А҆ка́ѳїстъ ст҃ѣ́й бл҃говѣ́рнѣй кн҃ги́нѣ прпⷣбнѣй а҆́ннѣ ка́шинстѣй.
Конда́къ а҃.
И҆збра́ннѣй и҆ преди́внѣй ᲂу҆го́дницѣ хрⷭ҇то́вѣ, ско́рой помо́щницѣ и҆ моли́твенницѣ на́шей, похва̑льнаѧ воспѣва́емъ тѝ, ѡ҆ на́съ пред̾ хрⷭ҇то́мъ бг҃омъ предста́тельнице. Ты́ же ꙗ҆́кѡ и҆мꙋ́щаѧ ве́лїе дерзнове́нїе ко гдⷭ҇ꙋ, моли́сѧ, да и҆зба́витъ ѿ бѣ́дъ и҆ скорбе́й ны̀ зовꙋ́щыѧ:
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
І҆́косъ а҃.
А҆́гг҃лѡвъ творе́цъ честнꙋ́ю ѻ҆́трасль бл҃гочести́вагѡ ко́рене бл҃говѣ́рныхъ рѡссі́йскихъ кнѧзе́й и҆збра́ тѧ во ѻ҆́бразъ всѣ̑мъ, сїѧ́ющꙋю вѣ́рою, любо́вїю, чистото́ю, да всѝ, зрѧ́ще твоѐ бг҃оꙋго́дное житїѐ, со бл҃гоговѣ́нїемъ и҆ ра́достїю глаго́лемъ тѝ си́це:
Ра́дꙋйсѧ, ꙗ҆́кѡ ѿ младе́нства блгⷣти бж҃їѧ и҆спо́лниласѧ є҆сѝ: ра́дꙋйсѧ, ꙗ҆́кѡ въ житїѝ твое́мъ добродѣ́тельми мно́гими просвѣти́ласѧ є҆сѝ.
Ра́дꙋйсѧ, пра́вило вѣ́ры и҆ бл҃гоче́стїѧ: ра́дꙋйсѧ, ѻ҆́бразе кро́тости и҆ смире́нїѧ.
Ра́дꙋйсѧ, свѣти́ло любвѐ и҆ воздержа́нїѧ: ра́дꙋйсѧ, дарѡ́въ ст҃а́гѡ дх҃а честно́е вмѣсти́лище.
Ра́дꙋйсѧ, ско́рбныхъ ᲂу҆тѣше́нїе: ра́дꙋйсѧ, кнѧги́нь и҆ и҆́нокинь рѡссі́йскихъ похвале́нїе.
Ра́дꙋйсѧ, живꙋ́щихъ въ мі́рѣ ти́хое приста́нище: ра́дꙋйсѧ, бл҃гочести́выхъ роди́телей ᲂу҆тѣше́нїе.
Ра́дꙋйсѧ, градѡ́въ тве́ри и҆ ка́шина и҆ всеѧ̀ землѝ на́шеѧ ᲂу҆краше́нїе: ра́дꙋйсѧ, ны́нѣ съ ли́ки а҆́гг҃льскими на нб҃сѣ́хъ влⷣцѣ всѣ́хъ предстоѧ́щаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ в҃
Прови́дѣвъ гдⷭ҇ь а҆гг҃лоподо́бное житїѐ твоѐ, ꙗ҆́кѡ ст҃о́е и҆́мѧ є҆гѡ̀ просла́виши, и҆ ꙗ҆́кѡже заповѣ́да ст҃ы́й а҆пⷭ҇лъ, бди́тельна, ст҃олѣ́пна, цѣломꙋ́дрена, здра́ва вѣ́рою, любо́вїю и҆ терпѣ́нїемъ пребꙋ́деши, ѿ ю҆́ности твоеѧ̀ призва̀ тѧ̀ пѣ́ти є҆мꙋ̀: А҆ллилꙋ́їа.
І҆́косъ в҃.
Ра́зꙋмъ нбⷭ҇ный тебѣ̀ дарова́сѧ, бг҃оизбра́ннаѧ ѻ҆трокови́це, непреста́ннѡ помышлѧ́ти ѡ҆ нбⷭ҇ныхъ въ бг҃олюби́вѣмъ кро́вѣ бл҃говѣ́рныхъ роди́телей твои́хъ. Сегѡ̀ ра́ди прїимѝ ѿ на́съ похвалы̑ сїѧ̑:
Ра́дꙋйсѧ, роди́телей бл҃гочести́выхъ пло́дъ бл҃гослове́нный бы́вшаѧ: ра́дꙋйсѧ, добродѣ́тєли и҆ бл҃гоче́стїе и҆́хъ ᲂу҆наслѣ́довавшаѧ.
Ра́дꙋйсѧ, бл҃гоче́стїю и҆ мл҃твѣ ѿ ни́хъ наꙋче́ннаѧ: ра́дꙋйсѧ, чте́нїю бжⷭ҇твенныхъ писа́нїй навы́кшаѧ.
Ра́дꙋйсѧ, житїѧ̀ ст҃ы́хъ и҆ поꙋчє́нїѧ и҆́хъ возлюби́вшаѧ: ра́дꙋйсѧ, ѿ ст҃и́телей росто́вскихъ наꙋче́нїе прїи́мшаѧ.
Ра́дꙋйсѧ, съ роди́тели твои́ми бл҃гослове́нїю и҆ наставле́нїю і҆ере́євъ гдⷭ҇нихъ при́снѡ внима́вшаѧ: ра́дꙋйсѧ, а҆́ки крі́нъ бл҃гово́нный во ѻ҆те́чествѣ твое́мъ процвѣ́тшаѧ.
