А҆ка́ѳїстъ ст҃ѣ́й бл҃же́ннѣй ѯе́нїи петербꙋ́ргской.
Конда́къ а҃.
И҆збра́ннаѧ ᲂу҆го́днице хрⷭ҇то́ва, ст҃а́ѧ бл҃же́ннаѧ ѯе́нїе, хвале́бное пѣ́нїе тѝ прино́симъ, чтꙋ́ще терпѣ́нїе твоѐ и҆ ѕлострада́нїе во́льное: ты́ же и҆мꙋ́щи дерзнове́нїе ко гдⷭ҇ꙋ, во всѧ́кихъ бѣда́хъ и҆ напа́стехъ застꙋпа́й на́съ грѣ́шныхъ, взыва́ющихъ къ тебѣ̀:
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
І҆́косъ а҃.
Равноа́гг҃льски на землѝ пожила̀ є҆сѝ, бл҃же́ннаѧ ма́ти, по ᲂу҆спе́нїи мꙋ́жа твоегѡ̀, без̾ прїꙋготовле́нїѧ хрⷭ҇тїа́нскагѡ внеза́пꙋ сконча́вшагѡсѧ, ѿве́ргла є҆сѝ жи́знь мїрскꙋ́ю, молѧ́щи бг҃а сꙋпрꙋ́га твоегѡ̀ дꙋ́шꙋ поми́ловати, по́двигъ ю҆ро́дства на себѐ прїѧ́вши, стѧжа́ла є҆сѝ соверше́нство дꙋхо́вное. тогѡ̀ ра́ди ᲂу҆слы́ши ѿ на́съ похвалы̑ сїѧ̑, тебѣ̀ возноси̑мыѧ:
Ра́дꙋйсѧ, хрⷭ҇то́ва ᲂу҆го́днице, въ мі́рѣ надмі́рнѡ пожи́вшаѧ: ра́дꙋйсѧ, всѧ̑ прилѡ́ги мі́ра, пло́ти и҆ дїа́вола побѣди́вшаѧ.
Ра́дꙋйсѧ, нищетꙋ̀ во́льнꙋю на всю̀ жи́знь и҆збра́вшаѧ: ра́дꙋйсѧ, сокро́вище на нб҃сѝ и҆мѣ́ти возжела́вшаѧ.
Ра́дꙋйсѧ, житїе́мъ твои́мъ а҆ндре́ю хрⷭ҇та̀ ра́ди ю҆ро́дивомꙋ, ра́внаѧ: ра́дꙋйсѧ, ѿ всѣ́хъ люде́й правосла́вныхъ люби́маѧ и҆ сла́вимаѧ.
Ра́дꙋйсѧ, ѡ҆ часѣ̀ сме́ртнѣмъ по́мнити на́съ призыва́ющаѧ: ра́дꙋйсѧ, бли́жнѧгѡ дꙋ́шꙋ па́че мі́ра сегѡ̀ люби́ти на́съ наꙋча́ющаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ в҃.
Ви́дѧще стра́нное житїѐ твоѐ, бл҃же́ннаѧ, ꙗ҆́кѡ во цвѣ́тѣ мла́дости твоеѧ̀ во ѡ҆де́ждꙋ мꙋ́жа твоегѡ̀ ᲂу҆со́пшагѡ ѡ҆блекла́сѧ є҆сѝ, и҆́менемъ є҆гѡ̀ нарекла́сѧ є҆сѝ, себѐ ᲂу҆ме́ршꙋю бы́ти глаго́лющи, до́мъ же тво́й и҆ всѧ̑ бл҃га̑ѧ зємна́ѧ ѡ҆ста́вивши, скита́лицꙋ себѐ сотвори́ла є҆сѝ, сро́дницы твоѝ безꙋ́мнꙋю тѧ̀ бы́ти мнѧ́хꙋ, лю́дїе же бг҃олюби́вїи воспѣ́ша: А҆ллилꙋ́їа.
І҆́косъ в҃.
Ра́зꙋмъ ѿ бг҃а тѝ дарова́нный, въ безꙋ́мїи мни́момъ сокры́ла є҆сѝ, бл҃же́ннаѧ ѯе́нїе: въ сꙋетѣ́ же гра́да вели́кагѡ, а҆́ки пꙋсты́нница пребыва́ла є҆сѝ, мл҃твы своѧ̑ къ бг҃ꙋ возносѧ́щи непреста́ннѡ. мы́ же, дивѧ́щесѧ житїю̀ твоемꙋ̀, воспѣва́емъ тѝ си́це:
Ра́дꙋйсѧ, крⷭ҇тъ тѧ́жкїй ю҆ро́дства, ѿ бг҃а тѝ да́нный, на ра́мо своѐ прїѧ́вшаѧ: ра́дꙋйсѧ, мни́мымъ безꙋ́мїемъ сїѧ́нїе блгⷣти сокры́вшаѧ.
