Канон Пресвятой Богородице пред иконой «Всех скорбящих Радость» (второй)

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Мо́рѧ жите́йскагѡ волна́ми потоплѧ́емь и҆ напа́стьми лю́тыми ѡ҆держи́мь, ко приста́нищꙋ ᲂу҆стреми́хсѧ невла́емомꙋ, покро́вꙋ твоемꙋ̀: тѣ́мже мѧ̀ и҆зба́ви, бцⷣе, ѿ лю́тыхъ.

Положи́ тѧ приста́нище сꙋ́щымъ въ бѣда́хъ, чⷭ҇таѧ, бг҃ъ, и҆́же ѿ тебє̀ бл҃говоли́вый воспрїѧ́ти пло́ть. тѣ́мже тѝ припа́дающе взыва́емъ: да́рꙋй по́мощь твою̀ рабѡ́мъ твои̑мъ.

Є҆ди́на бл҃гослове́ннаѧ и҆ бг҃ора́дованнаѧ, ꙗ҆́же ра́дость человѣ́кѡмъ ро́ждши неизрече́ннꙋю, печа̑ли ѿимѝ дꙋшѝ моеѧ̀, молю́сѧ, и҆ возвеселѝ се́рдце моѐ.

И҆зба́ви мѧ̀, пречⷭ҇таѧ, бѣсо́вскїѧ пре́лести, ѡ҆ѕлобле́нїѧ же и҆ вре́да и҆ и҆скꙋше́нїѧ, да вѣ́рою тѧ̀ сла́влю, сꙋ́щꙋю по бз҃ѣ застꙋ́пницꙋ и҆ покро́въ мо́й.

Ꙗ҆́же ненадѣ́ющихсѧ наде́жда, па́дшихъ и҆справле́нїе, печа́льныхъ ᲂу҆тѣше́нїе, свѣ́тъ бж҃е́ственный ро́ждшаѧ, дꙋ́шꙋ мою̀ сꙋ́щꙋю во тьмѣ̀ просвѣтѝ.

Ꙗ҆́кѡ гаврїи́лъ дв҃ѣ, прїиди́те, вѣ́рнїи, и҆ мы̀ вопїе́мъ бл҃гоговѣ́йнѡ: вои́стиннꙋ ᲂу҆кра́шена є҆сѝ, чⷭ҇таѧ, ро́ждшаѧ ра́дость: ра́дꙋйсѧ, бл҃гослове́ннаѧ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ты̀ є҆сѝ земноро́дныхъ ᲂу҆пова́нїе и҆ по́мощь и҆ ра́дость, покро́въ и҆ прибѣ́жище, влⷣчце мт҃и живота̀. тѣ́мже тѧ̀ мо́лимъ: твою̀ по́мощь низпослѝ всѣ̑мъ пою́щымъ тѧ̀, пречⷭ҇таѧ.

И҆́же тобо́ю и҆зба́вльшесѧ ѿ бѣ́дъ и҆ тебє̀ ра́ди ра́дость полꙋчи́вше, мт҃и безневѣ́стнаѧ, ꙗ҆́кѡ пода́тельницꙋ бл҃гꙋ́ю и҆ застꙋ́пницꙋ бл҃гохва́льнꙋ всѝ прославлѧ́емъ.

Бл҃гослове́нъ пло́дъ чре́ва твоегѡ̀, дв҃о бцⷣе, всѣ́хъ ра́досте: ра́дость бо всемꙋ̀ мі́рꙋ родила̀ є҆сѝ и҆ весе́лїе, разгонѧ́ющее печа́ль грѣхо́внꙋю, бг҃оневѣ́сто.

Тѧ̀ храни́тельницꙋ, прест҃а́ѧ, въ напа́стехъ стѧжа́хъ: тебѐ по бз҃ѣ мою̀ предста́тельницꙋ и҆́мамъ неꙋсы́пнꙋ: тебѐ да ѡ҆брѧ́щꙋ, пречⷭ҇таѧ, и҆збавлѧ́ющꙋю мѧ̀ въ де́нь сꙋда̀ всѧ́кагѡ ѡ҆сꙋжде́нїѧ.

Возвели́чи млⷭ҇ть и҆ застꙋпле́нїе, пречⷭ҇таѧ, твои́хъ мл҃твъ на мнѣ̀, и҆ и҆зба́ви мѧ̀ ѿ напа́стей и҆ скорбе́й, ра́дость мі́рꙋ ро́ждшаѧ.

