А҆ка́ѳїстъ вознесе́нїю гдⷭ҇ню.
Конда́къ а҃.
Возбра́нный воево́до, тво́рче нб҃а и҆ землѝ. Побѣди́телю сме́рти похва́льное прино́симъ пѣ́нїе, ꙗ҆́кѡ по пресвѣ́тломъ твое́мъ и҆з̾ ме́ртвыхъ воскр҃се́нїи на нб҃са̀ со сла́вою возне́слсѧ є҆сѝ и҆ съ пречⷭ҇тою пло́тїю твое́ю ѡ҆деснꙋ́ю бг҃а и҆ ѻ҆ц҃а̀ возсѣ́лъ є҆сѝ, да и҆ на́ше па́дшее є҆стество̀ совознесе́ши съ собо́ю, и҆ ѿ грѣхѡ́въ и҆ ѿ вѣ́чныѧ сме́рти свободи́ши на вѣ́ки. Мы́ же бжⷭ҇твенное твоѐ вознесе́нїе пра́зднꙋюще со ᲂу҆чн҃кѝ твои́ми ѿ дꙋшѝ тебѣ̀ вопїе́мъ:
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
І҆́косъ а҃.
А҆рха́гг҃лѡвъ и҆ а҆́гг҃лѡвъ ли́ки сопредста́ша тебѣ̀, цр҃ю̀ всѣ́хъ, на є҆леѡ́нстѣй горѣ̀, со стра́хомъ ви́дѣвше тѧ̀ на высотꙋ̀ нбⷭ҇нꙋю взе́млема съ пло́тїю, и҆ прославлѧ́хꙋ вели́чїе чл҃вѣколю́бїѧ твоегѡ̀, пою́ще тебѣ̀ та́кѡ:
І҆и҃се, цр҃ю̀ сла́вы, взы́ди на нб҃са̀ въ воскликнове́нїи во гла́сѣ трꙋ́бнѣ: і҆и҃се, гдⷭ҇и си́лъ, взы́ди на херꙋві́мы и҆ возлетѝ на крилꙋ̀ вѣ́трєню.
І҆и҃се, превѣ́чный бж҃е, да́ждь гла́сꙋ своемꙋ̀ гла́съ си́лы, да тре́петна бꙋ́детъ ны́нѣ всѧ̀ землѧ̀: і҆и҃се, превы́шнїй свѣ́те, ꙗ҆вѝ си́лꙋ твою̀ на ѻ҆́блацѣхъ, и҆ ѻ҆́гнь ѿ лица̀ твоегѡ̀ да воспла́менитсѧ.
І҆и҃се, и҆скꙋпи́телю тва́ри, ᲂу҆гото́ви на нб҃сѣ́хъ прⷭ҇то́лъ тво́й и҆ црⷭ҇твїю твоемꙋ̀ да не бꙋ́детъ конца̀: і҆и҃се, тво́рче нб҃ꙋ и҆ землѝ, сѣдѝ ѡ҆деснꙋ́ю ѻ҆ц҃а̀ твоегѡ̀, да бꙋ́детъ бг҃ъ всѧ́ческаѧ во всѣ́хъ.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ в҃.
Ви́дѣвше а҆пⷭ҇ли тѧ̀ и҆з̾ ме́ртвыхъ возста́вша, влⷣко гдⷭ҇и, є҆гда̀ во дне́хъ четы́редесѧтихъ ꙗ҆влѧ́лъ є҆сѝ себѐ и҆́мъ, глаго́люще ѡ҆ та́йнахъ црⷭ҇твїѧ бж҃їѧ, и҆ воспрїѧ́вше ѿ тебє̀ за́повѣдь ѿ і҆ерⷭ҇ли́ма не ѿлꙋча́тисѧ, но ча́ѧти ѻ҆бѣтова́нїѧ ѻ҆́ч҃а, до́ндеже ѡ҆блекꙋ́тсѧ си́лою свы́ше, соше́дшесѧ, пребыва́хꙋ є҆динодꙋ́шнѡ вкꙋ́пѣ на моли́твѣ пою́ще тебѣ̀ є҆ди́ными ᲂу҆сты̀ и҆ є҆ди́нымъ се́рдцемъ: А҆ллилꙋ́їа.
І҆́косъ в҃.
Ра́зꙋмъ бжⷭ҇твеннагѡ смотрѣ́нїѧ ѿкрыва́ѧ, всебл҃гі́й і҆и҃се, и҆зве́лъ є҆сѝ ᲂу҆ченикѝ твоѧ̀ во́нъ до виѳа́нїи, и҆ возве́дъ и҆̀хъ на го́рꙋ є҆леѡ́нскꙋю, нача́тъ къ вели́комꙋ твоегѡ̀ вознесе́нїѧ на нб҃о та́инствꙋ гото́вити, глаго́люще: прибли́жисѧ, ѽ, дрꙋ́зи моѝ, восхожде́нїѧ вре́мѧ, ше́дше ᲂу҆́бѡ наꙋчи́те всѧ̑ ꙗ҆зы̑ки сло́вꙋ, є҆́же слы́шасте ѿ гла́са моегѡ̀, крⷭ҇тѧ́ще и҆̀хъ во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а. Ті́и же, є҆щѐ земна̑ѧ мꙋ́дрствꙋюще, вопроша́хꙋ, не въ сїе́ ли лѣ́то ᲂу҆стро́иши црⷭ҇твїе і҆и҃лево. Ѻ҆ба́че ты̀ ре́клъ є҆сѝ и҆́мъ: нѣ́сть ва́ше разꙋмѣ́ти времена̀ и҆ лѣ́та, ꙗ҆́же ѻ҆ц҃ъ положѝ во свое́й вла́сти, да вы́нꙋ гото́ви бꙋ́дꙋтъ ко срѣ́тенїю своегѡ̀ жениха̀ нбⷭ҇нагѡ, вопїю́ще:
І҆и҃се, па́стырю до́брый, не разлꙋча́йсѧ никогда́же ѿ на́съ, но пребꙋ́ди съ на́ми неѿстꙋ́пнѡ: і҆и҃се, ᲂу҆чи́телю бл҃гі́й, ст҃а́гѡ ᲂу҆тѣ́шителѧ дх҃а ниспослѝ на́мъ, да пребꙋ́детъ съ на́ми неизмѣ́ннѡ.
І҆и҃се, просвѣти́телю на́шъ, просвѣтѝ дꙋ́ши на́ши твои́мъ къ нбⷭ҇номꙋ ѻ҆ц҃ꙋ̀ вознесе́нїемъ: і҆и҃се, сп҃си́телю на́шъ, сп҃сѝ на́съ ѿ малодꙋ́шїѧ и҆ бꙋ́ри твои́мъ застꙋпле́нїемъ.
І҆и҃се, наста́вниче на́шъ, сло́вомъ ᲂу҆́стъ твои́хъ наста́ви на́съ на твоѐ слꙋже́нїе: і҆и҃се, помо́щниче на́шъ, дх҃омъ твои́мъ ст҃ы́мъ воспомѧнѝ на́мъ твоѐ ѿкрове́нїе.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ г҃.
