Канон Пресвятой Богородице пред иконой «Табынская»

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ра́дости и҆спо́лнишасѧ всѝ концы̀ ᲂу҆ра́льскїѧ землѝ, прест҃а́ѧ дв҃о, во сп҃се́нїе бо на́ше і҆кѡ́нꙋ твою̀ ꙗ҆ви́ла є҆сѝ и҆ рекла̀ є҆сѝ: да потщи́тсѧ бра́тїѧ бг҃оспаса́емыѧ ѻ҆би́тели сеѧ̀ прїѧ́ти мѧ̀ во хра́мъ гдⷭ҇а моегѡ̀. на́съ же не ѡ҆ста́ви ᲂу҆бо́гихъ, и҆ да прїи́мемъ ѻ҆́бразъ тво́й ст҃ы́й въ хра́мы серде́цъ на́шихъ, вопїю́ще: ра́дꙋйсѧ, бл҃года́тнаѧ.

Во ѻ҆́нъ де́нь и҆́нокъ а҆мвро́сїй, мимоходѧ̀ и҆сто́чника, ᲂу҆слы́ша под̾ сѣ́нїю древе́съ глаго́лы твоѧ̑, бцⷣе, и҆ а҆́бїе ѡ҆брѣ́тъ на ве́лїемъ ка́мени і҆кѡ́нꙋ твою̀. на́съ же сподо́би сеѧ̀ ра́дости прича́стники бы́ти, и҆мꙋ́щихъ тѧ̀ пред̾ бг҃омъ хода́таицꙋ.

Оу҆диви́шасѧ бра́тїѧ вознесе́нскїѧ ѻ҆би́тели ꙗ҆вле́нїю твоемꙋ̀, прест҃а́ѧ дв҃о, и҆ со тща́нїемъ вкꙋ́пѣ собра́вшесѧ, послѣ́довахꙋ а҆мвро́сїю, и҆ ᲂу҆зрѣ́вше дре́вле пи́саннꙋю і҆кѡ́нꙋ твою̀, бцⷣе, съ ра́достїю воспѣ́ша ко гдⷭ҇ꙋ, ᲂу҆бл҃жа́юще тѧ̀, ꙗ҆́кѡ мт҃рь бж҃їю. мы́ же, то́жде творѧ́ще во бдѣ́нїи се́мъ, да ᲂу҆лꙋчи́мъ ѿ бг҃а млⷭ҇ть и҆ по́мощь твою̀, влⷣчце.

Ве́лїе чꙋ́до бы́сть во ѻ҆би́тели, є҆гда̀ заꙋ́тра і҆кѡ́на ѡ҆брѣ́тесѧ во вратѣ́хъ. и҆́ноцы же позна́вше ѡ҆ се́мъ во́лю твою̀, пречⷭ҇таѧ, ꙗ҆́кѡ врата́рницꙋ просла́виша тѧ̀ и҆ хра́мъ здѣ̀ созда́ша. на́съ же, ꙗ҆́кѡ ю҆ро́дивыхъ дѣ́въ, не ѿри́ни, да ѡ҆брѧ́щемсѧ во вратѣ́хъ раѧ̀ вожделѣ́ннагѡ, вы́нꙋ пою́ще гдⷭ҇еви: а҆ллилꙋ́їа.

Сла́ва: Вкꙋ́пѣ собра́шасѧ бра́тїѧ, пѣ́снь тѝ воспѣ́ша и҆ повѣ́даша всѧ̑ бы̑вшаѧ воево́дѣ ᲂу҆фи́мскомꙋ и҆ а҆рхїере́ю гра́да каза́ни. то́й же, позна́въ чꙋдеса̀ твоѧ̑, влⷣчце, повелѣ̀ чти́ти тѧ̀ собо́рнѣ. та́кѡ и҆ мы̀ ны́нѣ весели́мсѧ бжⷭ҇твеннѣ и҆ въ ра́дости воспѣва́емъ тѧ̀.

