Канон Пресвятой Богородице пред иконой «Свенская-Печерская» (иной)

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ра́дꙋйсѧ, брѧ́нскаѧ землѐ, и҆ весели́сѧ, све́нскаѧ ѻ҆би́тель, велегла́снѡ пою́ще пресла́вное застꙋпле́нїе бж҃їѧ мт҃ре, ꙗ҆́же све́нскою і҆кѡ́ною свое́ю вѣ̑рныѧ лю́ди ѿ сꙋпоста̑тъ и҆зба́ви.

А҆́ще не бы твоѧ̀ млⷭ҇ть къ на́мъ была̀, пребл҃гослове́ннаѧ влⷣчце, вма́лѣ бы вразѝ лю́тїи гра́дъ тво́й разори́ли и҆ ст҃ы̑ни правосла̑вныѧ порꙋга́нїю пре́дали, но си́хъ вспѧ́ть ѡ҆брати́ла є҆сѝ.

Дне́сь цр҃кѡ́внаѧ разширѧ́ютсѧ нѣ̑дра, прїе́млюще бога́тство бл҃года́ти дв҃ы бцⷣы, све́нскою бо і҆кѡ́ною свое́ю правосла̑вныѧ ѿ ви́димыхъ и҆ неви́димыхъ вра̑гъ ѡ҆гражда́етъ.

Оу҆жасо́шасѧ и҆ноплеме́нныхъ пѡ́лчища и҆ побѣго́ша, бжⷭ҇твеннымъ преще́нїемъ гони́ми, преложи́сѧ бо првⷣный бж҃їй гнѣ́въ на млⷭ҇ть къ на́мъ хода́тайствомъ пречⷭ҇тыѧ бцⷣы.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Сп҃се́нїе правосла́внѡ велича́ющымъ тѧ̀ содѣ́лала є҆сѝ посредѣ̀ землѝ брѧ́нскїѧ, бцⷣе дв҃о, воздви́женнѣй бо і҆кѡ́нѣ твое́й сщ҃е́нныхъ рꙋка́ми, воздꙋ́хъ ѡ҆ст҃и́сѧ и҆ полкѝ бѣсѡ́вскїѧ ѿгна́шасѧ.

Ꙗ҆вле́нїемъ млⷭ҇ти твоеѧ̀, мт҃и бж҃їѧ, да веселѧ́тсѧ правосла́вныхъ собо́ри, чтꙋ́щїи чꙋдотво́рный све́нскїй ѻ҆́бразъ тво́й, є҆реті́ческое же со́нмище да посрами́тсѧ, и҆ ꙗ҆́кѡ пра́хъ, да возмете́тсѧ ѿ лица̀ брѧ́нскїѧ землѝ.

Бл҃гослове́ннаѧ влⷣчце, деснꙋ́ю стопꙋ̀ твою̀ ᲂу҆твержде́нꙋ на ка́мени на све́нскомъ ѻ҆́бразѣ твое́мъ зрѧ́ще, прилѣ́жнѡ мо́лимъ тѧ̀: на ка́мени пра́выѧ вѣ́ры рабы̑ твоѧ̑ ᲂу҆твердѝ.

Лѣ́потою чꙋде́съ ѡ҆блече́сѧ све́нскаѧ і҆кѡ́на бг҃омт҃ре, ю҆́же стра́хомъ и҆ ра́достїю лобыза́емъ, бра́тїе, дꙋ́шы и҆ тѣлеса̀ ѡ҆чи́стивше, то́ю бо цр҃и́ца нб҃сѐ и҆ землѝ съ на́ми пребыва́етъ.

