Акафист святому равноапостольному Николаю, архиепископу Японскому
Текст утвержден Священным Синодом Русской Православной Церкви 11 марта 2020 года (журнал № 22).
Память: 16 февраля (03 февраля ст. ст.)
Утвержден для общецерковного использования.
Конда́к 1.
Избра́нный от родо́в ру́сских на благове́стие Христо́во в стране́ Япо́нской, ду́шу твою́ полага́л еси́ за о́вцы твоя́, утвержда́я и́х в ве́ре и́стинней. Те́мже по́двиги твоя́ почита́юще, хва́лим тя́:
Ра́дуйся, святы́й равноапо́стольный Нико́лае, земли́ Япо́нския просвети́телю.
И́кос 1.
А́нгел, я́коже Тови́и иногда́, спутеше́ствова тебе́, о́тче Нико́лае, егда́ в млада́я ле́та твоя́ напра́вил еси́ стопы́ в страну́, дале́че отстоя́щую, да просвети́ши лю́ди, во тьме́ неве́дения седя́щия, све́том Ева́нгелия Христо́ва. Сего́ ра́ди вопие́м ти́ си́це:
Ра́дуйся, Смоле́нския земли́ сла́вное рожде́ние; ра́дуйся, от младе́нства хра́м Бо́жий возлюби́вый.
Ра́дуйся, в сиротстве́ Богома́терию Одиги́триею не оста́вленный; ра́дуйся, духо́вными уче́ньми умудре́нный.
Ра́дуйся, на бде́нии всено́щнем призва́ние на тру́д апо́стольский прие́мый; ра́дуйся, сла́дость ми́ра ни во что́же вмени́вый.
Ра́дуйся, чи́на а́нгельскаго и са́на свяще́ннаго удосто́енный; ра́дуйся, к неве́дящим спасе́ния ми́лости испо́лненный.
Ра́дуйся, пропове́дати Ева́нгелие вожделе́вый; ра́дуйся, и да́льних я́ко бли́жних возлюби́вый.
Ра́дуйся, гоне́ния за ве́ру не страши́выйся; ра́дуйся, ко́зней вра́жиих не убоя́выйся.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 2.
Ви́дя по́двиги святи́теля Инноке́нтия, богому́драго просвети́теля Сиби́рскаго и Алеу́тскаго, и от того́ благослове́ние и наставле́ние на пу́ть сво́й прие́м, поревнова́л еси́ ему́, сло́во Бо́жие лю́дем непросвеще́нным неуста́нно пропове́дуя и Го́сподеви поя́: Аллилу́иа.
И́кос 2.
Ра́зум во смире́нии яви́л еси́, свя́тче, Го́споду моля́ся о е́же прия́ти я́сное разуме́ние язы́ка япо́нскаго: «Ка́ко пропове́даю наро́ду чужде́му? Ка́ко отве́рзу уста́ неиску́сная, а́ще не Са́м Ты́ наста́виши мя́?» Мы́ же, дивя́щеся, ка́ко ты́ словесы́ богодохнове́нными па́ству твою́ свои́м е́й наре́чием поуча́л еси́, восхваля́ем тя́:
Ра́дуйся, любо́вию Христо́вою вся́ побежда́вый; ра́дуйся, духо́вныя младе́нцы словесы́ Ева́нгельскими пита́вый.
Ра́дуйся, вражду́ющия в ча́да любо́вию претвори́вый; ра́дуйся, те́х грехи́ креще́нием омы́вый.
Ра́дуйся, уче́ньми неуста́нными ве́ру укрепля́вый; ра́дуйся, наста́вник рачи́тельный и до́брый яви́выйся.
Ра́дуйся, пресви́теров япо́нских поста́вивый; ра́дуйся, церко́вный чи́н устро́ивый.
Ра́дуйся, о стране́ Япо́нской моли́твенниче; ра́дуйся, согла́сия бра́тскаго побо́рниче.
Ра́дуйся, свети́льниче ве́ры правосла́вныя; ра́дуйся, сокро́вище кро́тости духо́вныя.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 3.
Си́ла Вы́шняго осени́ и укрепи́ тя́, о́тче, егда́ прише́л еси́ в страну́ язы́ческую, сме́рти ча́да своя́ предаю́щую за прия́тие благове́стия Христо́ва. Ты́ же, в земли́ се́й прозрева́я ни́ву Бо́жию, воспева́л еси́ Спаси́телю: Аллилу́иа.
И́кос 3.
Име́яй любо́вь нелицеме́рную, ча́ял еси́ страну́ Япо́нскую бы́ти неве́сту укра́шенную, Жениха́ Христа́ на бра́к ожида́ющую, оба́че срето́ша тя́ наро́ди, про́поведи Ева́нгельския чужда́ющиися. Те́мже почита́юще по́двиг апо́стольства твоего́ в земли́ се́й, прославля́ем тя́:
Ра́дуйся, се́ятелю сло́ва Бо́жия неле́ностный и ще́дрый; ра́дуйся, всемогу́щею си́лою Креста́ Госпо́дня укрепле́нный.
Ра́дуйся, сто́лпе ве́ры и благоче́стия непоколеби́мый; ра́дуйся, па́стырю небоя́зненный и чадолюби́вый.
Ра́дуйся, ра́зум имы́й богопросвеще́нный; ра́дуйся, пропове́дниче неумолка́ющий.
Ра́дуйся, в послуша́нии во́ли Бо́жией утверди́выйся; ра́дуйся, помо́щника кре́пка себе́ Бо́га стяжа́вый.
Ра́дуйся, испове́дников соприча́стниче; ра́дуйся, ве́рный о на́с моли́твенниче.
Ра́дуйся, скорбя́щих ми́лостивый уте́шителю; ра́дуйся, по за́поведи Госпо́дни враги́ своя́ люби́вый.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 4.
Бу́рю лю́тую воздвиго́ша на правосла́вных христиа́н служи́телие и́дольстии, зре́ти не терпя́щии числа́ ве́рных умножа́емаго и Це́ркве Христо́вы созида́ющияся. Ты́ же, ра́дуяся му́жеству и терпе́нию ча́д твои́х, в темни́цах заключе́нных, ку́пно с ни́ми возглаша́л еси́ Бо́гови: Аллилу́иа.
И́кос 4.
Слы́шаще, я́ко уче́ние Христо́во вся́ наро́ды объе́млет и прие́млет и́х равноче́стно, и я́ко оби́тели ве́рным мно́ги на Небесе́х Госпо́дь угото́ва, притека́ху к тебе́, па́стырю до́брый, му́жие и жены́, о́троцы и ста́рцы; те́мже и мы́ возглаша́ем ти́:
Ра́дуйся, ма́лое ста́до Христо́во собра́вый; ра́дуйся, те́сным путе́м к Бо́гу его́ приведы́й.
Ра́дуйся, Аки́ле и Приски́лле подража́ти ве́рныя научи́вый; ра́дуйся, це́ркви дома́шния утверди́вый.
Ра́дуйся, о́бщия трапе́зы благослови́вый; ра́дуйся, ча́да в беда́х николи́же оставля́вый.
Ра́дуйся, кре́пким в ве́ре немощны́я вруча́вый; ра́дуйся, изнемога́ющих оте́ческою дла́нию держа́вый.
Ра́дуйся, му́дро на ни́ве Христо́вой се́явый; ра́дуйся, Це́рковь на ка́мени тве́рдем стро́ивый.
Ра́дуйся, ра́бе усе́рдный, вруче́ннаго тала́нта не сокры́вый; ра́дуйся, разсужде́ние духо́вное оби́льне яви́вый.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 5.
Боготе́чная звезда́ яви́лся еси́, о́тче, Со́лнцу Пра́вды Христу́ служа́ ре́вностне и ко Го́споду приводя́ ве́рных, я́коже дре́вле звезда́ Вифлее́мская. Егда́ же возведе́н бы́л еси́ в са́н архиере́йский, благода́ть сугу́бую Це́рковь Бо́жию устроя́ти и ду́ши челове́ческия просвеща́ти прия́л еси́. Светоно́сною же моли́твою твое́ю и мы́ осеня́емии, вопие́м Христу́: Аллилу́иа.
И́кос 5.
Ви́дя ка́пища и́дольская, со слеза́ми моля́шеся святы́й: «Где́ сози́жду це́рковь Тебе́, Го́споди?» – и бы́сть услы́шана моли́тва его́. Чу́дный хра́м Воскресе́ния Христо́ва во гра́де То́кио труды́ мно́гими и по́мощию люде́й ру́сских воздви́жеся. Сего́ ра́ди и мы́ богоно́сному святи́телю, в его́же па́мять доны́не хра́м то́й Никола́й-до нарица́ется, возно́сим похвалы́ таковы́я:
Ра́дуйся, я́ко еле́нь на исто́чники водны́я, к Боже́ственней Трапе́зе притека́вый; ра́дуйся, собо́р Воскре́сения Христо́ва и други́я хра́мы возведы́й.
