Канон Пресвятой Богородице пред иконой «Свенская-Печерская»

Пѣ́снь а҃.

І҆рмо́съ: Воскрⷭ҇нїѧ де́нь, просвѣти́мсѧ, лю́дїе. па́сха, гдⷭ҇нѧ па́сха: ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.

Воскрⷭ҇нїѧ де́нь хрⷭ҇та̀ бг҃а на́шегѡ и҆ бл҃года́ть пречⷭ҇тыѧ є҆гѡ̀ мт҃ре прїиди́те, правосла́вныхъ собо́ри, согла́снѡ воспои́мъ, бл҃года́рствєннаѧ пою́ще.

Ѡ҆чи́стимъ чꙋ̑вствїѧ и҆ ᲂу҆́зримъ ѻ҆чи́ма вѣ́ры прест҃ꙋ́ю бцⷣꙋ, грѧдꙋ́щꙋю ѿ пече́рскагѡ ᲂу҆дѣ́ла своегѡ̀ посѣти́ти брѧ́нскꙋю зе́млю и҆ све́нскꙋю і҆кѡ́нꙋ свою̀ въ не́й просла́вити.

Нб҃са̀ ᲂу҆̀бо досто́йнѡ да веселѧ́тсѧ, землѧ̀ же рꙋ́сскаѧ да ра́дꙋетсѧ, да пра́зднꙋетъ же гра́дъ брѧ́нск и҆ све́нскаѧ ѻ҆би́тель да торжествꙋ́етъ, почита́юще і҆кѡ́нꙋ бг҃омт҃ре.

Ѻ҆́чи бл҃говѣ́рнагѡ кнѧ́зѧ рѡма́на просвѣти́ла є҆сѝ, те́плѣ молѧ́щагѡсѧ тебѣ̀, дв҃о всенепоро́чнаѧ, бл҃года́тїю сн҃а твоегѡ̀, и҆з̾ гро́ба дне́сь возсїѧ́вшагѡ.

Пѣ́снь г҃.

І҆рмо́съ: Прїиди́те, пи́во пїе́мъ но́вое, не ѿ ка́мене непло́дна чꙋдодѣ́емое, но нетлѣ́нїѧ и҆сто́чникъ, и҆з̾ гро́ба ѡ҆дожди́вша хрⷭ҇та̀, въ не́мже ᲂу҆твержда́емсѧ.

Прїиди́те, пѣ́снь воспои́мъ но́вꙋю пречⷭ҇тѣй дв҃ѣ бцⷣѣ, чтⷭ҇ны́й ѻ҆́бразъ є҆ѧ̀ ѡ҆бстоѧ́ще любо́вїю, на горѣ̀ све́нстѣй го́рꙋ ѡ҆дꙋшевле́ннꙋю правосла́внѡ велича́юще.

Прїиди́те, бл҃года́ть и҆сцѣле́нїй дꙋ́шъ и҆ тѣле́съ почерпе́мъ ѿ и҆сто́чника неистощи́магѡ, све́нскїѧ і҆кѡ́ны бг҃омт҃ре, є҆́юже во и҆́стиннѣй вѣ́рѣ ᲂу҆твержда́емсѧ и҆ дꙋшетлѣ̑ннаѧ ᲂу҆чє́нїѧ низлага́емъ.

Ны́нѣ всѝ и҆сполнѧ́ютсѧ ра́дости, а҆рхїерє́и и҆ сщ҃е́нницы, мона́си и҆ мїрсті́и, пра́зднꙋюще свѣ́тлѡ торжество̀ млⷭ҇тей твои́хъ, бг҃оневѣ́сто, све́нскимъ ѻ҆́бразомъ на́мъ ꙗ҆вле́нныхъ.

Вчера̀ зрѣ́нїѧ лиши́сѧ бл҃говѣ́рный кнѧ́зь рѡма́нъ, да ꙗ҆вѧ́тсѧ на не́мъ дѣла̀ цр҃и́цы бг҃оѻтрокови́цы, ны́нѣ же ꙗ҆́снѡ зри́тъ і҆кѡ́нꙋ є҆ѧ̀, зе́млю брѧ́нскꙋю чꙋдесы̀ ѡ҆блиста́ющꙋю.

