Канон Пресвятой Богородице пред иконой «Порт-Артурская» («Торжество Пресвятой Богородицы»)

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̀, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ра́достнѡ тѝ, бцⷣе, а҆́гг҃ли и҆ всѝ ст҃і́и че́стнѡ слꙋ́жатъ, и҆ блажа́тъ тѧ̀ нбⷭ҇ныхъ хода́таицꙋ, кꙋ́пнѡ же и҆ земноро́днїи въ весе́лїи восхвалѧ́емъ тѧ̀ и҆ ᲂу҆се́рднѡ млⷭ҇ти про́симъ: ѡ҆зарѝ на̑ша сєрдца̀ влⷣчце, пѣ́снь воспѣ́ти твоеѧ̀ і҆кѡ́ны ѡ҆брѣ́тенїю.

Ро́ди земні́и стеце́мсѧ, ᲂу҆мы̀ та́йнѡ ѡ҆чи́стивше, во ст҃ꙋ́ю цр҃ковь мт҃ри хрⷭ҇та̀ бг҃а на́шегѡ, къ приснотекꙋ́щемꙋ и҆сто́чникꙋ ст҃ѣ́й і҆кѡ́нѣ твое́й, бцⷣе, и҆сточа́етъ бо ѻ҆би̑льныѧ да̑ры пѣ́снь вѣ́рнѡ вопїю́щымъ: ра́дꙋйсѧ, бл҃гослове́ннаѧ, и҆з̾ тебѣ́ бо рожде́йсѧ бг҃ъ на́шъ.

Стра́нное чꙋ́до ви́жꙋ и҆ пресла́вное, бцⷣе: ка́кѡ херꙋві́мскаго творца̀ зачала̀ є҆сѝ! ка́кѡ невмѣсти́маго бг҃а, во ᲂу҆тро́бѣ вмѣсти́ла є҆сѝ! ка́кѡ жи́знь сꙋ́щꙋю пло́тїю ѡ҆блекла̀ є҆сѝ, и҆ сп҃си́телѧ всемꙋ̀ мі́рꙋ родила̀ є҆сѝ, бг҃а кꙋ́пнѡ и҆ чл҃вѣ́ка.

Под̾ твою̀ млⷭ҇ть прибѣга́емъ, всѝ ро́ди человѣ́честїи, бцⷣе дв҃о, просвѣтѝ на́съ свѣ́томъ сн҃а твоегѡ̀ хрⷭ҇та̀ бг҃а на́шегѡ, и҆ молѧ́щихсѧ и҆ кла́нѧющихсѧ прилѣ́жнѡ і҆кѡ́нѣ твое́й, сохранѝ и҆ сп҃сѝ, бл҃га́ѧ застꙋ́пнице.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ въ бжⷭ҇твеннѣй твое́й сла́вѣ, вѣнцє́въ сла́вы сподо́би.

Кꙋ́ю досто́йнꙋю похвалꙋ̀ принесе́мъ неизрече́ннѣй млⷭ҇ти твое́й, бцⷣе, ꙗ҆́кѡ ѡ҆брѣ́тенїемъ пречⷭ҇тыѧ твоеѧ̀ бжⷭ҇твенныѧ і҆кѡ́ны, ѕлочести́выхъ сопоста́тъ поража́еши и҆ ѿгонѧ́еши, пра́вѡ сла́вѧщихъ тѧ̀ спаса́еши.

Бжⷭ҇твенное твоеѧ̀ і҆кѡ́ны ѡ҆брѣ́тенїе, ꙗ҆́кѡ свѣтоно́сное на́мъ возсїѧ̀ со́лнце, пресла́вныхъ чꙋде́съ лꙋчѝ и҆спꙋща́еши, тьмꙋ̀ невѣ́рїѧ и҆ і҆дѡлослꙋже́нїѧ бл҃года́тїю твое́ю просвѣща́еши, сщ҃е́нными твои́ми, влⷣчце, моли́твами.