Ꙗ҆́же ра́дости прїе́мшаѧ и҆сполне́нїе, прїимѝ ѿ на́съ ра̑бъ твои́хъ цѣлова́нїе а҆рха́гг҃лово: ра́дꙋйсѧ, ра́дость ро́ждшаѧ мі́рꙋ: ра́дꙋйсѧ, ста́мно, и҆з̾ неѧ́же ма́нна нбⷭ҇наѧ всѣ̑мъ вѣ̑рнымъ дарова́сѧ: ра́дꙋйсѧ, бл҃гослове́ннаѧ.

Сѣда́ленъ, гла́съ з҃:

Ра́дꙋйсѧ, сл҃нца ѻ҆́блаче мы́сленнагѡ и҆ неизрече́ннагѡ, влⷣчце: ра́дꙋйсѧ, всесвѣ́тлаѧ свѣщѐ: ра́дꙋйсѧ, свѣ́щниче всезлаты́й: тобо́ю, прест҃а́ѧ, є҆́ѵа и҆зба́висѧ ѿ клѧ́твы. но ꙗ҆́кѡ и҆мꙋ́щаѧ дерзнове́нїе ко бл҃гопремѣ́нномꙋ твоемꙋ̀ и҆ бг҃ꙋ, мт҃рнею мл҃твою, не ѡ҆скꙋдѣ́й ѡ҆ на́съ моли́тисѧ, пречⷭ҇таѧ.

Пѣ́снь д҃.

І҆рмо́съ: И҆з̾ горы̀ прїѡсѣне́нныѧ, сло́ве, прⷪ҇ро́къ є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Ѿ вели́кихъ и҆ разли́чныхъ прегрѣше́нїй же и҆ напа́стей всегда̀ сп҃са́еши мѧ̀: тѣ́мже тѧ̀ ꙗ҆́кѡ ро́ждшꙋю гдⷭ҇а молю̀, и҆ къ тебѣ̀ прибѣга́ю, непобѣди́мѣй по́мощи скорбѧ́щымъ: ѿ бѣ́дъ и҆зведѝ мольба́ми твои́ми.

Бж҃е мо́й милосе́рде, бж҃е чл҃вѣколю́бче, воли́телю млⷭ҇ти, ны́нѣ на мѧ̀ и҆злі́й твою̀ млⷭ҇ть: мо́литъ тѧ̀ наде́жда и҆ застꙋ́пница моѧ̀, мт҃и твоѧ̀.

Млⷭ҇ть твою̀ и҆ милосе́рдїе на рабы̑ твоѧ̑, чⷭ҇таѧ, прострѝ, при́снѡ молѧ́щыѧ тѧ̀, всѧ́кїѧ ско́рби и҆ мꙋ́ки и҆збавлѧ́ющи мл҃твами твои́ми.

Ра́дꙋйсѧ, кра́снаѧ пала́то сло́ва, дѣ́вственный черто́же цр҃ѧ̀: ра́дꙋйсѧ, похвало̀ всѣ́хъ безпло́тныхъ: ра́дꙋйсѧ, человѣ́кѡвъ ра́досте и҆ по́моще и҆ ᲂу҆пова́нїе.

Сп҃се́нїе пода́ждь мѝ дꙋше́вное и҆ тѣле́сное, пренепоро́чнаѧ, и҆ недꙋ́гꙋющемꙋ да́рꙋй цѣльбꙋ̀ и҆ лю́тыхъ и҆збавле́нїе.

Ѡ҆ содѣ́ѧнїихъ мои́хъ лꙋка́выхъ и҆ прегрѣше́нїихъ мно́гихъ кто̀ возмо́жетъ ᲂу҆моли́ти сꙋдїю̀, а҆́ще не ты̀, чⷭ҇таѧ, є҆ди́на согрѣша́ющихъ застꙋ́пнице;

Пѣ́снь є҃.

І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.

Добро́тꙋ тѧ̀ і҆а́кѡвлю возлюбѝ бг҃ъ, дв҃о ѻ҆трокови́це, ᲂу҆краша́ѧ всѧ̑ тобо́ю, ѡ҆мрачи́вшыѧсѧ престꙋпле́нїемъ пе́рвѣе.

Дꙋ́шꙋ мою̀ сохранѝ ꙗ҆́кѡ зѣ́ницꙋ ѻ҆́ка под̾ кро́вомъ крилꙋ̑ твоє́ю, бл҃га́ѧ пречⷭ҇таѧ, и҆ ѿ дꙋхѡ́въ лꙋка́выхъ томле́нїѧ и҆ мꙋче́нїѧ и҆зба́ви.