Ра́дуйся, Кре́ст над гра́дом сто́льным утверди́вый; ра́дуйся, зво́н кампа́нный до небесе́ вознесы́й.
Ра́дуйся, пла́мень гоне́ния на христиа́н угаси́вый; ра́дуйся, почита́ние премно́гое в лю́дех япо́нских стяжа́вый.
Ра́дуйся, благи́м обы́чаем не возбрани́вый; ра́дуйся, дру́га и бра́та в наро́де япо́нском обреты́й.
Ра́дуйся, Бо́гом по́сланный просвети́телю; ра́дуйся, ве́рный Госпо́день домоправи́телю.
Ра́дуйся, ны́не увенча́нный сла́вою Небе́сною; ра́дуйся, торжеству́яй ди́вно си́лою Кре́стною.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 6,
Пропове́дницы свята́го Ева́нгелия ра́дуются в Го́рних черто́зех, прие́млюще тя́, я́коже собра́та. Мы́ же, сро́дницы твои́, в прославле́нии твое́м ми́лость Бо́жию к на́м гре́шным зря́ще ве́лию, Бо́гу воспева́ем: Аллилу́иа.
И́кос 6.
Возсия́л еси́ я́ко звезда́ но́вая, о́тче Нико́лае, от земли́ Смоле́нския да́же до страны́ Япо́нския доше́д, и апо́стольскими труды́ ди́вным ру́сским святы́м уподо́бився: Влади́миру равноапо́стольному, Стефа́ну Перми́ просвети́телю, Инноке́нтию Ирку́тскому и Ге́рману Аля́скинскому, и́же су́ть Це́ркви на́шей боже́ственное сия́ние. Мы́ же, вели́кия ра́дости испо́лнени, в ли́це се́м прославля́ем тя́, но́ваго Бо́жия уго́дника:
Ра́дуйся, диа́кона благочести́ваго до́брый сы́не; ра́дуйся, нищету́ смире́нно претерпе́вый.
Ра́дуйся, обе́т нестяжа́ния Бо́гу принесы́й; ра́дуйся, обеща́ния и́ноческая да́же до сме́рти соблюды́й.
Ра́дуйся, архипа́стырю, в ри́зы ве́тхия облече́нный; ра́дуйся, во убо́гих ке́лиях пожи́вый.
Ра́дуйся, в ми́ре живы́й, оба́че мирска́я презре́вый; ра́дуйся, до преде́лов зело́ да́льних доше́дый.
Ра́дуйся, му́дрый наста́вниче новопросвеще́нных; ра́дуйся, попечи́телю о рыбака́х а́йнских.
Ра́дуйся, сподви́жников себе́ во учи́лищех возрасти́вый; ра́дуйся, вертогра́д в земли́ Япо́нской насади́вый.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 7.
Хотя́й Це́ркви Япо́нской па́стырей до́брых и миря́н ве́рных возрасти́ти, о́тче Нико́лае, устроя́л еси́ шко́лы и учи́лища духо́вная, и собра́л еси́ наста́вников прему́дрых, и пе́ние церко́вное до́бре учини́л еси́, во е́же па́стве мно́гой вы́ну с тобо́ю пе́ти: Аллилу́иа.
И́кос 7.
Но́вое яви́ся торжество́ во гра́де То́кио, егда́ соверша́ше святи́тель пра́зднование Воскресе́ния Христо́ва в хра́ме собо́рнем, тогда́ ви́деша лю́дие япо́нстии Па́сху Бо́жию спаси́тельную. Мы́ же, доброде́телем твои́м, о́тче Нико́лае, дивя́щеся, вопие́м велегла́сно:
Ра́дуйся, устрои́телю церко́внаго пи́ра честне́йший; ра́дуйся, в ве́це жесто́цем любо́вь Христо́ву сохра́нший.
Ра́дуйся, на вся́к де́нь и ча́с спасе́ния ра́ди бли́жних подвиза́выйся; ра́дуйся, неле́ностне ве́рныя посеща́вый и наставля́вый.
Ра́дуйся, в преложе́нии свяще́нных кни́г да́же до кончи́ны труди́выйся; ра́дуйся, благода́ть Бо́жию в де́лании непреста́ннем стяжа́вый.
Ра́дуйся, про́поведию зерно́ горчи́чное насади́вый; ра́дуйся, дре́во прекра́сное ве́ры возрасти́вый.
Ра́дуйся, плоды́ трудо́в свои́х при исхо́де узре́вый; ра́дуйся, дре́во сие́ многопло́дное на́м завеща́вый.
Ра́дуйся, и по кончи́не неве́дущия к Бо́гу приводя́й; ра́дуйся, пребыва́яй ны́не со все́ми святы́ми в раи́ Иису́сове.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 8.
Стра́нная и чу́дная ви́деша лю́дие, егда́ христиа́не япо́нстии во́ином ру́сским плене́нным бра́тски служа́ху и вся́кое милосе́рдие те́м явля́ху. Мы́ же, плодо́м любве́ Христо́вы в новопросвеще́нных ча́дех Це́ркве Япо́нския дивя́щеся, Го́споду пе́снь воспои́м: Аллилу́иа.
И́кос 8.
Всего́ себе́ преда́л еси́ на служе́ние Бо́гу, равноапо́стольне Нико́лае, и лю́дем та́кожде о Го́споде служа́ непреста́нно, обоя́ запове́данная прему́дре испо́лнил еси́. Те́мже тебе́, ца́рским путе́м доброде́телей проше́дшему, умиле́нно воспева́ем:
Ра́дуйся, Бо́жий усе́рдный служи́телю; ра́дуйся, плене́нных ру́сских во́инов попечи́телю.
Ра́дуйся, Безкро́вную Же́ртву за лю́ди твоя́ приноси́вый; ра́дуйся, ду́ши смуще́нныя умири́вый.
Ра́дуйся, па́ству твою́ в тя́жкия дни́ бра́ни не оста́вивый; ра́дуйся, ду́шу свою́ за па́ству полага́вый.
Ра́дуйся, ми́лости и му́жества наста́вниче; ра́дуйся, отве́рженных ти́хое приста́нище.
Ра́дуйся, сокро́вище смире́ния; ра́дуйся, о́бразе покая́ния.
Ра́дуйся, ве́ро непосты́дная; ра́дуйся, любо́вь непобеди́мая.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 9.
Вся́кое дре́во по плода́м познае́тся, пло́д же трудо́в твои́х ве́лиих е́сть спасе́ние люде́й премно́гих. Яви́ша бо ся мно́гия ты́сящи правосла́вных христиа́н та́мо, иде́же пре́жде не бе́ ни еди́наго. Сего́ ра́ди возопии́м наста́вльшему тя́ на пропове́дание твое́ Го́споду: Аллилу́иа.
И́кос 9.
Вети́и многовеща́ннии подвиго́м твои́м изумля́ются, А́нгели с тобо́ю ликовству́ют, мы́ же, разуме́юще смире́нное и подви́жническое житие́ твое́, духо́вную бра́нь проти́ву ми́ра, пло́ти и диа́вола непреста́нную, и терпе́ние премно́гое, хва́лим тя́ си́це:
Ра́дуйся, не дре́вле, но в после́дняя времена́ подвиза́выйся; ра́дуйся, лю́тую бра́нь уны́ния победи́вый.
Ра́дуйся, Христа́ безстра́шное испове́дание; ра́дуйся, безбо́жия, язы́чества и ересе́й посрамле́ние.
Ра́дуйся, о́бразе архипа́стыря правосла́внаго; ра́дуйся, исто́чниче ве́дения духо́внаго.
Ра́дуйся, нераде́ния на́шего обличе́ние; ра́дуйся, во бране́х духо́вных укрепле́ние.
Ра́дуйся, моле́ния оте́чески прие́мляй; ра́дуйся, проше́ния на́ша исполня́яй.
Ра́дуйся, безсме́ртныя ра́дости испо́лненный; ра́дуйся, воздая́нием мно́гим обогаще́нный.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 10.
Спасти́ всеусе́рдно тща́лся еси́ лю́ди отча́янныя, И́стиннаго Бо́га не ве́дущия. И вся́кому вопроша́ющему, прему́дрому и некни́жному, я́сный отве́т о твое́м упова́нии возвеща́л еси́. Ны́не же, в се́ни сме́ртней све́т узре́вшая, ча́да твоя́ со все́ю Це́рковию вопию́т: Аллилу́иа.
И́кос 10.
«Стена́ неруши́ма бу́ди ча́дом Це́ркве но́выя, о Пресвята́я Де́во Богоро́дице!» – те́пле моля́шеся святи́тель. Пребыва́ше бо Це́рковь Япо́нская посреде́ инове́рия. Мы́ же, зря́ще ны́не кре́пость и ве́рность христиа́н япо́нских, пое́м богому́дрому па́стырю си́це:
Ра́дуйся, па́ствы твоея́ моли́твенный покро́ве; ра́дуйся, Го́споду и Ма́тери Его́ сию́ вруча́яй.
