Акафист Искуплению
Составлен митрополитом Вениамином Федченковым
Не утвержден для общецерковного использования.
Конда́к 1.
Возбра́нный воево́до, Христе́ Бо́же на́ш, пре́жде сложе́ния ми́ра на спасе́ние определе́нный, воплоти́тися от Присноде́вы Мари́и изво́лил еси́, да принесе́ши Себе́, я́ко же́ртву непоро́чну, и Кро́вию Твое́ю примири́ши на́с Роди́телю Твоему́. Мы́ же, я́ко Искупи́телю на́шему, благода́рне взыва́ем Ти́:
Иису́се, Искупи́телю ми́ра, Спа́се, спаси́ на́с.
И́кос 1.
А́нгельских во́инств и ми́ра Тво́рче, в непристу́пней седя́й сла́ве на Престо́ле Божества́, любве́ ра́ди к челове́ческому ро́ду, по о́бразу Твоему́ созда́нному во сла́ве, воплоти́вся, Себе́ Самого́ ума́лил еси́. Мы́ же, сла́ве Твое́й дивя́щеся, уничиже́нию же па́че изумля́ющеся, славосло́вим Тя́ си́це:
Иису́се, Бо́же предве́чный, Еди́н сы́й Присносу́щныя Тро́ицы: Иису́се, Сы́не Бо́жий Единоро́дный, Отцу́ и Ду́ху соприсносла́вный.
Иису́се, А́нгелом недомы́слимый, челове́ком непостижи́мый: Иису́се, всея́ тва́ри превысоча́йший, Божество́м непристу́пный.
Иису́се, Сло́ве О́тчий, от Де́вы воплоти́тися благоволи́вый: Иису́се, Сы́не Бо́га Жива́го, Сы́н Челове́ческий бы́вый.
Иису́се, Соде́телю ми́ра, Себе́ Самому́ пло́ть Ду́хом сотвори́вый: Иису́се, грехи́ на́ша прие́мый, Кресто́м Свои́м на́с искупи́вый.
Иису́се, Отца́ в Тро́ице сла́вимаго си́м уми́лостивый: Иису́се, до зра́ка ра́бия ума́ленный, вы́ше небесе́ вознесы́йся.
Иису́се, на Престо́ле Тро́ицы возсе́дый, Ду́ха от Отца́ на́м низпосла́вый: Иису́се, во смире́нии сше́дый, во сла́ве суди́ти всему́ ми́ру гряды́й.
Иису́се, Искупи́телю ми́ра, Спа́се, спаси́ на́с.
Конда́к 2.
Го́рдостне пе́рвый челове́к, бо́г бы́ти возжеле́в, от благода́тныя жи́зни, от Тебе́, Бо́га и Творца́ своего́, отпа́дый безу́мне, не оста́влен бы́сть Тобо́ю, Го́споди, но а́ще и изгна́л еси́ его́ из рая́ сла́дости, оба́че Боже́ственне спасти́ предопредели́л еси́, да поми́ловании Тобо́ю, па́ки зове́м: Аллилу́иа.
И́кос 2.
Никто́же взы́де на Не́бо, то́кмо Ты́, Сы́не Бо́жий, сше́дый с Небесе́, ви́дя челове́ка от жи́зни Боже́ственныя правосу́дне отлуче́ннаго, от диа́вола же неисце́льне му́чима. Не терпя́ созда́ния руку́ Твое́ю зре́ти ги́блема, сни́ти на зе́млю человеколю́бне благоволи́л еси́, да примири́ши Роди́телю зову́щыя Ти́ си́це:
Иису́се, я́ко Бо́г Благи́й, отпа́дших ми́лостию Твое́ю не оста́вивый: Иису́се, па́ки на́с спасти́ хотя́й, прему́дростию Свое́ю взыска́вый.
Иису́се, пра́вды и милосе́рдия ра́ди, да не до конца́ поги́бнем, из рая́ челове́ка изгна́вый: Иису́се, диа́волом прельще́нных, в ра́бстве тому́ на́м бы́ти попусти́вый.
Иису́се, го́рькою сме́ртию, грехо́в на́ших ра́ди, промысли́тельне на́с наказа́вый: Иису́се, в по́те лица́ труди́тися и в ско́рбех жи́ти человеколю́бне на́с наста́вивый.
Иису́се, зако́н иуде́ом, не́мощи облича́вый, руко́ю моисе́овою дарова́вый: Иису́се, проро́ки пресла́вными и вожди́ му́дрыми те́х руководи́вый.
Иису́се, язы́чники заблу́ждшыя творе́ньми ми́ра просвеща́яй и со́вестию наставля́яй: Иису́се, напосле́док ле́т всему́ ми́ру Себе́ теле́сне яви́вый.
Иису́се, Отца́ Своего́ в Тебе́ Саме́м ми́ру откры́вый: Иису́се, Ду́ха Свята́го от Отца́ посла́ти па́ки благоволи́вый.
Иису́се, Искупи́телю ми́ра, Спа́се, спаси́ на́с.
Конда́к 3.
Челове́к бы́в, Христе́ Бо́же, да челове́ков бо́ги по благода́ти соде́лаеши: сего́ ра́ди неизрече́нно Себе́ плототвори́ши, да на́с обоготвори́ши, Ти́ со А́нгелы подвиза́я вопи́ти: Бо́гу в Вы́шних сла́ва, на земли́ с Бо́гом ми́р, в челове́цех сего́ ра́ди благоволе́ние. Те́мже зове́м в Тро́ице сла́вимому Бо́гу: Аллилу́иа.
И́кос 3.
Е́вы немощно́е, от тва́ри иска́вшия обоже́ния, исправля́я, во утро́бу смире́нныя Де́вы всели́лся еси́, Божество́м челове́чество растворя́я. Пречи́стая же, от Ду́ха Свята́го зача́тие восприе́мши, Бо́га во чре́ве Свое́м иму́щи, научи́ на́с зва́ти Воплоти́вшемуся та́ко:
Иису́се, Отцу́ Твоему́ Небе́сному послуша́ние всеце́лое яви́вый: Иису́се, от Свята́го Ду́ха воплоти́выйся, в же́ртву Себе́ благоволи́вый.
Иису́се, А́гнче Бо́жий, в же́ртву за грехи́ на́ша Отцу́ Себе́ приведы́й: Иису́се, кля́тву отлуче́ния за грехопаде́ние на́ше си́м отъя́вый.
Иису́се, и а́нгельския умы́ та́йною домострои́тельства удиви́вый: Иису́се, и Само́й Ма́тери Твое́й о́браз воплоще́ния не откры́вый.
Иису́се, по смире́ннем глаго́ле Де́вы: се́, Раба́ Госпо́дня, воплоти́выйся: Иису́се, Ма́терию Иоа́нна в до́ме Заха́рии ра́достне велича́нный.
Иису́се, го́рькую держа́ву враго́в на́ших смире́нием посрами́вый: Иису́се, я́ко О́трок Изра́иля, от Него́же произошла́ е́сть, Ма́терь Твою́ ублажи́вый.
Иису́се, Елисаве́тою, я́ко Мари́а Ма́ти Твоя́, Го́споди, ублаже́нный: Иису́се, Предте́чею Иоа́нном во чре́ве Ма́тере чу́дне просла́вленный.
Иису́се, Искупи́телю ми́ра, Спа́се, спаси́ на́с.
Конда́к 4.
Челове́к бы́в, Бо́г сы́й, обре́затися в осмы́й де́нь не возгнуша́лся еси́, зако́н я́ко Законода́вец исполня́я, заве́т же но́вый предначина́яй. Сего́ ра́ди, сие́ зна́мение обруче́ния с Це́рковию Твое́ю восхваля́юще, спаси́тельное и́мя Иису́с прославля́ем, глаго́люще со Арха́нгелом: Аллилу́иа.
И́кос 4.
Ева́нгльскую благода́ть предначина́я, дре́вний зако́н обре́занием Свои́м запечатле́л еси́: же́ртвы кре́стныя проо́браз исполня́я, в заве́т ве́чный но́вым обре́занием Креще́ния ко Отцу́ на́с приве́л еси́. Мы́ же на Тя́, спасти́ на́с прише́дшаго, упова́юще, благонаде́жно вопие́м:
Иису́се, Бо́же И́стинный и Челове́к соверше́нный, кроме́ греха́ бы́вый: Иису́се, вся́ зако́ны испо́лнивый и ни еди́ныя непра́вды не сотвори́вый.
Иису́се, заве́т но́вый, благода́тию Свята́го Ду́ха установи́вый: Иису́се, кро́вь пречи́стую во обре́зании Твое́м проли́вый.
Иису́се, искупи́тельную же́ртву еще́ в младе́нчестве предобрази́вый: Иису́се, немощны́й зако́н за́поведей благода́тию замени́вый.
Иису́се, Це́рковь Твою́, я́ко неве́сту, Себе́ предобручи́вый: Иису́се, И́менем Свои́м, Спаси́теля ея́, человеколю́бно ю́ приусво́ивый.
Иису́се, наде́ждо спасе́ния на́шего, си́лу И́мене Твоего́ на́м дарова́вый: Иису́се, ко обре́занию страсте́й на́ших страда́ньми Свои́ми призва́вый.
Иису́се, моли́тве И́менем Твои́м на́с гре́шных научи́вый: Иису́се, Сы́не Бо́жий: поми́луй на́с по ми́лости Твое́й, моли́тися просвети́вый.
Иису́се, Искупи́телю ми́ра, Спа́се, спаси́ на́с.
Конда́к 5.
Жи́знию сокрове́нною с Пречи́стою Ма́терию в до́ме Ио́сифове жи́вый, и в благода́ти у Бо́га и челове́к преуспе́вый, прише́л еси́ ко Иоа́нну крести́тися от него́, не ве́дый греха́. Предте́ча же возбраня́ше Ти́, у Тебе́ прося́ Креще́ния. Повеле́нный же Тобо́ю, во Иорда́не крести́ Тя, со стра́хом зовы́й: Аллилу́иа.
И́кос 5.
Его́же у́зриши в воде́ креща́ема, Ду́ха с небесе́ сходя́ща и на не́м пребыва́юща, То́й е́сть Сы́н Мо́й возлю́бленный: и Се́й е́сть крестя́й Ду́хом Святы́м, Сего́ ви́дев, рече́ши лю́дем: се́ А́гнец Бо́жий, взе́мляй грехи́ ми́ра, Ему́же не́смь досто́ин отреши́ти реме́нь сапогу́ Его́. Мы́ же, чрез Него́ благоволе́ние получи́вше, глаго́лем с ве́рою:
Иису́се, во Иорда́не креща́ющуся Тебе́, Го́споди, Тро́ицу яви́вый: Иису́се, про́поведь о Не́й явле́нием Свои́м откры́вый.
Иису́се, Отце́м свиде́тельствованный и Ду́хом Святы́м пома́занный: Иису́се, Ца́рство Пресвяты́я Тро́ицы возстанови́ти предука́занный.
Иису́се, держа́ву диа́волю разруша́ти начина́я, погруже́нием из воды́ того́ изгна́вый: Иису́се, и на́с крести́ти повеле́вый, отрещи́ся от него́ науча́яй.
