Канон Пресвятой Богородице пред иконой «Всецарица»

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ѽ пребл҃га́ѧ застꙋ́пнице на́ша! недоꙋмѣ́емъ пѣсносло́вити тѧ̀ по достоѧ́нїю, ѻ҆ба́че любо́вїю понꙋжда́еми, мо́лимъ тѧ̀: сподо́би принестѝ тебѣ̀ пѣ̑сни бл҃года́рствєнныѧ.

Прїиди́те, вѣ́рнїи, ко всечтⷭ҇но́мꙋ ѻ҆́бразꙋ бцⷣы всецр҃и́цы припаде́мъ, ѡ҆б̾и́мемъ се́рдцемъ и҆ лобыза́имъ ᲂу҆стны̀, со ᲂу҆миле́нїемъ молѧ́щесѧ всемлⷭ҇тивой влⷣчцѣ.

Ѿ нбⷭ҇ныхъ сла́вимаѧ и҆ ѿ земны́хъ ᲂу҆бл҃жа́емаѧ, двⷭ҇твенными добро́тами преиспо́лненнаѧ, пречⷭ҇таѧ дв҃о, прїимѝ молє́нїѧ на̑ша и҆ при́зри на на́съ бл҃гоꙋвѣ́тливым взо́ромъ твои́мъ.

Ди̑вна чꙋдеса̀ твоѧ̑, гдⷭ҇и, ꙗ҆́кѡ дарова́лъ є҆сѝ мі́рꙋ пресла́внꙋю бг҃оѻтрокови́цꙋ мр҃і́ю, ѿ всѣ́хъ родѡ́въ и҆збра́ннꙋю во сп҃се́нїе ро́да человѣ́ческагѡ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Ты̀ є҆сѝ и҆сто́чникъ златострꙋ́йный, ро́сꙋ ᲂу҆тѣше́нїѧ и҆сточа́ѧй сердца́мъ скорбѧ́щымъ, ѽ цр҃и́це дв҃о. ѡ҆бо́дри ны̀ въ ча́съ и҆спыта́нїѧ, ѿ ѿча́ѧнїѧ и҆зба́ви и҆ сле́зы претворѝ въ ро́сꙋ нбⷭ҇ныѧ ра́дости.

Мо́лимъ тѧ̀ ѡ҆ сро́дницѣхъ на́шихъ, гпⷭ҇жѐ всецр҃и́це, и҆сцѣлѝ недꙋ́ги неисцѣ̑льныѧ, ᲂу҆ста́ви ра́ковыѧ ꙗ҆́звы стꙋже́нїе, терпѣ́нїе неистощи́мое стра́ждꙋщымъ да́рꙋй и҆ слеза́ми покаѧ́нїѧ ѡ҆мы́й сердца̀ и҆́хъ.

Любы̀ твоѧ̀, ѽ бг҃омт҃и, ꙗ҆́коже ѻ҆́гнь нбⷭ҇ный, да зате́плитъ въ сердца́хъ на́шихъ свѣтлосїѧ̑нныѧ свѣти́льники мл҃твы и҆ любвѐ.

Ѽ всесвѣ́тлаѧ влⷣчце, покры́й на́съ чтⷭ҇ны́мъ твои́мъ ѡ҆мофо́ромъ, и҆ свѣтоно́сными лꙋча́ми бл҃года́ти ѿженѝ те́мный ѻ҆́блакъ печа́лей на́шихъ.

Сѣда́ленъ, гла́съ и҃:

Дне́сь пра́зднꙋемъ прише́ствїе чтⷭ҇на́гѡ ѻ҆́браза твоегѡ̀, мт҃и бж҃їѧ, къ немꙋ́же съ вѣ́рою припа́даемъ, всебл҃же́ннаѧ, и҆ мо́лимъ тѧ̀: посѣтѝ сꙋ́щыѧ въ болѣ́знехъ и҆ печа́лехъ, и҆ покры́й ѿ бѣ́дъ и҆ ѕѡ́лъ рабы̑ твоѧ̑.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Въ зно́и неисцѣ́льныхъ болѣ́зней стра́ждꙋщымъ ѡ҆дождѝ ка̑пли нбⷭ҇нагѡ млⷭ҇рдїѧ твоегѡ̀, пречⷭ҇таѧ, и҆ бл҃года́ти прохла́дою ᲂу҆сладѝ дꙋ́шы и҆знемога́ющыѧ.