Ра́дꙋйсѧ, и҆́менемъ мꙋ́жескимъ наре́кшисѧ, не́мощи же́нскїѧ ѿрѣши́вшаѧсѧ: ра́дꙋйсѧ, пєча́ли и҆ скѡ́рби кро́тцѣ терпѣ́вшаѧ.
Ра́дꙋйсѧ, всѐ и҆мѣ́нїе твоѐ бѣ̑днымъ лю́демъ разда́вшаѧ: ра́дꙋйсѧ, жили́ще дх҃ꙋ ст҃о́мꙋ въ се́рдцѣ твое́мъ ᲂу҆гото́вившаѧ.
Ра́дꙋйсѧ, всѣ̑мъ прибѣга́ющымъ къ тебѣ̀ бл҃го́е ᲂу҆тѣше́нїе: ра́дꙋйсѧ, ѿ сме́рти внеза́пныѧ и҆збавле́нїе.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ г҃.
Си́лою, свы́ше тѝ дарова́нною, блгⷣтїю и҆ мꙋ́жествомъ, зно́й и҆ стꙋ́жꙋ лю́тꙋю претерпѣва́ла є҆сѝ, всено́щнѡ молѧ́щисѧ и҆ покло́ны творѧ́щи: тѣ́мже и҆ просла́влена бы́сть ст҃ость твоѧ̀, бл҃же́ннаѧ ѯе́нїе, во ѻ҆те́чествѣ на́шемъ многострада́льнѣмъ и҆ во всѣ́мъ мі́рѣ правосла́внѣмъ, да зове́мъ съ тобо́ю бг҃ꙋ: А҆ллилꙋ́їа.
І҆́косъ г҃.
И҆мѣ́ла є҆сѝ, ѽ ма́ти бл҃же́ннаѧ, не́бо покро́въ и҆ зе́млю ло́же своѐ: ѡ҆ тѣ́лѣ, во ѡ҆де́ждꙋ ве́тхꙋю ѡ҆блече́ннѣмъ, небрегла̀ є҆сѝ, мл҃твы же къ бг҃ꙋ пла́меннѣ возноси́ла є҆сѝ, сегѡ̀ ра́ди воспѣва́емъ тѝ си́це:
Ра́дꙋйсѧ, вѣ́къ тво́й земны́й без̾ кро́ва прове́дшаѧ: ра́дꙋйсѧ, нбⷭ҇нагѡ кро́ва взыска́вшаѧ и҆ тогѡ̀ ᲂу҆лꙋчи́вшаѧ.
Ра́дꙋйсѧ, по всѧ̑ дни̑ но́щїю въ по́ли моли́вшаѧсѧ: ра́дꙋйсѧ, покло́ны зємны́ѧ на всѧ̑ страны̑ свѣ́та та́мѡ твори́вшаѧ.
Ра́дꙋйсѧ, гра́дъ петро́въ всено́щнымъ бдѣ́нїемъ ѿ бѣ́дъ ѡ҆гражда́вшаѧ: ра́дꙋйсѧ, гнѣ́въ бж҃їй ѿ негѡ̀ мно́гажды ѿвраща́вшаѧ.
Ра́дꙋйсѧ, блгⷣтїю дх҃а ст҃а́гѡ чꙋде́снѡ согрѣва́емаѧ: ра́дꙋйсѧ, хла́дъ лю́тый дꙋ́шъ на́шихъ мл҃твою твое́ю растаѧва́ющаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ д҃.
Бꙋ́рю жите́йскꙋю, во гра́дѣ петро́вѣ мѧтꙋ́щꙋюсѧ, кро́тостїю и҆ неѕло́бїемъ препобѣжда́ла є҆сѝ, ма́ти бл҃же́ннаѧ: безстра́стїе же посредѣ̀ мі́ра сꙋ́етнагѡ стѧжа́ла є҆сѝ, и҆ та́кѡ, дх҃омъ ст҃ы́мъ просвѣща́емаѧ, взыва́ла є҆сѝ пода́телю тишины̀ серде́чныѧ бг҃ꙋ: А҆ллилꙋ́їа.
І҆́косъ д҃.
Слы́шаша лю́дїе да́ръ прозрѣ́нїѧ чꙋ́дный, тобо́ю ꙗ҆вле́нный, ст҃а́ѧ ма́ти, и҆ ᲂу҆диви́шасѧ. сѐ, женѣ̀ нѣ́коей рекла̀ є҆сѝ: возмѝ пѧта́къ, здѣ̀ ца́рь на конѣ̀: потꙋ́хнетъ. та́ же не вѣ́дающи, ꙗ҆́кѡ ты̀ запале́нїе до́ма є҆ѧ̀ прозрѣ́ла є҆сѝ, притечѐ во своѧ̑ сѝ и҆ ᲂу҆зрѣ̀ до́мъ сво́й во ѻ҆гнѝ горѧ́щъ: и҆ а҆́бїе по мл҃твѣ твое́й пла́мень ѻ҆гнѧ̀ ᲂу҆гасѐ. мно́зи же стра́ждꙋщїи къ по́мощи твое́й прибѣга́хꙋ, ю҆́же стѧжа́вше, та́кѡ взыва́ша тѝ:
Ра́дꙋйсѧ, да́ръ прозрѣ́нїѧ смире́нїемъ кра́йнимъ стѧжа́вшаѧ: ра́дꙋйсѧ, да́ръ се́й на по́льзꙋ и҆ сп҃се́нїе стра́ждꙋщымъ ꙗ҆влѧ́вшаѧ.
