Акафист святителю Амвросию, епископу Медиоланскому

И҆збра́ннагѡ чꙋдотво́рца и҆ свѣти́льника це́ркве медїола́нскїѧ ст҃а́гѡ а҆мвро́сїѧ, прїиди́те, вѣ́рнїи, почти́мъ по достоѧ́нїю ᲂу҆се́рдною хвало́ю. Ты́ же, ᲂу҆го́дниче бж҃їй млⷭ҇тивый, прїимѝ съ любо́вїю сїѐ приноше́нїе на́ше, да зове́мъ тѝ:

А҆́гг҃льскихъ си́лъ и҆ всеѧ̀ тва́ри содѣ́тель, є҆щѐ ѿ младе́нческихъ пеле́нъ твои́хъ пред̾ꙋказа́вый добро́тꙋ дꙋшѝ твоеѧ̀, ст҃е а҆мвро́сїе, подадѐ тѧ̀, въ во́зрастъ прише́дша, а҆́гг҃ла цр҃кви медїола́нстѣй, па́стырѧ и҆ ᲂу҆чи́телѧ слове́сномꙋ ста́дꙋ своемꙋ̀, и҆ си́мъ наꙋчѝ на́съ зва́ти тебѣ̀ си́це:

Ви́дѧ нбⷭ҇ное промышле́нїе, соверши́вшеесѧ въ чꙋ́днѣмъ призва́нїи твое́мъ ко слꙋже́нїю цр҃кви, премꙋ́дре, посвѧти́лъ є҆сѝ про́чее вре́мѧ житїѧ̀ твоегѡ̀ на ᲂу҆гожде́нїе во́ли бжⷭ҇твеннѣй, и҆ прине́слъ є҆сѝ всегѡ̀ себѐ и҆ всѧ̑ своѧ̑ въ же́ртвꙋ призва́вшемꙋ тѧ̀ гдⷭ҇ꙋ, поѧ̀ є҆мꙋ̀: А҆ллилꙋ́їа.

Ра́зꙋмомъ бг҃опросвѣще́ннымъ, напое́ннымъ же ѿ сло́ва бж҃їѧ, ᲂу҆разꙋмѣ́въ ꙗ҆́кѡ ѡ҆снова́нїе всѣ́хъ добродѣ́телей и҆ сою́зъ соверше́нства дꙋхо́внагѡ любы̀ къ бг҃ꙋ и҆ бли́жнемꙋ є҆́сть, бл҃гоче́стне, потща́лсѧ ꙗ҆ви́ти ю҆̀ въ себѣ̀ не сло́вомъ то́кмо, но дѣ́ломъ и҆ и҆́стиною. Тѣ́мже бѣ́дствꙋющымъ рꙋ́кꙋ ско́рыѧ по́мощи простира́лъ є҆сѝ, и҆мѣ́нїѧ своѧ̑ всѧ̑ ᲂу҆бо́гимъ расточи́лъ є҆сѝ, и҆ та́кѡ наста́вилъ є҆сѝ на́съ зва́ти тебѣ̀ си́це:

Си́лою вы́шнѧгѡ ᲂу҆крѣплѧ́емь, прпⷣбне, трꙋды̀ и҆ скѡ́рби вели́кагѡ слꙋже́нїѧ ст҃и́тельскагѡ на по́льзꙋ цр҃кве медїола́нскїѧ, во сла́вꙋ же гдⷭ҇а і҆и҃са, бл҃годꙋ́шнѡ поне́слъ є҆сѝ, ѡ҆ всѣ́хъ же благословлѧ́лъ є҆сѝ бг҃а, поѧ̀ є҆мꙋ̀: А҆ллилꙋ́їа.

