Канон предпразднству Благовещения Пресвятой Богородицы
Припе́в: Пресвята́я Богоро́дице, спаси́ на́с.
Глас 4.
Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Ми́р обра́дованно весели́тся, я́ко ощути́в Госпо́дне соше́ствие на Тя́: за милосе́рдие бо ми́лости с небе́с схо́дит во утро́бу Де́вы всели́тися.
Се́ Тебе́, Цари́це, посыла́ется боже́ственный арха́нгел Царя́ все́х и Бо́га провозвести́ти прише́ствие и возгласи́ти Тебе́: ра́дуйся, воззва́ние пра́отца.
Ста́мна светоза́рная и всезлата́я, угото́вися на прия́тие, ма́нны живо́тныя: на Тя́ бо прии́дет гла́сом а́нгеловым, в Тя́ па́че естества́ вселя́яся.
Во утро́бу Твою́ чи́стую всели́тися хо́щет Госпо́дь, живы́й при́сно на небеси́, онебеси́ти бо гряде́т земноро́дных смеше́ние, в сие́ му́дре обо́лкся.
Пе́снь 3.
Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.
Земля́, я́же те́рние страсте́й печа́льне израсти́вшая, взыгра́я, лику́й: се́ бо Земледе́латель Безсме́ртный, кля́твы изыма́я тя́, ны́не прихо́дит.
Боже́ственное руно́, гото́вися, Де́во нескве́рная: на Тя́ бо Бо́г, я́ко до́ждь, сни́дет изсуши́ти пото́ки преступле́ния.
Сви́тче боже́ственный, благоукраси́ся: пе́рстом бо О́тчим напи́шется в Тебе́ Боже́ственное Сло́во, вопло́щся, безслове́сия моего́ разреша́я преступле́ние.
Златы́й свети́льниче, подыми́ О́гнь Божества́, возсия́ющий Тобо́ю, и све́т ми́рови да́руя, и́мже зо́л на́ших тма́ разори́тся.
Седа́лен:
Наше́ствием Ду́ха Всесвята́го, Отцу́ Сопресто́льнаго и Единосу́щнаго, гла́сом арха́нгеловым зачала́ еси́, Богороди́тельнице, Ада́мово воззва́ние.
Сла́ва, и ны́не: Дне́сь вся́ тва́рь ра́дуется, я́ко — е́же ра́дуйся, — Тебе́ вопие́т а́нгел, благослове́нная Мариа́м и Пречи́стая Ма́ти Христа́ Бо́га. Дне́сь змии́но омрача́ется шата́ние, кля́твы бо пра́отчи разреши́ся соу́з. Те́мже и по всему́ вопие́м Ти́: ра́дуйся, Обра́дованная.
Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Та́инство, дре́вле пре́жде ве́к предопределе́нное, явле́ние начина́ет приима́ти. Земля́ и небе́сная, согла́сно возвесели́теся и ра́достно воскли́кните.
Пала́та вели́каго Царя́, слу́хов отве́рзи боже́ственныя вхо́ды, уже́ бо прихо́дит Христо́с и́стина и всели́тся посреди́ Тебе́.
Прама́тернее поползнове́ние исправля́яй, Изба́витель яви́тся, в неискусобра́чную утро́бу вселя́яся, Тому́ воспои́м: сла́ва си́ле Твое́й, Го́споди.
Авваку́м Тя́ пронарече́ го́ру дре́вле, доброде́тельми присе́нну, из нея́же яви́тися хо́щет Бо́г на́ш, Де́во Всенепоро́чная, еди́на челове́ком исправле́ние.
Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
О, нескве́рная А́гнице! А́гнец бо Бо́га на́шего во утро́бу Твою́ вни́ти тщи́тся, взе́мляй на́ша согреше́ния.
Же́зл та́йный пома́ле процвете́т, я́коже пи́шет, Боже́ственный цве́т от ко́рене Иессе́ева на́м явля́ющися.
