Каноны Пресвятой Богородице пред иконой «Тихвинская»

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ѽ трⷪ҇це вседержи́тельнаѧ, и҆ є҆ди́нице трисо́лнечнаѧ! дꙋ́шꙋ мою̀ и҆ се́рдце и҆ ᲂу҆́мъ, молю̀, просвѣти́вши, и҆ бл҃года́тїю ѡ҆свѧти́вши, къ бжⷭ҇твеннѣй твое́й любвѝ, пребл҃га́ѧ, возведѝ, и҆ наста́ви благоче́стнѡ пѣ́ти благосе́рдїе приснодв҃ы бл҃гослове́нныѧ.

Бл҃га́гѡ цр҃ѧ̀ бл҃га́ѧ мт҃и, ꙗ҆́же всѣ̑мъ благопослꙋ́шнаѧ въ проше́нїихъ, и҆ всеси́льнаѧ въ благодѣѧ́нїихъ, благода́ть свѣ́та твоегѡ̀ и҆ на́мъ возсїѧ́й, и҆ ѡ҆благодатѝ дне́сь, ѽ бг҃облагода́тнаѧ! пѣ́снь тебѣ̀ пѣ́ти начина́ющыѧ.

Ликѡ́мъ а҆́гг҃льскимъ вино́вно є҆́сть ра́дости твоегѡ̀, влⷣчце, настоѧ́щагѡ торжества̀ славосло́вїе: сі́и бо дне́сь дви́жꙋтсѧ къ похвале́нїю: мы́ же бре́ннїи что́ ти принесе́мъ; то́чїю ᲂу҆сє́рднаѧ благода̑рствїѧ.

А҆рха́гг҃льскїй гла́съ пое́мъ тѝ: ра́дꙋйсѧ, чⷭ҇таѧ, а҆́ще и҆ недосто́йни є҆смы̀. за бла́гость ᲂу҆́бѡ се́й прїимѝ, влⷣчце, свѣ́томъ ми́лости твоеѧ̀ на́съ просвѣща́ющи, и҆ благода́ть всѣ̑мъ подаю́щи.

И҆́нъ. гла́съ д҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Да́ждь мѝ, свѣтода́вче хрⷭ҇тѐ, въ наро́читый де́нь пресла́внагѡ ꙗ҆вле́нїѧ і҆кѡ́ны, ро́ждшїѧ тѧ̀, свѣ́тлѡ торжествова́ти, и҆ ве́селѡ во стра́сѣ и҆ ра́дости воспѣва́ти при́снѡ тоѧ̀ чꙋдеса̀.

Сло́во бж҃їе свѣтода́тельное, и҆ премꙋ́дрость ѻ҆́ч҃ꙋю пло́тїю, дв҃о, ро́ждшаѧ, просвѣтѝ глꙋбо́кꙋю тьмꙋ̀ моегѡ̀ неразꙋ́мїѧ, и҆ сло́во мѝ пода́ждь воспѣ́ти твоѧ̑ чꙋдеса̀.

Дне́сь вѣ́рныхъ собо́ри просвѣща́ютсѧ, є҆реті́чєскаѧ же ѡ҆полчє́нїѧ посрамлѧ́ютсѧ, ви́дѧще і҆кѡ́нꙋ твою̀, влⷣчце, ꙗ҆́кѡ со́лнце по воздꙋ́хꙋ ше́ствꙋющꙋ, нече́стїѧ мглꙋ̀ потреблѧ́ющꙋ, и҆ вѣ̑рныѧ просвѣща́ющꙋ.

Є҆ди́на є҆сѝ ты̀ вели́чїе на́ше и҆ похвала̀ съ бг҃омъ, бг҃оневѣ́стнаѧ: тобо́ю бо ѿ бѣ́дъ спаса́емсѧ, и҆ къ тебѣ̀ прибѣга́емъ, и҆ прилѣ́жнѡ мо́лимсѧ: и҆зба́ви, влⷣчце, рабы̑ твоѧ̑ вѣ́чнагѡ мꙋче́нїѧ, воспѣва́ющыѧ твоѧ̑ чꙋдеса̀.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Грѧди́те вѣ́рнїи на пресла́вное видѣ́нїе, зри́те на высотѣ̀ благолѣ́пнѡ сїѧ́ющꙋ пречⷭ҇тымъ свои́мъ ѻ҆́бразомъ, дв҃ꙋ пречⷭ҇тꙋю, на́съ благода́тнѡ посѣща́ющꙋ, благовѣ́рнѡ пою́щихъ. нѣ́сть пречⷭ҇ты па́че тебє̀, влⷣчце.

Ѡ҆свѧща́етсѧ, бцⷣе, твое́ю благода́тїю всѧ́къ ᲂу҆́мъ вѣ́рныхъ, и҆ возвыша́етсѧ чꙋ́днымъ і҆кѡ́ны твоеѧ̀ прише́ствїемъ: ю҆́же благоче́стнѡ почита́ющихъ, и҆ тебѐ вѣ́рнѡ сла́вѧщихъ, сподо́би, влⷣчце, на́съ рабѡ́въ твои́хъ вы́шнѧгѡ прича́стїѧ.

