Канон предпразднству Сретения Господня

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Сердца̀ ꙗ҆́коже рꙋ́цѣ всѝ пред̾ꙋгото́вльше, приходѧ́ща дне́сь хрⷭ҇та̀ чи́стѣ прїи́мемъ, и҆ тогѡ̀ дх҃омъ бжⷭ҇твенныхъ дарова́нїй наслади́мсѧ.

Двє́ри пред̾ѿве́рзши дне́сь, и҆́же въ зако́нѣ хра́мъ, законода́вцꙋ и҆ содѣ́телю ᲂу҆строѧ́етъ вхо́ды свѣ̑тлы, и҆ гото́витъ честны̑ѧ да́ры є҆мꙋ̀ бжⷭ҇твенное хвале́нїе.

Воспою̀ тебѣ̀, гдⷭ҇и бж҃е мо́й, млⷣнствовавшемꙋ пло́тїю, и҆ зако́нꙋ повинꙋ́вшемꙋсѧ, и҆ спа́сшемꙋ человѣ́ка, є҆гѡ́же ра́ди бы́лъ є҆сѝ чл҃вѣ́къ.

Бг҃оро́диченъ: Разꙋмѣ́въ ве́тхїй, пречⷭ҇таѧ, хра́мъ тѧ̀, влⷣчце, влⷣцѣ всѣ́хъ и҆ бг҃ꙋ жили́ще чи́сто, ли́къ проповѣ́даше велича́ѧ сла́вꙋ твою̀.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.

Взыгра́шасѧ мы́сленнѡ, ꙗ҆́же въ домꙋ̀ бж҃їи шє́ствїѧ, цр҃ѧ̀ хрⷭ҇та̀ хотѧ́ща пло́тїю прїѧ́ти.

Ꙗ҆́кѡ честны̑ѧ, хрⷭ҇тꙋ̀ пред̾ꙋгото́вльше дне́сь, вѣ́рнїи, да́ры прїѧ̑тны, хвалꙋ̀, сего̀ съ ра́достїю ᲂу҆срѧ́щемъ.

Ны́нѣ пре́йде сѣ́нь, и҆ пред̾и́де и҆́стина, благода́ти прише́дши: ны́нѣ под̾имѝ хрⷭ҇та̀, сѷмеѡ́не.

Бг҃оро́диченъ: Преста̀ є҆́же въ сѣ́нехъ и҆ ѻ҆бра́зныхъ начерта́нїихъ вѣща́нїе: и҆́стина бо, чⷭ҇таѧ, тобо́ю ꙗ҆ви́сѧ концє́мъ.

Сѣда́ленъ, гла́съ а҃.

Сокро́вище вѣ́чное жи́зни всѧ́ческихъ, менє̀ ра́ди подъ зако́номъ младе́нствовавый дре́вле начерта́вый на скрижа́лѣхъ зако́нъ на горѣ̀ сїна́йстѣй, да всѧ̑ и҆змѣни́ши ѿ зако́нныѧ дре́внїѧ рабо́ты. сла́ва бл҃гоꙋтро́бїю твоемꙋ̀, сп҃се, сла́ва соше́ствїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

На ѻ҆́блацѣ носи́мь свѣтоно́снѣмъ, пло́тски ꙗ҆́кѡ сл҃нце пра́вды, бж҃е́ствєнныѧ зари̑ своѧ̑ предлага́етъ дне́сь, и҆ пред̾ѡзарѧ́етъ хра́мъ сво́й.

Предпра́зднственнꙋю хвалꙋ̀ влⷣцѣ цр҃ковь дне́сь привноша́етъ, и҆ сего̀ ꙗ҆́кѡ жениха̀ прїѧ́ти свѣ́тлѡ гото́витсѧ, и҆ съ сѷмеѡ́номъ ра́дꙋетсѧ: чи́ни а҆́гг҃льстїи ᲂу҆жасо́шасѧ, зрѧ́ще на рꙋка́хъ ста́рческихъ со ѻ҆ц҃е́мъ и҆ дх҃омъ хвали́маго, ꙗ҆́кѡ сн҃а и҆ бг҃а на́шего.

