А҆ка́ѳїстъ ст҃и́телю лꙋкѣ̀, а҆рхїепⷭ҇кпꙋ кры́мскомꙋ, и҆сповѣ́дникꙋ.
Конда́къ а҃.
И҆збра́нный ст҃и́телю цр҃кве правосла́вныѧ и҆ и҆сповѣ́дниче, возсїѧ́вый странѣ̀ на́шей, ꙗ҆́кѡ свѣтоза́рное свѣти́ло, до́брѣ потрꙋди́выйсѧ и҆ за и҆́мѧ хрⷭ҇то́во гоне́нїе претерпѣ́вый, прославлѧ́юще просла́вльшаго тѧ̀ гдⷭ҇а, дарова́вшаго на́мъ тебѐ но́ваго мл҃твенника и҆ помо́щника, похва́льное воспѣва́емъ тѝ пѣ́нїе. Ты́ же, ꙗ҆́кѡ и҆мѣ́ѧй ве́лїе дерзнове́нїе ко влⷣцѣ нб҃сѐ и҆ землѝ, ѿ всѧ́кихъ недꙋ́гѡвъ дꙋше́вныхъ и҆ тѣле́сныхъ свободѝ на́съ и҆ до́брѣ стоѧ́ти во правосла́вїи ᲂу҆крѣпѝ, да всѝ во ᲂу҆миле́нїи зове́мъ тѝ:
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
І҆́косъ а҃.
А҆́гг҃лѡвъ собесѣ́дниче и҆ человѣ́кѡвъ наста́вниче, лꙋко̀ пресла́вный, подо́бнѣ є҆ѵⷢ҇лі́стꙋ и҆ а҆пⷭ҇лꙋ лꙋцѣ̀, є҆мꙋ́же тезоимени́тъ сы́й, ѿ бг҃а да́ръ цѣли́ти недꙋ́ги человѣ́чєскїѧ прїѧ́лъ є҆сѝ, мнѡ́гїѧ трꙋды̀ под̾е́млѧ во врачева́нїи болѣ́зней бли́жнихъ, пло́ть носѧ̀, ѡ҆ пло́ти не радѣ́лъ є҆сѝ, дѣ́лы же до́брыми ѻ҆ц҃а̀ нбⷭ҇наго просла́вилъ є҆сѝ. Тѣ́мже бл҃года́рнѣ во ᲂу҆миле́нїи зове́мъ тѝ:
Ра́дꙋйсѧ, ѿ ю҆́ности ра́зꙋмъ сво́й и҆́гꙋ хрⷭ҇то́вꙋ покори́вый: ра́дꙋйсѧ, пречтⷭ҇но́е ст҃ы́ѧ трⷪ҇цы селе́нїе бы́вый.
Ра́дꙋйсѧ, бл҃же́нство млⷭ҇тивыхъ, по сло́вꙋ гдⷭ҇а, ᲂу҆наслѣ́довавый: ра́дꙋйсѧ, вѣ́рою хрⷭ҇то́вою и҆ зна́нїемъ бг҃одарова́ннымъ мнѡ́гїѧ недꙋ̑жныѧ и҆сцѣли́вый.
Ра́дꙋйсѧ, стра́ждꙋщихъ недꙋ̑ги тѣле́сными врачꙋ̀ млⷭ҇рдый: ра́дꙋйсѧ, во дни̑ бра́ни вожде́й и҆ во́инѡвъ цѣли́телю и҆скꙋ́сный.
Ра́дꙋйсѧ, всѣ́хъ врачє́въ наста́вниче: ра́дꙋйсѧ, ско́рый въ нꙋ́ждахъ и҆ ско́рбехъ сꙋ́щымъ помо́щниче.
Ра́дꙋйсѧ, цр҃кве правосла́вныѧ ᲂу҆твержде́нїе: ра́дꙋйсѧ, землѝ на́шеѧ ѡ҆заре́нїе.
Ра́дꙋйсѧ, кры́мскїѧ па́ствы похвале́нїе: ра́дꙋйсѧ, гра́да сѷмферо́полѧ ᲂу҆краше́нїе.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ в҃.
Ви́дѧ въ человѣ́цѣхъ во вре́мѧ врачева́нїй, а҆́ки въ зерца́лѣ, премꙋ́дрость и҆ сла́вꙋ творца̀ всѧ́ческихъ бг҃а, къ немꙋ̀ дꙋ́хомъ всегда̀ возноси́лсѧ є҆сѝ, бг҃омꙋ́дре. Свѣ́томъ же бг҃оразꙋ́мїѧ твоегѡ̀ и҆ на́съ ѡ҆зарѝ, да вопїе́мъ кꙋ́пнѡ съ тобо́ю: А҆ллилꙋ́їа.
І҆́косъ в҃.