И҆ ны́нѣ: Па́че зла́та всѧ́кагѡ блиста́ющаѧ и҆ ᲂу҆́тра со́лнечнагѡ свѣтлѣ́йшаѧ, ра́дꙋйсѧ, врата́рнице, жили́ще хрⷭ҇то́во, ра́дꙋйсѧ, ѻ҆диги́трїе, ра́дꙋйсѧ, дв҃о, ра́дꙋйсѧ, невѣ́сто неневѣ́стнаѧ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Бꙋ́рѧ крамо́лы разорѝ пꙋ́стынь твою̀, бг҃ороди́тельнице, но ты̀, чⷭ҇таѧ, сподви́гла є҆сѝ чтⷭ҇на́го и҆гꙋ́мена є҆ѵфи́мїа, да ᲂу҆крѣпи́тъ бра́тїю на мꙋ̑ки смє́ртныѧ. на́мъ же стоѧ́нїе пꙋ́стыни сеѧ̀ ѻ҆́бразъ бы́сть дꙋ́ха крѣ́пости и҆ терпѣ́нїѧ, да воздви́гнемъ гла́сы своѧ̑, пою́ще чи́стꙋю вѣ́рꙋ правосла́внꙋю.

Е҆гда̀ ста́рецъ і҆ѡ́на возжела̀ па́ки созда́ти ѻ҆би́тель твою̀, бцⷣе, и҆спросѝ ᲂу҆ царѧ̀ моско́вскагѡ повелѣ́нїе на сїѐ, и҆ къ трꙋдѡ́мъ трꙋды̀ приложи́въ, воздви́же тебѣ̀, пречⷭ҇таѧ, пꙋ́стынь, да во вѣ́ки просла́витсѧ и҆́мѧ твоѐ въ заблꙋ́ждшихъ ꙗ҆зы́цѣхъ и҆ да почтꙋ́тъ бг҃а и҆́стиннаго. на́съ же въ любвѝ твое́й ᲂу҆твердѝ, мт҃и и҆́стины.

Гора̀ разве́рзе ᲂу҆тро́бꙋ свою̀ мл҃твами твои́ми, чⷭ҇таѧ, и҆ а҆́бїе стрꙋи̑ и҆сто́чникъ сла́ныхъ во́дъ лю́демъ твои̑мъ и҆сточѝ, а҆́ки ма́ннꙋ дре́вле въ пꙋсты́ни сїна́йстѣй. на́мъ же, пречⷭ҇таѧ, низпослѝ ма́ннꙋ чꙋде́съ твои́хъ, да не вза́лчемъ во вѣ́ки.

Лю́дїе ѻ҆стро́га солова́рнагѡ зрѧ́ще таковꙋ́ю млⷭ҇ть твою̀, воздвиго́ша і҆кѡ́нѣ твое́й цр҃ковь бж҃їю, да ст҃ы́хъ чи́ни че́стнѡ тѝ послꙋ́жатъ и҆ мїрсті́и концы̀ покло́нѧтсѧ. на́съ же сподо́би досто́йнѡ ᲂу҆бл҃жи́ти тѧ̀, ꙗ҆́кѡ нбⷭ҇нꙋю хода́таицꙋ и҆ воспѣва́ти пѣ́снь твоеѧ̀ ст҃ы́ни ꙗ҆вле́нїю.

Сла́ва: Вѣ́дꙋщи, бл҃га́ѧ мт҃и, ꙗ҆́кѡ ѻ҆би́тель разоре́на и҆́мать бы́ти вконе́цъ, и҆звѣстѝ бра́тїи ѡ҆ се́мъ, ті́и же, любо́вїю бж҃їею ѡ҆крилѧ́еми, восхотѣ́ша вѣнцы̀ мч҃нчєскїѧ прїѧ́ти. и҆ на́съ сподо́би, пречⷭ҇таѧ, вѣнцы̀ нбⷭ҇ныѧ ᲂу҆лꙋчи́ти.

И҆ ны́нѣ: Дне́сь торжествꙋ́етъ нбⷭ҇ное во́инство и҆́нокѡвъ пꙋ́стыни и҆ похвалѧ́етъ златꙋ́ю тѧ̀ ста́мнꙋ, и҆ же́злъ, и҆ трапе́зꙋ, пречⷭ҇таѧ дв҃о. да гла́съ и҆́хъ, ѻ҆диги́трїе, є҆́же ра́дꙋйсѧ, тебѣ̀ со а҆́гг҃лы вкꙋ́пѣ вопїе́тъ.

Сѣда́ленъ, гла́съ и҃:

И҆дѣ́же прославлѧ́етсѧ ст҃о́е и҆́мѧ ѡ҆бра́дованныѧ бцⷣы, та́мѡ всѧ́ческихъ бл҃ги́хъ и҆сто́чницы пролива́ютсѧ. почти́мъ же, лю́дїе, въ чистотѣ̀ і҆кѡ́нꙋ дв҃ы бцⷣы и҆ тоѧ̀ бжⷭ҇твеннаго сн҃а, хрⷭ҇та̀ бг҃а на́шего, и҆ лобыза́имъ и҆ прославлѧ́емъ ю҆̀ со стра́хомъ и҆ тре́петомъ, зовꙋ́ще: ра́дꙋйсѧ, млⷭ҇ти сокро́вище многоцѣ́нное.

