Акафист святому преподобному Феодосию Кавказскому

Кондак 1

Избранный угодниче Христов и преславный чудотворче, преподобне отче Феодосие, подвиги твоими Ангелы удививый и человеки многия из глубины греховныя изведый, умоли и о нас прославльшаго тя Господа и от бед и напастей нас свободи, любовию зовущих ти:

Радуйся, преподобне Феодосие, Кавказский чудотворче.

Икос 1

Ангелов Творец избра тя от чрева матере твоея и в рождестве твоем показа знамение будущаго иноческаго жития твоего, да будеши, богоблаженне Феодосие, молитвенник ко Господу и Пречистей его Матери за весь мир. Мы же, грешнии, уповающе на скорую помощь твою, взываем ти сице:

Радуйся, от чрева матере Господом избранный; радуйся, еще в детстве к служению Богу преднареченный.

Радуйся, в рождестве твоем чудное знамение монашескаго жития явивый; радуйся, в юности строгость иноческаго жития показавый.

Радуйся, Христа всем сердцем возлюбивый; радуйся, ум и сердце Господу предавый.

Радуйся, народа российскаго молитвенное ограждение; радуйся, земли Кавказския священное украшение.

Радуйся, преподобне Феодосие, Кавказский чудотворче.

Кондак 2

Видя Господь благое сердца твоего изволение, яко от младенчества имел еси велию любовь к Нему и немолчно прославлял еси Имя Господне, уготова ти ангельское житие во Святей Горе Афонстей, идеже во смирении и послушании научался еси Единаго Бога любити и Того ради вся земная презирати, вопия Ему: Аллилуиа.

Икос 2

Разум богопросвещен имея, преподобне отче Феодосие, на Раевом камне от младенчества молитися Богу навыкл еси, веру крепкую, надежду несумненную, любовь истинную к Нему стяжал еси и стопы своя ко Святей Горе Афонстей направил еси, тем же ублажаем тя сице:

Радуйся, от младенчества молитву ко Господу творивый; радуйся, выну любовию пламенною к Нему горевый.

Радуйся, на Святой Горе Афонстей во отрочестве чин ангельский принявый; радуйся, тамо многая послушания понесый.

Радуйся, усердный к Богу и Матери Божией молитвенниче; радуйся, покаяния проповедниче.

Радуйся, скорбящим скорое утешение и вразумление; радуйся, присное и неложное их умирение.

Радуйся, преподобне Феодосие, Кавказский чудотворче.

Кондак 3

Силу, данную ти свыше, принял еси, преподобне отче Феодосие, изгоняти всякую силу вражию. И того ради с кротостию и смирением уврачевал еси одержимую бесом жену знатную, да сие чудо видяще, вси людие прославиша Бога, вопиюще Ему: Аллилуиа.

Икос 3

Имуще тя, изрядный угодниче Христов Феодосие, воителя противу силы бесовския, теплаго молитвенника и предстателя пред Господем о нас, недостойных, любовию твоею побеждаеми, со умилением зовем ти:

Радуйся, многия дары духовныя от Господа получивый; радуйся, темиже козни диавольския победивый.

Радуйся, жену, бесом одержимую, во отрочестве твоем исцеливый; радуйся, плотския похоти умертвивый.

Радуйся, силу чудес Божиих явивый; радуйся воине Христов добропобедный.

Радуйся, предстателю о нас к Богу и Богородице непостыдный; радуйся, Небеснаго Царя избранниче предивный.

Радуйся, преподобне Феодосие, Кавказский чудотворче.

Кондак 4

Бурю гнева неправеднаго от братии претерпел еси, блаженне Феодосие, имиже в нечистоты ввержен, Пречистою же Богородицею чудесно извлечен был еси. Сего ради, зряще о тебе таковое Матере Божия благоволение, вопием Всевышнему Богу: Аллилуиа.

Икос 4

Слышавше о бывшем на тебе чудеснем излиянии милости Пресвятыя Девы Марии и Архистратига Божия Михаила, мы, грешнии, прославляем дивнаго во святых Своих Господа и Его Пречистую Матерь со Архангелом и вопием ти:

Радуйся, Царицею Небесною от смерти спасенный; радуйся, Архистратигом Михаилом от посрамления избавленный.

Радуйся, тесный путь спасения возлюбивый; радуйся, ярем Господень на выю свою возложивый.

Радуйся, от братии в монастыре всяческая поношения претерпевый; радуйся, незлобие младенческое имевый.