Ра́зꙋмъ тво́й бжⷭ҇твенными ᲂу҆че́ньми просвѣти́лъ є҆сѝ, лꙋко̀ всесла́вне, ѿве́ргнꙋвъ всѧ́кое плотско́е мꙋдрова́нїе, съ ра́зꙋмомъ же и҆ во́лю повинꙋ́лъ є҆сѝ гдⷭ҇еви, подо́бенъ а҆пⷭ҇лѡмъ бы́въ. Ті́и бо, по сло́вꙋ хрⷭ҇то́вꙋ: грѧди́те по мнѣ̀, и҆ сотворю̀ вы̀ ловцы̀ человѣ́кѡмъ, ѡ҆ста́виша всѧ̀ и҆ по не́мъ и҆до́ша, и҆ ты̀, ст҃е, ᲂу҆слы́шавъ гдⷭ҇а і҆и҃са, зовꙋ́щаго тѧ̀ на слꙋже́нїе, прїе́млеши сщ҃е́нство въ цр҃кви правосла́внѣй. Сегѡ̀ ра́ди, ꙗ҆́кѡ бг҃омꙋ́драго наста́вника тѧ̀ ᲂу҆бл҃жа́юще, воспѣва́емъ си́це:
Ра́дꙋйсѧ, ѡ҆ дꙋшѝ при́сное попече́нїе показа́вый: ра́дꙋйсѧ, а҆́гг҃ла храни́телѧ твоегѡ̀ возвесели́вый.
Ра́дꙋйсѧ, во ᲂу҆че́нїи преспѣва́вый и҆ мꙋдрецы̀ мі́ра сегѡ̀ ᲂу҆диви́вый: ра́дꙋйсѧ, ѿ творѧ́щихъ беззако́нїе стѡпы̀ твоѧ̑ ᲂу҆клони́вый.
Ра́дꙋйсѧ, бж҃їѧ премꙋ́дрости проповѣ́дниче и҆ созерца́телю: ра́дꙋйсѧ, и҆́стиннагѡ бг҃осло́вїѧ златослове́сный ᲂу҆чи́телю.
Ра́дꙋйсѧ, а҆пⷭ҇льскихъ преда́нїй блюсти́телю: ра́дꙋйсѧ, правосла́вїѧ ревни́телю.
Ра́дꙋйсѧ, ѕвѣздо̀, пꙋ́ть ко сп҃се́нїю показꙋ́ющаѧ: ра́дꙋйсѧ, свѣщѐ, бг҃омъ возжже́ннаѧ, мра́къ нече́стїѧ разгонѧ́ющаѧ.
Ра́дꙋйсѧ, раско́льникѡвъ ѡ҆бличи́вый: ра́дꙋйсѧ, свидѣ́нїй и҆ ѡ҆правда́нїй гдⷭ҇нихъ возжада́вый.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ г҃.
Си́лою бл҃года́ти бж҃їѧ, є҆щѐ во вре́меннѣй жи́зни прїѧ́лъ є҆сѝ да́ръ, ст҃е лꙋко̀, недꙋ́ги цѣли́ти, да всѝ ᲂу҆се́рднѡ притека́ющїи къ тебѣ̀ и҆сцѣлє́нїѧ болѣ́зней тѣле́сныхъ и҆ наипа́че дꙋше́вныхъ сподоблѧ́ютсѧ, вопїю́ще бг҃ꙋ: А҆ллилꙋ́їа.
І҆́косъ г҃.
И҆мѣ́ѧ неꙋсы́пное попече́нїе ѡ҆ сп҃се́нїи дꙋ́шъ, ввѣ́ренныхъ тебѣ̀ ѿ бг҃а, лꙋко̀ бл҃же́нне, па́стырски къ дꙋшесп҃си́тельной жи́зни и҆ сло́вомъ, и҆ са́мымъ дѣ́ломъ непреста́ннѡ и҆̀хъ наставлѧ́лъ є҆сѝ. Сегѡ̀ ра́ди прїимѝ ѿ на́шегѡ ᲂу҆се́рдїѧ похвалы̑, досто́йнѡ тебѣ̀ приноси̑мыѧ:
Ра́дꙋйсѧ, ра́зꙋма бжⷭ҇твеннагѡ и҆спо́лненный: ра́дꙋйсѧ, бл҃года́тїю дх҃а ст҃а́гѡ прїѡсѣне́нный.
Ра́дꙋйсѧ, нището́ю хрⷭ҇то́вою ѡ҆богати́выйсѧ: ра́дꙋйсѧ, щи́те, защища́ѧй бл҃гоче́стїе.
Ра́дꙋйсѧ, па́стырю до́брый, блꙋжда́ющихъ по гора́мъ сꙋемꙋ́дрїѧ взыска́вый: ра́дꙋйсѧ, дѣ́лателю вїногра́да хрⷭ҇то́ва, ча̑дъ бж҃їихъ въ вѣ́рѣ ᲂу҆крѣплѧ́ѧй.
Ра́дꙋйсѧ, непоколеби́мый правосла́вїѧ сто́лпе: ра́дꙋйсѧ, тве́рдый ка́меню вѣ́ры.
Ра́дꙋйсѧ, дꙋшепа́гꙋбнагѡ невѣ́рїѧ и҆ ѡ҆бновле́нческагѡ раско́ла ѡ҆бличи́телю: ра́дꙋйсѧ, въ дѣ́ланїи дꙋхо́внѣмъ подвиза́ющихсѧ мꙋ́дрый ᲂу҆крѣпи́телю.
Ра́дꙋйсѧ, ѿ мі́ра гони̑мымъ приста́нище ти́хое ᲂу҆казꙋ́ѧй: ра́дꙋйсѧ, ꙗ҆́кѡ прїи́мъ крⷭ҇тъ, хрⷭ҇тꙋ̀ послѣ́довалъ є҆сѝ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ д҃.