Сла́ва, и҆ ны́нѣ: Ты̀ є҆сѝ похвала̀ стрⷭ҇тоте́рпцєвъ, ты̀ є҆сѝ наде́жда прпⷣбныхъ, ты̀ є҆сѝ ᲂу҆тѣше́нїе всегѡ̀ мі́ра, и҆ на тѧ̀ сп҃се́нїе на́ше возложи́хомъ всѝ. ѡ҆дождѝ грѣ̑шнымъ рабѡ́мъ твои̑мъ дꙋшесп҃си́тєльныѧ твоѧ̑ млⷭ҇ти.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

По вре́мени ѻ҆́бразъ тво́й табы́нскїй па́ки во тьмѣ̀ возсїѧ̀, ве́черъ во ᲂу҆́тро восхо́да зарѝ претворѝ. ны́нѣ же на́шѧ мл҃твы прїимѝ, чтⷭ҇нѣ́йшаѧ, и҆ ст҃ꙋ́ю і҆кѡ́нꙋ твою̀ на́мъ па́ки ꙗ҆вѝ, приснобл҃же́ннаѧ.

Си́лою вра́жїею ѡ҆жесточе́ни а҆га́рѧне бы́вше, воста́ша на сла́вꙋ гдⷭ҇ню и҆ дв҃ы бжⷭ҇твенный ли́къ ᲂу҆ѧзви́ша. ты́ же, влⷣчце, ѻ҆́чный мра́къ наложи́вши, си́мъ просвѣти́ла є҆сѝ нечести́выхъ люде́й. тѣ́мже, грѣхо́внꙋю мглꙋ̀ потреблѧ́ющи, сподо́би и҆ на́съ пѣ́ти сла́вꙋ пречⷭ҇тагѡ ѻ҆́браза твоегѡ̀ второ́мꙋ ꙗ҆вле́нїю.

Хва́лимъ, бл҃гослови́мъ млⷭ҇ти твоѧ̑, бцⷣе, ꙗ҆́кѡ прозрѣ́нїе да́рꙋеши нечести́вомꙋ ѻ҆́трокꙋ. се́й, покаѧ́нїемъ и҆́стовымъ ꙗ҆́кѡ са́ѵлъ прозрѣ́въ, и҆́де во слѣ́дъ і҆кѡ́ны твоеѧ̀. на́съ же, грѣ́шныхъ, во срѣ́тенїе твоѐ прїимѝ и҆ къ бг҃ꙋ бл҃гоꙋтро́бномꙋ молє́нїѧ принесѝ, пою́щихъ тѧ̀ во всѧ̑ вѣ́ки.

Вои́стиннꙋ и҆сповѣ́дꙋемъ, ꙗ҆́кѡ ты̀, є҆ли̑ка хо́щеши, всѧ̑ ᲂу҆ сн҃а своегѡ̀ и҆спроси́ти мо́жеши, мт҃и бо є҆сѝ є҆гѡ̀, тѣ́мже мл҃твами твои́ми и҆ проще́нїе а҆га́рѧнѡмъ ᲂу҆ бг҃а и҆спроси́ла є҆сѝ. на́съ же, въ горды́ни и҆ за́висти сꙋ́щихъ, въ покаѧ́нїи прїимѝ и҆ въ ра́зꙋмъ и҆́стины призовѝ.

Сла́ва: Лю́дїе бж҃їи вельмѝ чꙋдѧ́хꙋсѧ ꙗ҆вле́ннѣй і҆кѡ́нѣ твое́й, влⷣчце, и҆ ꙗ҆́кѡ бг҃оѻте́цъ дв҃дъ, скака́ше и҆гра́ѧ, та́кожде и҆ ті́и, въ ра́дости ликꙋ́юще, ѻ҆́бразъ застꙋ́пницы съ че́стїю и҆ пѣ́нїемъ въ ве́сь бг҃оѧвле́нскꙋю принесо́ша. на́съ же, собра́вшихсѧ въ пра́здникъ се́й, дв҃о пречⷭ҇таѧ, бл҃гословѝ.