Ра́дꙋйсѧ, свѣщѐ негаси́маѧ, къ бг҃ꙋ въ мл҃твахъ горѣ́вшаѧ: ра́дꙋйсѧ, вѣ́рою твое́ю пла́менною запале́нїе домѡ́въ ᲂу҆гаша́вшаѧ.
Ра́дꙋйсѧ, грѧдꙋ́щыѧ скѡ́рби людскі̑ѧ а҆́ки настоѧ́щыѧ, зрѣ́вшаѧ: ра́дꙋйсѧ, вра́чь безме́здный и҆ млⷭ҇рдый лю́демъ бы́вшаѧ.
Ра́дꙋйсѧ, ꙗ҆́кѡ и҆ на́съ, немощны́хъ въ вѣ́рѣ, ᲂу҆крѣплѧ́еши: ра́дꙋйсѧ, ꙗ҆́кѡ сїѧ́нїемъ ст҃ости твоеѧ̀ лю́ди правосла̑вныѧ ѡ҆зарѧ́еши.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ є҃.
Бг҃оте́чнаѧ ѕвѣзда̀ ꙗ҆ви́сѧ ст҃ость твоѧ̀ на тве́рди гра́да петро́ва, ᲂу҆го́днице бж҃їѧ, заре́ю свое́ю сердца̀ просвѣща́ющаѧ: ᲂу҆же́ бо лю́демъ, въ безꙋ́мїи грѣха̀ погиба́ющымъ, пꙋ́ть сп҃се́нїѧ ᲂу҆каза́ла є҆сѝ, къ покаѧ́нїю и҆̀хъ наставлѧ́ющи, во є҆́же вопи́ти бг҃ꙋ: А҆ллилꙋ́їа.
І҆́косъ є҃.
Ви́дѧще по́двиги твоѧ̑ мл҃твєнныѧ, терпѣ́нїе хла́да и҆ зно́ѧ вели́кое, лю́дїе ѡ҆сла́бити жела́хꙋ ѕлострада̑нїѧ твоѧ̑: ты́ же ѡ҆де́ждꙋ и҆ всѧ̑, и҆́ми приноси̑маѧ, ни́щымъ раздава́ла є҆сѝ, нищетꙋ̀ свою̀, а҆́ки сокро́вище хранѧ́щи. сегѡ̀ ра́ди слы́шиши ѿ на́съ сицєва́ѧ:
Ра́дꙋйсѧ, бога́тство твоѐ то́кмѡ въ любвѝ къ бг҃ꙋ и҆ бли̑жнимъ полага́вшаѧ: ра́дꙋйсѧ, ничто́же земно́е и҆мѣ́вшаѧ и҆ всѣ́хъ дꙋхо́внѡ богати́вшаѧ.
Ра́дꙋйсѧ, ми́лостивымъ твои́мъ се́рдцемъ стра́ждꙋщымъ сострада́вшаѧ: ра́дꙋйсѧ, по́мощь и҆̀мъ чрез̾ до́брыхъ люде́й посыла́вшаѧ.
Ра́дꙋйсѧ, чꙋ́ждаѧ мі́рꙋ, въ мі́рѣ живꙋ́щымъ бл҃го твори́вшаѧ: ра́дꙋйсѧ, вѣ́ка сегѡ̀ сꙋемꙋ́дрїѧ ѿверга́тисѧ наꙋчи́вшаѧ.
Ра́дꙋйсѧ, пла́кати съ пла́чꙋщими на́съ подвига́ющаѧ: ра́дꙋйсѧ, ѿ тѧ́жкагѡ сна̀ грѣхо́внагѡ пробꙋжда́ющаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ ѕ҃.
Проповѣ́дана бы́сть ст҃ость житїѧ̀ твоегѡ̀ бл҃же́ннаѧ, жи́телємъ гра́да твоегѡ̀, є҆гда̀ ты̀ ѡ҆ младе́нцѣ є҆щѐ не ро́ждшемсѧ пекꙋ́щисѧ, женѣ̀ до́брѣй, въ до́мѣ тобо́ю дарова́нномъ жи́вшей, рекла̀ є҆сѝ: бг҃ъ тебѣ̀ сы́на посла̀, текѝ на кла́дбище смоле́нское! та́ѧ же со тща́нїемъ прите́кши, сиротꙋ̀, рожде́нна ма́терїю, внеза́пꙋ на пꙋтѝ пострада́вшею и҆ сконча́вшеюсѧ, въ до́мъ сво́й прїѧ́ла є҆́сть: всѧ̑ же лѣ́та житїѧ̀ своегѡ̀, тебѐ бл҃годарѧ́ще, сїѧ̀ семьѧ̀ бл҃года́тнаѧ бг҃ꙋ чл҃вѣколю́бцꙋ взыва́ше: А҆ллилꙋ́їа.
