Канон покаянный ко Господу Иисусу Христу. Творение иеромонаха Василия (Рослякова)

Пе́снь 1.

Ирмо́с: Разступи́ся пучи́на чермна́я и ублажи́ стопы́ Изра́иля уничиже́ннаго, сомкну́вшися же мгло́ю и бу́рею над главо́ю го́рдости еги́петския, Го́спода просла́вивши во ве́ки, я́ко и́стиннаго Судию́ и Изба́вителя.

Иде́же обря́щу нача́ло зла́ моего́? О́крест воззрю́ и содрага́юся, вну́трь обращу́ся и возболе́зную, я́ко тьма́ го́рькая обстои́т мя́. О Звездо́ еди́ная, Христе́ Спа́се мо́й, дости́гни мя́ луча́ми благода́ти Твоея́.

Со Ада́мом ны́не сокруша́юся: ка́ко воспою́ Све́та уте́ряннаго? Ка́ко возвещу́ И́стину оста́вленную? А́ще реку́, я́ко не ви́дех Го́спода, ка́мени возопию́т, облича́юще мя́. Ка́мо пойду́, презре́в Тя́, Спа́се, Пу́ть и И́стина Сы́й, Христе́?

Сла́ва: Не и́мам, Го́споди, вити́йства высо́каго, не ве́м глаго́лов прему́дрых, но, я́ко и отцы́ на́ши от ве́ка, взыва́ю Ти́: поми́луй мя́, Бо́же, и спаси́ мя́.

И ны́не: Не покры́ю лука́вством лю́тых мои́х, но вся́ возвещу́ Тебе́, Де́во Чи́стая, оба́че не смире́ния испо́лнен творю́ сия́, но безсты́дства потае́ннаго. Ты́ же, кро́тости Исто́чниче Пречи́стый, омы́й окая́нство души́ моея́ и целому́дрие во мне́ оживи́.

Пе́снь 3.

Ирмо́с: Еди́ному дню́ времена́ уподобля́я, ве́чности начерта́ние показа́л еси́, Го́споди, те́мже во хра́ме сла́вы Твоея́ ли́ки составля́ются, не́сть свя́т, ра́зве Тебе́, Го́споди, взыва́юще.

Коли́ко оде́жд раздеру́ окая́нный, и поко́я дости́гну? Коли́ко пе́пла возложу́ на главу́ сра́мную мою́ и не иму́ помышле́ний лю́тых? Ко́им вре́тищем покры́юся и не узрю́ беззако́ний мои́х? Всу́е мяту́ся, ища́ покая́ния. Но Ты́, Христе́, реки́й: без Мене́ не мо́жете твори́ти ничесо́же, пройди́ во у́ды моя́, разсецы́ сло́вом Твои́м ка́менную утро́бу мою́, порази́ ка́мень се́рдца моего́ и изведи́ исто́чники сле́з.

Егда́ в ску́дости пребыва́ю, печа́ль и за́висть терза́ют мя́. Егда́ же преспева́ю ма́ло, го́рдостию обурева́юся неудержи́мо; гре́х а́лчный го́нит мя́, Го́споди. Приими́ сокруше́ние мое́, Влады́ко, ины́х бо даро́в и же́ртв не и́мам.

Сла́ва: Отку́ду прииму́ сле́зы, а́ще не от Тебе́, Бо́же? Ка́мо гряду́ в де́нь печа́ли, а́ще не во хра́м Тво́й, Влады́ко? Где́ обря́щу утеше́ние, а́ще не в словесе́х Твои́х, Свя́те? Не отри́ни мене́, Го́споди, и ны́не помяни́ мя́.

И ны́не: При́зри на мя́, Влады́чице, и вся́ скве́рны моя́ попали́, да не обе́шу на вы́ю мою́ жерно́в осе́льский, но пра́х прегреше́ний мои́х принесу́ Христу́ Бо́гу моему́, и возмете́т от лица́ преклоне́ннаго моего́.

Седа́лен.

Оста́вих Тя́, Све́те и́стинный, тьма́ обдержи́т мя́ и хла́д, о́гнь мудрова́ния моего́ не гре́ет мя́, но́щи сме́ртныя ужаса́юся. Воста́ни ра́но, Го́споди, Со́лнце мое́, и оживи́ мя́ теплото́ю Ду́ха Твоего́.

Сла́ва: У Тебе́, Влады́ко, прошу́ благода́ти, но та́йную наде́жду полага́ю в кре́пости мое́й; велича́ю и благодарю́ Тя́, но сла́вы не лиша́ю самолюби́выя души́ моея́. Не пре́зри, Го́споди, покая́ния моего́ и поми́луй мя́.