Си́лою свы́ше а҆пⷭ҇лы ѡ҆блещѝ хотѧ́й, і҆и҃се, є҆гда̀ на горѣ̀ є҆леѡ́нстѣй ѡ҆бѣтова́лъ є҆сѝ и҆́мъ дх҃а ст҃а́гѡ соше́ствїе. Ты̀ повелѣ́лъ є҆сѝ и҆́мъ, да свидѣ́телїе твоѝ бꙋ́дꙋтъ во і҆ерⷭ҇ли́мѣ и҆ во все́й і҆ꙋде́и, и҆ да́же до послѣ́днихъ землѝ, глаго́люще: прїиди́те и҆ вни́дите враты̑ мои́ми, ᲂу҆гото́вите пꙋ́ть мо́й и҆ пꙋ́ть твори́те лю́демъ мои́мъ и҆ ка́менїѧ ѿ пꙋтѝ размещи́те, вознеси́те зна́менїе на ꙗ҆зы́ки, да всѝ вѣ́рнїи воспою́тъ съ ва́ми: А҆ллилꙋ́їа.
І҆́косъ г҃.
И҆мѣ́ѧ бе́зднꙋ милосе́рдїѧ, сладча́йшїй і҆и҃се, ᲂу҆ченикѝ твоѧ̀ и҆ жены̀ тебѣ̀ послѣ́дствовавшїѧ и҆ наипа́че ро́ждшꙋю тѧ̀ мт҃рь твою̀ ра́дости безчи́сленныѧ и҆спо́лнилъ є҆сѝ во твоѐ вознесе́нїе, є҆гда̀ ᲂу҆жѐ ѿстꙋпи́въ ѿ ни́хъ, распросте́рлъ є҆сѝ рꙋ́цѣ твоѝ и҆ бл҃гослови́лъ є҆сѝ, глаго́люще: сѐ а҆́зъ съ ва́ми є҆́смь во всѧ̑ дни̑ до сконча́нїѧ вѣ́ка: ті́и же, стра́хомъ и҆спо́лнени, прославлѧ́хꙋ твоѐ млⷭ҇тивное снисхожде́нїе, глаго́люще:
І҆и҃се, млⷭ҇ти пода́телю, поми́ловати ро́дъ чл҃вѣ́ческїй на є҆леѡ́нъ прише́дый: і҆и҃се, ско́рбныхъ ᲂу҆весели́телю, сꙋ́щїѧ съ тобо́ю дрꙋ́ги твоѧ̀ ᲂу҆тѣ́шити восхотѣ́вый.
І҆и҃се, наде́ждо безнаде́жныхъ, твои́мъ бл҃гослове́нїемъ при ѿше́ствїи на нб҃о на́съ ѿ ᲂу҆ны́нїѧ сохрани́вый: і҆и҃се, прибѣ́жище безпрїю́тныхъ, твои́мъ вознесе́нїемъ восхо́дъ къ ѻ҆ц҃ꙋ̀ нбⷭ҇номꙋ и҆ на́мъ дарова́вый.
І҆и҃се, ᲂу҆тѣ́шителю бл҃гі́й, ᲂу҆тѣ́шителѧ и҆на́гѡ ѿ ѻ҆ц҃а̀ посла́ти на́мъ ѡ҆бѣща́вый: і҆и҃се, па́стырю ѻ҆вца́мъ вели́кїй, твоемꙋ̀ вѣ́рномꙋ ста́дꙋ разсѣ́ѧтисѧ не бл҃говоли́вый.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ д҃.
Бꙋ́рю внꙋ́трь недоꙋмѣ́нїѧ и҆ печа́ли мнѡ́гїѧ и҆мꙋ́ще, а҆пⷭ҇ли рыда́нїемъ сле́зъ и҆спо́лнишасѧ, є҆гда̀ ᲂу҆ви́дѣша тѧ̀, хрⷭ҇тѐ, на ѻ҆́блацѣхъ возноси́ма и҆ пла́чꙋще глаго́лахꙋ: влⷣко, ка́кѡ ны́нѣ ѡ҆ставлѧ́еши рабы̑ твоѧ̑, и҆̀хже за млⷭ҇рдїе твоѐ возлюби́лъ є҆сѝ, ка́мѡ и҆́деши, рꙋка́ми содержа́й концы̀; мы́ же ѡ҆ста́вивше всѧ̑, тебѣ̀ бг҃ꙋ послѣ́довахомъ, ра́дꙋющесѧ, во вѣ́ки съ тобо́ю наде́ждꙋ и҆мꙋ́ще бы́ти. Не ѡ҆ста́ви на́съ си́рыхъ, ꙗ҆́коже ѡ҆бѣща́лсѧ є҆сѝ, не разлꙋчи́сѧ ѿ на́съ, па́стырю на́шъ до́брый, но послѝ на́мъ прест҃а́гѡ дх҃а твоегѡ̀, наставлѧ́юща, просвѣща́юща и҆ ѡ҆сщ҃а́юща дꙋ́ши на́шѧ, да бл҃года́рственнѡ воспое́мъ тебѣ̀: А҆ллилꙋ́їа.
І҆́косъ д҃.
Слы́ша рыда́нїѧ ᲂу҆чени̑къ твои́хъ, влⷣко гдⷭ҇и, ѡ҆ разлꙋче́нїи скорбѧ́щихъ, ты̀ соверше́ннѣйшее бл҃гослове́нїе препода́лъ є҆сѝ дрꙋгѡ́мъ твои́мъ, глаго́люще: не пла́чите возлю́бленнїи, и҆ сѣ́тованїе всѣ̀ ѿри́ните, поле́знѡ ва́мъ є҆́сть, да а҆́зъ и҆дꙋ̀ ко ѻ҆ц҃ꙋ̀ моемꙋ̀, а҆́ще бо не и҆дꙋ̀, ᲂу҆тѣ́шитель не прїи́детъ. Ва́съ ра́ди съ нб҃сѐ снидо́хъ и҆ ва́съ ра́ди па́ки восхождꙋ̀ на нб҃о ᲂу҆гото́вати мѣ́сто ва́мъ, не ѡ҆ста́влю бо ѻ҆ве́цъ мои́хъ, ꙗ҆̀же собра́хъ, не забꙋ́дꙋ, и҆̀хже возлюби́хъ. Ті́и же бжⷭ҇твенными словєсы̀ си́ми ᲂу҆тѣ́шени бы́вше, со ᲂу҆миле́нїемъ возопи́ша тебѣ̀:
І҆и҃се всебл҃гі́й, печа́ль и҆ сле́зы на́ши на ра́дость преложи́вый, не лишѝ на́съ и҆ вѣ́чныѧ ра́дости во црⷭ҇твїи твое́мъ: і҆и҃се всеще́дрый, ра́достїю и҆спо́лнивый на́съ во твое́мъ вознесе́нїи, сохранѝ дꙋ́хъ на́шъ въ при́сномъ ра́дованїи и҆ во стра́нствїи земно́мъ.
