Акафист святому преподобному Онуфрию Великому

И҆збра́нный и҆ ди́вный ѻ҆́тче ѻ҆нꙋ́фрїе, сїѧ́ющїй трисїѧ́ннагѡ живота̀ заре́ю, ты̀ мѧ̀, ѡ҆мраче́ннаго грѣхо́вными страстьмѝ, просвѣтѝ, ѿ смертоно́сныѧ ра́ны и҆схитѝ и҆ твои́ми мл҃твами ѿ всѣ́хъ бѣ́дъ и҆зба́ви, да зовꙋ̀ тебѣ̀:

А҆́гг҃льстїи чи́ни твои̑мъ, ѻ҆́тче, ᲂу҆диви́шасѧ по́двигѡмъ, и҆́миже въ пꙋсты́ни непреста́ннѡ ᲂу҆пражнѧ́лсѧ є҆сѝ: три́ бо и҆ шестьдесѧ́тъ лѣ́тъ пости́лсѧ є҆сѝ, бжⷭ҇твенныѧ же хрⷭ҇то́вы та̑йны ѿ рꙋ́къ а҆́гг҃льскихъ прїима́ти сподо́билсѧ є҆сѝ, и҆ ны́нѣ ᲂу҆̀бо почита́ѧ тѧ̀ є҆диновсе́льника и҆ собесѣ́дника а҆́гг҃лѡвъ, сицєва́ѧ вопїю̀ тѝ, свѧ́те ѻ҆нꙋ́фрїе:

Ви́дѧще стра́нный и҆ чꙋ́дный житїѧ̀ твоегѡ̀ ѡ҆́бразъ прпⷣбный пафнꙋ́тїй вельмѝ ᲂу҆диви́сѧ: тѣ́мже и҆ а҆́зъ, размышлѧ́ѧ твоѧ̑ па́че мѣ́ры трꙋдолю́бныѧ пꙋсты́нныѧ пѡ́двиги, пою̀ бг҃ꙋ, на сїѧ̑ тебє̀ ᲂу҆крѣпи́вшемꙋ: А҆ллилꙋ́їа.

Ра́зꙋмꙋ да́тисѧ мнѣ̀ бжⷭ҇твенномꙋ, помоли́сѧ прпⷣбне ѻ҆нꙋ́фрїе, ты́ бо, бжⷭ҇твеннымъ сїѧ́ющи свѣ́томъ и҆ съ а҆́гг҃лы водворѧ́ющисѧ посо́бствꙋеши па́мѧть твою̀ соверша́ющымъ и҆ ра́достнѡ похва̑льнаѧ тебѣ̀ си́це приносѧ́щымъ:

Си́ла вы́шнѧгѡ ѿ ложе́снъ ма́тернихъ ѡ҆сѣнѝ тѧ̀, прпⷣбне ѻ҆нꙋ́фрїе, и҆ показа̀ тѧ̀ селе́нїе и҆ жили́ще ст҃а́гѡ дх҃а, є҆го́же и҆ а҆́зъ недосто́йный ᲂу҆се́рднѡ прїѧ́ти жела́юще, пою̀ пѣ́снь бг҃ꙋ: А҆ллилꙋ́їа.

И҆мꙋ́ще тѧ̀ вели́ка, ѻ҆́тче, застꙋ́пника и҆ ско́раго въ напа́стѣхъ помо́щника, разли́чными ѡ҆держи́мїи напа́стьми тѧ̀ на по́мощь призыва́емъ, и҆ ве́селѡ въ твое́й свѣ́тлой па́мѧти торжествꙋ́юще, сїѧ̑ тебѣ̀ вопїе́мъ:

Бꙋ́рю страсте́й многомѧте́жнагѡ мі́ра возненави́дѣвши, ѻ҆́тче, всѣ́хъ є҆гѡ̀ ᲂу҆страни́лсѧ є҆сѝ красо́тъ, всели́всѧ же въ пꙋсты́ню, прпⷣбне, крⷭ҇ти́телю въ житїѝ послѣ́довалъ є҆сѝ и҆ прⷪ҇ро́ка и҆лїю̀ подража́лъ є҆сѝ, ны́нѣ же вѣ́чнꙋющꙋю въ нбⷭ҇ныхъ дво́рѣхъ сла́вꙋ полꙋчи́вши, съ нбⷭ҇ными бг҃ꙋ предстои́ши жи́тели и҆ пое́ши кꙋ́пнѡ съ ни́ми: А҆ллилꙋ́їа.