Ра́дуйся, отроко́в и отрокови́ц моли́тися научи́вый; ра́дуйся, высоту́ целому́дрия ю́ным изъясни́вый.
Ра́дуйся, бра́ки честны́я соверша́вый; ра́дуйся, градо́м и ве́сем ми́р приноси́вый.
Ра́дуйся, ста́рцу отцу́ до кончи́ны помога́вый; ра́дуйся, во все́х ну́ждах упова́ние на Бо́га возлага́вый.
Ра́дуйся, хитросплете́ния злове́рных разруши́вый; ра́дуйся, хле́бом Сло́ва Бо́жия па́ству твою́ насы́тивый.
Ра́дуйся, ду́шу за лю́ди япо́нския полага́вый; ра́дуйся, успе́нием твои́м ча́да радостопеча́лия испо́лнивый.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 11.
Пе́ние надгро́бное мно́гажды соверша́шеся, и сле́зы мно́гия пролива́шася, егда́ почи́ святи́тель Бо́жий, испо́лнив ле́та до́лга и до дне́ после́дняго не оста́вив трудо́в и попече́ний о возлю́бленней па́стве свое́й. Оба́че благода́тию Боже́ственною утеша́емии, воспева́ша ча́да твоя́, о́тче Нико́лае, Го́сподеви: Аллилу́иа.
И́кос 11.
Све́тло Це́рковь Япо́нская прия́т благове́стие на наре́чии свое́м от тебе́, просвети́телю и́стинный, уподо́бился бо еси́ вселе́нским учи́телем, преложи́в Свяще́нное Писа́ние и слу́жбу Боже́ственную на язы́к япо́нский, избира́я пи́сьмена и начерта́ния, прему́дрым и просты́м поня́тная. Те́мже почита́юще доброде́лание твое́, хва́лим тя́ си́це:
Ра́дуйся, та́йны Свяще́ннаго Писа́ния пости́гнувый; ра́дуйся, па́стве япо́нской сия́ изъясни́вый.
Ра́дуйся, от собо́рнаго ра́зума Церко́внаго ника́коже отступи́вый; ра́дуйся, удобоприя́тны твоя́ глаго́лы твори́вый.
Ра́дуйся, в преложе́ниих рече́ния я́сная избира́вый; ра́дуйся, ло́жная и ле́стная отмета́вый.
Ра́дуйся, слу́жбу свяще́нную на язы́це Япо́нском но́вей Це́ркви дарова́вый; ра́дуйся, наро́д япо́нский я́ко бра́тий до конца́ возлюби́вый.
Ра́дуйся, смири́вый го́рдость мудрецо́в лжеиме́нных; ра́дуйся, возлюби́вый кро́тких и смире́нных.
Ра́дуйся, па́ству духо́вным ме́дом и млеко́м пита́вый; ра́дуйся, блаже́нне от трудо́в твои́х премно́гих почи́вый.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 12.
Благода́ть Боже́ственная яви́ся я́сно в дея́ниих твои́х, апо́стольским ра́вных, свяще́нне Нико́лае, в любви́ твое́й, самоотверже́нии духо́вных ча́д твои́х ра́ди и в попече́ниих о стра́ждущих. Наипа́че же Це́рковь Япо́нская доны́не свя́тость твою́ возвеща́ет, с не́юже ку́пно и мы́ воспева́ем Го́споду: Аллилу́иа.
И́кос 12.
Пою́ще ра́достно в ли́це ру́сских святы́х твое́ прославле́ние и равноапо́стольным именова́ние, сро́дниче на́ш и па́стырю, со все́ю Це́рковию Правосла́вною взыва́ем ти́ си́це:
Ра́дуйся, Святы́я Це́ркве украше́ние; ра́дуйся, все́х притека́ющих к тебе́ утеше́ние.
Ра́дуйся, пра́вых сужде́ний свято́е зерца́ло; ра́дуйся, страда́ний ди́вное врачева́ние.
Ра́дуйся, подвиза́ющихся сподви́жниче; ра́дуйся, нестрое́ния вся́кая исправля́яй.
Ра́дуйся, ча́д твои́х в ра́йских оби́телех обрета́яй; ра́дуйся, помина́ющих тя́ помина́яй.
Ра́дуйся, све́том невече́рним вся́ озаря́яй; ра́дуйся, звездо́, от За́пада до Восто́ка просия́вшая.
Ра́дуйся, любве́ Бо́жия пропове́дниче; ра́дуйся, во вся́ких напа́стех моля́щимся тебе́ ско́рый помо́щниче.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 13.
О пресла́вный просвети́телю страны́ Япо́нския, при́сный моли́твенниче на́ш пред Го́сподем, равноапо́стольне Нико́лае! Приими́ ны́нешнее на́ше приноше́ние и умоли́ Спаси́теля Бо́га, да утверди́т в ве́ре и благоче́стии лю́ди правосла́вныя, и изба́вит на́с от вся́ких напа́стей, бе́д и скорбе́й, враго́в ви́димых и неви́димых, и пода́ст грехо́в оставле́ние, и ве́чных му́к избавле́ние, и Ца́рствия Небе́снаго сподо́бит, да ку́пно с тобо́ю и все́ми святы́ми Тро́ице Святе́й во ве́ки веко́в пое́м: Аллилу́иа.
Этот конда́к читается трижды, затем и́кос 1-й, и конда́к 1-й.
И́кос 1.
А́нгел, я́коже Тови́и иногда́, спутеше́ствова тебе́, о́тче Нико́лае, егда́ в млада́я ле́та твоя́ напра́вил еси́ стопы́ в страну́, дале́че отстоя́щую, да просвети́ши лю́ди, во тьме́ неве́дения седя́щия, све́том Ева́нгелия Христо́ва. Сего́ ра́ди вопие́м ти́ си́це:
Ра́дуйся, Смоле́нския земли́ сла́вное рожде́ние; ра́дуйся, от младе́нства хра́м Бо́жий возлюби́вый.
Ра́дуйся, в сиротстве́ Богома́терию Одиги́триею не оста́вленный; ра́дуйся, духо́вными уче́ньми умудре́нный.
Ра́дуйся, на бде́нии всено́щнем призва́ние на тру́д апо́стольский прие́мый; ра́дуйся, сла́дость ми́ра ни во что́же вмени́вый.
Ра́дуйся, чи́на а́нгельскаго и са́на свяще́ннаго удосто́енный; ра́дуйся, к неве́дящим спасе́ния ми́лости испо́лненный.
Ра́дуйся, пропове́дати Ева́нгелие вожделе́вый; ра́дуйся, и да́льних я́ко бли́жних возлюби́вый.
Ра́дуйся, гоне́ния за ве́ру не страши́выйся; ра́дуйся, ко́зней вра́жиих не убоя́выйся.
Ра́дуйся, святы́й равноапо́стольный Нико́лае, земли́ Япо́нския просвети́телю.
Конда́к 1.
Избра́нный от родо́в ру́сских на благове́стие Христо́во в стране́ Япо́нской, ду́шу твою́ полага́л еси́ за о́вцы твоя́, утвержда́я и́х в ве́ре и́стинней. Те́мже по́двиги твоя́ почита́юще, хва́лим тя́:
Ра́дуйся, святы́й равноапо́стольный Нико́лае, земли́ Япо́нския просвети́телю.
Моли́тва.
Свя́тче Бо́жий, па́стырю до́брый, де́лателю ве́рный виногра́да Христо́ва, равноапо́стольне Нико́лае! При́зри на гра́д се́й и на лю́ди сия́, моли́ Христа́ Бо́га, да сохрани́т па́ству твою́ от волко́в губя́щих ю́, да низпо́слет на́м Ду́ха Своего́ Свята́го да́р, во е́же умудри́ти на́с ходи́ти пред Ни́м во вся́ком благоче́стии и чистоте́ во вся́ дни́ жи́зни на́шея: да славосло́вяще и́мя Его́ всесвято́е во дни́ и но́щи, сподо́бимся бы́ти насле́дницы жи́зни ве́чныя, и просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
А҆ка́ѳїстъ ст҃о́мꙋ равноапⷭ҇льномꙋ нїкола́ю, а҆рхїепⷭ҇кпꙋ ꙗ҆по́нскомꙋ.
Конда́къ а҃.
И҆збра́нный ѿ родѡ́въ рꙋ́сскихъ на бл҃говѣ́стїе хрⷭ҇то́во въ странѣ̀ ꙗ҆по́нской, дꙋ́шꙋ твою̀ полага́лъ є҆сѝ за ѻ҆́вцы твоѧ̑, ᲂу҆твержда́ѧ и҆̀хъ въ вѣ́рѣ и҆́стиннѣй. Тѣ́мже по́двиги твоѧ̑ почита́юще, хва́лимъ тѧ̀:
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
І҆́косъ а҃.
