Канон Пресвятой Богородице пред иконой «Светописанная»

Пѣ́снь а҃.

І҆рмо́съ: Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ, ꙗ҆́кѡ просла́висѧ.

Ѿ на́съ, ѽ мт҃и, ча̑дъ твои́хъ, ли́къ ст҃ы́й тво́й ѡ҆бстоѧ́щихъ, любо́вь на́шꙋ и҆ бл҃года́рственнꙋю пѣ́снь ны́нѣ прїимѝ, и҆ и҆з̾ глꙋбины̀ дꙋшѝ приноси̑маѧ воздыха̑нїѧ мт҃рски ᲂу҆слы́ши, и҆ всѧ̑ на́шѧ печа̑ли ᲂу҆толѝ, вѣ́рнѡ тѧ̀ велича́ющихъ, сла́внѡ бо просла́вишасѧ твоѧ̑ чꙋдеса̀.

Всест҃о́е лицѐ твоѐ, дв҃о чⷭ҇таѧ, ꙗ҆́кѡ ра́й свѣ́телъ рабѡ́мъ твои̑мъ ꙗ҆ви́ла є҆сѝ, бл҃года́тїю и҆ жи́знїю ды́шꙋщее всѣ̑мъ взира́ющымъ, и҆ бл҃гоговѣ́йнѡ покланѧ́ющымсѧ є҆мꙋ̀ и҆ тѧ̀ воспѣва́ющымъ: сла́внѡ бо просла́вишасѧ твоѧ̑ чꙋдеса̀.

Го́рꙋ а҆ѳѡ́нскꙋю, вѣ́рнїи, ᲂу҆мы̑ ѡ҆б̾и́мемъ всѝ ᲂу҆се́рднѡ, и҆ ᲂу҆́зримъ та́инство бж҃їѧ мт҃ре, на́съ ра́ди бы́вшее: сла́внѡ бо просла́вишасѧ на горѣ̀ се́й ди̑внаѧ тоѧ̀ чꙋдеса̀.

Бцⷣе дв҃о, ра́досте и҆ ᲂу҆пова́нїе на́ше! ка́кѡ нб҃съ вы́шшаѧ, на землѝ птенцє́въ твои́хъ не ѡ҆ставлѧ́еши, но ꙗ҆́кѡ ко́кошъ согрѣва́еши и҆̀хъ и҆ нбⷭ҇ныѧ пи́щи насыща́еши; тѣ́мже воспѣва́емъ тѧ̀: сла́внѡ бо просла́вишасѧ на горѣ̀ се́й ди̑внаѧ твоѧ̑ чꙋдеса̀.

И҆́нъ.

І҆рмо́съ: То́йже.

Въ зе́млю ст҃ꙋ́ю, го́рꙋ сїю̀ бжⷭ҇твеннꙋю вни́ти мѧ̀ сподо́била є҆сѝ, бцⷣе, въ не́йже кро́тцыи, смире́ннїи и҆ чи́стїи се́рдцемъ то́кмѡ водворѧ́ютсѧ. тѣ́мже покаѧ́нїемъ мѧ̀ ѡ҆чи́стивъ, подража́телѧ тѣ́хъ сотворѝ, ꙗ҆́кѡ да съ ни́ми ра́дꙋѧсѧ непреста́ннѡ пою́ ти, сла́внѡ бо просла́вишасѧ на горѣ̀ се́й ди̑внаѧ твоѧ̑ чꙋдеса̀.

Ѿ мїрска́гѡ плѣ́на повелѣ́нїемъ твои́мъ, мт҃и бж҃їѧ, и҆зыдо́хъ. тѣ́мже вы́шнїѧ рабо́ты дѣ́лателѧ и҆скꙋ́сна, ѽ влⷣчце пречⷭ҇таѧ, и҆ менѐ неискꙋ́сна сꙋ́ща содѣ́лай, ꙗ҆́кѡ да то́ю просвѣща́ѧсѧ, ра́достнѡ и҆ а҆́зъ пою̀ твоѧ̑ чꙋдеса̀.

Сла́ва: Дх҃омъ ст҃ы́мъ ѿ ѻ҆ц҃а̀ и҆сходѧ́щимъ и҆ въ сн҃ѣ твое́мъ почива́ющимъ, ѽ влⷣчце бцⷣе, просвѣти́ мѧ и҆ ᲂу҆́мъ преста́вити къ вы̑шнимъ сподо́би, да горѣ̀ ᲂу҆мо́мъ вы́нꙋ водворѧ́ѧсѧ, непреста́ннѡ пою̀ твоѧ̑ чꙋдеса̀, сла́внѡ бо просла́вишасѧ.

И҆ ны́нѣ: Го́рдагѡ ѕмі́ѧ ржⷭ҇тво́мъ твои́мъ, всенепоро́чнаѧ, низложи́ла є҆сѝ: тѣ́мже си́лою и҆з̾ тебє̀ рожде́ннагѡ, и҆ менѐ безси́льнаго на врагѝ моѧ̑ ᲂу҆крѣпѝ, и҆ на по́двигъ зва́нїѧ твоегѡ̀ воста́ти сподо́би, да и҆ а҆́зъ воспою̀ ра́дꙋѧсѧ твоѧ̑ чꙋдеса̀, сла́внѡ бо просла́вишасѧ.

Пѣ́снь г҃.

І҆рмо́съ: Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.

Невмѣсти́маго бг҃а во ᲂу҆тро́бѣ свое́й несказа́ннѡ вмѣсти́вшаѧ, дв҃о, и҆ рꙋко́ю твое́ю носи́вшаѧ дла́нїю содержа́щаго всѧ̑, дне́сь и҆ рабы̑ твоѧ̑, под̾ кро́въ тво́й прите́кшыѧ, бг҃оно́сцы содѣ́лай и҆ сердца̀, і҆и҃са носѧ̑щаѧ, и҆̀мъ сотворѝ.

Бл҃гоꙋкраси́сѧ дне́сь ѻ҆би́тель рꙋ́сскаѧ и҆ прїимѝ бцⷣꙋ дв҃ꙋ всецр҃и́цꙋ. та́ бо во смире́нїи свое́мъ па́че со́лнца сїѧ́ющи къ на́мъ ꙗ҆ви́сѧ, ю҆́же а҆́гг҃ли незри́мѡ чⷭ҇тнѣ дорѷно́сѧтъ, да сердца̀, і҆и҃са носѧ̑щаѧ, рабѡ́мъ свои̑мъ сотвори́тъ.

