Канон Пресвятой Богородице пред иконой «Снетогорская»

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Возжада̀ дꙋша̀ моѧ̀ воспѣ́ти тѧ̀, влⷣчце! кꙋ́ю пѣ́снь принесꙋ̀ бцⷣѣ, недоꙋмѣ́юсѧ ѻ҆каѧ́нства моегѡ̀ ра́ди, свѧ́занъ же мѝ ѧ҆зы́къ и҆ дꙋша̀ притре́петна є҆́сть, сло́во мѝ пода́ждь, всепѣ́таѧ, во хвале́нїи велича́ти тѧ̀.

Ѿ лѣ́тъ дре́внихъ сокрыва́шесѧ сщ҃е́нное твоѐ и҆з̾ѡбраже́нїе, є҆гда̀ же въ разоре́ннѣй ѻ҆би́тели жи́знь и҆́ноческаѧ па́ки возроди́сѧ, бл҃говоли́ла є҆сѝ, пречⷭ҇таѧ, сокрове́нный ѻ҆́бразъ ꙗ҆ви́ти и҆ і҆кѡ́нꙋ твою̀ на́мъ дарова́ти.

Сла́ва: Сла́вимъ тѧ̀, бг҃оневѣ́сто, ро́ждшꙋю хрⷭ҇та̀, бг҃а на́шегѡ, є҆го́же молѝ поми́ловати дꙋ́шы на́шѧ.

И҆ ны́нѣ: Воспои́мъ, всѝ лю́дїе, гпⷭ҇жꙋ̀ и҆ влⷣчцꙋ на́шꙋ бцⷣꙋ, то́ю бо безбѣ́днѡ мо́ре жите́йское прехо́димъ и҆ приста́нище сп҃си́тельное въ сн҃ѣ є҆ѧ̀ ѡ҆брѣта́емъ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Бл҃говоли́ла є҆сѝ, гпⷭ҇жѐ, ꙗ҆́кѡ ст҃ы́хъ ѻ҆би́телей пресла́внаѧ и҆гꙋ́менїѧ, на снѧ́тнѣй горѣ̀ чернори́зицъ со́нмъ собра́ти, сегѡ̀ ра́ди и҆ чтⷭ҇нꙋ́ю і҆кѡ́нꙋ твою̀ въ зна́менїе млⷭ҇ти и҆ неѿстꙋ́пнагѡ покро́ва твоегѡ̀ дарова́ла є҆сѝ.

Пѣ́нїе всѧ́кое побѣжда́етсѧ пѣсносло́вцєвъ твои́хъ, бцⷣе, не возмога́емъ бре́ннїи досто́йнѡ воспѣ́ти тѧ̀, нижѐ и҆счи́слити щедрѡ́ты твоѧ̑, ни повѣ́дати смире́нїѧ глꙋбинꙋ̀, нижѐ бжⷭ҇твенныѧ любвѐ та́йнꙋ.

Сла́ва: Въ тебѣ̀, пречⷭ҇таѧ, ꙗ҆́кѡ въ чистѣ́йшемъ и҆сто́чницѣ, почерпа́емъ си́лы и҆ ᲂу҆тѣше́нїе, неѡскꙋ́днѡ бо млⷭ҇рдїе и҆ любо́вь твою̀ на на́съ грѣ́шныхъ преиз̾ѻби́льнѡ и҆злива́еши и҆ росо́ю ᲂу҆миле́нїѧ жестосе́рдыхъ ѡ҆роша́еши.

И҆ ны́нѣ: Бцⷣе дв҃о, въ мл҃твахъ твои́хъ мі́ръ не ѡ҆ста́вила є҆сѝ, бꙋ́ди на́мъ пꙋтеводи́тельница во ѻ҆би́тєли вѣ̑чныѧ.

Сѣда́ленъ, гла́съ в҃:

Дне́сь свѣ́тлѡ ликꙋ́юще, припа́даемъ всебл҃гоговѣ́йнѡ ко ѻ҆́бразꙋ пречⷭ҇тѣй, и҆́мже покро́въ мт҃рнїй ѻ҆би́тели млⷭ҇тивнѡ дарова́сѧ.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

И҆́же на ѻ҆́гненныхъ херꙋві́мѣхъ сѣдѧ́й и҆ пѣва́емый ѿ серафі̑мъ, во твою̀ чтⷭ҇нѣ́йшꙋю ᲂу҆тро́бꙋ сни́де, ложесна̀ дв҃и́чєскаѧ прⷭ҇то́ломъ бжⷭ҇тва̀ содѣ́лавъ. да́рꙋй и҆ на́мъ, ѽ гпⷭ҇жѐ, хра́мы дх҃а ст҃а́гѡ достѡ́йны содѣ́латисѧ.