И҆мѣ́ѧ же́злъ си́лы, крѣ́пость є҆ѵⷢ҇льскꙋю, по́сланнꙋю тѝ ѿ сїѡ́на нбⷭ҇нагѡ, ст҃и́телю, госпо́дствовалъ є҆сѝ посредѣ̀ врагѡ́въ твои́хъ и҆ не да́лъ є҆сѝ волкѡ́мъ ходѧ́щимъ во ѻ҆́вчихъ ко́жахъ, въ се́рдцѣ же носѧ́щимъ ꙗ҆́дъ па́гꙋбы, расхи́тити ста́до твоѐ. Тѣ́мже похва́льнаѧ восписꙋ́емъ тѝ сїѧ̑:

Бꙋ́рю крамѡлы̀, воздви́гшꙋюсѧ на це́рковь медїола́нскꙋю, зрѧ̀, а҆мвро́сїе, сладкоглаго́ливою бесѣ́дою твое́ю, содѣ́йствїемъ же бж҃їимъ ᲂу҆тиши́лъ є҆сѝ мѧте́жъ людскі́й, и҆ та́кѡ наꙋчи́лъ є҆сѝ ча́дъ мі́ра пѣ́ти бг҃ꙋ: А҆ллилꙋ́їа.

Слы́ша ѳеодо́сїй ца́рь преще́нїе твоѐ, и҆́мже возбранѧ́шесѧ є҆мꙋ̀ ꙗ҆́кѡ ᲂу҆бі́йце вни́ти въ це́рковь бж҃їю, во є҆́же прїѻбщи́тисѧ та́йнъ ст҃ы́хъ, повинова́сѧ тѝ, ꙗ҆́кѡ грѣ́шникъ смире́ннѡ ка́ющїйсѧ и҆ примире́нїѧ съ гдⷭ҇омъ жа́ждꙋщїй. Тогѡ̀ ра́ди по достоѧ́нїю возглаша́емъ тѝ:

Бг҃оте́чнаѧ ѕвѣзда̀ на тве́рди церко́внѣй бы́лъ є҆сѝ, ѻ҆́тче а҆мвро́сїе, свѣ́тлостїю ᲂу҆че́нїѧ и҆ житїѧ̀ твоегѡ̀ мглꙋ̀ є҆ресе́й разгонѧ́ющаѧ и҆ мра́къ безбо́жїѧ потреблѧ́ющаѧ, невѣ́рныхъ ѿ тмы̀ невѣ́рїѧ къ свѣ́тꙋ невече́рнемꙋ привлача́ющаѧ и҆ всѣ́хъ ко сп҃се́нїю пꙋтеводѧ́щаѧ, пою́щимъ бг҃ꙋ: А҆ллилꙋ́їа.

Ви́дѣвше тѧ̀ медїола́нстїи лю́дїе мꙋ́драгѡ пѣ́стꙋна и҆ любвеѻби́льнагѡ ѻ҆тца̀ па́ствѣ свое́й, ст҃и́телю, притека́хꙋ къ милосе́рдїю твоемꙋ̀ во всѣ́хъ ско́рбѣхъ и҆ нꙋ́ждахъ свои́хъ. Ты́ же, ми́лостиве, никого́же ѿри́нꙋлъ є҆сѝ, но всѣ̑мъ всѧ́къ помо́щникъ бы́лъ є҆сѝ, досто́йный сицевы́хъ похва́лъ:

Проповѣ́дникъ вѣща́ємыхъ тѝ ѿ а҆́гг҃лъ къ ᲂу҆́хꙋ глаго́лѡвъ бж҃їихъ бы́лъ є҆сѝ, ст҃и́телю а҆мвро́сїе, тѣ́мже словеса̀ ᲂу҆́стъ твои́хъ па́че ме́да и҆ со́та ᲂу҆слажда́хꙋ всѣ́хъ послꙋ́шающихъ тебѐ и҆ бг҃ꙋ вопїю́щихъ: А҆ллилꙋ́їа.

