Канон собору новомучеников и исповедников Радонежских

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.

Припѣ́въ: Прест҃а́ѧ трⷪ҇цѣ, бж҃е на́шъ, сла́ва тебѣ̀.

Бл҃гослове́нъ є҆сѝ, хрⷭ҇тѐ бж҃е на́шъ, и҆́же новомч҃нки ра́донежскїѧ въ на́шей цр҃кви ꙗ҆вле́й, низпосла́въ и҆̀мъ въ страда́нїихъ дх҃а ст҃а́го, и҆ тѣ́ми прославле́й ѻ҆ц҃а̀ нбⷭ҇наго, чл҃вѣколю́бче, сла́ва тебѣ̀.

Припѣ́въ: Прест҃а́ѧ трⷪ҇цѣ, бж҃е на́шъ, сла́ва тебѣ̀.

Гдⷭ҇и, бж҃е на́шъ, при́снѡ прославлѧ́ѧй ст҃ы̑ѧ твоѧ̑, ны́нѣ и҆ на́съ недосто́йныхъ сподо́би просла́вити ст҃ы́хъ предста́телей на́шихъ, новомч҃нкѡвъ и҆ и҆сповѣ́дникѡвъ ра́донежскихъ.

Припѣ́въ: Прест҃а́ѧ трⷪ҇цѣ, бж҃е на́шъ, сла́ва тебѣ̀.

Весели́сѧ, землѐ ра́донежскаѧ, торжествꙋ́йте, лю́бѧщїи ѻ҆би́тель се́ргїевꙋ: дне́сь мл҃твами ст҃ы́хъ новомч҃нкѡвъ гоне́нїе на вѣ́рꙋ и҆ цр҃ковь бж҃їю преста̀, и҆ и҆́мѧ ст҃ы́ѧ трⷪ҇цы достодо́лжнѡ прославлѧ́етсѧ.

Бг҃оро́диченъ: Ꙗ҆́коже жи́вꙋ мт҃рь сло́ва ви́дѣвше тѧ̀ сꙋемꙋ́дренныхъ многочи́сленное во́инство, ꙗ҆́коже бо́дреннаго блюсти́телѧ, на забра́лѣхъ ѡ҆бстои́мꙋ вѣ́рными, а҆́бїе рꙋ́цѣ и҆́хъ съ про́чими ᲂу҆́ды ѡ҆слабѣ́ша.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ па́че тебє̀, є҆ди́не чл҃вѣколю́бче.

Принесе́мъ, вѣ́рнїи, похвалꙋ̀ прпⷣбномч҃нкꙋ кроні́дꙋ, и҆́же, ꙗ҆́кѡ до́брый ко́рмчїй, бра́тїю ѻ҆би́тели се́ргїевы мꙋ́дрѣ ᲂу҆пра́ви и҆ страда́ньми за хрⷭ҇та̀ житїѐ своѐ ᲂу҆вѣнча̀.

Ѿ бж҃їѧ мт҃ре въ ю҆́ности наꙋче́нный поще́нїемъ чти́ти страда̑нїѧ сн҃а є҆ѧ̀, на ка́мени за́повѣдей гдⷭ҇нихъ житїѐ твоѐ ᲂу҆тверди́лъ є҆сѝ, прпⷣбномч҃нче кроні́де, и҆ да́же до сме́рти мч҃нчески пострада́лъ є҆сѝ.

А҆́ще и҆ и҆згна́нъ бы́сть безбо́жники и҆з̾ ѻ҆би́тели, ѻ҆ба́че кре́стъ и҆гꙋ́менства не ѡ҆ста́вилъ є҆сѝ, прпⷣбномч҃нче кроні́де. тѣ́мже, бра́тїю гони́мꙋю ᲂу҆тѣша́ѧ и҆ наставлѧ́ѧ, любо́вь хрⷭ҇то́вꙋ пред̾ мꙋчи́тєли и҆сповѣ́далъ є҆сѝ.

Бг҃оро́диченъ: Ны́нѣ наста̀ де́нь весе́лїѧ, зна́менїѧ і҆кѡ́ны твоеѧ̀, дв҃о бг҃ороди́тельнице, и҆ пра́здникъ свѣ́телъ, є҆го́же соверша́юще, вопїе́мъ: нѣ́сть пречⷭ҇тыѧ, па́че тебє̀, бг҃оневѣ́сто.