Да́ждь на́мъ ненавѣ́тнѡ нбⷭ҇нꙋю ше́ствовати стезю̀, бг҃оневѣ́стнаѧ, на бжⷭ҇твєннаѧ дѣѧ̑нїѧ на́съ ᲂу҆крѣплѧ́ющи: ꙗ҆́кѡ да твои́мъ, дв҃о, застꙋпле́нїемъ, ѕлоко́зненнагѡ пꙋте́й ᲂу҆кло́ншесѧ, присносꙋ́щныѧ сла́вы бꙋ́демъ ѻ҆́бщницы.

А҆́гг҃лѡвъ творца̀, и҆́стиннагѡ свѣ́та хрⷭ҇та̀, неизрече́ннѡ и҆зъ тебє̀, бг҃ома́ти, возсїѧ́вшагѡ лꙋча́ми, ѡ҆мрачє́нныѧ на́шѧ дꙋ́шы и҆ сердца̀ просвѣтѝ, и҆ бл҃года́тїю твое́ю, ѽ благода́тнаѧ! ѡ҆свѧтѝ, къ го́рнѧгѡ свѣ́та раче́нїю наставлѧ́ющи.

И҆́нъ.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Хрⷭ҇тѐ і҆и҃се, превѣ́чный цр҃ю̀ и҆ многоми́лостиве, пречⷭ҇тна́гѡ твоегѡ̀ ѻ҆́браза, и҆ ро́ждшїѧ тѧ̀ приснодв҃ы, просвѣтѝ на́съ ꙗ҆вле́нїемъ, и҆ пода́ждь на́мъ согрѣше́нїй ѡ҆ставле́нїе, и҆ ѿ бѣ́дъ и҆збавле́нїе.

Є҆гда̀ а҆́гг҃лами неви́димѡ носи́мꙋ пречⷭ҇тнꙋ́ю твою̀ і҆кѡ́нꙋ, влⷣчце, и҆ свѣтоза́рнѡ стоѧ́щꙋ на воздꙋ́сѣ лю́дїе ви́дѣша, тогда̀ просвѣти́вшесѧ свѣ́томъ твоеѧ̀ ми́лости, ра́дости неизглаго́ланныѧ и҆спо́лнишасѧ.

Ѽ бг҃олюби́вїи ст҃и́телїе и҆ свѧще́нницы, мона́си и҆ прості́и, и҆ наро́ди всѝ, свѣ́тлѡ ликовствꙋ́йте дне́сь, ꙗ҆́кѡ возсїѧ̀ на высотѣ̀ зарѧ̀ свѣтоно́снаѧ, держа́щи и҆́стиннаго свѣ́та и҆з̾ѡбраже́на пло́тїю. съ ни́мже сни́де къ на́мъ, подаю́щи всемꙋ̀ мі́рꙋ просвѣще́нїе.

Твое́ю, дв҃о, всечестно́ю і҆кѡ́ною дре́вле творе́цъ всѣ́хъ чꙋдодѣ́йствова, спасѐ ца́рскїй гра́дъ ѿ и҆ноплеме́нныхъ нахожде́нїѧ: си́це и҆ рѡссі́йстѣй странѣ̀ бꙋ́ди, гпⷭ҇жѐ цр҃и́це, покро́въ и҆ застꙋпле́нїе, спаса́ющи ю҆̀ ѿ всѣ́хъ навѣ̑тъ вра́жїихъ.

Сѣда́ленъ, гла́съ д҃:

Ꙗ҆́кѡ дре́внѧгѡ вои́стиннꙋ кївѡ́та чⷭ҇тнѣ́йшїй тво́й пречⷭ҇тый ѻ҆́бразъ, влⷣчце, па́че бо і҆ле́ктра блиста́ѧсѧ, повсю́дꙋ неѡскꙋ́днѡ лꙋчы̀ ми́лости твоеѧ̀ всѣ̑мъ ꙗ҆влѧ́ѧ простира́етъ, и҆ чтꙋ́щыѧ пресла́вное прише́ствїе є҆гѡ̀ благода́тїю бж҃їею ми́лостивнѡ соблюда́етъ. Ѡ҆ не́мже, влⷣчце, мы̀ ра́дꙋющесѧ ᲂу҆се́рднѡ пра́зднꙋемъ, и҆ мт҃рнее твоѐ къ на́мъ милосе́рдїе прославлѧ́емъ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Творе́цъ всѣ́хъ и҆ созда́тель, вседержи́тельною си́лою носѧ́й всѧ́чєскаѧ, ѻ҆́бразомъ свои́мъ бжⷭ҇твеннымъ, и҆ твои́мъ, дв҃о, дне́сь чꙋдоно́снымъ, пресла́внѡ прїи́де, на рꙋкꙋ̀ твоє́ю, чⷭ҇таѧ, носи́мь, на спасе́нїе человѣ́кѡмъ и҆ и҆сцѣле́нїе.

Неизрече́нномꙋ бж҃їю дарова́нїю, і҆кѡ́нѣ свѣ́та хрⷭ҇та̀, и҆ пречⷭ҇тыѧ дв҃ы, прїиди́те вѣ́рнїи, поклони́мсѧ, и҆ съ любо́вїю припаде́мъ вопїю́ще: низпослѝ, ѽ бл҃годѣ́телю! ро́ждшїѧ тѧ̀ ра́ди приснодв҃ы бл҃госе́рдыѧ, бл҃года́ть и҆ ми́лость на́мъ рабѡ́мъ твои̑мъ.

