Акафист трем святителям Василию Великому, Григорию Богослову и Иоанну Златоустому
Одобрен: 1910 год
Память: 12 февраля (30 января ст. ст.)
Утвержден для общецерковного использования.
Конда́к 1.
Избра́ннии свети́льницы Це́ркве Христо́вы, Васи́лие, Григо́рие и Иоа́нне, уче́ньми ва́шими ми́р просвети́вшии и вся́ шата́ния ересе́й и ху́льных смуще́ния угаси́вшии; я́ко хода́таи спасе́ния на́шего су́ще, моли́твами ва́шими сохрани́те ны́ от вся́ких бе́д и ве́чных му́к, да с ра́достию благодаря́ще вопие́м ва́м:
Ра́дуйтеся, трие́ святи́телие, вели́цыи и вселе́нстии учи́телие.
И́кос 1.
А́нгели земни́и и челове́цы небе́снии, святи́телие Христо́вы и отцы́ треблаже́ннии, побо́рницы Живонача́льныя Тро́ицы, от Нея́ све́том трисо́лнечным осиява́емии и моля́щиися непреста́нно у престо́ла Триипоста́снаго Божества́ о душа́х на́ших, услы́шите ны́ от се́рдца к ва́м взыва́ющия:
Ра́дуйтеся, иму́щии дерзнове́ние вопи́ти о на́с ко Го́споду; ра́дуйтеся, вели́цыи уго́дницы Святы́я Тро́ицы.
Ра́дуйтеся, дарова́ньми единоче́стнии; ра́дуйтеся, апо́столом единонра́внии.
Ра́дуйтеся, я́ко ва́шими уче́ньми ди́вно просия́ благода́ть Христо́ва; ра́дуйтеся, ра́зум сво́й в послуша́ние ве́ры плени́вшии.
Ра́дуйтеся, блази́и де́лателие виногра́да Христо́ва; ра́дуйтеся, от ю́ности Бо́гом благослове́ннии.
Ра́дуйтеся, ско́рби жития́ сего́ до́бре претерпе́вшии и да́нный ва́м тала́нт приумно́жившии; ра́дуйтеся, во́лю Бо́жию си́льным ми́ра сего́ со мно́гим дерзнове́нием благовести́вшии.
Ра́дуйтеся, тьму́ нече́стия отгна́вшии; ра́дуйтеся, всю́ подсо́лнечную заря́ми догма́тов просвети́вшии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 2.
Ви́дя ерети́чествующих лю́тая стремле́ния, ме́ч остре́йший проти́ву сете́й лжеуче́ний и о́гнь, пле́велы суему́дрия пояда́яй, святы́й Васи́лий яви́ся и, я́ко па́стырь изря́днейший, обличи́в ле́сть и́дольскую свои́м богодухнове́нным веща́нием. Научи́ ны́ почита́ти Святу́ю Тро́ицу, разделе́ну у́бо ипоста́сьми, соедине́ну же существо́м, и вопи́ти Е́й: Аллилу́иа.
И́кос 2.
Ра́зум озаре́н благода́тию Христо́вою иму́ще, я́ко апо́столом единонра́внии, правосла́вных догма́тов уче́ния уясни́сте и трие́ вели́цыи свети́льницы Триипоста́снаго Божества́ яви́стеся; ва́шими бо вдохнове́нными писа́ньми озаря́ема, Це́рковь Христо́ва све́тло красу́ется, и ве́рная ча́да ея́ в ме́ру во́зраста исполне́ния Христо́ва восхо́дят. Те́мже взира́юще на бога́тство благода́ти Христо́вы, ва́м дарова́нныя, я́ко просвети́тели на́ша восхваля́ем вы́, вопию́ще такова́я:
Ра́дуйтеся, богоно́снии небе́снии таи́нницы; ра́дуйтеся, покая́ния немо́лчнии пропове́дницы.
Ра́дуйтеся, сосу́ди избра́ннии; ра́дуйтеся, прему́дрии учи́телие вселе́нныя.
Ра́дуйтеся, в Боже́ственных уче́ниих Христо́вых лю́ди наста́вившии; ра́дуйтеся, в повеле́ниих Госпо́дних всегда́ усе́рдно ходи́вшии.
Ра́дуйтеся, многоразли́чных доброде́телей о́бразы в ва́шем житии́ яви́вшии; ра́дуйтеся, столпи́ непоколеби́мии, ве́ру Христо́ву Боже́ственными догма́ты утверди́вшии.
Ра́дуйтеся, слове́сное ста́до Христо́во му́дре упа́сшии; ра́дуйтеся, Правосла́вия изря́днейшии богосло́ви.
Ра́дуйтеся, свети́ла, вся́ концы́ земли́ просвеща́ющая; ра́дуйтеся, свире́ль и цевни́це сладкозву́чная.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 3.