А҆́гг҃лъ, ꙗ҆́коже тѡві́и и҆ногда̀, спꙋтеше́ствова тебѣ̀, ѻ҆́тче нїко́лае, є҆гда̀ въ млада̑ѧ лѣ̑та твоѧ̑ напра́вилъ є҆сѝ стѡпы̀ въ странꙋ̀, дале́че ѿстоѧ́щꙋю, да просвѣти́ши лю́ди, во тьмѣ̀ невѣ́дѣнїѧ сѣдѧ́щыѧ, свѣ́томъ є҆ѵⷢ҇лїа хрⷭ҇то́ва. Сегѡ̀ ра́ди вопїе́мъ тѝ си́це:
Ра́дꙋйсѧ, смоле́нскїѧ землѝ сла́вное рожде́нїе: ра́дꙋйсѧ, ѿ младе́нства хра́мъ бж҃їй возлюби́вый.
Ра́дꙋйсѧ, въ сиротствѣ̀ бг҃омт҃рїю ѻ҆диги́трїею не ѡ҆ста́вленный: ра́дꙋйсѧ, дх҃о́вными ᲂу҆че́ньми ᲂу҆мꙋдре́нный.
Ра́дꙋйсѧ, на бдѣ́нїи всено́щнѣмъ призва́нїе на трꙋ́дъ а҆пⷭ҇льскїй прїе́мый: ра́дꙋйсѧ, сла́дость мі́ра нивочто́же вмѣни́вый.
Ра́дꙋйсѧ, чи́на а҆́гг҃льскагѡ и҆ са́на сщ҃е́ннагѡ ᲂу҆досто́енный: ра́дꙋйсѧ, къ невѣ́дѧщымъ сп҃се́нїѧ млⷭ҇ти и҆спо́лненный.
Ра́дꙋйсѧ, проповѣ́дати є҆ѵⷢ҇лїе вожделѣ́вый: ра́дꙋйсѧ, и҆ да́льнихъ ꙗ҆́кѡ бли́жнихъ возлюби́вый.
Ра́дꙋйсѧ, гоне́нїѧ за вѣ́рꙋ не страши́выйсѧ: ра́дꙋйсѧ, ко́зней вра́жїихъ не ᲂу҆боѧ́выйсѧ.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ в҃.
Ви́дѧ по́двиги ст҃и́телѧ і҆нноке́нтїа, бг҃омꙋ́драгѡ просвѣти́телѧ сиби́рскагѡ и҆ а҆леꙋ́тскагѡ, и҆ ѿ тогѡ̀ бл҃гослове́нїе и҆ наставле́нїе на пꙋ́ть сво́й прїе́мъ, поревнова́лъ є҆сѝ є҆мꙋ̀, сло́во бж҃їе лю́демъ непросвѣщє́ннымъ неꙋста́ннѡ проповѣ́дꙋѧ и҆ гдⷭ҇еви поѧ̀: А҆ллилꙋ́їа.
І҆́косъ в҃.
Ра́зꙋмъ во смире́нїи ꙗ҆ви́лъ є҆сѝ, ст҃че, гдⷭ҇ꙋ молѧ́сѧ ѡ҆ є҆́же прїѧ́ти ꙗ҆́сное разꙋмѣ́нїе ѧ҆зы́ка ꙗ҆по́нскагѡ: ка́кѡ проповѣ́даю наро́дꙋ чꙋжде́мꙋ; ка́кѡ ѿве́рзꙋ ᲂу҆ста̀ неискꙋ̑снаѧ, а҆́ще не са́мъ ты̀ наста́виши мѧ̀; Мы́ же дивѧ́щесѧ, ка́кѡ ты̀ словесы̀ бг҃одохнове́нными па́ствꙋ твою̀ свои́мъ є҆́й нарѣ́чїемъ поꙋча́лъ є҆сѝ, восхвалѧ́емъ тѧ̀:
Ра́дꙋйсѧ, любо́вїю хрⷭ҇то́вою всѧ̑ побѣжда́вый: ра́дꙋйсѧ, дꙋхѡ́вныѧ младе́нцы словесы̀ є҆ѵⷢ҇льскими пита́вый.
Ра́дꙋйсѧ, враждꙋ́ющыѧ въ ча̑да любо́вїю претвори́вый: ра́дꙋйсѧ, тѣ́хъ грѣхѝ кр҃ще́нїемъ ѡ҆мы́вый.
Ра́дꙋйсѧ, ᲂу҆че́ньми неꙋста́нными вѣ́рꙋ ᲂу҆крѣплѧ́вый: ра́дꙋйсѧ, наста́вникъ рачи́тельный и҆ до́брый ꙗ҆ви́выйсѧ.
Ра́дꙋйсѧ, пресвѵ́терѡвъ ꙗ҆по́нскихъ поста́вивый: ра́дꙋйсѧ, цр҃ко́вный чи́нъ ᲂу҆стро́ивый.
Ра́дꙋйсѧ, ѡ҆ странѣ̀ ꙗ҆по́нской мл҃твенниче: ра́дꙋйсѧ, согла́сїѧ бра́тскагѡ побо́рниче.
Ра́дꙋйсѧ, свѣти́льниче вѣ́ры правосла́вныѧ: ра́дꙋйсѧ, сокро́вище кро́тости дꙋхо́вныѧ.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ г҃.
Си́ла вы́шнѧгѡ ѡ҆сѣнѝ и҆ ᲂу҆крѣпѝ тѧ̀, ѻ҆́тче, є҆гда̀ прише́лъ є҆сѝ въ странꙋ̀ ꙗ҆зы́ческꙋю, сме́рти ча̑да своѧ̑ предаю́щꙋю за прїѧ́тїе бл҃говѣ́стїѧ хрⷭ҇то́ва. Ты́ же въ землѝ се́й прозрѣва́ѧ ни́вꙋ бж҃їю, воспѣва́лъ є҆сѝ сп҃си́телю: А҆ллилꙋ́їа.
І҆́косъ г҃.
И҆мѣ́ѧй любо́вь нелицемѣ́рнꙋю, ча́ѧлъ є҆сѝ странꙋ̀ ꙗ҆по́нскꙋю бы́ти невѣ́стꙋ ᲂу҆кра́шеннꙋю, жениха̀ хрⷭ҇та̀ на бра́къ ѡ҆жида́ющꙋю, ѻ҆ба́че срѣто́ша тѧ̀ наро́ди, про́повѣди є҆ѵⷢ҇льскїѧ чꙋжда́ющїисѧ. Тѣ́мже почита́юще по́двигъ а҆пⷭ҇льства твоегѡ̀ въ землѝ се́й, прославлѧ́емъ тѧ̀:
Ра́дꙋйсѧ, сѣ́ѧтелю сло́ва бж҃їѧ нелѣ́ностный и҆ ще́дрый: ра́дꙋйсѧ, всемогꙋ́щею си́лою крⷭ҇та̀ гдⷭ҇нѧ ᲂу҆крѣпле́нный.
Ра́дꙋйсѧ, сто́лпе вѣ́ры и҆ бл҃гоче́стїѧ непоколеби́мый: ра́дꙋйсѧ, па́стырю небоѧ́зненный и҆ чадолюби́вый.
Ра́дꙋйсѧ, ра́зꙋмъ и҆мы́й бг҃опросвѣще́нный: ра́дꙋйсѧ, проповѣ́дниче неꙋмолка́ющїй.
Ра́дꙋйсѧ, въ послꙋша́нїи во́ли бж҃їей ᲂу҆тверди́выйсѧ: ра́дꙋйсѧ, помо́щника крѣ́пка себѣ̀ бг҃а стѧжа́вый.
Ра́дꙋйсѧ, и҆сповѣ́дникѡвъ соприча́стниче: ра́дꙋйсѧ, вѣ́рный ѡ҆ на́съ мл҃твенниче.
Ра́дꙋйсѧ, скорбѧ́щихъ млⷭ҇тивый ᲂу҆тѣ́шителю: ра́дꙋйсѧ, по за́повѣди гдⷭ҇ни врагѝ своѧ̑ люби́вый.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ д҃.
Бꙋ́рю лю́тꙋю воздвиго́ша на правосла́вныхъ хрⷭ҇тїа́нъ слꙋжи́телїе і҆́дѡльстїи, зрѣ́ти не терпѧ́щїи числа̀ вѣ́рныхъ ᲂу҆множа́емагѡ и҆ цр҃кве хрⷭ҇то́вы созида́ющїѧсѧ. Ты́ же ра́дꙋѧсѧ мꙋ́жествꙋ и҆ терпѣ́нїю ча̑дъ твои́хъ, въ темни́цахъ заключе́нныхъ, кꙋ́пнѡ съ ни́ми возглаша́лъ є҆сѝ бг҃ови: А҆ллилꙋ́їа.
І҆́косъ д҃.