А́нгеловым гла́сом утучни́вшися, я́ко виногра́д, к прозябе́нию гото́вися зре́лаго, Де́во, и нетле́ннаго Гро́зда.
Велича́йший проро́ков Иса́ия, возвесели́ся: Де́ва бо, о Не́йже проре́кл еси́, во чре́ве зачина́ет Сове́та Вели́каго А́нгела.
Пе́снь 6.
Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Ра́дуйся, — Тебе́ Гаврии́л арха́нгел веща́ет, — ра́дость бо во чре́ве Твое́м прии́меши несказа́нно, ю́же Е́ва преступле́нием, Де́во, погуби́.
Не опали́т, не ужаса́йся отню́д, утро́бы Твоея́ О́гнь Божества́, Отрокови́це: купина́ бо дре́вле Тя́ вообража́ше, горя́щи, ника́коже опаля́ема, Всечи́стая.
Гора́, ю́же Дании́л прови́де Ду́хом, ра́дуйся, Де́во, из Тебе́ бо мы́сленный Ка́мень усече́тся и сокруши́т де́монов безду́шная тре́бища.
Ми́ра Ца́рь к Тебе́ прии́дет и Тобо́ю примири́т поборе́нныя и прельще́нныя, Богома́ти, лука́вым сове́том змии́ным.
Конда́к:
Все́м земны́м нача́ло спасе́ния на́шего Ты́ еси́, Богоро́дице Де́во, Бо́жий бо служи́тель с небе́с по́слан предста́ти Тебе́, вели́кий чинонача́льник Гаврии́л, ра́дость обра́дованную Ти́ принесе́. Те́м вси́ зове́м Ти́: ра́дуйся, Неве́сто неневе́стная.
Пе́снь 7.
Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.
Киво́т слове́сный, его́же и́стинный Законополо́жник возлюби́в, в Тебе́ хо́щет селе́ние сотвори́ти, благово́ния испо́лнися, Тобо́ю бо истле́вшияся обнови́т.
Проро́ческий боже́ственный ли́к, я́коже ощути́в, Отрокови́це, е́же на Тя́ Изба́вителя ми́рное прише́ствие, зове́т Тебе́: ра́дуйся, все́х избавле́ние, ра́дуйся, Еди́на челове́ков спасе́ние.
Не ужаса́йся гла́са, не диви́ся глаго́лющему: Бо́жий слуга́ е́сть. Яви́ти Тебе́ прии́де та́инство, а́нгелы неизрече́нное, неискусобра́чная Де́во благослове́нная.
Зри́ши тва́рь всю́, враго́м порабоще́ну, Де́во, поми́ловати же ю́ за милосе́рдие ми́лости хотя́ Тобо́ю благоволи́вый, да не у́бо словесе́м а́нгела не ве́руеши.
Пе́снь 8.
Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Ле́гкий о́блаче Све́та, Неискусобра́чная, угото́вися: се́ Со́лнце свы́ше превозсия́ет Тебе́ незаходи́мое, вма́ле у́бо в Тебе́ кры́емо, ми́ру же явля́емо и реша́що зло́бы омраче́ние.
А́нгелов пе́рвый служи́тель возопи́ Тебе́ гла́с ра́достен, возвеща́я Тебе́, Чи́стая, Вели́каго Сове́та А́нгела, воплоща́ема из Тебе́ за бла́гость, Ему́же вопие́м: благослови́те, вся́ дела́ Госпо́дня, Го́спода.
Отца́ одесну́ю седя́й, в Тебе́ селе́ние хо́щет сотвори́ти Пресу́щественный, Чи́стая, я́ко да поста́вит одесну́ю Себе́ Тя́, бли́жнюю и до́брую я́ко Цари́цу, десни́цу же все́м простре́т па́дшим и спасе́т ны́.