Бжⷭ҇твеннꙋю сїю̀ і҆кѡ́нꙋ твою̀ ѻ҆тцы̀ всечⷭ҇тні́и бл҃гоговѣ́йнѣ прїѧ́ша, и҆ ра́дꙋющесѧ ᲂу҆дивлѧ́хꙋсѧ: ка́кѡ млⷭ҇ть всѣ̑мъ подаю́щаѧ, ми́лостыню ѿ раба̀ воспрїѧ́ла є҆сѝ; тѣ́мже мо́лимъ тѧ̀, пречⷭ҇таѧ, млⷭ҇ти твоеѧ̀ и҆ на́съ, ра̑бъ твои́хъ, не лишѝ, но сердца̀, і҆и҃са носѧ̑щаѧ, на́мъ сотворѝ.

Цвѣ́те прекра́сный, и҆ вонѧ̀ пи́щнаѧ, ѡ҆бл҃гоꙋха́еши, бцⷣе мр҃і́е, всѧ̑ тебѣ̀ ввѣрѧ́ющыѧсѧ, и҆ сп҃са́еши, и҆ ѿ страсте́й и҆сцѣлѧ́еши, и҆ сердца̀, і҆и҃са носѧ̑щаѧ, и҆̀мъ сотворѧ́еши.

И҆́нъ.

Невѣ́сто нетлѣ́ннаѧ, чⷭ҇таѧ и҆ сладча́йшаѧ, і҆и҃са сладча́йшагѡ мт҃и, дꙋ́шꙋ мою̀ те́мнꙋю просвѣтѝ, и҆ селе́нїе чⷭ҇тое гдⷭ҇ꙋ и҆ сн҃ꙋ твоемꙋ̀, ѽ пречⷭ҇таѧ, покажѝ, и҆ пода́ждь мѝ мл҃твꙋ молѧ́щемꙋсѧ тебѣ̀.

И҆́мѧ твоѐ, бл҃года́тнаѧ дв҃о, мр҃і́е всечⷭ҇таѧ, вселе́ннꙋю всю̀ ѡ҆зарѝ, вѣ́рныхъ сердца̀ просвѣща́ющи: тѣ́мже и҆ се́рдце моѐ страстьмѝ ѡ҆мраче́нное просвѣтѝ, и҆ всадѝ въ него̀ мл҃твꙋ молѧ́щемꙋсѧ тебѣ̀.

Сла́ва: Не пре́зри, гдⷭ҇и, ᲂу҆бо́гагѡ се́рдца моегѡ̀ двиза́нїѧ ма́лагѡ, ѡ҆скꙋдѣ́ бо крѣ́пость моѧ̀, млⷭ҇ть же твоѧ̀, бж҃е, ꙗ҆́коже са́мъ ре́клъ є҆сѝ, мл҃твами пречⷭ҇тыѧ твоеѧ̀ мт҃ре, да помо́жетъ мѝ и҆ пода́стъ мл҃твꙋ молѧ́щемꙋсѧ тебѣ̀.

И҆ ны́нѣ: Се́рдце гдⷭ҇еви прилѣпле́но, мт҃и бж҃їѧ, да́рꙋй мѝ, пречⷭ҇таѧ, рабꙋ̀ твоемꙋ̀, красотꙋ̀ въ не́мъ бжⷭ҇твеннꙋю написꙋ́ющи, и҆ мл҃твꙋ въ то́е вселѝ молѧ́щемꙋсѧ тебѣ̀.

Сѣда́ленъ, гла́съ д҃.

Оу҆диви́шасѧ, чⷭ҇таѧ, ли́цы а҆́гг҃льстїи, ка́кѡ прича́стница сꙋ́щи богатѣ́йшїѧ ра́дости нбⷭ҇ныѧ, во ю҆до́ли скорбе́й человѣ́ческихъ при́снѡ пребыва́еши, и҆ на всѧ́кїй во́пль мл҃твы мт҃рски ѿвѣща́еши и҆ бл҃года́ть раздае́ши неиждива́емꙋю: больны́хъ и҆сцѣлѧ́ющи и҆ печа́льныхъ ᲂу҆тѣша́ющи, дв҃о мт҃и гдⷭ҇нѧ, и҆ сокро́вище простра́ннѣйшее млⷭ҇ти бжⷭ҇твенныѧ;

Пѣ́снь д҃.

І҆рмо́съ: На землѝ твоѐ смире́нное ꙗ҆вле́нїе ᲂу҆зрѣ́вше, чи́ни нбⷭ҇нїи ᲂу҆диви́шасѧ, млⷭ҇рдїе твоѐ хва́лѧще, всѧ́ же тва́рь воспѣ́ тѧ ра́дꙋющисѧ, и҆ и҆спо́лнишасѧ всѧ̑ твоегѡ̀ хвале́нїѧ, чⷭ҇таѧ.

Сою́зомъ любвѐ собра́нїе свѣтоза́рное рабѡ́въ твои́хъ, бцⷣе, ѡ҆ гдⷭ҇ѣ свѧзꙋ́емо, ѕло́бꙋ всю̀ и҆ кова́рство ѕмі́євы си́лою твое́ю и҆ бл҃года́тїю мꙋжемꙋ́дреннѡ низлага́етъ. сегѡ̀ ра́ди при́снѡ тебѣ̀ вопїе́тъ: да и҆спо́лнѧтсѧ всѧ̑ твоегѡ̀ хвале́нїѧ, чⷭ҇таѧ!

Гора̀ сїѧ̀ ст҃а́ѧ нарече́сѧ, ꙗ҆́кѡ промышле́нїемъ и҆ чꙋдесы̀, и҆ посѣще́ньми твои́ми при́снѡ, дв҃о, красꙋ́етсѧ, въ не́йже до́блѣ всѝ подвиза́ющїисѧ стѧжа́ша тѧ̀ вѣ́рнꙋю хода́таицꙋ и҆ храни́тельницꙋ при́снꙋю во все́мъ житїѝ свое́мъ. да и҆спо́лнѧтсѧ всѧ̑ твоегѡ̀ хвале́нїѧ, чⷭ҇таѧ!