Ра́дꙋйсѧ, ѿ млады́хъ ногте́й твои́хъ стра́хъ бж҃їй и҆мѣ́вшаѧ: ра́дꙋйсѧ, ѿ ю҆́ности твоеѧ̀ гѡ́рнѧѧ мꙋ́дрствовавшаѧ.
Ра́дꙋйсѧ, си́мъ пꙋ́ть сп҃се́нїѧ на́мъ показа́вшаѧ: ра́дꙋйсѧ, непоколеби́мое на гдⷭ҇а і҆и҃са ᲂу҆пова́нїе неизмѣ́ннѡ сохра́ньшаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ г҃.
Си́ла вы́шнѧгѡ ѿ ю҆́ности твоеѧ̀ вои́стиннꙋ ѡ҆сѣнѧ́ше тѧ̀, и҆ хранѧ́ше, и҆ возбꙋжда́ше на мл҃твы, поще́нїе и҆ милосе́рдїе, во є҆́же бл҃гочєсти́вымъ пре́дкѡмъ твои̑мъ подража́ти и҆ гдⷭ҇еви воспѣва́ти: А҆ллилꙋ́їа.
І҆́косъ г҃.
И҆мꙋ́щи бл҃гочєсти́выѧ роди́тели, прилѣжа́ла є҆сѝ бг҃оꙋго́дномꙋ житїю̀, бл҃года́тїю бж҃їею во всѧ́цѣмъ дѣ́лѣ бла́зѣ всегда̀ подкрѣплѧ́ема сꙋ́щи. Тѣ́мже дивѧ́щесѧ таково́мꙋ ѿ ю҆́ности твоеѧ̀ раче́нїю, со ᲂу҆миле́нїемъ зове́мъ тѝ:
Ра́дꙋйсѧ, ꙗ҆́кѡ гдⷭ҇ь бг҃ъ бл҃гоизво́ли ѿ ю҆́ности ѡ҆ст҃и́ти тѧ̀: ра́дꙋйсѧ, ꙗ҆́кѡ бога́тый ми́лостїю ѡ҆богатѝ тѧ̀ бл҃года́тїю свое́ю.
Ра́дꙋйсѧ, ꙗ҆́кѡ гдⷭ҇ь и҆спо́лни тѧ̀ стра́ха бж҃їѧ, премꙋ́дрости и҆ ра́зꙋма: ра́дꙋйсѧ, ꙗ҆́кѡ ѿ младе́нчества гдⷭ҇еви прилѣпи́ласѧ є҆сѝ.
Ра́дꙋйсѧ, ꙗ҆́кѡ со стра́хомъ бж҃їимъ и҆ ᲂу҆се́рдїемъ хра́мꙋ бж҃їю и҆ слꙋ́жбамъ цр҃кѡ́внымъ при́снѡ прилѣжа́ла є҆сѝ: ра́дꙋйсѧ, ꙗ҆́кѡ и҆ въ до́мѣ неꙋсы́пнѡ пра́вило мл҃твенное и҆справлѧ́ла є҆сѝ.
Ра́дꙋйсѧ, ꙗ҆́кѡ всѧ́кое дѣ́ло твоѐ съ мл҃твою сопрѧга́шесѧ: ра́дꙋйсѧ, ꙗ҆́кѡ трꙋ́дъ тво́й бл҃годаре́нїемъ бг҃ꙋ скончава́шесѧ.
Ра́дꙋйсѧ, чистоты̀ дꙋше́вныѧ и҆ тѣле́сныѧ храни́тельнице: ра́дꙋйсѧ, неꙋста́ннымъ бл҃готворе́нїемъ и҆ ми́лостынѧми вѣ̑рнымъ ско́раѧ помо́щнице.
Ра́дꙋйсѧ, дѣ́вамъ чи̑стымъ премꙋ́драѧ ᲂу҆строи́тельнице: ра́дꙋйсѧ, ча́дѡмъ на́шимъ до́браѧ ᲂу҆чи́тельнице.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ д҃.
Бꙋ́рѧ бѣ́дъ и҆ напа́стей ᲂу҆тѣснѧ́ше тогда̀ ѻ҆те́чество на́ше и҆ вѣ́рꙋ правосла́внꙋю, и҆ всѝ бѣ́дствовахꙋ ѿ наше́ствїѧ и҆ноплемє́нникъ и҆ междоꙋсо́бныѧ бра́ни. Ты́ же, ю҆́нице, се́рдцемъ чи́стаѧ, во ᲂу҆едине́нїи сꙋ́щи, и҆злива́ла є҆сѝ въ мл҃твѣ пред̾ гдⷭ҇емъ дꙋ́шꙋ твою̀, а҆́гг҃льскꙋю пѣ́снь вопїю́ще: А҆ллилꙋ́їа.
І҆́косъ д҃.
Слы́шавши бг҃олюби́ваѧ кн҃ги́нѧ ѯе́нїа, ма́ти ст҃а́гѡ кнѧ́зѧ тверска́гѡ мїхаи́ла, ѡ҆ бл҃гоче́стїи твое́мъ, кн҃ги́не а҆́нно, речѐ послѡ́мъ свои́мъ: слы́шахъ, ꙗ҆́кѡ є҆́сть ᲂу҆ росто́вскагѡ кнѧ́зѧ дщѝ ѕѣлѡ̀ добродѣ́тельна, премꙋ́дра же и҆ прекра́сна: сїю̀ ᲂу҆̀бо, бж҃їимъ и҆зволе́нїемъ, ви́дѣти жела́ю въ сꙋпрꙋ́жествѣ за сы́номъ мои́мъ. И҆ а҆́бїе по бл҃года́ти бж҃їей и҆спо́лнисѧ жела́нїе се́рдца є҆ѧ̀, да тобо́ю бг҃ъ просла́витсѧ и҆ да всѝ воспѣва́ютъ тебѣ̀:
Ра́дꙋйсѧ, невѣ́сто, про́мысломъ бж҃їимъ пред̾ꙋка́заннаѧ: ра́дꙋйсѧ, голꙋби́це чи́стаѧ и҆ непоро́чнаѧ се́рдцемъ.