Си́ла моле́ний о́тчих пону́ди свята́го Григо́рия По́нт оста́вити и в Назиа́нз ко отцу́ своему́, по́мощи ра́ди ему́, пресели́тися, иде́же сла́ву Бо́жию уче́ньми и де́лы веща́ше и е́ресь ариа́нскую посрамля́ше. Те́мже и на́с, вели́кий святи́телю Григо́рие, Боже́ственнаго рая́ нетле́нныя проходя́ па́жити, помина́й у престо́ла Святы́я Тро́ицы, да со умиле́нием взыва́ем Е́й: Аллилу́иа.
И́кос 3.
Иму́ще в сердца́х светоно́сную благода́ть Святы́я, Единосу́щныя и Неразде́льныя Тро́ицы, трие́ богопропове́дницы, разделе́ннии телесы́ и совоку́пленнии ду́хом, благоче́стно я́ве пропове́даша Тро́ицу Еди́ну непреме́нную, Существо́ же и Божество́, и сию́ про́поведь страда́ньми запечатле́ша. Те́мже и мы́, подража́юще ве́ре и́х, вопие́м такова́я:
Ра́дуйтеся, си́льнии и непребори́мии Це́ркве Христо́вы спобо́рницы; ра́дуйтеся, и́стины Христо́вы усе́рднии ревни́тели.
Ра́дуйтеся, ко Пресвяте́й Тро́ице моли́твенницы те́плии; ра́дуйтеся, Це́ркве Христо́вы па́стырие до́брии.
Ра́дуйтеся, А́рия низложи́вшии и правосла́вныя утверди́вшии; ра́дуйтеся, Тро́ицу Еди́ну Непреме́нную, Существо́ и Божество́, дея́ньми и уче́ньми просла́вившии.
Ра́дуйтеся, Отца́, и Сы́на, и Свята́го Ду́ха, Тро́ицы ипоста́си, ди́вно уясни́вшии; ра́дуйтеся, Трисия́тельнаго ра́ди и Еди́наго Божества́ велича́йшия ско́рби и гоне́ния претерпе́вшии.
Ра́дуйтеся, тяготу́ дневну́ю до сконча́ния своего́ жития́ неосла́бно поне́сшии; ра́дуйтеся, но́щь мра́чную злочести́вых ересе́й луча́ми богому́дрых догма́тов отгна́вшии.
Ра́дуйтеся, ду́ши ве́рных благода́тно напита́вшии; ра́дуйтеся, Ца́рствия ве́чнаго насле́дницы бы́ти сподо́бившиися.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 4.
Бу́рю я́рости и гне́ва воздвиго́ша, о Златоу́сте, безу́мнии лю́дие, клеве́щуще на тя́ и изгна́ти от ца́рствующаго гра́да повелева́юще. Ты́ же, Златосло́ве, на ка́мени ве́ры Христо́вы непоколеби́мо пребыва́я и благода́тию Свята́го Ду́ха укрепля́ем, бу́рю гоне́ний и муче́ний му́жественно претерпе́л еси́ и страда́ньми вене́ц нетле́нный на Небесе́х себе́ угото́вал еси́, науча́я все́х в терпе́нии нести́ Кре́ст Христо́в и взыва́ти Бо́гу: Аллилу́иа.
И́кос 4.
Слы́шаще богодухнове́нная словеса́ ва́ша, запечатле́нная мно́гими по́двиги и страда́ньми, жа́ждущии глаго́лов жи́зни ве́чныя издале́ча к ва́м прихожда́ху, и нетле́нную пи́щу от ва́с прие́мше и боже́ственнаго пития́ поче́рпше, взыва́ху ва́м сицева́я:
Ра́дуйтеся, глубины́ сло́ва Бо́жия до́бре испыта́вшии; ра́дуйтеся, непреста́нным раче́нием Бо́га взыска́вшии.
Ра́дуйтеся, а́лчущих пра́вды пита́телие; ра́дуйтеся, ни́щих ду́хом уте́шителие.
Ра́дуйтеся, о́блацы, источа́ющии ро́су уче́ний благочести́вых и напая́ющии вселе́нную; ра́дуйтеся, приснотеку́щия ре́ки духо́вныя, напая́ющия ве́рных ча́д Це́ркве Христо́вы.
Ра́дуйтеся, Боже́ственных Та́ин храни́телие и слове́сныя трубы́ Бо́жия; ра́дуйтеся, пра́выя ве́ры и благоче́стия христиа́нскаго насади́телие.
Ра́дуйтеся, чудесы́ мно́гими ве́рныя озаря́ющии; ра́дуйтеся, ре́ки врачева́ний на́м пролива́ющии.
Ра́дуйтеся, усе́рдно притека́ющия к ва́м от искуше́ний и напа́стей моли́твами ва́шими охраня́ющии; ра́дуйтеся, всего́ ро́да христиа́нскаго похвало́.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 5.