Возсїѧ̀ а҆́ки со́лнце свѣ́тъ добродѣ́тельнагѡ житїѧ̀ твоегѡ̀ на землѝ, бг҃омꙋ́дре ѻ҆́тче, въ тебѣ́ бо зри́мъ всѧ̑ є҆ли́ка честна̀, є҆ли́ка пра́ведна, є҆ли́ка пречи́ста. Си́хъ ра́ди сла́вѧще ст҃а́гѡ дх҃а, вино́вника бл҃ги́хъ, ѿ си́лы въ си́лꙋ сщ҃еннота́йнѣ ве́дшагѡ тѧ̀, зове́мъ:

Хотѧ̀ ᲂу҆лꙋчи́ти сп҃се́нїе во мно́зѣ совѣ́тѣ, смиренномꙋ́дре, и҆мѣ́лъ є҆сѝ дрꙋ́га дꙋшѝ твоеѧ̀ пресвѵ́тера состарѣ́вшасѧ и҆ мꙋ́дра, почита́ѧ є҆гѡ̀ ꙗ҆́кѡ ѻ҆тца̀ и҆ съ ни́мъ совѣща́лсѧ ѡ҆ дѣ́лѣхъ свои́хъ: вразꙋмѝ и҆ на́съ твори́ти всѧ̑ съ совѣ́томъ бг҃омꙋ́дрыхъ ѻ҆тцє́въ, да ѡ҆кормле́нїемъ и҆̀хъ сп҃са́еми, пое́мъ бг҃ꙋ: А҆ллилꙋ́їа.

Зна́менїе є҆ѵⷢ҇льскїѧ любвѐ къ бли́жнемꙋ ꙗ҆ви́лъ є҆сѝ, ѻ҆́тче а҆мвро́сїе, є҆гда̀ врагѡ́мъ свои́мъ бл҃готвори́лъ є҆сѝ и҆ со грѣ́шники ка́ющимисѧ го́рькѡ пла́калъ є҆сѝ. Тѣ́мже тѝ ꙗ҆́кѡ непамѧтоѕло́бномꙋ па́стырю и҆ ѻ҆тцꙋ̀, болѣ́зновавшꙋ ѡ҆ сп҃се́нїи дꙋхо́вныхъ ча́дъ твои́хъ, вопїе́мъ:

Стра́нныѧ и҆ ди́вныѧ си́лы пе́рстъ бж҃їй сотворѝ въ житїѝ твое́мъ, ст҃и́телю, є҆гда̀ ᲂу҆мѣ́рша ѻ҆́трока воскресѝ тобо́ю, разсла́бленнꙋю и҆сцѣлѝ, а҆рїа́нина, почита́нїѧ ра́ди ст҃ы́хъ моще́й хꙋли́вшагѡ тѧ̀, бѣ́сꙋ преда̀, безстꙋ́днꙋю женꙋ̀ сїрмі́йскꙋ ᲂу҆ничижи́вшꙋю тѧ̀, ка́рою поразѝ. И҆ кто̀ ѿ слы́шащихъ всѧ̑ сїѧ̑ не просла́витъ ди́внагѡ въ житїѝ твое́мъ бг҃а пѣ́снїю: А҆ллилꙋ́їа.

Ве́сь и҆спо́лненъ бы́въ ре́вности по бз҃ѣ, ѻ҆́тче а҆мвро́сїе, таковꙋ́ю вла́сть над̾ де́моны стѧжа́лъ є҆сѝ, ꙗ҆́кѡ нижѐ къ две́рємъ до́мꙋ твоегѡ̀ прибли́зитисѧ можа́хꙋ: ѻ҆́гнь бо и҆сходѧ́й ѿтꙋ́дꙋ гна́ше и҆̀хъ, ꙗ҆́кѡ пра́хъ, є҆го́же возмета́етъ вѣ́тръ ѿ лица̀ землѝ. Толи́ко стра́шный де́мономъ ᲂу҆го́дниче бж҃їй, ѡ҆градѝ и҆ на́шꙋ не́мощь предста́тельствомъ твои́мъ ѿ гꙋби́тельныхъ стрѣ́лъ и҆̀хъ, да вопїе́мъ тѝ сицєва́ѧ:

Всѐ житїѐ на́ше во ю҆до́ли земна́гѡ стра́нствованїѧ сегѡ̀ и҆спо́лнено безчи́сленныхъ и҆скꙋше́нїй и҆ бѣ́дъ, грѣхѡ́въ и҆ страсте́й, вою́ющихъ на ны̀: ка́кѡ ᲂу҆́бѡ и҆збы́ти возмо́жемъ вѣ́чныхъ мꙋ́къ, ѡ҆каѧ́ннїи, є҆гда̀ пости́гнетъ на́съ сме́рть неꙋмоли́маѧ, а҆́ще не ты̀, ѻ҆́тче, съ наде́ждою на́шею бг҃ома́терїю, предста́тельствовати за ны̀ бꙋ́деши, поѧ̀ бг҃ꙋ: А҆ллилꙋ́їа.

Вѣті̑ѧ многовѣща̑нныѧ ви́димъ тобо́ю посра́млєнныѧ, ст҃и́телю: а҆́рїѧ бо хꙋ́льныхъ послѣ́дователей препре́лъ є҆сѝ, сїмма́ха высокоꙋ́мнагѡ низложи́лъ є҆сѝ, мꙋдрецы̀, и҆̀же ѿ восто́ка, глꙋбино́ю бг҃осло́вїѧ своегѡ̀ ᲂу҆диви́лъ є҆сѝ, и҆ всѧ̑ вѣ̑рныѧ ᲂу҆че́нїемъ и҆́стиннымъ просвѣти́лъ є҆сѝ. Тѣ́мже мо́лимъ тѧ̀: ѡ҆сїѧ́й и҆ на́съ свѣ́томъ бг҃оразꙋ́мїѧ твоегѡ̀, да ѿбѣ́гше скве́рнъ тлѣтво́рнагѡ дꙋ́ха вре́мене и҆ собла́знѡвъ бори́телѧ, вопїе́мъ тѝ:

Сп҃се́нїе соверше́нное ᲂу҆лꙋчи́въ ѿ привре́менныхъ бꙋ́рь и҆ бѣ́дъ, ᲂу҆го́дниче бж҃їй а҆мвро́сїе, не забꙋ́ди на́съ, потоплѧ́емыхъ напа́стей бꙋ́рею. Но въ ни́хже са́мъ и҆скꙋше́нъ бы́лъ є҆сѝ, и҆ на́мъ и҆скꙋша́ємымъ помозѝ, да пое́мъ бг҃ꙋ: А҆ллилꙋ́їа.

Стѣ́нꙋ тѧ̀ тве́рдꙋю и҆ и҆звѣ́стнѡ ᲂу҆твержде́нїе гра́дꙋ твоемꙋ̀ и҆ всѣ̑мъ чтꙋ́щимъ па́мѧть твою̀ и҆сповѣ́дающе, ст҃и́телю, дерза́емъ по достоѧ́нїю воспѣ́ти тебѣ̀ хвале́нїе сїѐ:

Пѣ́снь тебѐ бг҃а хва́лимъ, тебѐ гдⷭ҇а и҆сповѣ́дꙋемъ: па́че всѧ́кагѡ воздꙋ́шнагѡ ѻ҆рга́на ᲂу҆слажда́ющꙋю вѣ́рныхъ, воспѣ́лъ є҆сѝ въ че́сть бжⷭ҇твеннѣй трⷪ҇цѣ, ст҃и́телю. Ны́нѣ же въ цр҃кви нбⷭ҇нѣй пое́ши со а҆́гг҃лы и҆́нꙋ пѣ́снь то́йжде трⷪ҇цѣ: А҆ллилꙋ́їа.