Свѣтоно́сное со́лнце и҆ златоза́рное свѣти́ло и҆мꙋ́ще тѧ̀ вѣ́рнїи, свѧ́те ѻ҆нꙋ́фрїе, ᲂу҆ми́льнѡ тѧ̀ мо́лимъ, просвѣтѝ, вразꙋмѝ, наꙋчѝ вопи́ти тебѣ̀ си́це:

Бг҃оте́чнꙋю зарю̀ ᲂу҆ви́дѣвши тѧ̀, ѻ҆́тче, въ пꙋсты́ни, вели́кїй пафнꙋ́тїй тща́тельнѡ послѣ́дова тебѣ̀, и҆ ꙗ҆́кѡ ᲂу҆чи́тельна свѣти́льника придержа́сѧ тебє̀, и҆ ѡ҆ пꙋсты́нномъ любопы́тно и҆спыта́въ житїѝ: є҆го́же ѿ тебє̀ до́брѣ навы́къ, ᲂу҆ми́льнѡ воспѣва́ѧ бг҃ꙋ пѣ́снь: А҆ллилꙋ́їа.

Ви́дѧ твоѐ стра́нное житїѐ, собо́ръ цр҃ко́вный, ѻ҆нꙋ́фрїе прпⷣбне, съ бл҃гоговѣ́нїемъ твою̀ бл҃же́ннꙋю па́мѧть вели́тъ почита́ти. сегѡ̀ ра́ди и҆ а҆́зъ, сп҃се́нїе хотѧ̀ полꙋчи́ти, съ весе́лїемъ почита́ю и҆ си́це тебѣ̀ вопїю̀:

Про́повѣди є҆ѵⷢ҇льскїѧ творца̀, є҆́же не пещи́сѧ ѡ҆ ри́зѣ и҆лѝ что̀ ꙗ҆́сти, и҆́стинна тѧ̀, ѻ҆нꙋ́фрїе, ᲂу҆зрѣ̀ влⷣка гдⷭ҇ь и҆ а҆́бїе власы̀ бѣ́лыми, ꙗ҆́кѡ ѡ҆де́ждою, ѡ҆дѣ́ѧ тѧ̀ чꙋ́днѡ, и҆ сла́вою свы́ше ѡ҆богати́лъ тѧ̀ є҆́сть въ преставле́нїи твое́мъ: ю҆́же и҆ на́мъ ѿ хрⷭ҇та̀ полꙋчи́ти молѝ, вопїю́щымъ є҆мꙋ̀: А҆ллилꙋ́їа.

Возсїѧ́лъ є҆сѝ ѿ є҆гѵ́пта, столпо́мъ бжⷭ҇твеннагѡ свѣ́та наставлѧ́емь, прпⷣбне ѻ҆нꙋ́фрїе, не терпѧ́ще же тѧ̀ бѣсо́встїи полцы̀ въ пꙋсты́ни, бѣжа́ша: ѿ и҆́хже навѣ́тѡвъ и҆ на́съ и҆зба́ви мл҃твами твои́ми, вопїю́щихъ тѝ си́це:

И҆зше́дшꙋ пафнꙋ́тїю ѿ ѡ҆би́тели во внꙋ́трєннѧѧ пꙋсты́ни, є҆́же ви́дѣти гдⷭ҇еви рабо́тающыѧ, бж҃їимъ смотре́нїемъ ᲂу҆зрѣ́ тѧ стра́ннымъ ѡ҆́бразомъ и҆ ᲂу҆жасе́сѧ: по глаго́ланїи же твое́мъ къ немꙋ̀, позна́въ тѧ̀ бы́ти человѣ́ка, вѣ́рнѣ и҆ ди́внѣ бг҃ꙋ рабо́тающа, возгласѝ: А҆ллилꙋ́їа.