І҆и҃се, ꙗ҆́коже ко́кошъ собра́вый птенцы̀ своѧ̀, не попꙋстѝ на́мъ по сто́гнамъ мі́ра сегѡ̀ разлꙋчи́тисѧ: і҆и҃се, сою́зомъ любвѐ на́съ на ве́чери свѧза́вый, не да́ждь на́мъ по дѣ́йствꙋ сатанинꙋ̀, ꙗ҆́кѡ пшени́це разсѣ́ѧтисѧ.
І҆и҃се, ми́ръ тво́й на́мъ въ наслѣ́дїе ѡ҆ста́вивый, соблюдѝ на́съ въ є҆диномы́слїи и҆ любвѝ твое́й: і҆и҃се, ѡ҆би́тєли мнѡ́зи въ раѝ ᲂу҆стро́ивый, ᲂу҆гото́ви мѣ́сто на́мъ въ нбⷭ҇ной ѡ҆би́тели твое́й.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ є҃.
Бг҃оте́чный ѻ҆́блакъ пресвѣ́телъ ѕѣлѡ̀ под̾ѧ́тъ тѧ̀, жизнода́вче гдⷭ҇и, ᲂу҆ченикѡ́мъ зрѧ́щимъ, є҆гда̀ ѿстꙋпи́въ ѿ ни́хъ, бл҃гослови́лъ є҆сѝ, и҆ та́кѡ со сла́вою мно́гою, ꙗ҆́кѡ на крылѣ́хъ херꙋві́мскихъ носи́мый, преди́вный восхо́дъ тво́й ко ѻ҆ц҃ꙋ̀ твоемꙋ̀ соверши́лъ є҆сѝ на нб҃о, є҆́же пре́жде непроходи́мо бы́сть ѿ дꙋхѡ́въ ѕло́бы поднебе́сныхъ и҆ ѿ кнѧзе́й вла́сти воздꙋ́шныѧ, ны́нѣ же внꙋ́трь тебѐ прїѧ́тъ, да ѿ все́й тва́ри ви̑димыѧ и҆ неви̑димыѧ ᲂу҆слы́шиши а҆́гг҃льскꙋю пѣ́снь: А҆ллилꙋ́їа.
І҆́косъ є҃.
Ви́дѣвше пресла́вное твоѐ съ пло́тїю на нб҃са̀ восхожде́нїе, цр҃ю̀ тва́ри, чи́ни а҆́гг҃льскїѧ, до́лꙋ сꙋ́щїѧ, ᲂу҆жа́сшесѧ, глаго́лахꙋ си́ламъ го́рнѣйшимъ: возми́те врата̀ вѣ́чнаѧ, ꙗ҆́кѡ грѧде́тъ цр҃ь сла́вы, ѿве́рзитесѧ нб҃са̀ и҆ вы̀ нб҃са̀ нб҃съ, воспрїими́те гдⷭ҇а си́лъ и҆ поклони́тесѧ є҆мꙋ̀, вопїю́ще:
І҆и҃се, сла́вы ѻ҆́ч҃їѧ сїѧ́нїе, просвѣтѝ на́съ свѣ́томъ лица̀ твоегѡ̀: і҆и҃се, го́рнихъ ᲂу҆мѡ́въ ѡ҆блиста́нїе, ѡ҆блиста́й на́съ въ невече́рнѣмъ днѝ црⷭ҇твїѧ твоегѡ̀.
І҆и҃се, прише́дый ꙗ҆́вѣ во ѻ҆гнѝ и҆ бꙋ́рѣ ѕѣ́льнѣй, ᲂу҆́мное твоѐ нб҃о свы́ше призовѝ: і҆и҃се, ве́лїй и҆ хва́льный ѕѣлѡ̀ въ горѣ̀ твое́й ст҃ѣ́й, пра́вдꙋ твою̀ въ нб҃сѣ́хъ возвѣстѝ.
І҆и҃се, возвели́чивый до нб҃съ млⷭ҇ть твою̀, ꙗ҆вѝ сла́вꙋ твою̀ по все́й землѝ: і҆и҃се, возше́дый на нб҃о нб҃сѝ на восто́кѣ, во вѣ́къ сло́во твоѐ да пребꙋ́детъ на нб҃сѝ.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ ѕ҃.
Проповѣ́дницы бжⷭ҇твенныѧ сла́вы, нача́льнѣйшїѧ чи́ны а҆́гг҃льскїѧ, сꙋ́щїѧ на высотѣ̀ нбⷭ҇нѣй гдⷭ҇ствїѧ, прⷭ҇то́ли, многоѻчи́тїи херꙋві́ми и҆ шестокрыла́тїи серафі́ми, ѿверзо́ша вкꙋ́пѣ всѧ̑ высѡты̀ нбⷭ҇ныѧ, срѣта́юще тѧ̀, влⷣко всѧ́ческихъ, и҆ ви́дѧще тѧ̀ возне́сшагосѧ во пло́ти, дрꙋ́гъ ко дрꙋ́гꙋ со ᲂу҆дивле́нїемъ вопїѧ́хꙋ: кто̀ се́й, прише́дый и҆з̾ є҆дѡ́ма, держа́вный и҆ си́льный во бра́ни; Кто̀ се́й, прише́дый ѿ васѡ́ра, є҆́же є҆́сть ѿ пло́ти; Почто̀ червлє́ны ри̑зы є҆гѡ̀, ꙗ҆́кѡ ѿ ѡ҆моче́нїѧ кро́вїю, вѣне́цъ терно́венъ носѧ́й; Се́й є҆́сть вои́стиннꙋ цр҃ь сла́вы, а҆́гнецъ бж҃їй за сп҃се́нїе мі́ра закла́нный и҆ воскрⷭ҇ы́й, во пло́ти ны́нѣ грѧды́й сѣ́сти ѡ҆деснꙋ́ю ѻ҆ц҃а̀, є҆мꙋ́же вы́нꙋ воспѣва́ти бꙋ́демъ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ бжⷭ҇твенною сла́вою, і҆и҃се, є҆гда̀ є҆стество̀ чл҃вѣ́ческое, въ него́же ѡ҆бле́ксѧ є҆сѝ, ми́лостивнѡ возне́слъ є҆сѝ, ѻ҆ц҃ꙋ̀ спосади́лъ є҆сѝ, и҆ ѡ҆бж҃и́лъ є҆сѝ є҆̀. Тѣ́мже нбⷭ҇нїи безпло́тнїи чи́нове, чꙋдесѝ ᲂу҆дивлѧ́ющесѧ, ᲂу҆жаса́хꙋсѧ, ᲂу҆́жасомъ и҆ тре́петомъ содержи́мїи, твоѐ чл҃вѣколю́бїе велича́хꙋ. Съ ни́миже и҆ мы̀ земні́и твоѐ на́съ ра́ди снисхожде́нїе и҆ є҆́же ѿ на́съ на нб҃са̀ вознесе́нїе славосло́вѧще, мо́лимсѧ, глаго́люще:
І҆и҃се, стрꙋѧ̀ сы́й жи́зни, твои́мъ на нб҃о вознесе́нїемъ на́мъ стра́нникѡмъ землѝ пꙋ́ть жи́зни вѣ́чныѧ въ вы́шнїй і҆ерⷭ҇ли́мъ ᲂу҆каза́вый: і҆и҃се, бе́здна сы́й ми́лости, твои́мъ ѡ҆деснꙋ́ю ѻ҆ц҃а̀ сѣдѣ́нїемъ плотско́е на́ше воспрїѧ́тїе ѡ҆бж҃и́вый.