Свѣтопода́тельна свѣти́льника, є҆щѐ на землѝ просїѧ́вша невеще́ственнымъ свѣ́томъ, вѣ́дꙋще тѧ̀, ѻ҆́тче ст҃ы́й, кꙋ́ю досто́йнꙋю похвалꙋ̀ принесе́мъ тѝ грѣ́шнїи, ко́ею пѣ́снїю ᲂу҆бл҃жи́мъ тѧ̀ недосто́йнїи, ѡ҆ ст҃и́телю хрⷭ҇то́въ. Є҆ди́нъ то́кмо свѣ́дый глꙋбины̀ серде́чныѧ и҆ рекі́й: а҆́зъ прославлѧ́ющїѧ мѧ̀ просла́влю, є҆ди́нъ ѻ҆́нъ вѣ́сть, ка́кѡ по достоѧ́нїю просла́вити тѧ̀. Ѻ҆ба́че вѣ́дый, ꙗ҆́кѡ чл҃вѣ́къ, на́шꙋ не́мощь, не ѿри́ни ꙗ҆́кѡ ѻ҆те́цъ ми́лостивый, и҆ на̑ша ᲂу҆бѡ́гїѧ, но ѿ и҆́скреннихъ серде́цъ приноси́мыѧ тѝ хвалы̑ сїѧ̑:

Блгⷣтїю нбⷭ҇нагѡ покро́ва твоегѡ̀ не лишѝ на́съ никогда̀, ѽ ми́лостиве ѻ҆́тче, но при́снѡ моли́сѧ ѡ҆ на́съ къ ще́дромꙋ гдⷭ҇ꙋ, є҆мꙋ́же съ ли́ки ст҃ы́хъ немо́лчнѡ пое́ши: А҆ллилꙋ́їа.

Пою́ще чꙋдеса̀ и҆ по́двиги прпⷣбнагѡ житїѧ̀ твоегѡ̀, ст҃и́телю, сла́вимъ кончи́нꙋ твою̀, є҆́юже ми́рнѡ ѿше́лъ є҆сѝ на нб҃о, и҆ ᲂу҆бл҃жа́емъ соца́рствованїе твоѐ та́мѡ съ бг҃омъ вѣ́чнымъ. Ты́ же, ᲂу҆го́дниче ст҃ы́й, при́зри съ высоты̀ ѻ҆́нагѡ бл҃же́ннагѡ приста́нища твоегѡ̀ на на́съ, пла́вающихъ въ молвѣ̀ жите́йскихъ попече́нїй и҆ къ тебѣ̀, неви́димомꙋ ѡ҆корми́телю на́шемꙋ, и҆з̾ глꙋбины̀ дꙋшѝ вопїю́щихъ:

Ѽ ст҃ы́й и҆ ми́лостивый ᲂу҆го́дниче бж҃їй а҆мвро́сїе. Прїимѝ съ любо́вїю приноси́мое сїѐ ма́лое, но ѿ ᲂу҆се́рдїѧ приноси́мое тебѣ̀ хвале́нїе на́ше, и҆ потщи́сѧ и҆зба́вити на́съ ѿ болѣ́зней дꙋше́вныхъ и҆ тѣле́сныхъ, ѿ всѣ́хъ бѣ́дъ и҆ ѕѡ́лъ, да тобо́ю ᲂу҆лꙋчи́вше црⷭ҇тво нбⷭ҇ное, во вѣ́ки пое́мъ бг҃ꙋ: А҆ллилꙋ́їа.