Ка́кѡ бре́ннаѧ рꙋка̀ пречⷭ҇тыхъ дла́ней твои́хъ не ᲂу҆жасе́сѧ; ка́кѡ прикоснꙋ́тисѧ къ ни́мъ не вострепета̀; ка́кѡ ми́лостыню въ ни́хъ положи́ти не ᲂу҆стыде́сѧ; вои́стиннꙋ, то́кмѡ повелѣ́нїемъ твои́мъ и҆ и҆зволе́нїемъ, чⷭ҇таѧ, да чꙋ́до но́вое ꙗ҆ви́тсѧ и҆ неизрече́нное, и҆ и҆спо́лнѧтсѧ всѧ̑ твоегѡ̀ хвале́нїѧ.

Ви́дѧ ста́рецъ вра́тарь ꙗ҆вле́нїе ди́вное, дв҃ꙋ чⷭ҇тꙋю, є҆ѧ́же и҆́мѧ ѿ младе́нства своегѡ̀ призыва́ше, ꙗ҆́кѡ младе́нецъ диви́сѧ бы́вшемꙋ, ѻ҆ба́че ꙗ҆́кѡ послꙋшли́въ сы́й, рꙋ́кꙋ прострѐ на подаѧ́нїе, вопїѧ̀: да и҆спо́лнѧтсѧ всѧ̑ твоегѡ̀ хвале́нїѧ, чⷭ҇таѧ!

И҆́нъ.

Ка́ѧ ско́рбь ѡ҆бдержи́тъ мѧ̀, є҆гда̀ въ де́нь стра́шный ѻ҆́ный ста́до твоѐ къ сн҃ꙋ своемꙋ̀ приведе́ши, глаго́лющи: сѐ, а҆́зъ, влⷣко, и҆ ча̑да моѧ̑ и҆̀хже да́лъ мѝ є҆сѝ, се́й же кто̀ є҆́сть не вѣ́мъ; но молю́ тѧ, влⷣчце: пощади́ мѧ, и҆ внегда̀ ѡ҆сꙋжда́тисѧ дꙋшѝ мое́й, млⷭ҇ть свою̀ помѧнѝ!

Ѽ каковы́ѧ сла́вы, ѻ҆каѧ́нный, са́мъ себѐ лиши́хъ! Ѽ каково̀ сыновство̀ и҆ наслѣ́дїе, стра́стный, са́мъ ѿ себє̀ ѿверго́хъ! ри́зꙋ свѣ́тлꙋ, ю҆́же свы́ше прїѧ́хъ, ѕлѣ̀ низри́нꙋхъ и҆ ѻ҆бѣ́ты всѧ̑ ѡ҆скверни́хъ! но молю̀: мт҃и бж҃їѧ, пощади́ мѧ, и҆ внегда̀ ѡ҆сꙋжда́тисѧ дꙋшѝ мое́й, млⷭ҇ть свою̀ помѧнѝ.

Сла́ва: Во смире́нїи вели́каго, кро́ткаго же въ пра́вдѣ гдⷭ҇а на сꙋди́щи стра́шнѣмъ, ѽ всемлⷭ҇тиваѧ, млⷭ҇тива и҆ млⷭ҇рда мѝ содѣ́лай. а҆́зъ бо ни є҆ди́ныѧ за́повѣди є҆гѡ̀ соблюдо́хъ, ни ѻ҆бѣ́тѡвъ сщ҃е́нныхъ и҆спра́вихъ. сегѡ̀ ра́ди молю́ тѧ, всечⷭ҇таѧ: внегда̀ ѡ҆сꙋжда́тисѧ дꙋшѝ мое́й, млⷭ҇ть свою̀ помѧнѝ.

И҆ ны́нѣ: Хра́мъ тѧ̀ ст҃ъ и҆ пречⷭ҇тъ ве́сь бг҃ъ сло́во содѣ́ла. сегѡ̀ ра́ди молю́ тѧ, всечⷭ҇таѧ: ꙗ҆́кѡ хра́мъ мѧ̀ вельмѝ ѡ҆скверне́нъ па́ки ве́сь томꙋ̀ ѡ҆бновѝ, помѧнѝ млⷭ҇ть свою̀, да и҆спо́лнюсѧ и҆ а҆́зъ твоегѡ̀ хвале́нїѧ, чⷭ҇таѧ.

Пѣ́снь є҃.

І҆рмо́съ: Свѣ́тъ тво́й незаходи́мый возсїѧ́й, влⷣчце, въ сердца́хъ вѣ́рнѡ пою́щихъ тѝ, ми́ръ подава́й на́мъ па́че ᲂу҆ма̀: и҆́мже ѿ но́щи невѣ́денїѧ ко дню̀ свѣ́томъ твои́мъ текꙋ́ще, славосло́вимъ тѧ̀, пренепоро́чнаѧ.

Со́лнце свѣ́тлое, во смире́нїи твое́мъ блиста́ющее, возсїѧ̀ і҆кѡ́на твоѧ̀, бг҃омт҃и всенепоро́чнаѧ, свѣ́тъ бжⷭ҇твенный съ любо́вїю къ тебѣ̀ притека́ющымъ и҆злива́ющаѧ и҆ согрѣва́ющаѧ сердца̀ къ подража́нїю бг҃олѣ́пнагѡ житїѧ̀ твоегѡ̀, вѣ́рнѡ призыва́ющихъ и҆́мѧ твоѐ, бл҃года́тнаѧ.

Ме́чь бжⷭ҇твенный, и҆́мѧ сладча́йшее сн҃а твоегѡ̀ і҆и҃са рабѡ́мъ твои̑мъ дарова́ла є҆сѝ, бцⷣе, и҆́мже на́глость бѣсо́вскаѧ посѣка́етсѧ и҆ свирѣ́пство пло́ти закала́етсѧ, и҆ побѣдоно́сцы до́блїи хрⷭ҇тѡ́вы ꙗ҆влѧ́ютсѧ, вѣ́рнѡ и҆менꙋ́ющїи и҆́мѧ тогѡ̀ бл҃года́тное.

Свѣ́тлѡ возсїѧ̀ и҆ вселе́ннꙋю всю̀ ѡ҆зарѝ и҆́мѧ твоѐ, бл҃года́тнаѧ дв҃о, мр҃і́е всепѣ́таѧ, сѣ́нь лꙋка́вствїѧ ᲂу҆праздни́вшее, ѡ҆мраче́нїе серде́цъ ѿе́млющее, вѣ́рнѡ призыва́ющихъ тѧ̀, бл҃года́тнаѧ.