Слы́шаще, ꙗ҆́кѡ ᲂу҆че́нїе хрⷭ҇то́во всѧ̑ наро́ды ѡ҆б̾е́млетъ и҆ прїе́млетъ и҆̀хъ равноче́стнѡ, и҆ ꙗ҆́кѡ ѻ҆би́тєли вѣ̑рнымъ мнѡ́ги на нб҃сѣ́хъ гдⷭ҇ь ᲂу҆гото́ва, притека́хꙋ къ тебѣ̀, па́стырю до́брый, мꙋ́жїе и҆ жєны̀, ѻ҆́троцы и҆ ста́рцы: тѣ́мже и҆ мы̀ возглаша́емъ тѝ:
Ра́дꙋйсѧ, ма́лое ста́до хрⷭ҇то́во собра́вый: ра́дꙋйсѧ, тѣ́снымъ пꙋте́мъ къ бг҃ꙋ є҆го̀ приведы́й.
Ра́дꙋйсѧ, а҆кѵ́лѣ и҆ прїскі́ллѣ подража́ти вѣ̑рныѧ наꙋчи́вый: ра́дꙋйсѧ, цр҃кви дома̑шнїѧ ᲂу҆тверди́вый.
Ра́дꙋйсѧ, ѻ҆́бщыѧ трапє́зы бл҃гослови́вый: ра́дꙋйсѧ, ча̑да въ бѣда́хъ николи́же ѡ҆ставлѧ́вый.
Ра́дꙋйсѧ, крѣ̑пкимъ въ вѣ́рѣ немощны̑ѧ врꙋча́вый: ра́дꙋйсѧ, и҆знемога́ющихъ ѻ҆те́ческою дла́нїю держа́вый.
Ра́дꙋйсѧ, мꙋ́дрѡ на ни́вѣ хрⷭ҇то́вой сѣ́ѧвый: ра́дꙋйсѧ, цр҃ковь на ка́мени тве́рдѣмъ стро́ивый.
Ра́дꙋйсѧ, ра́бе ᲂу҆се́рдный, врꙋче́ннагѡ тала́нта не сокры́вый: ра́дꙋйсѧ, разсꙋжде́нїе дх҃о́вное ѻ҆би́льнѣ ꙗ҆ви́вый.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ є҃.
Бг҃оте́чнаѧ ѕвѣзда̀ ꙗ҆ви́лсѧ є҆сѝ, ѻ҆́тче, сл҃нцꙋ пра́вды хрⷭ҇тꙋ̀ слꙋжа̀ ре́вностнѣ и҆ ко гдⷭ҇ꙋ приводѧ̀ вѣ́рныхъ, ꙗ҆́коже дре́вле ѕвѣзда̀ виѳлее́мскаѧ. Є҆гда́ же возведе́нъ бы́лъ є҆сѝ въ са́нъ а҆рхїере́йскїй, бл҃года́ть сꙋгꙋ́бꙋю цр҃ковь бж҃їю ᲂу҆строѧ́ти и҆ дꙋ́шы человѣ́чєскїѧ просвѣща́ти прїѧ́лъ є҆сѝ. Свѣтоно́сною же мл҃твою твое́ю и҆ мы̀ ѡ҆сѣнѧ́емїи, вопїе́мъ хрⷭ҇тꙋ̀: А҆ллилꙋ́їа.
І҆́косъ є҃.
Ви́дѧ ка̑пища і҆́дѡльскаѧ, со слеза́ми молѧ́шесѧ ст҃ы́й: гдѣ̀ сози́ждꙋ цр҃ковь тебѣ̀, гдⷭ҇и: и҆ бы́сть ᲂу҆слы́шана мл҃тва є҆гѡ̀. Чꙋ́дный хра́мъ воскрⷭ҇нїѧ хрⷭ҇то́ва во гра́дѣ то́кїо трꙋды̑ мно́гими и҆ по́мощїю люде́й рꙋ́сскихъ воздви́жесѧ. Сегѡ̀ ра́ди и҆ мы̀ бг҃оно́сномꙋ ст҃и́телю, въ є҆гѡ́же па́мѧть до ны́нѣ хра́мъ то́й нїкола́й-до нарица́етсѧ, возно́симъ похвалы̑ таковы̑ѧ:
Ра́дꙋйсѧ, ꙗ҆́кѡ є҆ле́нь на и҆сто́чники водны̑ѧ, къ бжⷭ҇твеннѣй трапе́зѣ притека́вый: ра́дꙋйсѧ, собо́ръ воскрⷭ҇нїѧ хрⷭ҇то́ва и҆ дрꙋгі̑ѧ хра́мы возведы́й.
Ра́дꙋйсѧ, крⷭ҇тъ над̾ гра́домъ сто́льнымъ ᲂу҆тверди́вый: ра́дꙋйсѧ, зво́нъ кампа́нный до небесѐ вознесы́й.
Ра́дꙋйсѧ, пла́мень гоне́нїѧ на хрⷭ҇тїа́нъ ᲂу҆гаси́вый: ра́дꙋйсѧ, почита́нїе премно́гое въ лю́дехъ ꙗ҆по́нскихъ стѧжа́вый.
Ра́дꙋйсѧ, бл҃ги̑мъ ѻ҆бы́чаємъ не возбрани́вый: ра́дꙋйсѧ, дрꙋ́га и҆ бра́та въ наро́дѣ ꙗ҆по́нскомъ ѡ҆брѣты́й.
Ра́дꙋйсѧ, бг҃омъ по́сланный просвѣти́телю: ра́дꙋйсѧ, вѣ́рный гдⷭ҇ень домоправи́телю.
Ра́дꙋйсѧ, ны́нѣ ᲂу҆вѣнча́нный сла́вою нбⷭ҇ною: ра́дꙋйсѧ, торжествꙋ́ѧй ди́внѡ си́лою крⷭ҇тною.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ ѕ҃.
Проповѣ̑дницы ст҃а́гѡ є҆ѵⷢ҇лїа ра́дꙋютсѧ въ го́рнихъ черто́зѣхъ, прїе́млюще тѧ̀, ꙗ҆́коже собра́та. Мы́ же, срѡ́дницы твоѝ, въ прославле́нїи твое́мъ млⷭ҇ть бж҃їю къ на́мъ грѣ̑шнымъ зрѧ́ще ве́лїю, бг҃ꙋ воспѣва́емъ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ ꙗ҆́кѡ ѕвѣзда̀ но́ваѧ, ѻ҆́тче нїко́лае, ѿ землѝ смоле́нскїѧ да́же до страны̀ ꙗ҆по́нскїѧ доше́дъ, и҆ а҆пⷭ҇льскими трꙋды̑ ди̑внымъ рꙋ̑сскимъ ст҃ы̑мъ ᲂу҆подо́бивсѧ: влади́мїрꙋ равноапⷭ҇льномꙋ, стефа́нꙋ пермѝ просвѣти́телю, і҆нноке́нтїю и҆ркꙋ́тскомꙋ и҆ ге́рманꙋ а҆лѧ́скинскомꙋ, и҆̀же сꙋ́ть цр҃кви на́шей бжⷭ҇твенное сїѧ́нїе. Мы́ же вели́кїѧ ра́дости и҆спо́лнени, въ ли́цѣ се́мъ прославлѧ́емъ тѧ̀, но́ваго бж҃їѧ ᲂу҆го́дника:
Ра́дꙋйсѧ, дїа́кона бл҃гочести́вагѡ до́брый сы́не: ра́дꙋйсѧ, нищетꙋ̀ смире́ннѡ претерпѣ́вый.
Ра́дꙋйсѧ, ѻ҆бѣ́тъ нестѧжа́нїѧ бг҃ꙋ принесы́й: ра́дꙋйсѧ, ѡ҆бѣща̑нїѧ и҆́ночєскаѧ да́же до сме́рти соблюды́й.
Ра́дꙋйсѧ, а҆рхїпа́стырю, въ ри̑зы вє́тхїѧ ѡ҆блече́нный: ра́дꙋйсѧ, во ᲂу҆бо́гихъ ке́ллїахъ пожи́вый.
Ра́дꙋйсѧ, въ мі́рѣ живы́й, ѻ҆ба́че мїрска̑ѧ презрѣ́вый: ра́дꙋйсѧ, до предѣ́лѡвъ ѕѣлѡ̀ да́льнихъ доше́дый.
Ра́дꙋйсѧ, мꙋ́дрый наста́вниче новопросвѣще́нныхъ: ра́дꙋйсѧ, попечи́телю ѡ҆ рыбака́хъ а҆́йнскихъ.
Ра́дꙋйсѧ, сподви́жникѡвъ себѣ̀ во ᲂу҆чи́лищехъ возрасти́вый: ра́дꙋйсѧ, вертогра́дъ въ землѝ ꙗ҆по́нской насади́вый.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ з҃.