Я́ко ши́пок удо́лий чи́ст, я́ко кри́н благово́нен, позна́в Тя́, Зижди́тель на́ш Госпо́дь ны́не возжела́ Твоея́ добро́ты, Чи́стая, и воплоти́тися из Твои́х крове́й хо́щет, я́ко да прожене́т злосмра́дие пре́лести бла́гостию.
Пе́снь 9.
Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.
Е́ва у́бо объя́т пло́д, сме́рть де́лающ всегуби́тельную, посреди́ же Тебе́ возрасте́т Пло́д, безсме́ртия хода́тайствен, Христо́с — сла́дость на́ша, Влады́чице, Его́же воспева́юще, Тя́ сла́вим.
Преклони́в небеса́ Твоя́, к на́м сни́ди, престо́л уже́ угото́вася Тебе́, Сло́ве, утро́ба Деви́ча: на не́мже я́ко Ца́рь крепча́йший се́д, воздви́гнеши от паде́ния десни́цы Твоея́ созда́ние.
Ни́ва несе́янная, Чи́стая, подыми́ сло́вом небе́сное Сло́во, я́ко пшени́цу плодоно́сну, прозяба́ющу из Тебе́, и концы́ пита́ющаго хле́бом ра́зума, Ему́же покланя́ющеся, Тя́ сла́вим.
Возжела́ добро́ты Твоея́ Христо́с, Всенепоро́чная, и во утро́бу Твою́ всели́ся, я́ко да от страсте́й безобра́зия ро́д челове́ческий изба́вит и добро́ту дре́внюю да́рует, Ему́же покланя́ющеся, Тя́ сла́вим.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Мі́ръ ѡ҆бра́дованнѡ весели́тсѧ, ꙗ҆́кѡ ѡ҆щꙋти́въ гдⷭ҇не соше́ствїе на тѧ̀: за милосе́рдїе бо ми́лости съ нб҃съ схо́дитъ во ᲂу҆тро́бꙋ дв҃ы всели́тисѧ.
Сѐ тебѣ̀ цр҃и́цѣ посыла́етсѧ бж҃е́ственный а҆рха́гг҃лъ, цр҃ѧ̀ всѣ́хъ и҆ бг҃а провозвѣсти́ти прише́ствїе, и҆ возгласи́ти тебѣ̀: ра́дꙋйсѧ, воззва́нїе пра́ѻтца.
Ста́мна свѣтоза́рнаѧ и҆ всезлата́ѧ, ᲂу҆гото́висѧ на прїѧ́тїе ма́нны живо́тныѧ: на тѧ́ бо прїи́детъ гла́сомъ а҆́гг҃ловымъ, въ тѧ̀ па́че є҆стества̀ вселѧ́ѧсѧ.
Во ᲂу҆тро́бꙋ твою̀ чⷭ҇тꙋю всели́тисѧ хо́щетъ гдⷭ҇ь, живы́й при́снѡ на нб҃сѝ: ѡ҆небеси́ти бо грѧде́тъ земноро́дныхъ смѣше́нїе, въ сїѐ мꙋ́дрѣ ѡ҆бо́лксѧ.
Пѣ́снь г҃.
І҆рмо́съ: Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ. нѣ́сть бо свѧ́тъ, па́че тебє̀, чл҃вѣколю́бче.
Землѧ̀, ꙗ҆́же те́рнїе страсте́й печа́льнѣ и҆зрасти́вшаѧ, взыгра́ѧ ликꙋ́й: се́ бо земледѣ́латель безсме́ртный клѧ́твы и҆зима́ѧ тѧ̀, ны́нѣ прихо́дитъ.
Бжⷭ҇твенное рꙋно̀, гото́висѧ, дв҃о нескве́рнаѧ: на тѧ́ бо бг҃ъ ꙗ҆́кѡ до́ждь сни́детъ, и҆зсꙋши́ти пото́ки престꙋпле́нїѧ.