Иису́се, от пра́ведныя кля́твы челове́ки избавля́яй, на́с ра́ди уничижи́выйся: Иису́се, на́шу безо́бразную наготу́ покрыва́яй, во Иорда́не обнажи́выйся.
Иису́се, греха́ не ве́дый и на́ша грехи́ понесы́й, от ни́х омы́выйся: Иису́се, всю́ тва́рь обнови́ти хотя́й, обнови́тельную благода́ть воде́ дарова́вый.
Иису́се, зна́мением кре́стным непостижи́мою си́лою во́ду освяща́яй: Иису́се, в река́х и езе́рех струи́ всемогу́щею благода́тию обновля́яй.
Иису́се, Искупи́телю ми́ра, Спа́се, спаси́ на́с.
Конда́к 6.
Сла́ву Божества́ в преображе́нии Твое́м на горе́ Фаво́р апо́столом показа́л еси́, Христе́ Спа́се, да не то́кмо распя́тие Твое́ уразуме́ют во́льное, но и Ца́рствие Бо́жие прише́дшее в си́ле у́зрят, и та́ко с Моисе́ем и Илие́ю Тебе́, я́ко Бо́гу, покло́нятся и со стра́хом и ра́достию возопию́т: Аллилу́иа.
И́кос 6.
Преобрази́вшагося Тя́ Боже́ственною сла́вою ученико́в лу́чшии ви́девше, со стра́хом ни́ц падо́ша. Пе́тр же восхище́нный взыва́ше: Го́споди, добро́ е́сть на́м зде́ бы́ти. Моисе́й же и Илия́ об исхо́де твое́м бесе́доваша. Мы́ же, а́ще и после́днейшии от учени́к твои́х есмы́, взыва́ем ти́ те́пле:
Иису́се, еще́ пре́жде Воскре́сния и Вознесе́ния сла́ву Божества́ яви́вый: Иису́се, ученики́ Твоя́ зре́ти Кре́стное распя́тие укрепи́вый.
Иису́се, Боже́ственную сла́ву Твою́ я́ве те́м показа́вый: Иису́се, Илию́ с небесе́, Моисе́а из ме́ртвых, я́ко всеси́льный, воззва́вый.
Иису́се, лице́м Свои́м, я́ко со́лнце, све́тло возсия́вый: Иису́се, и тва́рь блиста́нием одея́ний Твои́х сла́вно просла́вивый.
Иису́се, ра́йское блаже́нство, челове́ком предназна́ченное, показа́вый: Иису́се, терпе́ти кре́ст сво́й на земли́ и на́с все́х призва́вый.
Иису́се, Ца́рству несозда́нному присносу́щному земны́х науча́яй: Иису́се, благода́тному созерца́нию Ца́рствия Бо́жия просвеща́яй.
Иису́се, преле́стныя пути́ позна́ния Преображе́нием твои́м обличи́вый: Иису́се, от су́етныя сла́вы и тле́ннаго бога́тства на́с отврати́вый.
Иису́се, Искупи́телю ми́ра, Спа́се, спаси́ на́с.
Конда́к 7.
А́нгелами на превознесе́ннем Престо́ле носи́мый, и на Фаво́ре сла́ву Ца́рствия Твоего́ яви́вый, на подяре́мное жребя́, А́гнче Бо́жий, возсе́л еси́, да го́рькое ца́рство врага́ Кресто́м победи́ши. Де́ти же евре́йстии, при́сно хле́ба тле́ннаго и ца́рства земна́го и́щуще, оса́нна вопия́ху, не ве́дуще воспева́ти я́ко Бо́гу: Аллилу́иа.
И́кос 7.
Сле́зы пролива́л еси́, Спаси́телю ми́ра, к Иерусали́му гряды́й и я́ко Ца́рь Изра́илев сла́вимый: ви́дел бо еси́, я́ко и в се́й ча́с избра́нный наро́д не позна́л е́сть посеще́ния Месси́и своего́ и Го́спода. Мы́ же, ве́дяще тя́ Царя́ Небе́снаго, искупи́ти Кресто́м гряду́щаго лю́ди Своя́ от держа́вы вра́жия, вопие́м ве́рно:
Иису́се, Го́споди госпо́дствующих, Херуви́мами носи́мый: Иису́се, А́гнче Бо́жий, на закла́ние осля́тем вози́мый.
Иису́се, во Своя́ прише́дый и Свои́ми осужде́нный: Иису́се, на во́льное распя́тие за грехи́ ми́ра обрече́нный.
Иису́се, оса́нна, я́ко царю́ земно́му, в слу́х прия́вый: Иису́се, распни́ Его́, я́ко Сы́на Бо́жия: претерпе́вый.
Иису́се, наро́д избра́нный, я́ко осли́цу упо́рную, оста́вивый: Иису́се, язы́чники, я́ко жребя́ младо́е, в Ца́рствие избра́вый.
Иису́се, и те́м к концу́ ми́ра отпаде́ние предрека́вый: Иису́се, и́стинным евре́ем, егда́ реку́т: благослове́н гряды́й, обраще́ние обеща́вый.
Иису́се, да вся́ по ми́лости поми́луеши, в противле́ние все́х затвори́вый: Иису́се, врата́ ра́йская все́м лю́дем кресто́м отвори́вый.
Иису́се, Искупи́телю ми́ра, Спа́се, спаси́ на́с.
Конда́к 8.
И́же хо́щет в ва́с бы́ти бо́льший, да бу́дет все́м слуга́, глаго́лал еси́ ученико́м Свои́м, о́браз Себе́ показу́яй и но́ги все́м умы́вый, пото́м же на Ве́чери Та́йней Же́ртву Отцу́ Те́лом и Кро́вию Себе́ принесы́й, и на́м препода́вый, и то́ю Отца́ уми́лостивый, во е́же па́ки в обще́ние Свое́ прия́ти, да зове́м ему́: Аллилу́иа.
И́кос 8.
Мои́ ли умы́еши но́зе, Го́споди, ре́вностный в любви́ Пе́тр глаго́лаше. Ты́ же: а́ще не умы́ю кого́, не и́мать то́й ча́сти со Мно́ю: указу́я, я́ко никто́же чи́ст бу́дет, а́ще не Ты́ очи́стиши его́, грехи́ те́х взе́м и Ду́хом Святы́м измы́в. И мы́ со апо́столом вопие́м: омы́й не то́кмо но́зе, но и главу́, да досто́йни бу́дем прича́стницы Ве́чери Твоея́ та́йныя, зову́ще ве́рою:
Иису́се, Госпо́дь Сы́й все́х, смире́нно но́зе рабо́м умы́вый: Иису́се, смире́ние, пу́ть к любви́, любо́вь к единомы́слию, яви́вый.
Иису́се, любо́вь, я́коже зна́мение, ученико́м Твои́м указа́вый: Иису́се, о любви́ О́тчей и к друго́м Твои́м в моли́тве Свое́й предвеща́вый.
Иису́се, с же́ртвою к Отцу́ восходя́й, Же́ртву Та́йную установи́вый: Иису́се, хле́б и вино́ в Те́ло и Кро́вь Свою́ непостижи́мо претвори́вый.
Иису́се, Преми́рный Све́те, преесте́ственно от Де́вы рожде́нный: Иису́се, в Та́йнах Те́ло и Кро́вь Ду́хом Святы́м претворя́яй, несотворе́нный.
Иису́се, Сло́ве воплоти́вшееся, челове́ков в Та́йнах Себе́ соедини́вый: Иису́се, Лозо́ виногра́дная, я́ко ве́тви Своя́, на́с к Себе́ приви́вый.
Иису́се, реки́й: яды́й Мою́ Пло́ть и пия́й Мою́ Кро́вь, во Мне́ пребыва́ет: Иису́се, обетова́вый: и А́з в не́м, со Отце́м и Ду́хом, оби́тель сотвори́м.
Иису́се, Искупи́телю ми́ра, Спа́се, спаси́ на́с.
Конда́к 9.
Я́ко А́гнца, на Ве́чери угото́вив Себе́ на закла́ние во́льное, в Гефсима́нию но́щию вше́л еси́, лу́чшыя ученики́ взе́м с Собо́ю, сла́ву Твою́ на Фаво́ре ви́девшыя. И зде́ на́чал еси́ зело́ тужи́ти, да́же до по́ту крова́ваго, моля́ся Отцу́ Своему́: а́ще возмо́жно, ми́мо неси́ ча́шу сию́, оба́че не я́коже А́з хощу́, но я́коже Ты́. А́з же зову́: Аллилу́иа.
И́кос 9.
Гефсимани́йскую зе́млю крова́выми ка́плями ороси́л еси́, Сы́не Челове́ческий, я́ко не то́кмо кре́стных страда́ний душа́ и те́ло Твои́ ужаса́хуся, но и Са́мое естество́ Челове́ческое, к безсме́ртию призва́нное, сме́ртию возмуща́шеся, еще́ же и греси́ всего́ ми́ра на Тебе́ возлежа́ху. Мы́ же, я́ко ученицы́ спя́щии, не мо́жем Ти́ зва́ти:
Иису́се, Бо́же безстра́стный, я́ко челове́к страда́вый: Иису́се, Еди́ным Лице́м в дву́х естества́х пребыва́вый.
Иису́се, грехи́ всего́ ми́ра на Себе́ восприя́вый: Иису́се, ра́ди все́х страда́ти и умре́ти изво́ливый.
Иису́се, прия́тием Креста́ я́ко огне́м, зе́льне пали́мый: Иису́се, му́кою сме́ртною, я́ко Челове́к, тя́жце томи́мый.
Иису́се, в ча́с стра́шный в моли́тве укрепле́ния иска́вый: Иису́се, и от немощны́х ученико́в утеше́ния Себе́ ожида́вый.
Иису́се, об избавле́нии от ча́ши сея́ Отцу́ трикра́ты моли́выйся: Иису́се, на во́лю Его́ послу́шне возложи́выйся.
Иису́се, все́ми оста́вленный, Еди́н в нощи́ вся́ терпе́вый: Иису́се, А́нгела, в утеше́ние от Отца́ по́сланнаго, узре́вый.
Иису́се, Искупи́телю ми́ра, Спа́се, спаси́ на́с.
Конда́к 10.
Распя́тие прия́ти моли́твою в Гефсима́нии угото́вленный, ми́рне на Кре́ст ше́л еси́, непра́ведный су́д, хуле́ния, бие́ния, зауше́ния претерпе́вый, да иску́пиши на́с от кля́твы зако́нныя и примири́в со Отце́м, приведе́ши к Нему́ всеро́днаго Ада́ма, благода́рственне со Е́вою и все́ми на́ми зову́щаго: Аллилу́иа.
И́кос 10.
Е́здяй на колесни́цех херуви́мских во сла́ве, на́г и пору́ган на Кресте́ ви́сит Ца́рь сла́вы, на́ше безче́стие на то́м пригвозди́в, да благоволе́ние О́тчее на́м исхода́тайствует же́ртвою Свое́ю. Мы́ же, в Твое́м распя́тии пови́ннии, Кресту́ Твоему́ покланя́емся, Христе́, и зове́м Ти́ сицева́я:
Иису́се, со Отце́м Безнача́льным и Ду́хом присноспребыва́яй: Иису́се, и на Кресте́ ви́ся, Престо́ла Божества́ не оставля́яй.
