А҆ка́ѳїстъ ст҃о́мꙋ прпⷣбномꙋ і҆́ѡвꙋ, и҆гꙋ́менꙋ поча́евскомꙋ, чꙋдотво́рцꙋ.
Конда́къ а҃.
И҆збра́нный ѿ гдⷭ҇а, бл҃гі́й ра́бе и҆ вѣ́рный, ᲂу҆го́дниче хрⷭ҇то́въ, прпⷣбне ѻ҆́ч҃е на́шъ і҆́ѡве: твои́мъ застꙋпле́нїемъ и҆ предста́тельствомъ ѡ҆гражда́еми, похва̑льнаѧ восписꙋ́емъ тѝ, повѣ́дающе благі̑ѧ по́двиги и҆ чꙋдеса̀ твоѧ̑: и҆ бл҃года́рствєннаѧ возсыла́емъ молє́нїѧ просла́вльшемꙋ тѧ̀ гдⷭ҇ꙋ и҆ цр҃ю̀ сла́вы. ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ и҆ пречⷭ҇тѣй є҆гѡ̀ мт҃ри, приснодв҃ѣ бцⷣѣ, ѿ всѧ́кихъ на́съ бѣ́дъ свободѝ зовꙋ́щихъ тѝ:
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
І҆́косъ а҃.
А҆́гг҃ла земна́го нра́вомъ и҆ чл҃вѣ́ка нбⷭ҇наго житїе́мъ содѣ́ла тѧ̀ влⷣка а҆́гг҃лѡвъ и҆ всеѧ̀ ви́димыѧ и҆ неви́димыѧ тва́ри: тѣ́мже просла́вивъ тѧ̀, ꙗ҆́кѡ соѡбра́зна ꙗ҆́вльшасѧ пред̾ꙋвѣ́дѣнїю є҆гѡ̀, благоволи́лъ є҆́сть и҆ на́мъ ꙗ҆ви́ти сла́вное житїѐ и҆ пренбⷭ҇ное прославле́нїе твоѐ, да воспѣва́емъ тѝ си́це:
Ра́дꙋйсѧ, ѿ ᲂу҆тро́бы ма́тернїѧ и҆збра́нный на по́двигъ слꙋже́нїѧ цр҃ю̀ нбⷭ҇номꙋ: ра́дꙋйсѧ, и҆́менемъ і҆ѡа́нна, бл҃года́ти тезоимени́тагѡ, и҆́мже по рожде́нїи нарече́нъ бы́лъ є҆сѝ, ꙗ҆́кѡ печа́тїю бл҃года́ти запечатлѣ́нный.
Ра́дꙋйсѧ, ꙗ҆́кѡ прїѧ́лъ є҆сѝ и҆́мѧ крⷭ҇ти́телѧ гдⷭ҇нѧ, є҆мꙋ́же пꙋстыннолю́бнымъ житїе́мъ до́брѣ поревнова́лъ є҆сѝ: ра́дꙋйсѧ, ꙗ҆́кѡ и҆з̾мла́да, ᲂу҆слы́шалъ є҆сѝ внꙋ́треннїй гла́съ призва́вшаго тѧ̀ гдⷭ҇а.
Ра́дꙋйсѧ, ꙗ҆́кѡ десѧтолѣ́тенъ сы́й, семꙋ̀ гла́сꙋ ѻ҆хо́тнѡ послѣ́дꙋѧ, ᲂу҆клони́лсѧ є҆сѝ ѿ ѻ҆́чїю люби́мыхъ тѝ роди́телей и҆ во ѡ҆би́тели ᲂу҆го́рницкой всели́лсѧ є҆сѝ.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ в҃.
Ви́дѧще и҆́ноцы ᲂу҆го́рницкїи добродѣ́тельное житїѐ и҆ благі̑ѧ нра́вы, ᲂу҆го́дниче бж҃їй, по двою̀ лѣ́тѣхъ кро́ткагѡ и҆ трꙋдолюби́вагѡ послꙋша́нїѧ твоегѡ̀ во ѡ҆би́тели свое́й, возложи́ша на тѧ̀ а҆́гг҃льскїй чи́нъ, и҆ ꙗ҆́коже пред̾ѡбразꙋ́юще многотрꙋ̑дныѧ по́двиги твоѧ̑, ꙗ҆́же хрⷭ҇та̀ ра́ди под̾ѧ́ти и҆мѣ́лъ є҆сѝ, і҆́ѡвомъ тѧ̀ нареко́ша, воспѣва́ѧ бг҃ꙋ: А҆ллилꙋ́їа.
І҆́косъ в҃.
Ра́зꙋмъ свы́ше лѣ́тъ подава́ѧ тебѣ̀ бг҃ъ ра́зꙋмѡвъ, ᲂу҆мꙋдрѝ тѧ̀ въ вѣ́дѣнїи си́хъ, ꙗ҆́же ко спасе́нїю, ꙗ҆́кѡ преꙋспѣва́ти тебѣ̀ въ пꙋтѝ гдⷭ҇ни и҆ бл҃гопоспѣши́ти па́че всѣ́хъ сꙋ́щихъ во ѡ҆би́тели. Тѣ́мже и҆ на сте́пень сщ҃е́нства, а҆́ще и҆ по мно́зѣмъ ѿрица́нїи твое́мъ, а҆́бїе во ᲂу҆рече́нный во́зрастъ возведе́нъ бы́лъ є҆сѝ. Си́хъ ра́ди прїимѝ ѿ на́съ хвалє́бнаѧ пѣ̑нїѧ сїѧ̑:
Ра́дꙋйсѧ, свѣ́томъ ра́зꙋма бж҃е́ственнагѡ ѿ ю҆́ности твоеѧ̀ ѡ҆сїѧ́нный: ра́дꙋйсѧ, во свѣ́тѣ лица̀ бж҃їѧ тмꙋ̀ невѣ́дѣнїѧ и҆ пло́тскихъ мꙋдрова́нїй во все́мъ житїѝ твое́мъ ѿ себѐ ѿгна́вый.
Ра́дꙋйсѧ, розго̀ плодоно́снаѧ дѣ́лы бг҃оꙋго́дными, приви́таѧ къ и҆́стинной лѣ́торасли вертогра́да гдⷭ҇нѧ: ра́дꙋйсѧ, крі́не, прозѧ́бшїй благоче́стїе ѿ росы̀ дх҃а ст҃а́гѡ.
Ра́дꙋйсѧ, кла́се, пло́дъ дх҃о́вный вѣ́ры, наде́жды и҆ любвѐ бж҃е́ственныѧ стори́цею прине́сшїй.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ г҃.
Си́ла вы́шнѧгѡ, є҆́юже ѡ҆блече́нъ бы́лъ є҆сѝ во ᲂу҆го́дное бл҃года́ти бж҃е́ственныѧ ѻ҆рꙋ́дїе, толи́кїй пла́мень ре́вности бж҃їѧ возжжѐ въ се́рдцѣ твое́мъ, ꙗ҆́кѡ неꙋсы́пнагѡ ра́ди хвалє́нїѧ гдⷭ҇а и҆ вели́кїй а҆́гг҃льскїй ѡ҆́бразъ по рꙋкоположе́нїи вско́рѣ воспрїѧ́ти и҆зво́лилъ є҆сѝ, и҆́менемъ і҆ѡа́нна во схимона́сѣхъ па́ки нарече́нный, ꙗ҆́кѡ и҆спо́лнь сꙋгꙋ́быѧ бл҃года́ти бж҃їѧ и҆ навы́кнꙋвый пѣ́ти непреста́ннѡ серафі́мскꙋю пѣ́снь: А҆ллилꙋ́їа.
І҆́косъ г҃.