Боготе́чную звезду́ Христо́с ми́ру показа́ тя́, вели́кий во иера́рсех Васи́лие; стяжа́в бо ве́дение Боже́ственных Та́ин и озаре́ние свы́ше от Престо́ла благода́ти Бо́жия, умы́ и сердца́ ве́рных богодухнове́нными словесы́ ди́вно просвети́л еси́, любо́вию же к Бо́гу одушевля́ем, гоне́ния и страда́ния за Христа́ до́бре претерпе́л еси́ и сего́ ра́ди сподо́бился еси́ на Небесе́х моли́твеннаго дерзнове́ния у Престо́ла Царя́ сла́вы, о́браз бы́в ве́рным сло́вом, житие́м, ду́хом, любо́вию, ве́рою и чистото́ю, да вси́ со умиле́нием вопию́т Пресвяте́й Тро́ице: Аллилу́иа.
И́кос 5.
Ви́дяще ва́с, святи́телие Христо́вы, Небе́сным ликостоя́нием при́сно спребыва́ющия и Престо́лу Бо́жию всегда́ предстоя́щия, со умиле́нием воспева́ем возвели́чившую ва́с Живонача́льную Тро́ицу, Ю́же сло́вом и житие́м ва́шим просла́вили есте́, ва́м же, моли́твенником изря́днейшим, от любве́ серде́чныя вопие́м:
Ра́дуйтеся, го́рним лико́м совокупле́нии и святы́х а́нгел сожи́телие; ра́дуйтеся, Престо́лу Царя́ сла́вы предстоя́щии при́сно со все́ми избра́нными.
Ра́дуйтеся, сла́вою небе́сною укра́шеннии; ра́дуйтеся, пло́ть и ми́р возненави́девшии.
Ра́дуйтеся, вся́ сокро́вища ми́ра и жите́йския сла́сти Христа́ ра́ди во уме́ты вмени́вшии; ра́дуйтеся, на светоза́рную доброде́телей колесни́цу возше́дшии и Небе́снаго Ца́рствия дости́гшии.
Ра́дуйтеся, и на́м, гре́шным, о́браз доброде́телей сло́вом и житие́м яви́вшии; ра́дуйтеся, мно́гими скорбьми́ вше́дшии в ра́дость Го́спода своего́.
Ра́дуйтеся, те́плии о на́с пред Бо́гом хода́таи; ра́дуйтеся, правосла́внаго богосло́вия свети́ла изря́днейшая.
Ра́дуйтеся, ве́ры христиа́нския похвало́; ра́дуйтеся, святи́телей сла́во и Це́ркве украше́ние.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 6.
Пропове́дуя и́стину боговеща́нными твои́ми глаго́лы, сокруши́л еси́, богосло́ве Григо́рие, е́ллинская суему́дрия и ересе́й собла́зны, вселе́нней же все́й немо́лчно пропове́дал еси́ в Тро́ице сла́вимаго Бо́га Единосу́щнаго, Отца́ и Сы́на и Ду́ха Свята́го, науча́я все́х вопи́ти Ему́: Аллилу́иа.
И́кос 6.
Возсия́сте све́том доброде́тельнаго жития́ и правосла́вныя ве́ры испове́данием во всю́ вселе́нную и все́м язы́ком све́т и́стиннаго богопозна́ния уясни́сте, я́коже бы́ти ва́м па́стырем и учи́телем всея́ Це́ркве Христо́вы. Те́мже и по сме́рти не преста́йте призира́ти на ны́, те́пле ва́м моля́щияся и взыва́ющия:
Ра́дуйтеся, три́ свети́ла вели́кая, путеводя́щая на́с ко спасе́нию; ра́дуйтеся, просвети́телие седя́щих во тьме́ неве́дения.
Ра́дуйтеся, недомы́сленныя Та́йны Триипоста́снаго Божества́ на́м уясня́ющии; ра́дуйтеся, струя́ми му́дрых уче́ний па́ству свою́ напая́ющии.
Ра́дуйтеся, па́стырие изря́днейшии, житие́ свое́ вся́кими доброде́тельми благоукраси́вшии; ра́дуйтеся, ста́до свое́ от волко́в хи́щных соблю́дшии.
Ра́дуйтеся, свети́льницы Трисо́лнечнаго Све́та, умы́ и сердца́ ве́рных ди́вно озаря́ющии; ра́дуйтеся, о́бразы целому́дрия, ревнова́ти о стяжа́нии сея́ доброде́тели на́с науча́ющии.
Ра́дуйтеся, церко́вная корми́ла, пу́ть правосла́внаго богове́дения я́сно показу́ющая; ра́дуйтеся, двана́десяти апо́столом единонра́внии.
Ра́дуйтеся, а́нгельских лико́в сожи́телие; ра́дуйтеся, ку́пно со все́ми святы́ми непреста́нно моля́щиися о на́с.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 7.