Сѣда́ленъ, гла́съ а҃:

Прїиди́те, рꙋ́сстїи собо́ри, восхва́лимъ стѣ́нꙋ и҆ забра́ло правосла́внагѡ ѻ҆те́чества на́шегѡ, цр҃и́цꙋ бцⷣꙋ, и҆ бжⷭ҇твенное сокро́вище, све́нскꙋю і҆кѡ́нꙋ є҆ѧ̀ и҆мꙋ́ще, є҆́юже гра́дъ брѧ́нск ѿ нахожде́нїѧ и҆ноплеме́нныхъ и҆зба́висѧ, побѣ̑ды над̾ страстьмѝ ᲂу҆ влⷣчцы и҆спро́симъ, ѿ неѧ̀ ро́ждшагосѧ бг҃а сла́вѧще.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

А҆́гг҃льстїи чи́ни стра́хомъ слꙋ́жатъ чꙋ́днѣй бж҃їѧ мт҃ре і҆кѡ́нѣ, человѣ́цы бл҃гоговѣ́йнѡ покланѧ́ютсѧ, и҆ всѧ̀ тва́рь ра́дꙋетсѧ, сла́вѧщи си́лꙋ непобѣди́мꙋю пречⷭ҇тыѧ влⷣчцы.

Гдѣ̀ сꙋ́ть де́рзѡсти ѕлочести́выхъ, всꙋ́е хва́лѧщихсѧ погꙋби́ти достоѧ́нїе твоѐ, бцⷣе; па́мѧть и҆́хъ поги́бнетъ съ шꙋ́момъ, твоѐ же застꙋпле́нїе всѝ ро́ди сла́вѧтъ.

Ѻ҆́бразъ све́нскїй цр҃и́цы бцⷣы гра́дꙋ брѧ́нскꙋ дарова́сѧ ꙗ҆́кѡ стѣна̀ неѡбори́маѧ и҆ щи́тъ несокрꙋши́мь, є҆го́же ны́нѣ ѡ҆бстоѧ́ще любо́вїю, первоѻбра́знѣй сла́вꙋ возсыла́емъ.

Дне́сь лѣ́тнюю па́мѧть соверша́юще и҆збавле́нїѧ брѧ́нскїѧ землѝ ѿ сꙋпоста̑тъ посо́бїемъ бг҃омт҃ре, прилѣ́жнѡ мо́лимсѧ є҆́й правосла́вїе ᲂу҆тверди́ти, є҆́рєси же и҆ раско́лы разори́ти.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

А҆́ще и҆ и҆з̾ѡщрѧ́ютъ ѧ҆зы́къ сво́й проти́вꙋ цр҃кве правосла́вныѧ є҆ретїцы̀ и҆ раскѡ́льницы, и҆ непра̑вды сплета́ютъ рꙋка́ми свои́ми, всꙋ́е трꙋжда́ютсѧ, ꙗ҆́кѡ паꙋчи́нꙋ разори́тъ сїѧ̑ гдⷭ҇ь бг҃ъ, ꙗ҆́коже дре́вле совѣ́тъ сꙋпоста́тѡвъ мл҃твами бг҃омт҃ре.

Твоегѡ̀ къ на́мъ бл҃говоле́нїѧ зало́гъ, све́нскꙋю­пече́рскꙋю і҆кѡ́нꙋ твою̀, влⷣчце, стра́жа неꙋсы́пна и҆ застꙋпле́нїе тве́рдо гра́дꙋ брѧ́нскꙋ дарова́ла є҆сѝ, на ню́же взира́юще, ᲂу҆ны́нїе ѿгонѧ́емъ и҆ весе́лїѧ дꙋхо́внагѡ и҆сполнѧ́емсѧ.

Наста́вница є҆сѝ мона́хѡвъ, приснодв҃о, тѣ́мже при́зри на ѻ҆би́тель све́нскꙋю, ю҆́же бл҃гочести́вый кнѧ́зь рѡма́нъ на мѣ́стѣ, тобо́ю и҆збра́ннѣмъ, созда̀, ꙗ҆́кѡ кївѡ́тъ чꙋдотво́рныѧ і҆кѡ́ны твоеѧ̀, и҆ при́снѡ сїю̀ соблюда́й, подвиза́ющихсѧ же въ не́й сп҃са́й.