Дре́вле и҆спо́лнила блгⷣти первопи́саннꙋю і҆кѡ́нꙋ твою̀, бцⷣе, та́ же и҆ ны́нѣ блгⷣть и҆́стинствꙋетъ сїѧ́нїемъ вѣ́ры во і҆кѡ́нѣ твое́й, къ не́йже всѝ съ вѣ́рою прибѣга́юще бл҃ги́хъ проше́нїй прїе́млемъ и҆сполне́нїе.

Ра́дꙋйсѧ прест҃а́ѧ дв҃о мр҃і́е, ѿ тебѣ̀ цр҃ь црⷭ҇твꙋющихъ пл҃ть воспрїѧ́ти и҆зво́ли, ты̀ хода́таице междꙋ̀ бг҃омъ и҆ человѣ̑ки, не́бо и҆ землѧ̀ твои́мъ бл҃гослове́ннымъ плодо́мъ примире́нны, и҆спросѝ ᲂу҆ чл҃вѣколю́бца бг҃а на́шимъ согрѣше́нїѧмъ проще́нїе и҆ ѿ тлѣ́нїѧ сме́ртнагѡ сп҃се́нїе.

Сѣда́ленъ:

Вели̑чїѧ твоѧ̑ кто̀ и҆сповѣ́сть, бг҃ороди́тельнице, ꙗ҆́кѡ возвесели́ла є҆сѝ дꙋ́ши правосла́вныхъ гра́да кі́ева, въ видѣ́нїи подви́гла и҆̀хъ къ созида́нїю вели́кагѡ бж҃їѧ да́ра, пречꙋ́дныѧ і҆кѡ́ны твоеѧ̀, бцⷣе, и҆ ꙗ҆ви́ла во́лю свою̀ бы́ть защи́тницѣй хрⷭ҇толюби́выхъ во́євъ да́льней рѡссі́и, ѿ врагѡ́въ защища́ѧ, и҆̀же по бз҃ѣ на тѧ̀ ᲂу҆пова́нїе возлага́ющихъ, ны́нѣ же, всемлⷭ҇тиваѧ влⷣчце, не лишѝ на́съ твоегѡ̀ застꙋпле́нїѧ, сп҃сѝ странꙋ̀ на́шꙋ правосла́внꙋю ѿ всѧ́кагѡ ѕла̀, да тобо́ю хва́лѧщесѧ не постыди́мсѧ во вѣ́ки.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щїѧ: сла́ва, хрⷭ҇тѐ, си́ле твое́й.

Почти́мъ лю́дїе непрело́жное ко творцꙋ̀ хода́тайство, пречⷭ҇тꙋю дв҃ꙋ мр҃і́ю и҆ пречꙋ́днꙋю тоѧ̀ і҆кѡ́нꙋ, лобыза́юще со стра́хомъ припа́дающе мо́лимсѧ, возбꙋдѝ на́съ помраче́нныхъ ѿ сна̀ грѣхо́внагѡ, и҆ ѿ всѧ́кагѡ ѡ҆бстоѧ́нїѧ млⷭ҇тивнѡ и҆зба́ви.

Бжⷭ҇твенный прⷪ҇ро́къ а҆ввакꙋ́мъ, ви́дѧ грѧдꙋ́щаго ѿ го́ры приѡсѣне́нныѧ, бг҃а, незаходѧ́щее сл҃нце сп҃са хрⷭ҇та̀, ро́ждшагосѧ ѿ дв҃ы, и҆ ᲂу҆боѧ́хсѧ, мы́ же со стра́хомъ лобыза́емъ і҆кѡ́нꙋ твою̀, влⷣчце, дꙋша́ми кꙋ́пнѡ и҆ тѣлесѝ ѡ҆свѧща́емсѧ.