Хотя́ зми́й лука́вый искуси́ти тя́, я́коже И́ова многострада́льнаго, воздви́же бу́рю зло́бы нечести́вых, изгна́вших тя́ в заточе́ние. Оба́че благода́тию Христо́вою укрепля́ем, вся́кая злострада́ния и боле́зни до́бре претерпе́л еси́, о́тче Иоа́нне Златоу́сте, и блаже́нныя кончи́ны сподо́бился еси́. Ны́не же пребыва́я в невече́рнем дни́ Ца́рствия Христо́ва, не преста́й моли́тися за ны́ у Престо́ла Триипоста́снаго Бо́га, да со умиле́нием вопие́м: Аллилу́иа.
И́кос 7.
Но́вии свети́льницы светоза́рнии и Це́ркве непоколеби́мии столпи́ яви́стеся, святи́телие вели́цыи: свя́тостию бо жития́ ва́шего, еще́ во пло́ти су́ще на земли́, бе́сте я́ко безпло́тни. Сего́ ра́ди Це́рковь Христо́ва, при́сно прославля́ющи ва́с, благода́рственная пе́ния воспису́ет Светода́вцу Христу́ Бо́гу, Его́же благода́тию укрепля́еми, ве́лия боле́зни претерпе́сте и труды́ понесо́сте во благове́стии Христо́ве. Те́мже прославля́юще Христа́, непреста́нно благоде́ющаго Це́ркви Свое́й Святе́й, восхваля́ем и ва́с, я́ко ве́рных слу́г Христо́вых и строи́телей Та́ин Бо́жиих, вопию́ще сицева́я:
Ра́дуйтеся, ве́рнии Тро́ицы побо́рницы; ра́дуйтеся, Правосла́вия непобеди́мии испове́дницы.
Ра́дуйтеся, иера́рхов священнонача́льницы; ра́дуйтеся, луча́ми богосло́вия ва́шего ересе́й неи́стовство разруши́вшии.
Ра́дуйтеся, пресве́тлии благоче́стия о́брази; ра́дуйтеся, ве́рныя в богове́дении утверди́вшии.
Ра́дуйтеся, сло́ва Бо́жия богодухнове́ннии изъясни́телие; ра́дуйтеся, Влады́ки Христа́ раби́ блази́и и ве́рнии.
Ра́дуйтеся, кро́тость Моисе́еву и ре́вность Илиину́ в по́двизех свои́х воплоти́вшии; ра́дуйтеся, терпе́нием скорбе́й и гоне́ний дре́внему И́ову подража́вшии.
Ра́дуйтеся, Ио́сифа целому́дрием и чистото́ю укра́шеннии; ра́дуйтеся, Петро́во испове́дание и Иоа́нново богосло́вие показа́вшии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 8.
Стра́нное чу́до благода́ти дарова́нныя тебе́, святи́телю Васи́лие, уве́де на себе́ Ефре́м Сириани́н, егда́ восхоте́вшу ему́ ви́дети тя́, о́тче, посла́л еси́ архидиа́кона своего́ привести́ его́ к тебе́, и моли́твою твое́ю Ефре́м уразуме́ язы́к е́ллинский и, чудеси́ дивя́ся, просла́ви Бо́га, поя́ Ему́: Аллилу́иа.
И́кос 8.
Всю́ ве́ру во Святу́ю Тро́ицу непоро́чну сохрани́сте и мно́ги ко Христу́ приведо́сте, святи́телие Христо́вы, по́двигом до́брым подвиза́вшеся. Сего́ ра́ди, взира́юще на ди́вный по́двиг ва́ш и на чи́стое житие́ ва́ше, со умиле́нием вопие́м ва́м такова́я:
Ра́дуйтеся, Правосла́вия оде́ждою, свы́ше истка́нною, Це́рковь украси́вшии; ра́дуйтеся, ерети́ческая суесло́вия я́сно обличи́вшии.
Ра́дуйтеся, писа́ньми и словесы́ ва́шими духо́вное сокро́вище Це́ркви Христо́ве собра́вшии; ра́дуйтеся, му́дрость земну́ю и вся́ кра́сная ми́ра Христа́ ра́ди отве́ргшии.
Ра́дуйтеся, сокро́вищ Небе́сных па́че всего́ взыска́вшии; ра́дуйтеся, Пастыренача́льника Христа́, я́ко служи́телие ве́рнии, живоно́сным стопа́м после́довавшии.
Ра́дуйтеся, высо́кий о́браз доброде́телей в житии́ ва́шем яви́вшии; ра́дуйтеся, душе́вныя стра́сти, вку́пе же и теле́сныя, духо́вным мече́м посе́кшии.
Ра́дуйтеся, Живонача́льней Тро́ице в же́ртву жи́ву, свя́ту и благоуго́дну себе́ сами́х прине́сшии; ра́дуйтеся, гре́шников предста́телие.