Бжⷭ҇твенный тво́й вертогра́дъ, ꙗ҆́кѡ ра́й и҆з̾ѻби́лїемъ щедро́тъ твои́хъ присноцвѣтꙋ́щъ, па́ки дне́сь ѿ бг҃оподо́бныѧ добро́ты твоеѧ̀ ᲂу҆гобзи́ла є҆сѝ, и҆ млⷭ҇ти твоеѧ̀ неизглаго́ланныѧ и҆ смире́нїѧ а҆рѡма́тъ во ве́сь мі́ръ ѡ҆бл҃гоꙋха́ла є҆сѝ, да пое́тсѧ и҆́мѧ твоѐ, бл҃года́тнаѧ!

И҆́нъ.

Сѐ падо́хъ, влⷣчце, сѐ ᲂу҆мро́хъ. а҆́зъ бо врагѝ моѧ̑, ꙗ҆́коже ты̀ рекла̀ є҆сѝ, до конца̀ не и҆зби́хъ, во́ли всеѻкаѧ́нныѧ своеѧ̀ не пожро́хъ, пло́ти вселꙋка́выѧ не закла́хъ. но молю́ тѧ, всечⷭ҇таѧ, ре́вность бжⷭ҇твеннꙋю ма́нїемъ твои́мъ низпосли́ ми, да ꙗ҆́коже ѻ҆́гнь съ нб҃сѐ низходѧ́й, сꙋпоста́ты моѧ̑ всѧ̑ поѧ́стъ.

И҆́мѧ твоѐ, бл҃года́тнаѧ мр҃і́е, побѣди́тельно є҆́сть и҆ всеси́льно, и҆́мже а҆́гг҃льстїи ли́цы просвѣща́ютсѧ, де́мѡнскаѧ же стада̀ го́рцѣ попалѧ́ютсѧ, є҆́же призыва́ти и҆ менѐ, бцⷣе, наꙋчѝ, ꙗ҆́кѡ да ѻ҆́гнь ѿ негѡ̀ и҆сходѧ́й, сꙋпоста́ты моѧ̑ всѧ̑ поѧ́стъ.

Сла́ва: Оу҆дивлѧ́ютсѧ ли́цы а҆́гг҃льстїи, дв҃ꙋ пресвѣ́тлꙋю, свѣ́тъ ѿ свѣ́та на рꙋкꙋ̀ своє́ю носи́вшꙋю, и҆ свѣ́тъ ѿ ѻ҆ц҃а̀ и҆сходѧ́щїй, и҆ въ дꙋша́хъ вѣ́рныхъ мл҃твъ є҆ѧ̀ ра́ди возсїѧва́ющїй зрѧ́ще. сегѡ̀ ра́ди и҆ а҆́зъ ѻ҆каѧ́нный ѻ҆́бразꙋ твоемꙋ̀ припа́даѧ, ᲂу҆молѧ́ти дерза́ю: лꙋче́ю є҆ди́ною бжⷭ҇тва̀ трисїѧ́ннагѡ дꙋ́шꙋ мою̀ просвѣтѝ, да ѻ҆́гнь ѿ неѧ̀ и҆сходѧ́й, сꙋпоста́ты моѧ̑ всѧ̑ поѧ́стъ.

И҆ ны́нѣ: Чⷭ҇таѧ дв҃о, свѣ́та жили́ще, и҆́мже мі́ръ ве́сь просвѣти́ла є҆сѝ, дꙋ́шꙋ мою̀ грѣхмѝ потемнѣ́ннꙋю посѣще́нїемъ твои́мъ ѡ҆зарѝ, да свѣ́тъ и҆з̾ тебє̀ и҆сходѧ́й, сꙋпоста́ты моѧ̑ всѧ̑ поѧ́стъ.

Пѣ́снь ѕ҃.

І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й, бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀.

А҆́ще и҆ сокрыва́ешисѧ вма́лѣ, дв҃о, смире́нїѧ ра́ди вели́кагѡ твоегѡ̀, подо́бїе рабѡ́въ твои́хъ ᲂу҆бо́гое прїе́мши, но дх҃ъ всест҃ы́й въ сердца́хъ лю́бѧщихъ тѧ̀ ѡ҆ тебѣ̀ вопїе́тъ: сѐ мт҃и бг҃а ва́шегѡ! то́й ны́нѣ поклони́тесѧ, любо́вїю зовꙋ́щи: сла́ва тебѣ̀.

Чⷭ҇тно́е ѻ҆́браза твоегѡ̀ ꙗ҆вле́нїе зрѧ́ще, хва́лимъ вѣ́рнїи, словесы̀ тѧ̀ воспѣва́юще, чⷭ҇таѧ, ꙗ҆́кѡ цр҃и́цꙋ, и҆ воздыха̑нїи серде́чными бл҃жа́ще глаго́лемъ: мт҃и бж҃їѧ, сла́ва тебѣ̀.

Торжествꙋ́емъ всѝ, любо́вїю пою́ще тѧ̀, и҆ ꙗ҆вле́нїе твоегѡ̀ ѻ҆́браза сла́вѧще: не преста́й, дв҃о, мл҃твами твои́ми сп҃са́ти рабы̑ твоѧ̑ ѿ всѧ́кїѧ бѣды̀, вѣ́рнѡ призыва́ющыѧ тѧ̀, бл҃года́тнаѧ, и҆ зовꙋ́щыѧ: мт҃и бж҃їѧ, сла́ва тебѣ̀.

Ра́достни и҆ престра́шни бы́ша рабѝ твоѝ, чⷭ҇таѧ, дрꙋ́гъ ко дрꙋ́гꙋ глаго́лахꙋ: ка́кѡ ѻ҆́чи на́шѧ держа́стасѧ; ви́дѣхомъ бо тѧ̀ посредѣ̀ на́съ про́стꙋ и҆ стра́ннꙋ, и҆ ти́хѡ ходѧ́щꙋю. ᲂу҆диви́вшесѧ же и҆ землѝ прекло́ньшесѧ, тебѣ̀, влⷣчце всѣ́хъ, поклони́шасѧ, зовꙋ́ще: мт҃и бж҃їѧ, сла́ва тебѣ̀.

И҆́нъ.

