Канон Пресвятой Богородице пред иконой «Всех скорбящих Радость» (первый)

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑ и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Кꙋ́ю тѝ досто́йнꙋю пѣ́снь принесе́тъ на́ше неможе́нїе; то́чїю ѡ҆бра́довательнꙋю, є҆́йже на́съ гаврїи́лъ та́йнѡ наꙋчи́лъ є҆́сть: ра́дꙋйсѧ, бцⷣе дв҃о, мт҃и неневѣ́стнаѧ.

Ра́дꙋйсѧ, бл҃года́ти и҆сто́чниче: ра́дꙋйсѧ, лѣ́ствице и҆ две́рь нбⷭ҇наѧ: ра́дꙋйсѧ, свѣ́щниче, и҆ ста́мно злата́ѧ и҆ горо̀ несѣко́маѧ, ꙗ҆́же жизнода́вца хрⷭ҇та̀ мі́рови ро́ждшаѧ.

Всеѧ̀ моеѧ̀ жи́зни предста́тельнице, ѿ бѣ́дъ мно́гихъ и҆зба́ви мѧ̀, да бл҃года́рственный гла́съ воспѣва́ю тѝ, бг҃оневѣ́сто пречⷭ҇таѧ, и҆ бꙋ́дꙋщїѧ мѧ̀ и҆схитѝ мꙋ́ки.

Ꙗ҆́же всѣ̑мъ ᲂу҆до́бь послꙋ́шнаѧ въ ско́рби, и҆ въ печа́ли помога́ющаѧ, бцⷣе бл҃га́ѧ, бл҃года́ть пода́ждь пѣ́ти тѧ̀ дерза́ющымъ, влⷣчце, скорбѧ́щихъ ра́досте.

Многобога́тнꙋю бл҃года́ть стѧжа́вши, влⷣчце, дерзнове́нною твое́ю мл҃твою пресла́внѡ и҆з̾ми́ мѧ ѿ напа́стей, ᲂу҆бо́гаго раба̀ твоего̀, скорбѧ́щихъ ра́досте.

Ꙗ҆́же є҆ди́на въ напа́стехъ и҆ ско́рбехъ защища́ющаѧ, под̾ кро́въ тво́й, пречⷭ҇таѧ, прибѣга́ющихъ те́плѣ, прїимѝ ꙗ҆́кѡ пребл҃га́ѧ, ꙗ҆̀же ѿ се́рдца молє́нїѧ.

Пѣ́снь г҃:

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дꙋхо́внѡ ᲂу҆твердѝ въ бж҃е́ственнѣй твое́й сла́вѣ, вѣнцє́въ сла́вы сподо́би.

Оу҆твержде́нїе бꙋ́ди и҆ прибѣ́жище и҆ покро́въ, дв҃о бг҃ороди́тельнице, вѣ́рою къ тебѣ̀ прибѣга́ющымъ и҆ бж҃їю тѧ̀ мт҃рь и҆сповѣ́дающымъ.

Крѣ́пость моѧ̀, и҆ ра́дость и҆ весе́лїе, и҆ стѣна̀ тве́рдаѧ, и҆ предста́тельница ты̀ є҆сѝ, всенепоро́чнаѧ, и҆скꙋше́нїй и҆ бѣ́дъ и҆збавлѧ́ющи мѧ̀.

Ми́лостивнымъ и҆ кро́ткимъ твои́мъ ѻ҆́комъ, бг҃ороди́тельнице, зрѧ́щи мѧ̀ во ѡ҆бстоѧ́нїи и҆ ско́рби ѡ҆держи́ма, вско́рѣ свободѝ: тѧ́ бо призыва́ю на по́мощь.

Кропи́ши и҆сцѣле́нїй стрꙋи̑ болѧ́щымъ, дв҃о, всю́дꙋ: тѧ́ бо и҆сто́чника показа̀ милосе́рдїѧ, влⷣчце, и҆́же млⷭ҇ти гдⷭ҇ь, и҆з̾ тебє̀ рожде́йсѧ па́че ᲂу҆ма̀.

И҆сто́чникъ млⷭ҇ти, подаѧ́й скорбѧ́щымъ ᲂу҆тѣше́нїе, ты̀ є҆сѝ: тѣ́мже, влⷣчце, и҆ мнѣ̀ мл҃твенныхъ твои́хъ во́дъ и҆сто́чникъ и҆сточѝ, и҆ ᲂу҆гасѝ страсте́й пе́щь.