Иису́се, Искупи́тель ми́ра яви́ся и А́нгелом неизрече́нный: Иису́се, в не́дрех Пресвяты́я Тро́ицы я́ко Бо́г бы́в неизме́нно.
Иису́се, я́ко Еди́н от Тро́ицы Себе́ Самому́ принесе́ся непостижи́мо: Иису́се, благоволе́ние Тро́ичное лю́дем возврати́ непоколеби́мо.
Иису́се, благода́ть Ду́ха Свята́го от Отца́ низпосла́вый: Иису́се, сме́ртию Свое́ю сме́рть на́шу попра́вый.
Иису́се, держа́ву диа́волю и а́д зло́бный сокруши́вый: Иису́се, разбо́йника пока́явшагося в ра́й пе́рваго введы́й.
Иису́се, пра́отцев, с ве́рою Тя́ ожида́вших, из а́да изведы́й.
Иису́се, Искупи́телю ми́ра, Спа́се, спаси́ на́с.
Конда́к 11.
Шестокрила́тии Херуви́ми и многоочи́тии Серафи́ми, зря́ще Своего́ Влады́ку, я́ко мертвеца́, во гро́бе лежа́ща, ужаса́хуся, ли́ца закрыва́юще. Тва́рь, егда́ ре́кл еси́: соверши́шася, спасе́нию ра́довашеся. Челове́ческий же ро́д, возсозда́ние с преизбы́тком улучи́в, взыва́ет Ти́: Аллилу́иа.
И́кос 11.
Нетле́ния све́т из гро́ба все́м возсия́, Тебе́, Христе́, воскре́сшу из ме́ртвых: ро́д челове́ческий обнови́ся, сме́рть умертви́ся, вся́ тва́рь весели́тся, а́д лю́те стене́т, ве́чная жи́знь ца́рствует, Небе́сныя Си́лы лику́ют, пра́зднует же ми́р ви́димый и неви́димый. И мы́ игра́юще, воспева́ем си́це:
Иису́се, Бо́же нетле́нный, пло́тию из ме́ртвых воскресы́й: Иису́се, Христе́ Спа́се, изги́бший ми́р воскре́снием спасы́й.
Иису́се, сме́ртию сме́рть попра́вый, воскре́сние на́м улучи́вый: Иису́се, диа́вола сокруши́в, держа́ву его́ разори́вый.
Иису́се, Па́сха та́инственная, челове́ка па́дшаго обновля́ющая: Иису́се, Па́сха кра́сная, две́ри ра́йския на́м отверза́ющая.
Иису́се, не́ба и земли́ соедине́ние, Бо́га с челове́ки примире́ние: Иису́се, Спа́се на́ш, живо́е и неже́ртвенное заколе́ние.
Иису́се, А́гнче Бо́жий, за все́х закла́нный, Же́ртва жива́я: Иису́се, на́ш Искупи́тель, ми́ру Спаси́тель, Па́сха свята́я.
Иису́се, я́ко Бо́г, Са́м Себе́ во́лею ко Отцу́ за все́х приведы́й: Иису́се, на́с совоскреси́вый, пу́ть Кресто́м показа́вый.
Иису́се, Искупи́телю ми́ра, Спа́се, спаси́ на́с.
Конда́к 12.
Ада́мов ро́д Воскре́снием обнови́в и ученики́ Твоя́ Ца́рствию Бо́жию наста́вив, возне́слся еси́ во сла́ве, Христе́ Бо́же на́ш, отону́дуже и снизше́л еси́, и спосади́в в Себе́ естество́ челове́ческое одесну́ю Отца́, Ду́ха Свята́го посла́л еси́, де́ло Свое́ сконча́л еси́ спасе́ния, Уте́шителю преда́в, да и мы́ всегда́ зове́м Ти́: Аллилу́иа.
И́кос 12.
Госпо́дь се́й, глаго́лаху ученико́м белоно́снии А́нгели, вознесы́йся от ва́с на Не́бо, та́кожде во сла́ве прии́дет суди́ти живы́м и ме́ртвым. И́мже обра́дованнии и обетова́нием Ду́ха уте́шеннии, с ра́достию вели́кою в земны́й Иерусали́м Небе́снаго жду́ще, на су́д себе́ угото́вим, зову́ще:
Иису́се, вся́ ко спасе́нию на́шему сотвори́вый, приими́ хвалу́ на́шу: Иису́се, на́с ра́ди воплоти́выйся, обоже́ние благода́тию сотвори́ в на́с.
Иису́се, в Креще́нии Тро́ицу яви́вый, от са́мости исцели́ на́с: Иису́се, ве́ре в Тя́ Ду́хом Святы́м просвети́ на́с.
Иису́се, Ду́хом Святы́м, Твои́ми соде́лай на́с: Иису́се, из ме́ртвых воскресы́й, сме́ртная тела́ на́ша Ду́хом Святы́м оживи́ в на́с.
Иису́се, Ду́хом Бо́жиим, Отцу́, о Не́мже взыва́ти: а́вва О́тче, усынови́ на́с: Иису́се, сонасле́дницы Тебе́ чрез страда́ния, просла́ви на́с.
Иису́се, плоды́ Ду́ха: любы́, ра́дость, ми́р покажи́ в на́с: Иису́се, моли́тися Ду́хом в на́ших не́мощех укрепи́ на́с.
Иису́се, свобо́ду на́м да́вый, и тва́рь свободи́ всю́: Иису́се, искупи́телю на́ш и одесну́ю Бо́га седы́й, всегда́ хода́тайствуй о на́с.
Иису́се, Искупи́телю ми́ра, Спа́се, спаси́ на́с.
Конда́к 13.
О пресла́вный и многоми́лостивый Иису́се Христе́, Сы́не Бо́жий! Отцу́ Себе́ в же́ртву о на́с приведы́й и пу́ть Креста́ и покая́ния на́м указа́вый, Са́м заступи́ на́с и поми́луй Твое́ю благода́тию, и и́миже ве́си судьба́ми, спаси́ на́с, недосто́йныя рабы́ Твоя́, да ны́не и при́сно зове́м Ти́: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
А́нгельских во́инств и ми́ра Тво́рче, в непристу́пней седя́й сла́ве на Престо́ле Божества́, любве́ ра́ди к челове́ческому ро́ду, по о́бразу Твоему́ созда́нному во сла́ве, воплоти́вся, Себе́ Самого́ ума́лил еси́. Мы́ же, сла́ве Твое́й дивя́щеся, уничиже́нию же па́че изумля́ющеся, славосло́вим Тя́ си́це:
Иису́се, Бо́же предве́чный, Еди́н сы́й Присносу́щныя Тро́ицы: Иису́се, Сы́не Бо́жий Единоро́дный, Отцу́ и Ду́ху соприсносла́вный.
Иису́се, А́нгелом недомы́слимый, челове́ком непостижи́мый: Иису́се, всея́ тва́ри превысоча́йший, Божество́м непристу́пный.
Иису́се, Сло́ве О́тчий, от Де́вы воплоти́тися благоволи́вый: Иису́се, Сы́не Бо́га Жива́го, Сы́н Челове́ческий бы́вый.
Иису́се, Соде́телю ми́ра, Себе́ Самому́ пло́ть Ду́хом сотвори́вый: Иису́се, грехи́ на́ша прие́мый, Кресто́м Свои́м на́с искупи́вый.
Иису́се, Отца́ в Тро́ице сла́вимаго си́м уми́лостивый: Иису́се, до зра́ка ра́бия ума́ленный, вы́ше небесе́ вознесы́йся.
Иису́се, на Престо́ле Тро́ицы возсе́дый, Ду́ха от Отца́ на́м низпосла́вый: Иису́се, во смире́нии сше́дый, во сла́ве суди́ти всему́ ми́ру гряды́й.
Иису́се, Искупи́телю ми́ра, Спа́се, спаси́ на́с.
Конда́к 1.
Возбра́нный воево́до, Христе́ Бо́же на́ш, пре́жде сложе́ния ми́ра на спасе́ние определе́нный, воплоти́тися от Присноде́вы Мари́и изво́лил еси́, да принесе́ши Себе́, я́ко же́ртву непоро́чну, и Кро́вию Твое́ю примири́ши на́с Роди́телю Твоему́. Мы́ же, я́ко Искупи́телю на́шему, благода́рне взыва́ем Ти́:
Иису́се, Искупи́телю ми́ра, Спа́се, спаси́ на́с.
Моли́тва пе́рвая, ко Го́споду Иису́су Христу́.
К Тебе́, Еди́ному Спаси́телю ми́ра и Искупи́телю на́шему, прибега́ем, Иису́се, Сы́не Бо́жий: ве́мы бо, вои́стинну ве́мы, я́ко не́сть ино́го И́мене под небесе́м, о не́мже возмо́жем спасти́ся. Сего́ ра́ди то́кмо на Тя́ упова́ем, гре́шных, а не пра́ведных спасти́ прише́дшаго. Тебе́ Еди́наго хода́тая о на́с к Бо́гу испове́дуем, к Твое́й всеси́льней благода́ти прибега́ем: не оста́ви на́с си́рых, Го́споди, я́коже ученико́м Твои́м обеща́л еси́. Всели́ в на́с Уте́шителя Ду́ха Твоего́, вся́ скве́рны на́ша очища́ющаго и в не́мощех утеша́ющаго. И Са́м, я́коже ре́кл еси́, пребу́ди с на́ми до сконча́ния ве́ка. Мы́ же, я́ко Спаси́теля на́шего ве́дуще, Пресвяту́ю же Засту́пницу Богоро́дицу со все́ми святы́ми Твои́ми призыва́юще, ве́сь живо́т на́ш Тебе́, Христу́ Бо́гу и Искупи́телю на́шему, с наде́ждою предади́м во ве́ки веко́в. Ами́нь.
Моли́тва втора́я, афо́нскаго и́нока отца́ Арсе́ния.
Го́споди Иису́се Христе́, Сы́не Бо́жий, поми́луй мя́!
Го́споди, собери́ разсе́янный мо́й у́м, дабы́ о́н ве́сь устреми́лся к Тебе́, Своему́ Созда́телю и Спаси́телю.
Сокруши́ стре́лы лука́ваго, отрева́ющыя мя́ от Тебе́.
Погаси́ пла́мень по́мыслов, пожига́ющих мя́ во вре́мя моли́твы.
Осени́ мя благода́тию Твое́ю, дабы́ мне́, до сконча́ния дни́й мои́х, Тебе́ Еди́наго люби́ти все́м се́рдцем и все́ю душе́ю мое́ю.
В ча́с же кончи́ны моея́ предста́ни мне́, кро́тко ду́шу мою́ от те́ла отдели́ и в Ца́рство Святы́я Тро́ицы всели́, за моли́твы Преблагослове́нныя Богоро́дицы и все́х святы́х. Ами́нь.
Моли́тва тре́тия, святи́теля Иоаса́фа Белогра́дскаго.