І҆и҃се, взе́мый на ра́мо заблꙋ́ждшее є҆стество̀ на́ше, возмѝ на себѣ̀ и҆ моѧ̑ тѧ̑жкїѧ прегрѣшє́нїѧ: і҆и҃се, возше́дый пло́тїю ко безпло́тномꙋ ѻ҆ц҃ꙋ̀, возведѝ горѣ̀ моѧ̀ до́лꙋ пони́кшыѧ помышлє́нїѧ.
І҆и҃се, ѿ землѝ ѡ҆деснꙋ́ю бг҃а и҆ ѻ҆ц҃а̀ на го́рнѧѧ возше́дый, да́рꙋй мѝ деснꙋ́ю ча́сть сп҃са́емыхъ ѻ҆ве́цъ полꙋчи́ти: і҆и҃се, ѿ сїѡ́на бл҃голѣ́пїе красоты̀ твоеѧ̀ ꙗ҆ви́вый, сподо́би мѧ̀ прича́стникомъ вѣ́чнагѡ бл҃же́нства твоегѡ̀ бы́ти.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ з҃.
Хотѧ́й вознестѝ и҆ просла́вити па́дшее во а҆да́мѣ є҆стество̀ чл҃вѣ́ческое, ты̀, ꙗ҆́кѡ вторы́й а҆да́мъ, возше́дъ на высотꙋ̀ нбⷭ҇нꙋю, ᲂу҆гото́валъ є҆сѝ прⷭ҇то́лъ тво́й во вѣ́къ вѣ́ка, и҆ сѣ́лъ є҆сѝ ѡ҆деснꙋ́ю бг҃а и҆ ѻ҆ц҃а̀, бжⷭ҇тво́мъ твои́мъ ника́коже разлꙋчи́выйсѧ ѻ҆ч҃ескихъ нѣ́дръ. Прїиди́те ᲂу҆́бѡ ѡ҆бнища́вшемꙋ на́съ ра́ди и҆ возше́дшемꙋ ѡ҆деснꙋ́ю ѻ҆ц҃а̀ і҆и҃сꙋ поклони́мсѧ, дади́мъ вели̑чїѧ є҆мꙋ̀, и҆ воспое́мъ и҆з̾ глꙋбины̀ дꙋшѝ: А҆ллилꙋ́їа.
І҆́косъ з҃.
Но́вое и҆ чⷭ҇тое жи́тельство ѿкры́лъ є҆сѝ, гдⷭ҇и, є҆гда̀ съ пло́тїю твое́ю возше́лъ є҆сѝ на нб҃са̀, да состарѣ́вшїйсѧ мно́гими грѣха́ми мі́ръ ѡ҆бнови́ши возста́нїемъ твои́мъ и҆ на нб҃са̀ вознесе́нїемъ, показꙋ́ѧ на́мъ ꙗ҆́вственнѡ, ꙗ҆́коже бжⷭ҇твенный па́ѵелъ глаго́летъ, ꙗ҆́кѡ жи́тельство на́ше на нб҃сѣ́хъ є҆́сть. Сегѡ̀ ра́ди ᲂу҆страни́мсѧ сꙋ́етнагѡ мі́ра, ᲂу҆́мъ на нб҃са̀ преложи́ша, и҆ вопїю́ще тебѣ̀ такова̑ѧ:
І҆и҃се, со а҆́гг҃лы нбⷭ҇ными бжⷭ҇тво́мъ свои́мъ на нб҃са̀ возше́ствїемъ на́съ къ нбⷭ҇номꙋ жи́тельствꙋ подвиза́тисѧ призва́вый: і҆и҃се, съ человѣ́ки земны́й пло́тїю, свои́мъ ѿ землѝ ѿше́ствїемъ на́съ ѿ земны́хъ пристра́стїй ѿвраща́тисѧ наꙋчи́вый.
І҆и҃се, взыска́ти прише́дый заблꙋ́ждшее ѻ҆вча̀, къ незаблꙋ́ждшымъ твои̑мъ ѻ҆вца́мъ возведѝ на́съ на нб҃са̀: і҆и҃се, совокꙋпи́ти соше́дый растоѧ́щаѧсѧ є҆стества̀, ꙗ҆́же на землѝ соединѝ нбⷭ҇нымъ ᲂу҆ вы́шнѧгѡ ѻ҆ц҃а̀.
І҆и҃се, во ѻ҆́блацѣ ле́гцѣ возше́дый на нб҃са̀, сподо́би на́съ, земна̑ѧ ѡ҆ста́вльше, при́снѡ взира́ти на нбⷭ҇наѧ врата̀: і҆и҃се, сѣдѧ́й во сла́вѣ на прⷭ҇то́лѣ бжⷭ҇тва̀, да́ждь на́мъ, ѿве́рзше ѻ҆́чи, ѿ зако́на разꙋмѣ́ти твоѧ̑ чꙋдеса̀.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ и҃.
Стра́ннѡ и҆ ди́внѡ твоѐ воскр҃се́нїе, стра́ннѡ и҆ стра́шнѡ твоѐ, жизнода́вче хрⷭ҇тѐ, є҆́же ѿ ст҃ы́ѧ горы̀ бжⷭ҇твенное вознесе́нїе, непостижи́мѡ и҆ па́че ᲂу҆ма̀ твоѐ є҆́же ѡ҆деснꙋ́ю ѻ҆ц҃а̀ во пло́ти сидѣ́нїе, ѡ҆ не́мже дв҃дъ дх҃омъ глаго́ла: речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менѐ, до́ндеже положꙋ̀ врагѝ твоѝ подно́жїе но́гъ твои́хъ. Сегѡ̀ ра́ди всѧ̀ си́лы нбⷭ҇ныѧ, зрѧ́ще твоѐ на нб҃са̀ возше́ствїе, вои́стиннꙋ покори́шасѧ под̾ но́зи твоѝ, пою́ще а҆́гг҃льскими ꙗ҆зы̑ки херꙋві́мскꙋю пѣ́снь: А҆ллилꙋ́їа.
І҆́косъ и҃.