А҆рха́гг҃льскїй гла́съ прино́симъ тѝ, всепѣ́таѧ: ра́дꙋйсѧ, бл҃года́тнаѧ, све́нскаѧ похвало̀, съ тобо́ю гдⷭ҇ь и҆ тобо́ю съ на́ми, є҆го́же, ꙗ҆́кѡ мт҃рнее дерзнове́нїе и҆мꙋ́щи, моли́ти не преста́й, ѻ҆́вцы па́жити твоеѧ̀ ѿ лю́тыхъ волкѡ́въ сохрани́ти невреди̑мы.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечтⷭ҇но́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Ꙗ҆вле́нїе бж҃їѧ бл҃года́ти, правосла́внѣй цр҃кви присꙋ́щїѧ, зри́мъ въ чꙋ́днѣмъ застꙋпле́нїи гра́да брѧ́нска све́нскїѧ ра́ди і҆кѡ́ны бг҃омт҃ре ѿ нахожде́нїѧ вои́телей ѕлосла́вныхъ.

Сотворѝ ны̀ достѡ́йны бы́ти такова́гѡ да́ра млⷭ҇ти твоеѧ̀, всепѣ́таѧ бцⷣе, ѡ҆браще́нїемъ ѿ ѕлы́хъ дѣ́лъ къ бл҃го́мꙋ житїю̀, па́че же правосла́вїемъ нерꙋши́мымъ.

Воззови́те вельмѝ, сщ҃е́нныхъ ᲂу҆ста̀, че́стнѣ почита́юще ѡ҆дꙋшевле́нный гдⷭ҇ень кївѡ́тъ, и҆ на̑ша молє́нїѧ къ пречⷭ҇тѣй вознеси́те, бл҃года́рнѡ є҆ѧ̀ бл҃гость прославлѧ́юще.

Є҆ли́цы бл҃гочести́вїи, прїиди́те, поклони́мсѧ све́нстѣй бж҃їѧ мт҃ре і҆кѡ́нѣ, подае́тъ бо пѣвцє́мъ чꙋдотво́рнагѡ є҆ѧ̀ ѻ҆́браза крѣ́пость на бори́телѧ дїа́вола и҆ грѣхѡ́въ ѡ҆ставле́нїе.

Конда́къ, гла́съ и҃:

Взбра́ннѣй воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ сꙋпоста̑тъ бл҃года́тїю све́нскаго твоегѡ̀ ѻ҆́браза, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.

І҆́косъ:

Є҆гда̀ по грѣхѡ́мъ на́шымъ воста́ша ꙗ҆зы́цы го́рьцїи и҆ бо́рзїи, ходѧ́щїи по широта́мъ землѝ рꙋ́сскїѧ, є҆́же наслѣ́дити селє́нїѧ чꙋ̑ждаѧ, и҆ ст҃ы̑ни правосла̑вныѧ порꙋга́нїю предаю́щїи, и҆ на гра́дъ брѧ́нск ᲂу҆стреми́шасѧ, тогда̀ си́хъ свирѣ́пство превозмо́же мл҃тва пречⷭ҇тыѧ бг҃омт҃ре и҆ дре́внихъ чꙋде́съ подо́бїе на́мъ ꙗ҆ви́сѧ: сїѧ̀ бо лю́ди ка́ющыѧсѧ и҆ къ і҆кѡ́нѣ є҆ѧ̀ припа́дающыѧ напра́сныѧ сме́рти и҆зба́ви, гра́дъ же сво́й и҆ ѡ҆крє́стныѧ вє́си ѿ ѻ҆гнѧ̀ и҆ меча̀ сохранѝ, пѡ́лчища и҆ноплемє́нныѧ вспѧ́ть ѡ҆брати́вши, сегѡ̀ ра́ди немо́лчнѡ зове́мъ є҆́й: ра́дꙋйсѧ, невѣ́сто неневѣ́стнаѧ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Не мо́щно на́мъ ѿве́рсти ᲂу҆ста̀, мт҃и бж҃їѧ, грѣсѝ на́ши, ꙗ҆́кѡ ѻ҆́гнь пе́щи вавѷлѡ́нскїѧ, превзыдо́ша на́шѧ главы̑, но въ покаѧ́нїи прїимѝ на́съ, бл҃гословѧ́щыѧ сн҃а твоего̀ и҆ бг҃а ѻ҆тє́цъ на́шихъ.