Сѣда́ленъ, гла́съ а҃:

Оу҆че́нїѧ безбо́жнагѡ не поче́тше, но вѣ́рою и҆́стинною защити́вшесѧ, новомч҃нцы ра́донежстїи, въ по́двизѣ и҆сповѣ́данїѧ просла́вистесѧ, посредѣ́ же страда́нїй нестерпи́мыхъ пребыва́юще, бг҃а призыва́сте: ᲂу҆скорѝ, ѽ ще́дрый, и҆ потщи́сѧ, ꙗ҆́кѡ млⷭ҇тивъ, въ по́мощь на́шꙋ, ꙗ҆́кѡ мо́жеши хотѧ́й.

Сла́ва, и҆ ны́нѣ: Ꙗ҆́же дре́влѣ прⷪ҇рѡ́ки проповѣ́дасѧ две́рь нбⷭ҇наѧ, неѡпали́маѧ кꙋпина̀, свѣ́щникъ многосвѣ́тлый, злата́ѧ кади́льница, рꙋ́чка и҆ же́злъ, пресла́внѡ дне́сь чꙋ́дномꙋ ст҃и́телю ꙗ҆влѧ́етсѧ, наро́дѡмъ дерза́ти повелѣва́етъ, и҆ ди́внꙋю побѣ́дꙋ показꙋ́етъ. тѣ́мже бл҃года̑рнаѧ то́й возопїи́мъ: дв҃о бг҃ороди́тельнице, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти на́мъ: тебе́ бо и҆́мамы наде́ждꙋ рабѝ твоѝ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Дре́внихъ мч҃нкъ стопа́мъ послѣ́дꙋюще, во дни̑ гоне́нїй подвиза́стесѧ тве́рдѡ, ст҃і́и прпⷣбномч҃нцы ѻ҆би́тели трⷪ҇цкїѧ. ны́нѣ же, ликꙋ́юще во црⷭ҇твїи бж҃їи, хрⷭ҇тꙋ̀, ᲂу҆крѣ́пльшемꙋ вы̀, подвиза́ете на́съ взыва́ти: си́лѣ твое́й сла́ва, чл҃вѣколю́бче.

Ли́къ прпⷣбномч҃нкѡвъ ра́донежскихъ ᲂу҆бл҃жа́юще, просла́вимъ трⷪ҇цꙋ живонача́льнꙋю, є҆ѧ́же ѻ҆би́тель ны́нѣ свѣ́тлѡ красꙋ́етсѧ, и҆ съ любо́вїю бг҃ꙋ возопїи́мъ: си́лѣ твое́й сла́ва, чл҃вѣколю́бче.

Хвалꙋ̀ є҆диносꙋ́щнѣй трⷪ҇цѣ ны́нѣ приносѧ́ще, мо́лимъ ва́съ, прпⷣбномч҃нцы: помози́те на́мъ дꙋ́хъ братолю́бїѧ, терпѣ́нїѧ и҆ смире́нїѧ стѧжа́ти, є҆диномы́слїе храни́ти и҆ съ чи́стымъ се́рдцемъ взыва́ти: си́лѣ твое́й сла́ва, чл҃вѣколю́бче.

Бг҃оро́диченъ: Собо́ри вѣ́рныхъ и҆ всѧ́ко состоѧ́нїе человѣ́ческое весели́тсѧ, совокꙋ́пльшесѧ въ чтⷭ҇нѣ́мъ хра́мѣ твое́мъ, зрѧ́ще въ не́мъ, ꙗ҆́коже пресвѣ́тлое со́лнце, чтⷭ҇ны́й ѻ҆́бразъ тво́й, влⷣчце.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

И҆́стиннѣй мꙋ́дрости сло́вомъ ᲂу҆ча́ще своѧ̑ ᲂу҆ченикѝ, новомч҃нцы и҆ и҆сповѣ̑дницы ра́донежстїи, ᲂу҆ченикѝ а҆́ввы се́ргїа дѣ́ломъ себѐ ꙗ҆ви́ли є҆стѐ, страда́ньми проповѣ́дꙋюще хрⷭ҇та̀, бж҃їю си́лꙋ и҆ премⷣрость.

Ꙗ҆́кѡ и҆́стиннїи ᲂу҆чи́телїе, новомч҃нцы ра́донежстїи, вѣ́рѣ и҆ бл҃гоче́стїю ᲂу҆ченикѝ наꙋчи́ли є҆стѐ, и҆ съ вѣ́рою несꙋмнѣ́нною хрⷭ҇тꙋ̀ послѣ́довали є҆стѐ, смири́вше себѐ да́же до сме́рти.