А҆́гг҃лѡвъ цр҃и́це, мы́сленный кївѡ́те, зако́ннагѡ па́че кївѡ́та пречⷭ҇тый тво́й ѻ҆́бразъ неизрече́нными чꙋдесы̀ и҆ бл҃года́тьми бг҃ъ ᲂу҆красѝ и҆ просла́ви, и҆ а҆́гг҃лѡмъ почита́ти того̀ повелѣ̀: съ ни́миже ѡ҆ на́съ є҆мꙋ̀, ѽ всепѣ́таѧ! моли́сѧ, сла́вѧщихъ спаси́тельное є҆гѡ̀ смотре́нїе, и҆ твоѐ є҆́же бы на́мъ спасе́нїе ᲂу҆лꙋчи́ти.

Ꙗ҆́же по бл҃года́ти дарова́ннаѧ ѿ бг҃а помо́щнице на́мъ всѣ̑мъ хрⷭ҇тїа́нѡмъ, того̀ молѝ, всебл҃га́ѧ и҆ всенепоро́чнаѧ, ꙗ҆́кѡ да пре́зритъ на̑ша безчи́слєннаѧ согрѣшє́нїѧ, и҆ и҆зба́витъ пла́меннагѡ томле́нїѧ и҆ тьмы̀ кромѣ́шнїѧ, и҆ мꙋ́ки всѧ́кїѧ.

И҆́нъ.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Землѧ̀ ᲂу҆́бѡ всѧ̀ дне́сь да возвесели́тсѧ, вкꙋ́пѣ же и҆ воздꙋ́хъ, и҆ мо́ре да кропи́тъ ра́дованїе, ꙗ҆́кѡ всечⷭ҇тна́гѡ ѻ҆́браза бг҃ома́тере чꙋде́снымъ ше́ствїемъ рѡссі́йскаѧ страна̀ пресла́внѡ ѡ҆зари́сѧ.

Раболѣ́пнѡ слꙋ́жатъ и҆ а҆́гг҃льстїи чи́нове тебѣ̀ всѣ́хъ цр҃и́цѣ, и҆ благоговѣ́йнѡ почита́ютъ всечⷭ҇тнꙋ́ю твою̀ і҆кѡ́нꙋ, воспѣва́юще тѧ̀ прест҃ꙋ́ю дв҃ꙋ: мы́ же смире́ннїи ка́кѡ тебѐ всечⷭ҇тꙋю досто́йнѡ пѣ́ти возмо́жемъ;

А҆рха́гг҃льскꙋю пѣ́снь, є҆́же ра́дꙋйсѧ, тебѣ̀ зове́мъ, бг҃оневѣ́сто, гдⷭ҇ь съ тобо́ю, ра́дꙋйсѧ, ра́досте а҆́гг҃лѡвъ, и҆ всѣ́хъ человѣ́кѡвъ сла́вѧщихъ тѧ̀ вои́стиннꙋ весе́лїе, спасѝ дꙋ́шы пою́щихъ тѧ̀, бцⷣе чⷭ҇таѧ.

Ѽ бг҃ороди́тельнице, ра́дости пода́тельнице, вѣ́рою сла́вѧщыѧ тѧ̀, и҆ ѿ дꙋшѝ пою́щыѧ, ра́дости неизрече́нныѧ и҆спо́лни, и҆ свѣ́та невече́рнѧгѡ сподо́би, дв҃о бл҃года́тнаѧ влⷣчце.

Пѣ́снь є҃.

І҆рмо́съ: Оу҆́тренюетъ дꙋ́хъ мо́й къ тебѣ̀, бж҃е, ѿ ѻ҆ц҃а̀ рожде́нномꙋ неизрече́ннѡ, и҆ воздви́гнꙋвшемꙋ ро́гъ спасе́нїѧ на́мъ.

Ты̀, ѽ бл҃года́тнаѧ! въ млⷭ҇тивомъ твое́мъ дне́сь благоволе́нїи, бг҃олѣ́пнымъ ꙗ҆вле́нїемъ странꙋ̀ на́шꙋ благода́тнѡ просвѣти́ла є҆сѝ, и҆ та́инственное свѣ́та твоегѡ̀ просвѣще́нїе мі́рꙋ низпосла́ла є҆сѝ, къ свѣ́тꙋ вы́шнїѧ сла́вы, бцⷣе, вѣ̑рныѧ возводѧ́щи.

Ѡ҆мрачи́хомсѧ пѡ́мыслы, ѡ҆тѧгчи́хомсѧ грѣхи̑, недоꙋмѣ́емъ свѣтоно́сныѧ бл҃года́ти, и҆ ми́лости твоеѧ̀ и҆сповѣ́дати, влⷣчце: но, ѽ прест҃а́ѧ дв҃о! просвѣтѝ на́съ и҆ ѡ҆богатѝ та́инственными твои́ми дарова̑нїи бжⷭ҇твенныхъ жела́нїй, къ свѣ́тꙋ пра́вагѡ пꙋтѝ направлѧ́ющи.