Бу́ди благослове́н де́нь же и ча́с, во́ньже Госпо́дь мо́й Иису́с Христо́с мене́ ра́ди роди́ся, распя́тие претерпе́ и сме́ртию пострада́. О Го́споди Иису́се Христе́, в ча́с кончи́ны моея́ предста́ни мне́ и ду́шу раба́ Твоего́ (и́мярек), в стра́нствии су́щую, в ру́це Твои́ приими́, за моли́твы Пречи́стыя Твоея́ Ма́тере и все́х святы́х Твои́х, я́ко благослове́н еси́ во ве́ки веко́в. Ами́нь.
Моли́тва четве́ртая, Спаси́телю.
Мно́зи ско́рби обурева́ют ду́шу мою́, и не́сть мне́ наде́жды на спасе́ние: отвсю́ду бо не́мощен е́смь, и никто́же мо́жет помощи́ мне́, я́ко и ти́и та́кожде не́мощни су́ть. Ускори́ на сове́ты Своя́, дабы́ а́з ну́ждею побуди́х ду́шу, да сотворю́, е́же до́лжен е́смь. Оба́че с Па́влом глаго́лю: окая́нен а́з е́смь челове́к: не то́ творю́, е́же хощу́, а е́же ненави́жду, то́ соверша́ю.
И то́кмо у Тебе́ спасе́ния ищу́, на Тебе́, Спа́се, наде́юся, и Тебе́, я́ко апо́столи в мо́ри, призыва́ю: Го́споди, спаси́ на́с, погиба́ем!
Ты́ же запрети́л еси́ мо́рю: и бы́сть вели́кая тишина́.
Та́кожде мно́гажды помога́ше мне́ ми́лость Твоя́, и в се́рдце мое́м водворя́шеся ве́лия и чу́дная тишина́.
И уразуме́в, я́ко челове́к ничто́жен е́сть, к Тебе́ припа́даю, и Тебе́ я́ко Бо́гу покланя́юся, и с несумне́нною ве́рою и любо́вию глаго́лю Ти́: Ты́ Бо́г мо́й еси́, я́ко благи́х от мене́ не тре́буеши! Но са́м спаса́еши мя́, и ми́р души́ мое́й да́руеши.
Сего́ ра́ди, Тебе́ благодарю́, на Тебе́ наде́юся и славосло́влю Тя́: спаси́телю мо́й, сла́ва Тебе́! Ты́ же отвеща́еши ми́: не бо́йся, то́кмо ве́руй: А́з е́смь спаси́тель Тво́й. Ами́нь.
Конда́къ а҃.
Возбра́нный воево́до, хрⷭ҇тѐ бж҃е на́шъ, пре́жде сложе́нїѧ мі́ра на сп҃се́нїе ѡ҆предѣле́нный, воплоти́тисѧ ѿ приснодв҃ы мр҃і́и и҆зво́лилъ є҆сѝ, да принесе́ши себѐ, ꙗ҆́кѡ же́ртвꙋ непоро́чнꙋ, и҆ кро́вїю твое́ю примири́ши на́съ роди́телю твоемꙋ̀. Мы́ же, ꙗ҆́кѡ и҆скꙋпи́телю на́шемꙋ, бл҃года́рнѣ взыва́емъ тѝ:
І҆и҃се, и҆скꙋпи́телю мі́ра, сп҃се, сп҃сѝ на́съ.
І҆́косъ а҃.
А҆́гг҃льскихъ во́инствъ и҆ мі́ра тво́рче, въ непристꙋ́пнѣй сѣдѧ́й сла́вѣ на прⷭ҇то́лѣ бжⷭ҇тва̀, любвѐ ра́ди къ человѣ́ческомꙋ ро́дꙋ, по ѻ҆́бразꙋ твоемꙋ̀ созда́нномꙋ во сла́вѣ, воплоти́всѧ, себѐ самого̀ ᲂу҆ма́лилъ є҆сѝ. Мы́ же, сла́вѣ твое́й дивѧ́щесѧ, ᲂу҆ничиже́нїю же па́че и҆зꙋмлѧ́ющесѧ, славосло́вимъ тѧ̀ си́це:
І҆и҃се, бж҃е предвѣ́чный, є҆ди́нъ сы́й присносꙋ́щныѧ трⷪ҇цы: і҆и҃се, сн҃е бж҃їй є҆диноро́дный, ѻ҆ц҃ꙋ̀ и҆ дх҃ꙋ соприсносла́вный.
І҆и҃се, а҆́гг҃лѡмъ недомы́слимый, человѣ́кѡмъ непостижи́мый: і҆и҃се, всеѧ̀ тва́ри превысоча́йшїй, бжⷭ҇тво́мъ непристꙋ́пный.
І҆и҃се, сло́ве ѻ҆́ч҃їй, ѿ дв҃ы воплоти́тисѧ бл҃говоли́вый: і҆и҃се, сн҃е бг҃а жива́гѡ, сн҃ъ чл҃вѣ́ческїй бы́вый.
І҆и҃се, содѣ́телю мі́ра, себѣ̀ самомꙋ̀ пло́ть дх҃омъ сотвори́вый: і҆и҃се, грѣхѝ на́шѧ прїе́мый, крⷭ҇то́мъ свои́мъ на́съ и҆скꙋпи́вый.
І҆и҃се, ѻ҆ц҃а̀ въ трⷪ҇цѣ сла́вимаго си́мъ ᲂу҆ми́лостивый: і҆и҃се, до зра́ка ра́бїѧ ᲂу҆ма́ленный, вы́ше небесѐ вознесы́йсѧ.
І҆и҃се, на прⷭ҇то́лѣ трⷪ҇цы возсѣ́дый, дх҃а ѿ ѻ҆ц҃а̀ на́мъ низпосла́вый: і҆и҃се, во смире́нїи сше́дый, во сла́вѣ сꙋди́ти всемꙋ̀ мі́рꙋ грѧды́й.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ в҃.
Го́рдостнѣ пе́рвый человѣ́къ, бо́гъ бы́ти возжелѣ́въ, ѿ бл҃года́тныѧ жи́зни, ѿ тебѐ, бг҃а и҆ творца̀ своегѡ̀, ѿпа́дый безꙋ́мнѣ, не ѡ҆ста́вленъ бы́сть тобо́ю, гдⷭ҇и, но а҆́ще и҆ и҆згна́лъ є҆сѝ є҆го̀ и҆з̾ раѧ̀ сла́дости, ѻ҆ба́че бжⷭ҇твеннѣ сп҃стѝ пред̾ѡпредѣли́лъ є҆сѝ, да поми́лованїи тобо́ю, па́ки зове́мъ: А҆ллилꙋ́їа.
І҆́косъ в҃.
Никто́же взы́де на нб҃о, то́кмѡ ты̀, сн҃е бж҃їй, сше́дый съ нб҃сѐ, ви́дѧ человѣ́ка ѿ жи́зни бжⷭ҇твенныѧ правосꙋ́днѣ ѿлꙋче́ннаго, ѿ дїа́вола же неисцѣ́льнѣ мꙋ́чима. Не терпѧ̀ созда́нїѧ рꙋкꙋ̀ твоє́ю зрѣ́ти ги́блема, сни́ти на зе́млю чл҃вѣколю́бнѣ бл҃говоли́лъ є҆сѝ, да примири́ши роди́телю зовꙋ́щыѧ тѝ си́це:
І҆и҃се, ꙗ҆́кѡ бг҃ъ бл҃гі́й, ѿпа́дшихъ млⷭ҇тїю твое́ю не ѡ҆ста́вивый: і҆и҃се, па́ки на́съ сп҃стѝ хотѧ́й, премⷣростїю свое́ю взыска́вый.
І҆и҃се, пра́вды и҆ млⷭ҇рдїѧ ра́ди, да не до конца̀ поги́бнемъ, и҆з̾ раѧ̀ человѣ́ка и҆згна́вый: і҆и҃се, дїа́воломъ прельще́нныхъ, въ ра́бствѣ томꙋ̀ на́мъ бы́ти попꙋсти́вый.
І҆и҃се, го́рькою сме́ртїю, грѣхѡ́въ на́шихъ ра́ди, промысли́тельнѣ на́съ наказа́вый: і҆и҃се, въ по́тѣ лица̀ трꙋди́тисѧ и҆ въ ско́рбехъ жи́ти человѣколю́бнѣ на́съ наста́вивый.
І҆и҃се, зако́нъ і҆ꙋде́ѡмъ, не́мѡщи ѡ҆блича́вый, рꙋко́ю мѡѷсе́овою дарова́вый: і҆и҃се, прⷪ҇рѡ́ки пресла́вными и҆ вожди̑ мꙋ́дрыми тѣ́хъ рꙋководи́вый.
І҆и҃се, ꙗ҆зы́чники заблꙋ́ждшыѧ творе́ньми мі́ра просвѣща́ѧй и҆ со́вѣстїю наставлѧ́ѧй: і҆и҃се, напослѣ́докъ лѣ́тъ всемꙋ̀ мі́рꙋ себѐ тѣле́снѣ ꙗ҆ви́вый.
І҆и҃се, ѻ҆ц҃а̀ своего̀ въ тебѣ̀ самѣ́мъ мі́рꙋ ѿкры́вый: і҆и҃се, дх҃а ст҃а́го ѿ ѻ҆ц҃а̀ посла́ти па́ки бл҃говоли́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ г҃.
Чл҃вѣ́къ бы́въ, хрⷭ҇тѐ бж҃е, да человѣ́кѡвъ бо́ги по бл҃года́ти содѣ́лаеши: сегѡ̀ ра́ди неизрече́ннѡ себѐ плототвори́ши, да на́съ ѡ҆бг҃отвори́ши, тѝ со а҆́гг҃лы подвиза́ѧ вопи́ти: бг҃ꙋ въ вы́шнихъ сла́ва, на землѝ съ бг҃омъ ми́ръ, въ человѣ́цѣхъ сегѡ̀ ра́ди бл҃говоле́нїе. Тѣ́мже зове́мъ въ трⷪ҇цѣ сла́вимомꙋ бг҃ꙋ: А҆ллилꙋ́їа.
І҆́косъ г҃.
Є҆́ѵы немощно́е, ѿ тва́ри и҆ска́вшїѧ ѡ҆боже́нїѧ, и҆справлѧ́ѧ, во ᲂу҆тро́бꙋ смире́нныѧ дв҃ы всели́лсѧ є҆сѝ, бжⷭ҇тво́мъ человѣ́чество растворѧ́ѧ. Пречⷭ҇таѧ же, ѿ дх҃а ст҃а́гѡ зача́тїе воспрїе́мши, бг҃а во чре́вѣ свое́мъ и҆мꙋ́щи, наꙋчѝ на́съ зва́ти воплоти́вшемꙋсѧ та́кѡ:
І҆и҃се, ѻ҆ц҃ꙋ̀ твоемꙋ̀ нбⷭ҇номꙋ послꙋша́нїе всецѣ́лое ꙗ҆ви́вый: і҆и҃се, ѿ ст҃а́гѡ дх҃а воплоти́выйсѧ, въ же́ртвꙋ себѐ бл҃говоли́вый.
І҆и҃се, а҆́гнче бж҃їй, въ же́ртвꙋ за грѣхѝ на́шѧ ѻ҆ц҃ꙋ̀ себѐ приведы́й: і҆и҃се, клѧ́твꙋ ѿлꙋче́нїѧ за грѣхопаде́нїе на́ше си́мъ ѿѧ́вый.