Бжⷭ҇твеннымъ манове́нїемъ ꙗ҆ви́ла во́лю свою̀, бцⷣе, и҆ нѣ́кїй списа́тель написꙋ́етъ пречꙋ́днꙋю твою̀ і҆кѡ́нꙋ, на рꙋ́цѣхъ твои́хъ ст҃ы́й ᲂу҆брꙋ́съ сп҃си́телѧ на́шегѡ и҆з̾ѡбрази́въ, къ не́йже притека́ющыѧ напа́стей и҆ бѣ́дъ и҆збавлѧ́еши, и҆ всѧ̑ покрыва́еши и҆ сп҃са́еши твое́ю млⷭ҇тїю.

Неискꙋсобра́чнаѧ дв҃о, дщѝ а҆враа́мова и҆ дв҃дова, непрело́жное ᲂу҆пова́нїе и҆ помо́щнице по бз҃ѣ, наде́ждꙋ на́шегѡ спⷭ҇нїѧ возложи́хомъ на тѧ̀, и҆ смире́ннѡ мо́лимсѧ: ѡ҆дождѝ всѣ̑мъ бога̑тыѧ дꙋшесп҃си́тельныѧ млⷭ҇ти.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Предрожа́йшей нбⷭ҇нѣй маргарі́тѣ, приснодв҃о мр҃і́е, всѧ́ко сꙋщество̀ по достоѧ́нїю недоꙋмѣ́етъ воспѣ́ти тѧ̀: па́че го́рнихъ чинѡ́въ возвели́чена є҆сѝ, ѡ҆деснꙋ́ю непристꙋ́пнагѡ бг҃а въ ри́захъ позлаще́нныхъ и҆ преиспещре́нныхъ стои́ши, къ тебѣ̀ вопїе́мъ и҆з̾ плаче́внѣй ю҆до́ли мі́ра сегѡ̀: не пре́зри моле́нїй на́шихъ и҆ да́рꙋй ско́рꙋю твою̀ по́мощь.

И҆дѣ́же возблиста́етъ свѣ́тлость блгⷣти твоеѧ̀ влⷣчце, стра́хомъ и҆счеза́ютъ гꙋби́телїе де́мѡни и҆ паꙋчи́на ѕлоко́зненныхъ мечта́нїй и҆́хъ разрꙋша́етсѧ, ра́дꙋетсѧ же хрⷭ҇тїа́нъ мно́жество и҆ пѣ́снь тебѣ̀ возноси́ти подвиза́ютсѧ: ра́дꙋйсѧ, бжⷭ҇твенный покро́ве дꙋ́шъ на́шихъ.

И҆са́їа бжⷭ҇твенный и҆ чꙋ́дный прⷪ҇ро́къ и҆здале́ча прови́дѧ вели́кое чꙋ́до, ликꙋ́ѧ: сѐ дв҃о и҆мѣ̀ во чре́вѣ и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀, є҆го́же велича́ющее съ нбⷭ҇ными вѡ́и пречⷭ҇тꙋю мт҃рь ᲂу҆блажа́емъ.

Ѽ прест҃а́ѧ влⷣчце бцⷣе, млⷭ҇рдїѧ сꙋ́щи и҆сто́чникъ, вѣ́рное ᲂу҆пова́нїе и҆ прибѣ́жище правовѣ́рныхъ, кі́ими ѱалмы̑ и҆ пѣ̑сни воспое́мъ вели̑чїѧ твоѧ̑: бг҃а бо воплоти́вшагосѧ на́съ ра́ди родила̀ є҆сѝ во сп҃се́нїе на́ше всемі́рное и҆ и҆збавле́нїе.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечтⷭ҇но́е соверша́юще пра́зднество, бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Творе́цъ и҆ и҆зба́витель на́шъ гдⷭ҇ь, и҆з̾ твои́хъ ложе́снъ проше́дъ, пречⷭ҇таѧ, ѡ҆болкі́йсѧ, распны́йсѧ и҆ погребы́йсѧ за ны̀ неблагода̑рныѧ и҆ врата̀ а҆́дѡвы воскр҃се́нїемъ сокрꙋши́лъ є҆сѝ. тѣ́мже мы̀, ꙗ҆́кѡ всемлⷭ҇тивѣй мт҃ри бж҃їей немо́лчнѡ вопїе́мъ: свободѝ на́съ ѿ рабо́ты вра́жїѧ и҆ ᲂу҆пра́ви ко сп҃се́нїю, ꙗ҆́кѡ ты̀ всѧ̑ мо́жеши хотѧ́й.