Сла́ва, и҆ ны́нѣ: Предвари́вшїи ᲂу҆́тро сщ҃е́нницы, провожда́вшїи ѿ ѻ҆би́тели кі́ево­пече́рскїѧ въ предѣ́лы брѧ́нскїѧ і҆кѡ́нꙋ твою̀, всепѣ́таѧ влⷣчце, не въ ладїѝ, но на дꙋ́бѣ бли́з̾ све́ны рѣкѝ ѡ҆брѣто́ша ю҆̀, слы́шавъ же сїѧ̑, кнѧ́зь рѡма́нъ со слеза́ми вопїѧ́ше: ѽ прест҃а́ѧ дв҃о! да́рꙋй мѝ зрѣ́ти чꙋ́дный ѻ҆́бразъ тво́й и҆ свѣ́тъ сн҃а твоегѡ̀, сп҃са́ющагѡ ро́дъ человѣ́ческїй.

Пѣ́снь д҃.

І҆рмо́съ: На бжⷭ҇твеннѣй стра́жи бг҃оглаго́ливый а҆ввакꙋ́мъ да ста́нетъ съ на́ми, и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь сп҃се́нїе мі́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

На бжⷭ҇твеннѣй стра́жи въ мл҃твеннѣмъ бдѣ́нїи пред̾ све́нскою і҆кѡ́ною ста́немъ, кꙋ́пнѡ съ прпⷣбными а҆нтѡ́нїемъ и҆ ѳеодо́сїемъ молѧ́ще пречⷭ҇тꙋю сп҃стѝ зе́млю рꙋ́сскꙋю.

Бг҃оѻте́цъ ᲂу҆́бѡ дв҃дъ пред̾ сѣ́ннымъ ковче́гомъ скака́ше и҆гра́ѧ, ча̑да же твоѧ̑, бг҃омт҃и, пред̾ ѻ҆́бразомъ твои́мъ ликꙋ́юще, чꙋдеса̀ є҆гѡ̀ прославлѧ́ютъ, и҆́миже сп҃са́еши на́съ ѿ бѣ́дъ и҆ ѕѡ́лъ.

Тѣлє́сныѧ ѻ҆́чи смотре́нїемъ бж҃їимъ помрачє́ны и҆мѣ́ѧ, бл҃гочести́вый кнѧ́зь рѡма́нъ серде́чныма ѻ҆чи́ма прови́дѣ во́лю твою̀, бцⷣе дв҃о, ѡ҆ созда́нїи ѻ҆би́тели и҆́нокѡмъ на мѣ́стѣ, тобо́ю и҆збра́ннѣмъ.

Ꙗ҆́коже дре́вле сꙋпоста̑тъ, ѻ҆би́тель твою̀ ѡ҆кра́дшихъ, ѡ҆слѣпи́ла є҆сѝ, влⷣчце, и҆ достоѧ́нїе бра́тїи возврати́ла є҆сѝ, та́кѡ ны́нѣ ѕловѣ̑рныѧ помрачѝ, заблꙋ́ждшыѧ же мт҃ри цр҃кви возвратѝ.

Пѣ́снь є҃.

І҆рмо́съ: Оу҆́тренюемъ ᲂу҆́треннюю глꙋбокꙋ̀, и҆ вмѣ́стѡ мѵ́ра пѣ́снь принесе́мъ влⷣцѣ, и҆ хрⷭ҇та̀ ᲂу҆́зримъ пра́вды сл҃нце, всѣ̑мъ жи́знь возсїѧ́юща.

Оу҆́тренюемъ ᲂу҆́треннюю глꙋбокꙋ̀, и҆ съ пѣ́нїемъ добродѣ́тєли принесе́мъ влⷣчцѣ, глаго́люще: сподо́би рабы̑ твоѧ̑ свѣ́тъ ᲂу҆зрѣ́ти присносїѧ́ющїй.