А҆́гг҃льскихъ си́лъ и҆ всеѧ̀ тва́ри содѣ́тель, є҆щѐ ѿ младе́нческихъ пеле́нъ твои́хъ пред̾ꙋказа́вый добро́тꙋ дꙋшѝ твоеѧ̀, ст҃е а҆мвро́сїе, подадѐ тѧ̀, въ во́зрастъ прише́дша, а҆́гг҃ла цр҃кви медїола́нстѣй, па́стырѧ и҆ ᲂу҆чи́телѧ слове́сномꙋ ста́дꙋ своемꙋ̀, и҆ си́мъ наꙋчѝ на́съ зва́ти тебѣ̀ си́це:

И҆збра́ннагѡ чꙋдотво́рца и҆ свѣти́льника це́ркве медїола́нскїѧ ст҃а́гѡ а҆мвро́сїѧ, прїиди́те, вѣ́рнїи, почти́мъ по достоѧ́нїю ᲂу҆се́рдною хвало́ю. Ты́ же, ᲂу҆го́дниче бж҃їй млⷭ҇тивый, прїимѝ съ любо́вїю сїѐ приноше́нїе на́ше, да зове́мъ тѝ:

Ѽ пресла́вный чꙋдотво́рче, въ ско́рбѣхъ ско́рый помо́щниче и҆ ᲂу҆се́рдный ѡ҆ мі́рѣ къ бг҃ꙋ моли́твенниче, ѻ҆́тче ст҃ы́й а҆мвро́сїе. Вѣ́мы, ꙗ҆́кѡ ве́лїе ко сп҃сꙋ и҆́маши дерзнове́нїе, предстоѧ̀ го́рнемꙋ прⷭ҇то́лꙋ є҆гѡ̀, и҆ сегѡ̀ ра́ди смире́ннѡ припа́даемъ тѝ: моли́сѧ є҆мꙋ̀, ᲂу҆го́дниче бж҃їй, да пода́стъ наро́дꙋ рѡссі́йскомꙋ бл҃годе́нственное и҆ ми́рное житїѐ, да и҆зба́витъ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплеме́нныхъ, ѿ недꙋ́га и҆ гла́да, ѿ всѧ́кїѧ ско́рби и҆ смертоно́сныѧ ꙗ҆́звы и҆ ѿ всѧ́кагѡ ѕла̀: на́мъ же всѣ̑мъ, вѣ́рою пра́зднꙋющымъ ст҃ꙋ́ю па́мѧть твою̀ и҆ ᲂу҆се́рднѡ хода́тайства твоегѡ̀ ча́ющымъ, да ниспо́слетъ всѧ̑ бл҃гопотрє́бнаѧ ко вре́менномꙋ и҆ вѣ́чномꙋ житїю̀ на́шемꙋ, па́че же ѡ҆ставле́нїе грѣхѡ́въ, мі́ръ по́мыслѡвъ, тишинꙋ̀ серде́чнꙋю, здра́вїе дꙋша́мъ и҆ тѣлесе́мъ на́шимъ. Є҆́й, ст҃и́телю бж҃їй, па́стырю хрⷭ҇то́въ ми́лостивѣйшїй, покрови́телю на́шъ гото́вѣйшїй. ᲂу҆слы́ши на́съ, є҆щѐ є҆ди́нагѡ ѿ тебє̀ просѧ́щихъ: бꙋ́ди те́плый моли́твенникъ и҆ предста́тель ко гдⷭ҇ꙋ ѡ҆ дꙋхо́вныхъ па́стырѣхъ и҆ ѻ҆тцѣ́хъ на́шихъ (и҆мена̀), и҆̀же не́мощи на̑ша но́сѧтъ и҆ ѡ҆ на́съ болѣ́знꙋютъ, до́ндеже воѡбрази́тсѧ въ на́съ хрⷭ҇то́съ, да сохрани́тъ ѻ҆́нъ, всебл҃гі́й и҆ всѧ̑ могꙋ́щїй влⷣка, дража́йшїѧ днѝ житїѧ̀ и҆̀хъ въ нерꙋши́момъ ми́рѣ и҆ крѣ́пости си́лъ дꙋхо́вныхъ и҆ тѣле́сныхъ, да