Ра́дуйтеся, ни́щих засту́пницы; ра́дуйтеся, па́стырей учи́телие и о́бразы.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 9.
Все́ю душе́ю твое́ю возлюби́в Бо́га, о́тче Григо́рие, богови́дную чистоту́ и целому́дрие па́че все́х избра́л еси́ и богосло́в вели́кий и таи́нник яви́лся еси́. Ны́не предстоя́ Престо́лу Святы́я Тро́ицы, испроси́ ми́рови ми́р, и спасе́ние все́м на́м, восхваля́ющим тя́ и пою́щим Бо́гу: Аллилу́иа.
И́кос 9.
Вити́йством богодухнове́нным трие́х вселе́нских святи́телей ерети́честии собла́зны преста́ша, правосла́вная же ве́ра па́че и па́че превозмо́же. Сего́ ра́ди от усе́рдия на́шего со умиле́нием и любо́вию взыва́ем к ни́м такова́я:
Ра́дуйтеся, любо́вию Правосла́вия все́ житие́ ва́ше озари́вшии; ра́дуйтеся, Еди́наго Бо́га в Трие́х Ли́цах чествова́ти научи́вшии.
Ра́дуйтеся, А́риево злоче́стие и хуле́ния ины́х еретико́в низложи́вшии; ра́дуйтеся, лжеучи́телей пребеззако́нная уста́ све́тлостию слове́с ва́ших загради́вшии.
Ра́дуйтеся, небе́сныя трубы́, пропове́давшия ми́рови Христо́во Ева́нгелие; ра́дуйтеся, во иера́рсех свети́ла три́ вели́кая.
Ра́дуйтеся, учи́телие кро́тости, воздержа́ния, вку́пе же и покая́ния; ра́дуйтеся, мона́шествующих до́брии учи́телие и наста́вницы.
Ра́дуйтеся, Це́ркве огражде́ние и Правосла́вия побо́рницы; ра́дуйтеся, в труды́ Апо́столов вше́дшии и кла́с до́браго испове́дания пожа́вшии.
Ра́дуйтеся, за ве́ру и по́двиги венцы́ нетле́нныя от Пастыренача́льника Христа́ прие́мшии; ра́дуйтеся, вели́кия труды́ и по́двиги во благоустрое́нии Це́ркве Христо́вы подъе́мшии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 10.
Спа́са Христа́ умоля́ти не преста́й о чту́щих па́мять твою́, всехва́льне Иоа́нне Златоу́сте: тебе́ бо даде́ся благода́ть моли́тися за ны́. Те́мже и мы́, я́ко ко благоуха́ннаго ми́ра сосу́ду, точа́щему исцеле́ния все́м с ве́рою притека́ющим, со умиле́нием и любо́вию припа́дающе, вопие́м просла́вльшему тя́ Бо́гу: Аллилу́иа.
И́кос 10.
Стена́ есте́ необори́мая пра́зднующим святу́ю па́мять ва́шу и все́м притека́ющим к моли́твенному покро́ву ва́шему, непосты́дная наде́жда и кре́пкое заступле́ние. Те́мже и на́м, святи́и трие́ святи́телие, со умиле́нием припа́дающим к ва́м, испроси́те у Престо́ла Святы́я Тро́ицы ми́лость и благода́ть во благовре́менную по́мощь, да с ра́достию и благодаре́нием взыва́ем ва́м:
Ра́дуйтеся, ми́лость и утеше́ние все́м ве́рным явля́ющии; ра́дуйтеся, ка́ющияся гре́шники от сете́й диа́вола избавля́ющии.
Ра́дуйтеся, благода́тных даро́в усе́рднии раздая́телие; ра́дуйтеся, все́х челове́к предста́тельство и покро́ве.
Ра́дуйтеся, си́рых отцы́ и вдо́в засту́пницы; ра́дуйтеся, убо́гих бога́тство и боля́щих исцеле́ние.
Ра́дуйтеся, милосе́рдия ко стра́ждущим немо́лчнии пропове́дницы и ю́ных наста́вницы; ра́дуйтеся, ста́рец пита́телие.
Ра́дуйтеся, су́щих в ско́рбех уте́шителие; ра́дуйтеся, стра́нных сопу́тницы.
Ра́дуйтеся, изнемога́ющим поможе́ние; ра́дуйтеся, чту́щим па́мять ва́шу ра́дость и спасе́ние низпосыла́ющии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 11.
Пе́ние Пресвяте́й Тро́ице па́че ины́х принесли́ есте́, святи́телие Бо́жии, умо́м, сло́вом, де́лом и богосло́вным вити́йством ва́шим сплете́ния ри́торская разруши́ли есте́, наставля́юще ны́ почита́ти Тро́ицу во Еди́нице и воспева́ти Е́й: Аллилу́иа.
И́кос 11.