Бꙋ́рю внꙋ́трь и҆мѣ́ѧ помышле́нїй мно́гихъ, недоꙋмѣва́ше ра́бъ бж҃їй, что̀ рече́тъ ѡ҆ не́мъ гдⷭ҇ь, є҆гда̀ проразꙋмѣва́хꙋ є҆го̀ досто́йна бы́ти є҆пⷭ҇кпомъ гра́дꙋ ташке́нтꙋ, ѻ҆ба́че всего̀ себѐ хрⷭ҇тꙋ̀ бг҃ꙋ преда́въ, томꙋ̀ ѡ҆ все́мъ бл҃годаре́нїе возсыла́ше, зовы́й: бл҃гослове́нъ бг҃ъ, и҆злива́ѧй бл҃года́ть свою̀ на а҆рхїерє́и своѧ̀, и҆ поѧ̀ є҆мꙋ̀: А҆ллилꙋ́їа.
І҆́косъ д҃.
Слы́шавше лю́дїе правосла́внїи, въ гоне́нїи сꙋ́щїи, ѡ҆ бл҃гопло́дныхъ добро́тахъ дꙋшѝ твоеѧ̀, бг҃оно́се лꙋко̀, и҆ ви́дѣвше тѧ̀ на степе́ни ст҃и́тельства, ꙗ҆́кѡ досто́йный сосꙋ́дъ бжⷭ҇твенныѧ бл҃года́ти, всѧ̀ немощна̑ѧ врачꙋ́ющїѧ и҆ ѡ҆скꙋдѣва̑ющаѧ восполнѧ́ющїѧ, дивлѧ́хꙋсѧ чꙋ́дномꙋ промышле́нїю бж҃їю ѡ҆ тебѣ̀ и҆ приноша́хꙋ тѝ бл҃гохвалє́нїѧ сицева̑ѧ:
Ра́дꙋйсѧ, а҆рхїере́ю, ѿ самагѡ̀ гдⷭ҇а пронарече́нный: ра́дꙋйсѧ, ѡ҆ надписа́нїи са́на є҆пⷭ҇кпскагѡ на кни́зѣ твое́й пред̾ꙋказа́нїе мы́сленное прїе́мый.
Ра́дꙋйсѧ, і҆ера́рхѡвъ и҆зрѧ́дное ᲂу҆краше́нїе: ра́дꙋйсѧ, па́стырю, дꙋ́шꙋ за ѻ҆́вцы хрⷭ҇тѡ́вы положи́ти гото́вый.
Ра́дꙋйсѧ, многосвѣ́тлый цр҃кве свѣти́льниче: ра́дꙋйсѧ, а҆пⷭ҇лѡвъ соприча́стниче.
Ра́дꙋйсѧ, и҆сповѣ́дникѡвъ ᲂу҆добре́нїе: ра́дꙋйсѧ, всѧ́кое ѡ҆ себѣ̀ ѿве́ргнꙋвый попече́нїе.
Ра́дꙋйсѧ, скорбе́й ᲂу҆толи́телю: ра́дꙋйсѧ, ѡ҆ людски́хъ невѣ́жествїихъ печа́льниче.
Ра́дꙋйсѧ, и҆ска́вшихъ сп҃се́нїѧ пра́вымъ ᲂу҆че́нїемъ ѡ҆глаша́вый: ра́дꙋйсѧ, житїе́мъ твои́мъ сегѡ̀ ᲂу҆че́нїѧ не посрами́вый.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ є҃.
Бг҃ото́чною кро́вїю хрⷭ҇то́вою ѿ вѣ́чныѧ сме́рти и҆скꙋплє́нныѧ жела́ѧ соблюстѝ, во дни̑ стра́шныхъ гоне́нїй са́нъ є҆пⷭ҇кпскїй ѿ рꙋ́къ а҆рхїере́євъ правосла́вныхъ прїѧ́лъ є҆сѝ, ст҃и́телю лꙋко̀, и҆ дѣ́ло бл҃говѣ́стника до́брѣ сотвори́лъ є҆сѝ, ѡ҆блича́ѧ, запреща́ѧ, ᲂу҆молѧ́ѧ со всѧ́кимъ долготерпѣ́нїемъ и҆ ᲂу҆че́нїемъ и҆ поѧ̀ бг҃ꙋ: А҆ллилꙋ́їа.
І҆́косъ є҃.
Ви́дѣвше а҆́гг҃льстїи чи́нове вели̑кїѧ по́двиги твоѧ̀, ᲂу҆диви́шасѧ, є҆гда̀ по за́повѣди гдⷭ҇ней: бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇твїе нбⷭ҇ное, въ крѣ́пости серде́чнѣй безро́потнѡ поне́слъ є҆сѝ заточе́нїе и҆ и҆згна́нїе за и҆́мѧ гдⷭ҇а и҆ ст҃ꙋ́ю цр҃ковь хрⷭ҇то́вꙋ, терпѣ́нїемъ ве́лїимъ ᲂу҆строѧ́ѧ сп҃се́нїе своѐ, примѣ́ромъ же свои́мъ вѣ́рныхъ дꙋ́шы назида́ѧ. Мы́ же тѧ̀, ᲂу҆се́рднѡ любо́вїю почита́юще, чествꙋ́емъ похвала́ми си́ми:
Ра́дꙋйсѧ, свѣти́льниче, на свѣ́щницѣ цр҃ко́внѣмъ поста́вленный: ра́дꙋйсѧ, подви́жниче, ѻ҆́бразъ любвѐ долготерпѧ́щїѧ ꙗ҆ви́вый.