Сви́тче бжⷭ҇твенный, благоꙋкраси́сѧ: пе́рстомъ бо ѻ҆́ч҃имъ напи́шетсѧ въ тебѣ̀ бжⷭ҇твенное сло́во вопло́щсѧ, безслове́сїѧ моегѡ̀ разрѣша́ѧ престꙋпле́нїе.
Златы́й свѣти́льниче, под̾имѝ ѻ҆́гнь бжⷭ҇тва̀, возсїѧ́ющїй тобо́ю, и҆ свѣ́тъ мі́рови да́рꙋѧ: и҆́мже ѕѡ́лъ на́шихъ тма̀ разори́тсѧ.
Сѣда́ленъ:
Наше́ствїемъ дх҃а всест҃а́гѡ, ѻ҆ц҃ꙋ̀ сопресто́льнагѡ и҆ є҆диносꙋ́щнагѡ, гла́сомъ а҆рха́гг҃ловымъ зачала̀ є҆сѝ, бг҃ороди́тельнице, а҆да́мово воззва́нїе.
Сла́ва, и҆ ны́нѣ: Дне́сь всѧ̀ тва́рь ра́дꙋетсѧ, ꙗ҆́кѡ є҆́же ра́дꙋйсѧ, тебѣ̀ вопїе́тъ а҆́гг҃лъ, благослове́ннаѧ марїа́мъ, и҆ пречи́стаѧ мт҃и хрⷭ҇та̀ бг҃а. дне́сь ѕмїи́но ѡ҆мрача́етсѧ шата́нїе, клѧ́твы бо пра́ѻч҃и разрѣши́сѧ соꙋ́зъ. тѣ́мже и҆ по всемꙋ̀ вопїе́мъ тѝ: ра́дꙋйсѧ, ѡ҆бра́дованнаѧ.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Та́инство дре́вле пре́жде вѣ̑къ пред̾ѡпредѣле́нное, ꙗ҆вле́нїе начина́етъ прїима́ти: землѧ̀ и҆ небє́снаѧ согла́снѡ возвесели́тесѧ, и҆ ра́достнѡ воскли́кните.
Пала́та вели́кагѡ цр҃ѧ̀, слꙋ́хѡвъ ѿве́рзи бжⷭ҇твєнныѧ вхо́ды, ᲂу҆же́ бо прихо́дитъ хрⷭ҇то́съ и҆́стина, и҆ всели́тсѧ посредѝ тебє̀.
Прама́тернее поползнове́нїе и҆справлѧ́ѧй, и҆зба́витель ꙗ҆ви́тсѧ, въ неискꙋсобра́чнꙋю ᲂу҆тро́бꙋ вселѧ́ѧсѧ, томꙋ̀ воспои́мъ: сла́ва си́лѣ твое́й, гдⷭ҇и.
А҆ввакꙋ́мъ тѧ̀ пронаречѐ го́рꙋ дре́вле, добродѣ́тельми присѣ́ннꙋ: и҆зъ неѧ́же ꙗ҆ви́тисѧ хо́щетъ бг҃ъ на́шъ, дв҃о всенепоро́чнаѧ, є҆ди́на человѣ́кѡмъ и҆справле́нїе.
Пѣ́снь є҃.
І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ѽ нескве́рнаѧ а҆́гнице! а҆́гнецъ бо бг҃а на́шегѡ во ᲂу҆тро́бꙋ твою̀ вни́ти тщи́тсѧ, взе́млѧй на̑ша согрѣшє́нїѧ.
Же́злъ та́йный пома́лѣ процвѣте́тъ, ꙗ҆́коже пи́шетъ, бжⷭ҇твенный цвѣ́тъ ѿ ко́рене і҆ессе́ева на́мъ ꙗ҆влѧ́ющисѧ.
А҆́гг҃ловымъ гла́сомъ ᲂу҆тꙋчни́вшисѧ ꙗ҆́кѡ вїногра́дъ, къ прозѧбе́нїю гото́висѧ зрѣ́лагѡ, дв҃о, и҆ нетлѣ́ннагѡ гро́зда.