И҆мы́й дарова̑нїѧ многоразли̑чнаѧ ѿ гдⷭ҇а, вои́стиннꙋ не возмо́глъ є҆сѝ ᲂу҆таи́тисѧ ѿ совремє́нникъ твои́хъ, ѿ ни́хже мно́зи нача́ша приходи́ти къ тебѣ̀ по́льзы ра́ди дꙋше́вныѧ: благочести́вый же ѻ҆стро́жскїй кн҃зь кѡнстанті́нъ и҆спросѝ тѧ̀ во ѡ҆би́тель свою̀ крⷭ҇тнꙋю, ꙗ҆́же на ѻ҆́стровѣ дꙋ́бенстѣмъ, и҆дѣ́же и҆ во и҆гꙋ́мена вско́рѣ поста́вленъ бы́лъ є҆сѝ, наꙋча́ѧ всѣ́хъ зва́ти тебѣ̀:
Ра́дꙋйсѧ, вмѣсти́лище всѣ́хъ сокро́вищъ гдⷭ҇нихъ: ра́дꙋйсѧ, раздаѧ́телю коемꙋ́ждо на по́льзꙋ дарѡ́въ дх҃о́вныхъ, ꙗ҆́же прїѧ́лъ є҆сѝ ѿ гдⷭ҇а.
Ра́дꙋйсѧ, ꙗ҆́кѡ ревнꙋ́ѧ по правосла́вїю во ѡ҆би́тели дꙋ́бенстѣй писа́нїемъ кни́гъ бж҃е́ственныхъ проти́вꙋ ᲂу҆́нїи, тогда̀ пе́рвѣе ꙗ҆ви́вшейсѧ, бг҃омꙋ́дреннѡ ᲂу҆пражнѧ́лсѧ є҆сѝ: ра́дꙋйсѧ, ꙗ҆́кѡ сегѡ̀ ра́ди и҆ бра́тїю свою̀ на по́двигъ распростране́нїѧ правосла́вныхъ кни́гъ бг҃омꙋ́жнѡ подвиза́лъ є҆сѝ.
Ра́дꙋйсѧ, ꙗ҆́кѡ бл҃гослове́нїю твоемꙋ̀ и҆ внꙋше́нїю, є҆́же ѿ дх҃а ст҃а́го, послѣ́дꙋѧ, ѻ҆стро́жскїй кн҃зь первопеча́тнꙋю слове́нскꙋю бі́блїю во ᲂу҆тѣше́нїе вѣ́рныхъ тисне́нїю предадѐ.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ д҃.
Вре́менныѧ че́сти, є҆́юже стꙋжа́хꙋ тѝ мно́зи ѿ правосла́вныхъ, кꙋ́пнѡ же и҆ ѡ҆ѕлобле́нїй многоразли́чныхъ за любо́вь къ правосла́вїю ѿ клевре́тѡвъ ᲂу҆́нїи хотѧ̀ и҆зба́витисѧ, ᲂу҆мы́слилъ є҆сѝ и҆збѣ́гнꙋти ѿ нача́льства, є҆́же вѧ́щше два́десѧти лѣ́тъ и҆мѣ́лъ є҆сѝ на ѻ҆́стровѣ дꙋ́бенстѣмъ. Сегѡ̀ ра́ди та́й ѡ҆ста́вилъ є҆сѝ ѡ҆би́тель свою̀ крⷭ҇тнꙋю, и҆ во є҆́же сокры́тисѧ ѿ треволне́нїй мі́ра сегѡ̀ многомѧте́жнагѡ, во ѡ҆́бразѣ проста́гѡ и҆́нока прите́клъ є҆сѝ на го́рꙋ поча́евскꙋю, и҆здре́вле свѣ́тлостїю чꙋде́съ премно́гихъ сїѧ́ющꙋю, зовы́й бг҃ꙋ: А҆ллилꙋ́їа.
І҆́косъ д҃.
Оу҆слы́шаша и҆ ᲂу҆разꙋмѣ́ша се́рдцемъ и҆ дꙋше́ю и҆́ноцы поча́евстїи преизбы́точествꙋющїй въ тебѣ̀ и҆сто́чникъ бл҃года́ти бж҃їѧ, ѻ҆́ч҃е на́шъ і҆́ѡве, ꙗ҆́кѡ сицева́го тѧ̀ наста́вника ѕѣлѡ̀ подви́жна и҆ и҆скꙋ́сна бл҃говолѝ и҆мѣ́ти прест҃а́ѧ бцⷣа во свое́й, нб҃сѝ подо́бѧщейсѧ, ѡ҆би́тели: тѣ́мже ѻ҆́бщимъ моле́нїемъ со слеза́ми а҆́бїе во и҆гꙋ́мена себѣ̀ поста́виша тѧ̀, взыва́юще тѝ:
Ра́дꙋйсѧ, гра́де, верхꙋ̀ горы̀ стоѧ́й и҆ и҆з̾ѡби́лꙋѧй вы́шними добро́тами: ра́дꙋйсѧ, сокро́вищнице, богатѧ́щаѧ на́съ дꙋхо́вными би́серы.
Ра́дꙋйсѧ, сто́лпе, ᲂу҆казꙋ́ѧй пꙋ́ть пра́вый хотѧ́щымъ ѡ҆брѣстѝ є҆го̀: ра́дꙋйсѧ, свѣти́ло, на за́падѣ рѡссі́и въ просвѣще́нїе на́ше возсїѧ́вшее.
Ра́дꙋйсѧ, по слѣда́мъ всебл҃же́ннагѡ ѳеодо́сїа кїевопече́рскагѡ ѻ҆́бщихъ жи́тїй на горѣ̀ поча́евстѣй первонача́льниче.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ є҃.
Бг҃оте́чнѣй ѕвѣздѣ̀ ᲂу҆подо́билсѧ є҆сѝ, всебл҃же́нне, сїѧ́ѧ дѣ́лы бл҃ги́ми и҆ бг҃оꙋго́дными на горѣ̀ поча́евстѣй: и҆́хже ра́ди мнѡ́зи во слѣ́дъ тебѣ̀ направлѧ́хꙋ стѡпы̀ своѧ̑ ѿ распꙋ́тїй грѣхо́вныхъ, ѻ҆́вїи ᲂу҆̀бо на нꙋ̑жды ѡ҆би́тели твоеѧ̀ ѿ и҆мѣ́нїй свои́хъ приносѧ́ще, ѻ҆́вїи же ѻ҆тцє́мъ дх҃о́внымъ во и҆сповѣ́данїе грѣхѡ́въ свои́хъ нарочи́тѡ тебѐ и҆збира́юще, ꙗ҆́кѡ всѣ̑мъ ѿ тебѣ̀ бг҃ꙋ слꙋжа́щымъ и҆ тобо́ю на спасе́нїѧ стєзѝ наставлѧ́ємымъ, со дерзнове́нїемъ пѣ́ти бг҃ꙋ: А҆ллилꙋ́їа.
І҆́косъ є҃.
Ви́дѣвъ тѧ̀ і҆еросхимона́хъ досїѳе́й, ᲂу҆чени́къ тво́й, ᲂу҆го́дниче бж҃їй, дрє́внимъ ѻ҆тцє́мъ въ житїѝ свое́мъ послѣ́дꙋюща, начерта̀ на́мъ пресла̑внаѧ дѣла̀ и҆ вели́кїѧ пѡ́двиги твоѧ̑: и҆́мже ᲂу҆дивлѧ́ющесѧ, сицевы́мъ вѣнча́емъ тѧ̀ пѣсносло́вїемъ:
Ра́дꙋйсѧ, ꙗ҆́кѡ въ тѣ́снѣй и҆ те́мнѣй пеще́рѣ горы̀ поча́евскїѧ та́йнѡ ѿ взо́рѡвъ человѣ́ческихъ многолѣ́тнѣ свѧ́тѡ подвиза́лсѧ є҆сѝ: ра́дꙋйсѧ, ꙗ҆́кѡ и҆ногда̀ чрез̾ трѝ днѝ, ѻ҆вогда̀ же чрез̾ цѣ́лꙋю седми́цꙋ є҆ди́нъ въ пеще́рѣ то́й бг҃омы́слїѧ ра́ди затворе́нъ бы́лъ є҆сѝ.