Ѿча́ѧвсѧ по́мощи всѧ́кїѧ, къ тебѣ̀, пренепоро́чнаѧ, держа́внѣй храни́тельницѣ и҆ покро́вꙋ притеко́хъ: не ѿри́ни ᲂу҆̀бо менѐ ѿ бж҃е́ственнагѡ покро́ва твоегѡ̀.

Сѣда́ленъ, гла́съ з҃:

Ра́дꙋйсѧ, сл҃нца ѻ҆́блаче мы́сленнагѡ и҆ неизрече́ннагѡ, влⷣчце: ра́дꙋйсѧ, всесвѣ́тлаѧ свѣщѐ: ра́дꙋйсѧ, свѣ́щниче всезлаты́й: тобо́ю, прест҃а́ѧ, є҆́ѵа и҆зба́висѧ ѿ клѧ́твы. но ꙗ҆́кѡ и҆мꙋ́щаѧ дерзнове́нїе ко бл҃гопремѣ́нномꙋ твоемꙋ̀ и҆ бг҃ꙋ, мт҃рнею мл҃твою, не ѡ҆скꙋдѣ́й ѡ҆ на́съ моли́тисѧ, пречⷭ҇таѧ.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Наде́ждо ненаде́жныхъ, помо́щнице ни́щихъ, пла́чꙋщихъ ᲂу҆тѣше́нїе, согрѣша́ющихъ ѡ҆чище́нїе, рꙋководи́тельнице заблꙋ́ждшихъ, болѧ́щихъ цѣле́бнице и҆ и҆справле́нїе па́дающихъ, влⷣчце, сп҃сѝ рабы̑ твоѧ̑.

Не неприча́стни є҆смы̀, влⷣчце, твоегѡ̀ застꙋпле́нїѧ въ ско́рбехъ: тѣ́мже и҆ ны́нѣ на́мъ помозѝ вско́рѣ, лю́тѣ ѡ҆бꙋрева́ємымъ рꙋ́кꙋ простира́ющи, чⷭ҇таѧ: бꙋ́ди млⷭ҇тива болѣ́знемъ на́шымъ, мт҃и бж҃їѧ, ра́дость ско́рꙋю подаю́щи.

Всѧ̀ бл҃га́ѧ и҆ те́плаѧ застꙋ́пница сꙋ́щи грѣ́шникѡмъ и҆ смирє́ннымъ, бг҃ороди́тельнице пречⷭ҇таѧ влⷣчце, ѿ бѣ́дъ и҆ скорбе́й и҆ грѣхѡ́въ сп҃са́й рабы̑ твоѧ̑.

Пресла́внꙋю твою̀ мт҃рь, хрⷭ҇тѐ, прїимѝ молѧ́щꙋюсѧ ѡ҆ мі́рѣ, ми́лостивнѡ тебѣ̀ зовꙋ́щꙋю: сн҃е мо́й, прїимѝ мольбꙋ̀ мою̀ и҆ ᲂу҆ти́ши гнѣ́въ належа́щїй землѝ.

Кро́въ и҆ застꙋпле́нїе и҆ прибѣ́жище бꙋ́ди мѝ, дв҃о, рабꙋ̀ твоемꙋ̀, и҆ и҆зба́ви мѧ̀ ѿ безмѣ́рныхъ ѕѡ́лъ, воспѣва́ти тѧ̀, пречⷭ҇таѧ: сла́ва неизрече́нномꙋ ржⷭ҇твꙋ̀ твоемꙋ̀.

Наде́жда и҆ щи́тъ и҆ ᲂу҆твержде́нїе ты̀ мнѣ̀ є҆сѝ, бл҃га́ѧ, и҆ лю́тыхъ и҆збавле́нїе, и҆ просвѣще́нїе дꙋшѝ мое́й, и҆ хвала̀ и҆ стѣна̀ и҆ держа́ва.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Ты̀ крѣ́пость моѧ̀, ты̀ похвала̀ и҆ ра́дованїе и҆ храни́тельница мѝ є҆сѝ, и҆ застꙋпле́нїе и҆ прибѣ́жище, и҆ предста́тельница непобѣди́ма, прест҃а́ѧ бцⷣе дв҃о: тѣ́мже сп҃сѝ раба̀ твоего̀.

Сп҃си́ мѧ, влⷣчце, и҆з̾ глꙋбины̀ напа́стей и҆ скорбе́й, и҆ печа́лей и҆ страсте́й тѣле́сныхъ, и҆ въ тишинѣ̀ бж҃е́ственнѣй сохранѝ дꙋ́шꙋ мою̀.