Ве́сь бѣ̀ въ вы́шнихъ, сладча́йшїй і҆и҃се, є҆гда̀ во́лею на́съ ра́ди возне́слсѧ є҆сѝ со сла́вою на нб҃са̀ и҆ ѡ҆деснꙋ́ю сѣ́лъ є҆сѝ бг҃а и҆ ѻ҆ц҃а̀, но и҆ ни́жнихъ ника́коже ѿлꙋчи́лсѧ є҆сѝ, занѐ ѡ҆бѣтова́лъ є҆сѝ пребыва́ти неѿстꙋ́пнѡ въ цр҃кви и҆ вопїѧ́лъ є҆сѝ лю́бѧщимъ тѧ̀: а҆́зъ є҆́смь съ ва́ми и҆ никто́же на вы̀. Сїѐ млⷭ҇тивое ѡ҆бѣтова́нїе твоѐ вы́нꙋ по́мнѧще и҆ хранѧ́ще въ се́рдцѣ, съ любо́вїю вопїе́мъ тебѣ̀ такова̑ѧ:
І҆и҃се, всѧ́кꙋ вла́сть на нб҃сѝ и҆ на землѝ по вознесе́нїи твое́мъ воспрїѧ́вый, воспрїимѝ на́съ въ твоѐ вѣ́чное наслѣ́дїе: і҆и҃се, всѧ́кїѧ ра́дости ᲂу҆ченикѝ твоѧ̀ ѡ҆бѣтова́нїемъ ст҃а́гѡ дх҃а и҆спо́лнивый, и҆спо́лни на́съ тогѡ̀ бл҃года́ти прише́ствїемъ.
І҆и҃се, приклони́вый схожде́нїемъ нб҃са̀, приклонѝ пред̾ вели́чїемъ сла́вы твоеѧ̀ до́лꙋ прикло́ньшꙋюсѧ мою̀ горды́ню: і҆и҃се, превозне́сши возше́ствїемъ твои́мъ всю̀ тва́рь, превознесѝ горѣ̀ мою̀ дꙋ́шꙋ воспѣва́ти со а҆́гг҃лы твою̀ ст҃ы́ню.
І҆и҃се, бж҃їй сло́ве, сло́вомъ твои́мъ нб҃са̀ ᲂу҆тверди́вый, ᲂу҆твердѝ въ се́рдцѣ мое́мъ словеса̀ твоѧ̀, ꙗ҆́кѡ да не согрѣшꙋ̀ тебѣ̀: і҆и҃се, сн҃е ѻ҆ч҃ь, дх҃омъ ᲂу҆́стъ твои́мъ всю̀ си́лꙋ твою̀ съ нб҃съ ꙗ҆ви́вый, ѡ҆бновѝ дх҃ъ пра́вый во ᲂу҆тро́бѣ мое́й, ꙗ҆́кѡ да не ѡ҆скверню̀ себє̀.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ ѳ҃.
Всѐ є҆стество̀ па́дшее чл҃вѣ́ческое, до́лꙋ пони́кшее и҆ грѣхмѝ и҆стлѣ́вшее, взѧ́лъ є҆сѝ на ра́мо своѐ, влⷣко гдⷭ҇и, новосотвори́вый собо́ю, и҆ превы́ше всѧ́кагѡ нача́ла и҆ вла́сти возве́лъ є҆сѝ дне́сь и҆ бг҃ꙋ и҆ ѻ҆ц҃ꙋ̀ приве́лъ є҆сѝ, и҆ съ собо́ю спосади́лъ є҆сѝ на прⷭ҇то́лѣ нбⷭ҇нѣмъ, да ѡ҆ст҃и́ши є҆̀, и҆ спросла́виши, и҆ ѡ҆божи́ши. Безпло́тнїи же, ᲂу҆дивлѧ́ющесѧ, глаго́лахꙋ: кто̀ се́й кра́сный мꙋ́жъ, но не чл҃вѣ́къ то́чїю, но вкꙋ́пѣ бг҃ъ и҆ чл҃вѣ́къ, є҆мꙋ́же да пое́мъ вы́нꙋ: А҆ллилꙋ́їа.
І҆́косъ ѳ҃.
Вѣті̑и бжⷭ҇твеннїи, ᲂу҆ченицы̀ твоѝ, сп҃се, твоемꙋ̀ пресла́вномꙋ восхожде́нїю ᲂу҆дивлѧ́ющесѧ, на нб҃о взира́хꙋ, скорбѧ́ще, тебѐ возне́сшꙋсѧ, и҆ сѐ два̀ а҆́гг҃ла предста́ста пред̾ ни́ми во ѻ҆де́жди бѣлѣ̀, и҆ реко́ста и҆́мъ во ᲂу҆тѣше́нїе: мꙋ́жїе галїле́йстїи, что̀ стоитѐ, зрѧ́ще на нб҃о; се́й і҆и҃съ, вознесы́йсѧ ѿ ва́съ на нб҃о, та́кожде прїи́детъ, и҆́мже ѻ҆́бразомъ ви́дѣста є҆го̀ и҆дꙋ́ща на нб҃о. Сїѐ а҆́гг҃льское бл҃говѣ́стїе ѡ҆ второ́мъ прише́ствїи твое́мъ, гдⷭ҇и, ᲂу҆ченицы̀ твоѝ слы́шавше, въ ра́достный тре́петъ прїидо́ша, съ ни́миже и҆ мы̀ ра́достнѡ да воспое́мъ тебѣ̀ такова̑ѧ:
І҆и҃се, вознесы́йсѧ ѿ на́съ во все́й сла́вѣ твое́й, є҆́й, грѧдѝ ско́рѡ со а҆́гг҃лы ст҃ы́ми твои́ми: і҆и҃се, и҆мѣ́ѧй па́ки прїитѝ сотвори́ти сꙋ́дъ пра́въ, є҆́й, грѧдѝ со сла́вою во свѣ́тлости ст҃ы́хъ твои́хъ.
І҆и҃се, ве́лїй и҆ стра́шный ѕѣлѡ̀ над̾ всѣ́ми ѻ҆кре́стными, поми́лꙋй и҆ защитѝ тогда̀ всѧ̑ крѡ́ткїѧ землѝ: і҆и҃се, прославлѧ́емый въ совѣ́тѣ ст҃ы́хъ твои́хъ, са́мъ на́съ спросла́ви во црⷭ҇твїи твое́мъ на нб҃сѝ.
І҆и҃се, проше́дый нб҃са̀ пло́тїю, бл҃говолѝ провестѝ дꙋ́шꙋ по мыта́рствамъ воздꙋ́шнымъ и҆ ᲂу҆лицезрѣ́ти тѧ̀: і҆и҃се, вознесы́йсѧ на ѻ҆́блацѣхъ нбⷭ҇ныхъ, сподо́би на́мъ съ весе́лїемъ и҆ со дерзнове́нїемъ въ послѣ́днїй де́нь на ѻ҆́блацѣхъ ᲂу҆срѣ́сти тѧ̀.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ і҃.