И҆зба́вльшесѧ тобо́ю прама́тернїѧ печа́ли, бг҃ороди́тельнице, ᲂу҆тѣше́нїѧ и҆спо́лнени бы́хомъ, весе́лїе всѣ̑мъ ро́ждшаѧ и҆ всемі́рнꙋю ра́дость: тѣ́мже, всепѣ́таѧ, твоѧ̑ пѣсносло́вцы ѿ бѣ́дъ твои́ми мл҃твами соблюдѝ.

Бл҃годари́мъ тѧ̀, и҆зба́вльшесѧ тобо́ю грѣхѡ́въ мно́гихъ и҆ не́мощей и҆ болѣ́зней и҆ недꙋ̑гъ лю́тыхъ, пречⷭ҇таѧ влⷣчце: наде́жда бо є҆сѝ тверда̀ твои̑мъ вѣ̑рнымъ рабѡ́мъ.

Съ бж҃е́ственнымъ соше́дшесѧ гаврїи́ломъ, возопїи́мъ бцⷣѣ вѣ́рнѡ: ра́дꙋйсѧ, дв҃о ст҃а́ѧ, бл҃года́тнаѧ, гдⷭ҇ь съ тобо́ю, и҆́же тебє̀ ра́ди потреби́въ печа́ль, подадѐ мі́рꙋ ра́дованїе.

Болѧ́щꙋю дꙋ́шꙋ мою̀ и҆сцѣлѝ, ро́ждшаѧ всѣ́хъ взе́млющаго недꙋ́ги, пречⷭ҇таѧ влⷣчце.

Пѣ́снь ѕ҃.

І҆рмо́съ: Содержи́ма мѧ̀ прїимѝ, чл҃вѣколю́бче, грѣхи̑ мно́гими, и҆ припа́дающа щедро́тамъ твои̑мъ, ꙗ҆́кѡ прⷪ҇ро́ка, гдⷭ҇и, и҆ сп҃си́ мѧ.

Въ нощѝ и҆ во днѝ, ꙗ҆́вѣ и҆ вта́й, под̾ тво́й прибѣга́емъ кро́въ, пречⷭ҇таѧ дв҃о, и҆̀же тѧ̀ вѣ́рнѡ славосло́вѧщїи.

Въ напа́стехъ застꙋ́пницꙋ тѧ̀ и҆́мамы тве́рдꙋ, въ ско́рбехъ крѣ́пкое сп҃се́нїе, поко́й въ печа́лехъ, въ бѣда́хъ по́мощь, приснодв҃о.

Добро́та честны́хъ ст҃ы́хъ а҆́гг҃лъ, ра́дованїе человѣ̑къ всѣ́хъ ты̀ є҆сѝ бцⷣе дв҃о: ты́ мѧ къ животꙋ̀ наста́ви.

Пала́та цр҃ѧ̀ сла́вы и҆ ѻ҆гнезра́чный была̀ є҆сѝ прⷭ҇то́лъ, дв҃о, херꙋві̑мъ превы́шши и҆ серафі̑мъ: тѣ́мже тѧ̀ всѧ́кое дыха́нїе сла́витъ, ꙗ҆́кѡ мт҃рь зижди́телѧ.

Ра́дꙋйсѧ, клещѐ ᲂу҆́глѧ бж҃е́ственнагѡ: ра́дꙋйсѧ, прⷪ҇ро́кѡвъ печа́ть и҆ а҆пⷭ҇лѡвъ похвало̀, пречⷭ҇таѧ бцⷣе, є҆ѧ́же ра́ди ѿ и҆стлѣ́нїѧ свободи́хомсѧ.

Бе́зднꙋ щедро́тъ ро́ждши, бцⷣе дв҃о, ско́рбныхъ житїѧ̀ дꙋ́шꙋ мою̀ сп҃сѝ, и҆ ра́дости дх҃о́вныѧ двє́ри ѿве́рзи мѝ: на тѧ́ бо є҆ди́нꙋ наде́ждꙋ возложи́хъ.

Конда́къ, гла́съ ѕ҃:

Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебє̀, влⷣчце: ты̀ на́мъ помозѝ: на тебѐ надѣ́емсѧ и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.