Ра́дꙋйсѧ, защища́ти тѧ̀ вѣ̑рнымъ воспрети́вый: ра́дꙋйсѧ, въ рꙋ́ки мꙋчи́телей за вѣ́рꙋ смире́ннѡ но́щїю преда́выйсѧ.
Ра́дꙋйсѧ, посо́бниками непра́ведныхъ сꙋде́й ᲂу҆ничиже́нный: ра́дꙋйсѧ, въ заточе́нїе со смире́нїемъ безро́потнѡ ше́дый.
Ра́дꙋйсѧ, пра́вды ра́ди съ па́ствою твое́ю ташке́нтскою разлꙋче́нїе претерпѣ́вый: ра́дꙋйсѧ, ꙗ҆́кѡ вѣ́рнїи ѡ҆ разлꙋче́нїи съ тобо́ю рыда́хꙋ.
Ра́дꙋйсѧ, за гдⷭ҇а распѧ́таго и҆з̾ѧзвле́нный и҆ заꙋше́нный: ра́дꙋйсѧ, лжи̑ваѧ ᲂу҆ста̀ безбо́жныхъ загради́вый.
Ра́дꙋйсѧ, првⷣными ᲂу҆сты̀ твои́ми нбⷭ҇ныѧ и҆́стины и҆ во и҆згна́нїи вѣща́вый: ра́дꙋйсѧ, ꙗ҆́кѡ мч҃нцы на нб҃сѣ́хъ ѡ҆ терпѣ́нїи твое́мъ ликовствова́хꙋ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ ѕ҃.
Проповѣ́дникъ немо́лчный та́йны прест҃ы́ѧ, є҆диносꙋ́щныѧ и҆ нераздѣ́льныѧ трⷪ҇цы бы́лъ є҆сѝ и҆ въ темни́цѣ, и҆ во гра́дѣхъ и҆згна́нїѧ сиби́рскагѡ, терпѧ̀ гла́дъ, мра́зъ страны̀ сѣ́верныѧ и҆ жесто́кость клевре́тѡвъ безбо́жныхъ. Сегѡ̀ ра́ди проповѣ́дꙋетъ цр҃ковь кры́мскаѧ вели̑чїѧ бж҃їѧ, ꙗ҆влє́ннаѧ на тебѣ̀, ст҃и́телю лꙋко̀. Мы́ же є҆ди́нѣмъ се́рдцемъ и҆ є҆ди́нѣми ᲂу҆сты̀ воспѣва́емъ бг҃ꙋ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ, ꙗ҆́кѡ ѕвѣзда̀ лꙋчеза́рнаѧ, красноѧ́рской па́ствѣ и҆ тамбо́вской, ѡ҆зарѧ́ѧ дꙋ́шы вѣ́рныхъ и҆ разгонѧ́ѧ тьмꙋ̀ нече́стїѧ и҆ безбо́жїѧ. И҆ и҆спо́лнишасѧ на тебѣ̀ слова̀ хрⷭ҇тѡ́вы: бл҃же́ни є҆стѐ, є҆гда̀ поно́сѧтъ ва́мъ, и҆ и҆жденꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀, лжꙋ́ще, менє̀ ра́ди. Ты́ бо, гони́мый и҆зъ гра́да во гра́дъ и҆ клеветы̑ терпѣ́вый, а҆рхїпа́стырское слꙋже́нїе ᲂу҆се́рднѣ и҆сполнѧ́лъ є҆сѝ и҆ сла́достїю писа́нїй твои́хъ всѧ̀ а҆́лчꙋщыѧ и҆ жа́ждꙋщыѧ пра́вды насыща́лъ є҆сѝ, и҆̀же бл҃года́рнѣ взыва́ютъ тебѣ̀:
Ра́дꙋйсѧ, наста́вниче, всѣ́хъ къ нб҃сѝ пꙋтеводѧ́й: ра́дꙋйсѧ, ѡ҆ сла́вѣ бж҃їей и҆́скреннѡ ревнова́вый.
Ра́дꙋйсѧ, во́ине хрⷭ҇то́въ непобѣди́мый: ра́дꙋйсѧ, за хрⷭ҇та̀ гдⷭ҇а темни̑цы и҆ бїє́нїѧ терпѣ́вый.
Ра́дꙋйсѧ, смире́нїѧ є҆гѡ̀ и҆́стинный подража́телю: ра́дꙋйсѧ, вмѣсти́лище дх҃а ст҃а́гѡ.
Ра́дꙋйсѧ, вше́дый съ мꙋ́дрыми въ ра́дость гдⷭ҇а твоегѡ̀: ра́дꙋйсѧ, корыстолю́бїѧ ѡ҆бличи́телю.
Ра́дꙋйсѧ, па́гꙋбꙋ тщесла́вїѧ показа́вый: ра́дꙋйсѧ, беззако́нники ко ѡ҆браще́нїю призыва́вый.
Ра́дꙋйсѧ, тобо́ю бо хрⷭ҇то́съ просла́висѧ: ра́дꙋйсѧ, тобо́ю бо сатана̀ посрами́сѧ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ з҃.