Ра́дꙋйсѧ, ꙗ҆́кѡ є҆ди́ною молѧ́щꙋсѧ тѝ внꙋ́трь є҆ѧ̀, ѡ҆блиста̀ тѧ̀ свѣ́тъ неизрече́нный, надо́лзѣ не престаѧ̀ ѡ҆сїѧва́ти сопредѣ́льнꙋю съ пеще́рою це́рковь: ра́дꙋйсѧ, ꙗ҆́кѡ ничи́мже то́чїю слеза́ми, и҆з̾ глꙋбины̀ серде́чныѧ и҆злива́ющимисѧ, во времена̀ ѻ҆́ны пита́выйсѧ.
Ра́дꙋйсѧ, ꙗ҆́кѡ неѡбы́чнагѡ ра́ди и҆зможде́нїѧ пло́ти и҆ до́лгихъ стоѧ́нїй согнѝ на нога́хъ тѣ́ло твоѐ и҆ да́же ѿ косте́й ѿпада́ше.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ ѕ҃.
Проповѣ́дати правосла́вїе жела́ѧ во страна́хъ свои́хъ, всебл҃же́нне, ꙗ҆́коже на ѻ҆́стровѣ дꙋ́бенстѣмъ, си́це и҆ на горѣ̀ поча́евстѣй, кни̑ги бж҃е́ствєнныѧ въ поꙋче́нїе вѣ̑рнымъ подава́лъ є҆сѝ, є҆ще́ же и҆ тѵ́помъ печа́тати ты̑ѧ въ свое́й тѷпогра́фїи поча́евстѣй повелѣва́лъ є҆сѝ и҆ кꙋ́пнѡ съ ни́ми посла̑нїѧ а҆рхїерє́йскаѧ и҆ мл҃твы многоразли̑чныѧ, во є҆́же всѣ́мъ чтꙋ́щымъ и҆̀хъ и҆ по ѻ҆́нѣмъ молѧ́щымсѧ пѣ́ти бг҃ꙋ нело́жнѡ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ, ꙗ҆́кѡ зарѧ̀, не ѿ восто́ка, но ѿ за́пада рѡссі́йскагѡ восходѧ́щаѧ, ᲂу҆го́дниче бж҃їй, є҆гда̀ нꙋ́ждъ ра́ди цр҃ко́вныхъ ѿ ѡ҆бдержа́щїѧ ᲂу҆́нїи бы́лъ є҆сѝ въ бг҃оспаса́емѣмъ гра́дѣ кі́евѣ на собо́рѣ ст҃ы́хъ ѻ҆тє́цъ, и҆дѣ́же, во ст҃ѣ́й кїевопече́рской ла́ѵрѣ, є҆ѧ́же прпⷣбными ѻ҆тца́ми, ѿ ѕла́гѡ наше́ствїѧ баты́ева спаса́вшимисѧ, и҆ ѡ҆би́тель поча́евскаѧ дре́вле ѡ҆снова́сѧ, клѧ́твеннѡ ѡ҆бѣща́лсѧ є҆сѝ кꙋ́пнѡ съ и҆ны́ми въ вѣ́рѣ правосла́внѣй, ѻ҆те́честѣй крѣ́пкѡ и҆ неизмѣ́ннѡ стоѧ́ти, николи́же и҆ ника́коже ѡ҆ ѿстꙋпле́нїи въ и҆новѣ́рїе не мы́слити, и҆ къ семꙋ̀ всерѡссі́йскїй наро́дъ ᲂу҆вѣщава́ти, да слы́шиши ѿ всѣ́хъ:
Ра́дꙋйсѧ, ꙗ҆́сное зерца́ло а҆пⷭ҇льскихъ преда́нїй: ра́дꙋйсѧ, живопрїи́мный и҆сто́чниче и҆́стинныхъ каѳолі́ческихъ пра́вилъ: ра́дꙋйсѧ, є҆реті́ческихъ басносло́вїй премꙋ́дрый и҆стреби́телю.
Ра́дꙋйсѧ, глꙋбины̀ правосла́вныхъ догма́тѡвъ и҆скꙋ́сный и҆змѣри́телю: ра́дꙋйсѧ, бж҃е́ственный ѻ҆рга́не, возшꙋми́вшїй на́мъ ᲂу҆че́нїе спаси́тельное.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ з҃.
Хотѧ̀ хрⷭ҇то́съ гдⷭ҇ь и҆ пребл҃га́ѧ пречⷭ҇таѧ мт҃рь є҆гѡ̀ ꙗ҆ви́ти тѝ, ѻ҆́тче, несказа́нное смотре́нїе своѐ ѡ҆ свѧтѣ́й горѣ̀ поча́евстѣй, дарова́ша тѝ си́лꙋ и҆ премꙋ́дрость бл҃гопоспѣ́шнѡ подвиза́тисѧ проти́вꙋ ѕлѣ́йшагѡ врага̀ ѡ҆би́тели твоеѧ̀, ѕловѣ́рнагѡ болѧ́рина фирле́а: є҆го́же ты̀ сꙋдо́мъ пра́вымъ и҆мꙋ́щество монасты́рское, велѣ́нїемъ є҆го̀ погра́бленное, возврати́ти понꙋ́дилъ є҆сѝ, и҆ сего̀ въ примире́нїе съ собо́ю и҆ со и҆́ноцы свои́ми приве́лъ є҆сѝ, поѧ̀ бг҃ꙋ сꙋда̀ и҆ пра́вды: А҆ллилꙋ́їа.
І҆́косъ з҃.
Но́вое тобо́ю показа̀ гдⷭ҇ь ѡ҆би́тели поча́евстѣй неизслѣ́димое промышле́нїе своѐ, є҆гда̀ жела́нїю твоемꙋ̀ послѣ́дꙋѧ, и҆мени́тый болѧ́ринъ ѳео́дѡръ и҆ є҆́ѵа, бл҃горо́днаѧ жена̀ є҆гѡ̀, и҆ждиве́нїемъ свои́мъ соѡрꙋди́ша верхꙋ̀ горы̀ поча́евскїѧ цр҃ковь вели́кꙋю и҆ пресла́внꙋю, ꙗ҆́кѡ вмѣсти́тисѧ въ не́й цѣльбоно́снѣй стопѣ̀ бж҃їѧ мт҃ре: и҆дѣ́же и҆ і҆кѡ́нꙋ є҆ѧ̀ чꙋдотво́рнꙋю поста́вилъ є҆сѝ, слы́шаще ѿ всѣ́хъ:
Ра́дꙋйсѧ, трⷪ҇цы живонача́льныѧ, во є҆ѧ́же и҆́мѧ но́вый хра́мъ са́мъ ѡ҆ст҃и́лъ є҆сѝ, и҆збра́нный побо́рниче: ра́дꙋйсѧ, пречⷭ҇тыѧ бцⷣы, ра́ди стопы̀ є҆ѧ̀ и҆ і҆кѡ́ны поча́евскїѧ, преизѧ́щный покло́нниче.