Но́вый вои́стиннꙋ побѣдоно́сецъ на плѡтскі́ѧ стра̑сти ꙗ҆ви́лсѧ є҆сѝ, прпⷣбне, и҆ кто̀ дово́ленъ воспѣ́ти борє́нїѧ твоѧ̑; кто̀ и҆зочте́тъ трꙋды̑, болѣ̑зни и҆ пѡ́двиги, въ ни́хже тече́нїе по́стничества соверши́лъ є҆сѝ; къ си́хъ же похвале́нїю недово́льни сꙋ́ще, любо́вїю па́че почита́емъ тѧ̀ и҆ вѣ́рнѡ тебѣ̀ сицєва́ѧ вопїе́мъ:

Стра́нное твоѐ житїѐ бы́сть, ѻ҆нꙋ́фрїе: взира́ѧ бо на возра́стшаго при пеще́рѣ твое́й фі́нїка, воздержа́нїемъ па́че пита́лсѧ є҆сѝ. сегѡ̀ ра́ди, ᲂу҆лꙋчи́въ вы́шнюю трапе́зꙋ, пое́ши бг҃ꙋ: А҆ллилꙋ́їа.

Ве́сь бы́лъ є҆сѝ въ вы́шнихъ и҆ горѣ̀ ѻ҆́комъ твоеѧ̀ дꙋшѝ взира́лъ є҆сѝ непреста́ннѡ въ се́мъ стра́нномъ по́стничествѣ твое́мъ, ны́нѣ же дерзнове́нїе стѧжа́въ къ бг҃ꙋ, прпⷣбне, застꙋпа́еши всѣ́хъ, на по́мощь тѧ̀ призыва́ющихъ и҆ вопїю́щихъ тѝ си́це:

Всѧ́кое є҆стество̀ ᲂу҆диви́сѧ тебѐ, ѻ҆нꙋ́фрїе свѧ́те: мі́ра бо кра̑снаѧ ѿ се́рдца возненави́дѣвъ и҆ є҆ди́наго бг҃а ѿ дꙋшѝ возлюби́въ, пꙋсты́ню пости́глъ є҆сѝ. и҆дѣ́же въ є҆ди́нѣхъ то́кмѡ видѣ́нїихъ ᲂу҆пражнѧ́ѧсѧ, ꙗ҆ви́лсѧ є҆сѝ ꙗ҆́кѡ а҆́гг҃лъ, съ пло́тїю живы́й, поѧ̀ бг҃ꙋ: А҆ллилꙋ́їа.

Виті́йстїи ꙗ҆зы́цы восхвали́ти тѧ̀ по достоѧ́нїю не мо́гꙋтъ, ѻ҆́тче бг҃омꙋ́дре ѻ҆нꙋ́фрїе: ты́ бо ѿ ᲂу҆тро́бы ма́терни бг҃ꙋ прибли́зивъ тво́й смы́слъ, весьма̀ прилѣжа́лъ є҆сѝ цр҃ю̀ вседержи́телю, плоды̀ досто́йны приносѧ̀ є҆мꙋ̀ ѿ твои́хъ пѡ́двигъ во все́мъ житїѝ, прпⷣбне. а҆́зъ ᲂу҆̀бо ѿ цр҃кве бж҃їѧ сла́вима тѧ̀ ѡ҆ тѣ́хъ ᲂу҆вѣ́дѣвъ, вѣ́рнѡ тебѣ̀ сицєва́ѧ вопїю̀:

Сп҃сти́сѧ хотѧ́ще вѣ́рнїи ѿ напа́стей разли́чныхъ, ѻ҆́тче, предста́телѧ тѧ̀ себѣ̀ и҆ побо́рника поставлѧ́ютъ и҆ не лиша́ютсѧ наде́ждъ свои́хъ: ты́ бо мл҃твами къ бг҃ꙋ твои́ми ѿ бѣ́дъ лю́тыхъ и҆ скорбе́й, ѡ҆держа́щихъ ны̀, и҆ многоразли́чныхъ ѕлы́хъ и҆з̾има́еши, наставлѧ́еши же на сп҃се́нїѧ стезѝ ᲂу҆се́рднѡ къ тебѣ̀ притека́ющыѧ и҆ бг҃ꙋ вѣ́рнѡ вопїю́щыѧ: А҆ллилꙋ́їа.