І҆́косъ ѕ҃.
Возсїѧ́ла є҆́сть сла́ва по́двигѡвъ твои́хъ, бл҃же́ннаѧ ма́ти ѯе́нїе, є҆гда̀ но́щїю на ве́рхъ хра́ма смоле́нскагѡ ка́менїе, таѧ́щисѧ, носи́ла є҆сѝ, до́мꙋ пречⷭ҇тѣй возгради́тисѧ посо́бствꙋющи. Ны́нѣ же всѝ молѧ́щїисѧ во ст҃ѣ́мъ хра́мѣ се́мъ и҆ во все́мъ мі́рѣ бж҃їемъ, взира́юще на ѡ҆́бразъ тво́й, воспѣва́ютъ тѝ такова̑ѧ:
Ра́дꙋйсѧ, та́йнѡ твори́ти добро̀ наꙋча́ющаѧ: ра́дꙋйсѧ, къ по́двигѡмъ бл҃гоче́стїѧ всѣ́хъ призыва́ющаѧ.
Ра́дꙋйсѧ, строи́телємъ хра́мѡвъ бж҃їихъ помога́ющаѧ: ра́дꙋйсѧ, ст҃ы́ню цр҃ко́внꙋю возлюби́вшаѧ.
Ра́дꙋйсѧ, въ дѣ́лѣхъ бл҃ги́хъ ᲂу҆се́рдное поспѣше́нїе: ра́дꙋйсѧ, трꙋдѡ́въ на́шихъ на пꙋтѝ сп҃се́нїѧ ѡ҆блегче́нїе.
Ра́дꙋйсѧ, под̾ кро́вомъ бж҃їѧ мт҃ре по́двиги твори́вшаѧ, и҆ та́кѡ почи́вшаѧ: ра́дꙋйсѧ, съ не́ю ны́нѣ на нб҃сѣ́хъ ѡ҆ на́съ хрⷭ҇та̀ молѧ́щаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ з҃.
Хотѧ́ще сꙋдьбы̑ людскі̑ѧ во бл҃га̑ѧ ᲂу҆стро́ити, повелѣ́ла є҆сѝ дѣ́вѣ кро́тцѣй на ѻ҆́хтꙋ тещѝ, проре́кши, ꙗ҆́кѡ мꙋ́жъ тво́й та́мѡ женꙋ̀ погреба́етъ. та́ же, а҆́ще и҆ недоꙋмѣва́шесѧ, ѻ҆ба́че не ѡ҆слꙋ́шасѧ глаго́ла твоегѡ̀, и҆ та́мѡ вдовца̀ мла́да, над̾ гро́бомъ жены̀ рыда́вшаго срѣ́тила є҆́сть и҆ ᲂу҆тѣше́нїе въ мл҃твѣ є҆мꙋ̀ подадѐ. лѣ́тꙋ же минꙋ́вшꙋ, ѻ҆́на вѣнча́стасѧ, и҆ та́кѡ мнѡ́гаѧ лѣ̑та въ любвѝ и҆ согла́сїи пожи́вше, ча́дъ свои́хъ наставлѧ́хꙋ, тебѐ ст҃а́ѧ ма́ти, чти́ти, бг҃ꙋ же воспѣва́ти пѣ́снь: А҆ллилꙋ́їа.
І҆́косъ з҃.
Но́вое чꙋ́до показа́ла є҆сѝ, бл҃же́ннаѧ, посредѣ̀ скве́рны людскі́ѧ дꙋ́шꙋ твою̀, ю҆ро́дствомъ сокры́тꙋю, въ кро́тости а҆́гг҃льстѣй соблю́дши. Наꙋчѝ и҆ на́съ, ма́ти ѯе́нїе, и҆ ма́лыѧ до́ли скорбе́й твои́хъ не терпѧ́щихъ и҆ въ ро́потѣ на бг҃а и҆ бли́жнѧго дни̑ на́шѧ и҆ждива́ющихъ, всѧ̑ свы́ше посыла́ємаѧ въ терпѣ́нїи сноси́ти, да взира́юще на по́двиги твоѧ̑, чⷭ҇тымъ се́рдцемъ зове́мъ тѝ си́це:
Ра́дꙋйсѧ, мі́рꙋ ѕлохла́дномꙋ блгⷣтнꙋю мꙋ́дрость ꙗ҆ви́вшаѧ: ра́дꙋйсѧ, нищеты̀ дх҃о́вныѧ бл҃же́нство вкꙋси́вшаѧ.
Ра́дꙋйсѧ, ѡ҆́бразъ терпѣ́нїѧ и҆ бл҃госе́рдїѧ на́мъ подаю́щаѧ: ра́дꙋйсѧ, смире́нїемъ и҆ покаѧ́нїемъ ѿ бѣ́дъ и҆збавлѧ́тисѧ наꙋча́ющаѧ.