Велича́йшїй прⷪ҇ро́кѡвъ и҆са́їа возвесели́сѧ: дв҃а бо, ѡ҆ не́йже проре́клъ є҆сѝ, во чре́вѣ зачина́етъ совѣ́та вели́кагѡ а҆́гг҃ла.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Ра́дꙋйсѧ, тебѣ̀ гаврїи́лъ а҆рха́гг҃лъ вѣща́етъ, ра́дость бо во чре́вѣ твое́мъ прїи́меши несказа́ннѡ, ю҆́же є҆́ѵа престꙋпле́нїемъ, дв҃о, погꙋбѝ.
Не ѡ҆пали́тъ, не ᲂу҆жаса́йсѧ ѿню́дъ, ᲂу҆тро́бы твоеѧ̀ ѻ҆́гнь бжⷭ҇тва̀, ѻ҆трокови́це: кꙋпина́ бо дре́вле тѧ̀ воѡбража́ше горѧ́щи, ника́коже ѡ҆палѧ́ема, всечⷭ҇таѧ.
Гора̀, ю҆́же данїи́лъ прови́дѣ дх҃омъ, ра́дꙋйсѧ, дв҃о: и҆зъ тебє́ бо мы́сленный ка́мень ᲂу҆сѣче́тсѧ, и҆ сокрꙋши́тъ де́мѡнѡвъ бездꙋ̑шнаѧ трє́бища.
Ми́ра цр҃ь къ тебѣ̀ прїи́детъ, и҆ тобо́ю примири́тъ поборє́нныѧ и҆ прельщє́нныѧ, бг҃омт҃и, лꙋка́вымъ совѣ́томъ ѕмїи́нымъ.
Конда́къ:
Всѣ̑мъ земны̑мъ нача́ло спасе́нїѧ на́шегѡ ты̀ є҆сѝ, бцⷣе дв҃о: бж҃їй бо слꙋжи́тель съ нб҃съ по́сланъ предста́ти тебѣ̀, вели́кїй чинонача́льникъ гаврїи́лъ, ра́дость ѡ҆бра́дованнꙋю тѝ принесѐ. тѣ́мъ всѝ зове́мъ тѝ: ра́дꙋйсѧ, невѣ́сто неневѣ́стнаѧ.
Пѣ́снь з҃.
І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Кївѡ́тъ слове́сный, є҆го́же и҆́стинный законополо́жникъ возлюби́въ въ тебѣ̀ хо́щетъ селе́нїе сотвори́ти, благово́нїѧ и҆спо́лнисѧ: тобо́ю бо и҆стлѣ́вшыѧсѧ ѡ҆бнови́тъ.
Прⷪ҇ро́ческїй бжⷭ҇твенный ли́къ, ꙗ҆́коже ѡ҆щꙋти́въ, ѻ҆трокови́це, є҆́же на тѧ̀ и҆зба́вителѧ ми́рное прише́ствїе, зове́тъ тебѣ̀: ра́дꙋйсѧ, всѣ́хъ и҆збавле́нїе, ра́дꙋйсѧ, є҆ди́на человѣ́кѡвъ спасе́нїе.
Не ᲂу҆жаса́йсѧ гла́са, не диви́сѧ глаго́лющемꙋ: бж҃їй слꙋга̀ є҆́сть. ꙗ҆ви́ти тебѣ̀ прїи́де та́инство, а҆́гг҃лы неизрече́нное, неискꙋсобра́чнаѧ дв҃о благослове́ннаѧ.