І҆́косъ:

Прострѝ дла̑ни твоѧ̑, и҆́миже всѣ́хъ влⷣкꙋ ꙗ҆́кѡ младе́нца прїѧ́ла є҆сѝ, за мно́жество бл҃гости: не ѡ҆ста́ви на́съ, всегда̀ надѣ́ющихсѧ на тѧ̀, бо́дренною твое́ю мл҃твою, и҆ неисче́тною просты́нею ᲂу҆ще́дри на́съ, и҆ пода́ждь дꙋша́мъ на́шымъ милосе́рдїе твоѐ, во вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ ѿ находѧ́щихъ на ны̀ бѣ́дъ и҆ ѕѡ́лъ: но ꙗ҆́кѡ и҆мꙋ́щи милосе́рдїѧ щедрѡ́ты, ᲂу҆скорѝ на мл҃твꙋ и҆ потщи́сѧ на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ, ра́дованною ного́ю ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Водвори́хомсѧ въ ве́черъ въ пла́чи печа́лей и҆ ча́ѧнїи ѕлы́хъ, но твои́мъ бг҃олѣ́пнымъ кро́вомъ, дв҃о, ѡ҆боже́ни бы́вше, ѡ҆брѣто́хомъ ра́дость заꙋ́тра: ты́ бо сп҃сла̀ є҆сѝ на́съ.

Ꙗ҆́кѡ бж҃е́ственное прибѣ́жище, покро́въ тво́й, влⷣчце, всѝ стѧжа́вше къ бг҃ꙋ, въ напа́стехъ и҆ гоне́нїихъ и҆ грѣсѣ́хъ къ тебѣ̀ прибѣга́емъ, и҆ тобо́ю и҆змѣне́нїе прїе́млемъ, пречⷭ҇таѧ.

Грѣ́шникѡвъ прибѣ́жище, низве́рженныхъ и҆справле́нїе ты̀ є҆сѝ, влⷣчце: сегѡ̀ ра́ди притека́ю къ покро́вꙋ твоемꙋ̀, сп҃си́ мѧ, бг҃оневѣ́сто.

Въ недоꙋмѣ́нїи и҆ печа́ли сы́й и҆ въ бѣда́хъ, пречⷭ҇таѧ, тѧ̀ призыва́ю те́плѣ ѿ се́рдца моегѡ̀: предварѝ и҆ и҆зба́ви мѧ̀, и҆ пода́ждь, чⷭ҇таѧ, мнѣ̀ ᲂу҆тѣше́нїе.

Бл҃гослове́ннаѧ дв҃о, ра́досте скорбѧ́щихъ всѣ́хъ вѣ́рныхъ, ѿ всѧ́кагѡ и҆скꙋше́нїѧ и҆ печа́ли и҆ ѕло́бы зави́дѧщихъ мнѣ̀ и҆з̾мѝ, и҆ ѿ грѣ̑хъ и҆ разли́чныхъ недꙋ̑гъ мѧ̀ и҆зба́ви.

Всѧ̀ є҆сѝ свѣтоно́сна, свѣ́тъ незаходи́мый, дв҃о, прїе́мши, и҆ просвѣща́ющи, чⷭ҇таѧ, вѣ́рою тебѣ̀ вопїю́щыѧ: бл҃гослове́нъ, пречⷭ҇таѧ, пло́дъ твоегѡ̀ чре́ва.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Всѧ̀ є҆сѝ чⷭ҇таѧ и҆ бж҃е́ственныѧ сла́вы и҆спо́лнена, бли́жнѧѧ моѧ̀, речѐ дх҃ъ бж҃їй, тѧ̀ провозвѣща́ѧ, пречⷭ҇таѧ. ю҆́же пѣ́сньми воспѣва́емъ, пою́ще: тебѣ̀ подоба́етъ ра́доватисѧ, бг҃а чл҃вѣ́ка ро́ждшей.

А҆́гг҃лѡвъ похвало̀ и҆ человѣ́кѡвъ сп҃се́нїе, и҆ спорꙋ́чница бꙋ́ди мѝ, мт҃и бж҃їѧ: ꙗ҆́кѡ да ѡ҆бращꙋ́сѧ и҆ прїимꙋ̀ разрѣше́нїе пре́жде согрѣше́нныхъ, въ вѣ́дѣнїи и҆ не въ вѣ́дѣнїи.

Тѧ̀ по бз҃ѣ ᲂу҆пова́нїе сп҃се́нїѧ въ напа́стехъ и҆мꙋ́ще вѣ́рнїи, взыва́емъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те є҆го̀ во вѣ́ки.