Пребеззакѡ́нныѧ на и҆́мѧ твоѐ хꙋлꙋ̀ возно́сѧтъ, ст҃ѣ́йшаѧ цр҃и́це, ди̑вныѧ чꙋдеса̀ твоѧ̑ мнѧ́тъ бы́ти измышле́нны, мы́ же и҆сповѣ́дꙋемъ преве́лїи млⷭ҇ти и҆ чꙋдеса̀ твоѧ̑, и҆ прибѣга́емъ къ ст҃ѣ́й і҆кѡ́нѣ твое́й, ꙗ҆́кѡ всемо́щнѣй и҆ ско́рѣй застꙋ́пницѣ.

И҆дѣ́же прославлѧ́етсѧ ст҃о́е и҆́мѧ пречⷭ҇той влⷣчцы, та́мо всѧ́ческихъ бл҃ги́хъ и҆стѡ́чницы пролива́ютсѧ: дарѡ́въ ст҃а́гѡ дх҃а вѣ́рнїи и҆сполнѧ́ютсѧ, грѣхѡ́въ проще́нїе, болѣ́зней и҆сцѣле́нїе и҆ дꙋ́шъ спⷭ҇нїѧ сподоблѧ́ютсѧ, ѿ поднбⷭ҇нѣй ѕло́бы и҆ хи́щныхъ рꙋ́къ и҆збавлѧ́ютсѧ ст҃ы́ми твои́ми предста́тельствы, влⷣчце.

Ты̀ є҆сѝ крѣ́пость на́ша, похвало̀ и҆ ра́дованїе, неꙋсыпа́емаѧ храни́тельнице и҆ застꙋ́пнице по бз҃ѣ, вѣ́рное прибѣ́жище и҆ предста́тельство непосты́дное, покро́въ страны̀ рѡссі́йскїѧ, пречⷭ҇таѧ влⷣчце, со всѣ́ми ст҃ы́ми молѝ сп҃стѝ рабы̑ твоѧ̑.

Конда́къ, гла́съ и҃:

И҆збра́ннѣй ѿ всѣ́хъ родѡ́въ застꙋ́пницѣ на́шей и҆ цр҃и́цѣ, / покро́вомъ своеѧ̀ бл҃гости покрыва́ющей предѣ́лы землѝ дальнерѡссі́йскїѧ, / бл҃года́рствєннаѧ пѣ́нїѧ прино́симъ тѝ рабѝ твоѝ, бцⷣе. / ты́ же ꙗ҆́кѡ всемлⷭ҇тиваѧ влⷣчце, / ѿ всѧ́кихъ на́съ бѣ́дъ сп҃сѝ и҆ вѣ́чныхъ мꙋ́къ свободѝ, да ра́дꙋющесѧ зове́мъ тѝ: / ра́дꙋйсѧ, цр҃и́це препросла́вленнаѧ, // предѣ́лы дальнерѡссі́йскїѧ землѝ (всѣ́хъ концє́въ землѝ) млⷭ҇тїю свое́ю не ѡ҆ставлѧ́ющаѧ.