І҆и҃се, и҆ а҆́гг҃льскїѧ ᲂу҆мы̀ та́йною домострои́тельства ᲂу҆диви́вый: і҆и҃се, и҆ само́й мт҃ри твое́й ѻ҆́бразъ воплоще́нїѧ не ѿкры́вый.
І҆и҃се, по смире́ннѣмъ глаго́лѣ дв҃ы: сѐ, раба̀ гдⷭ҇нѧ, воплоти́выйсѧ: і҆и҃се, ма́терїю і҆ѡа́нна въ до́мѣ заха́рїи ра́достнѣ велича́нный.
І҆и҃се, го́рькꙋю держа́вꙋ врагѡ́въ на́шихъ смире́нїемъ посрами́вый: і҆и҃се, ꙗ҆́кѡ ѻ҆́трокъ і҆и҃лѧ, ѿ негѡ́же произошла̀ є҆́сть, мт҃рь твою̀ ᲂу҆бл҃жи́вый.
І҆и҃се, є҆лїсаве́тою, ꙗ҆́кѡ мр҃і́а мт҃и твоѧ̀, гдⷭ҇и, ᲂу҆бл҃же́нный: і҆и҃се, прⷣте́чею і҆ѡа́нномъ во чре́вѣ мт҃ре чꙋ́днѣ просла́вленный.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ д҃.
Чл҃вѣ́къ бы́въ, бг҃ъ сы́й, ѡ҆брѣ́затисѧ въ ѻ҆смы́й де́нь не возгнꙋша́лсѧ є҆сѝ, зако́нъ ꙗ҆́кѡ законода́вецъ и҆сполнѧ́ѧ, завѣ́тъ же но́вый предначина́ѧй. Сегѡ̀ ра́ди, сїѐ зна́менїе ѡ҆брꙋче́нїѧ съ цр҃ковїю твое́ю восхвалѧ́юще, сп҃си́тельное и҆́мѧ і҆и҃съ прославлѧ́емъ, глаго́люще со а҆рха́гг҃ломъ: А҆ллилꙋ́їа.
І҆́косъ д҃.
Є҆ѵⷢ҇льскꙋю бл҃года́ть предначина́ѧ, дре́внїй зако́нъ ѡ҆брѣ́занїемъ свои́мъ запечатлѣ́лъ є҆сѝ: же́ртвы крⷭ҇тныѧ проѻ́бразъ и҆сполнѧ́ѧ, въ завѣ́тъ вѣ́чный но́вымъ ѡ҆брѣ́занїемъ кр҃ще́нїѧ ко ѻ҆ц҃ꙋ̀ на́съ приве́лъ є҆сѝ. Мы́ же на тѧ̀, сп҃стѝ на́съ прише́дшаго, ᲂу҆пова́юще, бл҃гонаде́жнѡ вопїе́мъ:
І҆и҃се, бж҃е и҆́стинный и҆ чл҃вѣ́къ соверше́нный, кромѣ̀ грѣха̀ бы́вый: і҆и҃се, всѧ̑ зако́ны и҆спо́лнивый и҆ ни є҆ди́ныѧ непра́вды не сотвори́вый.
І҆и҃се, завѣ́тъ но́вый, бл҃года́тїю ст҃а́гѡ дх҃а ᲂу҆станови́вый: і҆и҃се, кро́вь пречⷭ҇тꙋю во ѡ҆брѣ́занїи твое́мъ проли́вый.
І҆и҃се, и҆скꙋпи́тельнꙋю же́ртвꙋ є҆щѐ въ младе́нчествѣ пред̾ѡбрази́вый: і҆и҃се, немощны́й зако́нъ за́повѣдей бл҃года́тїю замѣни́вый.
І҆и҃се, цр҃ковь твою̀, ꙗ҆́кѡ невѣ́стꙋ, себѣ̀ пред̾ѡбрꙋчи́вый: і҆и҃се, и҆́менемъ свои́мъ, сп҃си́телѧ є҆ѧ̀, чл҃вѣколю́бнѡ ю҆̀ прїꙋсво́ивый.
І҆и҃се, наде́ждо сп҃се́нїѧ на́шегѡ, си́лꙋ и҆́мене твоегѡ̀ на́мъ дарова́вый: і҆и҃се, ко ѡ҆брѣ́занїю страсте́й на́шихъ страда́ньми свои́ми призва́вый.
І҆и҃се, мл҃твѣ и҆́менемъ твои́мъ на́съ грѣ́шныхъ наꙋчи́вый: і҆и҃се, сн҃е бж҃їй: поми́лꙋй на́съ по млⷭ҇ти твое́й, моли́тисѧ просвѣти́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ є҃.
Жи́знїю сокрове́нною съ пречⷭ҇тою мт҃рїю въ до́мѣ і҆ѡ́сифовѣ жи́вый, и҆ въ бл҃года́ти ᲂу҆ бг҃а и҆ человѣ̑къ преꙋспѣ́вый, прише́лъ є҆сѝ ко і҆ѡа́ннꙋ крⷭ҇ти́тисѧ ѿ негѡ̀, не вѣ́дый грѣха̀. Прⷣте́ча же возбранѧ́ше тѝ, ᲂу҆ тебє̀ просѧ̀ кр҃ще́нїѧ. Повелѣ́нный же тобо́ю, во і҆ѻрда́нѣ крⷭ҇ти́ тѧ, со стра́хомъ зовы́й: А҆ллилꙋ́їа.
І҆́косъ є҃.
Є҆го́же ᲂу҆́зриши въ водѣ̀ кр҃ща́ема, дх҃а съ нб҃сѐ сходѧ́ща и҆ на не́мъ пребыва́юща, то́й є҆́сть сн҃ъ мо́й возлю́бленный: и҆ се́й є҆́сть крⷭ҇тѧ́й дх҃омъ ст҃ы́мъ, сего̀ ви́дѣвъ, рече́ши лю́демъ: сѐ а҆́гнецъ бж҃їй, взе́млѧй грѣхѝ мі́ра, є҆мꙋ́же нѣ́смь досто́инъ ѿрѣши́ти реме́нь сапогꙋ̑ є҆гѡ̀. Мы́ же, чрез̾ негѡ̀ бл҃говоле́нїе полꙋчи́вше, глаго́лемъ съ вѣ́рою:
І҆и҃се, во і҆ѻрда́нѣ кр҃ща́ющꙋсѧ тебѣ̀, гдⷭ҇и, трⷪ҇цꙋ ꙗ҆ви́вый: і҆и҃се, про́повѣдь ѡ҆ не́й ꙗ҆вле́нїемъ свои́мъ ѿкры́вый.
І҆и҃се, ѻ҆ц҃е́мъ свидѣ́тельствованный и҆ дх҃омъ ст҃ы́мъ пома́занный: і҆и҃се, црⷭ҇тво прест҃ы́ѧ трⷪ҇цы возстанови́ти пред̾ꙋка́занный.
І҆и҃се, держа́вꙋ дїа́волю разрꙋша́ти начина́ѧ, погрꙋже́нїемъ и҆з̾ воды̀ того̀ и҆згна́вый: і҆и҃се, и҆ на́съ крⷭ҇ти́ти повелѣ́вый, ѿрещи́сѧ ѿ негѡ̀ наꙋча́ѧй.
І҆и҃се, ѿ пра́ведныѧ клѧ́твы человѣ́ки и҆збавлѧ́ѧй, на́съ ра́ди ᲂу҆ничижи́выйсѧ: і҆и҃се, на́шꙋ безѻ́бразнꙋю наготꙋ̀ покрыва́ѧй, во і҆ѻрда́нѣ ѻ҆бнажи́выйсѧ.
І҆и҃се, грѣха̀ не вѣ́дый и҆ на́ша грѣхѝ понесы́й, ѿ ни́хъ ѡ҆мы́выйсѧ: і҆и҃се, всю̀ тва́рь ѡ҆бнови́ти хотѧ́й, ѡ҆бнови́тельнꙋю бл҃года́ть водѣ̀ дарова́вый.
І҆и҃се, зна́менїемъ крⷭ҇тнымъ непостижи́мою си́лою во́дꙋ ѡ҆сщ҃а́ѧй: і҆и҃се, въ рѣка́хъ и҆ є҆зе́рѣхъ стрꙋи̑ всемогꙋ́щею бл҃года́тїю ѡ҆бновлѧ́ѧй.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ ѕ҃.
Сла́вꙋ бжⷭ҇тва̀ въ преѡбраже́нїи твое́мъ на горѣ̀ ѳавѡ́ръ а҆пⷭ҇лѡмъ показа́лъ є҆сѝ, хрⷭ҇тѐ сп҃се, да не то́кмѡ распѧ́тїе твоѐ ᲂу҆разꙋмѣ́ютъ во́льное, но и҆ црⷭ҇твїе бж҃їе прише́дшее въ си́лѣ ᲂу҆́зрѧтъ, и҆ та́кѡ съ мѡѷсе́емъ и҆ и҆лїе́ю тебѣ̀, ꙗ҆́кѡ бг҃ꙋ, покло́нѧтсѧ и҆ со стра́хомъ и҆ ра́достїю возопїю́тъ: А҆ллилꙋ́їа.
І҆́косъ ѕ҃.
Преѡбрази́вшагосѧ тѧ̀ бжⷭ҇твенною сла́вою ᲂу҆ч҃нкѡ́въ лꙋ́чшїи ви́дѣвше, со стра́хомъ ни́цъ падо́ша. Пе́тръ же восхище́нный взыва́ше: гдⷭ҇и, добро̀ є҆́сть на́мъ здѣ̀ бы́ти. Мѡѷсе́й же и҆ и҆лїа̀ ѡ҆б̾ и҆схо́дѣ твое́мъ бесѣ́доваша. Мы́ же, а҆́ще и҆ послѣ́днѣйшїи ѿ ᲂу҆ч҃ни̑къ твои́хъ є҆смы̀, взыва́емъ тѝ те́плѣ:
І҆и҃се, є҆щѐ пре́жде воскрⷭ҇нїѧ и҆ вознесе́нїѧ сла́вꙋ бжⷭ҇тва̀ ꙗ҆ви́вый: і҆и҃се, ᲂу҆ч҃нкѝ твоѧ̑ зрѣ́ти крⷭ҇тное распѧ́тїе ᲂу҆крѣпи́вый.
І҆и҃се, бжⷭ҇твеннꙋю сла́вꙋ твою̀ ꙗ҆́вѣ тѣ̑мъ показа́вый: і҆и҃се, и҆лїю̀ съ нб҃сѐ, мѡѷсе́а и҆з̾ ме́ртвыхъ, ꙗ҆́кѡ всеси́льный, воззва́вый.
І҆и҃се, лице́мъ свои́мъ, ꙗ҆́кѡ со́лнце, свѣ́тлѡ возсїѧ́вый: і҆и҃се, и҆ тва́рь блиста́нїемъ ѡ҆дѣѧ́нїй твои́хъ сла́внѡ просла́вивый.
І҆и҃се, ра́йское бл҃же́нство, человѣ́кѡмъ предназна́ченное, показа́вый: і҆и҃се, терпѣ́ти крⷭ҇тъ сво́й на землѝ и҆ на́съ всѣ́хъ призва́вый.
