Канон Пресвятой Богородице пред иконой «Рудненская»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Пречи́стая и Преблаже́нная Влады́чице Богоро́дице, услы́ши гла́с моле́ния моего́, умилосе́рдися о мне́, гре́шнем, погиба́ющем, Пречи́стая Богоро́дице, и вме́сто печа́ли да́руй ми́ ра́дость, да, ра́дуяся, воспева́ю Тя́, Всесвята́я Влады́чице.

Ути́ши души́ моея́ свире́пство, поне́же мно́гия ско́рби и печа́ли нападо́ша на мя́, гре́шнаго, да не поги́бну зле́, окая́нный.

Ты́ бо еси́ моя́ кре́пость, и утвержде́ние, и от враго́в защище́ние, и сего́ ра́ди не бою́ся вра́жия преще́ния, но при́сно пою́ Тя́ и сла́влю, Всесла́вная.

Напа́сти, и бе́ды, и ско́рби мно́ги приидо́ша на мя́ и отяготи́ша мя́, и се́ от всего́ се́рдца молю́ Тя́, вопия́: изба́ви, Богороди́тельнице, от си́х одержа́щих мя́ зо́л и весе́лия испо́лни.

Пе́снь 3.

Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Ты́ еси́ те́плая Предста́тельница и тве́рдое заступле́ние, изба́ви мя́, Всесвята́я, от наше́дших на мя́ напа́стей, Ты́ бо еси́, Влады́чице, па́дших исправле́ние.

Изба́ви мя́, Пречи́стая, от си́х напа́стей и бе́д и омраче́ние душе́вное, и уны́ние, и вся́ стра́сти отжени́ от мене́, Чи́стая, да при́сно сла́влю Тя́, Влады́чице.

К Тебе́ притека́ю, Пречи́стая: не пре́зри моя́ боле́зни и воздыха́ния, но при́зри на мя́, су́щаго в ско́рби, и сию́ мою́ печа́ль на ра́дость преложи́, Богоблаже́нная.

Ви́ждь, Влады́чице, беду́ мою́ и ско́рби, я́ко в те́х лука́вый вра́г поглоти́ти мя́ тщи́тся, но Ты́, Пречи́стая Богоро́дице, препни́ то́ его́ злохи́трое кова́рство, да, изба́влься, сла́влю Тя́, Тве́рдую Засту́пницу.

Пе́снь 4.

Ирмо́с: Седя́й в Сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Ты́ еси́, Пречи́стая Богоро́дице, наде́жда и утвержде́ние мое́ неруши́мое, и лю́тых бе́д свобожде́ние, и в печа́ли утеше́ние, и души́ мое́й просвеще́ние, и во упова́нии мое́м непоколеби́м сто́лп.

В си́х печа́лех бу́ди сла́дкое утеше́ние и в беда́х ско́рая Помо́щница, Тя́ бо, Ма́ти Бо́жия, стяжа́вшии от все́х бе́д избавля́ются и ко спасе́нию наставля́ются.

Ты́ еси́, Пречи́стая Де́во, и су́щим в отча́янии прибе́жище, и немощны́м помога́еши, согреши́вших исправля́еши и ко спасе́нию наставля́еши, я́ко Ма́ти Бо́жия су́щая.

Приклони́ся к мольба́м раба́ Твоего́, Влады́чице, и не закосни́ изба́вити мя́ от си́х все́х бе́д и скорбе́й, я́же одержа́т мя́, и ви́димыя и неви́димыя враги́ отжени́ от мене́, да не зле́ поги́бну, окая́нный.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Суди́ оби́дящаго мя́ и от напра́снаго оскорбле́ния изба́ви мя́, осужде́ннаго, я́ко Ты́ Судию́ Пра́веднаго родила́ еси́, Всенепоро́чная, И́же хо́щет кому́ждо возда́ти по дело́м его́.

Ты́ бо в напа́стех и ско́рбех ми́лостивно защища́еши, и зде́ под кро́в Тво́й прибега́ющаго, приими́, Пречи́стая, и мое́ сие́ ма́лое от уны́лаго се́рдца моле́ние, да не зле́, во отча́янии поги́бну.

Ми́лостивным и кро́тким о́ком, Богороди́тельнице, и милосе́рдием Свои́м при́зри на мя́, недосто́йнаго, и обстоя́щия напа́сти свободи́ призыва́ющаго Тя́ на по́мощь, Всепречи́стая.

Первозда́ннии Ада́м и Е́ва Тобо́ю, Пречи́стая, изба́вишася от сле́з. с ни́ми же и а́з припа́даю Ти́ и молю́ся: да ми́лостию Свое́ю отреши́ и моя́ боле́зненныя сле́зы и пода́ждь поле́зная и утеше́ние.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Внуши́ печа́льный во́пль раба́ Твоего́, тре́бующаго по́мощи Твоея́, Богома́ти: Ты́ бо еси́ упова́ние мое́, потщи́ся печа́ль мою́ на ра́дость преложи́ти.

Изба́ви мя́, Ма́ти Бо́жия, от язы́ка льсти́ва и от челове́ка непра́ведна изми́ мя́, безпа́мятна: вся́ Ты́ мо́жеши, я́ко Ма́ти Зижди́теля моего́ су́щи.