Радуйся, рабе Господень благий и верный; радуйся, скорый помощниче всем скорбящим и обремененным.

Радуйся, преподобне Феодосие, Кавказский чудотворче.

Кондак 5

Божественный Огнь благодатный видя, на Гробе Господнем в Великую Субботу чудесно возгораемый, и сим Огнем освященный, многие годы послужил еси, преподобне отче Феодосие, во Святей Земле, выну взывая Богу: Аллилуиа.

Икос 5

Видяще тя очами веры чада твоя, преподобне отче Феодосие, со благоговением у Гроба Господня служаща и со дерзновением Ему мольбы о стране Российстей приносяща, удивлением объяты, благодарно вопием ти:

Радуйся, во Земле Святей благодатно поживый; радуйся, по стопам Спасителя ходивый.

Радуйся, Огнем благодатным освятивыйся; радуйся, любовью к Богу воспламенивыйся.

Радуйся, пред Гробом Господним служителю усердный; радуйся, молитвенниче к Богу и Богородице о нас неусыпный.

Радуйся, веру Христову миру являяй; радуйся, всюду Христа прославляяй.

Радуйся, преподобне Феодосие, Кавказский чудотворче.

Кондак 6

Проповедник смирения и покаяния был еси, отче, примером жития твоего незлобие и всепрощение показуя, якоже светило многосветлое тьму неведения и уныния от приходящих к тебе отгонял еси и всех увещевал плоть духови покоряти и чистым сердцем пети Богу: Аллилуиа.

Икос 6

Приемый от Господа благодать разумения о Пресвятей Троице на Афонстей Горе, во Иерусалиме и Царьграде, в земли Российстей Православныя веры проповедник явился еси. Мы же, верующе православно во Святую Троицу, с любовию вопием ти:

Радуйся, веры Православныя проповедниче; радуйся, предивный Божий избранниче.

Радуйся, усердно призывающим тя помощниче; радуйся, добрый стада своего наставниче.

Радуйся, людей земли Российския усердный заступниче; радуйся, к Богу и Богородице непрестанный о них молитвенниче.

Радуйся, Царствия Небеснаго наследниче; радуйся, веры Христовой дерзновенный исповедниче.

Радуйся, преподобне Феодосие, Кавказский чудотворче.

Кондак 7

Хотя Человеколюбец Господь явити в тебе, преподобне, Свое неизреченное к людям милосердие, показа тя, яко воистину светило богосветлое: скорым твоим ходатайством чудеса многая и преславная совершаются. Ты же, старче, и при жизни достиг посещения небесных служителей, благодарне прославляя Всевышняго Бога: Аллилуиа.

Икос 7

Новаго видяще тя избранника Божия, издалеча притекаху к тебе вернии в скорбех и болезнех, егда источник в пустыне ископал еси, старче Феодосие, и благодать на воду сию у Пресвятыя Троицы испросил еси исцеляти телесныя и душевныя недуги. Сего ради взываем ти:

Радуйся, старче, рабе Господень; радуйся, верный источниче благодатный.

Радуйся, духовною пищею алчущия питаяй; радуйся, святою водою из источника твоего верным жажду утоляяй.

Радуйся, при жизни посещения Царицы Небесныя сподобивыйся; радуйся, и святыми небожителями не оставленный.

Радуйся, яко благословением и советы людям верующим помогаяй; радуйся, всех с верою к тебе притекающих на путь спасения наставляяй.

Радуйся, преподобне Феодосие, Кавказский чудотворче.

Кондак 8

Странное и преславное чудо даровал ти Господь, преподобне отче Феодосие, дар молитвенный, живых заступающий и от ада спасающий. Мы же Господу нашему, даровавшему нам, на Кавказе живущим, таковаго молитвенника и ходатая о нас, вопием: Аллилуиа.

Икос 8

Всего себе Христу от чрева матерняго предал еси, блаженне Феодосие, умиленным сердцем и сокрушенною душею Тому всегда предстоя и духовная чада твоя научая хранити смирение и самоукорение и дар умиления стяжати. Сия ведяще, восхваляем тя сице:

Радуйся, Безкровныя Жертвы достойный совершителю; радуйся, Алтаря Господня благоговейный служителю.

Радуйся, дарований духовных светильниче; радуйся, новыя обители иноческия начальниче.

Радуйся, заточение Христа ради претерпевый; радуйся, изгнание ближним предсказавый.