И҆ ны́нѣ: Недовѣ́домаѧ глꙋбино̀, высото̀ неизслѣ́димаѧ, рѣко̀ неисчерпа́емаѧ, цѣле́бнꙋю во́дꙋ точа́щаѧ, слѣпы̑мъ бо зрѣ́нїе дае́ши, глꙋхи̑мъ слы́шанїе, хромы̑мъ и҆ разсла́блєннымъ хожде́нїе и҆ всѣ̑мъ, сꙋ́щымъ въ недꙋ́зѣхъ, безмѣ́рное и҆сцѣле́нїе.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Ве́сь табы́нскаѧ ве́лїимъ ликова́нїемъ и҆спо́лнисѧ, є҆гда̀ і҆кѡ́нꙋ ѡ҆бра́дованныѧ ѡ҆брѣ́те и҆ напо́лнисѧ хра́мъ гдⷭ҇ень сла́вы є҆ѧ̀, прише́дшїи же ꙗ҆зы́цы возда́ша хвалꙋ̀ гдⷭ҇ꙋ и҆ пречⷭ҇тѣй роди́тельнице. на́съ же ѡ҆бра́дꙋй, бл҃га́ѧ, бл҃гоче́стнѡ воспѣва́ющихъ тѧ̀.

А҆га́рѧне восклица́хꙋ и҆ вельмѝ поѧ́хꙋ: вели́къ бг҃ъ хрⷭ҇тїа́нскїй, и҆ и҆́стины позна́нїе сни́де на є҆ди́наго ѿ ни́хъ, и҆́же, прїе́мъ вѣ́рꙋ правосла́внꙋю, мно́жицею потрꙋди́сѧ во сп҃се́нїе своѐ. на́съ же сподо́би по́двигомъ до́брымъ тече́нїе соверши́ти и҆ вѣ́чнагѡ живота̀ дости́гнꙋти.

Басꙋрма̑нъ вели́кое мно́жество ѡ҆полчи́шасѧ на табы́нскꙋю ве́сь. лю́дїе же бж҃їи, наде́ждꙋ на по́мощь твою̀ возложи́вше, проти́вꙋ сꙋпоста́тѡвъ и҆до́ша и҆ на мѣ́стѣ ꙗ҆вле́нїѧ ѻ҆́браза твоегѡ̀ си́лꙋ вра́жїю ѡ҆долѣ́ша, тѣ́мже и҆ въ па́мѧть застꙋпле́нїѧ твоегѡ̀, бцⷣе, сотвори́ша крⷭ҇тохожде́нїе и҆ і҆кѡ́ны чꙋдотво́рныѧ водрꙋже́нїе.

Е҆гда̀ ᲂу҆со́льстїи лю́дїе і҆кѡ́нꙋ твою̀ въ хра́мъ сво́й принесо́ша, ты̀, пречⷭ҇таѧ мт҃и, хотѣ́нїю и҆́хъ воспрети́ла є҆сѝ и҆ па́ки въ табы́нстѣмъ хра́мѣ ѡ҆брѣла́сѧ є҆сѝ. возвратѝ и҆ на́съ, вла́ющихсѧ по распꙋ́тїємъ мі́ра сегѡ̀, на пꙋ́ть и҆́стины, ст҃а́ѧ ѻ҆диги́трїе, и҆ црⷭ҇твїѧ нбⷭ҇нагѡ дости́гнꙋти сподо́би.

Сла́ва: Сїѧ́нїе бл҃года́ти чꙋ́дное бы́сть по все́й табы́нстѣй землѝ, ꙗ҆́кѡ созда́ша хрⷭ҇толюби́вїи лю́дїе и҆з̾ ка́мене цр҃ковь твою̀ и҆ воззва́ша всѧ̑ ѡ҆крє́стныѧ вє́си на восхвале́нїе чꙋде́съ твои́хъ. на́съ же, прише́дшихъ на торжество̀ сїѐ, прїимѝ и҆ пра́здника ра́ди дꙋ́шы возвеселѝ.

