Канон Пресвятой Богородице пред иконой «Абалакская» («Знамение»)

Пѣ́снь а҃.

І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Прекра́сный хра́ме трисл҃нечнаго свѣ́та, ᲂу҆красѝ моѧ̑ чꙋ̑вства, молю́сѧ, да цѣломꙋ́дренъ сы́й, чтⷭ҇но́е твоѐ во а҆бала́цѣ ѻ҆́браза ꙗ҆вле́нїе воспою̀, чⷭ҇таѧ.

Ра́дꙋѧсѧ, къ твое́й чтⷭ҇нѣ́й і҆кѡ́нѣ припа́даю, пречⷭ҇таѧ, дꙋ́шꙋ мою̀ просвѣтѝ, тѣ́ло ѿ скве́рны ѡ҆чи́сти, и҆ ѿ лю́тыхъ мѧ̀ недꙋ́гѡвъ свободи́вши, покажѝ прича́стника нбⷭ҇нагѡ црⷭ҇твїѧ.

И҆знемога́ющїй ᲂу҆́мъ мо́й напра́ви, молю́ тѧ, є҆ди́на приснодв҃о, къ позна́нїю є҆ди́нагѡ сꙋ́щагѡ бг҃а, и҆ щедролю́бїе да́рꙋй мѝ, и҆ бл҃года́тїю хрⷭ҇то́вою ᲂу҆краси́ мѧ, бг҃обл҃года́тнаѧ.

Зрѧ́щи грѣхо́вность и҆ хꙋ́дость є҆стества̀ моегѡ̀, молю́ тѧ, дв҃о: да́ждь мѝ позна́нїе моеѧ̀ не́мощи, да слеза́ми мно́гими ѡ҆мы́ю скве́рное моѐ житїѐ, є҆ди́на бг҃обл҃же́ннаѧ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Ра́ди млⷭ҇ти твоеѧ̀ низложѝ во мнѣ̀ прило́ги бѣсѡ́вскїѧ, да ᲂу҆́мъ ѡ҆чи́стивъ и҆ се́рдце ᲂу҆цѣломꙋ́дривъ, къ и҆́стинномꙋ бг҃опозна́нїю ᲂу҆стремлю́сѧ, є҆ди́на дв҃о всепѣ́таѧ.

И҆зво́лила є҆сѝ столпо́мъ ѻ҆́блачнымъ ꙗ҆ви́ти добро́тꙋ ѻ҆́браза твоегѡ̀ вдови́цѣ смире́ннѣй, та́кѡ и҆ ны́нѣ при́зри на рабы̑ твоѧ̑, призыва́ющыѧ тѧ̀ и҆ тре́бꙋющыѧ твоеѧ̀ по́мощи, бл҃года́тнаѧ.

Бꙋ́дꙋщее мꙋче́нїе, ꙗ҆́кѡ наказа́нїе за сꙋетꙋ̀ дѣѧ́нїй грѣхо́вныхъ, и҆ кра́ткїй всѣ́хъ веще́й и҆ всегѡ̀ мі́ра тлѣ́ннагѡ коне́цъ, помышлѧ́ти сподо́би мѧ̀, дв҃о, да бл҃года́тїю сн҃а твоегѡ̀, на пꙋ́ть и҆́стиннагѡ покаѧ́нїѧ наста́вленъ, вѣ́чнагѡ ѡ҆сꙋжде́нїѧ и҆збѣ́гнꙋ, пренепоро́чнаѧ.

Люби́ти бли́жнѧго и҆ покрыва́ти согрѣшє́нїѧ є҆гѡ̀ да́ждь мѝ, дв҃о, честолю́бїе же, ѡ҆сꙋжде́нїе и҆ праздносло́вїе ѿдалѝ ѿ менє̀, да плоды̀ достѡ́йны принесꙋ̀ сн҃ꙋ твоемꙋ̀, є҆ди́на пречⷭ҇таѧ.

И҆́нъ конда́къ, гла́съ д҃:

А҆бала́кской і҆кѡ́нѣ влⷣчцы на́шеѧ бцⷣы, бл҃гоговѣ́йнѡ поклонѧ́ющесѧ, со ᲂу҆миле́нїемъ взыва́емъ: сп҃сѝ на́съ мл҃твами твои́ми, прест҃а́ѧ дв҃о.