Стѣ́нꙋ тѧ̀, застꙋ́пника и҆ мл҃твенника те́пла ѡ҆брѣ́тъ, прпⷣбне, и҆з̾ глꙋбины̀ се́рдца, ꙗ҆́кѡ бл҃гоꙋха́нное кади́ло, съ воздыха́нїемъ бг҃ꙋ возсыла́ю хвалꙋ̀: тебѣ́ же, при́сномꙋ сꙋ́щꙋ мл҃твенникꙋ, сицєва́ѧ приношꙋ̀ пѣ̑нїѧ:

Пѣ́нїе а҆́гг҃льское слы́шашесѧ въ бжⷭ҇твеннѣмъ преставле́нїи твое́мъ, ѻ҆́тче, ст҃ѣ́й бо и҆ бг҃оꙋго́днѣйшѣй дꙋшѝ твое́й, въ нбⷭ҇наѧ селє́нїѧ пресла́внѡ восходѧ́щей, си́лы нбⷭ҇ныѧ дивлѧ́хꙋсѧ, пою́ще: А҆ллилꙋ́їа.

Свѣ́тлѡ по преставле́нїи лицѐ твоѐ ви́дѣ, ѻ҆́тче, пафнꙋ́тїй ст҃ы́й ᲂу҆диви́сѧ. раздѣли́въ же на двѣ̀ ча́сти рѧ́сꙋ свою̀, покры̀ мѡ́щи твоѧ̑ и҆ погребе́ тѧ со львы̀ че́стнѡ. сїѧ̀ и҆ а҆́зъ дꙋ́хомъ бл҃гоговѣ́йнѡ почита́ѧ, си́це тѝ вопїю̀:

Бл҃года́ть, да́ннꙋю тѝ, и҆ по́двиги твоѧ̀ никто́же ѿ земны́хъ и҆зрещѝ мо́жетъ, ѻ҆́тче ѻ҆нꙋ́фрїе: въ пꙋсты́ни бо нестѧжа́тельнѡ жи́вый, пи́щꙋ и҆мѣ́лъ є҆сѝ хлѣ́бъ а҆́гг҃льскїй, ѿ человѣ̑къ бѣ́гаѧ, съ бг҃омъ и҆ а҆́гг҃лы бесѣ́довалъ є҆сѝ. сегѡ̀ ра́ди въ нбⷭ҇ныхъ черто́зѣхъ ра́дꙋешисѧ и҆ пое́ши пѣ́снь: А҆ллилꙋ́їа.

Пое́мъ до́блествєнныѧ пѡ́двиги твоѧ̑, ᲂу҆бл҃жа́емъ достохва́льнꙋю кончи́нꙋ, почита́емъ и҆ сщ҃е́ннꙋю па́мѧть твою̀, прпⷣбне, къ не́йже и҆ ꙗ҆́кѡ є҆ди́номꙋ тебѐ ѿ два́десѧти четыре́хъ ста́рєцъ, ѡ҆крꙋжа́ющихъ прⷭ҇то́лъ вы́шнѧго, предсѣдѧ́щемꙋ похва̑льнаѧ си́це вопїе́мъ:

Ѽ всехва́льный и҆ преди́вный ᲂу҆го́дниче хрⷭ҇то́въ, ѻ҆́тче ѻ҆нꙋ́фрїе, молю́ ти сѧ и҆ вопїю̀ всеꙋсе́рднѡ: прїимѝ сїѐ ма́лое, ѿ менѐ приноси́мое моле́нїе и҆ потщи́сѧ ско́ро ᲂу҆моли́ти ми́лостиваго бг҃а и҆ влⷣкꙋ, да и҆зба́витъ мѧ̀ ѿ всѧ́кихъ бѣ́дъ и҆ бꙋ́дꙋщїѧ и҆́зметъ мꙋ́ки, вопїю́щагѡ: А҆ллилꙋ́їа.