Ѕвѣ́рь мѧ̀ раздра̀, всечⷭ҇таѧ, и҆́же пло́ть моѧ̀ вселꙋка́ваѧ є҆́сть, ю҆́же грѣ́ѧхъ а҆́зъ и҆ ласка́хъ, и҆ пита́хъ, но сїѧ́ мѧ внеза́пꙋ низри́нꙋ. сегѡ̀ ра́ди зовꙋ̀: мт҃и бж҃їѧ, и҆з̾ и҆стлѣ́нїѧ мѧ̀ и҆схитѝ!

Ѡ҆скверни́хъ преслꙋша́нїемъ ѡ҆бновле́нїѧ ри́зꙋ, ю҆́же ѿ тебє̀, ѽ влⷣчце моѧ̀, и҆ногда̀ воспрїѧ́хъ. въ ро́въ ᲂу҆ны́нїѧ низпадо́хъ и҆ лише́нъ добродѣ́тели, но съ і҆ѡ́ною тебѣ̀ вопїю̀: мт҃и свѣ́та! ѡ҆чи́сти, и҆спра́ви мѧ̀, чⷭ҇таѧ, и҆ и҆з̾ ти́ны страсте́й и҆схитѝ.

Сла́ва: Сѐ, при две́рехъ сме́рть, дꙋшѐ моѧ̀, предстои́тъ и҆ во чре́во а҆́дово низвести́ тѧ гото́ва є҆́сть. воспрѧнѝ, ѽ дꙋшѐ, возопі́й: пощадѝ, пощади́ мѧ, влⷣко, и҆ мл҃твами ро́ждшїѧ тѧ̀ ѿ ѕвѣ́рѧ сегѡ̀ и҆схитѝ.

И҆ ны́нѣ: Заблꙋди́хъ, гпⷭ҇жѐ моѧ̀, ѿпадо́хъ ѿ стезѝ сп҃си́тельныѧ, по пꙋти́ бо во́ли своеѧ̀ всегда̀ хожда́хъ. но молю̀: пощадѝ, взыщѝ и҆ наста́ви мѧ̀, чⷭ҇таѧ, и҆ ѿ конца̀ всепоги́бельнагѡ и҆схитѝ.

Конда́къ, гла́съ в҃.

Ѽ неизрече́ннагѡ и҆ бл҃госе́рдагѡ твоегѡ̀ смотре́нїѧ, чⷭ҇тнѣ́йшаѧ херꙋві̑мъ и҆ сла́внѣйшаѧ без̾ сравне́нїѧ серафі̑мъ! ѻ҆́бразъ тво́й свѣтоѧвле́нный, и҆ самоиз̾ѡбраже́нный свидѣ́тельство ꙗ҆ви́сѧ твоеѧ̀ неизрече́нныѧ любвѐ и҆ млⷭ҇рдїѧ, почита́емъ то́й, лобыза́юще.

І҆́косъ:

Оу҆вѣрѧ́ющи человѣ́кѡмъ та́йнꙋ своегѡ̀ бг҃омт҃рнѧгѡ промышле́нїѧ и҆ первосказа́нное своѐ ѡ҆бѣтова́нїе ᲂу҆дѣ́лꙋ своемꙋ̀ земно́мꙋ подтвержда́ющи, свѣтописꙋ́етъ нерꙋкотворе́нный ѻ҆́бразъ сво́й влⷣчца въ вертогра́дѣ ст҃ы́ѧ горы̀ а҆ѳѡ́нскїѧ, въ ѻ҆би́тели рꙋ́сскихъ мона́хѡвъ, во ᲂу҆тѣше́нїе и҆ сп҃се́нїе всѣ́хъ нꙋжда́ющихсѧ и҆ призыва́ющихъ є҆ѧ̀ бжⷭ҇твенное предста́тельство, то́йже ѡ҆б̾е́млюще дꙋше́ю и҆ се́рдцемъ, почита́емъ, лобыза́юще.

Пѣ́снь з҃.

І҆рмо́съ: Въ гремѧ́щꙋю пе́щь сни́де а҆́гг҃лъ гдⷭ҇ень къ сꙋ́щымъ ѡ҆ а҆за́рїи ѻ҆трокѡ́мъ, и҆ не прикоснꙋ́сѧ и҆́хъ ѿню́дъ ѻ҆́гнь. тогда̀ трїѐ воспѣва́юще глаго́лахꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆́бразъ тво́й ст҃ы́й ѻ҆тцы̀ ᲂу҆зрѣ́вше, бл҃года́тїю бжⷭ҇твенною ѕѣлѡ̀ ᲂу҆ѧзви́шасѧ, та́же любо́вїю бж҃їею распали́шасѧ, въ прє́днѧѧ простира́ющесѧ, за̑днѧѧ всѧ̑ ѡ҆ставлѧ́юще. бл҃года́тїю твое́ю и҆ на́съ, ли́кꙋ твоемꙋ̀ поклонѧ́ющихсѧ, мт҃и бж҃їѧ, ᲂу҆ѧзвѝ, вѣ́рою тѝ пою́щихъ: ра́дꙋйсѧ, ѻ҆тцє́въ на́шихъ бжⷭ҇твеннаѧ похвало̀.

Оу҆́мъ всѧ́къ ᲂу҆жаса́етсѧ, бл҃гоꙋтро́бїе твоѐ мно́гое, дв҃о чⷭ҇таѧ, зрѧ́й. ты́ бо снизхожде́нїемъ твои́мъ мт҃рнее попече́нїе показа́ла є҆сѝ всѣ̑мъ во жре́бїи твое́мъ живꙋ́щымъ, и҆́мже помышлє́нїѧ рабѡ́въ твои́хъ ѿ смꙋще́нїѧ и҆ ско́рби къ бг҃омы́слїю возве́дши но́вый ли́къ и҆ бг҃огла́сный пѣвцє́въ твои́хъ ꙗ҆ви́ла є҆сѝ. съ ни́миже и҆ мы̀ тебѣ̀ дне́сь вопїе́мъ: ра́дꙋйсѧ, ѻ҆тцє́въ на́шихъ бжⷭ҇твеннаѧ похвало̀.