Ра́дꙋйсѧ, мꙋ́драѧ є҆ѵⷢ҇льскаѧ дѣ́во, во свѣ́тѣ вѣ́ры и҆ дѣ́лъ бл҃ги́хъ ходи́вшаѧ: ра́дꙋйсѧ, ꙗ҆́кѡ невозвра́тнымъ пꙋте́мъ по за́повѣдємъ влⷣки твоегѡ̀ ше́ствовала є҆сѝ.
Ра́дꙋйсѧ, ꙗ҆́кѡ за пресла́вныѧ добродѣ̑тели твоѧ̑ вни́ти въ черто́гъ цр҃ѧ̀ нбⷭ҇нагѡ сподо́биласѧ є҆сѝ: ра́дꙋйсѧ, всѣ̑мъ жена́мъ рѡссі́йскимъ похвало̀ и҆ ᲂу҆твержде́нїе.
Ра́дꙋйсѧ, чистото́ю твое́ю всѣ̑мъ родѡ́мъ тве́рдое наꙋче́нїе: ра́дꙋйсѧ, ꙗ҆́кѡ согла́сїе сꙋпрꙋ́гѡмъ, по мл҃твамъ къ тебѣ̀, подава́ла є҆сѝ.
Ра́дꙋйсѧ, неисповѣди́мыми сꙋдьба́ми бж҃їими ѿ негѡ̀ просла́вленнаѧ: ра́дꙋйсѧ, но́ваѧ чꙋдеса̀ и҆ зна́мєнїѧ мнѡ́га чтꙋ́щымъ тѧ̀ ꙗ҆ви́вшаѧ.
Ра́дꙋйсѧ, ꙗ҆́кѡ цр҃ѧ̀ бг҃овѣнча́ннаго и҆ ѻ҆́трасли до́ма є҆гѡ̀ на поклоне́нїе мощє́мъ твои́мъ подви́гла є҆сѝ: ра́дꙋйсѧ, ꙗ҆́кѡ и҆ сердца̀ вѣ́рныхъ къ почита́нїю и҆ воспрославле́нїю твоемꙋ̀ привлекла̀ є҆сѝ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ є҃.
Ꙗ҆́кѡ свѣ́тлаѧ ѕвѣзда̀, бг҃омꙋ́драѧ невѣ́сто, при́сными твои́ми сопровожда́ема, съ вели́кою сла́вою во гра́дъ тве́рь во хра́мъ сп҃са на́шегѡ прибыла̀ є҆сѝ: кнѧ́зи же и҆ наро́ди, велелѣ́пнѡ срѣта́юще тѧ̀, ра́довахꙋсѧ ѡ҆ тебѣ̀, вопїю́ще бг҃ꙋ: А҆ллилꙋ́їа.
І҆́косъ є҃.
Ви́дѣвше тѧ̀ вельмо́жи, кли́рїцы и҆ мїрсті́и лю́дїе бг҃оспаса́емагѡ гра́да тве́ри, на бра́къ честны́й съ возлю́бленнымъ кнѧ́земъ и҆́хъ мїхаи́ломъ прите́кшꙋю, и҆зыдо́ша въ срѣ́тенїе твоѐ и҆ вопїѧ́хꙋ тѝ, глаго́люще:
Ра́дꙋйсѧ, ѿ лѷва́на невѣ́сто, во ѻ҆́бразъ є҆дине́нїѧ хрⷭ҇та̀ и҆ цр҃кве сочета́тисѧ бра́комъ со кнѧ́земъ на́шимъ грѧдꙋ́щаѧ: ра́дꙋйсѧ, чи́стаѧ голꙋби́це, прише́ствїемъ твои́мъ ми́ръ съ бг҃омъ и҆ въ чл҃вѣ́цѣхъ бл҃говоле́нїе зна́менꙋющаѧ.
Ра́дꙋйсѧ, ѿ бг҃а кнѧ́зю на́шемꙋ въ дѣ́лѣхъ ᲂу҆правле́нїѧ помо́щнице ᲂу҆гото́ваннаѧ: ра́дꙋйсѧ, за неви̑нныѧ и҆ лю́тѣ стра́ждꙋщыѧ хода́таице, про́мысломъ бж҃їимъ пред̾ꙋка́заннаѧ.
Ра́дꙋйсѧ, ѡ҆ нꙋ́ждахъ и҆ потре́бахъ на́шихъ пещи́сѧ ѿ бг҃а поста́вленнаѧ: ра́дꙋйсѧ, сокро́вище ма́тернѧгѡ попече́нїѧ, ѿ гдⷭ҇а на́мъ да́нное.
Ра́дꙋйсѧ, свѣти́ло млⷭ҇рдїѧ, над̾ гра́домъ на́шимъ восходѧ́щее: ра́дꙋйсѧ, ѕвѣздо̀ ᲂу҆́треннѧѧ, при́снѡ ра́дость на́мъ возвѣща́ющаѧ.
Ра́дꙋйсѧ, ѡ҆́блаче всесвѣ́тлый, до́ждь любвѐ и҆ по́мощи всѣ̑мъ достѡ́йнымъ твоегѡ̀ застꙋпле́нїѧ и҆ска́пати ѡ҆бѣща́ѧй: ра́дꙋйсѧ, во ѻ҆́бразъ жена́мъ хрїстїа̑нскимъ свы́ше пронарече́ннаѧ.
