А҆ка́ѳїстъ ст҃ѣ́й бл҃говѣ́рнѣй кн҃жнѣ̀ прпⷣбнѣй є҆ѵфросѵ́нїи по́лотстѣй.
Конда́къ а҃.
И҆збра́ннꙋю хрⷭ҇то́вꙋ невѣ́стꙋ пѣ́сньми восхва́лимъ дне́сь, вѣ́рнїи, є҆ѵфросѵ́нїю: сїѧ́ бо кнѧжна̀, до́мъ ѻ҆́тчїй ѡ҆ста́вльши и҆ во и҆́ночествѣ пожи́вши до́брѣ, мнѡ́гїѧ ᲂу҆пра́вила є҆́сть ко сп҃се́нїю: во і҆ерⷭ҇ли́мѣ пло́тїю преста́вльшисѧ, во і҆ерⷭ҇ли́мъ го́рнїй дꙋ́хомъ пресели́сѧ и҆ та́мѡ при́снѡ за ны̀ мо́литсѧ. Є҆́йже та́кѡ возопїи́мъ:
Ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
І҆́косъ а҃.
А҆́гг҃льски пожи́вши, прпⷣбнаѧ, по́стническимъ житїе́мъ ᲂу҆годи́ла є҆сѝ хрⷭ҇тꙋ̀ и҆ нбⷭ҇ныѧ ра́дости причасти́тисѧ сподо́биласѧ є҆сѝ по сконча́нїи. Тѣ́мже съ го́рнихъ высо́тъ при́зри на ны̀, та́кѡ тѧ̀ велича́ющыѧ:
Ра́дꙋйсѧ, рѡссі́йскїѧ землѝ похвало̀: ра́дꙋйсѧ, ѿрасле сла́внаѧ ѿ ро́да влади́мїра равноапⷭ҇льнагѡ.
Ра́дꙋйсѧ, и҆мени́тыхъ роди́телей ча́до бг҃оизбра́нное: ра́дꙋйсѧ, голꙋби́це непоро́чнаѧ.
Ра́дꙋйсѧ, дѣ́вственнице чи́стаѧ: ра́дꙋйсѧ, и҆́нокинѧмъ ᲂу҆тѣше́нїе.
Ра́дꙋйсѧ, ко і҆ерⷭ҇ли́мꙋ нбⷭ҇номꙋ пꙋтеводи́тельнице: ра́дꙋйсѧ, бл҃гоче́стїѧ ѕвѣздо̀.
Ра́дꙋйсѧ, застꙋ́пнице къ тебѣ̀ притека́ющихъ: ра́дꙋйсѧ, цѣли́тельнице недꙋ́гѡвъ незри́маѧ.
Ра́дꙋйсѧ, хода́таице за ны̀ те́плаѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ в҃.
Видѣ́нїе бѣ̀ ра́достное, є҆гда̀ по рожде́нїи твое́мъ принесо́ста тѧ̀, пресла́внаѧ, роди́тєлѧ твоѧ̑ во хра́мъ гдⷭ҇ень: та́мѡ бо въ кꙋпѣ́ли креще́нїѧ ѿ перворо́днагѡ грѣха̀ ѡ҆мы́ласѧ є҆сѝ погрꙋже́нїемъ, и҆ мѵ́ра сщ҃е́ннымъ пома́занїемъ тѧ̀, ꙗ҆́кѡ ѻ҆́трасль младꙋ́ю, і҆ере́й приви́лъ є҆́сть ко хрⷭ҇тꙋ̀, да пое́ши є҆мꙋ̀ вы́нꙋ со и҆збра́нными є҆гѡ̀: А҆ллилꙋ́їа.
І҆́косъ в҃.
Ра́зꙋмомъ, свы́ше просвѣще́ннымъ, и҆ чи́стымъ се́рдцемъ хрⷭ҇то́ви ѿ ю҆́ности врꙋчи́ла є҆сѝ себє̀, предисла́во, поча́стꙋ во хра́мъ притека́ющи, въ го́рницѣ во трꙋдѣ́хъ при́снѡ пребыва́ла є҆сѝ. Тѣ́мже тѧ̀ ᲂу҆блажа́емъ:
Ра́дꙋйсѧ, хрⷭ҇то́ви ѡ҆брꙋче́ннаѧ ѿ кꙋпѣ́ли кр҃ще́нїѧ: ра́дꙋйсѧ, мѵ́ромъ бл҃года́тнымъ запечатлѣ́ннаѧ.
Ра́дꙋйсѧ, дх҃а ст҃а вмѣсти́лище чи́стое: ра́дꙋйсѧ, тѣ́мъ ᲂу҆мꙋдре́ннаѧ во сп҃се́нїе.
Ра́дꙋйсѧ, во бл҃го́е свы́ше ᲂу҆крѣпле́ннаѧ: ра́дꙋйсѧ, ра́зꙋмъ просвѣти́вшаѧ мл҃твою.
Ра́дꙋйсѧ, со́вѣсть стѧжа́вшаѧ крѣ́пкꙋю во бл҃го́мъ: ра́дꙋйсѧ, ѿ мла́дости ᲂу҆вѣ́дѣвшаѧ пꙋтѝ бл҃гоче́стїѧ.