Хотѧ̀ досто́йнѡ соверши́ти по́двигъ, ѿ бг҃а тѝ ᲂу҆гото́ванный, ѡ҆бле́клсѧ є҆сѝ во всѧ̀ ѻ҆рꙋ̑жїѧ бж҃їѧ и҆ ста́лъ є҆сѝ на бра́нь проти́вꙋ мїродержи́телей тьмы̀ вѣ́ка сегѡ̀, дꙋхѡ́въ ѕло́бы поднебе́сныхъ, препоѧ́савъ чресла̀ своѧ̀ и҆́стиною и҆ ѡ҆дѣ́ѧвсѧ въ броню̀ пра́вды, ᲂу҆гаси́лъ є҆сѝ, и҆сповѣ́дниче лꙋко̀, всѧ̀ стрѣ́лы лꙋка́вагѡ, поѧ̀ содѣ́телю и҆ бг҃ꙋ: А҆ллилꙋ́їа.
І҆́косъ з҃.
Но́вое гоне́нїе воздвиго́ша беззако́ннїи и҆ безбо́жнїи человѣ́цы на цр҃ковь правосла́внꙋю и҆ во глꙋбинꙋ̀ да́льнїѧ тае́жныѧ страны̀ и҆згна́ша тѧ̀, ст҃и́телю лꙋко̀, и҆ бли́зъ сме́рти бы́въ, рꙋко́ю же бж҃їею сохране́нъ, взыва́лъ є҆сѝ со а҆пⷭ҇ломъ па́ѵломъ: до ны́нѣшнѧгѡ часа̀ и҆ а҆́лчемъ, и҆ жа́ждемъ, и҆ наготꙋ́емъ, и҆ стра́ждемъ, и҆ скита́емсѧ. Гони́ми, терпи́мъ. Ꙗ҆́коже ѻ҆тре́бїе мі́рꙋ бы́хомъ, всѣ̑мъ попра́нїе досе́лѣ. Сегѡ̀ ра́ди, вѣ́дꙋще ѡ҆ тебѣ̀ такова̑ѧ, ᲂу҆бл҃жа́емъ тѧ̀:
Ра́дꙋйсѧ, и҆сповѣ́дниче хрⷭ҇то́въ бл҃же́нный: ра́дꙋйсѧ, мра́зъ лю́тый и҆ гла́дъ во и҆згна́нїи претерпѣ́вый.
Ра́дꙋйсѧ, бли́зъ сме́рти бы́вый, гдⷭ҇емъ же сохране́нный: ра́дꙋйсѧ, самоѿверже́нїе всецѣ́лое показа́вый.
Ра́дꙋйсѧ, ᲂу҆невѣ́стивый дꙋ́шꙋ твою̀ женихꙋ̀ хрⷭ҇тꙋ̀: ра́дꙋйсѧ, гдⷭ҇а, распѧ́таго на крⷭ҇тѣ̀, при́снѡ пред̾ собо́ю предзрѣ́вый.
Ра́дꙋйсѧ, во бдѣ́нїихъ и҆ мл҃твахъ неѡсла́бнѡ пребы́вый: ра́дꙋйсѧ, є҆диносꙋ́щныѧ трⷪ҇цы и҆́стинный ревни́телю.
Ра́дꙋйсѧ, всѧ́кїѧ болѣ́зни ско́рый и҆ безме́здный врачꙋ̀: ра́дꙋйсѧ, ѿ неисцѣ́льныхъ гно́йныхъ болѣ́зней и҆ ра́нъ стра́ждꙋщыѧ здра̑вы возста́вивый.
Ра́дꙋйсѧ, ꙗ҆́кѡ вѣ́рою твое́ю разсла́бленнїи и҆сцѣлѣ́ша: Ра́дꙋйсѧ, ꙗ҆́кѡ трꙋды̑ твои́ми враче́бными и҆сцѣле́ннїи къ вѣ́рѣ приведе́ни бы́ша.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ и҃.
Стра́нникъ во ю҆до́ли земнѣ́й бы́въ, терпѣ́нїѧ, воздержа́нїѧ и҆ чистоты̀ ѻ҆́бразъ показа́лъ є҆сѝ, и҆сповѣ́дниче лꙋко̀. Є҆гда̀ ѻ҆те́чество въ бѣдѣ̀ ѿ наше́ствїѧ и҆ноплемє́нникъ пребыва́ше, любо́вь є҆ѵⷢ҇льскꙋю ꙗ҆влѧ́ѧ, денноно́щнѡ во враче́бницѣ трꙋди́лсѧ є҆сѝ, и҆сцѣлѧ́ѧ недꙋ́ги и҆ ра́ны вожде́й и҆ во́инѡвъ ѻ҆те́чества земна́гѡ, непамѧтоѕло́бїемъ и҆ любо́вїю ᲂу҆дивлѧ́ѧ всѣ́хъ творѧ́щихъ тѝ напа̑сти, и҆ мнѡ́гїѧ си́мъ ѡ҆брати́лъ є҆сѝ ко хрⷭ҇тꙋ̀, во є҆́же пѣ́ти є҆мꙋ̀: А҆ллилꙋ́їа.
І҆́косъ и҃.
Ве́сь и҆спо́лнь любвѐ хрⷭ҇то́вы, лꙋко̀ бл҃госе́рде, дꙋ́шꙋ твою̀ полага́лъ є҆сѝ за дрꙋ́ги твоѧ̀, и҆ ꙗ҆́кѡ а҆́гг҃лъ храни́тель бы́лъ є҆сѝ бли̑жнимъ и҆ да̑льнимъ, ѕлотворѧ́щыѧ ᲂу҆кроща́ѧ, враждꙋ́ющыѧ примирѧ́ѧ и҆ сп҃се́нїе всѣ̑мъ ᲂу҆строѧ́ѧ. Помина́юще трꙋды̀ твоѧ̀ во бл҃го люде́й ѻ҆те́чества твоегѡ̀, бл҃года́рнѣ взыва́емъ тѝ:
Ра́дꙋйсѧ, ди́внꙋю любо́вь ко ѻ҆те́чествꙋ земно́мꙋ показа́вый: ра́дꙋйсѧ, смире́нїѧ и҆ неѕло́бїѧ ᲂу҆чи́телю.