А҆́гг҃льстїи чи́ни твои̑мъ, ѻ҆́тче, ᲂу҆диви́шасѧ по́двигѡмъ, и҆́миже въ пꙋсты́ни непреста́ннѡ ᲂу҆пражнѧ́лсѧ є҆сѝ: три́ бо и҆ шестьдесѧ́тъ лѣ́тъ пости́лсѧ є҆сѝ, бжⷭ҇твенныѧ же хрⷭ҇то́вы та̑йны ѿ рꙋ́къ а҆́гг҃льскихъ прїима́ти сподо́билсѧ є҆сѝ, и҆ ны́нѣ ᲂу҆̀бо почита́ѧ тѧ̀ є҆диновсе́льника и҆ собесѣ́дника а҆́гг҃лѡвъ, сицєва́ѧ вопїю̀ тѝ, свѧ́те ѻ҆нꙋ́фрїе:

И҆збра́нный и҆ ди́вный ѻ҆́тче ѻ҆нꙋ́фрїе, сїѧ́ющїй трисїѧ́ннагѡ живота̀ заре́ю, ты̀ мѧ̀, ѡ҆мраче́ннаго грѣхо́вными страстьмѝ, просвѣтѝ, ѿ смертоно́сныѧ ра́ны и҆схитѝ и҆ твои́ми мл҃твами ѿ всѣ́хъ бѣ́дъ и҆зба́ви, да зовꙋ̀ тебѣ̀:

Ѽ преизѧ́щный и҆ превели́кїй пꙋстынножи́телю, прпⷣбне ѻ҆́тче ѻ҆нꙋ́фрїе! похвалѧ́ю твоѧ̑ неизречє́ннаѧ чꙋдотворє́нїѧ и҆ житїѐ пресвѣ́тло, є҆́же є҆сѝ препроводи́лъ ѿ ю҆́ности твоеѧ̀, да́же и҆ до ста́рости: никто́же бо и҆счестѝ возмо́же терпѣ́нїѧ и҆ по́двигѡвъ твои́хъ, прече́стне. ᲂу҆диви́сѧ прпⷣбный пафнꙋ́тїй твоемꙋ̀ жесто́комꙋ є҆́же въ пꙋсты́ни житїю̀, вкꙋ́пѣ же и҆ ѕѣлѡ̀ возра́довасѧ, ѡ҆брѣ́тъ тѧ̀ є҆ди́наго толи́кихъ по́двигѡвъ и҆ соверше́нства сꙋ́ща ѡ҆́бразъ. сегѡ̀ ра́ди и҆ по́длиннѡ и҆спыта̀ ѡ҆ трꙋдѣ́хъ твои́хъ свѧты́хъ и҆ ѡ҆ є҆́же коли́кѡ и҆мѣ́лъ є҆сѝ вре́меннагѡ житїѧ̀. тѣ́мже и҆ написа̀, ꙗ҆́кѡ шестьдесѧ́тъ лѣ́тъ и҆ трѝ въ трꙋдолю́бїи пребыва́ѧ, въ наготѣ̀ претерпѣва́ѧ мра́зъ и҆ зно́й, въ глꙋбо́цѣй пꙋсты́нѣ со ѕвѣрьмѝ и҆ пти̑цы ѡ҆бита́ѧ, мл҃твы непреста́ннѡ творѧ̀, пожи́лъ є҆сѝ. сегѡ̀ ра́ди ны́нѣ ра́дость тебѣ̀ приношꙋ̀ ѿ недосто́йныхъ ᲂу҆сте́нъ мои́хъ, прпⷣбне ѻ҆́тче, прпⷣбномꙋ пафнꙋ́тїю ра́досте вели́каѧ (сподо́бисѧ бо при кончи́нѣ съ львы̀ послꙋжи́ти тебѣ̀, погребстѝ тѣ́ло твоѐ и҆ съ тобо́ю на нб҃сѝ жи́ти), и҆лїѝ ѳесві́тѧнинꙋ ревни́телю, і҆ѡа́ннꙋ крⷭ҇ти́телю наслѣ́дниче, дрꙋ́же хрⷭ҇то́въ и҆ снаслѣ́дниче и҆́стинный, є҆гѵ́птꙋ ᲂу҆́мнаѧ красото̀, ѳиве́ѡмъ вели́кое свѣти́ло, лѷві́и кра́снаѧ добро́то, фі́нїѯъ краснопроцвѣта́ющїй, ѻ҆рлѐ высокопа́рный, лета́ющїй въ поднебє́снаѧ, на нб҃сѣ́хъ гражда́нство ѡ҆брѣты́й, и҆дѣ́же и҆ водвори́сѧ ᲂу҆ прⷭ҇то́ла влⷣки сла́вы, съ два́десѧть четы́рми ста́рцы жили́ще ѡ҆брѣты́й, съ ни́ми же и҆ пребыва́еши. и҆ ны́нѣ молю̀ тѧ̀, пречꙋ́дный граждани́не нбⷭ҇ный, ст҃ы́хъ ликѡ́въ а҆́гг҃льскихъ совсе́льниче, ᲂу҆слы́ши мѧ̀, грѣ́шнаго и҆ недосто́йнаго раба̀ твоегѡ̀, въ ча́съ се́й и҆ прїимѝ сїѐ ма́лое моле́нїе моѐ а҆ка́ѳїстово, вели́кїй застꙋ́пниче, ско́рый помо́щниче притека́ющымъ къ тебѣ̀ ᲂу҆се́рднѡ. загла́ди рꙋкописа́нїе дѣ́лъ мои́хъ скве́рныхъ и҆ нечи́стыхъ, ꙗ҆̀же держа́тъ дє́мѡнскїѧ полкѝ. покры́й мѧ̀ твои́мъ застꙋпле́нїемъ, причти́ мѧ ко ᲂу҆гото́ванномꙋ пресвѣ́тломꙋ мѣ́стꙋ мл҃твами твои́ми и҆ сподо́би мѧ̀ вы́шнѧгѡ і҆ерⷭ҇ли́ма, и҆́бо по пребл҃гослове́ннѣй влⷣчцѣ на́шей бцⷣѣ и҆ приснодѣ́вѣ марі́и, тебѣ̀ междꙋ̀ теплѣ́йшими помѡ́щницы, молє́бницы и҆ застꙋ̑пницы мои́ми почита́ю. присѣща́еши бо и҆ дае́ши рꙋ́кꙋ по́мощи припа́дающымъ къ тебѣ̀ въ хра́мѣ твое́мъ и҆ повсю́дꙋ. тѣ́мже и҆ а҆́зъ недосто́йный ны́нѣ тебѣ̀ молю́сѧ и҆ призыва́ю: ᲂу҆молѝ ми́лостиваго бг҃а, да ѿпꙋ́ститъ мѝ всѧ̑ прегрѣшє́нїѧ моѧ̑, вѡ́льнаѧ и҆ невѡ́льнаѧ, сотворє́ннаѧ всѧ̑ ѕла̑ѧ дѣла̀ моѧ̑, и҆ да и҆зба́витъ мѧ̀ твои́мъ предста́тельствомъ ѿ вѣ́чныхъ мꙋ́къ, наꙋчи́тъ мѧ̀ твори́ти дѡ́браѧ дѣла̀, наста́витъ мѧ̀ на пꙋ́ть къ сп҃се́нїю и҆́стинномꙋ и҆ сподо́битъ мѧ̀ кꙋ́пнѡ ра́дости вѣ́чныѧ наслади́тисѧ со всѣ́ми ст҃ы́ми, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ пречꙋ́дне и҆ преблаже́нне ᲂу҆го́дниче хрⷭ҇то́въ и҆ а҆́вво на́шъ, ѻ҆нꙋ́фрїе вели́кїй! ты̀ ди́внꙋю любо́вь ко гдⷭ҇ꙋ твоемꙋ̀ показа́лъ є҆сѝ, и҆ на ди̑вныѧ пѡ́двиги бл҃года́тїю є҆гѡ̀ ᲂу҆крѣпи́лсѧ є҆сѝ, и҆ сегѡ̀ ра́ди ве́лїѧ дерзнове́нїѧ къ немꙋ̀ сподо́билсѧ є҆сѝ: мно́га бо чꙋдеса̀ и҆ зна́мєнїѧ си́лы бж҃їѧ лю́демъ ѡ҆ тебѣ̀ ꙗ҆ви́шасѧ. воззрѝ ᲂу҆̀бо и҆ ны́нѣ, ѻ҆́тче преди́вный, бл҃госе́рдымъ ѻ҆́комъ любвѐ твоеѧ̀ на ны̀ недостѡ́йныѧ рабы̑, и҆ да́рꙋй всѣ̑мъ по коего́ждо потре́бѣ, по вѣ́рѣ же и҆ ᲂу҆пова́нїю: скорбѧ́щыѧ ѡ҆бра́дꙋй, пла́чꙋщыѧ ᲂу҆тѣ́ши, недꙋ́гꙋющїѧ и҆сцѣлѝ, трꙋжда́ющымсѧ помозѝ, борю́щыѧсѧ со страстьмѝ и҆ прилѡ́ги вра́жїими ᲂу҆крѣпѝ и҆ бл҃гословѝ, и҆знемога́ющыѧ поддержѝ, ѻ҆би́тель твою̀ и҆ всѣ́хъ на́съ ѿ вра̑гъ ви́димыхъ и҆ ѿ всѧ́кагѡ ѕла̀ сохранѝ. возвели́чи вѣ́рꙋ ст҃ꙋ́ю правосла́внꙋю во ѻ҆те́чествїи на́шемъ, ѡ҆братѝ заблꙋ́ждшыѧ, вразꙋмѝ ѿпа́дшыѧ, ᲂу҆твердѝ коле́блющыѧсѧ, ᲂу҆мѧгчѝ ᲂу҆по́рствꙋющыѧ, просвѣтѝ невѣ̑рныѧ, и҆ всѧ̑ приведѝ въ ти́хое приста́нище ѻ҆те́чествїѧ нбⷭ҇наго. ѽ преди́вное сло́во мона́шествꙋющихъ и҆ всѣ́хъ вѣ́рныхъ ᲂу҆тѣше́нїе! сла́вными пѡ́двиги твои́ми и҆ сла́дкимъ лицезрѣ́нїемъ чꙋдотво́рнагѡ ѡ҆́браза твоегѡ̀ и҆ на́съ ѡ҆зарѝ и҆ на всѧ́къ по́двигъ, трꙋ́дъ и҆ терпѣ́нїе ᲂу҆крѣпѝ во сла́вꙋ и҆́мени бж҃їѧ, да сп҃се́ннїи сподо́бимсѧ съ тобо́ю и҆ всѣ́ми ст҃ы́ми вѣ́чнаго и҆ пребл҃гослове́ннагѡ црⷭ҇твїѧ сла́вы ѻ҆ц҃а̀, и҆ сн҃а, и҆ ст҃а́гѡ дх҃а во вѣ́ки вѣкѡ́въ. а҆ми́нь.