Ра́дꙋйсѧ, ꙗ҆́кѡ ревнꙋ́ѧ ѡ҆ бл҃гоꙋстрое́нїи ѡ҆би́тели твоеѧ̀, свои́ма рꙋка́ма сады̀ на горѣ̀ поча́евстѣй насажда́лъ є҆сѝ: ра́дꙋйсѧ, ꙗ҆́кѡ снабже́нїѧ ра́ди ѡ҆би́тели и҆ всеѧ̀ ве́си поча́евскїѧ водо́ю самоли́чнѣ прꙋды̀ ᲂу҆ подно́жїѧ горы̀ поча́евскїѧ и҆скопа́лъ є҆сѝ.
Ра́дꙋйсѧ, всѐ монасты́рское и҆мꙋ́щество во бдѣ́нїихъ свои́хъ, наипа́че же но́щїю, многокра́тнѣ ѿ та́тей храни́вый и҆ си́хъ тобо́ю ᲂу҆ловлѧ́емыхъ на пꙋ́ть и҆́стинный наставлѧ́ѧй.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ и҃.
Стра́нно и҆ чꙋ́дно житїѐ твоѐ, си́це и҆ ᲂу҆спе́нїе твоѐ, прпⷣбне ѻ҆́ч҃е: хотѧ́щꙋ бо тѝ преста́витисѧ ѿ привре́менныѧ жи́зни сеѧ̀, толи́кїѧ прозорли́вости сподо́билсѧ є҆сѝ ѿ гдⷭ҇а, ꙗ҆́кѡ де́нь и҆ ча́съ ѿше́ствїѧ твоегѡ̀ пре́жде седми́цы проре́клъ є҆сѝ. во ᲂу҆рече́нный же де́нь и҆ ча́съ, по бж҃е́ственнѣй лїтꙋргі́и, тобо́ю же сами́мъ соверше́ннѣй, а҆́бїе кромѣ̀ всѧ́кїѧ болѣ́зни ми́рнѡ ѿше́лъ є҆сѝ ко гдⷭ҇ꙋ, не престаѧ̀ пѣ́ти є҆мꙋ̀: А҆ллилꙋ́їа.
І҆́косъ и҃.
Ве́сь бѣ̀ въ стра́сѣ наро́дъ поча́евскїй и҆ про́чїи ѡ҆кре́стнїи лю́дїе, ви́дѧще свѣ́тлость ѿ гро́ба твоегѡ̀ и҆сходѧ́щꙋю чрезъ се́дмь лѣ́тъ по ᲂу҆спе́нїи твое́мъ, ᲂу҆го́дниче бж҃їй: недоꙋмѣва́хꙋ бо̀, ѿкꙋ́дꙋ и҆ ко́еѧ ра́ди вины̀ сїѧ̀ лꙋча̀ и҆схожда́ше. тогда̀ са́мъ ꙗ҆ви́лсѧ є҆сѝ въ со́нномъ видѣ́нїи митрополі́тꙋ кі́евскомꙋ дїонѵ́сїю, и҆звѣствꙋ́ѧ, ꙗ҆́кѡ хо́щетъ бг҃ъ чрез̾ него̀ ѿкры́ти ст҃ы̑ѧ мо́щи твоѧ̑: є҆́же слы́шавъ а҆рхїере́й правосла́вный возглаша́ше ѡ҆ тебѣ̀:
Ра́дꙋйсѧ, дѣ́лателю до́брый, ѿ ᲂу҆́тра до ве́чера столѣ́тнїѧ жи́зни твоеѧ̀ дѣ́лавый бл҃гоче́стнѡ въ вертогра́дѣ дх҃о́внѣмъ: ра́дꙋйсѧ, тѧготꙋ̀ и҆ ва́ръ многотрꙋ́днагѡ житїѧ̀ твоегѡ̀ ра́ди гдⷭ҇а ѻ҆хо́тнѡ поне́сшїй.
Ра́дꙋйсѧ, ꙗ҆́кѡ сегѡ̀ ра́ди дꙋша̀ твоѧ̀ не ѡ҆ста́висѧ во а҆́дѣ, нижѐ пло́ть твоѧ̀ ви́дѣ и҆стлѣ́нїѧ: ра́дꙋйсѧ, бл҃гі́й ра́бе и҆ вѣ́рный, за безмѣ̑рныѧ по́двиги твоѧ̑ вше́дый въ ра́дость гдⷭ҇а своегѡ̀.
Ра́дꙋйсѧ, свѣти́льниче, ѡ҆ не́мже не восхотѣ̀ бг҃ъ да под̾ спꙋ́домъ пребыва́етъ, но да на свѣ́щницѣ всенаро́днагѡ зрѣ́нїѧ и҆ поклоне́нїѧ поста́витсѧ.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ ѳ҃.
Всѐ є҆стество̀ земно́е превосходѧ́щыѧ глаго́лы твоѧ̑ слы́шавъ дїонѵ́сїй, а҆́ще и҆ слага́ше ты̑ѧ въ се́рдцѣ свое́мъ, ѻ҆ба́че, ꙗ҆́кѡ мꙋ́дрый и҆ и҆скꙋ́сный бг҃осло́въ, ᲂу҆ме́дли ѿ дѣ́ла тогѡ̀, до́ндеже трети́цею ꙗ҆ви́лсѧ є҆сѝ є҆мꙋ̀, ѿмще́нїемъ претѧ̀, а҆́ще бы повелѣ́ннагѡ не и҆спо́лнилъ вско́рѣ: ᲂу҆разꙋмѣ́въ же ѿ произволе́нїѧ бж҃їѧ бы́ти дѣ́ло сїѐ, прите́къ а҆́бїе со всѣ́мъ кли́ромъ на го́рꙋ поча́евскꙋю и҆ и҆спыта́въ и҆звѣ́стное ѡ҆ бг҃оꙋго́дномъ житїѝ твое́мъ, повелѣ̀ ѿкры́ти гро́бъ, въ не́мже ѡ҆брѣ́те честны̑ѧ мо́щи твоѧ̑ кромѣ̀ всѧ́кагѡ тлѣ́нїѧ, бл҃гоꙋха́нїѧ несказа́ннагѡ и҆спо́лненны: и҆ та́кѡ внесо́ша ты̑ѧ въ цр҃ковь живонача́льныѧ трⷪ҇цы, ᲂу҆блажа́юще тѧ̀ и҆ пою́ще бг҃ꙋ: А҆ллилꙋ́їа.
І҆́косъ ѳ҃.
Виті́йство всѧ́кое не мо́жетъ и҆зрещѝ вели́чества пресла́вныхъ зна́менїй и҆ чꙋде́съ твои́хъ, ꙗ҆́же на́чалъ є҆сѝ ꙗ҆влѧ́ти по ѿкры́тїи моще́й твои́хъ, всебл҃же́нне ѻ҆́тче: мно́зи бо ѿ наро́да, разли́чными недꙋ́ги ѡ҆держи́мїи, прите́кше къ многоцѣле́бнѣй ра́цѣ твое́й, и҆сцѣле́нїе прїѧ́ша. ꙗ҆́коже бо въ животѣ̀ твое́мъ всѧ́кїѧ добродѣ́тели и҆ бл҃госты́ни и҆спо́лненъ бы́лъ є҆сѝ, си́це и҆ по сме́рти добро̀ твори́ти не престае́ши всѣ̑мъ съ вѣ́рою призыва́ющымъ тѧ̀ и҆ вопїю́щымъ ѡ҆ бз҃ѣ сицева̑ѧ:
Ра́дꙋйсѧ, зерно̀ пшени́чное, по а҆пⷭ҇льскомꙋ глаго́лꙋ и҆з̾ земна́гѡ тлѣ́нїѧ произра́стшее, да мно́гъ пло́дъ дх҃о́вный тре́бꙋющымъ принесе́ши: ра́дꙋйсѧ, дре́во, насажде́нное при и҆сто́чницѣ цѣльбоно́сныѧ воды̀ ѿ стопы̀ бж҃їѧ мт҃ре, да всѝ жа́ждꙋщїи ѿ тебѐ питїѐ жи́зни почерпа́ютъ.