Ра́дꙋйсѧ, и҆згна́нїе и҆ жестѡ́кїѧ мꙋ̑ки мꙋ́жественнѡ претерпѣ́вый: ра́дꙋйсѧ, за хрⷭ҇та̀ страда́вый и҆ мꙋ́чимь бы́вый.
Ра́дꙋйсѧ, тве́рдѡ є҆го̀ и҆сповѣ́давый: ра́дꙋйсѧ, ѕло́бꙋ врагѡ́въ любо́вїю хрⷭ҇то́вою побѣди́вый.
Ра́дꙋйсѧ, ѻ҆́тче бл҃госе́рдый, сп҃се́нїѧ мно́гихъ взыска́вый: ра́дꙋйсѧ, вели́кими скорбьмѝ и҆скꙋше́нный.
Ра́дꙋйсѧ, въ гоне́нїихъ терпѣ́нїе ди́вное ꙗ҆ви́вый: ра́дꙋйсѧ, ꙗ҆́кѡ за врагѝ гдⷭ҇еви моли́лсѧ є҆сѝ.
Ра́дꙋйсѧ, ꙗ҆́кѡ любо́вь твоѧ̀ всѧ́кꙋ враждꙋ̀ побѣдѝ: ра́дꙋйсѧ, ꙗ҆́кѡ неѕло́бїе твоѐ сердца̀ жестѡ́каѧ покорѝ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ ѳ҃.
Всѣ̑мъ бы́лъ є҆сѝ всѧ̀, ꙗ҆́коже и҆ ст҃ы́й па́ѵелъ, дабы̀ сп҃стѝ хотѧ́ бы нѣ́которыхъ, ст҃и́телю лꙋко̀, а҆рхїпа́стырскїй по́двигъ соверша́ѧ, въ тамбо́вскомъ кра́и мно́гими трꙋды̑ хра́мы ѡ҆бновлѧ́ѧ и҆ созида́ѧ, ᲂу҆ста́вы ст҃оѻте́чєскїѧ стро́гѡ соблюда́ѧ, сп҃се́нїю па́ствы твоеѧ̀ слꙋжи́ти не престава́лъ є҆сѝ, чи́стѡ бг҃ови поѧ̀: А҆ллилꙋ́їа.
І҆́косъ ѳ҃.
Вѣті̑и человѣ́честїи не возмо́гꙋтъ по достоѧ́нїю и҆зрещѝ твои́хъ бл҃годѣѧ́нїй мно́жество, є҆гда̀ ꙗ҆ви́сѧ на кры́мской землѝ, ꙗ҆́кѡ ѻ҆те́цъ чадолюби́вый, ст҃и́телю ѻ҆́тче лꙋко̀: щедрода́тельнаѧ бо десни́ца твоѧ̀ всю́дꙋ досѧза́ше. Мы́ же, бл҃госе́рдїю твоемꙋ̀ подража́ти хотѧ́ще, во ᲂу҆дивле́нїи взыва́емъ къ тебѣ̀:
Ра́дꙋйсѧ, лꙋчѐ любвѐ бж҃їѧ: ра́дꙋйсѧ, сокро́вище млⷭ҇рдїѧ сп҃сова неистощи́мое.
Ра́дꙋйсѧ, ꙗ҆́кѡ всѧ̀ своѧ̀ неимꙋ́щымъ раздава́лъ є҆сѝ: ра́дꙋйсѧ, бли̑жнїѧ твоѧ̀ па́че себє̀ возлюби́вый.
Ра́дꙋйсѧ, стра́ждꙋщихъ сиро́тъ пита́телю и҆ ѡ҆корми́телю: ра́дꙋйсѧ, безпомо́щныхъ ста́рцєвъ и҆ ста́рицъ попечи́телю.
Ра́дꙋйсѧ, ꙗ҆́кѡ болѧ́щыѧ и҆ въ темни́цѣ заключє́нныѧ посѣща́лъ є҆сѝ: ра́дꙋйсѧ, ꙗ҆́кѡ нꙋ̑жды бѣ́дныхъ во мно́зѣхъ мѣ́стѣхъ ѻ҆те́чества своегѡ̀ предварѧ́лъ є҆сѝ.
Ра́дꙋйсѧ, ꙗ҆́кѡ ни́щыѧ ми́лꙋѧ, трапє́зы и҆̀мъ ᲂу҆строѧ́лъ є҆сѝ: ра́дꙋйсѧ, ꙗ҆́кѡ ѡ҆ глꙋбинѣ̀ млⷭ҇рдїѧ твоегѡ̀ мт҃и бж҃їѧ возра́довасѧ.
Ра́дꙋйсѧ, а҆́гг҃ле земны́й и҆ человѣ́че нбⷭ҇ный: ра́дꙋйсѧ, ꙗ҆́кѡ коемꙋ́ждо въ го́рестехъ, а҆́ки а҆́гг҃лъ ᲂу҆тѣ́шитель, ꙗ҆влѧ́лсѧ є҆сѝ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ і҃.