Дне́сь бцⷣа на горѣ̀ а҆ѳѡ́нстѣй посредѣ̀ дрꙋгѡ́въ свои́хъ ꙗ҆ви́сѧ, ꙗ҆́коже ѡ҆бѣща̀ николи́же ѡ҆ставлѧ́ти и҆̀хъ, но во все́мъ бы́ти и҆̀мъ помо́щница и҆ храни́тельница, та́кѡ и҆ ны́нѣ сотворѝ. ю҆́же восхвалѧ́юще всѝ возопїи́мъ: ра́дꙋйсѧ, ѻ҆тцє́въ на́шихъ бжⷭ҇твеннаѧ похвало̀.

Чꙋ́до сїѐ зрѧ́ще, помѧни́те всѧ̑ є҆ли́ка ва́мъ ѡ҆бѣтова́хъ: ꙗ҆́кѡ бꙋ́дꙋ ва́мъ пита́тельница и҆ промысли́тельница, і҆кономи́сса и҆ млекопита́тельница, бѣ́дъ предвозвѣсти́тельница и҆ врагѡ́въ бори́тельница, врачева́тельница и҆ смире́ннаѧ врата́рница, и҆ во всѧ́кихъ нꙋ́ждахъ ско́раѧ и҆ наде́жнаѧ ва́ша послꙋ́шательница. да на нб҃сѣ́хъ ᲂу҆мо́мъ вы́нꙋ пребыва́юще, сн҃ꙋ моемꙋ̀ є҆ди́номꙋ собесѣ́дꙋете, при́снѡ вопїю́ще: ѻ҆тцє́въ и҆ на́шъ бж҃е, бл҃гослове́нъ є҆сѝ.

И҆́нъ.

Заблꙋди́хъ, ѽ мт҃и бж҃їѧ, ѿпадо́хъ, и҆ добро́тꙋ дꙋшѝ моеѧ̀, ю҆́же мѝ дарова́ла є҆сѝ, въ ро́въ страсте́й, ѻ҆каѧ́нный, безсты́днѡ низри́нꙋхъ. но молю̀: до конца̀ не ѿри́ни мѧ̀, всечⷭ҇таѧ, житїѐ ᲂу҆ны́ло и҆мꙋ́щаго, но всего́ мѧ покаѧ́нїемъ па́ки ѡ҆чи́сти и҆ ѻ҆́гненныхъ слꙋ́гъ твои́хъ соприча́стника сотворѝ, мл҃твъ бо ра́ди ѻ҆тцє́въ мои́хъ на тѧ̀, ѽ пречⷭ҇таѧ, ᲂу҆пова́ю.

Преслꙋша́нїе дерзнове́нїѧ мѧ̀ ѡ҆бнажѝ и҆ стыждꙋ́сѧ: ка́кѡ пред̾ лицѐ твоѐ прїидꙋ̀; кі́има ѻ҆чи́ма на тѧ̀ воззрю̀; ка́кѡ ѻ҆́бразꙋ твоемꙋ̀ чⷭ҇тно́мꙋ дне́сь поклоню́сѧ; но молю́сѧ бл҃гоꙋтро́бїю твоемꙋ̀: ри́зꙋ мѝ, ѽ всемлⷭ҇тиваѧ, пе́рвꙋю да́рꙋй и҆ ꙗ҆́кѡ ᲂу҆пра́вительница мѧ̀ сп҃сѝ, мл҃твъ ра́ди ѻ҆тцє́въ мои́хъ на тѧ̀, ѽ пречⷭ҇таѧ, ᲂу҆пова́ю.

Сла́ва: Ѻ҆́гнь любвѐ бжⷭ҇твенныѧ внꙋ́трь себє̀ носѧ́ща сотворѝ раба̀ твоего̀, мт҃и безневѣ́стнаѧ, ѻ҆́гнь бжⷭ҇тва̀ во ᲂу҆тро́бѣ свое́й неѡпа́льнѡ вмѣ́щшаѧ. си́мъ ᲂу҆́бѡ мѝ ѕѣ́льнѣ распалѧ́емꙋ, хвра́стное страсте́й мои́хъ потреби́тсѧ мно́жество, мл҃твъ бо ра́ди ѻ҆тцє́въ мои́хъ на тѧ̀, ѽ пречⷭ҇таѧ, ᲂу҆пова́ю.

И҆ ны́нѣ: Нетлѣ́нное сло́во, тлѣ́нїѧ на́съ и҆зба́вльшее, па́че сло́ва родила̀ є҆сѝ. сегѡ̀ ра́ди и҆ менѐ, молю́сѧ, ѿ страсте́й ѡ҆чи́сти, да возслѣ́дꙋю всѣ́мъ се́рдцемъ тебѣ̀ и҆ бою́сѧ сн҃а твоегѡ̀ и҆ лица̀ є҆гѡ̀ вы́нꙋ взыщꙋ̀, мл҃твъ бо ра́ди ѻ҆тцє́въ мои́хъ на тѧ̀, ѽ пречⷭ҇таѧ, ᲂу҆пова́ю.

Пѣ́снь и҃.

І҆рмо́съ: Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆ пою́ще глаго́лемъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Ста́до слове́сное ꙗ҆́кѡ па́стырѧ мт҃и въ жре́бїи а҆пⷭ҇льскагѡ слꙋже́нїѧ твоегѡ̀ собрала̀ є҆сѝ, бл҃года́ть хрⷭ҇то́вꙋ въ не́мъ при́снѡ проповѣ́дающи, нижѐ въ писа́нїихъ, ни въ словесѣ́хъ, но въ сами́хъ сердца́хъ со вла́стїю и҆ си́лою бжⷭ҇твенною мно́гою ѡ҆ дс҃ѣ ст҃ѣ, дв҃о, и҆звѣствꙋ́ющи. да́ръ бо се́й, ꙗ҆́кѡ мт҃ри хрⷭ҇то́вой, дх҃омъ дарова́сѧ тѝ, и҆́мже просвѣтѝ и҆ на́съ, да превозно́симъ и҆ пое́мъ тебѐ во вѣ́ки.

Бжⷭ҇твенною бл҃года́тїю въ покаѧ́нїи держа́внѡ ѡ҆дѣ́ѧвшесѧ и҆ свѣщы̀ вѣ́ры возжжє́нныѧ носѧ́ще, врага̀ низложи́ти си́лꙋ потщи́мсѧ, да вѣнцы̀ прїи́мемъ ѿ хрⷭ҇та̀ бг҃а по достоѧ́нїю, ꙗ҆́кѡ и҆збра̑нницы и҆ таи̑нницы пречⷭ҇тыѧ є҆гѡ̀ мт҃ре, пою́ще и҆ бл҃гословѧ́ще ю҆̀ во вѣ́ки.