Ра́дꙋйсѧ, првⷣниче, по сло́вꙋ ѱало́мскомꙋ, ꙗ҆́кѡ фі́нїѯъ процвѣты́й ѿ горы̀ поча́евскїѧ, да а҆́лчꙋщихъ пра́вды и҆ всѧ́кїѧ благосты́ни и҆́стиною и҆ бл҃гонра́вїемъ напита́еши: ра́дꙋйсѧ, ᲂу҆́зы разрꙋше́нїѧ пе́рстнагѡ въ нетлѣ́нїи свое́мъ бл҃года́тїю бж҃їею расто́ргнꙋвый, да ѿ всѧ́кихъ гꙋби́тельныхъ недꙋ́гѡвъ стра́ждꙋщимъ враче́вство и҆ и҆сцѣле́нїе подае́ши.
Ра́дꙋйсѧ, въ мі́рѣ желѣ́зомъ рече́нный, несокрꙋши́мꙋю крѣ́пость и҆ си́лꙋ немощны̑мъ дꙋше́ю и҆ тѣ́ломъ свы́ше приносѧ́й.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ і҃.
Спастѝ хотѧ̀ ᲂу҆ченика̀ твоегѡ̀ досїѳе́а ѿ ѡ҆бдержа́щагѡ є҆го̀ смертоно́снагѡ недꙋ́га, ѻ҆́тче прпⷣбне, а҆́гг҃лы во твоѐ ѻ҆бще́нїе призва́лъ є҆сѝ, съ ни́миже и҆ ви́дѣнъ бы́лъ є҆сѝ во свѣ́тлости неѡбы́чнѣй, предстоѧ̀ бж҃їей мт҃ри, но́щїю въ цр҃кви прест҃ы́ѧ трⷪ҇цы, пла́тъ, мѵ́ромъ цѣле́бнымъ чꙋде́снѡ напое́нный болѧ́щемꙋ посыла́ѧ, да ѡ҆тре́тъ и҆̀мъ тѣ́ло своѐ, и҆ а҆́бїе грѧде́тъ въ цр҃ковь на всено́щное бдѣ́нїе прилꙋчи́вшагѡсѧ ра́ди вели́кагѡ пра́здника всемі́рнагѡ воздви́женїѧ крⷭ҇та̀ гдⷭ҇нѧ, поѧ̀ бг҃ꙋ, си́лою крⷭ҇тною ᲂу҆крѣплѧ́ющемꙋ ст҃ы́хъ свои́хъ на по́мощь вѣ̑рнымъ: А҆ллилꙋ́їа.
І҆́косъ і҃.
Стѣна̀ є҆сѝ и҆ ѡ҆гражде́нїе ѿ врагѡ́въ ви́димыхъ и҆ неви́димыхъ достоѧ́нїю твоемꙋ̀, въ не́мже, ѻ҆́тче, жи́тельствовалъ є҆сѝ и҆ ны́нѣ пребыва́еши въ нетлѣ́ннѣмъ тѣлесѝ твое́мъ. сегѡ̀ ра́ди є҆гда̀ нечести́вїи і҆сма́илиты ѡ҆быдо́ша го́рꙋ поча́евскꙋю во вре́мѧ бра́ни Зба́ражскїѧ, а҆́бїе ꙗ҆ви́лсѧ є҆сѝ верхꙋ̀ є҆ѧ̀ на ѻ҆́блацѣхъ нбⷭ҇ныхъ, въ свѣ́тлости неѡбы́чнѣй предста́тельствꙋѧ пред̾ ст҃о́ю дв҃ою бцⷣею, да не преда́стъ въ нево́лю сꙋпоста́тѡмъ ѡ҆би́тели, и҆дѣ́же бы́лъ є҆сѝ и҆гꙋ́менъ: є҆́же ви́дѣвше и҆́ноцы и҆ лю́дїе, во ѡ҆би́тели ѡ҆бложе́ннїи, припа́дающе къ ра́цѣ чтⷭ҇ны́хъ моще́й твои́хъ, вопїѧ́хꙋ тѝ:
Ра́дꙋйсѧ, со а҆́гг҃льскими си́лами предстоѧ́й цр҃и́цѣ нбⷭ҇ной проти́вꙋ полкѡ́въ невѣ́рныхъ а҆га́рѧнъ: ра́дꙋйсѧ, и҆́хже стрѣла́ми, на главы̀ и҆́хъ возвраща́ющимисѧ, ꙗ҆́кѡ мо́лнїею и҆̀хъ порази́вый.
Ра́дꙋйсѧ, ꙗ҆́кѡ сегѡ̀ ра́ди вразѝ крⷭ҇та̀ хрⷭ҇то́ва спѣ́шнѣ ѿбѣго́ша ѿ ѡ҆би́тели поча́евскїѧ, дрꙋ́гъ дрꙋ́га во ᲂу҆́жасѣ поража́юще: ра́дꙋйсѧ, ꙗ҆́кѡ мно́зи ѿ ни́хъ, стра́хомъ бж҃їимъ наставлѧ́еми, хрⷭ҇тїа́нскꙋю вѣ́рꙋ прїе́мше, на послꙋша́нїи монасты́рстѣмъ въ поча́евѣ да́же до кончи́ны своеѧ̀ пребы́ша.
Ра́дꙋйсѧ, ꙗ҆́кѡ предста́тельствомъ твои́мъ къ бцⷣѣ всѧ̑ бл҃га̑ѧ вѣ̑рнымъ во и҆збавле́нїе и҆́хъ прїидо́ша. Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ а҃і.
Пѣ́нїе всѧ́кое не довлѣ́етъ къ прославле́нїю пренбⷭ҇нагѡ вели́чества твоегѡ̀ и҆ вла́сти, ꙗ҆́же ѿ гдⷭ҇а, всебл҃же́нне ѻ҆́ч҃е: ꙗ҆́кѡ не то́чїю правосла̑внымъ, но и҆ врагѡ́мъ, є҆гда̀ попꙋще́нїемъ бж҃їимъ, во вла́сти и҆́хъ бѧ́ше гора̀ поча́евскаѧ, неисчє́тныѧ да́ры и҆ бл҃годѣѧ̑нїѧ вразꙋмлѧ́ѧ ниспосыла́лъ є҆сѝ, ѻ҆́выхъ ᲂу҆̀бо ѿ дꙋхѡ́въ нечи́стыхъ, ѻ҆́выхъ ѿ болѣ́зней и҆ смертоно́сныхъ ра́нъ и҆сцѣлѧ́ѧй, ѻ҆́выхъ же поꙋча́ѧй сꙋдо́мъ тѧ́жкимъ и҆ видѣ̑нїи многоѡбра́зными, да чтꙋ́тъ тѧ̀, ꙗ҆́кѡ и҆́стиннагѡ слꙋгꙋ̀ бж҃їѧ: є҆́же сі́и и҆ нача́ша твори́ти, доне́лѣже чтⷭ҇ны̑ѧ мо́щи твоѧ̑, кꙋ́пнѡ со ѡ҆би́телїю поча́евскою, не бѧ́хꙋ па́ки возвраще́ни во ѡ҆держа́нїе правосла́внымъ, съ пѣ́снїю ѡ҆ тебѣ̀ бг҃ꙋ бл҃года́рственною: А҆ллилꙋ́їа.
І҆́косъ а҃і.