Безмѣ́рное твоѐ бл҃гоꙋтро́бїе, дв҃о, и҆гꙋ́менъ све́нскїѧ ѻ҆би́тели съ бра́тїею зрѧ́ше, и҆́хже ѿ напра́сныѧ сме́рти при разрꙋше́нїи хра́ма сохрани́ла є҆сѝ.

Пристꙋ́пимъ, свѣщено́снїи, любопра́зднственными чи́нми къ све́нскомꙋ ѻ҆́бразꙋ бг҃омт҃ре дне́сь, и҆́мже тьма̀ страсте́й на́шихъ ѿгонѧ́етсѧ.

Просвѣща́еши бжⷭ҇твенными лꙋча́ми бл҃года́ти і҆кѡ́ны твоеѧ̀, всепѣ́таѧ, дꙋхо́вною и҆ тѣле́сною слѣпото́ю недꙋ́гꙋющихъ.

Пѣ́снь ѕ҃.

І҆рмо́съ: Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ̑чныѧ, содержа́щыѧ свѧ̑занныѧ, хрⷭ҇тѐ, и҆ тридне́венъ, ꙗ҆́кѡ ѿ ки́та і҆ѡ́на, воскр҃слъ є҆сѝ ѿ гро́ба.

Пришла̀ є҆сѝ млⷭ҇тивнѡ, мт҃и бж҃їѧ, чтⷭ҇ны́мъ твои́мъ ѻ҆́бразомъ къ бл҃говѣ́рномꙋ кнѧ́зю рѡма́нꙋ, ꙗ҆́коже сн҃ъ тво́й посла̀ ѻ҆́бразъ сво́й кнѧ́зю а҆́ѵгарю, и҆ просвѣти́ла є҆сѝ ѻ҆́чи є҆гѡ̀.

Возво́диши держи́мыхъ скорбьмѝ и҆ болѣ́зньми, бг҃оневѣ́сто, къ терпѣ́нїю, смире́нїю и҆ ᲂу҆пова́нїю сп҃се́нїѧ, пред̾ све́нскою і҆кѡ́ною твое́ю те́плѣ по́мощь твою̀ призыва́ющихъ.

Сп҃се на́шъ пребл҃гі́й, пречⷭ҇тыѧ мт҃ре твоеѧ̀ мольба́ми цр҃ковь твою̀ ст҃ꙋ́ю ѿ є҆ресе́й и҆ раско́лѡвъ непоколеби́мꙋ сохранѝ и҆ заблꙋ́ждшыѧ на пꙋ́ть пра́вый ѡ҆братѝ.

Сохранѧ́й во и҆́стиннѣй вѣ́рѣ чтꙋ́щыѧ тѧ̀, влⷣчце, зна́мєнїи и҆ чꙋдесы̀ ѿ све́нскїѧ і҆кѡ́ны твоеѧ̀ ꙗ҆влѧ́ющи бл҃года́ть бж҃їю, правосла́внѣй цр҃кви присꙋ́щꙋю.

Конда́къ, гла́съ г҃:

Ꙗ҆́кѡ цвѣ́тъ неꙋвѧда́емый ла́ѵры кі́ево­пече́рскїѧ чꙋ́днаѧ і҆кѡ́на твоѧ̀, влⷣчце бцⷣе, на дре́вѣ бли́з̾ све́ны рѣкѝ ѡ҆брѣ́тесѧ, ꙗ҆влѧ́ющи мѣ́сто но́вагѡ вертогра́да дх҃о́внагѡ и҆ бл҃гоꙋха́нїемъ чꙋде́съ и҆сполнѧ́ющи притека́ющихъ къ не́й, тѣ́мже и҆ на прє́днѧѧ проба́ви млⷭ҇ти твоѧ̑, пречⷭ҇таѧ, правосла́внѡ тѧ̀ велича́ющымъ.