Ра́дꙋйсѧ, ᲂу҆клони́ласѧ бо є҆сѝ пꙋтѝ ги́бельнагѡ: ра́дꙋйсѧ, трꙋдолюби́ваѧ ѻ҆трокови́це.
Ра́дꙋйсѧ, ю҆́ныхъ дѣ́въ рѡссі́йскихъ красото̀: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ г҃.
Си́лою вы́шнѧгѡ ᲂу҆крѣпле́ннаѧ, возлюби́ла є҆сѝ прпⷣбнаѧ, наꙋче́нїе кни́жное и҆ томꙋ̀ прилѣжа́ла є҆сѝ: мꙋ́дрость же кни́жнꙋю пости́гши, па́че про́чихъ бж҃е́ствєнныѧ кни̑ги и҆збра́ла є҆сѝ, и҆ ꙗ҆́же ᲂу҆мꙋдри́ти мо́гꙋтъ во сп҃се́нїе всѧ́кагѡ человѣ́ка, ᲂу҆се́рднѡ почита́ла є҆сѝ, сла́дцѣ пою́щи гдⷭ҇еви: А҆ллилꙋ́їа.
І҆́косъ г҃.
И҆́мать дне́сь ѡ҆би́тель твоѧ̀ ѻ҆трокови̑цы мнѡ́ги и҆ мла̑ды, наꙋче́нїю кни́жномꙋ здѣ̀ вда̑нныѧ. Сегѡ̀ ра́ди ᲂу҆се́рднѡ мо́лимъ тѧ̀, всехва́льнаѧ, при́зри на ты̑ѧ и҆ ᲂу҆мꙋдрѝ ѧ҆̀ во сп҃се́нїе, да тѧ̀ велича́емъ:
Ра́дꙋйсѧ, клю́чь мꙋ́дрости взыска́вшаѧ: ра́дꙋйсѧ, ꙗ҆́кѡ хꙋдо́жество кни́жное пости́гла є҆сѝ ѿ мла́дости.
Ра́дꙋйсѧ, тѣ́мъ ѿве́рзшаѧ двє́ри бг҃опозна́нїѧ: ра́дꙋйсѧ, сщ҃е́нное почита́вшаѧ писа́нїе.
Ра́дꙋйсѧ, ѿ сегѡ̀ ᲂу҆зрѣ́вшаѧ мі́ра сꙋ́щагѡ сотворе́нїе: ра́дꙋйсѧ, ᲂу҆миле́ннаѧ неизрече́ннымъ хрⷭ҇то́вымъ снизхожде́нїемъ къ па́дшемꙋ ро́дꙋ на́шемꙋ.
Ра́дꙋйсѧ, возлюби́вшаѧ возлю́бльшагѡ на́съ гдⷭ҇а: ра́дꙋйсѧ, томꙋ̀ є҆ди́номꙋ порабо́тати возжелѣ́вшаѧ.
Ра́дꙋйсѧ, послѣдѝ въ черто́гъ сла́вы є҆гѡ̀ все́льшаѧсѧ: ра́дꙋйсѧ, дѣ́вственнице, ю҆́нымъ дѣ́вамъ незри́маѧ споспѣ́шнице въ наꙋче́нїи.
Ра́дꙋйсѧ, свѣти́льниче бл҃гоче́стїѧ и҆ зна́нїѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ д҃.
Бꙋ́ри жите́йскихъ бѣ́дъ и҆ напа́стей бѣжа́вши, прпⷣбнаѧ, па́че бра́ка че́стна житїѐ дѣ́вственное возлюби́ла є҆сѝ и҆ ѿ и҆мени́тыхъ женихѡ́въ ᲂу҆клони́ласѧ є҆сѝ, ѻ҆трокови́це, да є҆ди́номꙋ женихꙋ̀ нбⷭ҇номꙋ хрⷭ҇тꙋ̀ порабо́таеши, пою́щи є҆мꙋ̀: А҆ллилꙋ́їа.
І҆́косъ д҃.
Слы́шала є҆сѝ, прпⷣбнаѧ, ꙗ҆́же а҆пⷭ҇лъ речѐ: глаго́лю безбра̑чнымъ и҆ вдови́цамъ: добро̀ и҆̀мъ є҆́сть, а҆́ще пребꙋ́дꙋтъ, ꙗ҆́кѡже и҆ а҆́зъ: а҆́ще ли же нѝ, да посѧга́ютъ: не ѡ҆жени́вый бо сѧ пече́тсѧ, ка́кѡ ᲂу҆годи́ти гдⷭ҇еви: и҆ семꙋ̀ поревнова́ла є҆сѝ. Тѣ́мже тѧ̀ велича́емъ:
Ра́дꙋйсѧ, дѣ́вственнице чи́стаѧ: ра́дꙋйсѧ, пꙋ́ть и҆́ноческагѡ житїѧ̀ и҆збра́вшаѧ.
Ра́дꙋйсѧ, ꙗ҆́кѡ жре́бїй дѣ́вства прїѧ́ти и҆ вмѣсти́ти возмогла̀ є҆сѝ бж҃їею бл҃года́тїю: ра́дꙋйсѧ, мїрска́гѡ треволне́нїѧ и҆збѣ́гшаѧ.