Свы́ше назира́юще, мч҃нцы сла́внїи, съ любо́вїю хода́тайствꙋйте ѡ҆ на́съ, па́мѧть ва́шꙋ соверша́ющихъ, и҆ нбⷭ҇ныѧ мꙋ́дрости и҆спроси́те на́мъ ᲂу҆ даропода́телѧ всевы́шнѧгѡ.

Бг҃оро́диченъ: Тѧ̀ бога́тство неистощи́мое и҆́мамы и҆ и҆сцѣле́нїй и҆сто́чникъ вѣ́рою прибѣга́ющїи хра́мꙋ твоемꙋ̀, и҆дѣ́же пребыва́етъ чтⷭ҇ны́й ѻ҆́бразъ тво́й, влⷣчце.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ, къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

Возставле́нїѧ чи́на патрїа́ршагѡ въ цр҃кви рꙋ́сстѣй ревни́тель бы́въ, сщ҃енномч҃нче і҆ларїѡ́не, патрїа́рхꙋ и҆сповѣ́дникꙋ во все́мъ помо́щникъ ꙗ҆ви́лсѧ є҆сѝ и҆ лжепонови́телей чи́на цр҃ко́внагѡ ѡ҆бличи́лъ є҆сѝ, тѣ́мже и҆ хрⷭ҇та̀ со дерзнове́нїемъ и҆сповѣ́далъ є҆сѝ, во ᲂу҆́захъ того̀ прославлѧ́ѧ.

Любомꙋ́дрїю ѻ҆тцє́въ сїна́йскихъ поꙋча́ѧсѧ, по́двигомъ до́брымъ подвиза́лсѧ є҆сѝ, сщ҃енномч҃нче і҆ѡа́нне, ра́зꙋмъ же и҆́стинѣ хрⷭ҇то́вой покори́въ, па́ствѣ ѻ҆́бразъ чистоты̀ и҆ бл҃гоче́стїѧ ꙗ҆ви́лъ є҆сѝ и҆ кро́вїю мч҃нческою житїѐ твоѐ запечатлѣ́лъ є҆сѝ.

Ве́лїе попече́нїе ѡ҆ вѣ́рѣ и҆ бл҃гоче́стїи при́снѡ и҆мѣ́ѧ, мч҃нче і҆ѡа́нне, потща́лсѧ є҆сѝ во дни̑ разоре́нїѧ ла́ѵры мо́щи прпⷣбнагѡ се́ргїа ѿ порꙋга́нїѧ сохрани́ти. сегѡ̀ ра́ди ны́нѣ съ ни́мъ во црⷭ҇твїи бж҃їи ликꙋ́еши.

Бг҃оро́диченъ: Чтⷭ҇нꙋ́ю і҆кѡ́нꙋ твою̀ ра́достнымъ се́рдцемъ и҆ дꙋше́ю ѡ҆блобыза́емъ, веселѧ́щесѧ, и҆ те́плою вѣ́рою прикаса́ющесѧ, и҆сцѣле́нїе почерпа́емъ.

Конда́къ, гла́съ г҃:

Ꙗ҆́кѡ цвѣ́ти кра́снїи и҆ бл҃гоꙋха́ннїи, ст҃і́и новомч҃нцы и҆ и҆сповѣ̑дницы, зе́млю ра́донежскꙋю ᲂу҆краси́сте, ю҆́же се́ргїй прпⷣбный житїе́мъ просла́ви. съ ни́мже моли́тесѧ ко гдⷭ҇ꙋ, є҆́же во и҆́стиннѣй вѣ́рѣ на́мъ ходи́ти и҆ сп҃сти́сѧ дꙋша́мъ на́шымъ.

І҆́косъ:

Сꙋ̑щаѧ въ мі́рѣ возненави́дѣвъ, премі̑рнаѧ и҆ нетлѣ̑ннаѧ селє́нїѧ, ѻ҆тцы̀ бг҃омꙋ́дрїи, стѧжа́ли є҆стѐ, и҆ вѣнце́мъ по́чести, ꙗ҆́кѡ побѣди́тели, ᲂу҆вѣнча́лисѧ є҆стѐ, мл҃твами ва́шими всѣ́хъ покрыва́юще, восхвалѧ́ющихъ ва́съ си́це: ра́дꙋйтесѧ, прпⷣбномч҃нцы, ꙗ҆́кѡ хрⷭ҇та̀ всѣ́мъ се́рдцемъ возлюби́вше, томꙋ̀ невозвра́тнымъ по́мысломъ да́же до сме́рти послѣ́довали є҆стѐ: ра́дꙋйтесѧ, наста̑вницы вертогра́да дꙋхо́внагѡ, ꙗ҆́кѡ хрⷭ҇та̀, премⷣрость бж҃їю, и҆́стиннѡ и҆ небоѧ́зненнѡ проповѣ́дали є҆стѐ: ра́дꙋйтесѧ, сщ҃енномч҃нцы, ꙗ҆́кѡ во дни̑ разоре́нїѧ ѻ҆би́тели трⷪ҇цкїѧ во ѡ҆кре́стныхъ хра́мѣхъ же́ртвꙋ безкро́внꙋю приноси́ли є҆стѐ: ра́дꙋйтесѧ, ст҃і́и, ꙗ҆́кѡ во всѧ́цѣмъ ро́дѣ и҆ зва́нїи до́брѣ цр҃кви правосла́внѣй послꙋжи́ли є҆стѐ: ра́дꙋйтесѧ, новомч҃нцы и҆ и҆сповѣ̑дницы ра́донежстїи, ꙗ҆́кѡ ны́нѣ съ прпⷣбнымъ се́ргїемъ во сла́вѣ бг҃ꙋ предстоѧ́ще, мо́лите сп҃сти́сѧ дꙋша́мъ на́шымъ.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Па́стырь до́брый и҆ слꙋжи́тель вѣ́рный ꙗ҆ви́лсѧ є҆сѝ, прпⷣбномч҃нче маѵрі́кїе, тѣ́мже, ѿ бг҃обо́рцєвъ до сме́рти пострада́въ, мч҃нческїй вѣне́цъ съ васі́лїемъ сла́внымъ ѿ хрⷭ҇та̀ воспрїѧ́лъ є҆сѝ. съ ни́мже предстоѧ̀ прⷭ҇то́лꙋ гдⷭ҇ню, помина́й на́съ, чтꙋ́щихъ ст҃ꙋ́ю па́мѧть твою̀.

Во ѻ҆би́тели трⷪ҇цтѣй прпⷣбномч҃нкꙋ кроні́дꙋ сыно́внѣ послꙋжи́лъ є҆сѝ, ст҃е ѯенофѡ́нте, та́же, мнѡ́гаѧ и҆спыта̑нїѧ и҆ темни̑чнаѧ заключє́нїѧ претерпѣ́въ, вкꙋ́пѣ съ ни́мъ пострада́ти за хрⷭ҇та̀ сподо́билсѧ є҆сѝ. ны́нѣ же во ѻ҆би́телехъ нбⷭ҇ныхъ ра́достнѡ ликꙋ́ете.

Ꙗ҆́кѡ зла́то въ горни́лѣ и҆скꙋше́нъ бы́въ, сщ҃еннодїа́коне ѳеофа́не, бг҃обо́рцєвъ нечести́выхъ не ᲂу҆боѧ́лсѧ є҆сѝ, и҆ ꙗ҆́кѡ во́инъ непобѣди́мь ꙗ҆́вльсѧ, вѣне́цъ сла́вы ѿ бг҃а прїѧ́лъ є҆сѝ. є҆мꙋ́же во сла́вѣ нбⷭ҇нѣй ны́нѣ предстоѧ̀, моли́сѧ ѡ҆ дꙋша́хъ на́шихъ.

Бг҃оро́диченъ: Свѣтоно́снаѧ бл҃года́ть и҆ и҆сцѣле́нїѧ дарова́нїе даде́сѧ гра́дꙋ твоемꙋ̀ ѻ҆́бразъ тво́й, пречⷭ҇таѧ, є҆го́же любе́знѡ ѡ҆блобыза́юще, весели́мсѧ.

Пѣ́снь и҃.

І҆рмо́съ: Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею, сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Мно́зи бл҃гочести́вїи, зна́тнїи и҆ прості́и, ча́юще ᲂу҆тѣше́нїѧ и҆ ᲂу҆крѣпле́нїѧ во дни̑ гоне́нїй, под̾ покро́въ прпⷣбнагѡ се́ргїа собра́шасѧ и҆ ᲂу҆досто́ишасѧ съ бра́тїей пострада́ти, ꙗ҆́кѡ вѣ́рнїи ᲂу҆ченицы̀ є҆гѡ̀.

Ре́вностїю и҆ любо́вїю бж҃їею распала́еми, бл҃гочести́вїи лю́дїе во дни̑ разоре́нїѧ ла́ѵры ст҃ы̑ни є҆ѧ̀ сохрани́ша и҆ чтⷭ҇нꙋ́ю главꙋ̀ а҆́ввы се́ргїа ѿ порꙋга́нїѧ сокры́ша, тѣ́мже и҆ пострада́ти сподо́бишасѧ, ꙗ҆́кѡ вѣ́рнїи ᲂу҆ченицы̀ є҆гѡ̀.