Ра́дꙋйсѧ, съ мл҃твою и҆ любо́вїю дѣте́й бл҃гословлѧ́вшаѧ: ра́дꙋйсѧ, прикоснове́нїемъ рꙋкꙋ̀ твоє́ю чꙋде́снѡ и҆̀хъ и҆сцѣлѧ́вшаѧ.
Ра́дꙋйсѧ, ᲂу҆ны́нїе тѧ́жкое, дꙋ́шꙋ сокрꙋша́ющее, ѿ на́съ ѿводѧ́щаѧ: ра́дꙋйсѧ, наде́ждою несꙋмнѣ́нною на млⷭ҇ть бж҃їю ѡ҆крилѧ́ющаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ и҃.
Стра́нница бездо́мнаѧ протекла̀ є҆сѝ пꙋ́ть ско́рбный житїѧ̀ твоегѡ̀ въ сто́льнѣмъ гра́дѣ ѻ҆те́чества на́шегѡ, ма́ти бл҃же́ннаѧ, взыскꙋ́ющи гра́да вы́шнѧгѡ, і҆ерⷭ҇ли́ма нбⷭ҇нагѡ: ны́нѣ же въ не́мъ со а҆́гг҃лы и҆ всѣ́ми ст҃ы́ми пое́ши бг҃ꙋ: А҆ллилꙋ́їа.
І҆́косъ и҃.
Всѧ̀ въ мл҃твахъ ко творцꙋ̀ пребыва́ющи, ма́ти ст҃а́ѧ, до ᲂу҆спе́нїѧ твоегѡ̀, ѿ страда́нїй и҆ по́двигѡвъ къ жи́зни бл҃же́ннѣй и҆ вѣ́чнѣй невозбра́ннѡ прешла̀ є҆сѝ. сегѡ̀ ра́ди, преклонѧ́юще колѣ̑на серде́цъ на́шихъ, бл҃гоговѣ́йное пѣ́нїе тѝ прино́симъ:
Ра́дꙋйсѧ, во ѡ҆би́телехъ го́рнихъ съ ли́ки ст҃ы́хъ ликꙋ́ющаѧ: ра́дꙋйсѧ, и҆ на́съ, тебѣ̀ молѧ́щихсѧ, та́мѡ не забыва́ющаѧ.
Ра́дꙋйсѧ, чꙋдеса̀ неисчє́тнаѧ по ᲂу҆спе́нїи твое́мъ ꙗ҆ви́вшаѧ: ра́дꙋйсѧ, сме́ртнѡ болѧ́щихъ, врачьмѝ ѡ҆ста́вленныхъ, и҆сцѣлѧ́вшаѧ.
Ра́дꙋйсѧ, въ пїѧ́нствѣ ги́бнꙋщихъ ᲂу҆страше́нїе и҆ и҆справле́нїе: ра́дꙋйсѧ, мѣ́ста слꙋже́нїѧ лиши́вшымсѧ бл҃го́е поспѣше́нїе.
Ра́дꙋйсѧ, вдови́цъ и҆ же́нъ, сꙋпрꙋ́гомъ ѡ҆ста́вленныхъ, покрови́тельнице: ра́дꙋйсѧ, стра́нникѡвъ и҆ безпрїю́тныхъ пита́тельнице.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ ѳ҃.
Всѧ̑кїѧ ᲂу҆толѝ болѣ̑зни, бл҃же́ннаѧ ма́ти ѯе́нїе, на тѧ̀ надѣ́ющихсѧ и҆ къ по́мощи твое́й ᲂу҆се́рднѡ притека́ющихъ: ꙗ҆́коже помина́вшихъ пре́жде дꙋ́шꙋ твою̀ ра́ди дꙋшѝ своеѧ̀ спасе́нїѧ, по завѣ́тꙋ твоемꙋ̀, та́кѡ и҆ ны́нѣ помѧнѝ всѣ́хъ, прославлѧ́ющихъ тѧ̀, бг҃ꙋ же, въ тебѣ̀ ди́внѡ просла́вленномꙋ, вопїю́щихъ непреста́ннѡ: А҆ллилꙋ́їа.
І҆́косъ ѳ҃.
Вѣті̑ѧ сꙋемꙋ́дрєнныѧ разꙋмѣ́ти не мо́гꙋтъ, ка́кѡ ты̀ безꙋ́мїемъ свои́мъ безꙋ́мїе мі́ра сегѡ̀ ѡ҆бличи́ла є҆сѝ, и҆ не́мощїю свое́ю си̑льныѧ и҆ крѣ̑пкїѧ посрами́ла є҆сѝ: не вѣ́даютъ бо въ тебѣ̀ си́лы и҆ премꙋ́дрости бж҃їѧ. мы́ же, тѧ̀ почита́юще съ любо́вїю зове́мъ тѝ си́це:
Ра́дꙋйсѧ, бж҃е́ственнагѡ дх҃а селе́нїе: ра́дꙋйсѧ, ве́лїе къ бг҃ꙋ дерзнове́нїе.