Ра́дꙋйсѧ, ти́хагѡ приста́нища взыска́вшаѧ: ра́дꙋйсѧ, марі́и ла́заревѣ подража́вшаѧ.
Ра́дꙋйсѧ, ꙗ҆́кѡ во хра́мѣ, а҆́ки при ногꙋ̀ хрⷭ҇то́вꙋ, примета́ласѧ є҆сѝ: ра́дꙋйсѧ, ꙗ҆́кѡ ли́кꙋ мꙋ́ченицъ и҆ прпⷣбныхъ же́нъ прїѻбщи́ласѧ є҆сѝ.
Ра́дꙋйсѧ, презрѣ́вшаѧ лѣ́потꙋ мі́ра тлѣ́ннагѡ: ра́дꙋйсѧ, неизрече́нныѧ ра́дости въ мі́рѣ го́рнемъ дне́сь прича́стнице.
Ра́дꙋйсѧ, пра́веднагѡ житїѧ̀ ѡ҆́бразе: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ є҃.
Бг҃а то́чїю боѧ́щисѧ, не ᲂу҆страши́ласѧ є҆сѝ, є҆ѵфросѵ́нїе, тѧготы̀ житїѧ̀ и҆́ноческагѡ, кро́въ же ѡ҆ста́вльши ѻ҆́тчїй, во ѡ҆би́тель притекла̀ є҆сѝ и҆ ѡ҆блещѝ тѧ̀ во а҆́гг҃льскїй ѡ҆́бразъ ᲂу҆ми́льнѣ и҆гꙋ́менїю моли́ла є҆сѝ, да не ѡ҆бѧза́вшисѧ кꙋ́плѧми жите́йскими, вы́нꙋ пѣ́ти сподо́бишисѧ хрⷭ҇то́ви: А҆ллилꙋ́їа.
І҆́косъ є҃.
Врача̀ нбⷭ҇наго моли́ла є҆сѝ, всехва́льнаѧ, да ско́рбь, роди́телема твои́ма ѿше́ствїемъ ᲂу҆чине́ннаѧ, на ра́дость преложи́тсѧ: ѡ҆ста́вила бо є҆сѝ ѧ҆̀, прпⷣбнаѧ, да хрⷭ҇то́ви послꙋ́жиши и҆ за ро́ждшихъ тѧ̀ мо́лишисѧ. Тѣ́мже тѧ̀ хва́лимъ досто́йнѡ:
Ра́дꙋйсѧ, и҆збра́ннице бж҃їѧ: ра́дꙋйсѧ, та́йне и҆з̾ ѻ҆́тчагѡ до́ма ѿше́дшаѧ.
Ра́дꙋйсѧ, во ѡ҆би́тель все́льшаѧсѧ кнѧги́ни рѡма́новы: ра́дꙋйсѧ, возло́жшаѧ рꙋ́кꙋ на ра́ло дѣ́ланїѧ дꙋхо́внагѡ.
Ра́дꙋйсѧ, бра́чный вѣне́цъ ѿложи́вшаѧ: ра́дꙋйсѧ, главꙋ̀ покры́вшаѧ кꙋкꙋ́лемъ неѕло́бїѧ.
Ра́дꙋйсѧ, ѡ҆де́ждамъ бра̑чнымъ ѡ҆де́ждꙋ нищеты̀ предпоче́тшаѧ: ра́дꙋйсѧ, со прїѧ́тїемъ ве́рвицы, а҆́ки мече́мъ, воѡрꙋже́ннаѧ сло́вомъ бж҃їимъ.
Ра́дꙋйсѧ, крⷭ҇тъ хрⷭ҇то́въ, а҆́ки зна́мѧ вѣ́ры, прїи́мшаѧ: ра́дꙋйсѧ, ꙗ҆́кѡ не посрами́ тѧ гдⷭ҇ь во ᲂу҆пова́нїи.
Ра́дꙋйсѧ, роди́тєлѧ бо, пришє́дшаѧ тѧ̀ ви́дѣти, ѿ писа́нїѧ тобо́ю ᲂу҆тѣ̑шившасѧ, въ ра́дости возврати́стасѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ ѕ҃.
Проповѣ́дника па́ѵла, и҆́же речѐ: всѧ́къ подвиза́ѧсѧ ѿ всѣ́хъ да воздержи́тсѧ, послꙋ́шающи, въ постѣ̀ и҆ воздержа́нїи неѡсла́бнѡ пожила̀ є҆сѝ, прпⷣбнаѧ, во ѡ҆би́тели: сꙋесло́вїѧ бо бѣ́гала є҆сѝ, и҆ пѣ́сньми ѱало́мскими назида́ющисѧ, моли́ласѧ є҆сѝ, и҆ въ до́брѣмъ и҆зволе́нїи ᲂу҆твержда́ющисѧ, вы́нꙋ пѣ́ла є҆сѝ: А҆ллилꙋ́їа.
І҆́косъ ѕ҃.