И ны́не: Со вся́кою ско́рбию, вели́кою и ма́лою, с оби́дами та́йными и печа́лию го́рькою прибега́ю к Тебе́, Ма́ти Бо́жия, я́ко ча́до, от злы́х оби́димое, вся́ приношу́ Тебе́, Де́во Чи́стая, ча́я утеше́ния и Ма́терния ми́лости.

Пе́снь 4.

Ирмо́с: Ми́р из небытия́ воззва́вый и пе́рсть земну́ю сы́на Све́та соде́лавый, возведи́, Го́споди, в ра́дость ду́шу мою́ и утверди́ во и́стине Твое́й непоколеби́мо.

К Тебе́ иду́, Го́споди, и утаи́ти замышля́ю, я́ко Ана́ния и Сапфи́ра, ча́сть не́кую души́ моея́ на дела́ посты́дная. При́зри на не́мощь мою́, и умертви́ та́йная моя́, и Са́м яви́ мя́ неосужде́нна пред Тобо́ю.

Не прие́млет душа́ моя́ утеше́ния: дне́м лицеме́рие мое́ наставля́ет мя́, но́щию нече́стие се́рдца моего́ предстои́т мне́, отобою́ду печа́ль и поноше́ние, не́сть мне́ прибе́жища; еди́н то́кмо пла́ч утвержде́ние и утеше́ние мое́.

Сла́ва: О́тче, возста́ви мя́, а́з бо пред грехо́м пресмыка́юся ра́бски; Сы́не, изведи́ мя́ от ме́ста сту́днаго жития́ моего́; Ду́ше Святы́й, освяти́ но́щь стра́нствования моего́. Тро́ице непостижи́мая, да гряду́ к Тебе́ покая́нием непоколеби́мым.

И ны́не: Богоро́дице ми́лостивая, го́рькая жи́зни сея́ услади́ слеза́ми покая́ния, окамене́нная ми́ра сего́ сокруше́нием серде́чным умягчи́. Вся́ бо мо́жеши моле́нием неусыпа́ющим, одесну́ю Христа́ Бо́га предстоя́щи.

Пе́снь 5.

Ирмо́с: Плаче́вною но́щию бе́здне небе́сней а́з удиви́хся, де́нь истле́вший пред собо́ю ви́дя, достиго́х зари́ и нача́ла со́лнечнаго, и па́ки удиви́хся неудержи́мо блиста́нию проро́чествующему.

Я́ко Са́вл, неи́стовствую на Тя́, Бо́же, ре́вностно гоню́ благода́ть Твою́ от себе́, но Ты́ Са́м, Влады́ко, яви́ся се́рдцу моему́ и ослепи́ о́ное све́том любве́ Твоея́, и возглашу́ а́з, окая́нный: что́ сотворю́, Го́споди?

Обличи́л мя́ еси́, Го́споди, и преклони́хся пред Тобо́ю, стыдо́м покры́стася о́чи мои́, да не у́зрит и но́щь греха́ моего́; то́кмо Тебе́, Бо́же, печа́ль моя́. Не оста́ви мене́, смяте́ннаго, посети́ и спаси́ мя́.

Сла́ва: Не гла́дом гладна́ душа́ моя́, не жа́ждою жа́ждет се́рдце мое́, но о глаго́лех Твои́х, Христе́, стражду́, о и́стине Твое́й а́лчу. При́зри на не́мощь мою́, Го́споди, и пода́ждь ма́нну слове́с Твои́х.

И ны́не: Я́ко Свеща́ неугаси́мая, сле́зы те́плыя на зе́млю иска́пающи, предстои́ши, Богоро́дице Пресвята́я, пред Царе́м Небе́сным, те́мже и мне́ све́та и тепла́ Твоего́ да́руй на де́рзостное се́рдце мое́.

Пе́снь 6.

Ирмо́с: Пове́ржен на ло́же сле́зное, я́ко на дно́ морско́е, ка́ко воста́ти мне́ сме́ртному, от ме́ста клеветы́ и презре́ния? Го́споди, Бо́же мо́й, воскреси́ мя́ погиба́ющаго.

Внегда́ и́скренний мо́й поноша́ше мя́, к Тебе́, Го́споди, душа́ моя́; а́ще у́бо и душа́ моя́ обетша́ет, уста́ призову́т Влады́ку моего́. Но ка́мо, Го́споди, пойду́, а́ще рече́ши: не ве́м тя́? Земля́ не прии́мет мя́, не́бо не покры́ет мя́. Не отри́ни мене́, Бо́же, от лица́ Твоего́.