Кꙋпина̀ тѧ̀ неѡпа́льнаѧ проѡбразова́ше, ѽ цр҃и́це дв҃о, не ѡ҆палѝ бо чре́во твоѐ ѻ҆́гнь бжⷭ҇тва̀. тѣ́мже мо́лимъ тѧ̀: ѻ҆гнѧ̀ гее́нскагѡ и҆зба́ви ны̀.

Ра́дꙋйсѧ, бг҃оизбра́ннаѧ ѻ҆трокови́це, ѡ҆дꙋшевле́нный хра́ме, черто́же сло́ва бж҃їѧ, во ст҃ы́й хра́мъ во младе́нческихъ лѣ́тѣхъ введе́ннаѧ и҆ та́мѡ воспита́ннаѧ. тѣ́мже мо́лимъ тѧ̀: наꙋчѝ и҆ ны̀ ко хра́мꙋ бж҃їю ᲂу҆се́рднѡ прилѣжа́ти.

Ты̀ ѿ ст҃а́гѡ а҆́гг҃ла пи́щꙋ нбⷭ҇нꙋю прїе́млющи, под̾ сѣ́нїю хра́ма гдⷭ҇нѧ пребыва́ла є҆сѝ, дв҃о нетлѣ́ннаѧ. тѣ́мже напита́й и҆ на́шѧ во страсте́хъ и҆зсо́хшыѧ дꙋ́шы и҆ сподо́би хрⷭ҇то́выхъ та̑инъ досто́йнѡ причаща́тисѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Ѽ всебл҃же́ннаѧ бг҃омт҃и, согрѣша́ющихъ и҆справле́нїе, ᲂу҆мѧгчѝ и҆зсо́хшꙋю зе́млю серде́цъ на́шихъ, да прїе́мше сѣ́мена сло́ва бж҃їѧ, достѡ́йныѧ плоды̀ покаѧ́нїѧ принесе́мъ влⷣцѣ хрⷭ҇тꙋ̀.

Поги́бшихъ ты̀ є҆сѝ взыска́нїе, приснодв҃о мр҃і́е, и҆ хода́таица ѡ҆ на́съ къ сн҃ꙋ твоемꙋ̀ и҆ бг҃ꙋ, ты̀ є҆сѝ приста́нище сп҃си́тельное ѡ҆бꙋрева́ємымъ въ мо́ри жите́йстѣмъ и҆ погрꙋжа́ємымъ напа́стьми мно́гими.

То́ками бл҃года́ти, чрез̾ ст҃ы́й ѻ҆́бразъ тво́й, всецр҃и́це, на на́съ и҆злива́емыми, ѡ҆мы́й грѣхѡ́въ на́шихъ скве́рнꙋ и҆ ᲂу҆гасѝ страсте́й пе́щь, да ѡ҆брѧ́щемъ чистотꙋ̀ серде́чнꙋю и҆ ᲂу҆невѣ́стимъ дꙋ́шы хрⷭ҇тꙋ̀, сп҃сꙋ на́шемꙋ.

Ра́дꙋйсѧ, всепѣ́таѧ цр҃и́це! зарю̀, наставлѧ́ющꙋю къ свѣ́тꙋ, возсїѧ́й дꙋша́мъ на́шымъ, ро́ждшаѧ сл҃нце пра́вды хрⷭ҇та̀, ра́дость и҆ сп҃се́нїе мі́рꙋ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Не возгнꙋша́йсѧ на́съ многогрѣ́шныхъ, ѽ сладкоꙋха́нный крі́не чⷭ҇тоты̀! ѿженѝ плотско́е мꙋдрова́нїе, ᲂу҆ста́ви молвꙋ̀ лꙋка́выхъ помышле́нїй и҆ сподо́би добродѣ́телей бл҃гоꙋха́нїе творцꙋ̀ при́снѡ приноси́ти.

Помозѝ на́мъ, бг҃оневѣ́сто, нра́въ смире́нъ стѧжа́ти, всегда̀ ра́доватисѧ, за всѧ̑ творца̀ бл҃годари́ти, и҆ ко хрⷭ҇тꙋ̀, сп҃си́телю на́шемꙋ, непреста́ннѡ моли́тисѧ наꙋчѝ ны̀.