Светоза́рную тро́ицу святы́х иера́рхов, Васи́лия, ца́рствия тезоимени́таго, Григо́рия, Богосло́ва наимено́ваннаго, Иоа́нна, Златоу́стаго учи́теля вселе́нныя, глубины́ Бо́жия испыта́вших, восхваля́юще и све́тлую па́мять и́х благогове́йно торжеству́юще, похва́льная пе́ния прино́сим такова́я:
Ра́дуйтеся, благознамени́тыя трубы́ Боже́ственных глаго́лов; ра́дуйтеся, цевни́цы богодухнове́нныя.
Ра́дуйтеся, апо́стольских писа́ний богодухнове́ннии изъясни́телие; ра́дуйтеся, апо́стольских преда́ний ревни́телие.
Ра́дуйтеся, ди́вная вели́чия Бо́жия все́м земноро́дным пове́дающии; ра́дуйтеся, Сла́ву Бо́жию ва́шим житие́м и сло́вом пропове́давшии все́й вселе́нней.
Ра́дуйтеся, ко спасе́нию до́брии путеводи́телие и наста́вницы; ра́дуйтеся, растле́нных обы́чаев искорени́телие, благи́х же нра́вов насади́телие.
Ра́дуйтеся, отрица́тися плотски́х похоте́й и страсте́й науча́ющии; ра́дуйтеся, вра́чеве прему́дрии неду́гов душе́вных и теле́сных.
Ра́дуйтеся, церко́вная свети́ла, от Трисо́лнечнаго Све́та возжже́нная; ра́дуйтеся, цве́ты благово́ннии ра́йскаго прозябе́ния.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 12.
Благода́ть Бо́жия оби́льно излия́ся во уста́х ва́ших, треблаже́ннии: ве́ра правосла́вная ва́ми укрепи́ся, и мгла́ ерети́ческих шата́ний и лжеуче́ний све́том ва́ших богодухнове́нных писа́ний отгна́ся. Те́мже, святи́телие, моли́теся ко Христу́ Бо́гу, да ду́х ре́вности ва́шея о ве́ре и благоче́стии почи́ет и на на́с, да сподо́бимся ку́пно с ва́ми пе́ти Святе́й Тро́ице: Аллилу́иа.
И́кос 12.
Пою́ще и све́тло пра́зднующе свяще́нную па́мять ва́шу, треблаже́ннии Васи́лие Вели́кий, Богосло́ве Григо́рие и Златоу́стый Иоа́нне, смире́нно мо́лим ва́с, не преста́йте моли́тися Христу́ о все́х, ве́рою призыва́ющих ва́с и с любо́вию вопию́щих такова́я:
Ра́дуйтеся, правосла́вных догма́тов храни́телие; ра́дуйтеся, богосло́вия живоно́снии исто́чницы.
Ра́дуйтеся, ве́рных сердца́ Боже́ственне веселя́щии; ра́дуйтеся, я́ко неосла́бными по́двиги ва́шими А́рий низложи́ся.
Ра́дуйтеся, я́ко огне́м богодухнове́нных веща́ний ва́ших Евно́миева е́ресь попали́ся; ра́дуйтеся, я́ко ва́шими богодухнове́нными глаго́лы Саве́ллия е́ресь отгна́ся.
Ра́дуйтеся, я́ко мудрова́ние Несто́рия ва́ми упраздни́ся; ра́дуйтеся, о ми́ре моли́твенницы изря́днейшии.
Ра́дуйтеся, к Ца́рствию Небе́сному ве́рныя возводя́щии; ра́дуйтеся, Бо́жии гла́си, пречу́дно на́м возгреме́вшии.
Ра́дуйтеся, па́стырей Це́ркве достоподража́тельнии о́брази; ра́дуйтеся, по Апо́столу все́м вся́ бы́вшии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 13.
О святи́телие Христо́вы и отцы́ треблаже́ннии, Васи́лие Вели́кий, церко́вное свети́ло и сто́лпе непоколеби́мый, Богосло́ве Григо́рие, у́ме богопросвеще́нный, архиере́ю превели́кий, вку́пе же и Златоу́сте Иоа́нне, покая́ния тве́рдый пропове́дниче, небе́сным спребыва́юще лико́м и а́нгельским совоку́пльшеся си́лам, ны́нешнее прие́мше ма́лое моле́ние на́ше, испроси́те на́м у Всеще́драго Бо́га вы́шняя мы́слити и де́яти, да ве́чныя му́ки избе́гше, небе́сную жи́знь насле́дим с ва́ми, вопию́ще Бо́гу: Аллилу́иа.
Этот конда́к читается трижды, затем 1-й и́кос и 1-й конда́к.
И́кос 1.