Твоя́ от Твои́х приношу́ Ти́, Спа́се, и велича́юся; тщу́ся, я́ко Си́мон во́лхв, Ду́ха Свята́го получи́ти за мзду́ моли́тв и де́л мои́х. Прости́ мя́, Го́споди, и не помяни́ нече́стия моего́.

Сла́ва: Уста́ испове́дуют Тя́, Бо́же, те́ло уготовля́ется на по́двиги и страда́ния; душа́ же безмо́лвствует и гото́вит ча́с отрече́ния моего́; Го́споди, сокруши́ жесто́кое се́рдце мое́ и от сна́ нечу́вствия возста́ви мя́.

И ны́не: Сокруши́шася коле́на моя́ от но́щи печа́ли и забве́ния, но Ты́ не забу́ди мене́, Ма́ти Бо́жия, и возста́ви мя́ уныва́ющаго.

Конда́к, гла́с 6:

При бре́зе ста́ну, Го́споди, и воспла́чу, я́ко зрю́ Тя́ по ину́ю страну́ во́д непроходи́мых. Обрати́ ко мне́ о́чи Твои́, Спа́се мо́й, и поми́луй мя́.

И́н конда́к, гла́с то́йже:

Гла́с Тво́й слы́шу, Го́споди, хла́да то́нка, и не ве́м, отку́ду прихо́дит и ка́мо и́дет. Отве́рзи, Христе́ Спа́се, слу́х се́рдца моего́ и наста́ви и спаси́ мя́.

И́кос:

Поме́рче во мне́ Со́лнце Пра́вды, и прии́де на мя́ хла́д земны́й, гре́юся огне́м страсте́й мои́х, во дво́рех чужди́х обрета́юся окая́нный. Взы́ди, Го́споди, на не́бо се́рдца моего́ и де́нь спасе́ния мне́ возвести́.

Пе́снь 7.

Ирмо́с: Вавило́нскую пе́щь о́гненную, я́ко ча́сть ма́лую пла́мене беззако́ния людска́го, о́троцы невреди́мо проидо́ша, спасе́ния пе́снь воспева́юще: Бо́же оте́ц на́ших, благослове́н еси́.

А́ще оста́влю Тя́, Го́споди, Ты́ не оста́ви мене́ до конца́, потерпи́ безу́мства и беззако́ния моя́, покры́й срамоту́ и нече́стие мое́. Егда́ же в де́нь печа́ли призову́ Тя́, прости́ мене́ и не помяни́ непостоя́нства и двоеду́шия моего́.

Стыжду́ся проси́ти Тебе́, Го́споди, те́мже не и́мам слове́с к Тебе́, окая́нный, то́кмо ру́це простира́ю и се́рдце, ми́лости прошу́ и хле́ба насу́щнаго, я́ко ни́щий, отве́рженный и презре́нный.

Тебе́, Го́споди, ищу́ и не обрета́ю; я́ко слепе́ц, ищу́ Тебе́ и путевожда́ не и́мам; при пути́ сежу́ и ожида́ю, внегда́ мимои́деши и услы́шиши моле́ния моя́.

Сла́ва: Глаго́леши, Го́споди: толцы́те, и отве́рзется ва́м; но ско́рбь, Влады́ко, связа́ ру́це мои́, исто́рже му́жество из души́ моея́; при две́рех сижу́ безмо́лвный. Отве́рзи ми́, Го́споди, и при́зри на мя́, я́ко на разсла́бленнаго иногда́.

И ны́не: Почто́ сиро́тствую, Ма́терь име́я ми́ра Влады́чицу? Почто́ смуща́юся во стра́нствиих, до́м насле́довав Небе́сный? Пресвята́я Богоро́дице, Ма́ти Го́спода на́шего, доведи́ мя́ го́рняго Оте́чества моего́.

Пе́снь 8.

Ирмо́с: Не ужасни́ся, душе́ моя́, не устраши́ся, се́рдце мое́, искуше́ния о́гненнаго, во очище́ние посыла́емаго Го́сподем Милосе́рдым, Его́же стра́сти помяни́те, Воскресе́ние воспо́йте и превозноси́те во вся́ ве́ки.

Ве́рности сло́во вруча́ю Тебе́, Го́споди, но при пе́рвем стра́се отрица́юся; ви́дя же Тя́ на поруга́ние ведо́ма и обра́щшася, зря́ща мене́, помина́ю, сту́дный, кля́твы моя́, гряду́ во́н и пла́чуся го́рько.