Благоче́стнѡ ѿвсю́дꙋ, ѽ бг҃ома́ти! къ пречестнѣ́й твое́й і҆кѡ́нѣ притека́ющыѧ, и҆ ᲂу҆се́рднѡ покланѧ́ющыѧсѧ, и҆ вѣ́рнѡ вездѣ́ тѧ призыва́ющыѧ, предварѝ ѿ бѣ́дъ всѧ́кихъ спаса́ющи, и҆ лю́тыхъ недꙋ̑гъ и҆збавлѧ́ющи, и҆ дꙋ́хи лꙋка̑выѧ прогонѧ́ющи, тишинꙋ̀ и҆ здра́вїе подаю́щи всѣ̑мъ, влⷣчце.

Лю́тыми помышлє́нїи, и҆ скве́рными воспомина̑нїи, ѿ лꙋка́выхъ врагѡ́въ стꙋжа́емыхъ ѕѣ́льнѣ не ѡ҆ста́ви на́съ, нижѐ пре́зри, бг҃ороди́тельнице: но ѡ҆сѣнѝ твое́ю благода́тїю, покрыва́ющи ѿ си́хъ и҆ застꙋпа́ющи, и҆ спаса́ющи ѿ всѣ́хъ и҆́хъ навѣ̑тъ, ѽ бг҃облаже́ннаѧ!

И҆́нъ.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Въ пꙋсты́ни ꙗ҆вле́ннѡ тебѐ, бг҃ома́ти, со ст҃и́телемъ благоговѣ́йный ᲂу҆зрѣ́ти мꙋ́жъ сподо́бисѧ, и҆ благоволе́нїѧ твоегѡ̀ глаго́лы ѿ тебє̀, цр҃и́це, воспрїѧ́тъ, на бо́льшее ᲂу҆твержде́нїе, и҆ въ по́льзꙋ мі́рꙋ спасе́нїѧ.

Ѻ҆каѧ́ненъ ᲂу҆́бѡ а҆́зъ, всечⷭ҇таѧ, и҆ недосто́инъ таковы́ѧ ны́нѣ бл҃года́ти, є҆́же тѧ̀ ви́дѣти: но понѐ въ бꙋ́дꙋщемъ сподо́би мѧ̀ ᲂу҆зрѣ́ти тѧ̀, и҆ сн҃а твоего̀ ᲂу҆срѣ́сти грѧдꙋ́ща во сла́вѣ, и҆ гла́съ бжⷭ҇твенный ᲂу҆слы́шати зовꙋ́щь во црⷭ҇тво нбⷭ҇ное.

Прибѣга́емъ къ твое́й, дв҃о, бла́гости, и҆ ѻ҆́чи серде́цъ на́шихъ воспꙋща́емъ къ тебѣ̀, чⷭ҇таѧ, и҆ съ пла́чемъ колѣ̑на преклонѧ́юще, мо́лимъ тѧ̀: не пре́зри на́шегѡ воздыха́нїѧ, и҆ бꙋ́ди на́мъ покро́въ и҆ помо́щница въ де́нь сꙋ́дный.

Є҆ди́на є҆сѝ всѣ́хъ предста́тельница хрⷭ҇тїа́нъ, бг҃ома́ти пречⷭ҇таѧ, ᲂу҆слы́ши на́ше моле́нїе, воззрѝ на ны̀, всепѣ́таѧ, спасѝ гра́дъ и҆ ѻ҆би́тель твою̀, и҆ ѡ҆зарѝ ста́до твоѐ заре́ю бл҃года́ти твоегѡ̀ застꙋпле́нїѧ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑ ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

А҆е́ръ простра́нный, и҆ землѧ̀ на́ша, цр҃и́це, въ пресла́вномъ твоеѧ̀ і҆кѡ́ны прише́ствїи, чꙋде́съ и҆ бжⷭ҇твенныхъ дарѡ́въ благода́тїю твое́ю и҆спо́лнисѧ, во ᲂу҆твержде́нїе благоче́стїѧ, и҆ всѣ́хъ вѣ́рныхъ, всепѣ́таѧ, є҆́юже дне́сь и҆ сꙋпоста́ты низлага́ютсѧ, и҆ сла́вѧщїи тѧ̀ крѣ́пцѣ ᲂу҆твержда́ютсѧ.

Гра́де бж҃їй, селе́нїе ст҃о́е, дв҃о бг҃оневѣ́стнаѧ, сохранѝ ѿ сопроти́вныхъ нахожде́нїѧ, и҆ ѿ всѣ́хъ навѣ̑тъ вра́жїихъ ст҃ы́й до́мъ тво́й, и҆ всѧ̑ гра́ды и҆ страны̑ хрⷭ҇тїа́нскїѧ, любо́вїю пою́щыѧ тѧ̀, и҆ вѣ́рнѡ почита́ющыѧ пречⷭ҇тый ѻ҆́бразъ тво́й.