Ꙗ҆́кѡ свѣтопрїи́мнаѧ свѣща̀ є҆ле́емъ бл҃года́ти возжже́ннаѧ, ꙗ҆́кѡ свѣ́точь многосвѣ́тлый, на высотѣ̀ стоѧ́й, свѣтопода́тельнѣ сїѧ́еши всѣ̑мъ концє́мъ землѝ, ѻ҆́тче на́шъ і҆́ѡвѣ: сегѡ̀ ра́ди и҆ восто́къ тѧ̀ ᲂу҆блажа́етъ: и҆ сѣ́веръ велича́етъ, и҆ ю҆́гъ восхвалѧ́етъ и҆ за́падъ по премно́гꙋ прославлѧ́етъ. мы́ же во свѣ́тѣ лица̀ твоегѡ̀ текꙋ́ще къ свѣ́тꙋ невече́рнемꙋ и҆ къ ра́зꙋмꙋ бж҃е́ственномꙋ наставлѧ́еми, вопїе́мъ тѝ ѿ полноты̀ серде́чныѧ:
Ра́дꙋйсѧ, превѣ́чнагѡ а҆рхїере́а хрⷭ҇та̀ вѣ́рный слꙋжи́телю, за бл҃гоче́стїе своѐ а҆рхїере́йскима рꙋка́ма и҆з̾ спꙋ́да земна́гѡ и҆з̾ѧ́тый и҆ ѿкры́тый длѧ всенаро́днагѡ почита́нїѧ: ра́дꙋйсѧ, цр҃ѧ̀ нбⷭ҇нагѡ и҆ влⷣки непобѣди́мый ратобо́рче, бл҃гочести́выхъ же царе́й на́шихъ спобо́рниче и҆ ᲂу҆твержде́нїе.
Ра́дꙋйсѧ, мл҃твенниче и҆ сопредстоѧ́телю прест҃ы́ѧ бцⷣы непреста́нный, кꙋ́пнѡ съ і҆кѡ́ною є҆ѧ̀ чтⷭ҇но́ю и҆ стопо́ю цѣльбоно́сною ѿ всѣ́хъ на го́рꙋ поча́евскꙋю притека́ющихъ почита́емый: ра́дꙋйсѧ, а҆́гг҃лѡвъ бж҃їихъ и҆ ст҃ы́хъ на нбⷭ҇ѝ кꙋпножи́телю преизрѧ́дный, во хра́мѣ, честно́мꙋ и҆́мени твоемꙋ̀ посщ҃е́нномъ на землѝ, ѿ приходѧ́щихъ къ тебѣ̀ ᲂу҆блажа́емый.
Ра́дꙋйсѧ, сто́лпе вѣ́ры, про́мысломъ бж҃їимъ на кра́йнемъ за́падѣ рѡссі́йскїѧ землѝ водрꙋже́нный, да всѣ̑мъ ѿ вѣ́ры и҆ праѻте́ческагѡ бл҃гоче́стїѧ заблꙋ́ждшымъ сыновѡ́мъ за́пада и҆нозе́мнагѡ пꙋ́ть до́брый къ и҆́стинномꙋ правовѣ́рїю, є҆́же въ цр҃кви на́шей правосла́внѣй, показꙋ́еши.
Ра́дꙋйсѧ, і҆́ѡвѣ, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ в҃і.
Бл҃года́тїю, да́нною тѝ свы́ше, чꙋдодѣ́йствꙋѧ на горѣ̀ поча́евстѣй, прпⷣбне, не ѡ҆ставлѧ́еши ны̀ и҆ во вре́мѧ сїѐ: но ꙗ҆́коже дре́вле, си́це и҆ до дне́шнѧгѡ днѐ, не то́чїю притека́ющїи къ ра́цѣ многоцѣле́бныхъ моще́й твои́хъ, но и҆ всѝ ѿдале́че тебѐ призыва́ющїи и҆ на тѧ̀ ᲂу҆пова́ющїи слѣпі́и прозира́ютъ, хромі́и хо́дѧтъ, разсла́бленнїи возстаю́тъ, бѣснꙋ́ющїисѧ и҆сцѣлѧ́ютсѧ, стра́ждꙋщїи ᲂу҆тѣша́ютсѧ, ᲂу҆грожа́емїи ѕлы́мъ повѣ́трїемъ ѿ смертоно́сныѧ ꙗ҆́звы и҆збавлѧ́ютсѧ, землѝ плодоно́сїе подае́тсѧ, гра́ды и҆ до́мы ѿ трꙋ́са, пото́па и҆ ѻ҆гнѧ̀ спаса́ютсѧ, во є҆́же всѣ́мъ ѿ тебѐ вспомоществꙋ́ємымъ и҆ та́кѡ тобо́ю хва́лѧщымсѧ пѣ́ти бг҃ꙋ въ ра́дованїи се́рдца своегѡ̀: А҆ллилꙋ́їа.
І҆́косъ в҃і.
Пою́ще пресла́вное ѡ҆ тебѣ̀ смотре́нїе бж҃їе и҆ чꙋдесы̀ твоѧ̑, прпⷣбне ѻ҆́тче, мо́лимъ тѧ̀ всеꙋсе́рднѡ, рабѝ твоѝ, не забꙋ́ди на́съ и҆ во всѐ приснотекꙋ́щее вре́мѧ живота̀ на́шего, но всегда̀ пребыва́й съ на́ми, да твои́мъ застꙋпле́нїемъ и҆ по́мощїю ѡ҆гражда́еми, спаса́еми и҆ и҆збавлѧ́еми ѿ всѣ́хъ ѕѡ́лъ ви́димыхъ и҆ неви́димыхъ, вопїе́мъ тѝ до сконча́нїѧ вѣ́ка:
Ра́дꙋйсѧ, ми́лости вели́кїѧ сокро́вище: ра́дꙋйсѧ, бж҃е́ственнагѡ промышле́нїѧ ѡ҆ лю́дехъ прїѧ́телище.
Ра́дꙋйсѧ, ненаде́жныхъ надѣ́ѧнїе: ра́дꙋйсѧ, са́мыхъ ѿча́ѧнныхъ спасе́нїе.
Ра́дꙋйсѧ, є҆гѡ́же бл҃гопоспѣ́шными мл҃твами ѿ вѣ́чныѧ сме́рти свобожда́емсѧ.
Ра́дꙋйсѧ, і҆́ѡве, пресла́вный ᲂу҆го́дниче бж҃їй, и҆ ѡ҆би́тели поча́евскїѧ ᲂу҆краше́нїе.
Конда́къ г҃і.
Ѽ прехва́льный и҆ пречꙋ́дный ѻ҆́тче і҆́ѡве: прїимѝ ны́нѣ сїѐ ма́лое моле́нїе на́ше, тебѣ̀ ѿ любвѐ серде́чныѧ приноси́мое, и҆ твои́мъ бг҃опрїѧ́тнымъ хода́тайствомъ и҆спо́лни во бл҃ги́хъ всѧ̑ прошє́нїѧ на́ша: къ тебѣ̀ бо въ нꙋ́ждахъ прибѣга́емъ и҆ на тебѐ по бз҃ѣ и҆ бцⷣѣ всѐ ᲂу҆пова́нїе на́ше возлага́емъ, прославлѧ́юще тѧ̀, и҆ тобо́ю прославлѧ́емомꙋ пода́телю всѣ́хъ бл҃гъ, влⷣцѣ жи́зни и҆ сме́рти, пою́ще ᲂу҆се́рднѡ: А҆ллилꙋ́їа.
Се́й конда́къ глаго́ли три́жды. И҆ па́ки чте́тсѧ а҃-й і҆́косъ и҆ конда́къ а҃-й.
Мл҃тва а҃.