Радуйся, любящим и чтущим тя ходатаю спасения; радуйся, приводяй грешников ко исправлению.

Радуйся, преподобне Феодосие, Кавказский чудотворче.

Кондак 9

Вси людие удивляхуся тебе, старче Феодосие, яко призыванием Господа и молитвенным твоим ходатайством бесы изгоняются и одержимые исцеляются. Тако и мы, к мощем твоим приходяще, умиленно возглашаем Богу: Аллилуиа.

Икос 9

Разум человеческий не может изрещи обилие благодати духовныя, еюже ты, отче Феодосие, преисполнен, юже и мы получаем, в молитве к тебе прибегающе. Сего ради сицевое пение приносим тебе:

Радуйся, молитвами твоими тьму напастей от нас отгоняяй; радуйся, на путь отрешения от мира нас наставляяй.

Радуйся, страданиями душу обогативый; радуйся, утешение чадам духовным явивый.

Радуйся, Господом укрепленный; радуйся, Духом Святым просвещенный.

Радуйся, среди горских народов поживый; радуйся, с иноверными в мире жити учивый.

Радуйся, преподобне Феодосие, Кавказский чудотворче.

Кондак 10

Богоборная гонения на Церковь Православную видя, ты, отче Феодосие, верных ради подвиг юродства приял еси, да явиши людем премудрости Божией велия дары, вопия Ему: Аллилуиа.

Икос 10

Стена ты еси и твердое прибежище к заступлению твоему прибегающим, чудотворче Феодосие. Темже в бедах, скорбех, обстояниих и лишениих многих пребывающе, радуяся твоему о нас заступлению, благодарно вопием ти:

Радуйся, в юродстве силу Божию людем православным явивый; радуйся, грядущая, яко настоящая, провидевый.

Радуйся, прегрешений сокровенных обличителю прозорливый; радуйся, жителем града Минводы скорби в притчах предсказавый.

Радуйся, детей малых от огненнаго запаления чудесно избавивый; радуйся, призывающим тя скорый помощниче.

Радуйся, любви и смирению свою паству научаяй; радуйся, от помысла греховнаго упавших духом отвращаяй.

Радуйся, преподобне Феодосие, Кавказский чудотворче.

Кондак 11

Пение всеумиленное Пресвятей Троице принесл еси, егда душу свою Спасителю мира в руце предал еси и с лики Ангел в небесныя селения вселился еси, воспевая Богу: Аллилуиа.

Икос 11

Видевше людие, угодниче Божий Феодосие, мирную кончину твою и чудеса на гробе твоем творимая, возрадовашася. Темже в уповании всесильнаго предстательства твоего у Престола Пресвятыя Троицы уверишася, с любовию взывают ти:

Радуйся, яко Господь тя в обители небесныя всели; радуйся, яко кончину твою колокольный звон чудесно возвести.

Радуйся, яко гроб твой Ангели сопровождаша; радуйся, яко на могиле твоей столп огненный людие видеша.

Радуйся, яко от мощей твоих верные получают исцеление; радуйся, притекающих к гробу твоему крепкое заступление.

Радуйся, Таин Божиих вечный зрителю; радуйся, от бед и горя скорый избавителю.

Радуйся, преподобне Феодосие, Кавказский чудотворче.

Кондак 12

Благодать Божию приял еси, преславне Феодосие, яко при жизни твоей светильник был еси приходящим к тебе с верою, и по смерти своей возсиял еси светом чудес твоих. Людие же, дивящеся о славе твоей, взывают Богу со умилением: Аллилуиа.

Икос 12

Поюще Бога, дивнаго во святых Своих, восхваляем тя, преподобне отче Феодосие, ты бо еси образ жития юным, правило веры мужем, учитель старцев, нам же всем молитвенник и предстатель. Сего ради вопием ти:

Радуйся, долголетием от Бога одаренный; радуйся, и по смерти чад своих не оставивый.

Радуйся, обилие чудес верным явивый; радуйся, всем с верою приходящим к мощем твоим помогаяй.

Радуйся, на стезю спасения всех наставляяй; радуйся, Церковь Святую от неверия и расколов сохраняяй.

Радуйся, в обстаяниих и напастех верный о нас молитвенниче; радуйся, пастырей земли Кавказския покровителю и скорый помощниче.

Радуйся, преподобне Феодосие, Кавказский чудотворче.