Ра́дꙋйсѧ, вдови́цамъ и҆ си̑рымъ покро́ве, прови́дѣнїемъ по́сланный: ра́дꙋйсѧ, ю҆́нымъ дѣ́вамъ и҆ жена́мъ прибѣ́жище и҆ ᲂу҆крѣпле́нїе.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ ѕ҃.
Проповѣ́дꙋютъ ѡ҆ бг҃оꙋго́дномъ житїѝ твое́мъ, бл҃же́ннаѧ ма́ти, въ сꙋпрꙋ́жествѣ и҆ кнѧже́нїи, добродѣ́тєли твоѧ̑: ве́лїе бл҃гоче́стїе, смиренномꙋ́дрїе, милосе́рдїе, и҆́стиннаѧ ма́тернѧѧ любы̀ ко всѣ̑мъ, пою́щымъ ѡ҆ тебѣ̀ бг҃ꙋ: А҆ллилꙋ́їа.
І҆́косъ ѕ҃.
Возсїѧ̀ бг҃оꙋго́дное житїѐ твоѐ, ꙗ҆́кѡ кра́снаѧ зарѧ̀, призыва́ющаѧ всѣ́хъ на бг҃оꙋгожде́нїе на дѣ́ланїе своѐ со ᲂу҆се́рдїемъ, да всѝ послѣ́дꙋюще тѝ зовꙋ́тъ:
Ра́дꙋйсѧ, со кнѧ́земъ, сꙋпрꙋ́гомъ твои́мъ, во всѧ́комъ бл҃гоче́стїи и҆ чистотѣ̀ пожи́вшаѧ: ра́дꙋйсѧ, и҆ ча̑да твоѧ̑ во стра́сѣ бж҃їи воспита́вшаѧ.
Ра́дꙋйсѧ, цр҃кви бж҃їей бл҃годѣ́ѧвшаѧ и҆ бл҃голѣ́пїе хра́мѡвъ бж҃їихъ люби́вшаѧ: ра́дꙋйсѧ, и҆ по кончи́нѣ твое́й любо́вь мно́гꙋ ко хра́мѡмъ бж҃їимъ въ дꙋша́хъ гра́жданъ бг҃олюби́выхъ возжига́вшаѧ.
Ра́дꙋйсѧ, ꙗ҆́кѡ ѿ всѧ́кагѡ недꙋ́га прибѣга́ющыѧ съ вѣ́рою къ тебѣ̀ и҆сцѣлѧ́еши: ра́дꙋйсѧ, ꙗ҆́кѡ ѿ лю́тагѡ наси́лїѧ дїа́вольскагѡ молѧ́щыѧсѧ къ тебѣ̀ и҆з̾има́еши.
Ра́дꙋйсѧ, при́снѡ всѧ́кое попече́нїе ѡ҆ бла́зѣ владо́мыхъ и҆мѣ́вшаѧ: ра́дꙋйсѧ, въ ско́рбехъ и҆ страда́нїихъ несча̑стнымъ, си̑рымъ и҆ бѣ̑днымъ помо́щнице те́плаѧ.
Ра́дꙋйсѧ, больны́хъ цѣли́тельнице ско́раѧ и҆ чꙋ́днаѧ: ра́дꙋйсѧ, и҆́щꙋщымъ пꙋтѝ ко сп҃се́нїю наста́внице бл҃года́тнаѧ.
Ра́дꙋйсѧ, ꙗ҆́кѡ по преставле́нїи твое́мъ сподо́биласѧ є҆сѝ ѿ бг҃а да́ра чꙋдотворе́нїй: ра́дꙋйсѧ, полкѝ и҆ноплеме́нныхъ моле́нїемъ твои́мъ ѿ гра́да ка́шина ѿгна́вшаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ з҃.
Хотѧ̀ гдⷭ҇ь и҆́стинное бл҃гоче́стїе твоѐ ꙗ҆ви́ти и҆ въ терпѣ́нїи тѧ̀ ᲂу҆крѣпи́ти, скѡ́рби мнѡ́зи попꙋстѝ на тѧ̀, да просвѣти́шисѧ, ꙗ҆́кѡже зла́то въ горни́лѣ, и҆ да пое́ши бг҃ꙋ: А҆ллилꙋ́їа.
І҆́косъ з҃.
Но́ваго страстоте́рпца ꙗ҆вѝ гдⷭ҇ь сꙋпрꙋ́га твоегѡ̀, бл҃говѣ́рнагѡ кнѧ́зѧ мїхаи́ла: є҆мꙋ́же сострада́ющи, вѣнце́мъ ѿ бг҃а вѣнча́ласѧ є҆сѝ, бл҃говѣ́рнаѧ кн҃ги́не, да прославлѧ́юще просла́вльшаго тѧ̀ гдⷭ҇а, пое́мъ си́це:
Ра́дꙋйсѧ, пра́веднаѧ а҆́нно, носѧ́щаѧ дх҃ъ сокрꙋше́нъ къ си́льномꙋ и҆ бг҃ꙋ ра́зꙋмѡвъ: ра́дꙋйсѧ, мнѡ́гїѧ скѡ́рби и҆ бѣды̑ претерпѣ́вшаѧ.
Ра́дꙋйсѧ, мл҃твою всѧ̑ побѣжда́вшаѧ: ра́дꙋйсѧ, терпѣ́нїемъ и҆ ᲂу҆пова́нїемъ сꙋпрꙋ́га твоего̀ ᲂу҆тѣша́вшаѧ.
Ра́дꙋйсѧ, ѿ є҆ди́наго гдⷭ҇а по́мощи ѡ҆жида́вшаѧ: ра́дꙋйсѧ, къ немꙋ̀ млⷭ҇тивомꙋ съ го́рькими слеза́ми припа́давшаѧ.