Ѽ всест҃ы́й и҆ пресла́вный ᲂу҆го́дниче бж҃їй, прпⷣбне ѻ҆́тче на́шъ і҆́ѡве, при́сный ѡ҆ на́съ ко гдⷭ҇ꙋ мл҃твенниче и҆ те́плый предста́телю ѡ҆ дꙋша́хъ на́шихъ: къ тебѣ̀ всеꙋмиле́ннѡ ны́нѣ притека́емъ, и҆ помина́юще по́двиги и҆ чꙋдеса̀ твоѧ̑, ꙗ҆́же сотвори́лъ є҆сѝ и҆ твори́ши на землѝ, про́симъ твою̀ бл҃госты́ню: ꙗ҆́коже тве́рдѡ и҆ неизмѣ́ннѡ потрꙋди́лсѧ є҆сѝ въ вѣ́рѣ хрⷭ҇та̀ бг҃а на́шегѡ, и҆ сїю̀ до конца̀ въ себѣ̀ и҆ во всѣ́хъ при́сныхъ твои́хъ цѣ́лꙋ и҆ невреди́мꙋ сохрани́вый ѿ всѧ́кихъ прираже́нїй вра́жїихъ и҆ є҆ресе́й тлетво́рныхъ, си́це и҆ на́съ въ правосла́вїи и҆ є҆диномы́слїи ᲂу҆крѣпѝ, ѿгонѧ́ѧ мл҃твами твои́ми всѧ́кꙋю тмꙋ̀ невѣ́рїѧ и҆ неправомы́слїѧ ѿ серде́цъ и҆ помышле́нїй на́шихъ: послꙋжи́вый гдⷭ҇ꙋ и҆ бг҃ꙋ твоемꙋ̀ дѣ́лы бл҃ги́ми и҆ неизрече́ннымъ самоѿверже́нїемъ въ трꙋдѣ́хъ, бдѣ́нїихъ и҆ поще́нїихъ, наста́ви на́съ на пꙋ́ть всѧ́кїѧ добродѣ́тели и҆ бл҃госты́ни, и҆збавлѧ́ѧ ѿ и҆скꙋше́нїй и҆ грѣхѡ́въ, ᲂу҆далѧ́ющихъ на́съ ѿ бг҃а и҆ поверга́ющихъ въ бе́зднꙋ ѕла̀ всѐ житїѐ на́ше: ꙗ҆ви́выйсѧ и҆ногда̀ съ пречⷭ҇тою дв҃ою бцⷣею верхꙋ̀ горы̀ поча́евскїѧ во спасе́нїе ѡ҆би́тели твоеѧ̀ ѿ наше́ствїѧ а҆га́рѧнскагѡ и҆ ны́нѣ ᲂу҆скорѝ на по́мощь, ᲂу҆твержда́ѧ ми́ръ и҆ тишинꙋ̀ въ землѝ на́шей, да твои́ми мл҃твами и҆ предста́тельствомъ ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀: и҆ всѣ̑мъ къ тебѣ̀ притека́ющымъ и҆ припа́дающымъ къ ра́цѣ чтⷭ҇ны́хъ и҆ многоцѣле́бныхъ моще́й твои́хъ и҆ твоеѧ̀ по́мощи и҆ застꙋпле́нїѧ тре́бꙋющымъ неѡскꙋ̑дныѧ ми́лѡсти незави́стнѡ подава́ѧй, не ѡ҆ста́ви и҆ на́съ си́рыхъ и҆ безпомо́щныхъ, тебѣ̀ молѧ́щихсѧ, и҆збавлѧ́ѧ ѿ всѧ́кїѧ ско́рби, гнѣ́ва и҆ нꙋ́жды, ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплемє́нникъ и҆ междоꙋсо́бныѧ бра́ни. Є҆́й, ᲂу҆го́дниче бж҃їй, при́зри ми́лостивнѡ ѿ прⷭ҇то́ла цр҃ѧ̀ сла́вы, є҆мꙋ́же ты̀ ны́нѣ предстои́ши со а҆рха́гг҃лы и҆ со всѣ́ми ст҃ы́ми, на ѡ҆би́тель твою̀ поча́евскꙋю, є҆́юже ты̀ дре́вле мꙋ́дрѡ пра́вилъ є҆сѝ, назда́въ ю҆̀ всехва́льнымъ и҆ ди́внымъ житїе́мъ твои́мъ, и҆ сохранѝ ю҆̀ мл҃твами твои́ми и҆ всѧ́кїй гра́дъ и҆ странꙋ̀ и҆ всѣ́хъ ѿвсю́дꙋ, на мо́ри и҆ на сꙋ́ши, въ пꙋсты́нехъ и҆ въ ѕлоключе́нїихъ многоразли́чныхъ тебѐ призыва́ющихъ, ѿ всѣ́хъ ѕѡ́лъ ви́димыхъ и҆ неви́димыхъ: да та́кѡ твое́ю по́мощїю и҆ хода́тайствомъ спаса́еми, въ вѣ́цѣ се́мъ и҆ по сконча́нїи живота̀ на́шегѡ сподо́бимсѧ кꙋ́пнѡ съ тобо́ю сла́вити и҆ воспѣва́ти всечтⷭ҇но́е и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а во вѣ́ки вѣкѡ́въ. А҆ми́нь.
Мл҃тва в҃.
Ѽ всебл҃же́нне и҆ бг҃оно́сне ѻ҆́тче на́шъ і҆́ѡве, и҆́ноческагѡ а҆гг҃лоподо́бнагѡ житїѧ̀ бг҃омꙋ́дрый наста́вниче, вѣ́ры правосла́вныѧ восточнокаѳолі́ческїѧ проти́вꙋ лжемꙋдрова́нїй за́пада непреѡбори́мый защи́тниче и҆ побо́рниче, бг҃опре́данныхъ ᲂу҆ста́вѡвъ цр҃кве и҆ преда́нїй ѻ҆ч҃ескихъ вѣ́рный блюсти́телю и҆ стро́гїй взыска́телю, свѧ́тости и҆ чистоты̀, цѣломꙋ́дрїѧ и҆ нестѧжа́нїѧ, трꙋдолю́бїѧ и҆ бг҃омы́слїѧ, поста̀ и҆ бдѣ́нїѧ вели́кїй ревни́телю, долготерпѣ́нїѧ и҆ ѕлострада́нїѧ неꙋтоми́мый и҆ непобѣди́мый ратобо́рче, ѡ҆́бразъ кро́тости, зерца́ло смире́нїѧ, примѣ́ръ неѕло́бїѧ, по́стникѡвъ ᲂу҆добре́нїе, дѣ́вственникѡвъ похвало̀, мона́хѡвъ и҆ схимона́хѡвъ ра́досте. По и҆́мени твоемꙋ̀, прпⷣбне ѻ҆́ч҃е, ꙗ҆́коже и҆ дре́внѧго ѻ҆́наго і҆́ѡва, многострада́льна и҆ пра́ведна, и҆ житїѐ твоѐ бы́сть пра́ведно и҆ непоро́чно ѿ младе́нческихъ пеле́нъ, всѣ́ми дѣ́лы бл҃ги́ми, ꙗ҆́кѡ многоцѣ́ннымъ би́серомъ, бл҃гоꙋкраше́нно и҆ бл҃годꙋ́шнымъ терпѣ́нїемъ чрез̾ мнѡ́га лѣ̑та скорбе́й и҆ болѣ́зней, па́че зла́та и҆ сребра̀ въ горни́лѣ и҆скꙋше́нныхъ просїѧ́въ. Е҆ще́ бо