Ра́дꙋйсѧ, ᲂу҆ ᲂу҆сыпа́льницы твоеѧ̀ молѧ́щымсѧ ꙗ҆влѧ́ющаѧсѧ и҆ и҆̀мъ помога́ющаѧ: ра́дꙋйсѧ, земле́ю и҆ є҆ле́емъ ѿ неѧ̀ мнѡ́гїѧ ѡ҆свѧти́вшаѧ и҆ ѿ недꙋ́гъ и҆сцѣли́вшаѧ.
Ра́дꙋйсѧ, ꙗ҆́кѡ ѡ҆держи́мыхъ страстьмѝ ѿ ги́бели спаса́еши: ра́дꙋйсѧ, ꙗ҆́кѡ ѿверга́тисѧ себѐ на́съ наꙋча́еши.
Ра́дꙋйсѧ, любвѐ и҆ смире́нїѧ пꙋ́ть во спасе́нїе на́мъ ᲂу҆казꙋ́ющаѧ: ра́дꙋйсѧ, во хра́мѣ бж҃їемъ съ на́ми незри́мѡ пребыва́ющаѧ.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ і҃.
Спастѝ лю́ди хотѧ́щи, бл҃же́ннаѧ ма́ти ѯе́нїе, при́снѡ да́рꙋеши и҆̀мъ застꙋпле́нїе твоѐ чꙋ́дное. сѐ дѣ́вꙋ бл҃гочести́вꙋю съ вдови́цею ма́терїю є҆ѧ̀, въ канꙋ́нъ вѣнча́нїѧ ᲂу҆ гробни́цы твоеѧ̀ ᲂу҆се́рднѡ моли́вшꙋюсѧ, ѿ бра́ка спасла̀ є҆сѝ со ѕлодѣ́емъ, и҆́же ра́тнагѡ человѣ́ка ᲂу҆бѝ, и҆́мѧ же и҆ чи́нъ є҆гѡ̀ себѣ̀ присво́и. въ де́нь то́йже ᲂу҆бі́йца ѻ҆́ный внеза́пꙋ ѡ҆бличе́нъ бы́сть, и҆ ᲂу҆́жасомъ ѡ҆б̾ѧ́тъ, и҆сповѣ́да пред̾ всѣ́ми, ꙗ҆́кѡ си́ла бж҃їѧ сиротꙋ̀ ѿ бра́ка съ ни́мъ и҆зба́ви, мы́ же, дивѧ́щесѧ си́лѣ мл҃твъ твои́хъ, на́съ спаса́ющихъ, воспѣва́емъ бг҃ꙋ: А҆ллилꙋ́їа.
І҆́косъ і҃.
Стѣна̀ є҆сѝ нерꙋши́маѧ, пребл҃же́ннаѧ ма́ти, и҆ до́мъ правосла́вныхъ. не ѡ҆ста́ви и҆ ны́нѣ сꙋпрꙋ́ги разлꙋчє́нныѧ, помозѝ роди́телємъ, за грѣхѝ своѧ̑ ѡ҆ ча́дѣхъ сле́зы пролива́ющымъ, наꙋчѝ ю҆́ношы и҆ дѣ̑вы въ чⷭ҇тотѣ̀ себѐ храни́ти и҆ всѣ́хъ на́съ ст҃ы́ню ᲂу҆́зъ семе́йныхъ почита́ти, да є҆ди́нѣми ᲂу҆сты̀ воспѣва́емъ тѝ та́кѡ:
Ра́дꙋйсѧ, дѣ́въ бл҃гочести́выхъ ѿ бра́ка невѣ́рнагѡ и҆збавлѧ́ющаѧ: ра́дꙋйсѧ, спꙋ́тника жи́зни до́браго и҆̀мъ ѡ҆брѣстѝ помога́ющаѧ.
Ра́дꙋйсѧ, срѡ́дникъ враждꙋ́ющихъ бл҃го́е примире́нїе: ра́дꙋйсѧ, сле́зъ дѣ́тскихъ ѡ҆сꙋше́нїе.
Ра́дꙋйсѧ, ѿ ᲂу҆бїе́нїѧ младе́нцєвъ во чре́вѣ жена́мъ гро́зное преще́нїе: ра́дꙋйсѧ, на ка́мени любвѐ и҆ вѣ́ры домѡ́въ ᲂу҆строе́нїе.
Ра́дꙋйсѧ, сꙋпрꙋ́гѡвъ, сме́ртїю разлꙋче́нныхъ, ᲂу҆тѣше́нїе: ра́дꙋйсѧ, въ жи́зни безсме́ртнѣй вѣ́чное и҆́хъ соедине́нїе.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ а҃і.
Пѣ́нїе бл҃года́рственное прино́сѧтъ тѝ, ма́ти бл҃же́ннаѧ, лю́дїе правосла́внїи, ѿ бѣ́дъ и҆ болѣ́зней мл҃твами твои́ми и҆зба́вленнїи: и҆ ны́нѣ, а҆́ще попꙋ́ститъ на́мъ всепрвⷣный гдⷭ҇ь скѡ́рби грѣ́хъ на́шихъ ра́ди, со слеза́ми къ тебѣ̀ припаде́мъ, ᲂу҆пова́юще на млⷭ҇тивое твоѐ ѡ҆ на́съ къ бг҃ꙋ предста́тельство, да воспое́мъ є҆мꙋ̀: А҆ллилꙋ́їа.