И҆ ны́нѣ: Ка́ѧ тѝ є҆́сть досто́йнаѧ похвала̀, сїю́ ли на́ше принесе́тъ коне́чное неможе́нїе; ꙗ҆́кѡ ꙗ҆вле́нїемъ пречⷭ҇тыѧ твоеѧ̀ і҆кѡ́ны, свѣтоза́рное на́мъ возсїѧ̀ со́лнце, пресла́вныхъ чꙋде́съ лꙋчы̀ и҆спꙋска́ѧ и҆ тьмы̀ лю́тыхъ ѡ҆бстоѧ́нїй ѿгонѧ́ѧ сщ҃е́нными твои́ми, влⷣчце, предста́тельствы.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечтⷭ҇но́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Зно́й и҆ бездо́ждїе бы́сть ᲂу҆фи́мстѣй землѝ, но тще́тнѡ молѧ́хꙋсѧ вѣ́рнїи, и҆злїѧ́сѧ бо гнѣ́въ гдⷭ҇ень за беззакѡ́нїѧ, ѻ҆ба́че і҆кѡ́на твоѧ̀, пребл҃га́ѧ, принесѐ ѡ҆дожде́нїе ги́бнꙋщымъ ѕла́кѡмъ. на́шѧ же и҆зсо́хшыѧ дꙋ́шы ѡ҆дождѝ росо́ю бл҃года́ти твоеѧ̀, да произрасти́мъ кла́сы добродѣ́телей и҆ сп҃се́нїе ᲂу҆́зримъ.

Е҆гда̀ бы́сть мо́ръ сме́ртный во всѣ́хъ ᲂу҆дѣ́лѣхъ на́шихъ, лю́дїе гра́да стерлитама́ка наде́ждꙋ на тѧ̀, влⷣчце, возложи́ша, и҆ по́мощь ѿ тебє̀ ᲂу҆лꙋчи́вше, въ па́мѧть ѡ҆ се́мъ на всѧ́ко лѣ́то хожде́нїе съ і҆кѡ́ною твое́ю ᲂу҆стро́иша, восхвалѧ́юще тѧ̀, пребл҃гослове́ннаѧ.

Та́же ѻ҆ренбꙋ́ргъ гра́дъ ѡ҆держи́мь бѣ̀ лю́тагѡ мо́ра наше́ствїемъ и҆ ве́лїѧ ско́рбь ѡ҆бы́де та́мѡ живꙋ́щихъ. ты́ же, пречⷭ҇таѧ, повелѣ́ла є҆сѝ ст҃и́телю а҆нтѡ́нїю прїѧ́ти і҆кѡ́нꙋ твою̀, и҆ є҆гда̀ сїѐ сотворѝ, болѣ̑зни смє́ртныѧ ѿстꙋпи́ша. мы́ же, чꙋдѧ́щесѧ чꙋдесѝ семꙋ̀, вопїе́мъ тѝ: покры́й и҆ на́съ чтⷭ҇ны́мъ твои́мъ ѡ҆мофо́ромъ.

Є҆гда̀ сла́ва пречⷭ҇тыѧ ᲂу҆мно́жисѧ, бы́сть повелѣ́нїе царе́во, во є҆́же почти́ти бг҃омт҃рь лѣ́тнымъ крⷭ҇тохожде́нїемъ во всѧ̑ концы̀ ᲂу҆ра́льскїѧ землѝ. та́кѡ и҆ мы̀ творѧ́ще, при́снѡ помина́емъ твоѧ̑ чꙋдеса̀, всебл҃га́ѧ.

Сла́ва: Мі́ра застꙋ́пнице, мт҃и всепѣ́таѧ, вѣ́рныхъ твои́хъ похвало̀! не ѡ҆ста́ви на́съ си́рыхъ и҆ ᲂу҆бо́гихъ рабѡ́въ твои́хъ, но при́снѡ пребꙋ́ди съ на́ми.

И҆ ны́нѣ: Ра́дꙋйсѧ, цр҃и́це, люде́й правосла́вныхъ и҆ во́инствъ хрⷭ҇толюби́выхъ сла́во, покро́ве и҆ прибѣ́жище. ра́дꙋйсѧ, чꙋ́до чꙋде́съ, ѻ҆диги́трїе на́ша, ве́сей и҆ градѡ́въ ᲂу҆твержде́нїе.

Конда́къ, гла́съ и҃:

Взбра́нной воево́дѣ ро́да хрⷭ҇тїа́нскагѡ и҆ страны̀ на́шеѧ и҆звѣ́стнѣй и҆зба́вительницѣ, хвалє́бныѧ пѣ̑сни принесе́мъ, вѣ́рнїи, дв҃ѣ, влⷣчцѣ бцⷣѣ. ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѿ всѧ́кихъ на́съ ско́рбныхъ ѡ҆бстоѧ́нїй свободѝ, да съ любо́вїю зове́мъ тѝ: ра́дꙋйсѧ, всегѡ̀ мі́ра наде́ждо и҆ ᲂу҆тѣше́нїе, похвало̀ табы́нскаѧ.