Ѡ҆свѧще́нїе, здра́вїе и҆ спасе́нїе всегда̀ подава́й дꙋша́мъ же и҆ тѣлесє́мъ на́шымъ, ѽ мт҃и бж҃їѧ благоче́стнѡ покланѧ́ющымсѧ і҆кѡ́нѣ твое́й бжⷭ҇твеннѣй, и҆ ᲂу҆сты̑ и҆ се́рдцемъ благоговѣ́йнѡ ю҆̀ со стра́хомъ цѣлꙋ́ющымъ, и҆ вѣ́рою ѿ дꙋши́ тѧ пѣсносло́вѧщымъ.

Держа́вный покро́въ и҆ стѣ́нꙋ неѡбори́мꙋ стѧжа́вше тѧ̀, приснодв҃о бцⷣе, ᲂу҆пова́нїе на тѧ̀ съ бг҃омъ возлага́емъ, вѣ́рнїи, и҆ прилѣ́жнѡ мо́лимъ, си́лою твое́ю стрѣ́лы вра̑жїѧ и҆ кѡ́зни всѧ̑ бѣсѡ́вскїѧ, не́мѡщны ꙗ҆́кѡ младе́нчески покажѝ и҆ недѣ́йствєнны, крѣ́пкаѧ на́ша помо́щнице.

И҆́нъ.

І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Ѽ преди́внагѡ твоегѡ̀ чꙋдесѐ, влⷣчце! ꙗ҆́кѡ за преслꙋша́нїе твоегѡ̀ повелѣ́нїѧ, ᲂу҆жа́снѡ человѣ́къ съ главы̀ цр҃ко́вныѧ восхище́нъ бы́въ, на землѝ невреди́мь ѡ҆брѣ́тесѧ, ми́лостїю твое́ю, всеми́лостиваѧ.

Никто́же та́кѡ преслꙋ́ша бжⷭ҇твєннаѧ повелѣ̑нїѧ, ꙗ҆́коже а҆́зъ ѻ҆каѧ́нный. тѣ́мъ тѝ припа́даѧ молю́сѧ, влⷣчце: пре́жде да́же до конца̀ не поги́бнꙋ, наста́ви мѧ̀ на и҆́стинный пꙋ́ть, и҆ спаси́ мѧ, чⷭ҇таѧ.

Ты̀, ѽ бг҃ома́ти, ро́ждшаѧ претерпѣ́вшаго на́съ ра́ди на дре́вѣ крⷭ҇тнѣмъ распѧ́тїе, ᲂу҆молѝ при́снѡ на́мъ страда́нїе є҆гѡ̀ ст҃о́е по́мнѧщымъ, во́лю є҆гѡ̀ бжⷭ҇твеннꙋю твори́ти, и҆ вѣ́чныхъ бл҃гъ наслѣ́дниками бы́ти.

Влⷣчце дв҃о чⷭ҇таѧ, и҆зба́ви на́съ лю́тыхъ всѣ́хъ, ᲂу҆молѧ́ющи пригвозди́вшаго на крⷭ҇тѣ̀ грѣхѝ на́шѧ, и҆ сподо́би на́съ досто́йнѡ ѡ҆деснꙋ́ю є҆гѡ̀ ста́ти, є҆гда̀ прїи́детъ во сла́вѣ свое́й.

Конда́къ, гла́съ и҃:

Притеце́мъ, лю́дїе, къ дв҃ѣй бцⷣѣ цр҃и́цѣ, благодарѧ́ще хрⷭ҇та̀ бг҃а, и҆ къ тоѧ̀ чꙋдотво́рнѣй і҆кѡ́нѣ ᲂу҆ми́льнѡ взира́ющи припаде́мъ, и҆ возопїе́мъ є҆́й: ѽ влⷣчце марі́е! присѣти́вши странꙋ̀ сїю̀, твоегѡ̀ честна́гѡ ѻ҆́браза ꙗ҆вле́нїемъ чꙋде́снѡ, спаса́й въ ми́рѣ и҆ благовре́менствѣ ѻ҆те́чество на́ше, и҆ всѧ̑ хрⷭ҇тїа́ны, наслѣ́дники показꙋ́ющи нбⷭ҇ныѧ жи́зни. тебѣ́ бо вѣ́рнѡ зове́мъ: ра́дꙋйсѧ, дв҃о, мі́ра спасе́нїе.

І҆́косъ:

Пречꙋ́дное ꙗ҆вле́нїе бг҃ома́тере ви́дѧще, на высотꙋ̀ добродѣ́телей взы́демъ, и҆ ᲂу҆́мъ на нб҃о возведе́мъ: сегѡ́ бо ра́ди небоше́ственнѣ прїи́де, да привлече́тъ къ высотѣ̀ вопїю́щыѧ є҆́й си́це: ра́дꙋйсѧ, бл҃гослове́ннаѧ дв҃о, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, нбⷭ҇наѧ цр҃и́це, гдⷭ҇а бг҃а мт҃и и҆ творца̀ всѧ́ческихъ: ра́дꙋйсѧ, всера́достное а҆́гг҃лѡмъ пѣ́нїе: ра́дꙋйсѧ, всежела́тельное всегѡ̀ мі́ра зрѣ́нїе: ра́дꙋйсѧ, неподви́жимое вѣ́ры благоче́стїѧ ѡ҆снова́нїе: ра́дꙋйсѧ, всесвѣ́тлое бл҃года́ти позна́нїе: ра́дꙋйсѧ, бж҃їе къ зємны́мъ благоволе́нїе: ра́дꙋйсѧ, земны́хъ къ бг҃ꙋ возведе́нїе: ра́дꙋйсѧ, ѡ҆ѕло́блєннымъ дꙋша́мъ ᲂу҆тѣше́нїе: ра́дꙋйсѧ, всѣ̑мъ вѣ̑рнымъ ско́рое поможе́нїе: ра́дꙋйсѧ, дарова́ннаѧ ѿ бг҃а предста́тельнице ро́дꙋ хрⷭ҇тїа́нскомꙋ, є҆го́же и҆ соблюда́й прилѣ́жнѡ ѿ всѧ́кихъ бѣ́дъ и҆ ѕѡ́лъ, да зове́мъ тѝ: ра́дꙋйсѧ, дв҃о, вѣ̑рнымъ спасе́нїе.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