Возсїѧ̀ бл҃года́ть въ по́двизѣхъ житїѧ̀ твоегѡ̀, є҆ѵфросѵ́нїе всечестна́ѧ: по нѣ́коемъ бо вре́мени во гра́дъ по́лотскъ пресели́ласѧ є҆сѝ, и҆ при хра́мѣ ст҃ы́ѧ софі́и въ клѣ́тцѣ ма́лѣ подвиза́ющисѧ, кни̑ги бж҃е́ствєнныѧ препи́совала є҆сѝ, и҆ та́кѡ гра́дъ тѝ при́сный поле́знымъ ᲂу҆че́нїемъ напаѧ́ла є҆сѝ, слы́шащи ѿ всѣ́хъ такова̑ѧ:
Ра́дꙋйсѧ, по́лотское ра́дованїе: ра́дꙋйсѧ, дѣ́вамъ сїѧ́нїе.
Ра́дꙋйсѧ, ѕвѣздо̀ бл҃гоче́стїѧ: ра́дꙋйсѧ, смире́нїѧ и҆спо́лненнаѧ.
Ра́дꙋйсѧ, послꙋша́нїемъ ᲂу҆твержде́ннаѧ: ра́дꙋйсѧ, съ молча́нїемъ ско́рби терпѣ́вшаѧ.
Ра́дꙋйсѧ, при хра́мѣ бо, ꙗ҆́кѡ дре́вле бг҃оѻтрокови́ца, пожила̀ є҆сѝ: ра́дꙋйсѧ, мꙋ́драѧ кнѧжно̀ и҆ и҆ноки́не пречестна́ѧ.
Ра́дꙋйсѧ, цвѣ́те по́стничества: ра́дꙋйсѧ, свѣ́те кро́тости.
Ра́дꙋйсѧ, ᲂу҆пова́нїѧ нело́жнагѡ и҆сповѣ́днице: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ з҃.
Хотѧ́й сп҃стѝ тобо́ю жєны̀ и҆ дѣ̑вы мнѡ́гїѧ во и҆́ночествѣ, влⷣка хрⷭ҇то́съ сицева́гѡ видѣ́нїѧ ᲂу҆досто́и тѧ̀, прпⷣбнаѧ: въ со́ннѣмъ видѣ́нїи ᲂу҆зрѣ́ла є҆сѝ себє̀, є҆ѵфросѵ́нїе, принесе́нꙋ въ сельцѐ къ це́рквицѣ сп҃совѣ, и҆ а҆́гг҃ла тѝ ре́кшаго: здѣ́ ти бы́ти подоба́етъ. Ты̀ же а҆́бїе ѿ сна̀ воста́вши, ра́достнѣ пѣ́ла є҆сѝ: А҆ллилꙋ́їа.
І҆́косъ з҃.
Но́вое чꙋ́до бы́сть: то́йже бо а҆́гг҃лъ ꙗ҆ви́всѧ ст҃и́телю и҆лїѝ, повелѣ̀ є҆мꙋ̀ да́ти сельцѐ то̀ на вселе́нїе тѝ и҆ це́рквицꙋ на мл҃твꙋ, є҆́же и҆ сотворѝ ст҃и́тель а҆́бїе. Сїѧ̑ помина́юще, та́кѡ тѧ̀ велича́емъ:
Ра́дꙋйсѧ, а҆́гг҃льски пожи́вшаѧ: ра́дꙋйсѧ, а҆́гг҃ла гдⷭ҇нѧ ᲂу҆зрѣ́вшаѧ.
Ра́дꙋйсѧ, сла́дкїѧ бесѣ́ды є҆гѡ̀ прича́стнице: ра́дꙋйсѧ, ꙗ҆́кѡ и҆ пред̾ ст҃и́телемъ хода́тай бѣ̀ ѡ҆ тебѣ̀.
Ра́дꙋйсѧ, а҆́гг҃ломъ и҆ на всѣ́хъ пꙋте́хъ твои́хъ хране́ннаѧ: ра́дꙋйсѧ, кро́вомъ кри́лъ є҆гѡ̀ ѡ҆гражде́ннаѧ.
Ра́дꙋйсѧ, не преткнꙋ́вшаѧ ногѝ твоеѧ̀ ѡ҆ ка́мень горды́ни: ра́дꙋйсѧ, сегѡ̀ ра́ди видѣ́нїѧ зра́ка а҆́гг҃льскагѡ ᲂу҆досто́еннаѧ.
Ра́дꙋйсѧ, ꙗ҆́кѡ ꙗ҆ви́сѧ тѝ, и҆́же зри́тъ лицѐ ѻ҆ц҃а̀ на́шегѡ нбⷭ҇нагѡ: ра́дꙋйсѧ, не прогнѣ́вльшаѧ храни́телѧ ничи́мже сꙋ́етнымъ и҆ грѣхо́внымъ.
Ра́дꙋйсѧ, сегѡ̀ ра́ди ра́достныѧ вѣ́сти ᲂу҆досто́еннаѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ и҃.
Стра́нникъ, кро́въ ᲂу҆зрѣ́въ, ра́дꙋетсѧ, и҆ прише́дъ, поко́й сѝ прїе́млетъ. И҆ ты̀, прпⷣбнаѧ, ра́дости и҆спо́лниласѧ є҆сѝ, при це́рквицѣ на сельцѣ̀ водвори́вшисѧ со є҆ди́ною ѿ и҆́нокинь, и҆ тꙋ̀ ѡ҆снова́нїе ѡ҆би́тели твоеѧ̀ сотвори́ла є҆сѝ, ѿню́дꙋже бг҃ови дне́сь возно́ситсѧ пѣ́снь вели́каѧ, въ вы́шнихъ сꙋгꙋ́бѡ пѣсносло́вимаѧ: А҆ллилꙋ́їа.