І҆́косъ:

Земна̑ѧ на землѝ ѡ҆ста́вльше, и҆ мы́сли ѿ страсте́й ѡ҆чи́стивше, впери́мъ зрѣ́нїе вкꙋ́пѣ и҆ чꙋ̑вства къ пречⷭ҇тѣй бг҃омт҃ри, све́нскаго ѻ҆́браза є҆ѧ̀ ди́вное вознесе́нїе на дре́во и҆ чꙋдеса̀ є҆гѡ̀ бл҃года́рнѡ прославлѧ́юще, и҆ ᲂу҆миле́ннѡ возопїи́мъ: не ѡ҆ста́ви рабы̑ твоѧ̑, влⷣчце, и҆́нокѡвъ, подвиза́ющихсѧ на мѣ́стѣ, тобо́ю и҆збра́ннѣмъ, ᲂу҆крѣпѝ, гра́дъ брѧ́нск и҆ всю̀ рꙋ́сскꙋю зе́млю бл҃года́тїю твое́ю покры́й, ᲂу҆тѣ́ши на́съ, ꙗ҆́кѡ мт҃и, наста́ви, ꙗ҆́кѡ сынѡ́въ, правосла́внѡ тѧ̀ велича́ющихъ.

Пѣ́снь з҃.

І҆рмо́съ: Ѻ҆́троки ѿ пе́щи и҆зба́вивый, бы́въ чл҃вѣ́къ, стра́ждетъ ꙗ҆́кѡ сме́ртенъ, и҆ стрⷭ҇тїю сме́ртное въ нетлѣ́нїѧ ѡ҆блачи́тъ бл҃голѣ́пїе, є҆ди́нъ бл҃гослове́нъ ѻ҆тцє́въ бг҃ъ, и҆ препросла́вленъ.

Ѻ҆́троки ѿ пе́щи и҆зба́вивый, влⷣчце, сн҃ъ тво́й и҆ бг҃ъ, мно́гажды и҆збавлѧ́ше гра́дъ брѧ́нск и҆ ѻ҆би́тель све́нскꙋю ѿ сꙋпоста̑тъ, мольба́ми твои́ми, є҆ди́на бл҃гослове́ннаѧ.

Въ воню̀ мѵ́ра бл҃года́ти све́нскїѧ і҆кѡ́ны твоеѧ̀ притека́юще, пречⷭ҇таѧ, нбⷭ҇ное мѵ́ро ро́ждшаѧ, бл҃гоꙋха́нїемъ позна́нїѧ хрⷭ҇то́ва и҆сполнѧ́емсѧ и҆ ѕлосмра́дїѧ ѕловѣ́рїѧ и҆збавлѧ́емсѧ.

Сме́рти пра́зднꙋемъ ᲂу҆мерщвле́нїе воскрⷭ҇нїемъ хрⷭ҇та̀, ѕлочести́выхъ же посрамле́нїе и҆ бѣ́гство млⷭ҇рдїемъ приснодв҃ы, тѣ́мже пред̾ і҆кѡ́ною є҆ѧ̀ ликꙋ́юще, застꙋ́пницꙋ на́шꙋ воспѣва́емъ.

Ꙗ҆́кѡ вои́стиннꙋ сщ҃е́нный и҆ сп҃си́тельный, и҆ свѣтоно́сный, бг҃омт҃и, све́нскїй ѻ҆́бразъ тво́й, вѣ́рою бо покланѧ́ющымсѧ є҆мꙋ̀, да́рꙋеши и҆сцѣле́нїе и҆ ѿ напа́стей и҆збавле́нїе.

Пѣ́снь и҃.

І҆рмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ: во́ньже бл҃гослови́мъ хрⷭ҇та̀ во вѣ́ки.

Се́й нарече́нный и҆ ст҃ы́й де́нь всѣ́хъ правосла́вныхъ землѝ брѧ́нскїѧ созыва́етъ къ прославле́нїю бж҃їѧ мт҃ре, ра́ди чꙋдотво́рныѧ све́нскїѧ є҆ѧ̀ і҆кѡ́ны.