Ра́дꙋйсѧ, ѿ гдⷭ҇а ꙗ҆́кѡже зла́то въ горни́лѣ скорбе́й ѡ҆чище́ннаѧ: ра́дꙋйсѧ, ꙗ҆́кѡже ка́мень драгі́й чистото́ю сїѧ́ющаѧ.
Ра́дꙋйсѧ, вїногра́де, и҆з̾ точи́ла приносѧ́й вїно̀ бл҃гово́нное: ра́дꙋйсѧ, ма́нно, пита́ющаѧ и҆ ᲂу҆слажда́ющаѧ всѣ́хъ тре́бꙋющихъ.
Ра́дꙋйсѧ, и҆сто́чниче ра́зꙋма, ѿ бг҃а ра́зꙋмѡвъ всѧ̑ напаѧ́ѧй: ра́дꙋйсѧ, росо̀, ѡ҆роша́ющаѧ и҆ ѡ҆живлѧ́ющаѧ странꙋ̀ твою̀, ѿ наше́ствїѧ и҆ноплеме́нныхъ пострада́вшꙋю.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ и҃.
Стра́нникъ въ невѣ́рнѣй странѣ̀ ꙗ҆ви́сѧ бл҃говѣ́рный сꙋпрꙋ́гъ тво́й, всебл҃же́ннаѧ а҆́нно, є҆гда̀ за́вистїю и҆ клевето́ю срѡ́дникъ свои́хъ къ безбо́жномꙋ царю̀ ѻ҆рды́нскомꙋ приведе́нъ бы́сть. Ты́ же ско́рбь се́рдца твоегѡ̀ покрыва́ющи, и҆́злиха вопїѧ́ла є҆сѝ бг҃ꙋ: А҆ллилꙋ́їа.
І҆́косъ и҃.
Ве́сь є҆сѝ жела́нїе моѐ, ве́сь сла́дость, сладча́йшїй і҆и҃се! Си́це молѧ́щесѧ мїхаи́лъ, кнѧ́зь хрⷭ҇толюби́вый, и҆ та́кѡ гл҃аше: а҆́ще бг҃ъ соизво́литъ, хощꙋ̀ и҆тѝ са́мъ во ѻ҆рдꙋ̀ ко беззако́нномꙋ царю̀, хощꙋ̀ са́мъ да́ти ѿвѣ́тъ и҆ дꙋ́шꙋ мою̀ положи́ти за ѻ҆́вцы ста́да хрⷭ҇то́ва по сло́вꙋ є҆гѡ̀. Ты́ же, сꙋпрꙋ́жнице кнѧ́зѧ бл҃гочести́вагѡ, вдохновле́ннаѧ бл҃года́тїю свы́ше, рекла̀ є҆сѝ є҆мꙋ̀: пои́стинѣ бл҃же́нъ бꙋ́деши во всѧ̑ ро́ды. Сегѡ̀ ра́ди всѝ приглаша́хꙋ тѝ си́це:
Ра́дꙋйсѧ, бл҃же́ннаѧ мт҃и, въ же́нстѣмъ є҆стествѣ̀ мꙋ́жескꙋю крѣ́пость и҆мѣ́вшаѧ: ра́дꙋйсѧ, долготерпѣли́внѡ ᲂу҆пова́нїемъ на гдⷭ҇а ᲂу҆крѣплѧ́вшаѧсѧ.
Ра́дꙋйсѧ, глаго́лавшаѧ кнѧ́зю: гдⷭ҇ь бꙋ́детъ тво́й помо́щникъ: ра́дꙋйсѧ, ре́кшаѧ є҆мꙋ̀: за гдⷭ҇а пострада́въ, пои́стиннѣ бл҃же́нъ бꙋ́деши.
Ра́дꙋйсѧ, ꙗ҆́кѡ и҆ сама̀ ᲂу҆готовлѧ́ласѧ є҆сѝ пострада́ти за сп҃са хрⷭ҇та̀: ра́дꙋйсѧ, спострада́вшаѧ сꙋпрꙋ́гꙋ твоемꙋ̀ въ ско́рби мно́зѣ.
Ра́дꙋйсѧ, а҆́ще и҆ не пло́тїю, ѻ҆ба́че се́рдцемъ за хрⷭ҇та̀ страда́вшаѧ: ра́дꙋйсѧ, то́кмѡ посто́мъ, мл҃твою и҆ бл҃года́тїю бж҃їею подкрѣплѧ́вшаѧсѧ.
Ра́дꙋйсѧ, во́племъ крѣ́пкимъ ко гдⷭ҇ꙋ взыва́вшаѧ: ра́дꙋйсѧ, глаго́лавшаѧ: и҆змѝ на́съ, гдⷭ҇и, ѿ человѣ̑къ лꙋка́выхъ, и҆ ѿ мꙋже́й непра́ведныхъ, ѡ҆полча́вшихъ бра̑ни, и҆зба́ви на́съ.
Ра́дꙋйсѧ, сꙋпрꙋ́га твоего̀ презрѣ́ти сла́вꙋ и҆ всю̀ сла́дость мі́ра сегѡ̀ тлѣ́ннагѡ ᲂу҆вѣщава́вшаѧ: ра́дꙋйсѧ, и҆ на́мъ крѣ́пкое ᲂу҆пова́нїе подаю́щаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ ѳ҃.