Добродѣ́тель є҆ѵⷢ҇льскагѡ млⷭ҇рдїѧ ꙗ҆влѧ́ющи, въ заточе́нїи стра́ждꙋщымъ ᲂу҆се́рднѡ послꙋжи́ла є҆сѝ, мч҃нце татїа́но пресла́внаѧ. по́слѣжде и҆ сама̀, а҆́ще и҆ є҆стество́мъ жена̀ сꙋ́щи, мꙋ́жески пострада́ти сподо́биласѧ є҆сѝ, ꙗ҆́кѡ вѣ́рнаѧ ᲂу҆чени́ца се́ргїева.

Бг҃оро́диченъ: Что̀ тѝ принестѝ, пречⷭ҇таѧ, ѿ всеѧ̀ тва́ри сла́вимѣй, недоꙋмѣ́емсѧ, влⷣчце, то́чїю є҆́же гаврїи́лъ на́съ наꙋчѝ: ра́дꙋйсѧ, ѡ҆бра́дованнаѧ.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Свѣти́сѧ, свѣти́сѧ, гора̀ ма́ковецъ, сла́ва бо гдⷭ҇нѧ на тебѣ̀ возсїѧ̀. ликꙋ́й ны́нѣ и҆ весели́сѧ ѻ҆би́тель се́ргїева, дне́сь бо ли́къ новомч҃нкѡвъ твои́хъ хвалꙋ̀ трⷪ҇цѣ живонача́льнѣй возно́ситъ.

Ни ско́рбь, ни тѣснота̀, ни гоне́нїе, ни гѡ́рькїѧ рабѡ́ты, ни ᲂу҆́зы, ни са́маѧ сме́рть возмого́ша разлꙋчи́ти ва́съ, новомч҃нцы ра́донежстїи, ѿ любвѐ бж҃їѧ, но мл҃твами а҆́ввы се́ргїа всѧ̑ терпѧ́ще, бл҃годаре́нїе бг҃ꙋ при́снѡ возноси́ли є҆стѐ.

Ѽ трⷪ҇це чтⷭ҇на́ѧ, прїимѝ, ꙗ҆̀же землѧ̀ ра́донежскаѧ прино́ситъ тѝ, ꙗ҆́кѡ нача́тки и҆ ꙗ҆́кѡ ѳѷмїа́мъ и҆збра́нный, всѧ̑ бг҃ꙋ ᲂу҆годи́вшыѧ и҆ пре́жде, и҆ по́слѣжде въ не́й, и҆ зна́ємыѧ, и҆ незна́ємыѧ, и҆ мл҃твами и҆́хъ ѿ всѧ́кагѡ вре́да на́съ сохранѧ́й.

Бг҃оро́диченъ: Двⷭ҇тва твоегѡ̀ зна́мєнїѧ невреди́мѡ сохрани́въ, сло́во бж҃їе, и҆з̾ тебє̀ проше́дъ, сохранѝ гра́дъ тво́й невреди́мь, дв҃о всепѣ́таѧ, да тѧ̀ непреста́ннѡ велича́емъ.

Свѣти́ленъ:

И҆́же во свѣ́тѣ живы́й непристꙋ́пнѣмъ и҆ содержа́й всѧ́чєскаѧ, за бл҃гоꙋтро́бїе неизрече́нное ѿ дв҃ы ражда́етсѧ и҆ пелена́ми повива́етсѧ, ꙗ҆́кѡ младе́нецъ. волсвѝ грѧдꙋ́тъ въ виѳлее́мъ на поклоне́нїе є҆мꙋ̀, съ ни́миже и҆ собо́ръ новомч҃нкѡвъ ра́донежскихъ поспѣша́етъ, страда̑нїѧ и҆ и҆сповѣ̑данїѧ своѧ̑ приносѧ́ще вопло́щшемꙋсѧ бг҃ꙋ, ꙗ҆́коже да́ры.

Сла́ва, и҆ ны́нѣ: Возжелѣ́въ твоеѧ̀ добро́ты і҆и҃съ, пречⷭ҇таѧ, въ тѧ̀ всели́сѧ, и҆ тебѐ застꙋ́пницꙋ гра́дꙋ твоемꙋ̀ сло́во бж҃їе дарова̀: є҆го́же сохранѧ́й застꙋпле́нїемъ твои́мъ при́снѡ, ꙗ҆́кѡ да тѧ̀ ᲂу҆бл҃жа́емъ, пренепоро́чнаѧ ѻ҆трокови́це.