Сни́ди въ пе́щь страсте́й на́шихъ, пренепоро́чнаѧ, и҆ пла́мѧ по́хоти въ дꙋ́хъ росы̀ шꙋмѧ́щъ чистоты̀ преложѝ, да бл҃года́рнѡ зове́мъ тѝ: бл҃гослове́нна є҆сѝ, ро́ждшаѧ бг҃а ѻ҆тє́цъ на́шихъ.

Ка́кѡ воспое́мъ чꙋ́до застꙋпле́нїѧ твоегѡ̀, бл҃гослове́ннаѧ бцⷣе; ты́ бо слє́зныѧ мольбы̑ и҆ сокрꙋше́нїе серде́цъ ча̑дъ твои́хъ прїе́мши, ꙗ҆́кѡ же́ртвꙋ чи́стꙋю сн҃ꙋ твоемꙋ̀ принесла̀ є҆сѝ, и҆ првⷣный гнѣ́въ є҆гѡ̀ ᲂу҆гаси́ла є҆сѝ, ро́ждшаѧ бг҃а ѻ҆тє́цъ на́шихъ.

А҆́ще и҆ согрѣши́хомъ, но не ѿстꙋпи́хомъ ѿ тебє̀, влⷣчце, ᲂу҆ми́льнѡ вопїѧ́хꙋ лю́дїе пред̾ све́нскою і҆кѡ́ною твое́ю, не ѡ҆ста́ви на порꙋга́нїе ѕловѣ̑рнымъ гра́дъ тво́й, бл҃гословѧ́щїй сн҃а твоего̀ и҆ бг҃а ѻ҆тє́цъ на́шихъ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ꙗ҆́кѡ столпо́мъ ѻ҆́блачнымъ, све́нскою і҆кѡ́ною твое́ю, гра́дъ тво́й покрыва́еши, пречⷭ҇таѧ, и҆ ꙗ҆́кѡ столпо́мъ ѻ҆́гненнымъ ви̑димыѧ и҆ неви̑димыѧ врагѝ ѡ҆палѧ́еши, вѣ̑рныѧ же просвѣща́еши, превозносѧ́щыѧ сн҃а твоего̀ во вѣ́ки.

Просла́вимъ бл҃гоче́стнѡ бл҃годѣѧ̑нїѧ приснодв҃ы, чтⷭ҇ны́й є҆ѧ̀ ѻ҆́бразъ ѡ҆бстоѧ́ще любо́вїю, та̀ бо лю́ди своѧ̑, пла́меннѣ ю҆̀ призыва́ющыѧ, млⷭ҇тїю свое́ю ѡ҆росѝ, ѕлочести̑выѧ сꙋпоста́ты ѿ гра́да брѧ́нска дале́че ѿгна́вши, тѣ́мже застꙋ́пницꙋ на́шꙋ превозно́симъ во вѣ́ки.

Ѻ҆гне́мъ ѿкры́етсѧ и҆ и҆скꙋси́тсѧ коегѡ́ждо дѣ́ло, ꙗ҆ково̀ же є҆́сть, и҆ а҆́ще пребꙋ́детъ, мздꙋ̀ прїи́мемъ, а҆́ще же сгори́тъ, ѡ҆тщети́мсѧ. ᲂу҆бои́мсѧ ᲂу҆̀бо, бра́тїе, потопле́нїѧ ѻ҆́гненнаго и҆ под̾ кро́въ бцⷣы притеце́мъ, превозносѧ́ще сн҃а є҆ѧ̀ во вѣ́ки.