І҆и҃се, црⷭ҇твꙋ несозда́нномꙋ присносꙋ́щномꙋ земны́хъ наꙋча́ѧй: і҆и҃се, бл҃года́тномꙋ созерца́нїю црⷭ҇твїѧ бж҃їѧ просвѣща́ѧй.
І҆и҃се, прелє́стныѧ пꙋти̑ позна́нїѧ преѡбраже́нїемъ твои́мъ ѡ҆бличи́вый: і҆и҃се, ѿ сꙋ́етныѧ сла́вы и҆ тлѣ́ннагѡ бога́тства на́съ ѿврати́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ з҃.
А҆́гг҃лами на превознесе́ннѣмъ прⷭ҇то́лѣ носи́мый, и҆ на ѳавѡ́рѣ сла́вꙋ црⷭ҇твїѧ твоегѡ̀ ꙗ҆ви́вый, на под̾ѧре́мное жребѧ̀, а҆́гнче бж҃їй, возсѣ́лъ є҆сѝ, да го́рькое ца́рство врага̀ крⷭ҇то́мъ побѣди́ши. Дѣ́ти же є҆вре́йстїи, при́снѡ хлѣ́ба тлѣ́ннагѡ и҆ ца́рства земна́гѡ и҆́щꙋще, ѡ҆са́нна вопїѧ́хꙋ, не вѣ́дꙋще воспѣва́ти ꙗ҆́кѡ бг҃ꙋ: А҆ллилꙋ́їа.
І҆́косъ з҃.
Сле́зы пролива́лъ є҆сѝ, сп҃си́телю мі́ра, къ і҆ерⷭ҇ли́мꙋ грѧды́й и҆ ꙗ҆́кѡ цр҃ь і҆и҃левъ сла́вимый: ви́дѣлъ бо є҆сѝ, ꙗ҆́кѡ и҆ въ се́й ча́съ и҆збра́нный наро́дъ не позна́лъ є҆́сть посѣще́нїѧ мессі́и своегѡ̀ и҆ гдⷭ҇а. Мы́ же, вѣ́дѧще тѧ̀ цр҃ѧ̀ нбⷭ҇наго, и҆скꙋпи́ти крⷭ҇то́мъ грѧдꙋ́щаго лю́ди своѧ̑ ѿ держа́вы вра́жїѧ, вопїе́мъ вѣ́рнѡ:
І҆и҃се, гдⷭ҇и госпо́дствꙋющихъ, херꙋві́мами носи́мый: і҆и҃се, а҆́гнче бж҃їй, на закла́нїе ѻ҆слѧ́темъ вози́мый.
І҆и҃се, во своѧ̑ прише́дый и҆ свои́ми ѡ҆сꙋжде́нный: і҆и҃се, на во́льное распѧ́тїе за грѣхѝ мі́ра ѡ҆брече́нный.
І҆и҃се, ѻ҆са́нна, ꙗ҆́кѡ царю̀ земно́мꙋ, въ слꙋ́хъ прїѧ́вый: і҆и҃се, распнѝ є҆го̀, ꙗ҆́кѡ сн҃а бж҃їѧ: претерпѣ́вый.
І҆и҃се, наро́дъ и҆збра́нный, ꙗ҆́кѡ ѻ҆сли́цꙋ ᲂу҆по́рнꙋю, ѡ҆ста́вивый: і҆и҃се, ꙗ҆зы́чники, ꙗ҆́кѡ жребѧ̀ младо́е, въ црⷭ҇твїе и҆збра́вый.
І҆и҃се, и҆ тѣ̑мъ къ концꙋ̀ мі́ра ѿпаде́нїе предрека́вый: і҆и҃се, и҆́стиннымъ є҆вре́ємъ, є҆гда̀ рекꙋ́тъ: бл҃гослове́нъ грѧды́й, ѡ҆браще́нїе ѡ҆бѣща́вый.
І҆и҃се, да всѧ̑ по млⷭ҇ти поми́лꙋеши, въ противле́нїе всѣ́хъ затвори́вый: і҆и҃се, врата̀ ра̑йскаѧ всѣ̑мъ лю́демъ крⷭ҇то́мъ ѿвори́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ и҃.
И҆́же хо́щетъ въ ва́съ бы́ти бо́льшїй, да бꙋ́детъ всѣ̑мъ слꙋга̀, глаго́лалъ є҆сѝ ᲂу҆ч҃нкѡ́мъ свои̑мъ, ѻ҆́бразъ себѐ показꙋ́ѧй и҆ но́ги всѣ̑мъ ᲂу҆мы́вый, пото́мъ же на ве́чери та́йнѣй же́ртвꙋ ѻ҆ц҃ꙋ̀ тѣ́ломъ и҆ кро́вїю себѐ принесы́й, и҆ на́мъ препода́вый, и҆ то́ю ѻ҆ц҃а̀ ᲂу҆ми́лостивый, во є҆́же па́ки въ ѻ҆бще́нїе своѐ прїѧ́ти, да зове́мъ є҆мꙋ̀: А҆ллилꙋ́їа.
І҆́косъ и҃.
Мои́ ли ᲂу҆мы́еши но́зѣ, гдⷭ҇и, ре́вностный въ любвѝ пе́тръ глаго́лаше. Ты́ же: а҆́ще не ᲂу҆мы́ю кого̀, не и҆́мать то́й ча́сти со мно́ю: ᲂу҆казꙋ́ѧ, ꙗ҆́кѡ никто́же чи́стъ бꙋ́детъ, а҆́ще не ты̀ ѡ҆чи́стиши є҆го̀, грѣхѝ тѣ́хъ взе́мъ и҆ дх҃омъ ст҃ы́мъ и҆змы́въ. И҆ мы̀ со а҆пⷭ҇ломъ вопїе́мъ: ѡ҆мы́й не то́кмѡ но́зѣ, но и҆ главꙋ̀, да досто́йни бꙋ́демъ прича̑стницы ве́чери твоеѧ̀ та́йныѧ, зовꙋ́ще вѣ́рою:
І҆и҃се, гдⷭ҇ь сы́й всѣ́хъ, смире́ннѡ нѡ́зѣ рабѡ́мъ ᲂу҆мы́вый: і҆и҃се, смире́нїе, пꙋ́ть къ любвѝ, любо́вь къ є҆диномы́слїю, ꙗ҆ви́вый.
І҆и҃се, любо́вь, ꙗ҆́коже зна́менїе, ᲂу҆ч҃нкѡ́мъ твои̑мъ ᲂу҆каза́вый: і҆и҃се, ѡ҆ любвѝ ѻ҆́ч҃ей и҆ къ дрꙋгѡ́мъ твои̑мъ въ мл҃твѣ свое́й предвѣща́вый.
І҆и҃се, съ же́ртвою къ ѻ҆ц҃ꙋ̀ восходѧ́й, же́ртвꙋ та́йнꙋю ᲂу҆станови́вый: і҆и҃се, хлѣ́бъ и҆ вїно̀ въ тѣ́ло и҆ кро́вь свою̀ непостижи́мѡ претвори́вый.
І҆и҃се, премі́рный свѣ́те, преесте́ственнѡ ѿ дв҃ы рожде́нный: і҆и҃се, въ та́йнахъ тѣ́ло и҆ кро́вь дх҃омъ ст҃ы́мъ претворѧ́ѧй, несотворе́нный.
І҆и҃се, сло́ве воплоти́вшеесѧ, человѣ́кѡвъ въ та́йнахъ себѣ̀ соедини́вый: і҆и҃се, лозо̀ вїногра́днаѧ, ꙗ҆́кѡ вѣ̑тви своѧ̑, на́съ къ себѣ̀ приви́вый.
І҆и҃се, рекі́й: ꙗ҆ды́й мою̀ пло́ть и҆ пїѧ́й мою̀ кро́вь, во мнѣ̀ пребыва́етъ: і҆и҃се, ѡ҆бѣтова́вый: и҆ а҆́зъ въ не́мъ, со ѻ҆ц҃е́мъ и҆ дх҃омъ, ѻ҆би́тель сотвори́мъ.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ ѳ҃.
Ꙗ҆́кѡ а҆́гнца, на ве́чери ᲂу҆гото́вивъ себѐ на закла́нїе во́льное, въ геѳсїма́нїю но́щїю вше́лъ є҆сѝ, лꙋ́чшыѧ ᲂу҆ч҃нкѝ взе́мъ съ собо́ю, сла́вꙋ твою̀ на ѳавѡ́рѣ ви́дѣвшыѧ. И҆ здѣ̀ на́чалъ є҆сѝ ѕѣлѡ̀ тꙋжи́ти, да́же до по́тꙋ крова́вагѡ, молѧ́сѧ ѻ҆ц҃ꙋ̀ своемꙋ̀: а҆́ще возмо́жно, ми́мѡ несѝ ча́шꙋ сїю̀, ѻ҆ба́че не ꙗ҆́коже а҆́зъ хощꙋ̀, но ꙗ҆́коже ты̀. А҆́зъ же зовꙋ̀: А҆ллилꙋ́їа.
І҆́косъ ѳ҃.
Геѳсимані́йскꙋю зе́млю крова́выми ка́плѧми ѡ҆роси́лъ є҆сѝ, сн҃е чл҃вѣ́ческїй, ꙗ҆́кѡ не то́кмѡ крⷭ҇тныхъ страда́нїй дꙋша̀ и҆ тѣ́ло твоѝ ᲂу҆жаса́хꙋсѧ, но и҆ са́мое є҆стество̀ человѣ́ческое, къ безсме́ртїю призва́нное, сме́ртїю возмꙋща́шесѧ, є҆ще́ же и҆ грѣсѝ всегѡ̀ мі́ра на тебѣ̀ возлежа́хꙋ. Мы́ же, ꙗ҆́кѡ ᲂу҆ч҃нцы̀ спѧ́щїи, не мо́жемъ тѝ зва́ти:
І҆и҃се, бж҃е безстра́стный, ꙗ҆́кѡ чл҃вѣ́къ страда́вый: і҆и҃се, є҆ди́нымъ лице́мъ въ двꙋ́хъ є҆стества́хъ пребыва́вый.
І҆и҃се, грѣхѝ всегѡ̀ мі́ра на себѐ воспрїѧ́вый: і҆и҃се, ра́ди всѣ́хъ страда́ти и҆ ᲂу҆мре́ти и҆зво́ливый.
І҆и҃се, прїѧ́тїемъ крⷭ҇та̀ ꙗ҆́кѡ ѻ҆гне́мъ, ѕѣ́льнѣ пали́мый: і҆и҃се, мꙋ́кою сме́ртною, ꙗ҆́кѡ чл҃вѣ́къ, тѧ́жцѣ томи́мый.
І҆и҃се, въ ча́съ стра́шный въ мл҃твѣ ᲂу҆крѣпле́нїѧ и҆ска́вый: і҆и҃се, и҆ ѿ немощны́хъ ᲂу҆ч҃нкѡ́въ ᲂу҆тѣше́нїѧ себѣ̀ ѡ҆жида́вый.
І҆и҃се, ѡ҆б̾ и҆збавле́нїи ѿ ча́ши сеѧ̀ ѻ҆ц҃ꙋ̀ трикра́ты моли́выйсѧ: і҆и҃се, на во́лю є҆гѡ̀ послꙋ́шнѣ возложи́выйсѧ.