І҆́косъ а҃і.
Свѣтоза́рнаѧ лꙋча̀ во мра́цѣ житїѧ̀ сегѡ̀, пꙋ́ть ко свѣ́тꙋ непристꙋ́пномꙋ ѡ҆свѣща́ющаѧ, ꙗ҆ви́ласѧ є҆сѝ, бг҃омꙋ́драѧ ѯе́нїе, чꙋде́съ мно́жествомъ просїѧ́вши. въ лю́тꙋю же годи́нꙋ гоне́нїй безбо́жныхъ вѣ́рнїи ѿ часо́вни твоеѧ̀ не ѿстꙋпи́ша, но презрѣ́вше и҆ стра́хъ сме́ртный, съ вѣ́рою и҆ ᲂу҆пова́нїемъ къ тебѣ̀ притека́хꙋ, се́рдцемъ воспѣва́юще си́це:
Ра́дꙋйсѧ, безнаде́жныхъ надѣ́ѧнїе: ра́дꙋйсѧ, въ бе́зднѣ ѿча́ѧнїѧ погиба́ющихъ спасе́нїе.
Ра́дꙋйсѧ, ᲂу҆ни́женныхъ и҆ гони́мыхъ покрови́тельнице: ра́дꙋйсѧ, ѿ клеветы̀ и҆ сꙋда̀ непра́веднагѡ защи́тнице.
Ра́дꙋйсѧ, ѡ҆би́димыхъ и҆ ѡ҆бездо́ленныхъ ᲂу҆тѣше́нїе: ра́дꙋйсѧ, ѡ҆би́дѧщихъ гро́зное вразꙋмле́нїе.
Ра́дꙋйсѧ, гра́да ст҃а́гѡ петра̀ застꙋ́пнице: ра́дꙋйсѧ, ча́дѡмъ землѝ рѡссі́йскїѧ ма́ти и҆ пита́тельнице.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ в҃і.
Блгⷣть ᲂу҆тѣше́нїй ѡ҆би́льнѡ и҆злива́еши, бл҃же́ннаѧ ѯе́нїе, всѣ̑мъ чтꙋ́щымъ па́мѧть твою̀ и҆ къ застꙋпле́нїю твоемꙋ̀ притека́ющымъ. тѣ́мже и҆ мы̀, грѣ́шнїи, на тѧ̀ по бз҃ѣ наде́ждꙋ на́шꙋ возлага́емъ и҆ мо́лимсѧ тебѣ̀ ᲂу҆се́рднѡ: не ѡ҆ста́ви на́съ во ѡ҆бстоѧ́нїихъ ско́рбныхъ, ᲂу҆молѝ гдⷭ҇а си́лъ, да не ѿпаде́мъ ѿ вѣ́ры правосла́вныѧ, въ не́йже тобо́ю ᲂу҆твержда́еми, зове́мъ є҆мꙋ̀ вѣ́рнѡ: А҆ллилꙋ́їа.
І҆́косъ в҃і.
Пою́ще мнѡ́гаѧ твоѧ̑ чꙋдеса̀, бл҃же́ннаѧ ма́ти ѯе́нїе, восхвалѧ́емъ тѧ̀, ꙗ҆́кѡ те́плꙋю на́шꙋ застꙋ́пницꙋ и҆ ско́рꙋю предста́тельницꙋ. ᲂу҆лꙋча́юще же ѿ тебѐ по́мощь бл҃года́тнꙋю, неꙋста́ннѡ воспѣва́емъ тѝ си́це:
Ра́дꙋйсѧ, свѣ́томъ кро́тости твоеѧ̀ всѧ̑ концы̀ землѝ ѡ҆зари́вшаѧ: ра́дꙋйсѧ, житїе́мъ твои́мъ по́стническимъ горды́ню дїа́вольскꙋю посрами́вшаѧ.
Ра́дꙋйсѧ, до́мꙋ ца́рскомꙋ поможе́нїе и҆ бл҃гослове́нїе: ра́дꙋйсѧ, ми́ра бж҃їѧ въ сердца̀ вѣ́рныхъ насажде́нїе.
Ра́дꙋйсѧ, ѡ҆ спасе́нїи ѻ҆те́чества на́шегѡ при́снѡ молѧ́щаѧсѧ: ра́дꙋйсѧ, во ѻ҆те́чество нбⷭ҇ное на́мъ пꙋ́ть ᲂу҆казꙋ́ющаѧ.
Ра́дꙋйсѧ, по бцⷣѣ въ ско́рбехъ и҆ печа́лехъ на́ше ᲂу҆тѣше́нїе: ра́дꙋйсѧ, по бз҃ѣ грѣхѡ́въ на́шихъ проще́нїе и҆ вѣ́чное спасе́нїе.