І҆́косъ и҃.
Всѧ̑ вѣ́сть гдⷭ҇ь, и҆ ничто́же та́йно, є҆́же не ѿкры́етсѧ, вѣ́дый же всѧ̑, коемꙋ́ждо ѿ человѣ̑къ и҆зволе́нїе да́рꙋетъ, да и҆збере́тъ кі́йждо пꙋ́ть житїѧ̀, и҆ ꙗ҆́кѡже кто̀ поживе́тъ, по житїю̀ коего́ждо сконча́вшасѧ сꙋ́дитъ. Ꙗ҆́же па́мѧтꙋюще, та́кѡ тѧ̀ хва́лимъ:
Ра́дꙋйсѧ, бл҃гі́й ꙗ҆ре́мъ хрⷭ҇то́въ под̾е́мшаѧ: ра́дꙋйсѧ, по гла́сꙋ а҆́гг҃льскомꙋ на мѣ́сто пꙋсты́нно ѿше́дшаѧ.
Ра́дꙋйсѧ, то́чїю кни̑ги съ собо́ю прине́сшаѧ: ра́дꙋйсѧ, со є҆ди́нѣмъ ѡ҆дѣѧ́нїемъ бы́вшаѧ.
Ра́дꙋйсѧ, съ тремѝ ма́лыми хлѣ̑бы все́льшаѧсѧ: ра́дꙋйсѧ, прѡ́чаѧ всѧ̑ ѡ҆ста́вльшаѧ.
Ра́дꙋйсѧ, пꙋсты́ни ᲂу҆краше́нїе: ра́дꙋйсѧ, ꙗ҆́кѡ сро́днїи за по́двигъ се́й бл҃гослови́ша тѧ̀.
Ра́дꙋйсѧ, є҆пⷭ҇кпомъ и҆лїе́ю ᲂу҆тѣ́шеннаѧ: ра́дꙋйсѧ, ꙗ҆́кѡ вско́рѣ къ тебѣ̀ мнѡ́ги и҆́нѡкини стеко́шасѧ.
Ра́дꙋйсѧ, ꙗ҆́кѡ и҆ ѡ҆би́тель сла́внаѧ тꙋ̀ ᲂу҆стро́исѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ ѳ҃.
Всемлⷭ҇тиваго сп҃са хра́мъ во ѡ҆би́тели создала̀ є҆сѝ и҆ честны́ми і҆кѡ́нами ᲂу҆краси́ла є҆сѝ, прпⷣбнаѧ, споспѣ́шествꙋющей тѝ бл҃года́ти бж҃їей: древодѣ́ла бо на строе́нїе церко́вное нѣ́кїй гла́съ бꙋжда́ше, на сконча́нїе же хра́ма ди́внѣ плі̑нѳы мнѡ̀ги ѡ҆брѣто́шасѧ. Ꙗ҆́же зрѧ́щи, со ᲂу҆миле́нїемъ пѣ́ла є҆сѝ: А҆ллилꙋ́їа.
І҆́косъ ѳ҃.
Вѣті́ѧ мꙋ́драѧ была̀ є҆сѝ, прпⷣбнаѧ, па́мѧтовала бо є҆сѝ сло́во хрⷭ҇то́во: и҆́же сотвори́тъ є҆ди́нꙋ за́повѣдей си́хъ ма́лыхъ и҆ наꙋчи́тъ та́кѡ человѣ́ки, се́й ве́лїй нарече́тсѧ въ црⷭ҇твїи нбⷭ҇нѣмъ, и҆ поꙋча́ющи бл҃гоче́стїю сєстры̀ своѧ̑, пе́рвѣе сїѧ̑ твори́ла є҆сѝ. Тѣ́мже тѧ̀ велича́емъ:
Ра́дꙋйсѧ, и҆́нокинѧмъ пра́вило и҆́ноческагѡ житїѧ̀: ра́дꙋйсѧ, ꙗ҆́кѡ въ чистотѣ̀ и҆ цѣломꙋ́дрїи блюла̀ є҆сѝ ю҆́ныѧ.
Ра́дꙋйсѧ, нело́жнѡ ста̑рыѧ почита́вшаѧ: ра́дꙋйсѧ, скѡ́рбнымъ споспѣ́шнице въ терпѣ́нїи.
Ра́дꙋйсѧ, была̀ бо є҆сѝ всѣ̑мъ ѡ҆́бразъ смире́нїѧ и҆ бл҃голѣ́пнагѡ хожде́нїѧ: ра́дꙋйсѧ, ѡ҆бличи́тельнице ѡ҆сꙋжде́нїѧ и҆ многосло́вїѧ.
Ра́дꙋйсѧ, прїѧ́телище да́ра прозрѣ́нїѧ сердє́цъ: ра́дꙋйсѧ, вопроша́ющымъ мꙋ́драѧ совѣ́тнице.
Ра́дꙋйсѧ, миротво́рице сва́рѧщихсѧ: ра́дꙋйсѧ, добродѣ́тельми преꙋкраше́ннаѧ.