Моли́твеннице нело́жнаѧ, ᲂу҆пова́нїе хрⷭ҇тїа́нъ, ѡ҆бра́дованнаѧ, прїимѝ мольбы̑ ѿ на́съ, прилѣ́жнѡ призыва́ющихъ и҆ молѧ́щихсѧ тебѣ̀.

Покро́въ мо́й є҆сѝ ты̀ и҆ при́сное хвале́нїе, ѽ влⷣчце бцⷣе: ника́коже бо презира́еши къ тебѣ̀ прибѣга́ющихъ.

До́мъ тѧ̀ сла́вы, го́рꙋ бж҃їю ст҃ꙋ́ю, чⷭ҇таѧ, невѣ́стꙋ, черто́гъ, хра́мъ ѡ҆сщ҃е́нїѧ, сн҃ъ бж҃їй, въ тѧ̀ всели́выйсѧ, и҆ ра́й сла́дости присносꙋ́щныѧ на́мъ содѣ́ла.

Стѣ́нꙋ неѡбори́мꙋ, чⷭ҇таѧ, мл҃твꙋ твою̀ стѧжа́вше, вопїе́мъ тѝ: ᲂу҆милосе́рдисѧ, ѽ влⷣчце, и҆ ви̑димыѧ и҆ неви̑димыѧ врагѝ проженѝ.

Пѣ́снь ѕ҃.

І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Болѧ́щихъ цѣли́тельницꙋ, па́дающихъ воста́нїе, согрѣша́ющихъ ѡ҆чище́нїе, бцⷣе, тебѐ молю̀, со слеза́ми припа́даю, и҆ зовꙋ́ ти: ꙗ҆́кѡ сильна̀, сама́ мѧ сп҃сѝ погиба́ющаго.

Ты̀ є҆сѝ стѣна̀ нерꙋши́ма, ты̀ є҆сѝ покро́въ тве́рдъ, бцⷣе бл҃га́ѧ, ты̀ є҆сѝ предста́тельница крѣпка̀ рабꙋ̀ твоемꙋ̀: сегѡ̀ ра́ди призыва́ю тѧ̀ при́снѡ, и҆ притека́ю къ покро́вꙋ твоемꙋ̀.

Мі́рови ра́дость сꙋ́щи, бцⷣе чⷭ҇таѧ, ра́дꙋйсѧ, тебѣ̀, дв҃о, зове́мъ со а҆́гг҃ломъ вѣ́рнѡ: твоеѧ̀ ра́дости сподо́би ны̀, и҆ печа́ль на́шꙋ разорѝ.

Сла́дость а҆́гг҃лѡвъ, скорбѧ́щихъ ра́дость, хрⷭ҇тїа́нъ предста́тельница ты̀ є҆сѝ, дв҃о мт҃и гдⷭ҇нѧ: застꙋпѝ на́съ, и҆ и҆зба́ви вѣ́чныхъ мꙋ́къ.

Въ де́нь печа́ли, є҆гда̀ и҆́мамъ тѣле́сныхъ соꙋ́зъ разрѣши́тисѧ, предста́ни мѝ, бг҃ороди́тельнице, и҆ ѡ҆бдержа́нїѧ бѣсо́вскагѡ и҆схитѝ.

При́зри, влⷣчце, на мѧ̀ смире́ннаго, и҆ па́че наде́жды сп҃си́ мѧ: ты́ бо є҆сѝ ᲂу҆пова́нїе и҆ покро́въ мѝ, жи́знь и҆ свѣ́тъ се́рдцꙋ моемꙋ̀, бцⷣе, и҆ ᲂу҆твержде́нїе.

Конда́къ, гла́съ ѕ҃:

Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебє̀, влⷣчце: ты̀ на́мъ помозѝ: на тебѐ надѣ́емсѧ и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.

І҆́косъ:

Прострѝ дла̑ни твоѧ̑, и҆́миже всѣ́хъ влⷣкꙋ ꙗ҆́кѡ младе́нца прїѧ́ла є҆сѝ, за мно́жество бл҃гости: не ѡ҆ста́ви на́съ, всегда̀ надѣ́ющихсѧ на тѧ̀, бо́дренною твое́ю мл҃твою, и҆ неисче́тною просты́нею ᲂу҆ще́дри на́съ, и҆ пода́ждь дꙋша́мъ на́шымъ милосе́рдїе твоѐ, во вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ ѿ находѧ́щихъ на ны̀ бѣ́дъ и҆ ѕѡ́лъ: но ꙗ҆́кѡ и҆мꙋ́щи милосе́рдїѧ щедрѡ́ты, ᲂу҆скорѝ на мл҃твꙋ и҆ потщи́сѧ на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Страстьмѝ престарѣ́всѧ и҆ неѡсла́бными напа́стьми и҆ скорбьмѝ, и҆ доспѣ́въ къ за́падѡмъ житїѧ̀ моегѡ̀, добродѣ́телемъ неприча́стенъ, лѣ́ностїю снѣде́нъ бы́въ, вопїю̀ тѝ, влⷣчце: ᲂу҆тѣше́нїе земны̑мъ, поми́лꙋй мѧ̀.

Ра́дꙋйсѧ, и҆сто́чниче присноживо́тныѧ воды̀: ра́дꙋйсѧ, раю̀ пи́щный: ра́дꙋйсѧ, стѣно̀ вѣ́рныхъ: ра́дꙋйсѧ, неискꙋсобра́чнаѧ: ра́дꙋйсѧ, всемі́рнаѧ ра́досте, є҆́юже на́мъ возсїѧ̀ хвали́мый ѻ҆тцє́въ бг҃ъ и҆ препросла́вленъ.

Всѣ̑мъ сꙋ́щымъ въ мі́рѣ застꙋ́пница є҆сѝ, и҆ стѣна̀ хрⷭ҇тїа́нѡмъ, и҆ прибѣ́жище непосты́дно, чⷭ҇таѧ мр҃і́е. тѣ́мже вѣ́рою тѧ̀ чтꙋ́ще, вопїе́мъ хрⷭ҇тꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.

Ѽ бл҃гоꙋтро́бїѧ твоегѡ̀, дв҃о чⷭ҇таѧ! рѣши́ши бо безмѣ̑рныѧ печа̑ли и҆ напа̑сти, призыва́ющымъ въ нꙋ́ждѣ и҆ ѡ҆бстоѧ́нїи: тѣ́мже и҆ ны́нѣ помозѝ, бл҃гослове́ннаѧ, тѧ̀ восхвалѧ́ющымъ.

Є҆ди́но ᲂу҆пова́нїе и҆ по́мощь вѣ̑рнымъ сꙋ́щи, бг҃ороди́тельнице, потщи́сѧ помощѝ рабѡ́мъ твои̑мъ, погрꙋжа́ємымъ скорбьмѝ, и҆ въ болѣ́знехъ сꙋ́щымъ, и҆ прибѣга́ющымъ къ тебѣ̀ съ любо́вїю дꙋшѝ.

Ра́дованїе бл҃года́рственное тебѣ̀ прино́симъ, мт҃и бж҃їѧ, ꙗ҆́кѡ вои́стиннꙋ тобо́ю и҆зба́влени всѧ́кагѡ ѕла́гѡ начина́нїѧ, и҆ согла́снѡ тебѣ̀ пое́мъ: бл҃гослове́на є҆сѝ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ра́дꙋйсѧ, прⷭ҇то́ле сла́вный бж҃їй: ра́дꙋйсѧ, вѣ́рныхъ стѣно̀, є҆́юже сꙋ́щымъ во тмѣ̀ возсїѧ̀ свѣ́тъ хрⷭ҇то́съ, тебѐ блажа́щымъ и҆ вопїю́щымъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Пое́мъ тѧ̀, пречⷭ҇таѧ и҆ мт҃и бж҃їѧ: и҆ кто̀ не сла́витъ тѧ̀ вои́стиннꙋ бл҃гꙋ́ю, сꙋ́щꙋю наде́ждꙋ дꙋ́шъ на́шихъ; тѣ́мже, пречⷭ҇таѧ, и҆ мою̀ мольбꙋ̀ прїимѝ.

Ты̀ є҆сѝ сп҃се́нїе всѣ́хъ человѣ́къ, ꙗ҆́же бг҃а ро́ждшаѧ неизрече́ннѡ: ты̀ є҆сѝ вѣ́рныхъ сп҃си́тельница, бцⷣе, и҆ слѣпы́хъ наста́вница, и҆ па́дающихъ и҆справле́нїе. тѣ́мже тѧ̀ восхвалѧ́юще, хрⷭ҇тꙋ̀ зове́мъ: бл҃гослови́те, всѧ̑ дѣла̀, гдⷭ҇а, по́йте и҆ превозноси́те є҆го̀ во всѧ̑ вѣ́ки.