І҆́косъ:

Возсїѧ́ла ꙗ҆́кѡ виѳлеє́мскаѧ ѕвѣзда̀, пречꙋ́днаѧ твоѧ̑ і҆кѡ́на, бцⷣе, гра́дъ владивосто́къ и҆ предѣ́лы да́льней рѡссі́и свѣ́томъ хрⷭ҇то́вымъ ѡ҆зарѧ́юще, ѿ безстꙋ́днагѡ лица̀ а҆́дскагѡ врага̀ и҆ споспѣ̑шникъ є҆гѡ̀ защища́юще. бл҃гопоспѣшѝ, премлⷭ҇рдаѧ мт҃и, ѡ҆бꙋрева́ємымъ въ ѻ҆кеа́не сꙋ́етнагѡ мі́ра сегѡ̀ сп҃се́нїемъ твои́мъ: помозѝ безпомѡ́щнымъ, ᲂу҆тѣ́ши пла́чꙋщихъ, возвеселѝ скорбѧ́щихъ, ты́ бо є҆сѝ живоно́сный млⷭ҇тей и҆сто́чникъ съ вѣ́рою и҆ моли́твами къ тебѣ̀ прибѣга́ющымъ.

Пѣ́снь з҃.

І҆рмо́съ: Не послꙋжи́ша тва́ри, бг҃омꙋ́дрїи па́че созда́вшаго, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Ра́дꙋютсѧ и҆ веселѧ́тсѧ вѣ́рнїи лю́дїе, пречꙋ́дномꙋ ѡ҆брѣ́тенїю і҆кѡ́ны пречⷭ҇тыѧ влⷣчцы, молѧ́сѧ и҆ колѣнопреклонѧ́ѧсѧ пред̾ ст҃ы́мъ и҆зѡбраже́нїемъ лица̀ є҆ѧ̀, возводѧ̀ ᲂу҆́мъ на первоѡбра́зное, до́ндеже ѡ҆брѧ́щемъ млⷭ҇ти є҆ѧ̀, во бл҃говре́меннꙋю по́мощь къ наслѣ́дїю нбⷭ҇нагѡ ѡ҆бѣтова́нїѧ.

Речѐ безꙋ́мный вра́гъ въ се́рдцѣ свое́мъ: низложꙋ̀ правосла́внꙋю рѡссі́ю, хра́мы и҆ ѻ҆би́тєли є҆ѧ̀ разрꙋшꙋ̀, и҆ вложꙋ̀ дх҃ъ лжи́вый во ᲂу҆ста̀ и҆ се́рдце вѣ́рныхъ хрⷭ҇тїа́нъ. ᲂу҆скорѝ, влⷣчце, и҆ и҆зба́ви на́съ ѿ сѣ́ти ловѧ́щихъ и҆ сокрꙋшѝ годы́ню и҆́хъ и҆ сп҃сѝ предста́тельствомъ твои́мъ къ сн҃ꙋ твоемꙋ̀ вѣ́рнѡ вопїю́щихъ: ѻ҆тє́цъ на́шихъ бж҃е, бл҃гослове́нъ є҆сѝ.

Неꙋсы́пнꙋю и҆ бг҃опрїѧ́тнꙋю и҆мꙋ́ще, пречⷭ҇таѧ, мл҃твꙋ и҆ нерꙋши́мꙋю крѣ́пости держа́вꙋ, врагѡ́въ на́шихъ де́рзость разорѝ, и҆ вы̑ѧ и҆́хъ под̾ но́зѣ хрⷭ҇толюби̑вымъ во́ємъ на́шимъ низложѝ, да возвесели́мсѧ ѡ҆ тебѣ̀, рабѝ твоѝ, сн҃ꙋ твоемꙋ̀ сп҃си́телю вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ.