А҆́гг҃лѡмъ говѣ́йный ѻ҆́бразъ тво́й, влⷣчце, неизрече́нною при́снѡ бл҃года́тїю сїѧ́етъ и҆ си́лою: дне́сь бо тогѡ̀ дарова̑нїи зємны́ѧ просвѣща́еши, и҆ къ нбⷭ҇нымъ наставлѧ́еши, и҆ къ вѣ́чномꙋ животꙋ̀ ᲂу҆строѧ́еши, за неизглаго́ланнꙋю твою̀ бл҃гость, бг҃облагода́тнаѧ.

Твоегѡ̀ бг҃олѣ́пнагѡ ꙗ҆вле́нїѧ, и҆ пресла́внагѡ і҆кѡ́ны прише́ствїѧ, и҆ чꙋде́съ пꙋчи̑ны, чⷭ҇таѧ, виті́йствꙋющихъ ᲂу҆ста̀ ника́коже возмога́ютъ и҆сповѣ́дати, мы́ же грꙋ́бїи что̀ возглаго́лемъ; то́чїю, поми́лꙋй и҆ спасѝ на́съ, ѽ всеми́лостиваѧ влⷣчце!

И҆звѣ́стнаѧ вѣ́рныхъ помо́щнице, и҆ всѣ́хъ благи́хъ пода́тельнице, прїимѝ на́съ вѣ́рнѡ припа́дающихъ, и҆ любо́вїю вопїю́щихъ тѝ: поми́лꙋй на́съ, гпⷭ҇жѐ, поми́лꙋй на́съ, ꙗ҆́коже дне́сь, та́кѡ и҆ во ѻ҆́ный вѣ́къ, бꙋ́ди на́мъ помо́щница и҆ застꙋ́пница.

Мт҃и бж҃їѧ милосе́рдаѧ, ми́лости твоеѧ̀ двє́ри дне́сь ѿве́рзи на́мъ, и҆ ѿ ᲂу҆́стъ мы́сленныхъ волкѡ́въ и҆схитѝ, хотѧ́щихъ на́съ поглоти́ти, и҆ до конца̀ погꙋби́ти: поми́лꙋй, мо́лимъ тѧ̀, ѽ влⷣчце, поми́лꙋй, не ѿвратѝ посра́мленныхъ ра̑бъ твои́хъ.

И҆́нъ.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Є҆диноча́дый тво́й сн҃ъ и҆ бг҃ъ всѣ́хъ, бг҃ома́ти, пречⷭ҇тый тво́й ѻ҆́бразъ невреди́мь сохранѝ во пла́мени, ѽ чꙋдесѐ!. бл҃года́тїю па́че со́лнца ѡ҆брѣ́тесѧ сїѧ́ющь, и҆ вѣ̑рныѧ просвѣща́ющь, вѣ́рою пою́щыѧ: бж҃е, бл҃гослове́нъ є҆сѝ.

Нбⷭ҇нїи чи́нове веселѧ́тсѧ съ земноро́дными, бцⷣе, въ свѣ́тломъ торжествѣ̀ твое́мъ, є҆́же соверша́ющыѧ ны̀, и҆ со стра́хомъ предстоѧ́щыѧ предъ пречⷭ҇тымъ твои́мъ ѻ҆́бразомъ, просвѣтѝ свѣ́томъ сїѧ́нїѧ твоегѡ̀, пречⷭ҇таѧ, и҆ всѧ̑ спасѝ.

Є҆ди́наго ѿ трⷪ҇цы бг҃а сло́ва цр҃ѧ̀ нбⷭ҇наго пло́тїю, цр҃и́це, родила̀ є҆сѝ: того̀ молѝ, влⷣчце, во́инствꙋ на́шемꙋ пода́ти ѡ҆долѣ́нїе на проти̑вныѧ, и҆ всѣ̑мъ вѣ̑рнымъ по́мощь, грѣхѡ́въ ѡ҆ставле́нїе, и҆ дꙋша́мъ спасе́нїе.

Рабы̑ твоѧ̑, чⷭ҇таѧ, пою́щыѧ тѧ̀, и҆ вѣ́рою несꙋмнѣ́нною молѧ́щыѧсѧ тебѣ̀, свѣтода́тельною твое́ю и҆ бжⷭ҇твенною ѡ҆сѣнѝ бл҃года́тїю, ꙗ҆́кѡ бл҃годѣ́телѧ всѣ́хъ ро́ждшаѧ, и҆ покры́й и҆ сохранѝ ѿ всѣ́хъ навѣ̑тъ вра́жїихъ.