Ѽ прпⷣбне ѻ҆́тче ѻ҆нꙋ́фрїе! мо́лимъ тѧ̀: ᲂу҆слы́ши на́съ, грѣ́шныхъ и҆ недосто́йныхъ ра́бъ бж҃їихъ (и҆мена̀), въ ча́съ се́й, и҆ прїимѝ сїѐ ма́лое моле́нїе на́ше: рꙋкописа́нїе дѣ́лъ на́шихъ скве́рныхъ и҆ нечи́стыхъ моли́твою твое́ю и҆згла́ди, твои́мъ застꙋпле́нїемъ при́снѡ на́съ покрыва́й и҆ ко ᲂу҆гото́ванномꙋ вѣ̑рнымъ пресвѣ́тломꙋ черто́гꙋ моли́твами твои́ми приведѝ: ᲂу҆молѝ ᲂу҆̀бо млⷭ҇тиваго бг҃а, да ѿпꙋ́ститъ на́мъ всѧ̑ прегрѣшє́нїѧ на̑ша вѡ́льнаѧ и҆ невѡ́льнаѧ и҆ всѧ̑ ѕла̑ѧ дѣла̀, на́ми сотворе́нныѧ, и҆ да и҆зба́витъ на́съ твои́мъ предста́тельствомъ ѿ вѣ́чныхъ мꙋ́къ и҆ сподо́битъ на́съ ра́дости вѣ́чныѧ наслади́тисѧ, кꙋ́пнѡ со всѣ́ми ст҃ы́ми, во вѣ́ки вѣкѡ́въ. а҆ми́нь.