Хотѧ́й цр҃кви ꙗ҆по́нской па́стырей до́брыхъ и҆ мїрѧ́нъ вѣ́рныхъ возрасти́ти, ѻ҆́тче нїко́лае, ᲂу҆строѧ́лъ є҆сѝ шкѡ́лы и҆ ᲂу҆чи̑лища дꙋхѡ́внаѧ, и҆ собра́лъ є҆сѝ наста́вникѡвъ премꙋ́дрыхъ, и҆ пѣ́нїе цр҃ко́вное до́брѣ ᲂу҆чини́лъ є҆сѝ, во є҆́же па́ствѣ мно́гой вы́нꙋ съ тобо́ю пѣ́ти: А҆ллилꙋ́їа.
І҆́косъ з҃.
Но́вое ꙗ҆ви́сѧ торжество̀ во гра́дѣ то́кїо, є҆гда̀ соверша́ше ст҃и́тель пра́зднованїе воскрⷭ҇нїѧ хрⷭ҇то́ва въ хра́мѣ собо́рнѣмъ, тогда̀ ви́дѣша лю́дїе ꙗ҆по́нстїи па́схꙋ бж҃їю сп҃си́тельнꙋю. Мы́ же добродѣ́телємъ твои̑мъ, ѻ҆́тче нїко́лае, дивѧ́щесѧ, вопїе́мъ велегла́снѡ:
Ра́дꙋйсѧ, ᲂу҆строи́телю цр҃ко́внагѡ пи́ра чтⷭ҇нѣ́йшїй: ра́дꙋйсѧ, въ вѣ́цѣ жесто́цѣмъ любо́вь хрⷭ҇то́вꙋ сохра́ншїй.
Ра́дꙋйсѧ, на всѧ́къ де́нь и҆ ча́съ сп҃се́нїѧ ра́ди бли́жнихъ подвиза́выйсѧ: ра́дꙋйсѧ, нелѣ́ностнѣ вѣ̑рныѧ посѣща́вый и҆ наставлѧ́вый.
Ра́дꙋйсѧ, въ преложе́нїи сщ҃е́нныхъ кни́гъ да́же до кончи́ны трꙋди́выйсѧ: ра́дꙋйсѧ, бл҃года́ть бж҃їю въ дѣ́ланїи непреста́ннѣмъ стѧжа́вый.
Ра́дꙋйсѧ, про́повѣдїю зерно̀ горчи́чное насади́вый: ра́дꙋйсѧ, дре́во прекра́сное вѣ́ры возрасти́вый.
Ра́дꙋйсѧ, плоды̀ трꙋдѡ́въ свои́хъ при и҆схо́дѣ ᲂу҆зрѣ́вый: ра́дꙋйсѧ, дре́во сїѐ многопло́дное на́мъ завѣща́вый.
Ра́дꙋйсѧ, и҆ по кончи́нѣ невѣ́дꙋщыѧ къ бг҃ꙋ приводѧ́й: ра́дꙋйсѧ, пребыва́ѧй ны́нѣ со всѣ́ми ст҃ы́ми въ раѝ і҆и҃совѣ.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ и҃.
Стра̑ннаѧ и҆ чꙋ̑днаѧ ви́дѣша лю́дїе, є҆гда̀ хрⷭ҇тїа́не ꙗ҆по́нстїи во́инѡмъ рꙋ̑сскимъ плѣнє́ннымъ бра́тски слꙋжа́хꙋ и҆ всѧ́кое млⷭ҇рдїе тѣ̑мъ ꙗ҆влѧ́хꙋ. Мы́ же плодѡ́мъ любвѐ хрⷭ҇то́вы въ новопросвѣще́нныхъ ча́дѣхъ цр҃кве ꙗ҆по́нскїѧ дивѧ́щесѧ, гдⷭ҇ꙋ пѣ́снь воспои́мъ: А҆ллилꙋ́їа.
І҆́косъ и҃.
Всего̀ себѐ преда́лъ є҆сѝ на слꙋже́нїе бг҃ꙋ, равноапⷭ҇льне нїко́лае, и҆ лю́демъ та́кожде ѡ҆ гдⷭ҇ѣ слꙋжа̀ непреста́ннѡ, ѻ҆боѧ̀ заповѣ̑даннаѧ премꙋ́дрѣ и҆спо́лнилъ є҆сѝ. Тѣ́мже тебѣ̀, црⷭ҇кимъ пꙋте́мъ добродѣ́телей проше́дшемꙋ, ᲂу҆миле́ннѡ воспѣва́емъ:
Ра́дꙋйсѧ, бж҃їй ᲂу҆се́рдный слꙋжи́телю: ра́дꙋйсѧ, плѣне́нныхъ рꙋ́сскихъ во́инѡвъ попечи́телю.
Ра́дꙋйсѧ, безкро́внꙋю же́ртвꙋ за лю́ди твоѧ̑ приноси́вый: ра́дꙋйсѧ, дꙋ́шы смꙋщє́нныѧ ᲂу҆мири́вый.
Ра́дꙋйсѧ, па́ствꙋ твою̀ въ тѧ̑жкїѧ дни̑ бра́ни не ѡ҆ста́вивый:
ра́дꙋйсѧ, дꙋ́шꙋ свою̀ за па́ствꙋ полага́вый.
Ра́дꙋйсѧ, млⷭ҇ти и҆ мꙋ́жества наста́вниче: ра́дꙋйсѧ, ѿве́рженныхъ ти́хое приста́нище.
Ра́дꙋйсѧ, сокро́вище смире́нїѧ: ра́дꙋйсѧ, ѻ҆́бразе покаѧ́нїѧ.
Ра́дꙋйсѧ, вѣ́ро непосты́днаѧ: ра́дꙋйсѧ, любо́вь непобѣди́маѧ.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ ѳ҃.
Всѧ́кое дре́во по плода́мъ познае́тсѧ, пло́дъ же трꙋдѡ́въ твои́хъ ве́лїихъ є҆́сть сп҃се́нїе люде́й премно́гихъ. Ꙗ҆ви́ша бо сѧ мнѡ́гїѧ ты́сѧщы правосла́вныхъ хрⷭ҇тїа́нъ та́мѡ, и҆дѣ́же пре́жде не бѣ̀ ни є҆ди́нагѡ. Сегѡ̀ ра́ди возопїи́мъ наста́вльшемꙋ тѧ̀ на проповѣ́данїе твоѐ гдⷭ҇ꙋ: А҆ллилꙋ́їа.
І҆́косъ ѳ҃.
Вѣті̑и многовѣща́ннїи подвигѡ́мъ твои̑мъ и҆з̾ꙋмлѧ́ютсѧ, а҆́гг҃ли съ тобо́ю ликовствꙋ́ютъ, мы́ же разꙋмѣ́юще смире́нное и҆ подви́жническое житїѐ твоѐ, дꙋхо́внꙋю бра́нь проти́вꙋ мі́ра, пло́ти и҆ дїа́вола непреста́ннꙋю, и҆ терпѣ́нїе премно́гое, хва́лимъ тѧ̀ си́це:
Ра́дꙋйсѧ, не дре́вле, но въ послѣ̑днѧѧ времена̀ подвиза́выйсѧ: ра́дꙋйсѧ, лю́тꙋю бра́нь ᲂу҆ны́нїѧ побѣди́вый.
Ра́дꙋйсѧ, хрⷭ҇та̀ безстра́шное и҆сповѣ́данїе: ра́дꙋйсѧ, безбо́жїѧ, ꙗ҆зы́чества и҆ є҆ресе́й посрамле́нїе.
Ра́дꙋйсѧ, ѻ҆́бразе а҆рхїпа́стырѧ правосла́внагѡ: ра́дꙋйсѧ, и҆сто́чниче вѣ́дѣнїѧ дх҃о́внагѡ.
Ра́дꙋйсѧ, нерадѣ́нїѧ на́шегѡ ѡ҆бличе́нїе: ра́дꙋйсѧ, во бране́хъ дꙋхо́вныхъ ᲂу҆крѣпле́нїе.
Ра́дꙋйсѧ, молє́нїѧ ѻ҆те́чески прїе́млѧй: ра́дꙋйсѧ, прошє́нїѧ на̑ша и҆сполнѧ́ѧй.
Ра́дꙋйсѧ, безсме́ртныѧ ра́дости и҆спо́лненный: ра́дꙋйсѧ, воздаѧ́нїемъ мно́гимъ ѡ҆богаще́нный.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ і҃.
Сп҃стѝ всеꙋсе́рднѡ тща́лсѧ є҆сѝ лю́ди ѿча̑ѧнныѧ, и҆́стиннагѡ бг҃а не вѣ́дꙋщыѧ. И҆ всѧ́комꙋ вопроша́ющемꙋ, премꙋ́дромꙋ и҆ некни́жномꙋ, ꙗ҆́сный ѿвѣ́тъ ѡ҆ твое́мъ ᲂу҆пова́нїи возвѣща́лъ є҆сѝ. Ны́нѣ же, въ сѣ́ни сме́ртнѣй свѣ́тъ ᲂу҆зрѣ̑вшаѧ, ча̑да твоѧ̑ со все́ю цр҃ковїю вопїю́тъ: А҆ллилꙋ́їа.