приведе́тъ на́съ, недосто́йныхъ рабѡ́въ свои́хъ, и҆̀хъ ѡ҆кормле́нїемъ и҆ моли́твами, твои́мъ же хода́йтайствомъ и҆ застꙋпле́нїемъ ко приста́нищꙋ жи́зни несконча́емыѧ, и҆дѣ́же херꙋві́ми и҆ серафі́ми, ст҃і́и всѝ съ бцⷣею и҆ съ тобо́ю, покрови́телемъ на́шимъ, непреста́нными гла́сы сла́вѧтъ ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ѽ всест҃ы́й а҆мвро́сїе, ᲂу҆го́дниче бж҃їй и҆зрѧ́днѣйшїй, покрови́телю мо́й ми́лостивѣйшїй. При́зри съ высоты̀ го́рнѧгѡ жили́ща твоегѡ̀ на мѧ̀ недосто́йнагѡ, неради́вагѡ, ᲂу҆ны́лагѡ въ настоѧ́щемъ житїѝ се́мъ. Ви́ждь менѐ грѣ́шнагѡ, въ толи́цѣмъ ѡ҆бстоѧ́нїи сꙋ́щагѡ, ᲂу҆мо́мъ помраче́ннагѡ, во́лею ко ѕлꙋ̀ преклоне́ннаго, и҆ се́рдцемъ па́че къ землѝ, не́же къ нб҃сѝ, прилѣпле́ннагѡ. Ви́ждь стра́стное ѡ҆бꙋрева́нїе дꙋшѝ моеѧ̀ и҆ не́мощь и҆ небреже́нїе моѐ. Ви́ждь при се́мъ и҆ кова́рство ѕлонача́льника и҆ гꙋби́телѧ моегѡ̀, ви́ждь, ѽ ст҃и́телю хрⷭ҇то́въ, и҆ ᲂу҆милосе́рдисѧ ѡ҆ мнѣ̀, такова́гѡ ра́ди положе́нїѧ моегѡ̀. Помозѝ мѝ, ѽ застꙋ́пниче мо́й, ско́рымъ предста́тельствомъ твои́мъ. И҆схода́тайствꙋй мѝ ѿ ѻ҆ц҃а̀ щедрѡ́тъ бо́дрость и҆ си́лꙋ, во є҆́же твори́ти во́лю є҆гѡ̀, бл҃гꙋ́ю, ᲂу҆го́днꙋю и҆ соверше́ннꙋю, стра́сти моѧ̑ ᲂу҆мѣртви́ти, де́мѡна низложи́ти, мі́ръ себѐ распѧ́ти и҆ себѐ мі́рꙋ, и҆ та́кѡ дости́гнꙋти хрⷭ҇тїа́нскїѧ кончи́ны живота̀ своегѡ̀, безболѣ́зненны, непосты́дны, ми́рны. По и҆схо́дѣ же притре́петныѧ дꙋшѝ моеѧ̀ ѿ ѡ҆каѧ́ннагѡ и҆ бре́ннагѡ тѣлесѐ сегѡ̀, бꙋ́ди є҆́й а҆́гг҃лъ покрови́тель, до́бръ спꙋ́тникъ, вѣ́ренъ храни́тель и҆ защи́тникъ ѿ лю́тыхъ нападе́нїй нача́льника воздꙋ́шныхъ мыта́рствъ, да безбѣ́днѡ преше́дъ ѻ҆́ныѧ, си́лою предста́тельства твоегѡ̀, сподо́блюсѧ про́чее и҆ а҆́зъ, послѣ́днїй и҆з̾ всѣ́хъ, и҆̀же въ ца́рствѣ бл҃года́ти, ᲂу҆зрѣ́ти сладча́йшее лицѐ гдⷭ҇а на́шегѡ и҆ сла́вити є҆гѡ̀ со ѻ҆ц҃е́мъ и҆ ст҃ы́мъ дх҃омъ, и҆ твоѐ ми́лостивное ѡ҆ мнѣ̀ предста́тельство, во вѣ́ки вѣкѡ́въ. А҆ми́нь.