Ꙗ҆́кѡ дре́вле ро́дъ і҆и҃льскїй въ пꙋсты́ни пꙋтеводи́вый, та́кѡ и҆ ны́нѣ гдⷭ҇ь и҆́нокѡмъ, ꙗ҆́кѡ возлю́блєннымъ ча́дѡмъ, пꙋтеводи́тельницꙋ ко сп҃се́нїю, ѻ҆́блакъ ле́гкїй, пречⷭ҇тꙋю мт҃рь свою̀ ꙗ҆влѧ́етъ.

Сла́ва: Во є҆ди́но и҆́ночествꙋющихъ собра́вый, гдⷭ҇и, и҆ застꙋпле́нїе и҆̀мъ ѻ҆́бразъ пречⷭ҇тыѧ мт҃ре твоеѧ̀ дарова́вый, и҆сточѝ бл҃года́ть сп҃си́тельнꙋю, да не преста́нꙋтъ воспѣва́ти: сла́ва, хрⷭ҇тѐ, си́лѣ твое́й.

И҆ ны́нѣ: Всѧ̑ прⷪ҇ро́чєства на тебѣ̀ и҆спо́лнишасѧ, и҆ ѻ҆рꙋ́жїе крⷭ҇тное непоро́чнꙋю дꙋ́шꙋ твою̀ про́йде, сегѡ̀ ра́ди смире́ннѣйшею послꙋ́шницею во́ли гдⷭ҇ни нарека́емъ тѧ̀ и҆ мо́лимъ: добродѣ́телїю се́ю ѡ҆богатѝ стропти̑ваѧ сердца̀ на̑ша, скоропослꙋ́шнаѧ а҆́гнице пастыренача́льника хрⷭ҇та̀.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ мі́ръ подава́ющаѧ.

Что̀ тѧ̀ нарече́мъ, ѽ бл҃года́тнаѧ; цѣломꙋ́дрїе твоѐ и҆ а҆́гг҃лѡмъ преди́вно є҆́сть, па́че снѣ́га ᲂу҆бѣли́ласѧ є҆сѝ двⷭ҇тва чⷭ҇тото́ю и҆ ст҃ы́нею твое́ю преиз̾ѻби́льнѡ ны́нѣ ра̑йскаѧ селє́нїѧ бл҃гоꙋха́еши: ра́дꙋйсѧ, двⷭ҇твеннаѧ похвало̀, велича́емъ тѧ̀.

Чꙋ́до твоѐ, бцⷣе, ᲂу҆жаса́етъ и҆ а҆́гг҃лы, вы́шши бо ꙗ҆ви́ласѧ є҆сѝ всѧ́кїѧ земны́ѧ и҆ нбⷭ҇ныѧ тва́ри, смире́нїемъ превознесе́на и҆ многоразли́чными добро́тами преꙋкра́шена, селе́нїе содѣ́лаласѧ є҆сѝ невмѣсти́магѡ зижди́телѧ твоегѡ̀.

Сла́ва: Сла́вѧтъ тѧ̀ а҆́гг҃льскихъ во́инствъ чинонача̑лїѧ: гаврїи́лъ преизѧ́щнѣйшїй ѡ҆ чⷭ҇тотѣ̀ вѣща́етъ, мїхаи́лъ до́блественнѣйшїй ѡ҆ добродѣ́тели пое́тъ, є҆стество̀ же всѐ безпло́тныхъ со стра́хомъ и҆ любо́вїю, ꙗ҆́кѡ бж҃їей мт҃ри, покланѧ́етсѧ.

И҆ ны́нѣ: Къ тебѣ̀, влⷣчце, припа́даемъ, ѡ҆брѣстѝ разрѣше́нїе лю́тыхъ ча́юще, и҆зрасти́ша бо грѣсѝ на́ши плоды̀ жестосе́рдїѧ и҆ ѡ҆мраче́нїѧ. ѡ҆зарѝ ны̀ свѣ́томъ сн҃а твоегѡ̀, во є҆́же сп҃сти́сѧ на́мъ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечтⷭ҇но́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

И҆змла́да бг҃ꙋ посщ҃е́ннаѧ, во ст҃а̑ѧ ст҃ы́хъ, бг҃оѻтрокови́це, пребыва́ла є҆сѝ, въ зако́нѣ гдⷭ҇ни поꙋча́ющисѧ. сподо́би на́съ твори́ти во́лю гдⷭ҇ню и҆ во ѻ҆би́тєли вѣ̑чныѧ вни́ти.

Ꙗ҆́же ѡ҆ бра́цѣ въ ка́нѣ галїле́йстѣй попече́нїе и҆мѣ́вшаѧ, предста́ни и҆ ны́нѣ хода́тайствомъ твои́мъ и҆ ᲂу҆молѝ гдⷭ҇а дꙋша́мъ на́шымъ весе́лїю нбⷭ҇номꙋ прїѡбщи́тисѧ.