При́зри, прест҃а́ѧ дв҃о, на лю́ди твоѧ̑, пред̾ і҆кѡ́ною све́нскою молѧ́щыѧсѧ тебѣ̀, и҆ прошє́нїѧ и҆спо́лни ѡ҆ тебѣ̀ бл҃гословѧ́щыѧ хрⷭ҇та̀ во вѣ́ки.

Ѻ҆́ч҃е вседержи́телю, и҆ сло́ве, и҆ дш҃е, мл҃твами бцⷣы цр҃ковь правосла́внꙋю ᲂу҆твердѝ, ѻ҆те́чество на́ше въ ми́рѣ сохранѝ и҆ сп҃сѝ бл҃гословѧ́щыѧ тѧ̀ во вѣ́ки.

Прїиди́те, и҆́нокѡвъ собо́ри, ра́достнѡ бл҃годаре́нїе приснодв҃ѣ принесе́мъ, све́нскимъ ѻ҆́бразомъ свои́мъ бл҃гослове́нїе пече́рскїѧ ла́ѵры землѝ брѧ́нстѣй дарова́вшей.

Пѣ́снь ѳ҃.

І҆рмо́съ: Свѣти́сѧ, свѣти́сѧ, но́вый і҆ерⷭ҇ли́ме: сла́ва бо гдⷭ҇нѧ на тебѣ̀ возсїѧ̀: ликꙋ́й ны́нѣ и҆ весели́сѧ, сїѡ́не. ты́ же, чⷭ҇таѧ, красꙋ́йсѧ, бцⷣе, ѡ҆ воста́нїи ржⷭ҇тва̀ твоегѡ̀.

Свѣти́сѧ, свѣти́сѧ, сла́вный гра́де брѧ́нск сла́вою све́нскаго ѻ҆́браза бг҃омт҃ре, ликꙋ́й ны́нѣ и҆ весели́сѧ всѧ̀ рꙋ́сскаѧ землѐ, покро́вомъ влⷣчцы храни̑маѧ.

Ѽ бжⷭ҇твеннагѡ, ѽ любе́знагѡ, ѽ сладча́йшагѡ твоегѡ̀ ли́ка, бг҃оневѣ́сто, и҆́мже пребыва́ти съ на́ми и҆зво́лила є҆сѝ, є҆го́же вѣ́рнїи ᲂу҆твержде́нїе наде́жды сп҃се́нїѧ и҆мꙋ́ще ра́дꙋемсѧ.

Ѽ мт҃и бж҃їѧ, въ мл҃твꙋ тебѣ̀ приво́димъ а҆нтѡ́нїа, ѳеодо́сїа и҆ всѣ́хъ пече́рскихъ и҆ брѧ́нскихъ ст҃ы́хъ, и҆́хже предста́тельствомъ сподо́би на́съ невече́рнѧгѡ днѐ црⷭ҇твїѧ сн҃а твоегѡ̀.

Согла́снѡ, дв҃о, тебѐ бл҃жи́мъ вѣ́рнїи, зна́мєнїѧ и҆ чꙋдеса̀ све́нскїѧ і҆кѡ́ны твоеѧ̀ бл҃года́рнѡ воспомина́юще и҆ воста́нїе ржⷭ҇тва̀ твоегѡ̀ воспѣва́юще.

Свѣти́ленъ:

Ꙗ҆́коже дре́вле просвѣти́ла є҆сѝ тѣлє́сныѧ ѻ҆́чи бл҃говѣ́рнагѡ кнѧ́зѧ рѡма́на бл҃года́тїю све́нскїѧ і҆кѡ́ны твоеѧ̀, всепѣ́таѧ бцⷣе, та́кѡ и҆ ны́нѣ ѡ҆мрачє́нныѧ ѕловѣ́рїемъ, бжⷭ҇твенною лꙋче́ю сн҃а твоегѡ̀ просвѣтѝ, правосла̑вныѧ же во свѣ́тѣ лица̀ є҆гѡ̀ ходи́ти ᲂу҆твердѝ.