Сѣда́ленъ, гла́съ то́йже:

Глаго́лы на́шѧ ᲂу҆слы́ши, влⷣчце, призыва́ющихъ тѧ̀ и҆ тре́бꙋющихъ твоеѧ̀ по́мощи, да́рꙋй на́мъ на врагѝ ѡ҆долѣ́нїе и҆ дꙋша́мъ на́шымъ сп҃се́нїе, ты́ бо є҆сѝ пода́тельница бл҃ги́хъ, нб҃сѝ цр҃и́ца и҆ мі́рꙋ помо́щница.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Ѡ҆ тебѣ̀, бг҃омт҃и, нбⷭ҇ное торжествꙋ́етъ сосло́вїе, съ ни́мже и҆ мы̀ земноро́днїи пра́зднꙋемъ дне́сь, прославлѧ́юще ꙗ҆вле́нїе ѻ҆́браза твоегѡ̀, пречⷭ҇таѧ.

Се́рдце моѐ ѡ҆жесточе́нное ᲂу҆мѧгчѝ, дв҃о, и҆ росо́ю млⷭ҇рдїѧ напоѝ и҆зсо́хшꙋю дꙋ́шꙋ мою̀, да бли́жнемꙋ своемꙋ̀ и҆́скреннѣ послꙋжи́въ, просла́влю тѧ̀, бг҃оневѣ́сто влⷣчце.

Е҆ди́на приснодв҃о, ѿ тлѣ́нныхъ и҆ вре́менныхъ ᲂу҆́мъ мо́й ѿвратѝ, и҆ млⷭ҇рдїемъ твои́мъ покры́вши, пла́мень страсте́й мои́хъ ᲂу҆гасѝ.

Ра́бское сребролю́бїе и҆ забве́нїе бл҃гоче́стїѧ потребѝ ѿ правосла́вныхъ, влⷣчце, да жи́знь нескве́рнꙋю воспрїе́мше, невозбра́ннѡ є҆ди́ными ᲂу҆сты̀ восхва́лѧтъ тѧ̀, приснодв҃о.

Пѣ́снь є҃.

І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Ди́внагѡ ѻ҆́браза бг҃омт҃ре ꙗ҆вле́нїе, въ не́мже ст҃и́тель нїкола́й наставлѧ́етъ вдови́цꙋ чи́стꙋю ѡ҆ твое́мъ зна́менїи повѣ́дати лю́демъ, пренепоро́чнаѧ, да тьмꙋ̀ сꙋевѣ́рїѧ ѿгна́вши, и҆́стинный свѣ́тъ сп҃се́нїѧ воспрїи́мꙋтъ.

И҆спо́лни ра́дости се́рдце моѐ, пречⷭ҇таѧ, и҆ лю́тыхъ собла́знѡвъ и҆зба́вльши, мглꙋ̀ грѣхо́внꙋю развѣ́й и҆ бл҃гостїю твое́ю хра́мъ чистоты̀ и҆ всѧ́кїѧ добродѣ́тели мѧ̀ содѣ́лай.

Е҆ди́но дꙋшѝ моеѧ̀ ᲂу҆пова́нїе, бцⷣе, кра̑снаѧ мі́ра сегѡ̀ возненави́дѣти мѧ̀ наста́ви, молю́ тѧ, чⷭ҇таѧ, да помраче́нїѧ мы́сленнагѡ и҆зба́вльсѧ, ᲂу҆лꙋчꙋ̀ нетлѣ́нное сн҃а твоегѡ̀ наслѣ́дїе.

Молю́ тѧ, влⷣчце, па́мѧть сме́ртнꙋю и҆ бл҃ги̑мъ воздаѧ́нїе во мнѣ̀ ᲂу҆твердѝ, да сїѧ̑ вы́нꙋ во ᲂу҆мѣ̀ содержа̀, всѧ̑каѧ беззакѡ́нїѧ ѡ҆ста́влю и҆ црⷭ҇твїѧ нбⷭ҇нагѡ дости́гнꙋ.

Пѣ́снь ѕ҃.

І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Возводѧ́щи лю́ди ѿ тьмы̀ грѣхо́вныѧ ꙗ҆вле́нїемъ ѻ҆́браза твоегѡ̀, влⷣчце, подае́ши застꙋпле́нїе и҆ предста́тельство, да є҆ди́ными ᲂу҆сты̀ и҆ чи́стымъ се́рдцемъ просла́вѧтъ тѧ̀, є҆ди́на пречⷭ҇таѧ.

Сло́ва бж҃їѧ роди́тельнице, за́висти грѣхо́вныѧ и҆зба́ви мѧ̀, да и҆́скреннее братолю́бїе ꙗ҆влѧ́ѧ, жи́зни вѣ́чныѧ въ црⷭ҇твѣ сн҃а твоегѡ̀ сподо́блюсѧ, пребл҃гослове́ннаѧ.

Е҆ди́на бг҃омт҃и, ра́дости моѐ се́рдце и҆спо́лни, и҆ печа́ли мглꙋ̀ грѣхо́внꙋю ско́рѡ потреблѧ́ющи, наста́ви мѧ̀ пѣ́ти: ра́дꙋйсѧ, бл҃года́тнаѧ, сп҃са хрⷭ҇та̀ на́мъ ро́ждшаѧ.