І҆и҃се, всѣ́ми ѡ҆ста́вленный, є҆ди́нъ въ нощѝ всѧ̑ терпѣ́вый: і҆и҃се, а҆́гг҃ла, въ ᲂу҆тѣше́нїе ѿ ѻ҆ц҃а̀ по́сланнаго, ᲂу҆зрѣ́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ і҃.
Распѧ́тїе прїѧ́ти мл҃твою въ геѳсима́нїи ᲂу҆гото́вленный, ми́рнѣ на крⷭ҇тъ ше́лъ є҆сѝ, непра́ведный сꙋ́дъ, хꙋлє́нїѧ, бїє́нїѧ, заꙋшє́нїѧ претерпѣ́вый, да и҆скꙋ́пиши на́съ ѿ клѧ́твы зако́нныѧ и҆ примири́въ со ѻ҆ц҃е́мъ, приведе́ши къ немꙋ̀ всеро́днаго а҆да́ма, бл҃года́рственнѣ со є҆́ѵою и҆ всѣ́ми на́ми зовꙋ́щаго: А҆ллилꙋ́їа.
І҆́косъ і҃.
Ѣ҆́здѧй на колесни́цѣхъ херꙋві́мскихъ во сла́вѣ, на́гъ и҆ порꙋ́ганъ на крⷭ҇тѣ̀ ви́ситъ цр҃ь сла́вы, на́ше безче́стїе на то́мъ пригвозди́въ, да бл҃говоле́нїе ѻ҆́ч҃ее на́мъ и҆схода́тайствꙋетъ же́ртвою свое́ю. Мы́ же, въ твое́мъ распѧ́тїи пови́ннїи, крⷭ҇тꙋ̀ твоемꙋ̀ покланѧ́емсѧ, хрⷭ҇тѐ, и҆ зове́мъ тѝ сицева̑ѧ:
І҆и҃се, со ѻ҆ц҃е́мъ безнача́льнымъ и҆ дх҃омъ присноспребыва́ѧй: і҆и҃се, и҆ на крⷭ҇тѣ̀ ви́сѧ, прⷭ҇то́ла бжⷭ҇тва̀ не ѡ҆ставлѧ́ѧй.
І҆и҃се, и҆скꙋпи́тель мі́ра ꙗ҆ви́сѧ и҆ а҆́гг҃лѡмъ неизрече́нный: і҆и҃се, въ нѣ́дрѣхъ прест҃ы́ѧ трⷪ҇цы ꙗ҆́кѡ бг҃ъ бы́въ неизмѣ́ннѡ.
І҆и҃се, ꙗ҆́кѡ є҆ди́нъ ѿ трⷪ҇цы себѣ̀ самомꙋ̀ принесе́сѧ непостижи́мѡ: і҆и҃се, бл҃говоле́нїе трⷪ҇чное лю́демъ возвратѝ непоколеби́мо.
І҆и҃се, бл҃года́ть дх҃а ст҃а́гѡ ѿ ѻ҆ц҃а̀ низпосла́вый: і҆и҃се, сме́ртїю свое́ю сме́рть на́шꙋ попра́вый.
І҆и҃се, держа́вꙋ дїа́волю и҆ а҆́дъ ѕло́бный сокрꙋши́вый: і҆и҃се, разбо́йника пока́ѧвшагосѧ въ ра́й пе́рваго введы́й.
І҆и҃се, пра́ѻтцєвъ, съ вѣ́рою тѧ̀ ѡ҆жида́вшихъ, и҆з̾ а҆́да и҆зведы́й.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ а҃і.
Шестокрила́тїи херꙋві́ми и҆ многоѻчи́тїи серафі́ми, зрѧ́ще своего̀ влⷣкꙋ, ꙗ҆́кѡ мертвеца̀, во гро́бѣ лежа́ща, ᲂу҆жаса́хꙋсѧ, ли́ца закрыва́юще. Тва́рь, є҆гда̀ ре́клъ є҆сѝ: соверши́шасѧ, сп҃се́нїю ра́довашесѧ. Человѣ́ческїй же ро́дъ, возсозда́нїе съ преизбы́ткомъ ᲂу҆лꙋчи́въ, взыва́етъ тѝ: А҆ллилꙋ́їа.
І҆́косъ а҃і.
Нетлѣ́нїѧ свѣ́тъ и҆з̾ гро́ба всѣ̑мъ возсїѧ̀, тебѣ̀, хрⷭ҇тѐ, воскрⷭ҇шꙋ и҆з̾ ме́ртвыхъ: ро́дъ человѣ́ческїй ѡ҆бнови́сѧ, сме́рть ᲂу҆мертви́сѧ, всѧ̀ тва́рь весели́тсѧ, а҆́дъ лю́тѣ стене́тъ, вѣ́чнаѧ жи́знь ца́рствꙋетъ, нбⷭ҇ныѧ си̑лы ликꙋ́ютъ, пра́зднꙋетъ же мі́ръ ви́димый и҆ неви́димый. И҆ мы̀ и҆гра́юще, воспѣва́емъ си́це:
І҆и҃се, бж҃е нетлѣ́нный, пло́тїю и҆з̾ ме́ртвыхъ воскр҃сы́й: і҆и҃се, хрⷭ҇тѐ сп҃се, и҆зги́бшїй мі́ръ воскрⷭ҇нїемъ сп҃сы́й.
І҆и҃се, сме́ртїю сме́рть попра́вый, воскрⷭ҇нїе на́мъ ᲂу҆лꙋчи́вый: і҆и҃се, дїа́вола сокрꙋши́въ, держа́вꙋ є҆гѡ̀ разори́вый.
І҆и҃се, па́сха та́инственнаѧ, человѣ́ка па́дшаго ѡ҆бновлѧ́ющаѧ: і҆и҃се, па́сха кра́снаѧ, двє́ри ра̑йскїѧ на́мъ ѿверза́ющаѧ.
І҆и҃се, нб҃а и҆ землѝ соедине́нїе, бг҃а съ человѣ̑ки примире́нїе: і҆и҃се, сп҃се на́шъ, живо́е и҆ неже́ртвенное заколе́нїе.
І҆и҃се, а҆́гнче бж҃їй, за всѣ́хъ закла́нный, же́ртва жива́ѧ: і҆и҃се, на́шъ и҆скꙋпи́тель, мі́рꙋ сп҃си́тель, па́сха ст҃а́ѧ.
І҆и҃се, ꙗ҆́кѡ бг҃ъ, са́мъ себѐ во́лею ко ѻ҆ц҃ꙋ̀ за всѣ́хъ приведы́й: і҆и҃се, на́съ совоскр҃си́вый, пꙋ́ть крⷭ҇то́мъ показа́вый.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ в҃і.
А҆да́мовъ ро́дъ воскрⷭ҇нїемъ ѡ҆бнови́въ и҆ ᲂу҆чн҃кѝ твоѧ̑ црⷭ҇твїю бж҃їю наста́вивъ, возне́слсѧ є҆сѝ во сла́вѣ, хрⷭ҇тѐ бж҃е на́шъ, ѿѻнꙋ́дꙋже и҆ снизше́лъ є҆сѝ, и҆ спосади́въ въ себѣ̀ є҆стество̀ человѣ́ческое ѡ҆деснꙋ́ю ѻ҆ц҃а̀, дх҃а ст҃а́го посла́лъ є҆сѝ, дѣ́ло своѐ сконча́лъ є҆сѝ сп҃се́нїѧ, ᲂу҆тѣ́шителю преда́въ, да и҆ мы̀ всегда̀ зове́мъ тѝ: А҆ллилꙋ́їа.
І҆́косъ в҃і.
Гдⷭ҇ь се́й, глаго́лахꙋ ᲂу҆ч҃нкѡ́мъ бѣлоно́снїи а҆́гг҃ли, вознесы́йсѧ ѿ ва́съ на нб҃о, та́кожде во сла́вѣ прїи́детъ сꙋди́ти живы̑мъ и҆ мє́ртвымъ. И҆́мже ѡ҆бра́дованнїи и҆ ѡ҆бѣтова́нїемъ дх҃а ᲂу҆тѣ́шеннїи, съ ра́достїю вели́кою въ земны́й і҆ерⷭ҇ли́мъ нбⷭ҇нагѡ ждꙋ́ще, на сꙋ́дъ себѐ ᲂу҆гото́вимъ, зовꙋ́ще:
І҆и҃се, всѧ̑ ко сп҃се́нїю на́шемꙋ сотвори́вый, прїимѝ хвалꙋ̀ на́шꙋ: і҆и҃се, на́съ ра́ди воплоти́выйсѧ, ѡ҆бж҃е́нїе бл҃года́тїю сотворѝ въ на́съ.
І҆и҃се, въ кр҃ще́нїи трⷪ҇цꙋ ꙗ҆ви́вый, ѿ са́мости и҆сцѣлѝ на́съ: і҆и҃се, вѣ́рѣ въ тѧ̀ дх҃омъ ст҃ы́мъ просвѣтѝ на́съ.
І҆и҃се, дх҃омъ ст҃ы́мъ, твои́ми содѣ́лай на́съ: і҆и҃се, и҆з̾ ме́ртвыхъ воскр҃сы́й, смє́ртнаѧ тѣла̀ на̑ша дх҃омъ ст҃ы́мъ ѡ҆живѝ въ на́съ.
І҆и҃се, дх҃омъ бж҃їимъ, ѻ҆ц҃ꙋ̀, ѡ҆ не́мже взыва́ти: а҆́вва ѻ҆́ч҃е, ᲂу҆сыновѝ на́съ: і҆и҃се, сонаслѣ́дницы тебѣ̀ чрез̾ страда̑нїѧ, просла́ви на́съ.
І҆и҃се, плоды̀ дх҃а: любы̀, ра́дость, ми́ръ покажѝ въ на́съ: і҆и҃се, моли́тисѧ дх҃омъ въ на́шихъ не́мощехъ ᲂу҆крѣпѝ на́съ.
І҆и҃се, свобо́дꙋ на́мъ да́вый, и҆ тва́рь свободѝ всю̀: і҆и҃се, и҆скꙋпи́телю на́шъ и҆ ѡ҆деснꙋ́ю бг҃а сѣды́й, всегда̀ хода́тайствꙋй ѡ҆ на́съ.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ г҃і.
ѽ пресла́вный и҆ многомлⷭ҇тивый і҆и҃се хрⷭ҇тѐ, сн҃е бж҃їй! ѻ҆ц҃ꙋ̀ себѐ въ же́ртвꙋ ѡ҆ на́съ приведы́й и҆ пꙋ́ть крⷭ҇та̀ и҆ покаѧ́нїѧ на́мъ ᲂу҆каза́вый, са́мъ застꙋпѝ на́съ и҆ поми́лꙋй твое́ю бл҃года́тїю, и҆ и҆́миже вѣ́си сꙋдьба́ми, сп҃сѝ на́съ, недостѡ́йныѧ рабы̀ твоѧ̑, да ны́нѣ и҆ при́снѡ зове́мъ тѝ: А҆ллилꙋ́їа.
Се́й конда́къ глаго́ли три́жды. И҆ па́ки і҆́косъ а҃_й и҆ конда́къ а҃_й.