Сп҃се́нїю кры́мскїѧ па́ствы твоеѧ̀ слꙋжи́ти многолѣ́тнѣ не престава́ѧ, по ѻ҆́бразꙋ пастыренача́льника хрⷭ҇та̀, на ра́мена заблꙋ́ждшыѧ взе́мъ, нбⷭ҇номꙋ ѻ҆ц҃ꙋ̀ приве́лъ є҆сѝ, наде́ждею бо на бж҃їе млⷭ҇рдїе ᲂу҆тѣша́ѧ, ко и҆справле́нїю житїѧ̀ словесы̀ ᲂу҆чи́тельными твои́ми вле́клъ є҆сѝ всѧ̀, во є҆́же се́рдцемъ чи́стымъ пѣ́ти бг҃ꙋ: А҆ллилꙋ́їа.
І҆́косъ і҃.
Цр҃ѧ̀ нбⷭ҇нагѡ хрⷭ҇та̀ бг҃а вѣ́рный слꙋжи́тель бы́въ, ст҃и́телю ѻ҆́тче лꙋко̀, неꙋста́ннѡ возвѣща́лъ є҆сѝ сло́во и҆́стины во всѣ́хъ хра́мѣхъ землѝ таври́ческїѧ, дꙋшесп҃си́тельною пи́щею ᲂу҆че́нїѧ є҆ѵⷢ҇льскагѡ вѣ̑рнаѧ ча̑да пита́ѧ и҆ ᲂу҆ста́въ цр҃ко́вный стро́гѡ и҆сполнѧ́ти повелѣва́ѧ. Тѣ́мже тѧ̀, ꙗ҆́кѡ па́стырѧ до́браго, прославлѧ́емъ си́це:
Ра́дꙋйсѧ, неꙋтоми́мый проповѣ́дниче є҆ѵⷢ҇льскїѧ пра́вды: ра́дꙋйсѧ, ꙗ҆́кѡ бг҃омъ врꙋче́нное тебѣ̀ ста́до слове́сное до́брѣ ᲂу҆па́слъ є҆сѝ.
Ра́дꙋйсѧ, ѻ҆́вцы своѧ̀ ѿ дꙋшепа́гꙋбныхъ волкѡ́въ ѡ҆хранѧ́вый: ра́дꙋйсѧ, чи́на цр҃ко́внагѡ стро́гїй блюсти́телю.
Ра́дꙋйсѧ, чистоты̀ вѣ́ры правосла́вныѧ ѡ҆храни́телю: ра́дꙋйсѧ, тобо́ю бо дх҃ъ ст҃ы́й написа̀ словеса̀ сп҃си́тєльнаѧ.
Ра́дꙋйсѧ, мꙋдрецє́мъ вѣ́ка сегѡ̀ бытїѐ бж҃їе проповѣ́давый: ра́дꙋйсѧ, ꙗ҆́кѡ сло́во твоѐ, а҆́ки въ ри̑зы позлащє́ны, въ та̑йны вѣ́ры ѡ҆дѣ́ѧсѧ.
Ра́дꙋйсѧ, мо́лнїе, горды́ню низлага́ющаѧ: ра́дꙋйсѧ, гро́ме, беззако́ннѡ живꙋ́щыѧ ᲂу҆страша́ѧй.
Ра́дꙋйсѧ, цр҃ко́внагѡ бл҃гоче́стїѧ насади́телю: ра́дꙋйсѧ, а҆рхїпа́стырю, па̑стыри дꙋхѡ́вныѧ наставлѧ́ѧй и҆ вразꙋмлѧ́ѧй непреста́ннѡ.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ а҃і.
Пѣ́нїе ᲂу҆ гро́ба твоегѡ̀, ᲂу҆го́дниче бж҃їй, не ᲂу҆молка́ше во дне́хъ бл҃же́ннагѡ ᲂу҆спе́нїѧ твоегѡ̀. Мно́зи бо, вѣ́дꙋще тѧ̀ бг҃оно́сна и҆ равноа́гг҃льна, собра́шасѧ ѿ всѣ́хъ предѣ́лъ земна́гѡ ѻ҆те́чества твоегѡ̀ соверши́ти моле́нїе собо́рное ѡ҆ дꙋшѝ твое́й, въ гѡ́рнїѧ ѻ҆би́тєли ѻ҆ч҃ества нбⷭ҇нагѡ восходѧ́щей, воспѣва́юще бг҃ꙋ: А҆ллилꙋ́їа.
І҆́косъ а҃і.
Свѣще́ю, въ цр҃кви хрⷭ҇то́вѣй горѧ́щею свѣ́томъ невеще́ственнымъ бл҃года́ти бж҃їѧ, бы́лъ є҆сѝ, ст҃и́телю лꙋко̀, всѧ̀ концы̀ землѝ на́шеѧ ѡ҆зарѧ́ѧ. Помина́юще бл҃же́нное ᲂу҆спе́нїе и҆ ве́лїе твоѐ на нб҃сѝ и҆ на землѝ прославле́нїе, съ ра́достїю прино́симъ тѝ бл҃гохвалє́нїѧ сїѧ̀:
Ра́дꙋйсѧ, свѣти́льниче неме́ркнꙋщїй свѣ́та невече́рнѧгѡ: ра́дꙋйсѧ, ꙗ҆́кѡ мно́зи просла́виша твои́хъ ра́ди до́брыхъ дѣ́лъ ѻ҆ц҃а̀ нбⷭ҇нагѡ.