Прест҃а́ѧ бцⷣе, бл҃года́тїю твое́ю любо́вь къ сн҃ꙋ твоемꙋ̀ во мнѣ̀ возгрѣ́й и҆ бли́жнемꙋ моемꙋ̀ ѿ дꙋшѝ бл҃готвори́ти наста́ви, да не пре́данъ бꙋ́дꙋ сꙋдꙋ̀ без̾ млⷭ҇ти, ꙗ҆́кѡ не сотвори́вый млⷭ҇ти, всенепоро́чнаѧ.

Конда́къ, гла́съ д҃:

Е҆ѵⷢ҇лїа хрⷭ҇то́ва бл҃говѣ́стникъ лꙋка̀ ѻ҆́бразы твоѧ̑, пречⷭ҇таѧ, дре́вле и҆з̾ѡбразѝ, вдови́ца же, є҆ди́нъ ѿ ни́хъ чꙋ́днѣ ᲂу҆зрѣ́вши, возвѣстѝ на́мъ повелѣ́нїе твоѐ, да вѣ́рнїи, къ тебѣ̀ притека́юще, зовꙋ́тъ: ра́дꙋйсѧ, влⷣчце, зна́менїе млⷭ҇ти твоеѧ̀ на́мъ ꙗ҆влѧ́ющаѧ.

І҆́косъ:

Твоегѡ̀ пресла́внагѡ ꙗ҆вле́нїѧ чꙋ́до, бцⷣе, во а҆бала́цѣ почита́ющихъ тѧ̀ ᲂу҆тѣша́етъ и҆ ᲂу҆крѣплѧ́етъ: земнорѡ́днымъ бо подае́ши незави́стнꙋю и҆сцѣле́нїѧ ра́дость, є҆́юже и҆ землѧ̀ сиби́рскаѧ, преиз̾ѻби́льнѡ ѡ҆богати́вшисѧ, весели́тсѧ ны́нѣ и҆ непреста́ннѡ вопїе́тъ тѝ: ра́дꙋйсѧ, прибѣ́жище на́ше и҆ ᲂу҆пова́нїе: ра́дꙋйсѧ, неисповѣди́маѧ всѣ̑мъ ра́досте. ра́дꙋйсѧ, ѻ҆́бразомъ свои́мъ ст҃ы́мъ на́съ просвѣща́ющаѧ: ра́дꙋйсѧ, и҆сцѣле́нїе всѣ̑мъ ско́рѡ подаю́щаѧ. ра́дꙋйсѧ, ѿ бѣ́дъ и҆ скорбе́й и҆збавле́нїе: ра́дꙋйсѧ, ѻ҆би́тели а҆бала́кской и҆ всеѧ̀ сиби́ри защище́нїе. ра́дꙋйсѧ, влⷣчце, зна́менїе млⷭ҇ти твоеѧ̀ на́мъ ꙗ҆влѧ́ющаѧ.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ.

А҆́гг҃льскїй ли́къ на нб҃сѝ пѣсносло́витъ пресвѣ́тлое твоѐ ꙗ҆вле́нїе и҆ человѣ́ческїй ро́дъ восхвалѧ́етъ тѧ̀ на землѝ, пренепоро́чнаѧ бцⷣе, ꙗ҆́кѡ мт҃и сꙋ́щи живота̀, мо́лиши ѡ҆ на́съ сн҃а твоегѡ̀, хрⷭ҇та̀ бг҃а на́шегѡ, пою́щихъ: ѻ҆тцє́въ бж҃е, бл҃гослове́нъ є҆сѝ.

Ꙗ҆́дїю въ тлѣ́нїе па́дшихъ лю́тѣ ржⷭ҇тво́мъ твои́мъ возста́вила є҆сѝ, бцⷣе дв҃о. сегѡ̀ ра́ди презрѣ́нїе вре́менныхъ и҆ жела́нїе бла̑гъ вѣ́чныхъ пода́ждь вѣ́рою пою́щымъ: ѻ҆тцє́въ бж҃е, бл҃гослове́нъ є҆сѝ.

Бѣсѡ́вскїѧ прило́ги потреблѧ́ющи, по́хѡти плотскі̑ѧ ᲂу҆кротѝ во мнѣ̀, дв҃о, и҆ дꙋшѝ мое́й здра́вїе да́рꙋющи, сподо́би вкꙋ́пѣ со ст҃ы́ми пѣ́ти: ѻ҆тцє́въ бж҃е, бл҃гослове́нъ є҆сѝ.