Бг҃оро́диченъ: Ꙗ҆́кѡ ски́нїю тѧ̀, пресла́внаѧ бцⷣе, хотѧ́щи прїѧ́ти зако́ннаѧ сѣ́нь, зако́нꙋ гдⷭ҇а, на рꙋка́хъ носѧ́щꙋю, твое́ю ѡ҆сїѧ́шесѧ бл҃года́тїю.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Тѧ̀, гдⷭ҇и, пло́тїю цр҃ковь хотѧ́щи прїѧ́ти, бжⷭ҇твенною твое́ю и҆ неизрече́нною бжⷭ҇тва̀ заре́ю сла́внѡ просвѣща́шесѧ.

Тѧ̀, гдⷭ҇и, рꙋка́ми дꙋше́вными сподо́би прїѧ́ти хва́лѧщыѧ твоѐ смотре́нїе: и҆ на́съ вѣ́рою пою́щихъ тѧ̀ прїимѝ, ꙗ҆́кѡ чл҃вѣколю́бецъ.

Тѧ̀, гдⷭ҇и, ра́достною дꙋше́ю прїе́млющыѧ, пло́тїю на́съ ра́ди хотѧ́ща прїитѝ, сподо́би съ сѷмеѡ́номъ благодари́ти тѧ̀.

Бг҃оро́диченъ: И҆зба́вльшесѧ тебє̀ ра́ди сѣно́вныѧ слꙋ́жбы, чи́стаѧ, ра́зꙋмомъ и҆́стиннымъ и҆ вѣ́рою тве́рдою досто́йнѡ тѧ̀ сла́вимъ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Пѣ̑сни, ꙗ҆́коже цвѣ́ты, и҆спле́тше дне́сь, пред̾ꙋгото́вимъ вѣ́рою благодаре́нїѧ вѣне́цъ бжⷭ҇твенъ влⷣцѣ, мы́сленнѡ прїитѝ хотѧ́щемꙋ.

Рꙋ́ки дꙋшє́вныѧ бг҃ꙋ ᲂу҆гото́вимъ, ꙗ҆́коже сѷмеѡ́нъ ста́рецъ, и҆ въ хра́мъ бжⷭ҇твенныѧ сла́вы є҆гѡ̀ приходѧ́ща, того̀ съ весе́лїемъ воспрїи́мемъ.

Творца̀ вѣкѡ́въ ста́рецъ, ꙗ҆́кѡ младе́нца, прїе́мъ, бг҃а превѣ́чнаго разꙋмѣ̀, и҆ свѣ́та ꙗ҆зы́кѡвъ, во сла́вꙋ і҆и҃лѧ хрⷭ҇та̀.

Бг҃оро́диченъ: Пи́шꙋще бг҃ови́днѡ тро́стїю дх҃о́вною тѧ̀ прⷪ҇ро́цы, дв҃о, хра́мъ, и҆ сѣ́нь, и҆ бжⷭ҇твенный до́мъ влⷣцѣ всѣ́хъ, ѡ҆ тебѣ̀ ᲂу҆краша́хꙋсѧ.

Конда́къ, гла́съ ѕ҃:

Со ѻ҆ц҃е́мъ сло́во сы́й неви́димо, ны́нѣ ᲂу҆́бѡ ви́димь є҆́сть пло́тїю, неизрече́ннѡ ѿ дв҃ы роди́сѧ, и҆ на рꙋкꙋ̀ ста̑рчꙋ дае́тсѧ свѧти́телю, поклони́мсѧ томꙋ̀ и҆́стинномꙋ бг҃ꙋ на́шемꙋ.

І҆́косъ:

Сщ҃е́ннаѧ трапе́за предлага́етсѧ, празднолю́бныхъ собо́ръ дне́сь предпра́зднствєннаѧ носѧ́щи зна́мєнїѧ, гдⷭ҇а четыредесѧтодне́вна, и҆зъ дв҃ы стра́шное ржⷭ҇тво̀, и҆ ста́рца честна́гѡ ѡ҆б̾ѧ́тїе, и҆ че́стна страда́льца па́мѧть, предпра́зднствєнныѧ хвалы̑ припѣва́юще и҆́стинномꙋ бг҃ꙋ на́шемꙋ.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Цр҃ковь пред̾ꙋкра́шшисѧ заре́ю мы́сленною, любо́вїю влⷣки всѣ́хъ и҆ творца̀, воспрїѧ́ти є҆го̀ гото́витсѧ, и҆ ра́дѡстнаѧ семꙋ̀ плете́тъ восхождє́нїѧ.