Ра́дꙋйсѧ, вели́каѧ рѡссі́йскаѧ дѣ́во: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ і҃.
Сп҃се́нїѧ ра́ди и҆ ᲂу҆тѣше́нїѧ є҆фе́сскꙋю і҆кѡ́нꙋ влⷣчцы на́шеѧ бцⷣы и҆спроси́ла є҆сѝ и҆з̾ царѧгра́да, прпⷣбнаѧ, во гра́дъ по́лотскъ. Ѡ҆би́тель и҆́нꙋ ᲂу҆стро́ивши, то́ю і҆кѡ́ною сїю̀ ᲂу҆краси́ла є҆сѝ: сестрꙋ́ же и҆ двѣ̀ дще́ри бра́тнїѧ, кѷрїа́ннꙋ и҆ ѻ҆́льгꙋ, и҆́ночества ѡ҆бѣ̑ты хрⷭ҇то́ви ѡ҆брꙋчи́ла є҆сѝ и҆ во ѡ҆би́телехъ твои́хъ во сп҃се́нїе ᲂу҆пра́вила є҆сѝ мнѡ́гїѧ, пою́щи: А҆ллилꙋ́їа.
І҆́косъ і҃.
Стѣно́ю крѣ́пкою ѿ и҆скꙋше́нїй ꙗ҆ви́сѧ смире́нїе твоѐ: всѧ̑ бо тѝ повелѣ́ннаѧ совѣрши́вши, ꙗ҆́кѡ рабꙋ̀ неключи́мꙋ вмѣни́ла є҆сѝ себє̀, прпⷣбнаѧ, кро́тостїю и҆ ти́хостїю нра́ва па́че зла́та и҆ би́сера ᲂу҆краси́ла є҆сѝ дꙋ́шꙋ твою̀. Тѣ́мже тѧ̀ велича́емъ:
Ра́дꙋйсѧ, слꙋго̀ чи́стаѧ дв҃ы пречⷭ҇тыѧ: ра́дꙋйсѧ, ᲂу҆весели́ла бо є҆сѝ по́лотскъ чꙋ́днымъ бж҃їѧ мт҃ре ѡ҆́бразомъ.
Ра́дꙋйсѧ, вели́кое сокро́вище рѡссі́йстѣй землѝ та́кѡ стѧжа́вшаѧ: ра́дꙋйсѧ, мнѡ́гїѧ дѣ̑вы во ѡ҆би́тель бж҃їѧ мт҃ре приве́дшаѧ.
Ра́дꙋйсѧ, при̑сныѧ тѝ на пꙋ́ть сп҃се́нїѧ привле́кшаѧ: ра́дꙋйсѧ, мꙋ́драѧ ᲂу҆прави́тельнице во сп҃се́нїе.
Ра́дꙋйсѧ, двѣ̀ ѡ҆би́тели, ꙗ҆́кѡ свѣщѝ возже́гшаѧ: ра́дꙋйсѧ, тѣ́ми просвѣти́вшаѧ странꙋ̀ по́лотскꙋю.
Ра́дꙋйсѧ, насади́тельнице дре́ва и҆́ноческагѡ житїѧ̀: ра́дꙋйсѧ, смире́нїемъ ᲂу҆таева́вшаѧ высотꙋ̀ твои́хъ по́двигѡвъ.
Ра́дꙋйсѧ, строи́тельнице рѡссі́йскїѧ землѝ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ а҃і.
Пѣ́сньми восхвалѧ́юще тѧ̀, терпѣ́нїю твоемꙋ̀ диви́мсѧ, прпⷣбнаѧ, всѧ̑кїѧ бо трꙋды̀ и҆ скѡ́рби поне́сши, послѣдѝ во ст҃ꙋ́ю зе́млю стра́нствїе прїѧ́ла є҆сѝ, и҆дѣ́же, по жела́нїю твоемꙋ̀, и҆ сконча́тисѧ приведѐ тѝ гдⷭ҇ь: та́мѡ бо къ немꙋ̀ въ ста́рости масти́тѣй пресели́ласѧ є҆сѝ, по́двигъ до́брый совѣрши́вши, съ пѣ́снїю: А҆ллилꙋ́їа.
І҆́косъ а҃і.
Свѣтоза́рнаѧ лꙋча̀ землѝ рѡссі́йскїѧ! А҆́ще пло́тїю преста́виласѧ є҆сѝ ѿ на́съ, прпⷣбнаѧ, ѻ҆ба́че дꙋ́хомъ съ на́ми при́снѡ пребыва́еши. Во хра́мѣ, тобо́ю созда́ннѣмъ, молѧ́щесѧ и҆ крестꙋ̀, ѿ тебє̀ ᲂу҆стро́енꙋ, покланѧ́ющесѧ, мо́лимъ тѧ̀, прїимѝ ѿ на́съ сицевы̑ѧ хвалы̑:
Ра́дꙋйсѧ, дре́внїѧ рѡссі́и сїѧ́нїе: ра́дꙋйсѧ, ѻ҆́ныѧ дне́сь вели́кїѧ похвало̀.