Хвра́стїе є҆ресе́й и҆ раско́лѡвъ, и҆ собла́знѡвъ цр҃ко́вныхъ бжⷭ҇твеннымъ ѻ҆гне́мъ любвѐ бж҃їѧ попалѝ, цр҃и́це нбⷭ҇наѧ, є҆го́же сн҃ъ тво́й прїи́де воврещѝ на зе́млю, правосла̑вныѧ же ꙗ҆́кѡ зла́то въ горни́лѣ и҆спыта́нїй ѡ҆чи́сти, превозносѧ́щыѧ гдⷭ҇а во вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Всепѣ́таѧ бцⷣа на нб҃сѝ съ сн҃омъ и҆ бг҃омъ свои́мъ црⷭ҇твꙋющи, на землѝ сꙋ́щихъ бл҃гоꙋтро́бнѡ посѣща́етъ, па́че же те́плѣ призыва́ющымъ є҆ѧ̀ ско́раѧ помо́щница ꙗ҆влѧ́етсѧ, тѣ́мже и҆ гра́дъ брѧ́нск ѿ наше́ствїѧ сꙋпоста̑тъ и҆зба́вила є҆́сть.

А҆нтѡ́нїа и҆ ѳеодо́сїа пече́рскихъ, мона́хѡвъ рꙋ́сскихъ первонача́льникѡвъ, прпⷣбный а҆лѵ́пїй предстоѧ́щими тебѣ̀ и҆з̾ѡбразѝ, мона́шескагѡ чи́на влⷣчце, зна́менꙋѧ при́сное и҆́хъ къ тебѣ̀ ѡ҆ на́съ моле́нїе, съ ни́миже тѧ̀ велича́емъ.

Ликꙋ́й и҆ красꙋ́йсѧ, брѧ́нскаѧ землѐ, и҆мꙋ́щи въ себѣ̀ неѡскꙋ́дный и҆сто́чникъ бл҃года́ти, све́нскꙋю і҆кѡ́нꙋ пречⷭ҇тыѧ дв҃ы, є҆ѧ́же ра́ди ви̑димыѧ и҆ неви̑димыѧ врагѝ прогонѧ́ютсѧ, є҆ретїцы̀ посрамлѧ́ютсѧ, вѣ́рнїи же любо́вїю неизчє́тныѧ є҆ѧ̀ млⷭ҇ти велича́ютъ.

Ѽ вели́каѧ на́ша застꙋ́пнице и҆ похвало̀, прест҃а́ѧ бцⷣе, чтⷭ҇нѣ́йшаѧ херꙋві̑мъ и҆ сла́внѣйшаѧ без̾ сравне́нїѧ серафі̑мъ, правосла́вїѧ щи́те и҆ ѻ҆рꙋ́жїе на врагѝ непобѣди́мое, по достоѧ́нїю воспѣ́ти тѧ̀ не могꙋ́ще, во смире́нїи се́рдца велича́емъ.

Свѣти́ленъ:

Мт҃и бж҃їѧ, при́зри бл҃госе́рднѡ на бл҃года́рнѡ чтꙋ́щыѧ све́нскꙋю і҆кѡ́нꙋ твою̀, є҆́юже гра́дъ брѧ́нск ѿ нахожде́нїѧ ѕловѣ́рныхъ и҆зба́вила є҆сѝ, и҆ ᲂу҆молѝ ро́ждшагосѧ ѿ тебє̀ дарова́ти цр҃кви правосла́внѣй ᲂу҆твержде́нїе, ѻ҆те́чествꙋ на́шемꙋ на врагѝ ѡ҆долѣ́нїе и҆ дꙋша́мъ на́шымъ сп҃се́нїе.