И злочести́вый Иу́да любля́ше Иису́са, оба́че коры́сти ра́ди; а́з же немощны́й, та́яжде творю́, си́лы Боже́ственныя любве́ не прие́млю, изнемога́ю от но́щи тщесла́вия моего́. Спаси́ мя́, Го́споди, да не впаду́ в бе́здну преда́тельства и поги́бели ве́чныя.

Сла́ва: Да́ры исцеле́ний от Бо́га прии́м и лю́дем расточа́я, сла́вою обогати́ся Иу́да; приноше́ния содержа́ и ми́лостыню подава́я, благодаре́ньми услажда́шеся; а́з же, треокая́нный, тщесла́вия бога́тство скры́в, страшу́ся еди́ножды Бо́га преда́ти. Спаси́ мя́, Го́споди, да возда́м Тебе́ Еди́ному сла́ву и благодаре́ние.

И ны́не: Ску́дно хвале́ние мое́ Твоего́, Влады́чице, милосе́рдия, не́мощно покая́ние мое́ о бе́здне грехо́в мои́х; не ревну́ю о благодаре́нии, немо́тствую и в покая́нии. Не оста́ви мене́, смяте́ннаго, Ма́ти Бо́жия, и спаси́ мя́.

Пе́снь 9.

Ирмо́с: Усыновле́ние мое́ чу́дное Ма́терию Госпо́днею дерза́ю воспева́ти, но страшу́ся и трепе́щу сего́, я́ко при Кресте́ бы́вшаго. Предста́ни мне́, Ма́ти, в позо́рищи и сме́рти су́щему, и спаси́ мя́ сия́нием ли́ка Твоего́ Пречи́стаго.

Не отвеща́еши мне́ ничесо́же, Го́споди, егда́ восле́д вопию́ Тебе́: помози́ ми́, душа́ моя́ жесто́ко печа́луется. Обрати́ся же, Спа́се мо́й, я́ко не понесу́ оставле́ния сего́, и поми́луй мя́.

Ве́м, Го́споди, ве́м, я́ко бие́ши вся́каго сы́на, его́же прие́млеши, но ропщу́, егда́ зрю́ наказу́емая ча́да Твоя́. Прости́ мя́, Го́споди, и терпе́ние с благодаре́нием да́руй.

Сла́ва: Ра́зумом постига́ю, я́ко венцы́ и сла́ву гото́виши пла́чущим и уничиже́нным, но душа́ моя́ не утеша́ется ны́не воздая́нием гряду́щим; ско́рбь объе́млет мя́, егда́ зрю́ поноше́ния на и́скренняя моя́. Поми́луй мя́, Го́споди, и моли́тися научи́ за враги́ неоскудева́ющия.

И ны́не: Гне́ва о́гнь неугаси́мый сожига́ет мя́, горды́ни че́рвь неусыпа́яй снеда́ет се́рдце мое́. Спаси́ мя́, Пресвята́я Богоро́дице, от му́к а́довых, дости́гших до души́ моея́.

Свети́лен:

Све́те мо́й Христе́ Спа́се, но́щь жития́ моего́, иде́же и со́лнце не просвеща́ет мя́, озари́ блиста́нием Божества́ Твоего́ и спаси́ мя́.

Моли́тва.

Го́споди Иису́се Христе́, Ты́ еси́ Хле́б Живы́й, сше́дый с Небесе́, и яды́й Хле́б се́й не у́мрет и бу́дет жи́ти во ве́ки! Го́споди, Хле́б се́й е́сть Пло́ть Твоя́, ю́же Ты́ отда́л еси́ за жи́знь ми́ра, те́мже и ре́кл еси́: яды́й Мою́ Пло́ть и пия́й Мою́ Кро́вь и́мать живо́т ве́чный, и А́з воскрешу́ его́ в после́дний де́нь. Та́ко и дне́сь гряде́м к Тебе́ по сло́ву Твоему́. И ны́не, испыту́я на́с, глаго́леши: не хо́щете ли и вы́ отыти́? Мы́ же, я́ко Пе́тр иногда́, зове́м Ти́: Го́споди! К кому́ на́м ити́? Ты́ и́маши глаго́лы жи́зни ве́чныя, Ты́ – Христо́с, Сы́н Бо́га Жива́го, Ты́ – А́льфа и Оме́га, нача́ло и коне́ц, Ты́ – Бо́г, Ца́рь и Госпо́дь, и Твою́ держа́ву и милосе́рдие сла́вим ны́не и при́сно, и во ве́ки веко́в. Ами́нь.