Сп҃стѝ хотѧ̀ сꙋ́щїѧ съ тобо́ю ᲂу҆ченикѝ, хрⷭ҇тѐ сп҃се, и҆ всѧ̑ вѣ́рꙋющыѧ словесѝ и҆̀хъ ра́ди въ тѧ̀, и҆ по тебѣ̀ послѣ́довавшаѧ, возше́лъ є҆сѝ на нб҃са̀, да ᲂу҆гото́виши мѣ́сто и҆́мъ, ꙗ҆́кѡ въ домꙋ̀ ѻ҆ц҃а̀ твоегѡ̀ ѻ҆би́тєли мнѡ́ги сꙋ́ть, ꙗ҆́коже са́мъ ре́клъ є҆сѝ ко стрⷭ҇ти грѧды́й, глаго́лѧ: а҆́ще ᲂу҆гото́влю мѣ́сто ва́мъ, па́ки прїидꙋ̀ и҆ поимꙋ́ вы къ себѣ̀, да и҆дѣ́же є҆́смь а҆́зъ, и҆ вы̀ бꙋ́дете. Сегѡ̀ ра́ди сподо́би и҆ на́мъ, гдⷭ҇и, по сме́ртнѣмъ вознесе́нїи на́шемъ ѡ҆брѣстѝ хра́минꙋ нерꙋкотворе́нꙋ, вѣ́чнꙋ на нбⷭ҇ѣ́хъ, ᲂу҆гото́ваннꙋю не ѿ дре́ва, и҆лѝ сѣ́на и҆лѝ трѡ́стїѧ пло́тскихъ дѣ́лъ на́шихъ ра́ди, ꙗ҆́же во ѻ҆гнѣ̀ не ᲂу҆стоѧ́тъ, но ѿ зла́та и҆лѝ сребра̀ и҆лѝ ка́меней драги́хъ на твое́мъ ѡ҆снова́нїи назда́ннꙋю, и҆дѣ́же вы́нꙋ бꙋ́демъ тебѐ сла́вити и҆ воспѣва́ти: А҆ллилꙋ́їа.
І҆́косъ і҃.
Цр҃ю̀ предвѣ́чный, і҆и҃се хрⷭ҇тѐ, на нб҃са̀ возше́дый съ пречⷭ҇тою твое́ю пло́тїю и҆ всѣ́хъ на́съ въ нбⷭ҇ное на́ше ѻ҆ч҃ество призва́вый, возведѝ на́съ до́лꙋ пове́рженныхъ ѿ мїрски́хъ пристра́стїй и҆ плотски́хъ мꙋдрова́нїй къ высотѣ̀ нбⷭ҇нѣй и҆ да́рꙋй на́мъ є҆щѐ во днѝ пло́ти на́шеѧ чи́стымъ свидѣ́тельствомъ со́вѣсти причасти́тисѧ нбⷭ҇ныѧ жи́зни и҆ вы́нꙋ вкꙋша́ти въ та́инствѣ бжⷭ҇твенныѧ є҆ѵхарі́стїи нбⷭ҇нꙋю пи́щꙋ, да ѿ чи́стагѡ се́рдца и҆ дꙋ́ха пра́вагѡ воспое́мъ тебѣ̀ такова̑ѧ:
І҆и҃се, вели́кїй а҆рхїере́ю грѧдꙋ́щихъ бл҃гъ, въ вознесе́нїе своѐ проше́дый нб҃са̀ пло́тїю и҆ возше́дый не въ рꙋкотворе́нный хра́мъ, но въ са́мое нб҃о, да ли́кꙋ бж҃їю ѿ на́съ предста́неши: і҆и҃се, нбⷭ҇ный а҆рхїте́ктѡне, ски́нїю нерꙋкотворе́ннꙋю на нб҃сѣ́хъ соѡрꙋди́вый и҆ є҆ди́ною вше́дый во ст҃а́ѧ ст҃ы́хъ ко ѻ҆ц҃ꙋ̀ со свое́ю кро́вїю, да вѣ́чное и҆скꙋпле́нїе соверши́ши.
І҆и҃се, непоро́чный а҆́гнче бж҃їй, є҆ди́ною за грѣхѝ мі́ра закла́нный, во є҆́же вознестѝ грѣхѝ мно́гихъ, вознесѝ къ прⷭ҇то́лꙋ бж҃їю моѧ̑ ѡ҆ грѣсѣ́хъ приношє́нїѧ: і҆и҃се, но́вагѡ завѣ́та хода́таю, є҆ди́ною на нб҃са̀ ко ѻ҆ц҃ꙋ̀ возше́дый, во є҆́же ѿкры́ти пꙋ́ть въ нбⷭ҇нꙋю ски́нїю, воспрїимѝ ѡ҆ нечистотѣ̀ мое́й воздыха́нїѧ.
І҆и҃се, возлю́бленный женишѐ на́шъ, свѣтосїѧ́нный черто́гъ на нб҃сѝ ᲂу҆гото́вавый, ᲂу҆гото́ви та́мѡ мѣ́стѡ тебѣ̀ є҆ди́номꙋ слꙋжи́ти восхотѣ́вшымъ: і҆и҃се, до́брый па́стырю твои́хъ ѻ҆ве́цъ, нбⷭ҇наѧ па́стбища въ раѝ твоемꙋ̀ ста́дꙋ произрасти́вый, да́рꙋй на́мъ вѣнцы̀, тебѣ̀ є҆ди́номꙋ послѣ́довати возжела́вшымъ.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ а҃і.
Пѣ́нїе всеꙋмиле́нное приноша́ше бжⷭ҇твенномꙋ вознесе́нїю твоемꙋ̀, сло́ве, ро́ждшаѧ тѧ̀ всенепоро́чнаѧ мт҃и твоѧ̀. Та́ бо во стра́сти твое́й мт҃рски па́че всѣ́хъ болѣ́зноваше ѡ҆ тебѣ̀, сегѡ̀ ра́ди подоба́ше то́й въ прославле́нїе пло́ти твоеѧ̀ премно́жайшїѧ наслади́тисѧ ра́дости, и҆ съ се́ю ра́достїю вели́кою сни́де съ є҆леѡ́нскїѧ горы̀ со а҆пⷭ҇лы, и҆ возврати́шасѧ всѝ во і҆ерⷭ҇ли́мъ и҆ взыдо́ша въ го́рницꙋ, и҆ бѧ́хꙋ всѝ а҆пⷭ҇ли, терпѧ́ще є҆динодꙋ́шнѡ вкꙋ́пѣ въ моли́твѣ, моле́нїи и҆ поще́нїи съ жена́ми и҆ мр҃і́ею мт҃рїю і҆и҃совой, и҆ съ бра́тїею є҆гѡ̀, ча́юще соше́ствїѧ ст҃а́гѡ дх҃а, хва́лѧще и҆ бл҃гословѧ́ще бг҃а, и҆ воспѣва́юще є҆мꙋ̀: А҆ллилꙋ́їа.
І҆́косъ а҃і.