Дне́сь ѡ҆ чꙋдесѣ́хъ твои́хъ, влⷣчце, на горѣ̀ ст҃ѣ́й се́й бы́вшихъ, бл҃годарє́нїѧ тебѣ̀ прино́симъ. тѣ́мже тѝ молѧ́щыѧсѧ ѡ҆бл҃годатѝ, и҆ житїѐ и҆спра́ви, и҆ сп҃се́нїе дꙋ́шъ на́шихъ и҆спросѝ, да превозно́симъ и҆ пое́мъ тебѐ во вѣ́ки.

Зри́мъ тѧ̀, ꙗ҆́кѡ дре́вле мѡѷсе́й, во ѻ҆гнѝ дх҃а всест҃а́гѡ бл҃года́тїю блиста́ющꙋю, є҆́юже дꙋ́шы лю́бѧщихъ тѧ̀ согрѣва́еши, тє́рнїѧ страсте́й всѧ̑ попалѧ́еши и҆ слꙋги̑ твоѧ̑ ꙗ҆́кѡ пла́мень ѻ҆́гненный ꙗ҆влѧ́еши, съ ни́миже и҆ на́съ, рабѡ́въ твои́хъ, сопричтѝ, да превозно́симъ и҆ пое́мъ тебѐ во вѣ́ки.

И҆́нъ.

Ви́ждь, ѽ мт҃и всест҃а́ѧ, се́рдца моегѡ̀ печа́ль, ви́ждь и҆ ѡ҆браще́нїе дꙋшѝ моеѧ̀, ви́ждь и҆ сле́зы, и҆ не ѿвратѝ менє̀, но ѡ҆быми́ мѧ па́ки, є҆́смь бо ѻ҆троча̀ твоѐ, и҆ и҆спра́ви без̾ѻбра́зїе моѐ, и҆ по кончи́нѣ со ѻ҆тцы̑ мои́ми сопричтѝ, пою́ща и҆ превозносѧ́ща тѧ̀ во вѣ́ки.

И҆ помышле́ньми поползнꙋ́всѧ и҆ дѣ́лы прегрѣши́въ, рыда́ю и҆ стеню̀, и҆ вопїю̀: мт҃и бж҃їѧ, сп҃си́ мѧ, и҆ ѕлосмра́дїе грѣхѡ́въ во бл҃гоꙋха́нїе дꙋхо́вное претворѝ, и҆ по кончи́нѣ со ѻ҆тцы̑ мои́ми сопричтѝ, пою́ща и҆ превозносѧ́ща тѧ̀ во вѣ́ки.

Сла́ва: Свѣ́тлыми мл҃твами твои́ми, дв҃о, мы́слєннаѧ моѧ̑ ѻ҆чеса̀, ѡ҆мрачє́ннаѧ ѕло́бою, просвѣтѝ молю́сѧ, и҆ на пꙋ́ть покаѧ́нїѧ наста́ви мѧ̀, прошꙋ̀ тѧ̀: ꙗ҆́кѡ да до́лжнѡ тѧ̀ пѣсносло́влю, па́че сло́ва сло́во воплоти́вшꙋю, поѧ̀ и҆ превозносѧ̀ тѧ̀ во вѣ́ки.

И҆ ны́нѣ: Бг҃ороди́тельнице чⷭ҇таѧ, низве́рженныхъ и҆справле́нїе є҆ди́но, и҆спра́ви и҆ менѐ, всѧ́кими страстьмѝ сокрꙋше́ннаго всего̀ и҆ да́же до а҆́да низве́ргшагосѧ, грѣхопаде́нїй мои́хъ ра́ди. но молю̀: рꙋкописа́нїе грѣхѡ́въ безстꙋ́дныхъ мои́хъ разорѝ, и҆ со ѻ҆тцы̑ мои́ми сопричтѝ, пою́ща и҆ превозносѧ́ща тѧ̀ во вѣ́ки.

Пѣ́снь ѳ҃.

І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.

Припѣ́въ: Велича́й, дꙋшѐ моѧ̀, ꙗ҆вле́нїе чꙋ́дное и҆ пресла́вное пречⷭ҇тыѧ влⷣчцы.

Ка́кѡ ѻ҆чеса̀ на̑ша и҆змѣни́ша на́мъ; ка́кѡ ви́дѧще тѧ̀, мт҃рь свѣ́та, не позна́хомъ; си́це бо, влⷣчце, ᲂу҆вѣ́дѣхомъ, ꙗ҆́кѡ нѣ́сть возмо́жно всѧ́комꙋ сїѐ. а҆́ще ᲂу҆́бѡ не смири́мъ себѐ, ѽ бра́тїе, ли́къ смире́нный дв҃ы чⷭ҇тыѧ ни въ жи́зни се́й, ни въ бꙋ́дꙋщей ᲂу҆зрѣ́ти возмо́жемъ, и҆́мѧ бо є҆ѧ̀ то́кмѡ въ се́рдцѣ чи́стомъ и҆ смире́нномъ досто́йнѡ велича́етсѧ.

Припѣ́въ: Велича́й, дꙋшѐ моѧ̀, пребл҃гослове́нныѧ цр҃и́цы ѻ҆́бразъ свѣтопи́санный.

Пѣ̑сни тебѣ̀ бл҃года́рствєнныѧ всѝ мы̀, въ горѣ̀ твое́й живꙋ́щїи, прино́симъ, мт҃и бж҃їѧ, ꙗ҆́кѡ сп҃са́еши на́съ при́снѡ ѿ всѧ́кагѡ ѡ҆бстоѧ́нїѧ, пита́еши, грѣ́еши и҆ промышлѧ́еши, на врагѝ спобо́рствꙋющи. но мо́лимъ тѧ̀: и҆ бжⷭ҇твеннагѡ црⷭ҇твїѧ со ѻ҆тцы̑ на́шими по кончи́нѣ сподо́би, да въ безконє́чныѧ вѣ́ки сꙋ́щꙋю бцⷣꙋ и҆ мы̀ тебѐ велича́емъ.

Припѣ́въ: Велича́й, дꙋшѐ моѧ̀, ко рабѡ́мъ свои̑мъ прише́дшꙋю влⷣчцꙋ.