Сла́ва: Прїиди́те ны́нѣ, празднолю́бцы, и҆́ночестїи собо́ри и҆ вѣ́рныхъ собра́нїе, воскли́кнемъ гпⷭ҇жѣ̀ и҆ влⷣчцѣ на́шей бцⷣѣ: ра́дꙋйсѧ, землѝ пско́вскїѧ покро́ве и҆ ѻ҆би́тели снѣтого́рскїѧ ѿра́до и҆ ᲂу҆тѣше́нїе.

И҆ ны́нѣ: Є҆ле́й мт҃рнїѧ млⷭ҇ти твоеѧ̀ преиз̾ѻби́льнѡ и҆зле́й болѣ́знꙋющымъ дꙋша́мъ на́шымъ, ꙗ҆́кѡ да скве́рны грѣхо́вныѧ совле́кшесѧ, возмо́жемъ чи́стѣ сла́вити тѧ̀ и҆ ѿ тебє̀ ро́ждшагосѧ гдⷭ҇а.

Конда́къ, гла́съ г҃:

Дв҃ы дне́сь сщ҃е́нное торжество̀ въ цр҃кви соверша́етсѧ: на прⷭ҇то́лѣ бо всецр҃и́ца сла́внѡ возсѣди́тъ и҆ подаѧ́нїе бжⷭ҇твенныѧ бл҃года́ти на́мъ ѿ сп҃са прилѣ́жнѡ хода́тайствꙋетъ, а҆́гг҃ли и҆ человѣ́цы раболѣ́пнѡ влⷣчцѣ предстоѧ́тъ, на́съ бо ра́ди мо́литъ бцⷣа превѣ́чнаго бг҃а.

І҆́косъ:

Оу҆краси́сѧ ны́нѣ, бг҃оспаса́емый гра́де пско́ве, и҆мѣ́ѧ въ себѣ̀ го́рꙋ снѧ́тнꙋю бг҃опокрове́ннꙋю, и҆дѣ́же бо чтⷭ҇ны́й ѻ҆́бразъ бг҃омт҃ре въ хра́мѣ ржⷭ҇тва̀ є҆ѧ̀ сла́внѡ возсїѧ̀. ли́цы и҆́ночестїи и҆ мїрсті́и, вкꙋ́пѣ ра́дꙋйтесѧ: і҆ѡаса́фъ бо прпⷣбный ѡ҆ ст҃ѣ́й ѻ҆би́тели свое́й ко пречⷭ҇тѣй дв҃ѣ припа́даетъ и҆ довмо́нтъ бл҃говѣ́рный ѡ҆ землѝ на́шей бцⷣѣ предста́тельствꙋетъ, мїхаи́лъ а҆рха́гг҃лъ съ гаврїи́ломъ бл҃говѣ́стникомъ всецр҃и́це слꙋ́жатъ, на́съ бо ра́ди мо́литъ бцⷣа превѣ́чнаго бг҃а.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Настиго́ша ны̀ сꙋпоста́ты лꙋка́вїи, и҆ ꙗ҆́кѡ въ пещѝ ѻ҆́гненнѣй, ѿ мно́жества и҆скꙋше́нїй ѡ҆бꙋрева́емсѧ, ѡ҆росѝ ны̀ ѵ҆ссѡ́помъ мл҃твъ твои́хъ и҆ и҆зведѝ и҆з̾ горни́ла стра́стнагѡ, да въ ми́рѣ дꙋше́внѣмъ вопїе́мъ тѝ: ра́дꙋйсѧ, кꙋпино̀, ѻ҆гне́мъ бжⷭ҇тва̀ не ѡ҆па́льшаѧсѧ.

Ꙗ҆́коже дре́вле зе́млю пско́вскꙋю ѿ и҆новѣ́рныхъ наше́ствїѧ мно́гажды сохранѧ́ла є҆сѝ, та́кѡ и҆ ны́нѣ взбра́ннаѧ воево́да ꙗ҆ви́сѧ, сп҃сѝ дꙋ́шы на́шѧ и҆ набѣ́ги лꙋка́выхъ сꙋпоста̑тъ потребѝ.

Сла́ва: Не престае́тъ ли́къ и҆́ноческїй по всѧ̑ дни̑ сла́вити тѧ̀, всепѣ́тꙋю мт҃рь бг҃а на́шегѡ. ты́ бо, ꙗ҆́кѡ бл҃гоꙋха́нный крі́нъ, чⷭ҇тото́ю двⷭ҇тва бл҃гоꙋха́еши и҆ ко а҆́гг҃льстѣй жи́зни мона́хѡвъ наставлѧ́еши.