Кондак 13

О, пречудный угодниче Божий и чудотворче, преподобне отче Феодосие! Ты воистину дар Божий еси нам, иже во иночестве, и во священстве, и во юродстве Триипостаснаго Бога прославил еси. Приими малое сие моление наше и умоли Господа Бога, да помилует нас твоими мольбами и на путь покаяния всех наставит, вопиющих Ему: Аллилуиа.

Этот кондак читается трижды, затем 1-й икос: «Ангелов Творче…» и 1-й кондак: «Избранный угодниче…».

Молитва

О святый угодниче Божий, преподобне отче Феодосие!

Ты, от юности Христа возлюбивый и Единому Ему последовавый, удалился еси в удел Матери Божия, на Святую Гору Афонскую, и оттуду ко Гробу Господню притекл еси. Тамо во священном чине многая лета пребывая, совершал усердная моления за землю Российскую, за Церковь Православную и за народ русский. Егда же постиже Русь Святую лихолетие безбожия, ты, оставив Афон и Иерусалим, вернулся еси во Отечество свое, разделяя скорби народа своего и Церкви нашея Святыя, якоже монах и священнослужитель, даже до темничнаго заточения. Вера твоя, кротость, смирение и терпение умиляху огрубевшая сердца в заточении с тобою пребывавших. В годы брани ты, отче, помогал народу православному одолети врага и супостата, и многих, от уныния, горя и отчаяния самовольне живот свой скончати желавших, спасл еси. Помощию твоею укрепляхуся вернии во уповании своем, яко не оставит Господь Отечество наше, Матерь Божия сохранит удел Свой, и гнев Божий Ея молитвами на милость претворится. Многотрудный твой подвиг юродства Христа ради удиви, отче, не токмо нас, земных, но и небожителей, являвшихся тебе. Вся бо может сотворити молитва праведника, верою крепкою поспешествуемая.

Ты веси нужды и печали наша, преподобне отче Феодосие, веси и желание наше со Христом быти. Пройдя тесный и тернистый путь земнаго бытия, ты несл ярем тяжкий от братий своих, от неверных и соплеменников. Помяни нас, старче Божий, у Престола Господня, яко обещался еси помогати всем, иже обратится к тебе.

Память твоя, отче, на земли Кавказстей не оскудевает и поныне: се бо с верою и упованием притекают православнии людие к мощем твоим, просяще заступления и помощи. Просим тя, преподобне отче Феодосие: помози нам в трудный час жизни нашея, в минуты скорбей и страданий, умоли Начальника мира Господа, да умягчит Он злая и огрубевшая сердца человеческая и умирит народы Кавказа, да разорит нечестивые советы раскольников и еретиков, возстающих на Святую Церковь Русскую.

Твоими молитвами, святче Божий, да простит нам Господь всякая прегрешения, да минуют нас стрелы вражия и козни диавольския. Испроси у Творца и Промыслителя жизни нашея время на покаяние, от пагубы избавление, болящим здравие, падшим возстановление, скорбящим утешение, чадом в страхе Божием воспитание, отходящим к вечности благое уготовление, отшедшим упокоение и Небеснаго Царствия наследование.

Буди, отче Феодосие, покровителем и помощником всем верным земли Кавказския. Да укрепится и умножится на ней и во всей Руси Велицей Святое Православие. Мы же, святыми твоими молитвами укрепляеми, прославим Живоначальную Троицу и твое освященное Богом имя, ныне и присно и во веки веков. Аминь.

Тропарь, глас 4

От юности Христа возлюбил еси, блаженне, Его же ради на Святой Афон и ко Гробу Господню удалился еси. Тамо благодатию, даром чудес обогатился еси и паки в страну Российскую к людем своим возвратился еси. Народы Кавказа в годину гонений молитвами и чудесами многими в Православии укрепил еси. Преподобне отче Феодосие, моли Христа Бога, да укрепит Господь люди зде живущия, и оградит землю нашу миром, и спасет всех, яко милосерд.

Кондак

Всю жизнь Христу Богу отдал еси, преподобне отче Феодосие, подвиги молитвы, стояния у Гроба Господня, поста, воздержания, юродства, темничнаго заточения Его ради претерпел еси до конца. Темже и Христос долголетием и чудесами тя обогати, яко и доныне людие земли нашея к мощем твоим притекают с верою и получают просимое. Отче наш Феодосие предивный, моли Господа Бога и Владыку всех о сохранении в стране Российстей Православия, умирениии мира и спасении душ наших.