧ́щи є҆го̀ во вѣ́ки.

Да́ры хрⷭ҇тꙋ̀ любо́вїю принесла̀ є҆сѝ, прпⷣбномч҃нце марі́е, мл҃твꙋ, ꙗ҆́кѡ зла́то, поще́нїе, ꙗ҆́кѡ лїва́нъ, и҆ страда́нїе, ꙗ҆́кѡ смѵ́рнꙋ. тѣ́мъ тѧ̀ бл҃гоче́стнѡ велича́емъ.

Ѻ҆́бразе неизмѣ́нный ѻ҆ч҃ь, сїѧ́нїе сла́вы присносꙋ́щнагѡ свѣ́та, печа́ть вы́шнѧгѡ, сло́ве, си́ло и҆ мꙋ́дросте! тѧ̀ бл҃гословѧ́щымъ бл҃гопремѣни́тель бꙋ́ди.

Бг҃оро́диченъ: Ѽ дв҃о бг҃ороди́тельнице, ѡ҆би́димыхъ застꙋ́пнице и҆ всѣ́хъ скорбѧ́щихъ ра́досте! прїимѝ бл҃года́рственное пѣ́нїе, ѿ дꙋшѝ тебѣ̀ возноси́мое, и҆ бꙋ́ди на́мъ те́плаѧ хода́таица въ де́нь стра́шнагѡ и҆спыта́нїѧ, є҆гда̀ сн҃ъ тво́й и҆́мать сꙋди́ти живы́хъ и҆ ме́ртвыхъ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ра́дꙋйсѧ, прпⷣбне ѻ҆́тче а҆леѯа́ндре сви́рскїй, бг҃ъ въ трⷪ҇цѣ воспѣва́емый ꙗ҆ви́сѧ тѝ и҆ сосꙋ́дъ и҆збра́нный содѣ́ла тѧ̀, тѣ́мже, бг҃оно́се, и҆ доны́нѣ чꙋдодѣ́еши.

Ѿ роди́телей бл҃гочести́выхъ, и҆спроси́вшихъ сы́на ᲂу҆ ст҃ы́ѧ трⷪ҇цы, прозѧ́блъ є҆сѝ, а҆леѯа́ндре требл҃же́нне, и҆ ꙗ҆ви́лсѧ є҆сѝ та̑инъ бжⷭ҇твенныхъ созерца́тель.

Всегда́шнимъ къ бг҃ꙋ раче́нїемъ и҆ мі́ра ѿверже́нїемъ, ѻ҆́тче а҆нтѡ́нїе, ды́мскїй чꙋдотво́рче, гдⷭ҇ꙋ вѣ́рнѡ послꙋжи́лъ є҆сѝ, тѣ́мже и҆ досто́инъ ꙗ҆ви́лсѧ є҆сѝ ᲂу҆слы́шати вожделѣ́нный гла́съ є҆гѡ̀: бл҃гі́й ра́бе и҆ вѣ́рный, вни́ди въ ра́дость гдⷭ҇а твоегѡ̀.

Неѕло́бивъ, првⷣенъ и҆ млⷭ҇тивъ бы́въ, а҆нтѡ́нїе бг҃омꙋ́дре, бл҃же́нства нбⷭ҇нагѡ въ землѝ кро́ткихъ сподо́билсѧ є҆сѝ, и҆ та́мѡ вкꙋша́еши вѣ́чнагѡ ᲂу҆тѣше́нїѧ.

Ꙗ҆́коже мꙋ́драѧ пчела̀, прпⷣбне ѻ҆́тче а҆рсе́нїе, ме́дъ дꙋхо́вный собира́ѧ, го́рꙋ а҆ѳѡ́нскꙋю ѡ҆бходи́лъ є҆сѝ, тѣ́мже и҆ ѻ҆би́тель коневе́цкаѧ, тобо́ю ᲂу҆стро́єннаѧ, сокро́вищница дарѡ́въ ст҃а́гѡ дх҃а ꙗ҆ви́ласѧ є҆сѝ.

Врага̀ ро́да человѣ́ческагѡ и҆́менемъ хрⷭ҇то́вымъ ѿгна́въ, прпⷣбне а҆рсе́нїе, ꙗ҆зы́чєскаѧ жертвоприношє́нїѧ на ѻ҆́стровѣ коне́встѣмъ ᲂу҆праздни́лъ є҆сѝ и҆ та́мѡ же́ртвꙋ хвалы̀ бг҃ꙋ приноси́лъ є҆сѝ.

Пꙋ́стынь зелене́цкаѧ, кресто́мъ ѕвѣ́зднымъ бл҃гослове́ннаѧ, по́двигомъ прпⷣбнагѡ мартѵ́рїа созда́сѧ и҆ просла́висѧ, тѣ́мже и҆ ны́нѣ мл҃твами вѣ́рныхъ ᲂу҆твержда́етсѧ.

Бг҃оро́диченъ: Во гра́дѣ каза́ни і҆кѡ́нꙋ твою̀ ꙗ҆ви́ла є҆сѝ, пречⷭ҇таѧ, ѻ҆чеса̀ слѣпы́хъ ѿверза́ющи и҆ млⷭ҇ти своѧ̀ на вѣ́рныхъ и҆злива́ющи, и҆ ны́нѣ, застꙋ́пнице ᲂу҆се́рднаѧ, просвѣтѝ на́съ, во гра́дѣ ст҃а́гѡ петра̀ чтⷭ҇но́мꙋ ѻ҆́бразꙋ твоемꙋ̀ покланѧ́ющихсѧ.

Свѣти́ленъ:

Ра́дꙋйсѧ, сла́вный гра́де ст҃а́гѡ петра̀, сла́ва бо ст҃ы́хъ твои́хъ въ тебѣ̀ возсїѧ̀, ликꙋ́йте ны́нѣ и҆ весели́тесѧ, бл҃гочести́вїи лю́дїе, ꙗ҆́кѡ со́нмъ ве́лїй хода́таєвъ нбⷭ҇ныхъ и҆́мате пред̾ бг҃омъ.