І҆́косъ:

Смы́слъ ѡ҆чи́стивше и҆ ᲂу҆́мъ, притеце́мъ къ бцⷣѣ, свѣ́тлѡ пѣ́сньми ᲂу҆бл҃жа́юще ю҆̀, и҆ пречтⷭ҇нꙋ́ю і҆кѡ́нꙋ є҆ѧ̀ табы́нскꙋю просла́вимъ и҆ почти́мъ, припа́дающе, поклони́мсѧ є҆́й, посрамлѧ́етъ бо не чтꙋ́щыѧ ю҆̀, и҆збавлѧ́етъ же ѿ вели́кихъ бѣ́дъ и҆ ѕѡ́лъ бл҃гонра̑вныѧ и҆ бг҃обоѧ́щыѧсѧ рабы̑ своѧ̑, зовꙋ́щыѧ: ра́дꙋйсѧ, похвало̀ табы́нскаѧ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Сла́ва табы́нскїѧ і҆кѡ́ны твоеѧ̀, пречⷭ҇таѧ, возсїѧ̀ въ верхнеꙋра́льстѣмъ гра́дѣ, тѣ́мже мно́жество люді́й, срѣта́юще і҆кѡ́нꙋ твою̀, преложи́ша невѣ́рїе въ позна́нїе и҆́стиннагѡ бг҃а и҆ въ па́мѧть ѡ҆ се́мъ ᲂу҆тверди́ша ка́мень ве́лїй на высо́цѣй горѣ̀. Наꙋчѝ и҆ на́съ, бг҃оневѣ́сто, па́мѧтовати чꙋдеса̀ твоѧ̑ и҆ воспѣва́ти препѣ́таго ѻ҆тцє́въ гдⷭ҇а и҆ бг҃а.

Ны́нѣ ра́дꙋетсѧ сиби́рскаѧ землѧ̀, достиго́ша бо ю҆̀ вели̑чїѧ твоѧ̑, бг҃омт҃и, ликꙋ́етъ челѧ́бинскъ гра́дъ, съ ни́мже гра́ды тюме́нь и҆ кꙋстана́й, прїе́млюще табы́нскꙋю і҆кѡ́нꙋ твою̀, пречⷭ҇таѧ, неѡскꙋ́дно бо дѣ́йство бл҃года́ти твоеѧ̀, є҆́юже соверша́еши вели̑каѧ и҆ пресла̑внаѧ чꙋдеса̀ во сп҃се́нїе всѣ́хъ и҆ просвѣще́нїе.

Гра́дъ ᲂу҆ра́льскъ є҆реті́ческимъ ѕловѣ́рїемъ ѡ҆держи́мь бѣ̀, є҆гда́ же срѣ́те ѻ҆́бразъ тво́й, пречⷭ҇таѧ, кѡ́зни вра̑жїѧ а҆́бїе разрꙋши́шасѧ, лю́дїе же, ви́дѣвше млⷭ҇ти быва́ємыѧ, во слѣ́дъ тебѣ̀ теча́хꙋ и҆ вѣ́рꙋ правосла́внꙋю, ра́дꙋющесѧ, прославлѧ́хꙋ.

Е҆гда̀ хрⷭ҇толюби́вїи во́ини землѝ ѻ҆ренбꙋ́ргскїѧ и҆мѧ́хꙋ і҆кѡ́нꙋ твою̀ въ полцѣ̀ свое́мъ, тогда̀ ве́лїю крѣ́пость и҆ си́лꙋ ѡ҆брѣта́хꙋ на врагѝ своѧ̑, ѻ҆рды̑ бо невѣ̑рныѧ покори́ша и҆ де́рзѡсти и҆́хъ низложи́ша.

Сла́ва: Пово́лжстѣй землѝ то́чиши бл҃года́ть незави́стнꙋю, влⷣчце, прише́ствїемъ твои́мъ въ сара́товъ гра́дъ, і҆кѡ́на бо твоѧ̀ табы́нскаѧ де́монѡвъ пѡ́лчища ѿгонѧ́етъ и҆ дꙋ́шы заблꙋ́ждшихъ просвѣща́етъ. мы́ же любе́знѡ покланѧ́емсѧ и҆ лобыза́емъ ю҆̀ и҆ тѧ̀, бцⷣе, велича́емъ.