Всѐ се́рдце твоѐ содрогнꙋ́сѧ, бг҃омꙋ́драѧ, є҆гда̀ вѣ́стникъ печа́льнꙋю вѣ́сть принесѐ, ꙗ҆́кѡ бл҃говѣ́рный сꙋпрꙋ́гъ тво́й мїхаи́лъ во мно́зѣхъ страда́нїихъ сме́рть мч҃ническꙋю претерпѣ̀: и҆ а҆́бїе въ ско́рби ве́лїей, прекло́ньши кѡлѣ́на, ко ѻ҆ц҃ꙋ̀ нбⷭ҇номꙋ возстена́ла є҆сѝ: бꙋ́ди во́лѧ твоѧ̀. А҆́гг҃ли же, возносѧ́ще дꙋ́шꙋ бл҃же́ннаго на не́бо, поѧ́хꙋ: А҆ллилꙋ́їа.
І҆́косъ ѳ҃.
Вѣті̑и многовѣща́ннїи не возмо́гꙋтъ и҆зрещѝ скѡ́рби твоѧ̑ и҆ крѣ́пость любвѐ твоеѧ̀, є҆гда̀ со ча́ды твои́ми текла̀ є҆сѝ во срѣ́тенїе моще́й бл҃же́ннаго кнѧ́зѧ, сꙋпрꙋ́га твоегѡ̀. Тѣ́мже и҆ мы̀, ᲂу҆блажа́юще болѣ̑зни се́рдца твоегѡ̀, гл҃емъ си́це:
Ра́дꙋйсѧ, ѻ҆́гненное и҆скꙋше́нїе гдⷭ҇а ра́ди претерпѣ́вшаѧ: ра́дꙋйсѧ, прїѻбщи́тисѧ страсте́мъ хрⷭ҇тѡ́вымъ ᲂу҆досто́ившаѧсѧ.
Ра́дꙋйсѧ, съ вѣ́рою и҆ любо́вїю поне́сшаѧ крⷭ҇тъ тво́й и҆ хрⷭ҇тꙋ̀ послѣ́довавшаѧ: ра́дꙋйсѧ, пре́лєсти мі́ра сегѡ̀ сп҃се́нїѧ ра́ди презрѣ́вшаѧ.
Ра́дꙋйсѧ, ꙗ҆́кѡ и҆ во ꙗ҆вле́нїи сла́вы є҆гѡ̀ возра́дꙋешисѧ и҆ восторжествꙋ́еши: ра́дꙋйсѧ, въ бѣда́хъ и҆ ско́рбныхъ ѡ҆бстоѧ́нїихъ помо́щнице на́мъ ско́раѧ.
Ра́дꙋйсѧ, ꙗ҆́кѡ и҆ сама̀ въ житїѝ твое́мъ хрⷭ҇та̀ ра́ди многоско́рбна была̀ є҆сѝ: ра́дꙋйсѧ, дꙋ́шъ смѧте́нныхъ ᲂу҆миротвори́тельнице ти́хаѧ.
Ра́дꙋйсѧ, ᲂу҆ныва́ющымъ ᲂу҆тѣ́шительнице ди́внаѧ: ра́дꙋйсѧ, недоꙋмѣва́ющымъ совѣ́тнице мꙋ́драѧ.
Ра́дꙋйсѧ, призыва́ющымъ тѧ̀ мл҃твеннице те́плаѧ: ра́дꙋйсѧ, съ вѣ́рою и҆ ᲂу҆пова́нїемъ ᲂу҆мира́ющымъ порꙋ́чнице крѣ́пкаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ і҃.
Спаси́тельнаго по́двига и҆́щꙋщи, бл҃же́ннаѧ многоско́рбнаѧ кн҃ги́не а҆́нно те́плыми мл҃твами непреста́ннѡ бг҃а молѧ́ще, да не лиши́тъ ю҆̀ достоѧ́нїѧ ст҃ы́хъ и҆ наслѣ́дїѧ нбⷭ҇нагѡ своегѡ̀ црⷭ҇твїѧ, пою́щꙋю бг҃ꙋ: А҆ллилꙋ́їа.
І҆́косъ і҃.
Стѣна̀ нерꙋши́маѧ, приста́нище и҆ предста́тельство къ тебѣ̀ прибѣга́ющихъ была̀ є҆сѝ, бл҃же́ннаѧ, ᲂу҆тѣше́нїе же и҆ весе́лїе. Сегѡ̀ ра́ди зове́мъ тѝ:
Ра́дꙋйсѧ, и҆ во вдовствѣ̀ бы́вшаѧ прави́тельнице мꙋ́драѧ, ѻ҆́льзѣ ст҃ѣ́й подо́бнаѧ и҆ милосе́рднаѧ: ра́дꙋйсѧ, ча̑да твоѧ̑ во стра́сѣ бж҃їемъ содержа́вшаѧ.
Ра́дꙋйсѧ, ходи́ти въ за́повѣдехъ гдⷭ҇нихъ и҆ ꙗ҆влѧ́ти ко всѣ̑мъ ми́лость поꙋча́вшаѧ: ра́дꙋйсѧ, бл҃же́ннаѧ, ни́щыѧ пита́вшаѧ и҆ ᲂу҆бѡ́гїѧ призира́вшаѧ.
Ра́дꙋйсѧ, стра̑нныѧ въ до́мъ тво́й вводи́ти повелѣва́вшаѧ, пи́щꙋ и҆ ѡ҆де́ждꙋ и҆̀мъ подава́вшаѧ: ра́дꙋйсѧ, си̑рыѧ и҆ вдѡви́цы застꙋпа́вшаѧ и҆ всѣ̑мъ просѧ́щымъ по́мощи помога́вшаѧ.
Ра́дꙋйсѧ, мно́гѡ дꙋше́ю за ча̑да твоѧ̑ поболѣ́вшаѧ: ра́дꙋйсѧ, сꙋпрꙋ́жнице до́блѧѧ.