Свѣ́тъ вѣ́чный и҆ нетлѣ́нный возсїѧ̀ всемꙋ̀ мі́рꙋ ѿ ст҃ы́ѧ горы̀ є҆леѡ́нскїѧ, и҆дѣ́же стоѧ́сте пречⷭ҇тыѧ но́зѣ твоѝ, хрⷭ҇тѐ сп҃се, є҆гда̀ возне́слсѧ є҆сѝ со сла́вою на нб҃са̀, занѐ проше́дъ нб҃са̀ съ пло́тїю, ты̀ ѿве́рзлъ є҆сѝ врата̀ нбⷭ҇наѧ, паде́нїемъ а҆да́мовымъ заключе́ннаѧ, и҆ са́мъ сы́й пꙋ́ть, и҆́стина и҆ живо́тъ, ѿкры́лъ є҆сѝ пꙋ́ть всѧ́кой пло́ти во ѻ҆би́тєли ѻ҆ц҃а̀ твоегѡ̀ нбⷭ҇нагѡ, ꙗ҆́коже и҆ предре́клъ є҆сѝ твои́мъ ᲂу҆ченико́мъ, глаго́лѧ: ѿсе́лѣ ᲂу҆́зрите нб҃о ѿве́рсто и҆ а҆́гг҃лы бж҃їи восходѧ́щыѧ и҆ нисходѧ́щыѧ над̾ сн҃а чл҃вѣ́ческагѡ. Сегѡ̀ ра́ди вѣ́дꙋще пꙋ́ть тво́й, ꙗ҆́кѡ никто́же прїи́детъ ко ѻ҆ц҃ꙋ̀, то́кмо тобо́ю, пое́мъ тебѣ̀ си́це:
І҆и҃се, на ѻ҆́блацѣхъ свѣ́та возше́дый ко ѻ҆ц҃ꙋ̀, ᲂу҆га́сшїй свѣти́льникъ дꙋшѝ моеѧ̀ просвѣтѝ: і҆и҃се, во свѣ́тлостехъ ст҃ы́хъ твои́хъ вознесы́йсѧ горѣ̀, животворѧ́щїй ѻ҆́гнь тво́й въ се́рдцѣ мое́мъ воспламенѝ.
І҆и҃се, па́че со́лнца возсїѧ́вый на высотѣ̀ нбⷭ҇нѣй въ вознесе́нїи твое́мъ, теплото́ю дх҃а твоегѡ̀ хла́дъ дꙋшѝ моеѧ̀ разженѝ: і҆и҃се, свѣ́тъ ѿ свѣ́та бжⷭ҇тва̀ твоегѡ̀ возсїѧ́вый мі́рꙋ ѿ ѻ҆ц҃а̀, свѣ́томъ слове́съ твои́хъ въ но́щи грѣха̀ на́съ спѧ́щихъ просвѣтѝ.
І҆и҃се, со́лнце пра́вды, и҆мѣ́ѧй ѿ кра́ѧ нб҃сѐ восхо́дъ тво́й и҆ срѣ́тенїе твоѐ да́же до кра́ѧ нб҃сѐ, во всю̀ зе́млю вѣща́нїе твоѐ возвѣща́й на́мъ всегда̀: і҆и҃се, невече́рнїй свѣ́те, и҆мѣ́ѧй па́ки въ прише́ствїе твоѐ и҆схо́дъ тво́й, ꙗ҆́кѡ мо́лнїю ѿ востѡ́къ и҆ да́же до за̑падъ ꙗ҆вле́нїе твоѐ, ѻ҆гне́мъ гнѣ́ва твоегѡ̀ не попалѝ на́съ тогда̀.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ в҃і.
Блгⷣть но́вꙋю препода́лъ є҆сѝ, сладча́йшїй і҆и҃се, къ соверше́нїю ст҃ы́хъ и҆ въ созида́нїе цр҃кви ст҃ы́ѧ твоеѧ̀, є҆гда̀ на нб҃са̀ съ пречⷭ҇тою твое́ю пло́тїю возше́лъ є҆сѝ и҆ ѡ҆деснꙋ́ю бг҃а и҆ ѻ҆ц҃а̀ сѣ́лъ є҆сѝ, ꙗ҆́коже пи́сано є҆́сть: сше́дый пре́жде въ до́льнѣйшїѧ страны̑ землѝ сп҃се́нїѧ на́шегѡ ра́ди, ты̀ ны́нѣ возше́лъ є҆сѝ на высотꙋ̀ превы́ше всѣ́хъ нб҃съ, да и҆спо́лниши всѧ́чєскаѧ къ соверше́нїю ст҃ы́хъ, въ созида́нїе тѣ́ла хрⷭ҇то́ва, сегѡ̀ ра́ди плѣни́лъ є҆сѝ плѣ́нъ, и҆ пода́лъ є҆сѝ даѧ́нїѧ чл҃вѣ́кѡмъ, до́ндеже дости́гнемъ всѝ въ соедине́нїе вѣ́ры и҆ позна́нїѧ тебѐ, сн҃а бж҃їѧ, въ мꙋ́жа соверше́нна, въ мѣ́рꙋ во́зраста и҆сполне́нїѧ твоегѡ̀, да та́кѡ, сп҃се́нїе ᲂу҆лꙋчи́вше, бл҃года́рственнѡ воспое́мъ тебѣ̀: А҆ллилꙋ́їа.
І҆́косъ в҃і.
Пою́ще твоѐ во́льное на нб҃са̀ со сла́вою вознесе́нїе, поклонѧ́емсѧ твоемꙋ̀, влⷣко хрⷭ҇тѐ, ѡ҆деснꙋ́ю бг҃а и҆ ѻ҆ц҃а̀ сосѣдѣ́нїю, сла́вимъ твоѐ на нб҃сѝ и҆ на землѝ воцр҃е́нїе и҆ вѣ́рꙋемъ со а҆пⷭ҇лы твои́ми, ꙗ҆́кѡ вои́стиннꙋ, и҆́мже ѻ҆́бразомъ возше́лъ є҆сѝ на нб҃о, та́кожде па́ки прїи́деши на ѻ҆́блацѣхъ со сла́вою и҆ си́лою мно́гою. Тогда̀ ᲂу҆́бѡ не посрамѝ на́съ тебѣ̀ вѣ́рꙋющихъ и҆ та́кѡ вопїю́щихъ:
І҆и҃се, со ѻ҆ц҃е́мъ твои́мъ на прⷭ҇то́лѣ бжⷭ҇тва̀ при́снѡ сосѣдѧ́й, сподо́би побѣжда́ющымъ мі́ръ съ по́мощїю твое́ю сѣ́сти съ тобо́ю во црⷭ҇твїи твое́мъ: і҆и҃се, со ст҃ы́мъ ᲂу҆тѣ́шителемъ дх҃омъ твои́мъ вы́нꙋ споклонѧ́емый, не лишѝ на́съ по ѡ҆бѣтова́нїю твоемꙋ̀ того̀ соше́ствїѧ во слꙋже́нїи твое́мъ.
І҆и҃се, съ херꙋві́мы и҆ серафі́мы и҆ съ ли́ки ст҃ы́хъ по вознесе́нїи твое́мъ на нб҃сѝ спребыва́ѧй, пода́ждь на́мъ здѣ̀ на моли́твꙋ во и҆́мѧ твоѐ собра̑ннымъ присꙋ́тствїе твоѐ ѡ҆щꙋща́ти: і҆и҃се, ст҃ы́ѧ хра́мы твоѧ̑ по ѿше́ствїи твое́мъ на нб҃о пра́вѡ въ тѧ̀ вѣ́рꙋющымъ дарова́вый, помогѝ на́мъ во хра́мѣ стоѧ́щымъ себє̀ на нб҃сѐ бы́ти помышлѧ́ти.