И҆́же въ нѣ́дрѣхъ неѡпи́саннѡ сꙋ́ща ѻ҆ч҃ескихъ сло́во, сн҃а своего̀ є҆диноро́днаго, мт҃рнїи рꙋ́цѣ носѧ́щїи въ цр҃ковь пло́тїю, по зако́нꙋ, ꙗ҆́кѡ младе́нца вно́сѧтъ.

Всели́выйсѧ бг҃ъ во чре́во дв҃ы, на рꙋка́хъ сѷмеѡ́на, ꙗ҆́кѡ на прⷭ҇то́лѣ ѻ҆́гненнѣмъ, дне́сь сѣди́тъ.

Бг҃оро́диченъ: Ви́дѣша сла́вꙋ твою̀ ꙗ҆зы́цы всѝ, є҆ди́на чⷭ҇таѧ: тѣ́мже тва́рей всѣ́хъ тѧ̀ бл҃гоче́стнѡ цр҃и́цꙋ ᲂу҆блажа́ютъ, и҆ бг҃ома́терь па́че є҆стества̀ непреста́ннѡ сла́вѧтъ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Рꙋ́цѣ распросте́ръ сѷмеѡ́нъ, и҆ пред̾ѡчи́щъ дꙋ́шꙋ бж҃е́ственными дѣѧ́ньми, младе́нствовавшаго гдⷭ҇а то́кмѡ за бла́гость прїѧ́тъ, вопїѧ̀ съ весе́лїемъ є҆мꙋ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Свѣ́тъ бл҃года́ти хрⷭ҇то́вы просїѧ̀ на́мъ, хотѧ̀ ввестѝ въ хра́мъ сво́й, всесѣнѡ́внаѧ начерта̑нїѧ претворѧ́ѧ ꙗ҆́кѡ ѡ҆бнови́тель, вои́стиннꙋ вопїю́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Предвѣ́чнаго бг҃а, бл҃говоли́вшаго на́съ ра́ди младе́нствовати, и҆ на рꙋка́хъ прїе́млема бы́ти ста́рца сѷмеѡ́на, бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: И҆́же за бл҃госты́ню мно́гꙋю вочеловѣ́чсѧ хрⷭ҇то́съ, и҆зъ тебє̀, пречⷭ҇таѧ, на́съ ра́ди прїѧ̑тна дне́сь ѻ҆ц҃ꙋ̀ приноша́етъ ѡ҆чищє́нїѧ, є҆ди́нъ сы́й пречи́стъ и҆ пренепоро́ченъ, и҆ тѧ̀ є҆ди́нꙋ чистѣ́йшꙋю соблюда́ѧ прест҃ꙋ́ю.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Дꙋше́вными тѧ̀ рꙋка́ми сподо́би мѧ̀, бл҃годѣ́телю, воспрїѧ́ти, ꙗ҆́коже дре́вле сѷмеѡ́нъ, и҆ наслади́тисѧ твоеѧ̀ бла́гости: ты́ бо є҆сѝ є҆ди́нъ жела́нїе и҆ сла́дость превозжелѣ́нный.

Мы́сленнѡ вже́гше всѝ добродѣ́телей свѣщы̀, любо́вїю съ сѷмеѡ́номъ и҆ а҆́нною, свѣщено́сцы пред̾ꙋсрѧ́щемъ, хрⷭ҇тꙋ̀ хотѧ́щꙋ прїитѝ ѡ҆ст҃и́ти пою́щыѧ є҆го̀.

Дне́сь въ хра́мѣ сѷмеѡ́нъ ста́рецъ рꙋка́ми прїѧ́тъ хрⷭ҇та̀ бг҃а на́шего, и҆ возопѝ глаго́лѧ: ны́нѣ ѿпꙋща́еши раба̀ твоего̀, влⷣко.

Бг҃оро́диченъ: Па́че сꙋ́щихъ воспрїѧ́тъ и҆зъ тебє̀ пло́ть сло́во вы́шнѧгѡ: чи́стъ сы́й, приноша́етъ безнача́льномꙋ ѻ҆ц҃ꙋ̀ ѡ҆чище́нїе, и҆ ѡ҆чища́етъ любо́вїю тѧ̀, бж҃їю мт҃рь, велича́ющыѧ.