Пѣ́снь и҃.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

И҆зрѧ́днїи чи́нове нбⷭ҇нїи благоче́стнѡ благоговѣ́ютъ пречⷭ҇томꙋ твоемꙋ̀ ѻ҆́бразꙋ, всечⷭ҇таѧ, и҆ пречꙋ́дномꙋ є҆гѡ̀ прише́ствїю, подъ со́лнцемъ пресла́внꙋ показа́вшꙋсѧ, и҆ ро́дъ правовѣ́рный воздви́гшꙋ пѣ́ти, и҆ сла́вити сн҃а твоего̀, ꙗ҆́кѡ содѣ́телѧ всѣ́хъ во вѣ́ки.

Пресла̑внаѧ дне́сь пою́ще, любе́знѡ а҆́гг҃лѡмъ говѣ́йной твое́й і҆кѡ́нѣ покланѧ́емсѧ, благоговѣ́юще, ѽ гпⷭ҇жѐ цр҃и́це! сла́вѧщее тѧ̀ ѻ҆те́чество на́ше бжⷭ҇твенною твое́ю благода́тїю ѡ҆сѣнѝ, и҆ на врагѝ ᲂу҆крѣпѝ, и҆ ми́рно соблюдѝ.

Ра́дости вина̀, всебл҃гослове́ннаѧ, ра́дꙋйсѧ, всенепоро́чнаѧ, ра́дꙋйсѧ, бл҃года́тнаѧ, держа́ва на́ша и҆ ѡ҆гражде́нїе, и҆ спаси́тельное прибѣ́жище, спаси́ ны рабы̑ твоѧ̑, не и҆мꙋ́щыѧ па́че тебє̀ къ бг҃ꙋ по́мощи: на тѧ́ бо надѣ́емсѧ, и҆ тебѐ пое́мъ во вѣ́ки.

Є҆ди́нꙋ тѧ̀ жи́зни на́шеѧ стѧжа́хомъ съ бг҃омъ храни́тельницꙋ, и҆ крѣ́пкꙋ наде́ждꙋ спасе́нїѧ: мо́лимъ тѧ̀, ѽ бл҃госе́рдаѧ, и҆ по кончи́нѣ хода́тайствовати ѡ҆ на́съ, ꙗ҆́кѡ да бꙋ́дꙋщихъ стѧза́нїй и҆зба́вимсѧ, и҆ ми́лостива ѡ҆брѧ́щемъ сн҃а твоего̀ и҆ бг҃а въ де́нь сꙋ́дный.

И҆́нъ.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ѽ пресла́вныхъ чꙋде́съ твои́хъ, чⷭ҇таѧ! ꙗ҆́кѡ зда́тели ст҃ы́ѧ цр҃кве твоеѧ̀, подъ ка́менїемъ тридне́внѡ бы́вшїи, ѡ҆брѣто́шасѧ жи́ви и҆ безвре́дни, покро́вомъ твои́мъ соблюде́ни, тебѣ̀ всѣ́хъ цр҃и́цѣ возсыла́юще гла́сы похва́льныѧ.

Жи́знь вмѣ́стѡ сме́рти дарова́ла є҆сѝ, бцⷣе, ме́ртвенномꙋ сꙋществꙋ̀. тѣ́мже и҆ на́съ ᲂу҆мерщвле́нныхъ грѣхи̑ мно́гими, бг҃оневѣ́сто, неврежде́нны ѿ вра̑гъ соблюдѝ, и҆ къ жи́зни лꙋ́чшей возведѝ, спаса́ющи дꙋ́шы на́шѧ.

Дне́сь и҆спо́лнишасѧ ра́дости и҆ весе́лїѧ всѝ вѣ́рнїи ѡ҆ і҆кѡ́нѣ твое́й, бцⷣе, ꙗ҆́кѡ въ че́люстѣхъ сме́рти бы́вшымъ ꙗ҆ви́ласѧ є҆сѝ жи́зни вино́вница, и҆ и҆сто́чникъ приснотекꙋ́щїй, цѣлє́бныѧ да́ры всѣ̑мъ точа́щїй, и҆ спасе́нїе подаю́щїй.

И҆зрѧ́днѡ воспѣ́ти пречⷭ҇тагѡ твоегѡ̀ ѻ҆́браза, и҆ ро́ждшагосѧ и҆зъ тебє̀ млⷣнца, и҆́стинна же бг҃а чꙋ́дныѧ і҆кѡ́ны пресла́вное прише́ствїе, совокꙋ́пльшихсѧ люде́й ѿвсю́дꙋ, всепѣ́таѧ, моле́нїе прїимѝ, и҆ прошє́нїѧ и҆спо́лни.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Про́ста пꙋтѝ по а҆е́рꙋ свѣтопрїѧ́тномꙋ, і҆кѡ́на твоѧ̀, влⷣчце, стезю̀ проходѧ́щи, бг҃одви́жимѡ и҆ свѣтолѣ́пнѡ неизслѣ́димы стєзѝ творѧ́щи, вѣ̑рныѧ въ поднебе́снѣй бл҃года́тїю ѡ҆зарѝ, вѣ́рою вопїю́щыѧ: вои́стиннꙋ честнѣ́йши всѣ́хъ є҆сѝ, дв҃о чⷭ҇таѧ.