А́нгели земни́и и челове́цы небе́снии, святи́телие Христо́вы и отцы́ треблаже́ннии, побо́рницы Живонача́льныя Тро́ицы, от Нея́ све́том трисо́лнечным осиява́емии и моля́щиися непреста́нно у престо́ла Триипоста́снаго Божества́ о душа́х на́ших, услы́шите ны́ от се́рдца к ва́м взыва́ющия:
Ра́дуйтеся, иму́щии дерзнове́ние вопи́ти о на́с ко Го́споду; ра́дуйтеся, вели́цыи уго́дницы Святы́я Тро́ицы.
Ра́дуйтеся, дарова́ньми единоче́стнии; ра́дуйтеся, апо́столом единонра́внии.
Ра́дуйтеся, я́ко ва́шими уче́ньми ди́вно просия́ благода́ть Христо́ва; ра́дуйтеся, ра́зум сво́й в послуша́ние ве́ры плени́вшии.
Ра́дуйтеся, блази́и де́лателие виногра́да Христо́ва; ра́дуйтеся, от ю́ности Бо́гом благослове́ннии.
Ра́дуйтеся, ско́рби жития́ сего́ до́бре претерпе́вшии и да́нный ва́м тала́нт приумно́жившии; ра́дуйтеся, во́лю Бо́жию си́льным ми́ра сего́ со мно́гим дерзнове́нием благовести́вшии.
Ра́дуйтеся, тьму́ нече́стия отгна́вшии; ра́дуйтеся, всю́ подсо́лнечную заря́ми догма́тов просвети́вшии.
Ра́дуйтеся, трие́ святи́телие, вели́цыи и вселе́нстии учи́телие.
Конда́к 1.
Избра́ннии свети́льницы Це́ркве Христо́вы, Васи́лие, Григо́рие и Иоа́нне, уче́ньми ва́шими ми́р просвети́вшии и вся́ шата́ния ересе́й и ху́льных смуще́ния угаси́вшии; я́ко хода́таи спасе́ния на́шего су́ще, моли́твами ва́шими сохрани́те ны́ от вся́ких бе́д и ве́чных му́к, да с ра́достию благодаря́ще вопие́м ва́м:
Ра́дуйтеся, трие́ святи́телие, вели́цыи и вселе́нстии учи́телие.
Моли́тва.
О пресве́тлии свети́льницы Це́ркве Христо́вы, Васи́лие, Григо́рие и Иоа́нне, све́том правосла́вных догма́тов вся́ концы́ земли́ озари́вшии и мече́м сло́ва Бо́жия ху́льных смуще́ния и шата́ния ересе́й угаси́вшии; припа́дающе к ва́шему милосе́рдию, с ве́рою и любо́вию из глубины́ души́ вопие́м: предстоя́ще Престо́лу Пресвяты́я, Единосу́щныя, Животворя́щия и Неразде́льныя Тро́ицы, за Ню́же сло́вом, писа́нием и житие́м до́бре подвиза́стеся и ду́ши своя́ полага́сте, всегда́ моли́теся Е́й, да укрепи́т и ны́ в Правосла́вии и единомы́слии, и непоколеби́мем да́же до сме́рти испове́дании ве́ры Христо́вы, и во вседуше́внем послуша́нии Его́ Це́ркви Святе́й: да препоя́шет ны́ с высоты́ си́лою на вся́ неви́димыя и ви́димыя враги́ на́ша: да соблюде́т Це́рковь Свою́ незы́блему от неве́рия, суеве́рия, ересе́й и раско́ла; да да́рует архипа́стырем на́шим здра́вие, долгоде́нствие и во все́м благо́е поспеше́ние; па́стырем на́шим да пода́ст духо́вное трезве́ние и ре́вность о спасе́нии пасо́мых; прави́телем су́д и пра́вду, во́ином терпе́ние, му́жество и одоле́ние на враги́, си́рым и вдови́цам заступле́ние, боля́щим исцеле́ние, ю́ным благо́е в ве́ре возраста́ние, ста́рцем утеше́ние, оби́димым заступле́ние, и все́м вся́ ко вре́менней и ве́чней жи́зни потре́бная, я́ко да в ми́ре и покая́нии, жела́нием спасе́ния горя́ще, Го́сподеви рабо́тающе, до́брым по́двигом подвиза́ющеся, тече́ние на́ше сконча́ем и сподо́бимся в Небе́снем Ца́рствии ку́пно с ва́ми всегда́ пе́ти и сла́вити пресвято́е и великоле́пое и́мя Отца́, и Сы́на и Свята́го Ду́ха во ве́ки веко́в. Ами́нь.
При императоре Алексее Комнине, который правил с 1081 по 1118 г., в Константинополе разгорелся спор, разделивший на три лагеря мужей, просвещенных в вопросах веры и усердных в стяжании добродетелей. Речь шла о трех святителях и выдающихся отцах Церкви: Василии Великом, Григории Богослове и Иоанне Златоусте. Одни выступали за то, чтобы предпочесть св. Василия двум другим, поскольку он сумел объяснить тайны природы как никто другой и был вознесен добродетелями на Ангельскую высоту. В нем, говорили его сторонники, не было ничего низменного или земного, он был организатором монашества, главой всей Церкви в борьбе с ересями, строгим и требовательным пастырем относительно чистоты нравов. Поэтому, делали вывод они, св. Василий стоит выше св. Иоанна Златоуста, который по характеру был более склонен прощать грешников.