І҆́косъ а҃.
А҆́гг҃льскихъ во́инствъ и҆ мі́ра тво́рче, въ непристꙋ́пнѣй сѣдѧ́й сла́вѣ на прⷭ҇то́лѣ бжⷭ҇тва̀, любвѐ ра́ди къ человѣ́ческомꙋ ро́дꙋ, по ѻ҆́бразꙋ твоемꙋ̀ созда́нномꙋ во сла́вѣ, воплоти́всѧ, себѐ самого̀ ᲂу҆ма́лилъ є҆сѝ. Мы́ же, сла́вѣ твое́й дивѧ́щесѧ, ᲂу҆ничиже́нїю же па́че и҆зꙋмлѧ́ющесѧ, славосло́вимъ тѧ̀ си́це:
І҆и҃се, бж҃е предвѣ́чный, є҆ди́нъ сы́й присносꙋ́щныѧ трⷪ҇цы: і҆и҃се, сн҃е бж҃їй є҆диноро́дный, ѻ҆ц҃ꙋ̀ и҆ дх҃ꙋ соприсносла́вный.
І҆и҃се, а҆́гг҃лѡмъ недомы́слимый, человѣ́кѡмъ непостижи́мый: і҆и҃се, всеѧ̀ тва́ри превысоча́йшїй, бжⷭ҇тво́мъ непристꙋ́пный.
І҆и҃се, сло́ве ѻ҆́ч҃їй, ѿ дв҃ы воплоти́тисѧ бл҃говоли́вый: і҆и҃се, сн҃е бг҃а жива́гѡ, сн҃ъ чл҃вѣ́ческїй бы́вый.
І҆и҃се, содѣ́телю мі́ра, себѣ̀ самомꙋ̀ пло́ть дх҃омъ сотвори́вый: і҆и҃се, грѣхѝ на́шѧ прїе́мый, крⷭ҇то́мъ свои́мъ на́съ и҆скꙋпи́вый.
І҆и҃се, ѻ҆ц҃а̀ въ трⷪ҇цѣ сла́вимаго си́мъ ᲂу҆ми́лостивый: і҆и҃се, до зра́ка ра́бїѧ ᲂу҆ма́ленный, вы́ше небесѐ вознесы́йсѧ.
І҆и҃се, на прⷭ҇то́лѣ трⷪ҇цы возсѣ́дый, дх҃а ѿ ѻ҆ц҃а̀ на́мъ низпосла́вый: і҆и҃се, во смире́нїи сше́дый, во сла́вѣ сꙋди́ти всемꙋ̀ мі́рꙋ грѧды́й.
І҆и҃се, и҆скꙋпи́телю мі́ра, сп҃се, сп҃сѝ на́съ.
Конда́къ а҃.
Возбра́нный воево́до, хрⷭ҇тѐ бж҃е на́шъ, пре́жде сложе́нїѧ мі́ра на сп҃се́нїе ѡ҆предѣле́нный, воплоти́тисѧ ѿ приснодв҃ы мр҃і́и и҆зво́лилъ є҆сѝ, да принесе́ши себѐ, ꙗ҆́кѡ же́ртвꙋ непоро́чнꙋ, и҆ кро́вїю твое́ю примири́ши на́съ роди́телю твоемꙋ̀. Мы́ же, ꙗ҆́кѡ и҆скꙋпи́телю на́шемꙋ, бл҃года́рнѣ взыва́емъ тѝ:
І҆и҃се, и҆скꙋпи́телю мі́ра, сп҃се, сп҃сѝ на́съ.
Мл҃тва а҃, ко гдⷭ҇ꙋ і҆и҃сꙋ хрⷭ҇тꙋ̀.
Къ тебѣ̀, є҆ди́номꙋ сп҃си́телю мі́ра и҆ и҆скꙋпи́телю на́шемꙋ, прибѣга́емъ, і҆и҃се, сн҃е бж҃їй: вѣ́мы бо, вои́стиннꙋ вѣ́мы, ꙗ҆́кѡ нѣ́сть и҆но́гѡ и҆́мене под̾ нб҃се́мъ, ѡ҆ не́мже возмо́жемъ сп҃сти́сѧ. Сегѡ̀ ра́ди то́кмѡ на тѧ̀ ᲂу҆пова́емъ, грѣ́шныхъ, а҆ не првⷣныхъ сп҃стѝ прише́дшаго. Тебѐ є҆ди́наго хода́таѧ ѡ҆ на́съ къ бг҃ꙋ и҆сповѣ́дꙋемъ, къ твое́й всеси́льнѣй бл҃года́ти прибѣга́емъ: не ѡ҆ста́ви на́съ си́рыхъ, гдⷭ҇и, ꙗ҆́коже ᲂу҆ч҃нкѡ́мъ твои̑мъ ѡ҆бѣща́лъ є҆сѝ. Вселѝ въ на́съ ᲂу҆тѣ́шителѧ дх҃а твоего̀, всѧ̑ сквє́рны на́ша ѡ҆чища́ющаго и҆ въ не́мощехъ ᲂу҆тѣша́ющагѡ. И҆ са́мъ, ꙗ҆́коже ре́клъ є҆сѝ, пребꙋ́ди съ на́ми до сконча́нїѧ вѣ́ка. Мы́ же, ꙗ҆́кѡ сп҃си́телѧ на́шего вѣ́дꙋще, прест҃ꙋ́ю же застꙋ́пницꙋ бцⷣꙋ со всѣ́ми ст҃ы́ми твои́ми призыва́юще, ве́сь живо́тъ на́шъ тебѣ̀, хрⷭ҇тꙋ̀ бг҃ꙋ и҆ и҆скꙋпи́телю на́шемꙋ, съ наде́ждою предади́мъ во вѣ́ки вѣкѡ́въ. А҆ми́нь.
Мл҃тва в҃, а҆ѳѡ́нскагѡ и҆́нока ѻ҆тца̀ а҆рсе́нїа.
Гдⷭ҇и і҆и҃се хрⷭ҇тѐ, сн҃е бж҃їй, поми́лꙋй мѧ̀!
Гдⷭ҇и, соберѝ разсѣ́ѧнный мо́й ᲂу҆́мъ, дабы̀ ѻ҆́нъ ве́сь ᲂу҆стреми́лсѧ къ тебѣ̀, своемꙋ̀ созда́телю и҆ сп҃си́телю.
Сокрꙋшѝ стрѣ́лы лꙋка́вагѡ, ѿрева́ющыѧ мѧ̀ ѿ тебє̀.
Погасѝ пла́мень по́мыслѡвъ, пожига́ющихъ мѧ̀ во вре́мѧ мл҃твы.
Ѡ҆сѣни́ мѧ бл҃года́тїю твое́ю, дабы̀ мнѣ̀, до сконча́нїѧ дні́й мои́хъ, тебѐ є҆ди́наго люби́ти все́мъ се́рдцемъ и҆ все́ю дꙋше́ю мое́ю.
Въ ча́съ же кончи́ны моеѧ̀ предста́ни мнѣ̀, кро́ткѡ дꙋ́шꙋ мою̀ ѿ тѣ́ла ѿдѣлѝ и҆ въ црⷭ҇тво ст҃ы́ѧ трⷪ҇цы вселѝ, за мл҃твы пребл҃гослове́нныѧ бцⷣы и҆ всѣ́хъ ст҃ы́хъ. А҆ми́нь.
Мл҃тва г҃, ст҃и́телѧ і҆ѡаса́фа бѣлогра́дскагѡ.
Бꙋ́ди бл҃гослове́нъ де́нь же и҆ ча́съ, во́ньже гдⷭ҇ь мо́й і҆и҃съ хрⷭ҇то́съ менє̀ ра́ди роди́сѧ, распѧ́тїе претерпѣ̀ и҆ сме́ртїю пострада̀. Ѽ гдⷭ҇и і҆и҃се хрⷭ҇тѐ, въ ча́съ кончи́ны моеѧ̀ предста́ни мнѣ̀ и҆ дꙋ́шꙋ раба̀ твоегѡ̀ (и҆́мⷬ҇къ), въ стра́нствїи сꙋ́щꙋю, въ рꙋ́цѣ твоѝ прїимѝ, за мл҃твы пречⷭ҇тыѧ твоеѧ̀ мт҃ре и҆ всѣ́хъ ст҃ы́хъ твои́хъ, ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь.
Мл҃тва д҃, сп҃си́телю.
Мно́зи скѡ́рби ѡ҆бꙋрева́ютъ дꙋ́шꙋ мою̀, и҆ нѣ́сть мнѣ̀ наде́жды на сп҃се́нїе: ѿвсю́дꙋ бо не́мощенъ є҆́смь, и҆ никто́же мо́жетъ помощѝ мнѣ̀, ꙗ҆́кѡ и҆ ті́и та́кожде не́мощни сꙋ́ть. Оу҆скорѝ на совѣ́ты своѧ̑, дабы̀ а҆́зъ нꙋ́ждею побꙋди́хъ дꙋ́шꙋ, да сотворю̀, є҆́же до́лженъ є҆́смь. Ѻ҆ба́че съ па́ѵломъ глаго́лю: ѻ҆каѧ́ненъ а҆́зъ є҆́смь человѣ́къ: не то̀ творю̀, є҆́же хощꙋ̀, а҆ є҆́же ненави́ждꙋ, то̀ соверша́ю.
И҆ то́кмѡ ᲂу҆ тебє̀ сп҃се́нїѧ и҆щꙋ̀, на тебѐ, сп҃се, надѣ́юсѧ, и҆ тебѐ, ꙗ҆́кѡ а҆пⷭ҇ли въ мо́ри, призыва́ю: гдⷭ҇и, сп҃сѝ на́съ, погиба́емъ!
Ты́ же запрети́лъ є҆сѝ мо́рю: и҆ бы́сть вели́каѧ тишина̀.
Та́кожде мно́гажды помога́ше мнѣ̀ млⷭ҇ть твоѧ̀, и҆ въ се́рдцѣ мое́мъ водворѧ́шесѧ ве́лїѧ и҆ чꙋ́днаѧ тишина̀.
И҆ ᲂу҆разꙋмѣ́въ, ꙗ҆́кѡ человѣ́къ ничто́женъ є҆́сть, къ тебѣ̀ припа́даю, и҆ тебѣ̀ ꙗ҆́кѡ бг҃ꙋ покланѧ́юсѧ, и҆ съ несꙋмнѣ́нною вѣ́рою и҆ любо́вїю глаго́лю тѝ: ты̀ бг҃ъ мо́й є҆сѝ, ꙗ҆́кѡ бл҃ги́хъ ѿ менє̀ не тре́бꙋеши! Но са́мъ сп҃са́еши мѧ̀, и҆ ми́ръ дꙋшѝ мое́й да́рꙋеши.
Сегѡ̀ ра́ди, тебѐ бл҃годарю̀, на тебѐ надѣ́юсѧ и҆ славосло́влю тѧ̀: сп҃си́телю мо́й, сла́ва тебѣ̀! Ты́ же ѿвѣща́еши мѝ: не бо́йсѧ, то́кмѡ вѣ́рꙋй: а҆́зъ є҆́смь сп҃си́тель тво́й. А҆ми́нь.