Сло́ва виті́йствомъ превысо́кихъ твои́хъ, чⷭ҇таѧ, чꙋде́съ, ника́коже по достоѧ́нїю ᲂу҆краси́ти ᲂу҆до́бни є҆смы̀, то́чїю ᲂу҆се́рднѣ мо́лимъ тѧ̀, цр҃и́це: да мо́лиши сн҃а твоего̀, влⷣкꙋ и҆ цр҃ѧ̀ всѣ́хъ, дарова́вшаго на́мъ тебѐ пресла́внꙋю помо́щницꙋ, сподо́бити на́съ нбⷭ҇нагѡ своегѡ̀ црⷭ҇твїѧ.

Пѣ́снь благода́рственнѡ пѣ́нїѧ, за неизрече́нное твоѐ милосе́рдїе, ѽ бг҃облагода́тнаѧ! ѿ на́съ прїимѝ, прошє́нїѧ на̑ша въ по́льзꙋ и҆сполнѧ́ющи, и҆ къ высотѣ̀ го́рнѣй всѣ́хъ возведѝ, вѣ́рнѡ бо тѝ зове́мъ: вои́стиннꙋ вы́шши всѣ́хъ є҆сѝ, дв҃о всенепоро́чнаѧ.

Ро́ди всѝ ра́достнѡ блажи́мъ тѧ̀, бцⷣе, ꙗ҆́кѡ ра́дости всѧ̑ ны̀ и҆спо́лнила є҆сѝ, пресла́внымъ прише́ствїемъ і҆кѡ́ны твоеѧ̀, пречⷭ҇таѧ. є҆́йже дне́сь покланѧ́ющесѧ, ᲂу҆ми́льнѡ мо́лимъ тѧ̀: не забꙋ́ди, влⷣчце, твои́хъ рабѡ́въ сподо́бити въ бꙋ́дꙋщемъ вѣ́цѣ и҆збра́нныхъ ра́дости.

И҆́нъ.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чи́стаѧ приснодв҃о.

Ꙗ҆вле́нїю, влⷣчце, всечестны́ѧ твоеѧ̀ і҆кѡ́ны кто̀ не ᲂу҆диви́тсѧ, и҆лѝ кто̀ не почꙋди́тсѧ; по воздꙋ́хꙋ бо сїю̀, ꙗ҆́кѡ нѣ́кїй да́ръ свѣтоно́сный, низпосла́ла є҆сѝ землѝ рѡссі́йстѣй, ра́достнѡ пою́щей тѧ̀, и҆ вѣ́рнѡ велича́ющей.

Ра́дость мі́рꙋ, дв҃о, неизглаго́ланнꙋю дарова́вши ꙗ҆вле́нїемъ пречⷭ҇тыѧ твоеѧ̀ і҆кѡ́ны, и҆зба́ви, влⷣчце, ѿ всѧ́кїѧ печа́ли вѣ́рою покланѧ́ющыѧсѧ є҆́й, и҆ со стра́хомъ цѣлꙋ́ющыѧ ю҆̀: ѽ прест҃а́ѧ! всѧ̑ спасѝ и҆ поми́лꙋй, и҆ црⷭ҇твїѧ нбⷭ҇нагѡ сподо́би.

Ро́ждшаѧ, влⷣчце, чл҃вѣколю́бца бг҃а, за чл҃вѣколю́бїе посѣти́ла є҆сѝ на́съ бжⷭ҇твенною твое́ю і҆кѡ́ною, къ не́йже всегда̀ притека́юще, и҆ благолѣ́пїе є҆ѧ̀ зрѧ́ще, тебѣ̀ ᲂу҆ми́льнѡ вопїе́мъ: спаса́й при́снѡ, бцⷣе, достоѧ́нїе твоѐ.

Оу҆стна́ми смире́нными принесо́хъ тѝ препро́стое сїѐ, всепѣ́таѧ, пѣ́нїе: поне́же грꙋ́бъ є҆́смь многогрѣ́шный, и҆ недосто́инъ по достоѧ́нїю воспѣ́ти тѧ̀, но ѿ ᲂу҆се́рдїѧ на твоѧ̑ щедрѡ́ты надѣ́ѧсѧ, ꙗ҆́кѡ сп҃си́телѧ всегѡ̀ мі́ра родила̀ є҆сѝ: не возгнꙋша́йсѧ, цр҃и́це, прїимѝ сїѐ, и҆ спаси́ мѧ.

Свѣти́ленъ.

Пречⷭ҇тый ѻ҆́бразъ тво́й, и҆́мже присѣти́ла є҆сѝ на́съ, бг҃оѻтрокови́це дв҃о, чтꙋ́ще пра́зднꙋемъ сегѡ̀ ны́нѣ прише́ствїе, ѿ негѡ̀ бл҃года́тїю, сн҃а твоегѡ̀, и҆ твое́ю прїе́млюще скорбе́й и҆ бѣ́дъ, и҆ напа́стей и҆збавле́нїе, мт҃и бг҃а вы́шнѧгѡ.