Зри́ши тва́рь всю̀, враго́мъ порабоще́нꙋ, дв҃о, поми́ловати же ю҆̀ за милосе́рдїе ми́лости хотѧ̀, тобо́ю благоволи́вый: да не ᲂу҆̀бо словесє́мъ а҆́гг҃ла не вѣ́рꙋеши.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Ле́гкїй ѻ҆́блаче свѣ́та, неискꙋсобра́чнаѧ, ᲂу҆гото́висѧ: сѐ сл҃нце свы́ше превозсїѧ́етъ тебѣ̀ незаходи́мое, вма́лѣ ᲂу҆́бѡ въ тебѣ̀ кры́емо, мі́рꙋ же ꙗ҆влѧ́емо, и҆ рѣша́що ѕло́бы ѡ҆мраче́нїе.
А҆́гг҃лѡвъ пе́рвый слꙋжи́тель возопѝ тебѣ̀ гла́съ ра́достенъ, возвѣща́ѧ тебѣ̀, чⷭ҇таѧ, вели́кагѡ совѣ́та а҆́гг҃ла, воплоща́ема и҆зъ тебє̀ за бла́гость, є҆мꙋ́же вопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Ѻ҆ц҃а̀ ѡ҆деснꙋ́ю сѣдѧ́й, въ тебѣ̀ селе́нїе хо́щетъ сотвори́ти, пресꙋ́щественный, чⷭ҇таѧ: ꙗ҆́кѡ да поста́витъ ѡ҆деснꙋ́ѧ себє́ тѧ бли́жнюю и҆ до́брꙋю, ꙗ҆́кѡ цари́цꙋ, десни́цꙋ же всѣ̑мъ простре́тъ па́дшымъ, и҆ спасе́тъ ны̀.
Ꙗ҆́кѡ ши́покъ ᲂу҆до́лїй чи́стъ, ꙗ҆́кѡ крі́нъ благово́ненъ, позна́въ тѧ̀ зижди́тель на́шъ гдⷭ҇ь, ны́нѣ возжела̀ твоеѧ̀ добро́ты, чⷭ҇таѧ, и҆ воплоти́тисѧ и҆зъ твои́хъ крове́й хо́щетъ, ꙗ҆́кѡ да прожене́тъ ѕлосмра́дїе пре́лести бла́гостїю.
Пѣ́снь ѳ҃.
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Є҆́ѵа ᲂу҆́бѡ ѡ҆б̾ѧ́тъ пло́дъ, сме́рть дѣ́лающь всегꙋби́тельнꙋю: посреди́ же тебє̀ возрасте́тъ пло́дъ безсме́ртїѧ хода́тайственъ, хрⷭ҇то́съ сла́дость на́ша, влⷣчце. є҆го́же воспѣва́юще, тѧ̀ сла́вимъ.
Преклони́въ небеса̀ твоѧ̑, къ на́мъ сни́ди, престо́лъ ᲂу҆жѐ ᲂу҆гото́васѧ тебѣ̀, сло́ве, ᲂу҆тро́ба дв҃и́ча: на не́мже ꙗ҆́кѡ цр҃ь крѣпча́йшїй сѣ́дъ, воздви́гнеши ѿ паде́нїѧ десни́цы твоеѧ̀ созда́нїе.
Ни́ва несѣ́ѧннаѧ, чⷭ҇таѧ, под̾имѝ сло́вомъ нбⷭ҇ное сло́во, ꙗ҆́кѡ пшени́цꙋ плодоно́снꙋ прозѧба́ющꙋ и҆зъ тебє̀, и҆ концы̀ пита́ющаго хлѣ́бомъ ра́зꙋма. є҆мꙋ́же покланѧ́ющесѧ, тѧ̀ сла́вимъ.
Возжела̀ добро́ты твоеѧ̀ хрⷭ҇то́съ, всенепоро́чнаѧ, и҆ во ᲂу҆тро́бꙋ твою̀ всели́сѧ: ꙗ҆́кѡ да ѿ страсте́й безѻбра́зїѧ ро́дъ человѣ́ческїй и҆зба́витъ, и҆ добро́тꙋ дре́внюю да́рꙋетъ. є҆мꙋ́же покланѧ́ющесѧ, тѧ̀ сла́вимъ.