Прише́ствїемъ і҆кѡ́ны твоеѧ̀ ѡ҆зарѧ́еми, мо́лимъ тѧ̀, всецр҃и́це: бꙋ́ди на́мъ грѣ̑шнымъ спорꙋ́чница, на стєзѝ сп҃си́тєльныѧ наста́ви, поборѝ борю́щыѧ ны̀ и҆ побѣ́дꙋ непобѣди́мꙋю во бра́нехъ да́рꙋй.

Ѽ чⷭ҇таѧ голꙋби́це, нескве́рнаѧ а҆́гнице, а҆́гнца и҆ па́стырѧ неизрече́ннѡ ро́ждшаѧ! вои́стиннꙋ ты̀ є҆сѝ а҆́гг҃льскихъ чинѡ́въ превы́шшаѧ, ᲂу҆молѝ ѡ҆ на́съ бжⷭ҇твеннаго сн҃а твоего̀.

Конда́къ, гла́съ и҃:

Новоѧвле́ннѣй і҆кѡ́нѣ бцⷣы всецр҃и́цы предстоѧ́ще и҆ на ли́къ тоѧ̀ взира́юще, со ᲂу҆миле́нїемъ и҆ любо́вїю глаго́лемъ: низпослѝ, влⷣчце, цѣльбы̑ къ тебѣ̀ притека́ющымъ, и҆ пода́ждь ᲂу҆тѣше́нїе въ ско́рби сꙋ́щымъ, да воспрїе́мше млⷭ҇ть, бл҃года́рнѣ воззове́мъ тѝ: ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

І҆́косъ:

А҆́гг҃лъ предста́тель съ нб҃сѐ по́сланъ бы́сть, речѐ бцⷣѣ: ра́дꙋйсѧ, бл҃года́тнаѧ, гдⷭ҇ь съ тобо́ю! и҆ со бг҃овѣща́ннымъ гла́сомъ воплоща́ема зрѧ̀ гдⷭ҇а, возопѝ къ не́й такова̑ѧ: ра́дꙋйсѧ, глави́зно на́шегѡ сп҃се́нїѧ: ра́дꙋйсѧ, и҆сполне́нїе зижди́телева смотре́нїѧ. ра́дꙋйсѧ, ꙗ҆́кѡ тобо́ю бг҃ъ воплоти́сѧ: ра́дꙋйсѧ, ꙗ҆́кѡ неви́димый въ тебѣ̀ и҆з̾ѡбрази́сѧ. ра́дꙋйсѧ, млⷭ҇ть ми́ра внꙋ́трь прїи́мшаѧ: ра́дꙋйсѧ, ѡ҆дѣѧ́нїе пло́ти сло́вꙋ сотка́вшаѧ. ра́дꙋйсѧ, ᲂу҆мꙋ̀ непости́жнаѧ го́рнѧѧ сла́во: ра́дꙋйсѧ, сердца̀ ѡ҆живи́вшаѧ нбⷭ҇наѧ ма́нно. ра́дꙋйсѧ, ѕвѣздо̀, бл҃года́ти сїѧ́нїе: ра́дꙋйсѧ, и҆сто́чниче, живы́ѧ воды̀ и҆злїѧ́нїе. ра́дꙋйсѧ, бцⷣе, въ жена́хъ бл҃гослове́ннаѧ: ра́дꙋйсѧ, ро́ждшаѧ сп҃са, дв҃о нетлѣ́ннаѧ. ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Сподо́би ны̀, пребл҃га́ѧ бг҃ороди́тельнице, пресла́вное и҆́мѧ і҆и҃сово ᲂу҆мо́мъ и҆ се́рдцемъ призыва́ти и҆ се́ю мл҃твою ᲂу҆сладѝ го́речь печа́лей и҆ скорбе́й на́шихъ.

Притецы́те, всѝ здра́вїѧ и҆́щꙋщїи, ко бл҃госе́рдой дв҃ѣ мр҃і́и бцⷣѣ и҆ почерпи́те во́дꙋ жи́зни ѿ и҆сто́чника сп҃си́тельнагѡ.