Другая партия, напротив, защищала Златоуста, возражая противникам, что прославленный епископ Константинополя ничуть не в меньшей степени, чем свт. Василий, был устремлен бороться с пороками, призывать грешников к покаянию и побуждать народ к совершенствованию по евангельским заповедям. Непревзойденный в красноречии, златоустый пастырь оросил Церковь настоящей полноводной рекой проповедей. В них он толковал Слово Божие и показывал, как его применять в повседневной жизни, причем ему удалось это сделать лучше, чем двум другим христианским учителям.
Третья группа ратовала за то, чтобы признать главным свт. Григория Богослова за величие, чистоту и глубину его языка. Они говорили, что свт. Григорий, лучше всех освоивший мудрость и красноречие греческого мира, достиг высочайшей степени в созерцании Бога, поэтому никто из людей не смог столь великолепно изложить учение о Святой Троице.
Таким образом, каждая партия защищала одного отца перед двумя другими, и это противостояние захватило вскоре всех жителей столицы. Вовсе уже не помышляя о почтительном отношении к святителям, люди пускались в бесконечные споры и перебранки. Разногласиям между партиями не было видно ни конца ни края.
Тогда однажды ночью три святителя явились во сне св. Иоанну Мавроподу, митрополиту Евхаитскому (память 5 октября), сначала по одному, а затем втроем. В один голос они ему сказали: «Как ты видишь, мы все вместе находимся рядом с Богом и никакие размолвки или соперничество нас не разделяют. Каждый из нас в ту меру обстоятельств и вдохновения, какая была ему дарована Святым Духом, писал и учил тому, что необходимо для спасения людей. Среди нас нет ни первого, ни второго, ни третьего. Если ты призываешь имя одного из нас, двое других также присутствуют рядом с ним. Посему повели тем, кто ссорится, не создавать из-за нас расколов в Церкви, поскольку при жизни все свои усилия мы посвящали установлению единства и согласия в мире. Затем объедини наши памяти в один праздник и составь для него службу, включив туда песнопения, посвященные каждому из нас, сообразно искусству и науке, которые Господь тебе дал. Передай эту службу христианам, чтобы они праздновали ее каждый год. Если они будут почитать нас таким образом – едиными перед Богом и в Боге, то мы обещаем, что будем ходатайствовать в нашей общей молитве об их спасении». После этих слов святители поднялись на небо, объятые несказанным светом, обращаясь друг к другу по имени.
Тогда свт. Иоанн Мавропод собрал без промедления народ и сообщил об откровении. Так как все уважали митрополита за добродетель и восхищались силой его красноречия, спорившие партии примирились. Все стали просить Иоанна немедленно приняться за составление службы общего праздника трех святителей. Тонко продумав вопрос, Иоанн решил отвести этому празднованию тридцатый день января, чтобы словно скрепить печатью этот месяц, в течение которого вспоминаются все три святителя по отдельности.
Как поется в многочисленных тропарях из этой великолепной службы, три святителя, «земная троица», разные как личности, но единые по благодати Божией, заповедали нам в своих писаниях и примером своей жизни почитать и прославлять Пресвятую Троицу – Бога Единого в трех Лицах. Эти светильники Церкви распространили по всей земле свет истинной веры вопреки опасностям и преследованиям и оставили нам, их потомкам, святое наследие. Через их творения мы можем также достичь высшего блаженства и вечной жизни в присутствии Бога вместе со всеми святыми.
На протяжении января мы празднуем память многих славных иерархов, исповедников и подвижников и завершаем его соборным праздником в честь трех великих святителей. Таким образом Церковь вспоминает всех святых, которые проповедовали православную веру своей жизнью или в своих сочинениях. Этим праздником мы отдаем дань почтения всей совокупности знаний, просвещенности, ума и сердца верующих, которые они получают через слово. В итоге праздник трех святителей оказывается воспоминанием всех отцов Церкви и всех примеров евангельского совершенства, которые Святой Дух порождает во все времена и во всех местах, чтобы появлялись новые пророки и новые апостолы, проводники наших душ на Небеса, утешители народа и пламенные столпы молитвы, на которых и покоится Церковь, укрепляясь в истине.
Составитель – иеромонах Макарий (Симонопетрский),
адаптированный русский перевод – изд-во Сретенского монастыря
Источник: http://www.pravoslavie.ru
См. также: "Собор трех великих вселенских учителей Василия Великого, Григория Богослова и Иоанна Златоустого" в изложении свт. Димитрия Ростовского.