Простра́ннѣйшїй дво́ре и҆ пресвѣ́тлейшаѧ пала́то, мр҃і́е, мт҃и хрⷭ҇та̀ бг҃а на́шегѡ, непостижи́мъ є҆́сть ѻ҆́бразъ, дв҃о, зача́тїѧ твоегѡ̀, зача́тїе без̾ сѣ́мени, ржⷭ҇тво̀ без̾ мꙋ́жа, безпло́тный воплоти́сѧ ѿ тебѣ̀, сн҃ъ бж҃їй сп҃си́тель ми́ра, є҆мꙋ́же вопїе́мъ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Чⷭ҇тѣ́йшаѧ ст҃а́гѡ дх҃а прїѧ́телище и҆ непоро́чное бг҃а сло́ва вмѣсти́лище, прест҃а́ѧ мт҃и и҆ приснодв҃о мр҃і́е, ра́дость а҆́гг҃лѡвъ и҆ человѣ́кѡвъ, сладча́йшаго і҆исꙋ́са хрⷭ҇та̀ ѿ дх҃а ст҃а́гѡ пло́тїю родила̀ є҆сѝ, є҆го́же ᲂу҆жаса́етсѧ тва́рь и҆ трепе́щꙋтъ го́рнїи си̑лы непреста́ннѡ вопїю́ще: ст҃ъ, ст҃ъ, ст҃ъ є҆сѝ, бж҃е препѣ́тый и҆ превозноси́мый во вѣ́ки.

Бг҃ъ богѡ́въ чрез̾ а҆рха́гг҃ла гаврїи́ла, мр҃і́и возвѣща́ѧ: ра́дꙋйсѧ вмѣсти́лище невмѣсти́маго цр҃ѧ̀, ра́дꙋйсѧ, бл҃года́тнаѧ, носи́ло бжⷭ҇тва̀, ра́дꙋйсѧ, а҆да́мово воззва́нїе, съ тобо́ю гдⷭ҇ь, и҆ тебє̀ ра́ди съ на́ми сп҃са́ѧ на́съ. є҆го́же пое́мъ и҆ превозно́симъ во вѣ́ки.

Ты̀ похвала̀ хрⷭ҇тїа́нѡмъ є҆сѝ, влⷣчце, непобѣди́мое ѻ҆рꙋ́жїе, нерꙋши́маѧ стѣно̀, къ тебѣ̀ прибѣга́ющымъ, тѧ̀ ны́нѣ на по́мощь призыва́емъ: не да́ждь врагѡ́мъ вознести́сѧ на лю́ди твоѧ̑, и҆ и҆̀же не хва́лѧтъ бг҃а на́шегѡ, и҆ твое́й і҆кѡ́нѣ не кла́нѧютсѧ, си́хъ побѣдѝ и҆ сп҃сѝ дꙋ́ши на́шѧ.

Бл҃гоꙋкраше́нный до́ме непостижи́маго цр҃ѧ̀, цр҃ко́вное незаходи́мое и҆ лꙋчеза́рное свѣти́ло, пречꙋ́днаѧ твоѧ̀ і҆кѡ́на, бцⷣе ꙗ҆ви́сѧ: ти́хое приста́нище ѡ҆бꙋрева́ємымъ, пла́чꙋщимъ и҆ скорбѧ́щимъ ра́йское ᲂу҆тѣше́нїе и҆ правовѣ́рнымъ хрⷭ҇тїа́нѡмъ спⷭ҇нїе.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ, бцⷣе чⷭ҇таѧ приснодв҃о.

Ѽ свѣ́те нбⷭ҇нымъ свѣ́томъ ѡ҆сїѧ́нный, цр҃и́це пребл҃га́ѧ, ли́къ прⷪ҇ро́ческїй многоѻбра́знѡ провозвѣща́етъ и҆ вои́стиннꙋ тѧ̀ нарица́етъ: простра́ннѣйшꙋю нб҃съ и҆ скрижа́ль бг҃опи́саннꙋю, сѣ́нь ст҃ꙋ́ю и҆ кꙋпинꙋ̀ неѡпали́мꙋю, го́рꙋ же и҆ лѣ́ствицꙋ и҆ же́злъ процвѣ́тшїй, мы́ же тѧ̀ вои́стиннꙋ, бцⷣꙋ, велича́емъ.