Ра́дꙋйсѧ, и҆́ноческое стро́гое житїѐ во вдовствѣ̀ проводи́вшаѧ: ра́дꙋйсѧ, печа́льми земны́ми ᲂу҆гнетє́ннымъ ми́ръ вѣ́чный раскрыва́ющаѧ.
Ра́дꙋйсѧ, ᲂу҆ распѧ́тагѡ на крⷭ҇тѣ̀ за ны̀, грѣ̑шныѧ, ми́ра и҆ тишины̀ непреста́ннѡ проси́вшаѧ: ра́дꙋйсѧ, въ ны́нѣшнемъ житїѝ всѣ̑мъ помо́щнице те́плаѧ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ а҃і.
Пѣ́нїе и҆ мл҃твы непреста́нныѧ возноси́ти бг҃ꙋ хотѧ́щи, бл҃же́ннаѧ, пришла̀ є҆сѝ во ѡ҆би́тель дѣви́чꙋ, и҆ та́мѡ съ вели́кимъ смире́нїемъ молѧ́щисѧ, повелѣ́ла є҆сѝ себє̀ постри́щи во а҆́гг҃льскїй чи́нъ, и҆ та́кѡ, по́мощїю всевы́шнѧгѡ бг҃а, въ ма́лѣ вре́мени превзошла̀ є҆сѝ добродѣ́тельми всѧ̑ бы́вшаѧ та́мѡ пѡ́стницы, пою́щи гдⷭ҇еви: А҆ллилꙋ́їа.
І҆́косъ а҃і.
Свѣтопода́тельный свѣти́льникъ была̀ є҆сѝ, бг҃обл҃же́ннаѧ: кнѧ́зи бо, кн҃ги̑ни, ча̑да твоѧ̑ и҆ всѧ̑ бл҃гоче́стнѡ живꙋ́щыѧ во гра́дѣхъ тве́ри и҆ ка́шинѣ, ѡ҆би́тель твою̀ посѣща́вшыѧ непреста́ннѡ поꙋча́ла є҆сѝ бг҃а боѧ́тисѧ, Томꙋ̀ всегда̀ ᲂу҆гѡ́днаѧ твори́ти и҆ жи́ти въ любвѝ дрꙋ́гъ ко дрꙋ́гꙋ. Сегѡ̀ ра́ди всѝ прославлѧ́хꙋ тѧ̀ си́це:
Ра́дꙋйсѧ, мїрскі́ѧ сꙋеты̀ ѿрѣши́вшаѧсѧ: ра́дꙋйсѧ, нбⷭ҇нагѡ ѻ҆те́чества возжела́вшаѧ.
Ра́дꙋйсѧ, хрⷭ҇та̀ всѣ́мъ се́рдцемъ возлюби́вшаѧ: ра́дꙋйсѧ, къ подно́жїю но́гъ є҆гѡ̀ при́снѡ припа́давшаѧ.
Ра́дꙋйсѧ, вели́кимъ а҆́гг҃льскимъ ѡ҆́бразомъ ᲂу҆краси́вшаѧсѧ: ра́дꙋйсѧ, на и҆́ночєскїѧ по́двиги и҆ борє́нїѧ ᲂу҆стреми́вшаѧсѧ.
Ра́дꙋйсѧ, и҆́ноческомꙋ послꙋша́нїю всецѣ́лѡ преда́вшаѧсѧ: ра́дꙋйсѧ, всю̀ себє̀ въ же́ртвꙋ непоро́чнꙋю прине́сшаѧ.
Ра́дꙋйсѧ, ᲂу҆́мъ и҆ се́рдце твоѐ мл҃твѣ посвѧти́вшаѧ: ра́дꙋйсѧ, ꙗ҆́кѡ хрⷭ҇то́съ по ᲂу҆спе́нїи твое́мъ въ черто́гъ сво́й тѧ̀ вселѝ.
Ра́дꙋйсѧ, ꙗ҆́кѡ и҆ мѡ́щи твоѧ̑ нетлѣ̑нны сохранѝ, мнѡ́гими чꙋдесы̑ и҆ и҆сцѣле́ньми къ тебѣ̀ приходѧ́щихъ ѡ҆богатѝ: ра́дꙋйсѧ, наста́внице и҆́нокинѧмъ и҆ собесѣ́днице а҆́гг҃лѡмъ.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ в҃і.
Бл҃года́ть и҆ ве́лїе дерзнове́нїе твоѐ пред̾ бг҃омъ вѣ́дꙋще, тебѣ̀, прпⷣбнаѧ мт҃и, мо́лимсѧ: моли́сѧ ѡ҆ на́съ ко гдⷭ҇ꙋ, да и҆зба́витъ ны̀ ѿ всѣ́хъ бѣ́дъ и҆ напа́стей и҆ сохрани́тъ и҆ ᲂу҆тверди́тъ ны̀ во ст҃ѣ́й вѣ́рѣ, во всѧ́комъ бл҃гоче́стїи и҆ чистотѣ̀, да ти́хое и҆ безмо́лвное житїѐ поживе́мъ и҆ пое́мъ бл҃годѣ́ющемꙋ тобо́ю бг҃ꙋ: А҆ллилꙋ́їа.
І҆́косъ в҃і.
Пою́ще твоѐ прославле́нїе, ᲂу҆блажа́емъ тѧ̀, прпⷣбнаѧ, ꙗ҆́кѡ многомо́щнꙋю ѡ҆ на́съ мл҃твенницꙋ пред̾ гдⷭ҇емъ, ᲂу҆тѣ́шительницꙋ и҆ покрови́тельницꙋ, и҆ возглаша́емъ тѝ си́це:
Ра́дꙋйсѧ, по́двигомъ до́брымъ подвиза́вшаѧсѧ: ра́дꙋйсѧ, тече́нїе ско́рбное посто́мъ, бдѣ́нїемъ и҆ мл҃твою непреста́ннѡ совѣрша́вшаѧ.