Ра́дꙋйсѧ, сла́внаѧ землѝ ст҃ы́ѧ ѿ сѣ́вера прише́льнице: ра́дꙋйсѧ, гро́бꙋ хрⷭ҇то́вꙋ поклони́тисѧ сподо́бльшаѧсѧ.
Ра́дꙋйсѧ, лампа́дꙋ тꙋ̀ ѿ землѝ рѡссі́йскїѧ возже́гшаѧ: ра́дꙋйсѧ, ᲂу҆ гро́ба хрⷭ҇то́ва ко хрⷭ҇тꙋ̀ ѿше́дшаѧ.
Ра́дꙋйсѧ, ᲂу҆ ѻ҆́нагѡ кре́стъ земна́гѡ житїѧ̀ твоегѡ̀ ѡ҆ста́вльшаѧ: ра́дꙋйсѧ, ст҃ы́ми та́йнами при сконча́нїи напꙋ́тствованнаѧ.
Ра́дꙋйсѧ, на нб҃сѝ ѿ ст҃ы́хъ ᲂу҆гѡ́дникъ ра́достно срѣ́теннаѧ: ра́дꙋйсѧ, вѣнце́мъ сла́вы ѿ нбⷭ҇нагѡ жениха̀ ᲂу҆вѣнча́ннаѧ.
Ра́дꙋйсѧ, мꙋ́драѧ дѣ́во, вше́дшаѧ въ черто́гъ жениха̀ нбⷭ҇нагѡ со сла́вою: Ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ в҃і.
Бл҃года́ти прича́стнице, ᲂу҆се́рдно мо́лимъ тѧ̀, є҆ѵфросѵ́нїе всехва́льнаѧ: пролі́й те́плꙋю твою̀ моли́твꙋ ко всевы́шнемꙋ за всю̀ зе́млю на́шꙋ правосла́внꙋю, да мꙋ́дростїю и҆ чистото́ю житїѧ̀ наро́днагѡ, ꙗ҆́кѡ дще́рь и҆збра́ннаѧ, бꙋ́детъ во ꙗ҆зы́цѣхъ землѧ̀ на́ша, и҆ ча̑да є҆ѧ̀ да вни́дꙋтъ въ гѡ́рнѧѧ селє́нїѧ, пою́ще бг҃ови: А҆ллилꙋ́їа.
І҆́косъ в҃і.
Пою́ще тѧ̀, ꙗ҆́кѡ застꙋ́пницꙋ на́шꙋ те́плꙋю, и҆́нокинѧмъ же и҆ дѣ́вамъ ѡ҆би́тели твоеѧ̀ покро́въ и҆ ᲂу҆твержде́нїе, ра́дꙋемсѧ ѡ҆ тебѣ̀, прпⷣбнаѧ, и҆ мл҃твами твои́ми проси̑маѧ прїе́млюще, съ любо́вїю велича́емъ тѧ̀ си́це досто́йнѡ:
Ра́дꙋйсѧ, ꙗ҆́кѡ мѡ́щи твоѧ̀, во ѻ҆те́чество принесє́нныѧ, процвѣто́ша нетлѣ́нїемъ: ра́дꙋйсѧ, всехва́льнаѧ, равноапⷭ҇льнагѡ влади́мїра пра́внꙋко.
Ра́дꙋйсѧ, собесѣ́днице равноапⷭ҇льныѧ ѻ҆́льги и҆ всегѡ̀ бг҃освѣ́тлагѡ ли́ка пра́ведныхъ же́нъ: ра́дꙋйсѧ, все́льшаѧсѧ въ ски́нїю ст҃ы́хъ.
Ра́дꙋйсѧ, незри́маѧ ѡ҆ на́съ хода́таице: ра́дꙋйсѧ, болѧ́щихъ врачева́нїе ди́вное.
Ра́дꙋйсѧ, печа́льныхъ ᲂу҆тѣше́нїе нело́жное: ра́дꙋйсѧ, ѿра́до скорбѧ́щихъ.
Ра́дꙋйсѧ, ѡ҆по́ро тѧ̀ призыва́ющихъ: ра́дꙋйсѧ, застꙋ́пнице на́ша те́плаѧ ᲂу҆ хрⷭ҇та̀.
Ра́дꙋйсѧ, ди́внаѧ, вѣ́рою чтꙋ́щихъ тѧ̀ пꙋтеводи́тельнице ко сп҃се́нїю: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечестна́ѧ.
Конда́къ г҃і.
Ѽ всехва́льнаѧ ма́ти на́ша, є҆ѵфросѵ́нїе всечестна́ѧ! Молѝ за ны̀ гдⷭ҇а и҆ мт҃рь є҆гѡ̀ пречⷭ҇тꙋю, да ᲂу҆крѣпи́тъ на́ша немощны̑ѧ си́лы и҆ во сп҃се́нїе ᲂу҆пра́витъ, ю҆́ныѧ въ чистотѣ̀ соблюде́тъ, дѣ́вствꙋющїѧ ᲂу҆крѣпи́тъ въ по́двизѣ, во бра́цѣ сꙋ́щїѧ въ любвѝ и҆ ми́рѣ ᲂу҆соверши́тъ, ᲂу҆врачꙋ́етъ недꙋ̑жныѧ, просвѣти́тъ ѡ҆мрачє́нныѧ, ᲂу҆ме́ршїѧ прости́тъ и҆ всѧ̑ въ черто́ги своѧ̑ ᲂу҆пра́витъ, и҆дѣ́же вы́нꙋ а҆́гг҃ли пою́тъ пѣ́снь хвале́бнꙋю: А҆ллилꙋ́їа.