Ве́м Тя́, Богоблагода́тная, многотру́дным Целе́бницу, и а́з, немощны́й ду́хом, зову́: от напа́стей си́х и печа́ли свободи́ и спаси́ мя́, Влады́чице, к Тебе́ прибега́юща.

Изба́ви мя́ от напа́сти сея́ и беды́, Богоневе́сто, Тя́ бо устро́и Бо́г на спасе́ние и заступле́ние су́щу Хода́таицу, сего́ ра́ди и мне́, недосто́йну, исхода́тайствуй от сея́ печа́ли свобожде́ние.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты́ на́м помози́: на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

И́кос:

Простри́ дла́ни Твоя́, и́миже все́х Влады́ку, я́ко Младе́нца, прия́ла еси́ за мно́жество бла́гости: не оста́ви на́с, всегда́ наде́ющихся на Тя́, бо́дренною Твое́ю моли́твою, и неисче́тною просты́нею уще́дри на́с, и пода́ждь душа́м на́шим милосе́рдие Твое́, во ве́ки источа́ющи. Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щи милосе́рдия щедро́ты, ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя́.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Ты́ еси́, Пречи́стая Богоро́дице, Покрови́тельница моя́ и непреста́нное ра́дование души́ моея́, но, о Влады́чице Богоро́дице, не пре́зри мя́, одержи́маго лю́тою бедо́ю и неутеши́мою печа́лию.

Ты́ еси́ кре́пость моя́, Пречи́стая Влады́чице, и в наше́дших на мя́ неча́емых ско́рбех утеше́ние, и сего́ ра́ди а́з, недосто́йный ра́б Тво́й, всенаде́жно вопию́ Ти́: поми́луй мя́, па́дшаго.

Исцели́ душе́вныя моя́ я́звы, Влады́чице, и заступи́ мя́, раба́ Твоего́, и изба́ви мя́ от оболга́ния сего́ непра́веднаго и от вся́каго наве́та, и от развраще́ния изми́ мя́, Преблагослове́нная.

Сокруши́ сове́ты непра́ведныя, и́же и на мя́ изощре́ни су́ть, а́з бо ины́я по́мощи не и́мам, ра́зве Тебе́, Чи́стая, и к Тебе́ прибега́ю: не попусти́ ми́ поги́бнути, я́ко вся́ Тебе́ возмо́жна.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Ду́шу мою́ сохрани́ под кро́вом крилу́ Твое́ю, Преблагослове́нная Богоро́дице, от разли́чных належа́щих на мя́ бе́д и скорбе́й изба́ви, да не пора́дуется вра́г мо́й о мое́й поги́бели, но да сла́влю Тя́, Бо́жию Ма́терь, во ве́ки.

А́з убоя́хся по́мощи челове́ческия иска́ти, прибего́х к Тебе́, Всенепоро́чная, Ты́ еси́ всенаде́жная Храни́тельница христиа́ном; дне́сь к покро́ву Твоему́ прибего́х, наде́яся на ми́лость благоутро́бия Твоего́, но Ты́ ма́терски поми́луй мя́, да сла́влю Тя́ во ве́ки.

Ты́ еси́, Пречи́стая, просвеще́ние мое́ и избавле́ние, Ты́ еси́ Помо́щница моя́ всера́достная, и стена́ неруши́мая, и сла́ва, и хвала́ моя́, Всенепоро́чная Де́во, Тебе́ усе́рдно покланя́юся и вопию́: спаси́ мя́, отча́явшагося, да просла́влю Тя́.

На Тя́ всю́ наде́жду возложи́х спасе́ния моего́, Неискусобра́чная Богороди́тельнице, и на по́мощь призыва́ю Тя́: спаси́ мя́ от печа́ли сея́ и напа́сти, разреши́ плени́цы зо́л мои́х и от все́х скорбе́й изба́ви мя́, да сла́влю Тя́ во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

И́зсше, я́ко скуде́ль, от печа́ли кре́пость моя́ и до а́да прибли́жихся от я́зв душепа́губных, предвари́, Ма́ти Бо́жия, заступле́нием Свои́м от одержа́щих мя́ скорбе́й руко́ю ми́лости Твоея́, да сла́влю Тя́, Чи́стая Присноде́во.

Всенепоро́чная Отрокови́це, все́м ве́рным кре́пкая Помо́щнице и упова́ние христиа́ном, бу́ди о мне́ неотсту́пная Моле́бница к Сы́ну Твоему́ и Бо́гу, в Тро́ице сла́вимому, и пода́ждь свобожде́ние от наше́дшия на мя́ напа́сти, да вопию́ Ти́: ра́дуйся, Присноде́во.

Ты́ еси́ кре́пость моя́, Пречи́стая, и прибе́жище, и стена́ необори́мая, Ты́ еси́ те́плая к Бо́гу Моли́твенница, вся́ких мя́ напа́стей и бе́д свободи́, еди́на Благослове́нная, и ра́туемыя на мя́ всу́е разжени́, я́ко пра́х, да пою́ Ти́: ра́дуйся, Преблаже́нная Богоро́дице, Чи́стая Присноде́во.