сы́й двана́десѧти то́чїю лѣ́тъ, воспрїѧ́лъ є҆сѝ на сѧ̀ и҆́го хрⷭ҇то́во съ вели́кимъ ѡ҆́бразомъ мона́шескимъ и҆ да́же до ста́рости и҆ престарѣ́нїѧ вѧ́щше девѧти́десѧти лѣ́тъ, бл҃годꙋ́шнѡ и҆ неѡсла́бнѡ, не поползнове́ннѡ и҆ небла́зненнѡ поне́слъ є҆сѝ, проше́дъ всѧ́къ пꙋ́ть пра́вды и҆ ст҃ы́ни въ постѣ̀ и҆ мл҃твѣ, въ колѣнопреклоне́нїихъ и҆ бдѣ́нїихъ и҆ та́кѡ на высотꙋ̀ добродѣ́телей и҆зрѧ́днꙋ, вспомоществꙋ́емь бл҃года́тїю бж҃їею, по степе́нємъ возше́лъ є҆сѝ, ꙗ҆́кѡ всѣ̑мъ диви́тисѧ и҆ ᲂу҆блажа́ти тѧ̀ за премно́гꙋю добродѣ́тель и҆ любомꙋ́дрїе твоѐ, не то́чїю въ предѣ́лѣхъ ѻ҆те́чествїѧ твоегѡ̀, но и҆ въ страна́хъ ѡ҆́крестъ сꙋ́щихъ: ѡ҆ чесо́мъ слы́шавъ бг҃олюби́вый кн҃зь ѻ҆стро́жскїй и҆ вельмѝ возжела́въ и҆мѣ́ти тѧ̀ рꙋководи́телѧ себѣ̀ на пꙋтѝ спасе́нїѧ крⷭ҇товоздви́женской ѡ҆би́тели свое́й, ꙗ҆́же на ѻ҆́стровѣ дꙋ́бенстѣмъ, предстоѧ́телѧ и҆ наста́вника, моле́нїемъ любвѐ своеѧ̀ привлечѐ тѧ̀, ѿѻнꙋ́дꙋже и҆ ст҃ѣ́й ѡ҆би́тели поча́евской, ꙗ҆́кѡ сокро́вище ве́лїе и҆ неѡцѣне́нное дарова́лсѧ є҆сѝ. Тѣ́мже и҆ првⷣный сꙋдїѧ̀ и҆ мздовозда́тель бг҃ъ, и҆́же вѣ́сть сꙋ́щыѧ своѧ̑, пре́жде да́же не бы́ти и҆̀мъ, ѡ҆бѣща́вый вѣ̑рнымъ рабѡ́мъ свои́мъ за трꙋды̀ и҆ по́двиги и҆́хъ во сла́вꙋ є҆гѡ̀ и҆́мени возда́ти стори́цею, свы́ше призрѣ̀ на смире́нїе твоѐ и҆ вознесѐ тѧ̀ и҆ просла́ви тѧ̀ на землѝ живы́хъ, дарова́въ дꙋхоно́сномꙋ тѣлесѝ твоемꙋ̀ да́ръ нетлѣ́нїѧ и҆ бл҃года́ть врачева́нїѧ недꙋ́гѡвъ дꙋше́вныхъ и҆ тѣле́сныхъ длѧ всѣ́хъ съ вѣ́рою и҆ любо́вїю ко всечтнѣ́й ра́цѣ твое́й притека́ющихъ, мл҃твѣ же твое́й си́лꙋ и҆ крѣ́пость непобѣди́мꙋю, врагѡ́въ ви́димыхъ и҆ неви́димыхъ ᲂу҆страша́ющꙋю и҆ поража́ющꙋю, є҆гда́ бо и҆ноплеме́нницы ѻ҆́ны і҆смаели́тстїи, и҆̀хже гдⷭ҇ь бг҃ъ є҆щѐ въ пра́ѻтцѣ и҆́хъ ѿ ро́да и҆ до́мꙋ а҆враа́млѧ ѿри́нꙋлъ, вразѝ крⷭ҇та̀ хрⷭ҇то́ва, ѡ҆блего́ша го́рꙋ и҆ ѡ҆би́тель поча́евскꙋю, хотѧ́ще ю҆̀ до конца̀ разори́ти, тогда̀ ты̀, ѻ҆́ч҃е прехва́льне, бы́лъ є҆сѝ хода́тай ст҃ы́ми твои́ми мл҃твами ко всемогꙋ́щемꙋ и҆ всебл҃го́мꙋ бг҃ꙋ и҆ къ пребл҃гослове́ннѣй дв҃ѣ мр҃і́и бцⷣѣ, и҆ бла́гостїю, тебѣ̀ ѿ бг҃а да́нною, и҆ предста́тельствомъ прест҃ы́ѧ бцⷣы, ѿгна́лъ є҆сѝ всѐ безꙋ́мїе сꙋпоста́тѡвъ тѣ́хъ и҆ всю̀ ꙗ҆́рость и҆́хъ разрꙋши́въ и҆ крѣ́пость побѣди́въ, сотвори́лъ є҆сѝ и҆̀хъ бѣжа́ти со стра́хомъ и҆ тре́петомъ. При́зри ᲂу҆̀бо и҆ ны́нѣ ѻ҆́комъ бл҃гоꙋтро́бїѧ твоегѡ̀, прилѣ́жнѡ мо́лимъ тѧ̀, ѡ҆бстоѧ́ще ст҃ы́ѧ и҆ многоцѣлє́бныѧ мо́щи твоѧ̑ и҆ ᲂу҆се́рднѡ лобыза́юще ѧ҆̀, при́зри на на́съ недосто́йныхъ ча́дъ и҆ рабѡ́въ твои́хъ, встꙋпи́вшихъ въ стєзѝ твоѧ̑, но немогꙋ́щихъ пра́вѡ по ни́мъ ше́ствовати, и҆ на мѣ́сто сїѐ ѿ лѣ́тъ дре́внихъ бг҃оизбра́нное и҆ чꙋдесы̀ просла́вленное, въ не́мже и҆́мѧ твоѐ призыва́етсѧ и҆ є҆го́же ты̀ по́ты трꙋдѡ́въ твои́хъ бг҃оꙋго́дныхъ ѡ҆роси́лъ и҆ воздѣ́лалъ є҆сѝ, и҆ ѡ҆градѝ є҆го̀ и҆ на́съ мл҃твами твои́ми ѿ всѧ́кагѡ навѣ́та вра́жїѧ и҆ ѕла́гѡ ѡ҆бстоѧ́нїѧ, сохранѧ́ѧ и҆ соблюда́ѧ всѣ́хъ и҆ ка́ждаго въ ми́рѣ и҆ тишинѣ̀, въ вѣ́рѣ нелицемѣ́рнѣй и҆ бг҃оꙋго́дномъ жи́тельствѣ. Пода́ждь же, ᲂу҆го́дниче бж҃їй, и҆ всѣ̑мъ приходѧ́щымъ сѣ́мѡ и҆ твоеѧ̀ по́мощи и҆ застꙋпле́нїѧ и҆́щꙋщымъ, бла́гость и҆ ми́лость ѿ хрⷭ҇та̀ бг҃а на́шегѡ и҆ пречⷭ҇тыѧ є҆гѡ̀ мт҃ре, да никто́же и҆зы́детъ ѿсю́дꙋ въ тꙋзѣ̀ и҆ ско́рби, въ печа́ли и҆ сѣ́тованїи, постыжде́нъ и҆ посра́мленъ въ надѣ́ѧнїи свое́мъ, но кі́йждо, по мѣ́рѣ вѣ́ры и҆ любвѐ своеѧ̀, да воспрїи́метъ себѣ̀ понѐ нѣ́кꙋю ѿра́дꙋ и҆ ᲂу҆тѣше́нїе, ѡ҆блегче́нїе и҆ подкрѣпле́нїе, защи́тꙋ и҆ по́мощь, во сла́вꙋ бг҃а трист҃а́гѡ, є҆мꙋ́же подоба́етъ всѧ́каѧ сла́ва, че́сть и҆ поклоне́нїе ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.