Ѡ҆скверни́хъ дꙋ́шꙋ мою̀ грѣха́ми мно́гими и҆ невоздержа́нїемъ всѧ́ческимъ сотвори́хъ себѐ непотре́бна пред̾ тобо́ю, пречⷭ҇таѧ влⷣчце, но ѡ҆чи́сти мѧ̀ и҆ на бг҃оꙋго́дное житїѐ наста́ви, да со ст҃ы́ми вкꙋ́пѣ воспою̀: ѻ҆тцє́въ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те, и҆ превозноси́те во всѧ̑ вѣ́ки.

Грѣхо́вное томле́нїе дꙋшѝ моеѧ̀ ᲂу҆толѝ, бцⷣе, росо́ю же бл҃года́ти твоеѧ̀ со́вѣстное жже́нїе ᲂу҆гасѝ, и҆ ѿ клеветы̀ навѣ́тꙋющихъ и҆зба́вльши, не́нависть и҆ памѧтоѕло́бїе ѿвратѝ ѿ менє̀, да бл҃года́рнѣ воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

Ѻ҆́бразъ тво́й, бцⷣе, во а҆бала́цѣ ꙗ҆́вльшїйсѧ, по́мощь и҆ застꙋпле́нїе подае́тъ всѣ̑мъ, съ вѣ́рою къ немꙋ̀ притека́ющымъ и҆ бл҃года́рнѣ вопїю́щымъ: хвали́те бг҃а и҆ превозноси́те є҆го̀ во всѧ̑ вѣ́ки.

Ра́дость вмѣ́стѡ печа́ли дꙋшѝ мое́й пода́ждь, всечⷭ҇таѧ, и҆ млⷭ҇тїю твое́ю ᲂу҆твердѝ въ ми́рѣ се́рдце моѐ, мѧте́жъ мі́ра сегѡ̀ потреблѧ́ющи, да бл҃года́рнѣ воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

ѽ пренепоро́чнаѧ дв҃о, терпѣ́нїе тве́рдое да́рꙋй мѝ во и҆скꙋше́нїи, кро́тостїю и҆ неѕло́бїемъ и҆спо́лни мѧ̀ во ѡ҆ѕлобле́нїи, да ра́дꙋѧсѧ, воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

До́мъ пречⷭ҇тыѧ бцⷣы ꙗ҆ви́сѧ ѻ҆би́тель а҆бала́кскаѧ, въ не́мже чꙋдотво́рный ѻ҆́бразъ пребыва́етъ, ꙗ҆́кѡ зна́менїе сп҃се́нїѧ землѝ сиби́рстѣй и҆ всѣ̑мъ, съ вѣ́рою къ немꙋ̀ притека́ющымъ.

И҆спо́лни ра́дости се́рдце моѐ, дв҃о чⷭ҇таѧ, ᲂу҆ныва́ющаго мѧ̀ ѡ҆живѝ и҆ ѿча́ѧнїемъ па́дшаго возста́ви, лѣ́ность же дꙋшѝ моеѧ̀ потреблѧ́ющи, во всѧ́цѣй добродѣ́тели ᲂу҆крѣпѝ, да со безпло́тными ли̑ки непреста́ннѡ тѧ̀ велича́ю.

Цѣломꙋ́дренно се́рдце сози́жди во мнѣ̀, приснодв҃о бцⷣе, ко и҆сполне́нїю во́ли сн҃а твоегѡ̀ при́снѡ наставлѧ́ющи, и҆ въ мл҃твѣ постоѧ́нство да́рꙋй мѝ, пꙋтеводи́тельнице моегѡ̀ сп҃се́нїѧ.

Е҆ди́наѧ пречⷭ҇таѧ чⷭ҇таѧ приснодв҃о, мнѡ́гїѧ млⷭ҇ти ѻ҆́бразомъ твои́мъ чꙋдотво́рнымъ во а҆бала́цѣ на́мъ ꙗ҆ви́вшаѧ, ны́нѣ бл҃года́рственное славосло́вїе воспѣва́емъ тѝ: ра́дꙋйсѧ, бл҃года́тнаѧ, землѝ сиби́рстѣй покро́въ и҆ ᲂу҆твержде́нїе.

Свѣти́ленъ: Досто́йное пѣ́нїе воздади́мъ дне́сь, вѣ́рнїи, ро́ждшей всѣ́хъ ст҃ы́хъ ст҃ѣ́йшее сло́во, сїѧ́ бо є҆́сть нетлѣ́нный сосꙋ́дъ чⷭ҇тоты̀ и҆ и҆́стиннаѧ приснодв҃а, ѿ грѣхо́вныѧ нечистоты̀ предста́тельствомъ свои́мъ на́съ и҆збавлѧ́ющаѧ.