И҆ ны́нѣ: Всѧ́къ, прибѣга́ѧй къ покро́вꙋ твоемꙋ̀, чⷭ҇таѧ, не ѿхо́дитъ то́щь и҆ не ᲂу҆слы́шанъ, ты́ бо, ꙗ҆́кѡ мт҃и и҆́стиннагѡ живота̀, ѿча́ѧнныхъ ве́лїе прибѣ́жище и҆ ѡ҆бꙋрева́емыхъ ти́хое приста́нище. прїимѝ и҆ на́съ, призыва́ющихъ тѧ̀ на по́мощь, всепѣ́таѧ влⷣчце.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Е҆гда̀ лю́таѧ годи́на пости́же зе́млю рꙋ́сскꙋю и҆ ꙗ҆ви́шасѧ безбо́жнїи лю́дїе, тогда̀ бы́сть всемꙋ̀ ᲂу҆ра́льскомꙋ кра́ю ве́лїе возмꙋще́нїе: бж҃їѧ бо хра́мы разори́ша, ст҃ы́ни ѡ҆скверни́ша и҆ крⷭ҇тохождє́нїѧ съ і҆кѡ́ною ᲂу҆праздни́ша. мы́ же мо́лимъ тѧ̀, влⷣчце: и҆спросѝ ᲂу҆ сн҃а твоегѡ̀ грѣхѡ́въ ѻ҆тє́цъ на́шихъ ѡ҆ставле́нїе.

Печа́лꙋющисѧ ѡ҆ странѣ̀ на́шей рꙋ́сстѣй, влⷣчце, и҆ не хотѧ́щи і҆кѡ́ною твое́ю ѡ҆ста́вити нꙋ́ждею предѣ́лы землѝ є҆ѧ̀, ста́ла є҆сѝ недви́жнѡ ᲂу҆ а҆мꙋ́ра рѣкѝ, несо́маѧ гони́мыми хрⷭ҇толюби́выми вѡ́ины. вѣ́рнїи же лю́дїе со ст҃и́тєли меѳо́дїемъ и҆ не́сторомъ сле́знѡ молѧ́хꙋсѧ, да не ѡ҆ста́виши и҆̀хъ си́рыхъ во странѣ̀ кита́йстѣй, но да и҆́деши съ ни́ми, по́мощь свою̀ подаю́щи.

Оу҆диви́шасѧ кита́йстїи наро́ди, зрѧ́ще чꙋдеса̀ ѿ і҆кѡ́ны твоеѧ̀ быва́ємаѧ, тѣ́мже, во хра́мъ тво́й притека́юще, кр҃ще́нїе прїима́хꙋ. мы́ же, вѣ́дꙋще сїѐ, прославлѧ́емъ тѧ̀ и҆ сн҃а твоего̀, зовꙋ́ще: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

А҆встралі́йскаѧ землѧ̀ велича́етъ тѧ̀, пречⷭ҇таѧ, слы́шащи ѡ҆ ди́вныхъ чꙋдесѣ́хъ твои́хъ, ты́ бо, любо́вїю свое́ю всѣ́хъ ѡ҆б̾е́млющи и҆ бл҃года́тїю и҆сполнѧ́ющи, наꙋча́еши пѣ́ти: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Сла́ва: Всѧ́къ ꙗ҆зы́къ, творѧ́й беззако́нїе, лиша́емь ст҃ы́нь свои́хъ быва́етъ, та́кѡ сокры́та є҆́сть ѿ на́съ и҆ табы́нскаѧ і҆кѡ́на твоѧ̀, бг҃омт҃и, тайнодѣ́йствїемъ бж҃їимъ, мы́ же, грѣ́шнїи, въ покаѧ́нїи те́плѣ мо́лимъ тѧ̀: прїидѝ къ на́мъ си̑рымъ и҆ ᲂу҆тѣ́ши ны̀.

И҆ ны́нѣ: Оу҆́мъ а҆́гг҃льскїй и҆ человѣ́ческїй ᲂу҆жаса́етсѧ, влⷣчце, ка́кѡ млⷣнца безлѣ́тна ражда́еши, ка́кѡ сн҃а бж҃їѧ на рꙋкꙋ̀ твоє́ю но́сиши, є҆гѡ́же трепе́щꙋтъ гѡ́рнїѧ си̑лы, вопїю́ще: ст҃ъ, ст҃ъ, ст҃ъ є҆сѝ, бж҃е, бцⷣею поми́лꙋй на́съ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ме́рзость запꙋстѣ́нїѧ на мѣ́стѣ ст҃ѣ́мъ быва́ше, є҆гда̀ и҆сто́чницы сла́нїи во враче́бницꙋ преложе́ни бы́ша, ѻ҆ба́че ты̀, бцⷣе, невѣ́рствꙋющихъ чꙋде́снымъ твои́мъ страхова́нїемъ и҆згнала̀ є҆сѝ, да позна́ютъ вели̑чїѧ твоѧ̑, бг҃оневѣ́сто.