Се́й конда́къ глаго́ли три́жды, та́же і҆́косъ а҃-й и҆ конда́къ а҃-й.
Моли́тва.
Ѽ прпⷣбнаѧ и҆ приснопа́мѧтнаѧ, всехва́льнаѧ ма́ти є҆ѵфросѵ́нїе, а҆́гг҃ле во пло́ти, бг҃оизбра́нный сосꙋ́де ст҃а́гѡ дх҃а, цр҃кве хрⷭ҇то́вы похвало̀ и҆ ᲂу҆краше́нїе, мона́шествꙋющихъ сла́во и҆ ᲂу҆твержде́нїе, ѻ҆те́чествꙋ, ѡ҆би́тели твое́й и҆ все́й странѣ̀ по́моще, покро́ве и҆ защи́тнице! Ты̀ є҆сѝ, ꙗ҆́кѡ дре́во, насажде́нное при и҆схо́дищихъ во́дъ, плоды̑ добродѣ́телей твои́хъ и҆ бл҃года́тными дарова̑нїи ст҃а́гѡ дх҃а ᲂу҆краше́ннаѧ, наста́внице дѣ́ломъ и҆ сло́вомъ, и҆збра́ннаѧ, непоро́чнаѧ и҆ до́браѧ. Оу҆слы́ши ны̀, молѧ́щыѧсѧ тебѣ̀ и҆ призыва́ющыѧ и҆́мѧ твоѐ, и҆́маши бо дерзнове́нїе ᲂу҆ гдⷭ҇а. И҆спросѝ на́мъ преспѣ́ѧнїе въ жи́зни добродѣ́тельнѣй, ѡ҆градѝ сєрдца̀ на̑ша вѣ́рою, наде́ждою и҆ любо́вїю и҆ стра́хомъ бж҃їимъ. Пода́й на́мъ по́мощь въ трꙋдѣ́хъ и҆ ско́рбѣхъ на́шихъ: и҆ ꙗ҆́коже попече́нїе и҆мѣ́ла є҆сѝ въ житїѝ твое́мъ ѡ҆ ѡ҆би́тели твое́й и҆ и҆́ночествꙋющихъ, та́кѡ и҆ ны́нѣ потщи́сѧ ѡ҆ на́съ, бл҃гопоспѣши́ти на́мъ во все́мъ: и҆ ѡ҆би́тель твою̀ ѡ҆градѝ ми́ромъ и҆ защитѝ ѿ вра̑гъ ви́димыхъ и҆ неви́димыхъ, да преꙋспѣва́етъ и҆ процвѣта́етъ въ добродѣ́телехъ. И҆змѝ ны̀ ѿ всѧ́кїѧ нꙋ́жды и҆ тѣсноты̀, ѿ лю́тыхъ болѣ́зней и҆ ѿ неча́ѧнныѧ сме́рти и҆ приведѝ ны̀ ко и҆́стинномꙋ покаѧ́нїю при и҆схо́дѣ и҆з̾ жи́зни сеѧ̀: и҆спросѝ на́мъ ᲂу҆ гдⷭ҇а бг҃а кончи́нꙋ ми́рнꙋ, безболѣ́зненнꙋ, непосты́днꙋ, ст҃ы́хъ та̑инъ прича́стнꙋ и҆ преведѝ ны̀ чрез̾ мыта̑рства воздꙋ̑шнаѧ, да не похи́тѧтъ на́съ и҆стѧза́телїе гро́знїи по грѣхѡ́мъ на́шимъ, но да твои́мъ застꙋпле́нїемъ и҆ по́мощїю возмо́жемъ безбѣ́днѡ проитѝ и҆стѧза́нїе воздꙋ́шное, и҆ ми́лость полꙋчи́ти, и҆ предста́ти неѡсꙋжде́ннѡ стра́шномꙋ прⷭ҇то́лꙋ, и҆ на стра́шнѣмъ сꙋди́щи сподо́битисѧ ѡ҆деснꙋ́ю ста́ти пра́веднагѡ сꙋдїѝ, и҆ наслѣ́довати пра́ведныхъ ча́сть. Є҆́й, госпожѐ, всечестна́ѧ ма́ти, прпⷣбнаѧ є҆ѵфросѵ́нїе, помозѝ на́мъ мл҃твами твои́ми, ѡ҆градѝ на́съ и҆ застꙋпѝ ѿ всѧ́кихъ ко́зней вра́жїихъ, да сподо́бимсѧ прейтѝ вре́мѧ жи́зни сеѧ̀ непреткнове́ннѡ и҆ сп҃се́нїе полꙋчи́ти мл҃твами твои́ми ᲂу҆ хрⷭ҇та̀ гдⷭ҇а, є҆го́же и҆ сподо́бимсѧ пѣ́ти и҆ славосло́вити со безнача́льнымъ ѻ҆ц҃е́мъ и҆ со ст҃ы́мъ дх҃омъ во вѣ́ки вѣкѡ́въ. А҆ми́нь.