Ра́дꙋйсѧ, носи́вшаѧ на землѝ вѣне́цъ терно́вый: ра́дꙋйсѧ, ᲂу҆наслѣ́довавшаѧ на нб҃сѝ вѣне́цъ нетлѣ́нный.
Ра́дꙋйсѧ, сꙋпрꙋ́жнице страстоте́рпца хрⷭ҇то́ва: ра́дꙋйсѧ, съ ни́мъ спострада́вшаѧ и҆ вѣнча́вшаѧсѧ.
Ра́дꙋйсѧ, мл҃твами твои́ми гра́дъ ка́шинъ ѿ смертоно́сныѧ ꙗ҆́звы и҆зба́вившаѧ: ра́дꙋйсѧ, ꙗ҆́кѡ вѣ́рꙋ къ тебѣ̀ несꙋмнѣ́ннꙋю и҆ наде́ждꙋ и҆звѣ́стнꙋю въ лю́бѧщихъ тѧ̀ возгрѣ́ла є҆сѝ.
Ра́дꙋйсѧ, ѿ гдⷭ҇а всѣ́хъ бл҃ги́хъ на́мъ пода́тельнице: ра́дꙋйсѧ, во всѣ́хъ ско́рбехъ и҆ ѡ҆бстоѧ́нїихъ ᲂу҆тѣ́шительнице.
Ра́дꙋйсѧ, ѿ вра̑гъ ви́димыхъ и҆ неви́димыхъ защи́тнице: ра́дꙋйсѧ, ѡ҆ на́съ пред̾ гдⷭ҇емъ въ де́нь пра́веднагѡ воздаѧ́нїѧ предста́тельнице.
Ра́дꙋйсѧ, ст҃а́ѧ бл҃говѣ́рнаѧ кн҃ги́не, прпⷣбнаѧ ма́ти а҆́нно.
Конда́къ г҃і.
Ѽ, прпⷣбнаѧ и҆ пребл҃же́ннаѧ ма́ти а҆́нно! Моли́сѧ при́снѡ хрⷭ҇тꙋ̀ бг҃ꙋ на́шемꙋ, дарова́ти лю́демъ правосла̑внымъ на врагѝ побѣ̑ды и҆ ѡ҆долѣ́нїе, и҆ мі́рꙋ ᲂу҆мире́нїе, и҆ все́й рѡссі́йстѣй землѝ вели́кое ᲂу҆твержде́нїе, на́мъ же грѣхѡ́въ ѡ҆ставле́нїе и҆ житїѧ̀ и҆справле́нїе, да та́кѡ нбⷭ҇нагѡ црⷭ҇твїѧ наслѣ́дницы бꙋ́демъ, въ ра́дости пою́ще со а҆́гг҃лы бг҃ꙋ: А҆ллилꙋ́їа.
Се́й конда́къ глаго́летсѧ три́жды. Та́же і҆́косъ а҃-й конда́къ а҃-й.
Моли́тва.
Ѽ, прпⷣбнаѧ и҆ пребл҃же́ннаѧ ма́ти а҆́нно! Смире́ннѡ припа́дающе къ ра́цѣ честны́хъ моще́й твои́хъ, мо́лимсѧ со слеза́ми приле́жнѡ: не забꙋ́ди ᲂу҆бо́гихъ твои́хъ до конца̀, но помина́й на́съ всегда̀ во ст҃ы́хъ твои́хъ и҆ бл҃гопрїѧ́тныхъ мл҃твахъ къ бг҃ꙋ. Ѽ, пребл҃же́ннаѧ вели́каѧ кн҃ги́не а҆́нно! Не забꙋ́ди присѣща́ти ча̑дъ твои́хъ: а҆́ще бо тѣ́ломъ и҆ преста́виласѧ є҆сѝ ѿ на́съ, но и҆ по сме́рти жива̀ пребыва́еши, и҆ не ѿстꙋпа́й ѿ на́съ дꙋ́хомъ, сохранѧ́ющи на́съ ѿ стрѣ́лъ вра́жїихъ, всѧ́кїѧ пре́лести бѣсо́вскїѧ и҆ ко́зней дїа́вольскихъ. Мл҃твеннице на́ша ᲂу҆се́рднаѧ! Не преста́й молѧ́щисѧ за ны̀ ко хрⷭ҇тꙋ̀, бг҃ꙋ на́шемꙋ: а҆́ще бо моще́й твои́хъ ра́ка пред̾ ѻ҆чи́ма на́шима вы́нꙋ ви́дима є҆́сть, но ст҃а́ѧ дꙋша̀ твоѧ̀, со а҆́гг҃льскими во́инствы ᲂу҆ прⷭ҇то́ла вседержи́телѧ предстоѧ́щи, досто́йнѡ весели́тсѧ. Къ тебѣ̀ ᲂу҆̀бо припа́даемъ, тебѣ̀ мо́лимсѧ: моли́сѧ, пребл҃же́ннаѧ а҆́нно, всемлⷭ҇тивомꙋ бг҃ꙋ на́шемꙋ ѡ҆ сп҃се́нїи дꙋ́шъ на́шихъ, и҆спросѝ на́мъ вре́мѧ на покаѧ́нїе и҆ невозбра́ннѡ прейтѝ ѿ землѝ на не́бо, мыта́рствъ го́рькихъ и҆ вѣ́чныѧ мꙋ́ки и҆зба́витисѧ и҆ нбⷭ҇номꙋ црⷭ҇твїю наслѣ́дникѡмъ бы́ти со всѣ́ми прпⷣбными, ѿ вѣ́ка ᲂу҆годи́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же сла́ва, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.