Прїимѝ пѣ́снь ѿ хꙋды́хъ ᲂу҆сте́нъ, дв҃о всепѣ́таѧ, вопїю́щихъ тѝ: ра́дꙋйсѧ, болѧ́щымъ тѣлесє́мъ врачевство̀ и҆ ѿча̑ѧннымъ дꙋша́мъ сп҃се́нїе.

Въ болѣ́знехъ и҆ напа́стехъ ѡ҆держи́мыѧ не пре́зри, бл҃га́ѧ: но мольбꙋ̀ хꙋдꙋ́ю ᲂу҆слы́шавши, свободѝ на́съ ѿ скорбе́й вели́кихъ, да вѣ́рнѡ твою̀ млⷭ҇ть и҆ застꙋпле́нїе, чⷭ҇таѧ, воспѣва́емъ.

Стоѧ́щихъ ᲂу҆твержде́нїе є҆сѝ и҆ па́дшихъ и҆справле́нїе, дв҃о: тѣ́мже мѧ̀ па́дшаго возста́ви, да тѧ̀ сла́влю бл҃гослове́ннꙋю и҆ ѡ҆бра́дованнꙋю.

Пѣ́снь ѳ҃.

І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ въ домꙋ̀ дв҃довѣ, ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Ра́дости на́мъ вѣ́чныѧ и҆ жи́зни ꙗ҆ви́ласѧ є҆сѝ преесте́ственнѣ, бг҃ороди́тельнице, хода́таица, чтⷭ҇аѧ, сп҃са всѣ́хъ ро́ждшаѧ, ѿ лица̀ земна́гѡ всѧ́кꙋ сле́зꙋ ꙗ҆́вѣ ѿе́мшаго и҆ всѣ̑мъ ра́дость пода́вшаго.

Ра́дость и҆ весе́лїе и҆ ра́дованїе бж҃е́ственное, дв҃о неискꙋсомꙋ́жнаѧ, на́мъ ᲂу҆мно́жисѧ бж҃їе: се́ бо, пла́чꙋщїисѧ лю́тѣ, ра́дꙋемсѧ мл҃твами твои́ми.

Под̾ твоѐ милосе́рдїе прибѣга́ющїи вѣ́рою и҆збавлѧ́ютсѧ ско́рбныхъ бѣ́дъ житїѧ̀: тѣ́мже и҆ а҆́зъ ко твоемꙋ̀ покро́вꙋ прибѣго́хъ, бцⷣе.

Ѱалмы̑ тѧ̀ воспѣва́емъ, бл҃года́тнаѧ, и҆ немо́лчнѡ, є҆́же ра́дꙋйсѧ, прино́симъ: ты́ бо и҆сточи́ла є҆сѝ всѣ̑мъ ра́дость.

И҆ска́пающаѧ бж҃е́ственнꙋю сла́дость, всѣ́хъ сла́дость ро́ждшаѧ, дꙋ́шꙋ мою̀ ᲂу҆сладѝ, ꙗ҆́домъ ѕмїи́нымъ ѡ҆горче́ннꙋю, ѿчꙋжда́ющи мѧ̀ го́рькагѡ вре́да всегда̀ хода́тайствомъ твои́мъ, предста́тельнице и҆ ра́досте вѣ́рныхъ, влⷣчце.

Бл҃гословѧ̀ бл҃гословлю́ тѧ, пречⷭ҇таѧ, и҆ велича́ю те́плѣ: бл҃гослови́ мѧ ᲂу҆̀бо твоего̀ пѣвца̀, и҆ всѧ́ческихъ нꙋ́ждныхъ и҆ печа́льныхъ и҆зба́ви, и҆ сохранѝ твои́ми дла́ньми непобѣди́ма.

Свѣти́ленъ.

Под̾ кро́въ тво́й, дв҃о гпⷭ҇жѐ, прибѣга́емъ всѝ ро́ди человѣ́честїи: просвѣти́ ны свѣ́томъ ржⷭ҇тва̀ твоегѡ̀ грѣ̑шныѧ рабы̑ твоѧ̑, молѧ́щыѧсѧ прилѣ́жнѡ, и҆ покланѧ́ющыѧсѧ тебѣ̀, и҆ просѧ́щыѧ ᲂу҆мире́нїѧ мі́рови и҆ дꙋша́мъ на́шымъ ве́лїѧ млⷭ҇ти.