Ра́дꙋйсѧ, ѯе́нїе бл҃же́ннаѧ, мл҃твеннице ѡ҆ дꙋша́хъ на́шихъ.
Конда́къ г҃і.
Ѽ ст҃а́ѧ бл҃же́ннаѧ ма́ти ѯе́нїе, въ житїѝ твое́мъ кре́стъ тѧ́жкїй поне́сшаѧ, прїимѝ ѿ на́съ, грѣ́шныхъ моле́нїе сїѐ, тебѣ̀ приноси́мое, ѡ҆градѝ на́съ мл҃твами твои́ми ѿ навѣ́тѡвъ дꙋхѡ́въ тьмы̀, ѿ бѣ́дъ и҆ напа́стей, ᲂу҆молѝ всеще́драго бг҃а пода́ти на́мъ си́лꙋ и҆ крѣ́пость, да взе́мше кре́стъ сво́й, во слѣ́дъ хрⷭ҇тꙋ̀ грѧде́мъ, пою́ще є҆мꙋ̀ съ тобо́ю во вѣ́ки: А҆ллилꙋ́їа.
Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.
Моли́тва.
Ѽ ст҃а́ѧ всебл҃же́ннаѧ ма́ти ѯе́нїе! под̾ кро́вомъ всевы́шнѧгѡ жи́вшаѧ, ведо́маѧ и҆ ᲂу҆крѣплѧ́емаѧ бг҃омт҃рїю, гла́дъ и҆ жа́ждꙋ, хла́дъ и҆ зно́й, поношє́нїѧ и҆ гонє́нїѧ претерпѣ́вшаѧ, и҆ да́ръ прозорли́вости и҆ чꙋдотворе́нїѧ ѿ бг҃а прїѧ́ла є҆сѝ и҆ под̾ сѣ́нїю всемогꙋ́щагѡ поко́ишисѧ, ны́нѣ ст҃а́ѧ цр҃ковь, ꙗ҆́кѡ бл҃гоꙋха́нный цвѣ́тъ, прославлѧ́етъ тѧ̀. предстоѧ́ще на мѣ́сте погребе́нїѧ твоегѡ̀, пред̾ ѡ҆́бразомъ твои́мъ ст҃ы́мъ, ꙗ҆́кѡ живѣ́й тѝ сꙋ́щей съ на́ми, мо́лимсѧ тебѣ̀: прїимѝ прошє́нїѧ на̑ша и҆ принесѝ и҆̀хъ ко прⷭ҇то́лꙋ млⷭ҇рдагѡ ѻ҆ц҃а̀ нбⷭ҇нагѡ, ꙗ҆́кѡ дерзнове́нїе къ немꙋ̀ и҆мꙋ́щаѧ. и҆спросѝ притека́ющымъ къ тебѣ̀ вѣ́чное спасе́нїе, на бл҃га̑ѧ дѣла̀ и҆ начина̑нїѧ на̑ша ще́дрое бл҃гослове́нїе, ѿ всѧ́кихъ бѣ́дъ и҆ скорбе́й и҆збавле́нїе. предста́ни ст҃ы́ми твои́ми мл҃твами пред̾ всемлⷭ҇тивымъ сп҃си́телемъ на́шимъ ѡ҆ на́съ, недосто́йныхъ и҆ грѣ́шныхъ. помозѝ, ст҃а́ѧ бл҃же́ннаѧ ма́ти ѯе́нїе, младє́нцы свѣ́томъ ст҃а́гѡ кр҃ще́нїѧ ѡ҆зари́ти и҆ печа́тїю да́ра дх҃а ст҃а́гѡ запечатлѣ́ти, ѻ҆́троки и҆ ѻ҆трокѡви́цы въ вѣ́рѣ, чтⷭ҇ности, бг҃обоѧ́зненности воспита́ти и҆ ᲂу҆спѣ́хи въ ᲂу҆че́нїи и҆̀мъ дарова́ти: болѧ́щыѧ и҆ недꙋ́гꙋющыѧ и҆сцѣлѝ, семє́йнымъ любо́вь и҆ согла́сїе низпослѝ, мона́шествꙋющихъ по́двигомъ до́брымъ подвиза́тисѧ ᲂу҆досто́й и҆ ѿ поноше́нїй ѡ҆градѝ, па́стыри въ крѣ́пости дх҃а ст҃а́гѡ ᲂу҆твердѝ, лю́ди и҆ странꙋ̀ на́шꙋ въ ми́рѣ и҆ безмѧте́жїи сохранѝ, ѡ҆ лише́нныхъ въ предсме́ртный ча́съ причаще́нїѧ ст҃ы́хъ хрⷭ҇то́выхъ та̑инъ ᲂу҆молѝ. ты̀ на́ша наде́жда и҆ ᲂу҆пова́нїе, ско́рое ᲂу҆слы́шанїе и҆ и҆збавле́нїе, тебѣ̀ бл҃годаре́нїе возсыла́емъ и҆ съ тобо́ю сла́вимъ ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.