Возскорбѣ́ша хрⷭ҇толюби́вїи лю́дїе, є҆гда̀ беззакѡ́нницы хра́мъ, стоѧ́й на и҆сто́чницѣхъ сла́ныхъ, разори́ша и҆ мѣ́сто ст҃о́е въ запꙋстѣ́нїе приведо́ша, ѻ҆ба́че до конца̀ млⷭ҇ть ѿ рабѡ́въ твою̀ не ѿврати́ла є҆сѝ, влⷣчце, и҆ є҆ди́ножды въ лѣ́то стрꙋи̑ водны̑ѧ въ пеще́рѣ подае́ши, а҆́ки сле́зы точа́щи.

Сѐ вре́мѧ бл҃гопрїѧ́тное, сѐ ны́нѣ де́нь сп҃се́нїѧ наста̀ въ рꙋ́сстѣй землѝ! хра́мы бж҃їи ѿкрыва́хꙋсѧ, ѻ҆би́тєли ст҃ы̑ѧ возражда́хꙋсѧ и҆ на горѣ̀ табы́нстѣй хра́мъ чꙋ́дный пречⷭ҇тѣй бцⷣѣ воздви́гнꙋтъ бы́сть, и҆́ноцы же, здѣ̀ собра́вшесѧ, мл҃твꙋ ѡ҆ ми́рѣ возсыла́ютъ и҆ сла́вꙋ бг҃ꙋ воспѣва́ютъ, та́кѡ и҆зво́лившемꙋ.

Па́ки бл҃гослове́ннаѧ влⷣчца и҆злива́етъ чꙋдеса̀ на рабы̑ своѧ̑, ꙗ҆́кѡже пре́жде, та́кѡ и҆ ны́нѣ млⷭ҇тїю и҆сполнѧ́етъ, мѷроточе́нїе творѧ́щи ѿ ѻ҆́браза своегѡ̀, къ немꙋ́же притека́ютъ всѝ, чтꙋ́щїи ю҆̀, ᲂу҆лꙋча́юще полє́знаѧ ко сп҃се́нїю.

Сла́ва: Ве́лїѧ сла́ва твоѧ̀, бг҃омт҃и, на и҆сто́чницѣхъ сла́ныхъ ꙗ҆ви́сѧ, є҆гда̀ стека́хꙋсѧ лю́дїе возда́ти бл҃годаре́нїе тѝ: тѧ́жкѡ недꙋ́гꙋющихъ бо и҆сцѣлѧ́еши, ма́теремъ дѣтородѧ́щымъ ско́рое разрѣше́нїе да́рꙋеши, ѡ҆жесточе́ннѡ враждꙋ́ющымъ неча́ѧнное примире́нїе подае́ши, сопрꙋ́жныхъ въ є҆диномы́слїи и҆ любвѝ сохранѧ́еши, ра́дость бо ты̀ є҆сѝ и҆́стиннаѧ.

И҆ ны́нѣ: Прїиди́те, вѣ́рнїи, чи́стымъ се́рдцемъ возвели́чимъ пречⷭ҇тыѧ мт҃ре бг҃а на́шегѡ чꙋ́днꙋю і҆кѡ́нꙋ табы́нскꙋю и҆ бжⷭ҇твеннаго млⷣнца, сп҃са хрⷭ҇та̀, є҆го́же, ꙗ҆́кѡ ро́ждшаѧ, на рꙋкꙋ̀ носи́вши и҆ мт҃рнее дерзнове́нїе къ немꙋ̀ и҆мꙋ́щи, непреста́ннѡ мо́литъ за ны̀ и҆ подае́тъ рабѡ́мъ свои̑мъ бога̑тыѧ млⷭ҇ти.

Свѣти́ленъ:

Да почти́тсѧ всепѣ́таѧ мт҃рь бж҃їѧ, ра́йскихъ двере́й ѿверзе́нїе, всегѡ̀ мі́ра ѡ҆чище́нїе и҆ къ жи́зни нетлѣ́ннѣй возведе́нїе, ꙗ҆́кѡ жи́знь сꙋ́щꙋю ро́ждшаѧ, хрⷭ҇та̀ бг҃а на́шего, се́й бо є҆́сть прⷪ҇ро́кѡмъ глаго́лавый, томꙋ̀ поклони́мсѧ, ꙗ҆́кѡ бг҃ꙋ и҆ сп҃сꙋ дꙋ́шъ на́шихъ.