И҆ ны́нѣ: Приведѝ ны̀, гпⷭ҇жѐ, въ бл҃гоче́стїи и҆ пра́вдѣ пожи́ти, возведѝ, во є҆́же въ преподо́бїи и҆ чистотѣ̀ сн҃ꙋ твоемꙋ̀ послꙋжи́ти, да и҆збѣ́гше шꙋ́їихъ, сопричте́мсѧ десны̑мъ и҆ сподо́бимсѧ ѻ҆тцє́въ гдⷭ҇а и҆ бг҃а сла́вити во вѣ́ки.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Трїѐ ѻ҆́троцы въ пещѝ вавѷлѡ́нстѣй бл҃гоче́стїемъ дре́вле спасо́шасѧ, дꙋ́шы же на́шѧ, грѣхѡ́мъ плѣнє́нныѧ, на па́жить сп҃си́тельныхъ за́повѣдей хрⷭ҇то́выхъ, влⷣчце, напра́ви, да непоро́чнымъ пꙋте́мъ ѡ҆правда́нїй гдⷭ҇нихъ го́рнѧгѡ і҆ерⷭ҇ли́ма дости́гнемъ.

Бг҃а пребл҃га́го ᲂу҆молѝ, пречⷭ҇таѧ бцⷣе, ѿ бѣ́дъ лю́тыхъ и҆зба́витисѧ на́мъ, любо́вїю чтꙋ́щымъ тѧ̀, всепѣ́таѧ.

Сла́ва: И҆́же крѣ́пость вѣ́ры ѻ҆трокѡ́въ въ пещѝ крѣ́постїю ѻ҆гнѧ̀ и҆скꙋси́вый и҆ ре́вность па́че ѻ҆гнѧ̀ тѣ̑мъ пода́вый, свѣ́тлымъ ѻ҆гне́мъ бжⷭ҇тва̀ твоегѡ̀ грѣ̑шныѧ дꙋ́шы на́шѧ ѡ҆зарѝ, мл҃твами пречⷭ҇тыѧ мт҃ре твоеѧ̀.

И҆ ны́нѣ: Предста̀ цр҃и́ца ѡ҆деснꙋ́ю сп҃са въ ри́захъ позлаще́нныхъ ѡ҆дѣ́ѧна и҆ мно́гими добродѣ́тельми преꙋкра́шена, бжⷭ҇твеннымъ же смире́нїемъ преиспещре́на, взыва́ющи: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Велича́етъ бцⷣꙋ пречⷭ҇тꙋю нбⷭ҇наѧ цр҃ковь и҆ земна́ѧ вкꙋ́пѣ, ѻ҆троча̀ бо даде́сѧ на́мъ, ꙗ҆́кѡ до́ждь на рꙋно̀ въ дѣ́вственнꙋю ᲂу҆тро́бꙋ тоѧ̀ сни́де и҆ чре́во простра́ннѣе нб҃съ содѣ́ла.

Всѝ ст҃і́и ѡ҆ тебѣ̀ ра́дꙋютсѧ, прⷪ҇ро́цы же и҆сполне́нїю предрече́ннагѡ ликꙋ́ютъ: сло́во бо є҆диноро́дное, во ѻ҆ч҃ескихъ нѣ́дрѣхъ безнача́льнѡ сѣдѧ́щее, на рꙋкꙋ̀ мт҃ре дв҃ы ѻ҆троча̀ зри́тсѧ, є҆мманꙋ́иломъ нарица́емое.

Сла́ва: Пресла́внаѧ бж҃їѧ мт҃и и҆ ст҃ы́хъ а҆́гг҃лъ ст҃ѣ́йшаѧ, немо́лчнѡ воспѣва́емъ тѧ̀ се́рдцемъ и҆ ᲂу҆сты̀: ра́дꙋйсѧ, кро́тостїю препросла́вленнаѧ: ра́дꙋйсѧ, вели́чїемъ смире́нїѧ превознесе́ннаѧ.

И҆ ны́нѣ: Ржⷭ҇тво́мъ твои́мъ, пречⷭ҇таѧ, сп҃се́нїе на́мъ прїи́де, гѡ́рнѧѧ бо дѡ́льнимъ совокꙋпи́шасѧ. тѣ́мже вопїе́мъ тѝ: ра́дꙋйсѧ, прозѧбе́нїемъ чревоноше́нїѧ бл҃гослове́нїе мі́рови и҆сточи́вшаѧ.

Свѣти́ленъ:

Мт҃и свѣ́та, бл҃гослове́ннаѧ бцⷣе, просвѣтѝ ѡ҆мрачє́ннаѧ сердца̀ на̑ша ѻ҆гне́мъ любвѐ бжⷭ҇твенныѧ, да то́ю просвѣща́еми, востече́мъ ко свѣ́тꙋ всѣ́хъ свѣ́тѡвъ, сладча́йшемꙋ сн҃ꙋ твоемꙋ̀.