І҆и҃се, пречⷭ҇тꙋю мт҃рь твою̀ со а҆пⷭ҇лы въ вознесе́нїе твоѐ на моли́твꙋ за ве́сь мі́ръ по себѣ̀ ѡ҆ста́вивый, не ѡ҆ста́ви на́съ без̾ предста́тельства ст҃ы́хъ твои́хъ: і҆и҃се, цр҃ковь, невѣ́стꙋ твою̀ на землѝ по вознесе́нїи твое́мъ до сконча́нїѧ вѣ́ка ѡ҆ста́вивый, не лишѝ на́съ ча́дъ тоѧ̀ бл҃года́тныхъ дарѡ́въ твои́хъ.
І҆и҃се, вознесы́йсѧ ѿ на́съ на нб҃о, не ѡ҆ста́ви на́съ си́рыхъ.
Конда́къ г҃і.
Ѽ, пресла́дкїй и҆ всеще́дрый і҆и҃се, вознесы́йсѧ ѿ на́съ на нб҃о и҆ сѣдѣ́нїемъ ѡ҆деснꙋ́ю бг҃а и҆ ѻ҆ц҃а̀ поми́ловавый и҆ ѡ҆бж҃и́вый па́дшее є҆стество̀ на́ше! при́зри съ высоты̀ нбⷭ҇ныѧ на немѡщны́ѧ и҆ къ землѝ пове́ржєнныѧ рабы̑ твоѧ̑ и҆ да́рꙋй на́мъ си́лꙋ свы́ше побѣжда́ти всѧ̑ и҆скꙋше́нїѧ ѿ пло́ти, мі́ра и҆ дїа́вола находѧ́щїѧ на ны̀, да гѡ́рнѧѧ бꙋ́демъ мꙋ́дрствовати, а҆ не земна̑ѧ. И҆ сохранѝ на́съ ѿ всѣ́хъ врагѡ́въ ви́димыхъ и҆ неви́димыхъ возстаю́щихъ на на́съ. По кончи́нѣ же земны́ѧ жи́зни на́шеѧ вознесѝ дꙋ́ши на́ша въ нбⷭ҇ныѧ ѻ҆би́тєли, и҆дѣ́же со всѣ́ми ст҃ы́ми вы́нꙋ воспѣва́ти бꙋ́демъ: А҆ллилꙋ́їа.
Се́й конда́къ глаго́ли три́жды. И҆ па́ки і҆́косъ а҃-й и҆ конда́къ а҃-й.
Мл҃тва на вознесе́нїе гдⷭ҇не.
Гдⷭ҇и і҆и҃се хрⷭ҇тѐ, бж҃е на́шъ, соше́дый съ нбⷭ҇ныхъ высо́тъ сп҃се́нїѧ на́шегѡ ра́ди и҆ напита́вый на́съ дꙋхо́вною ра́достїю во ст҃ы́ѧ и҆ пресвѣ́тлыѧ днѝ воскр҃се́нїѧ твоегѡ̀, и҆ па́ки по соверше́нїи земна́гѡ слꙋже́нїѧ твоегѡ̀ вознесы́йсѧ ѿ на́съ на нб҃о со сла́вою и҆ возсѣ́дый ѡ҆деснꙋ́ю бг҃а и҆ ѻ҆ц҃а̀! въ се́й ꙗ҆́сный и҆ всесвѣ́тлый де́нь бжⷭ҇твеннагѡ на нб҃са̀ восхожде́нїѧ твоегѡ̀ землѧ̀ пра́зднꙋетъ и҆ ликꙋ́етъ, ра́дꙋетсѧ и҆ нб҃о вознесе́нїемъ дне́сь творца̀ тва́ри, чл҃вѣ́цы славосло́вѧтъ непреста́ннѡ, зрѧ́ще заблꙋ́ждшее и҆ па́дшее є҆стество̀ своѐ на ра́мо твоѐ, сп҃се, взе́млемое и҆ на нб҃са̀ вознесе́нное, а҆́гг҃ли же веселѧ́тсѧ, глаго́люще: кто̀ се́й, прише́дый во сла́вѣ, си́ленъ во бра́ни; се́й вои́стиннꙋ цр҃ь сла́вы. Сподо́би и҆ на́мъ немощны́мъ, земна̑ѧ є҆щѐ мꙋ́дрствꙋющымъ и҆ плотоꙋго́дїѧ, твори́ти не престаю́щымъ, восхо́дъ тво́й на нб҃о стра́шный помышлѧ́ющи и҆ пра́зднꙋюще, плѡтска́ѧ и҆ житє́йскаѧ ѿложи́ти попечє́нїѧ и҆ со а҆пⷭ҇лы твои́ми на нб҃о ны́нѣ взира́ти всѣ́мъ се́рдцемъ свои́мъ и҆ всѣ́ми помышле́ньми свои́ми, помина́юще, ꙗ҆́кѡ та́мѡ на нб҃сѝ горѣ̀ жи́тельство на́ше є҆́сть, здѣ́сь же на землѝ мы̀ то́чїю стра́нники и҆ прише́льцы є҆смы̀, ѿше́дшыѧ и҆з̾ до́ма ѻ҆́ч҃а въ странꙋ̀ дале́че грѣха̀. Сегѡ̀ ра́ди ᲂу҆се́рднѡ про́симъ тѧ̀, пресла́внымъ вознесе́нїемъ твои́мъ, гдⷭ҇и, ѡ҆живѝ на́шꙋ со́вѣсть, є҆ѧ́же нꙋ́жнѣйши ничто́же є҆́сть въ мі́рѣ, возведѝ на́съ и҆з̾ плѣ́на сегѡ̀ грѣхо́внагѡ пло́ти и҆ мі́ра и҆ сотворѝ на́съ гѡ́рнѧѧ мꙋ́дрствовати, а҆ не земна̑ѧ, ꙗ҆́кѡ да не ктомꙋ̀ себѣ̀ ᲂу҆гожда́ти бꙋ́демъ и҆ жи́ти, но тебѣ̀ гдⷭ҇ꙋ и҆ бг҃ꙋ на́шемꙋ слꙋжи́ти бꙋ́демъ и҆ порабо́таемъ, до́ндеже ѿрѣши́вшесѧ ѿ ᲂу҆́зъ пло́ти и҆ проше́дши невозбра́ннѡ воздꙋ̑шныѧ мыта̑рства, дости́гнемъ нбⷭ҇ныхъ ѻ҆би́телей твои́хъ, и҆дѣ́же, ста́вше ѡ҆деснꙋ́ю вели́чествїѧ твоегѡ̀, со а҆рха́гг҃лы и҆ а҆́гг҃лы и҆ всѣ́ми ст҃ы́ми прославлѧ́ти бꙋ́демъ всест҃о́е и҆́мѧ твоѐ со безнача́льнымъ твои́мъ ѻ҆ц҃е́мъ и҆ прест҃ы́мъ и҆ є҆диносꙋ́щнымъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.