Гпⷭ҇жꙋ̀ пречⷭ҇тꙋю воспои́мъ ᲂу҆се́рднѡ, бра́тїе, ꙗ҆́же, ꙗ҆́кѡ мт҃и на рꙋкꙋ̀ своє́ю на́съ при́снѡ носѧ́щи, дꙋхо́внѣ при́снѡ на́съ пита́етъ. є҆́йже всѣ́мъ житїе́мъ ᲂу҆годи́ти потщи́мсѧ, да во црⷭ҇твїи сн҃а є҆ѧ̀ во вѣ́ки ю҆̀ велича́емъ.

Припѣ́въ: Велича́й, дꙋшѐ моѧ̀, приснобл҃же́нныѧ бг҃оневѣ́сты ли́къ самоиз̾ѡбраже́нный.

Въ жи́зни се́й потрꙋди́тисѧ всѝ да потщи́мсѧ, да печа́ть бг҃омт҃рнѧгѡ и҆збра́нїѧ и҆ сыновства̀, бг҃оподо́бною красото́ю и҆ добро́тою сїѧ́ющи, въ дꙋша́хъ на́шихъ воѡбрази́тсѧ, и҆ позна́ти на́съ мт҃и бж҃їѧ въ де́нь ѻ҆́нъ стра́шный возмо́жетъ тогда̀, да во црⷭ҇твїи сн҃а є҆ѧ̀ безконе́чнѡ ю҆̀ велича́емъ.

И҆́нъ.

Припѣ́въ: Велича́й, дꙋшѐ моѧ̀, погиба́ющихъ сп҃се́нїѧ взыскꙋ́ющꙋю.

Сѐ, падо́хомъ, ѽ дꙋшѐ моѧ̀, и҆ грѣхо́мъ сме́ртнѣ ᲂу҆ѧзви́хомсѧ. сѐ, ᲂу҆мро́хомъ длѧ жи́зни нбⷭ҇ныѧ и҆ ѿста́хомъ до́брыѧ дрꙋжи́ны бра́тїй на́шихъ. ѻ҆ба́че, дꙋшѐ моѧ̀, воспрѧнѝ, воста́ни! се́ бо живота̀ роди́тельница, ꙗ҆́кѡ мт҃и млⷭ҇тивнѡ рꙋ́цѣ живи́тельнѣи свы́ше тѝ подае́тъ, да и҆ ты̀, ѽ дꙋшѐ моѧ̀, сꙋ́щꙋю бцⷣꙋ ю҆̀ велича́еши.

Припѣ́въ: Велича́й, дꙋшѐ моѧ̀, дв҃ꙋ чⷭ҇тꙋю, горы̀ а҆ѳѡ́нскїѧ и҆гꙋ́менїю.

Ри́зꙋ свѣ́тлꙋ да́рꙋеши ѡ҆бновле́нїѧ бл҃года́тїю дх҃а сщ҃енноистка́ннꙋю, бцⷣе, во дворѣ̀ твое́мъ рабо́тати приходѧ́щымъ, ю҆́же и҆ мнѣ̀, дв҃о чⷭ҇таѧ, въ покаѧ́нїи, ѽ всемлⷭ҇тиваѧ, ѡ҆бновѝ, да и҆ а҆́зъ со ѻ҆тцы̑ воспою̀ пѣ́снь досто́йнѡ, сꙋ́щꙋю бцⷣꙋ тѧ̀ велича́ѧ.

Припѣ́въ: Велича́й, дꙋше́ моѧ̀, трїѷпоста́снагѡ бжⷭ҇тва̀ держа́вꙋ.

Гла́съ а҆рха́гг҃ловъ тебѣ̀, пречⷭ҇таѧ, и҆ а҆́зъ недосто́йный со ѻ҆тцы̑ мои́ми дне́сь приношꙋ̀: ра́дꙋйсѧ, ѡ҆бра́дованнаѧ и҆ пребл҃гослове́ннаѧ! ра́дꙋйсѧ, всепѣ́таѧ, гдⷭ҇ь съ тобо́ю! ѽ влⷣчце пресвѣ́тлаѧ, пѣ́снь сїю̀ не пре́зри, но во црⷭ҇твїи трїѷпоста́снагѡ бг҃а на́шегѡ, ꙗ҆́коже сама̀ и҆зво́лиши, нищетꙋ̀ мою̀ помѧнѝ.

Припѣ́въ: Велича́й, дꙋшѐ моѧ̀, чⷭ҇тнѣ́йшꙋю го́рнихъ во́инствъ дв҃ꙋ пречⷭ҇тꙋю бцⷣꙋ.

Ѽ всепѣ́таѧ мт҃и! пѣ́снь досто́йнꙋю воспѣ́ти тѝ недоꙋмѣ́ю. но ѻ҆ба́че сѐ дерза́ю и҆ бл҃годарю̀ тѧ̀, ꙗ҆́кѡ сподо́била мѧ̀ є҆сѝ немощна́го ли́кꙋ твоемꙋ̀ ст҃о́мꙋ и҆ свѣтоѧвле́нномꙋ послꙋжи́ти. прїимѝ, ѽ всест҃а́ѧ, дерзнове́нїе ᲂу҆бо́гое сїѐ, и҆ житїѧ̀ моегѡ̀ ѡ҆ста́токъ въ непоро́чности, молю́ тѧ, сохранѝ. въ де́нь же стра́шный и҆схо́да ѻ҆каѧ́нныѧ моеѧ̀ дꙋшѝ грѣхѡ́въ мои́хъ рꙋкописа́нїе, ѽ всемлⷭ҇тиваѧ, раздерѝ, да во црⷭ҇твїи сн҃а твоегѡ̀ со ѻ҆тцы̑ мои́ми и҆ а҆́зъ недосто́йный сꙋ́щꙋю бцⷣꙋ во вѣ́ки тѧ̀ велича́ю.

Свѣти́ленъ.

И҆збра́ннїи ѿ конє́цъ земны́хъ, совокꙋ́пльшесѧ здѣ̀, во ᲂу҆дѣ́лѣ ст҃ѣ́мъ мое́мъ, возвели́чити и҆́мѧ моѐ. и҆ ты̀, сн҃е и҆ бж҃е мо́й, низпослѝ и҆̀мъ съ высоты̀ свѣ́тъ тво́й.