І҆́косъ і҃.
Стѣна̀ нерꙋши́ма бꙋ́ди ча́дѡмъ цр҃кве но́выѧ, ѽ прест҃а́ѧ дв҃о бцⷣе! те́плѣ молѧ́шесѧ ст҃и́тель. Пребыва́ше бо цр҃ковь ꙗ҆по́нскаѧ посредѣ̀ и҆новѣ́рїѧ. Мы́ же зрѧ́ще ны́нѣ крѣ́пость и҆ вѣ́рность хрⷭ҇тїа́нъ ꙗ҆по́нскихъ, пое́мъ бг҃омꙋ́дромꙋ па́стырю си́це:
Ра́дꙋйсѧ, па́ствы твоеѧ̀ мл҃твенный покро́ве: ра́дꙋйсѧ, гдⷭ҇ꙋ и҆ мт҃ри є҆гѡ̀ сїю̀ врꙋча́ѧй.
Ра́дꙋйсѧ, ѻ҆трокѡ́въ и҆ ѻ҆трокови́цъ моли́тисѧ наꙋчи́вый: ра́дꙋйсѧ, высотꙋ̀ цѣломꙋ́дрїѧ ю҆́нымъ и҆з̾ѧсни́вый.
Ра́дꙋйсѧ, бра́ки честны̑ѧ соверша́вый: ра́дꙋйсѧ, градѡ́мъ и҆ ве́семъ ми́ръ приноси́вый.
Ра́дꙋйсѧ, ста́рцꙋ ѻ҆тцꙋ̀ до кончи́ны помога́вый: ра́дꙋйсѧ, во всѣ́хъ нꙋ́ждахъ ᲂу҆пова́нїе на бг҃а возлага́вый.
Ра́дꙋйсѧ, хитросплетє́нїѧ ѕловѣ́рныхъ разрꙋши́вый: ра́дꙋйсѧ, хлѣ́бомъ сло́ва бж҃їѧ па́ствꙋ твою̀ насы́тивый.
Ра́дꙋйсѧ, дꙋ́шꙋ за лю́ди ꙗ҆пѡ́нскїѧ полага́вый: ра́дꙋйсѧ, ᲂу҆спе́нїемъ твои́мъ ча̑да радостопеча́лїѧ и҆спо́лнивый.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ а҃і.
Пѣ́нїе надгро́бное мно́гажды соверша́шесѧ, и҆ сле́зы мнѡ́гїѧ пролива́шасѧ, є҆гда̀ почѝ ст҃и́тель бж҃їй, и҆спо́лнивъ лѣ̑та до́лга и҆ до днѐ послѣ́днѧгѡ не ѡ҆ста́вивъ трꙋдѡ́въ и҆ попече́нїй ѡ҆ возлю́бленнѣй па́ствѣ свое́й. Ѻ҆ба́че бл҃года́тїю бжⷭ҇твенною ᲂу҆тѣша́емїи, воспѣва́ша ча̑да твоѧ̑, ѻ҆́тче нїко́лае, гдⷭ҇еви: А҆ллилꙋ́їа.
І҆́косъ а҃і.
Свѣ́тлѡ цр҃ковь ꙗ҆по́нскаѧ прїѧ́тъ бл҃говѣ́стїе на нарѣ́чїи свое́мъ ѿ тебє̀, просвѣти́телю и҆́стинный, ᲂу҆подо́билсѧ бо є҆сѝ вселє́нскимъ ᲂу҆чи́телємъ, преложи́въ сщ҃е́нное писа́нїе и҆ слꙋ́жбꙋ бжⷭ҇твеннꙋю на ѧ҆зы́къ ꙗ҆по́нскїй, и҆збира́ѧ пи́сьмена и҆ начерта̑нїѧ, премꙋ̑дрымъ и҆ просты̑мъ понѧ̑тнаѧ. Тѣ́мже почита́юще добродѣ́ланїе твоѐ, хва́лимъ тѧ̀ си́це:
Ра́дꙋйсѧ, та̑йны сщ҃е́ннагѡ писа́нїѧ пости́гнꙋвый: ра́дꙋйсѧ, па́ствѣ ꙗ҆по́нской сїѧ̑ и҆з̾ѧсни́вый.
Ра́дꙋйсѧ, ѿ собо́рнагѡ ра́зꙋма цр҃ко́внагѡ ника́коже ѿстꙋпи́вый: ра́дꙋйсѧ, ᲂу҆добопрїѧ̑тны твоѧ̑ глаго́лы твори́вый.
Ра́дꙋйсѧ, въ преложе́нїихъ речє́нїѧ ꙗ҆́снаѧ и҆збира́вый: ра́дꙋйсѧ, лѡ́жнаѧ и҆ лє́стнаѧ ѿмета́вый.
Ра́дꙋйсѧ, слꙋ́жбꙋ сщ҃е́ннꙋю на ѧ҆зы́цѣ ꙗ҆по́нскомъ но́вѣй цр҃кви дарова́вый: ра́дꙋйсѧ, наро́дъ ꙗ҆по́нскїй ꙗ҆́кѡ бра́тїй до конца̀ возлюби́вый.
Ра́дꙋйсѧ, смири́вый го́рдость мꙋдрецѡ́въ лжеиме́нныхъ: ра́дꙋйсѧ, возлюби́вый кро́ткихъ и҆ смире́нныхъ.
Ра́дꙋйсѧ, па́ствꙋ дꙋхо́внымъ ме́домъ и҆ млеко́мъ пита́вый: ра́дꙋйсѧ, бл҃же́ннѣ ѿ трꙋдѡ́въ твои́хъ премно́гихъ почи́вый.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ в҃і.
Бл҃года́ть бжⷭ҇твеннаѧ ꙗ҆ви́сѧ ꙗ҆́снѡ въ дѣѧ́нїихъ твои́хъ, а҆пⷭ҇льскимъ ра́вныхъ, сщ҃е́нне нїко́лае, въ любвѝ твое́й, самоѿверже́нїи дꙋхо́вныхъ ча̑дъ твои́хъ ра́ди и҆ въ попече́нїихъ ѡ҆ стра́ждꙋщихъ. Наипа́че же цр҃ковь ꙗ҆по́нскаѧ до ны́нѣ ст҃ость твою̀ возвѣща́етъ, съ не́юже кꙋ́пнѡ и҆ мы̀ воспѣва́емъ гдⷭ҇ꙋ: А҆ллилꙋ́їа.
І҆́косъ в҃і.
Пою́ще ра́достнѡ въ ли́цѣ рꙋ́сскихъ ст҃ы́хъ твоѐ прославле́нїе и҆ равноапⷭ҇льнымъ и҆менова́нїе, сро́дниче на́шъ и҆ па́стырю, со все́ю цр҃ковїю правосла́вною взыва́емъ тѝ си́це:
Ра́дꙋйсѧ, ст҃ы́ѧ цр҃кве ᲂу҆краше́нїе: ра́дꙋйсѧ, всѣ́хъ притека́ющихъ къ тебѣ̀ ᲂу҆тѣше́нїе.
Ра́дꙋйсѧ, пра́выхъ сꙋжде́нїй ст҃о́е зерца́ло: ра́дꙋйсѧ, страда́нїй ди́вное врачева́нїе.
Ра́дꙋйсѧ, подвиза́ющихсѧ сподви́жниче: ра́дꙋйсѧ, нестроє́нїѧ всѧ̑каѧ и҆справлѧ́ѧй.
Ра́дꙋйсѧ, ча̑дъ твои́хъ въ ра́йскихъ ѻ҆би́телехъ ѡ҆брѣта́ѧй: ра́дꙋйсѧ, помина́ющихъ тѧ̀ помина́ѧй.
Ра́дꙋйсѧ, свѣ́томъ невече́рнимъ всѧ̑ ѡ҆зарѧ́ѧй: ра́дꙋйсѧ, ѕвѣздо̀, ѿ за́пада до восто́ка просїѧ́вшаѧ.
Ра́дꙋйсѧ, любвѐ бж҃їѧ проповѣ́дниче: ра́дꙋйсѧ, во всѧ́кихъ напа́стехъ молѧ́щымсѧ тебѣ̀ ско́рый помо́щниче.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ г҃і.