Стрꙋи̑ и҆сцѣле́нїй на́мъ всегда̀, вѣ̑рнымъ, чⷭ҇таѧ, и҆сточа́еши: тѣ́мже незави́стнꙋю бл҃года́ть взе́млюще, воспѣва́емъ ржⷭ҇тво̀ твоѐ, чⷭ҇таѧ, и҆ превозно́симъ во всѧ̑ вѣ́ки.

На тѧ̀ возложи́хъ, влⷣчце, се́рдце и҆ дꙋ́шꙋ и҆ тѣ́ло: не и҆́мамъ бо и҆ны́ѧ наде́жды, ра́звѣ тебє̀, є҆́юже полꙋчꙋ̀ млⷭ҇ть. тѣ́мже пода́ждь мѝ бога́тꙋю твою̀ бл҃года́ть.

На мольбꙋ̀ мою̀ ны́нѣ ᲂу҆милосе́рдисѧ, и҆ ра́дость въ печа́ли мѣ́сто да́рꙋй мѝ, да пою́ тѧ, влⷣчце, и҆ вопїю̀ сн҃ꙋ твоемꙋ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ра́дꙋйсѧ, мр҃і́е, вели́кое всеѧ̀ тва́ри чꙋ́до: ра́дꙋйсѧ, дщѝ ᲂу҆́бѡ дв҃дова, гдⷭ҇нѧ же мт҃и: ра́дꙋйсѧ, пѣ́нїе гаврїи́лово: ра́дꙋйсѧ, прибѣ́жище и҆ ᲂу҆твержде́нїе и҆ по́мощь всѣ̑мъ, прест҃а́ѧ, сꙋ́щымъ на землѝ грѣ́шникѡмъ.

Ю҆́же и҆зво́лилъ є҆сѝ, влⷣко, прїимѝ ми́лостивнѡ моли́твенницꙋ мт҃рь твою̀ ѡ҆ на́съ, и҆ твоеѧ̀ бл҃гости всѧ́чєскаѧ и҆спо́лнѧтсѧ: да тѧ̀ всѝ ꙗ҆́кѡ бл҃годѣ́телѧ велича́емъ.

Ѽ дв҃о бл҃га́ѧ! ѽ мі́ра ра́досте и҆ прибѣ́жище! ѽ храни́лище вѣ́рныхъ и҆ и҆збавле́нїе скорбе́й! ты̀ предста́ни мѝ въ ча́съ сме́рти, и҆ и҆зба́ви ѿ бѣсѡ́въ, и҆́щꙋщихъ поглоти́ти мѧ̀.

Ты̀ є҆сѝ а҆́гг҃лѡвъ ра́дость, ты̀ є҆сѝ првⷣникѡвъ добро́та, ты̀ є҆сѝ вѣ́рныхъ наде́жда, ты̀ є҆сѝ соблюде́нїе на́ше: ты̀ є҆сѝ мо́стъ, къ жи́зни нестарѣ́ющейсѧ преводѧ́й вѣ́рою и҆ любо́вїю тѧ̀ велича́ющыѧ.

Ѽ мт҃и всѧ́ческихъ творца̀, всесвѣ́тлаѧ печа́льныхъ ᲂу҆тѣ́хо, ѡ҆скорблѧ́емыхъ предста́тельнице и҆ немощны́хъ застꙋ́пнице, сохрани́ мѧ, бл҃га́ѧ, ѿ бѣ́дъ и҆ прилѡ́гъ вра́жїихъ.

Є҆ди́на болѧ́щихъ посѣще́нїе, є҆ди́на па́дшихъ и҆справле́нїе, влⷣчце, є҆ди́на къ бг҃ꙋ рꙋководи́тельнице и҆ вхо́де, є҆ди́на хода́таице вѣ́чныхъ бл҃гъ, поми́лꙋй мѧ̀ є҆ди́наго, па́че всѣ́хъ согрѣши́вшаго.

Свѣти́ленъ.

Под̾ кро́въ тво́й, дв҃о гпⷭ҇жѐ, прибѣга́емъ всѝ ро́ди человѣ́честїи: просвѣти́ ны свѣ́томъ ржⷭ҇тва̀ твоегѡ̀ грѣ̑шныѧ рабы̑ твоѧ̑, молѧ́щыѧсѧ прилѣ́жнѡ, и҆ покланѧ́ющыѧсѧ тебѣ̀, и҆ просѧ́щыѧ ᲂу҆мире́нїѧ мі́рови и҆ дꙋша́мъ на́шымъ ве́лїѧ млⷭ҇ти.