Бг҃ъ ста̀ въ со́нме богѡ́въ: ѿ высоча́йшагѡ бл҃говоле́нїѧ є҆гѡ̀, ꙗ҆́кѡ ра́йскїй цвѣ́тъ произы́де мт҃рь бж҃їѧ, прїиди́те и҆ припади́те къ стопа́мъ є҆ѧ̀, всѝ лю́бѧщїи и҆ почита́ющїи ю҆̀, ѻ҆на́ бо є҆́сть и҆сто́чникъ вѣ́чной жи́зни, тꙋ́не напоѧ́етъ жа́ждꙋщыѧ, и҆ пїю́щїи ѿ сегѡ̀ не вжа́ждꙋтъ во вѣ́ки.

Оу҆́тро та́инственное ꙗ҆ви́ласѧ є҆сѝ, приснодв҃о мр҃і́е, пречⷭ҇таѧ твоѧ̑ і҆кѡ́на во мра́кѣ ѿча́ѧнїѧ сѣдѧ́щимъ, де́монѡвъ прогонѧ́етъ и҆ ли́ца нечести́выхъ ѡ҆мрача́етъ, не терпѧ́тъ бо взира́ти на си́лꙋ є҆ѧ̀, бѣ́гаютъ же и҆ и҆счеза́ютъ, мы́ же просвѣ́щшисѧ, і҆кѡ́нꙋ твою̀ лобыза́емъ, да тѧ̀, бцⷣе, велича́емъ.

Сп҃си́тельное приста́нище и҆ непрело́жное хрⷭ҇тїа́нъ ᲂу҆пова́нїе! недоꙋмѣ́етъ всѧ́къ ᲂу҆́мъ по достоѧ́нїю воспѣ́ти тѧ̀, мт҃и бж҃їѧ: всеѧ̀ тва̑ри чⷭ҇тнѣ́йши вои́стиннꙋ показа́ласѧ є҆сѝ, творца̀ всѧ́ческихъ и҆ пищеда́телѧ родила̀ и҆ млеко́мъ ѿ сосє́цъ пита́ла є҆сѝ, ны́нѣ прїимѝ прилѣ́жнѡ возноси́мꙋю тебѣ̀ пѣ́снь и҆ сп҃са́й на́съ всегда̀, на тѧ́ бо надѣ́емсѧ.

Свѣти́ленъ:

І҆кѡ́нꙋ твою̀ всечⷭ҇тнꙋ́ю, въ зало́гъ бл҃говоле́нїѧ твоегѡ̀, вѣ́рномꙋ во́инствꙋ да́льней рѡссі́и дарова́ла є҆сѝ, влⷣчце, покрыва́ѧ и҆ сохранѧ́ѧ ю҆̀ ѿ наше́ствїѧ вра́жїѧ на тѧ̀ ᲂу҆пова́ющыѧ: ѡ҆ мт҃и цр҃ѧ̀ хрⷭ҇та̀ бг҃а, бꙋ́ди и҆ на́мъ грѣ̑шнымъ прибѣ́жище спⷭ҇нїѧ въ неча́ѧнныхъ бѣда́хъ, и҆ хода́таице вѣ́чныѧ жи́зни.

Сла́ва и҆ ны́нѣ: Прїиди́те, почерпе́мъ ѿпꙋще́нїѧ ѿ неистощи́магѡ и҆сто́чника, точа́щаго ст҃ы́ню, пречⷭ҇тыѧ дв҃ы марі́и, жи́знь сꙋ́щꙋю ро́ждши, хрⷭ҇та̀ бг҃а на́шегѡ, ра́йскихъ двере́й ѿверзе́нїе и҆ всего̀ мі́ра сп҃се́нїе. се́й є҆́сть прⷪ҇рѡ́ки гл҃го́лавый, томꙋ̀ поклони́мсѧ, бг҃ꙋ и҆ сп҃сꙋ дꙋ́шъ на́шихъ.