Ѽ пресла́вный просвѣти́телю страны̀ ꙗ҆по́нскїѧ, при́сный мл҃твенниче на́шъ пред̾ гдⷭ҇емъ, равноапⷭ҇льне нїко́лае! Прїимѝ ны́нѣшнее на́ше приноше́нїе и҆ ᲂу҆молѝ сп҃си́телѧ бг҃а, да ᲂу҆тверди́тъ въ вѣ́рѣ и҆ бл҃гоче́стїи лю́ди правосла̑вныѧ, и҆ и҆зба́витъ на́съ ѿ всѧ́кихъ напа́стей, бѣ́дъ и҆ скорбе́й, врагѡ́въ ви́димыхъ и҆ неви́димыхъ, и҆ пода́стъ грѣхѡ́въ ѡ҆ставле́нїе, и҆ вѣ́чныхъ мꙋ́къ и҆збавле́нїе, и҆ црⷭ҇твїѧ нбⷭ҇нагѡ сподо́битъ, да кꙋ́пнѡ съ тобо́ю и҆ всѣ́ми ст҃ы́ми трⷪ҇цѣ ст҃ѣ́й во вѣ́ки вѣкѡ́въ пое́мъ: А҆ллилꙋ́їа.
Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.
І҆́косъ а҃.
А҆́гг҃лъ, ꙗ҆́коже тѡві́и и҆ногда̀, спꙋтеше́ствова тебѣ̀, ѻ҆́тче нїко́лае, є҆гда̀ въ млада̑ѧ лѣ̑та твоѧ̑ напра́вилъ є҆сѝ стѡпы̀ въ странꙋ̀, дале́че ѿстоѧ́щꙋю, да просвѣти́ши лю́ди, во тьмѣ̀ невѣ́дѣнїѧ сѣдѧ́щыѧ, свѣ́томъ є҆ѵⷢ҇лїа хрⷭ҇то́ва. Сегѡ̀ ра́ди вопїе́мъ тѝ си́це:
Ра́дꙋйсѧ, смоле́нскїѧ землѝ сла́вное рожде́нїе: ра́дꙋйсѧ, ѿ младе́нства хра́мъ бж҃їй возлюби́вый.
Ра́дꙋйсѧ, въ сиротствѣ̀ бг҃омт҃рїю ѻ҆диги́трїею не ѡ҆ста́вленный: ра́дꙋйсѧ, дх҃о́вными ᲂу҆че́ньми ᲂу҆мꙋдре́нный.
Ра́дꙋйсѧ, на бдѣ́нїи всено́щнѣмъ призва́нїе на трꙋ́дъ а҆пⷭ҇льскїй прїе́мый: ра́дꙋйсѧ, сла́дость мі́ра нивочто́же вмѣни́вый.
Ра́дꙋйсѧ, чи́на а҆́гг҃льскагѡ и҆ са́на сщ҃е́ннагѡ ᲂу҆досто́енный: ра́дꙋйсѧ, къ невѣ́дѧщымъ сп҃се́нїѧ млⷭ҇ти и҆спо́лненный.
Ра́дꙋйсѧ, проповѣ́дати є҆ѵⷢ҇лїе вожделѣ́вый: ра́дꙋйсѧ, и҆ да́льнихъ ꙗ҆́кѡ бли́жнихъ возлюби́вый.
Ра́дꙋйсѧ, гоне́нїѧ за вѣ́рꙋ не страши́выйсѧ: ра́дꙋйсѧ, ко́зней вра́жїихъ не ᲂу҆боѧ́выйсѧ.
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Конда́къ а҃.
И҆збра́нный ѿ родѡ́въ рꙋ́сскихъ на бл҃говѣ́стїе хрⷭ҇то́во въ странѣ̀ ꙗ҆по́нской, дꙋ́шꙋ твою̀ полага́лъ є҆сѝ за ѻ҆́вцы твоѧ̑, ᲂу҆твержда́ѧ и҆̀хъ въ вѣ́рѣ и҆́стиннѣй. Тѣ́мже по́двиги твоѧ̑ почита́юще, хва́лимъ тѧ̀:
Ра́дꙋйсѧ, ст҃ы́й равноапⷭ҇льный нїко́лае, землѝ ꙗ҆по́нскїѧ просвѣти́телю.
Мл҃тва.
Ст҃че бж҃їй, па́стырю до́брый, дѣ́лателю вѣ́рный вїногра́да хрⷭ҇то́ва, равноапⷭ҇льне нїко́лае! При́зри на гра́дъ се́й и҆ на лю́ди сїѧ̑, молѝ хрⷭ҇та̀ бг҃а, да сохрани́тъ па́ствꙋ твою̀ ѿ волкѡ́въ гꙋбѧ́щихъ ю҆̀, да низпо́слетъ на́мъ дх҃а своегѡ̀ ст҃а́гѡ да́ръ, во є҆́же ᲂу҆мꙋдри́ти на́съ ходи́ти пред̾ ни́мъ во всѧ́комъ бл҃гоче́стїи и҆ чистотѣ̀ во всѧ̑ дни̑ жи́зни на́шеѧ: да славосло́вѧще и҆́мѧ є҆гѡ̀ всест҃о́е во дни̑ и҆ нѡ́щи, сподо́бимсѧ бы́ти наслѣ̑дницы жи́зни вѣ́чныѧ, и҆ просла́вимъ ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Святой равноапостольный Николай, архиепископ Японский, в миру Иван Димитриевич Касаткин, родился 1 августа 1836 года в Березовском погосте, Вольского уезда, Смоленской губернии, где его отец служил диаконом. Пяти лет он потерял мать. Окончив Бельское духовное училище, а затем Смоленскую духовную семинарию, в 1857 году Иван Касаткин поступил в Санкт-Петербургскую духовную академию. 24 июня 1860 года в академическом храме Двенадцати Апостолов епископ Нектарий совершил пострижение его в монашество с наречением имени Николай. В день памяти первоверховных апостолов Петра и Павла, 29 июня, инок Николай был посвящен во иеродиакона, а 30 июня – в престольный праздник академического храма – в сан иеромонаха. Затем по его желанию отец Николай был назначен в Японию настоятелем консульского храма города Хакодате.
Сначала проповедь Евангелия в Японии казалась совершенно немыслимой. По словам самого отца Николая, "тогдашние японцы смотрели на иностранцев как на зверей, а на христианство как на злодейскую церковь, к которой могут принадлежать только отъявленные злодеи и чародеи". Восемь лет ушло на то, чтобы изучить страну, народ, язык, нравы, обычаи тех, среди кого предстояло проповедовать, и к 1868 году паства отца Николая насчитывала уже около двадцати японцев. В конце 1869 года иеромонах Николай в Петербурге доложил Синоду о результатах своей работы. Было принято решение: "Образовать для проповеди между японскими язычниками Слова Божия особую Российскую Духовную Миссию". Отец Николай был возведен в сан архимандрита и назначен начальником этой Миссии. Вернувшись в Японию, будущий святитель передал Хакодатскую паству иеромонаху Анатолию, а сам перенес центр Миссии в Токио. В 1871 году в стране началось гонение на христиан, многие подвергались преследованиям (в том числе первый православный японец, знаменитый впоследствии миссионер-священник Павел Савабе). Только к 1873 году гонения несколько прекратились, и стала возможна свободная проповедь христианства.
В тот же год архимандрит Николай приступил к строительству в Токио церкви и школы на пятьдесят человек, а затем и духовного училища, которое в 1878 году было преобразовано в семинарию.
В 1874 году в Токио прибыл преосвященный Павел, епископ Камчатский, чтобы рукоположить во священный сан рекомендуемых архимандритом Николаем кандидатов из местного населения. К этому времени при Миссии в Токио действовали четыре училища – катехизаторское, семинарское, женское, причетническое, а в Хакодате два – для мальчиков и девочек. Во второй половине 1877 года Миссией стал регулярно издаваться журнал "Церковный вестник". К 1878 году в Японии насчитывалось уже 4115 христиан, существовали многочисленные христианские общины. Богослужение и преподавание на родном языке, издание книг религиозно-нравственного содержания – вот средства, которые позволили Миссии добиться за короткий срок столь значительных результатов.
30 марта 1880 года в Троицком соборе Александро-Невской Лавры состоялась хиротония архимандрита Николая во епископа. Вернувшись в Японию, святитель с еще большим усердием стал продолжать свои апостольские труды: завершил строительство собора Воскресения Христова в Токио, принялся за новый перевод богослужебных книг, составил на японском языке особый православный богословский словарь.
Большие испытания выпали на долю святителя и его паствы в период русско-японской войны. За свои подвижнические труды в эти тяжелые годы он был удостоен возведения в сан архиепископа.
В 1911 году исполнилось полвека с тех пор, как молодой иеромонах Николай впервые ступил на японскую землю. К тому времени в 266 общинах Японской Православной Церкви было 33017 христиан, 1 архиепископ, 1 епископ, 35 священников, 6 диаконов, 14 учителей пения, 116 проповедников-катехизаторов.
3 февраля 1912 года, на 76-м году жизни, просветитель Японии архиепископ Николай мирно отошел ко Господу. Священный Синод Русской Православной Церкви 10 апреля 1970 года вынес акт о прославлении святителя в лике равноапостолов, ибо в Японии святой уже давно был чтим как великий праведник и молитвенник пред Господом.