Бл҃гослове́нъ є҆сѝ, гдⷭ҇и і҆и҃се хрⷭ҇тѐ, сп҃си́телю на́шъ, ꙗ҆́кѡ въ ча́съ крⷭ҇тныхъ страда́нїй твои́хъ бл҃говоли́лъ є҆сѝ порꙋчи́ти ны̀ покро́вꙋ пречⷭ҇тыѧ мт҃ре твоеѧ̀ и҆ ча́дами є҆ѧ̀ содѣ́лалъ є҆сѝ.

Ра́дꙋйсѧ, ѡ҆дꙋшевле́ннаѧ пала́то бжⷭ҇тва̀, є҆ди́на неискꙋсомꙋ́жнаѧ дв҃о мр҃і́е, во ᲂу҆тро́бꙋ двⷭ҇твеннꙋю бг҃а вмѣсти́вшаѧ. тѣ́мже съ гаврїи́ломъ а҆рха́гг҃ломъ вопїе́мъ тѝ: бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ѽ бг҃омт҃и всецр҃и́це, просвѣтѝ ны̀ позна́нїемъ сн҃а твоегѡ̀, да наслѣ́дствꙋюще црⷭ҇твїе нбⷭ҇ное, воспое́мъ гдⷭ҇а и҆ превозно́симъ є҆го̀ во всѧ̑ вѣ́ки.

Си́ла бж҃їѧ въ не́мощи соверша́етсѧ. тѣ́мже сподо́би ны̀, гпⷭ҇жѐ, всѧ̑ посыла́ємаѧ на́мъ со бл҃годаре́нїемъ терпѣ́ти и҆ за всѧ̑ сн҃а твоего̀ и҆ бг҃а на́шего сла́вити.

Оу҆мирѝ сердца̀ на̑ша и҆ въ тишинѣ̀ по́мыслѡвъ соблюдѝ, всест҃а́ѧ мт҃и дв҃о, да молѧ́щесѧ на всѧ́кое вре́мѧ, гдⷭ҇а бл҃гослови́мъ и҆ превозно́симъ во всѧ̑ вѣ́ки.

Во ᲂу҆спе́нїи мі́ра не ѡ҆ста́вила є҆сѝ, ѽ бг҃омт҃и, но при́снѡ съ на́ми пребыва́еши и҆ предста́тельствомъ твои́мъ на́съ сп҃са́еши.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ѽ цр҃и́це дв҃о, ра́ковыѧ ꙗ҆́звы преди́внаѧ цѣли́тельнице! ꙗ҆вѝ свою̀ млⷭ҇ть въ долгонедꙋ́жїи сꙋ́щымъ и҆ пода́ждь и҆̀мъ здра́вїе, да воспѣва́ютъ вы́нꙋ тѧ̀, всебл҃га́ѧ мт҃и бж҃їѧ.

Ви́ждь, влⷣчце, неможе́нїе на́ше и҆ прїимѝ смирє́ннаѧ молє́нїѧ на̑ша, бꙋ́ди на́мъ бл҃га́ѧ пꙋтеводи́тельница ко сп҃се́нїю и҆ наста́ви пꙋте́мъ тѣ́снымъ ше́ствовати къ жи́зни вѣ́чнѣй, да тѧ̀ непреста́ннѡ велича́емъ.

Ѽ мт҃и млⷭ҇рдїѧ и҆ ᲂу҆тѣше́нїѧ! ᲂу҆ще́дри ны̀ неизрече́нною твое́ю бл҃госты́нею и҆ бл҃гословѝ ны̀, те́плѣ тѧ̀ воспѣва́ющыѧ.

Всѝ ро́ди хрⷭ҇тїа́нстїи ᲂу҆бл҃жа́ютъ тѧ̀, бг҃ороди́тельнице пречⷭ҇таѧ, ꙗ҆́кѡ призрѣ̀ гдⷭ҇ь на смире́нїе твоѐ и҆ сотворѝ тѝ вели́чїе неисповѣди́мое.

Свѣти́ленъ:

Свѣ́телъ є҆́сть чтⷭ҇ны́й пра́здникъ і҆кѡ́ны твоеѧ̀, всецр҃и́це, є҆го́же въ торжествѣ̀ дꙋхо́внѣмъ бл҃голѣ́пнѡ соверша́юще, велича́емъ тѧ̀, свѣтоно́снаѧ ски́нїе хрⷭ҇та̀, цр҃ѧ̀ и҆ бг҃а на́шегѡ.