Ра́дꙋйсѧ, ᲂу҆го́дниче бж҃їй, тече́нїе бл҃гоче́стнѣ сконча́вый: ра́дꙋйсѧ, вѣ́рꙋ, наде́ждꙋ и҆ любо́вь ѿ гдⷭ҇а стѧжа́вый.
Ра́дꙋйсѧ, со хрⷭ҇то́мъ, є҆го́же возлюби́лъ є҆сѝ, на вѣ́ки соедини́выйсѧ: ра́дꙋйсѧ, црⷭ҇твїѧ нбⷭ҇нагѡ и҆ сла́вы вѣ́чныѧ наслѣ́дниче.
Ра́дꙋйсѧ, ꙗ҆́кѡ свѣ́тъ до́брыхъ дѣ́лъ твои́хъ пред̾ человѣ̑ки просвѣти́сѧ: ра́дꙋйсѧ, мно́гихъ наꙋчи́вый за́повѣдемъ хрⷭ҇тѡ́вымъ и҆ сотвори́вый ѧ҆̀.
Ра́дꙋйсѧ, а҆рхїере́ю, ѿ вѣ́чнагѡ а҆рхїере́а хрⷭ҇та̀ бл҃года́тными да̑ры и҆спо́лненный: ра́дꙋйсѧ, ско́рый помо́щниче призыва́ющымъ тѧ̀.
Ра́дꙋйсѧ, землѝ кры́мскїѧ но́вое свѣти́ло и҆ ᲂу҆твержде́нїе: ра́дꙋйсѧ, ро́да хрⷭ҇тїа́нскагѡ бл҃года́тный покрови́телю.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ в҃і.
Бл҃года́ть, свы́ше тѝ да́ннꙋю, позна́вше, бл҃гоговѣ́йнѡ лобыза́емъ чтⷭ҇ны́й ѻ҆́бразъ тво́й, ст҃и́телю лꙋко̀, ча́юще тобо́ю прїѧ́ти проси́мое ѿ бг҃а. Тѣ́мже припа́дающе ко ст҃ѣ́й і҆кѡ́нѣ твое́й [а҆́ще же пред̾ мощьмѝ глаго́леши: ко ст҃ы̑мъ моще́мъ твои̑мъ], со ᲂу҆миле́нїемъ мо́лимъ тѧ̀: ᲂу҆крѣпѝ на́съ до́брѣ стоѧ́ти въ вѣ́рѣ правосла́внѣй, и҆ ᲂу҆гожда́юще бл҃ги́ми дѣ́лы, немо́лчнѡ пѣ́ти бг҃ꙋ: А҆ллилꙋ́їа.
І҆́косъ в҃і.
Пою́ще бг҃а, ди́внаго во ст҃ы́хъ свои́хъ, хва́лимъ тѧ̀, хрⷭ҇то́ва и҆сповѣ́дника, ст҃и́телѧ и҆ предста́телѧ пред̾ гдⷭ҇емъ. Ве́сь бо є҆сѝ въ вы́шнихъ, но и҆ ни́жнихъ не ѡ҆ставлѧ́еши, ст҃и́телю ѻ҆́тче лꙋко̀, при́снѡ со хрⷭ҇то́мъ ца́рствꙋеши и҆ ѡ҆ на́съ грѣ́шныхъ пред̾ прⷭ҇то́ломъ бж҃їимъ хода́тайствꙋеши. Сегѡ̀ ра́ди во ᲂу҆миле́нїи зове́мъ тѝ:
Ра́дꙋйсѧ, свѣ́та непристꙋ́пнаго зри́телю: ра́дꙋйсѧ, тебѣ́ бо сора́дꙋютсѧ а҆́гг҃ли и҆ ѡ҆ тебѣ̀ веселѧ́тсѧ человѣ́цы.
Ра́дꙋйсѧ, дѣ́лы и҆ писа́ньми твои́ми невѣ́рꙋющыѧ просвѣща́ѧй: ра́дꙋйсѧ, маловѣ̑рныѧ и҆ малодꙋ̑шныѧ ᲂу҆крѣплѧ́ѧй и҆ ᲂу҆твержда́ѧй.
Ра́дꙋйсѧ, ꙗ҆́кѡ досто́инъ ꙗ҆ви́лсѧ є҆сѝ црⷭ҇твїѧ нбⷭ҇нагѡ: ра́дꙋйсѧ, пꙋте́мъ и҆сповѣ́дничества ра́йскихъ селе́нїй дости́гнꙋвый.
Ра́дꙋйсѧ, поношє́нїѧ хрⷭ҇та̀ ра́ди терпѣ́вый и҆ вѣ́чнꙋю съ ни́мъ сла́вꙋ прїе́мый: ра́дꙋйсѧ, дꙋ́шы на́шѧ къ црⷭ҇твїю нбⷭ҇номꙋ пꙋтеводѧ́й.
Ра́дꙋйсѧ, предста́телю пред̾ прⷭ҇то́ломъ бж҃їимъ за на́съ грѣ́шныхъ: ра́дꙋйсѧ, правосла́вїѧ похвало̀ и҆ землѝ на́шеѧ ра́дованїе.
Ра́дꙋйсѧ, въ со́нмѣ ст҃ы́хъ бы́ти сподо́бивыйсѧ: ра́дꙋйсѧ, собо́рꙋ всѣ́хъ кры́мскихъ ст҃ы́хъ соприча́стниче.
Ра́дꙋйсѧ, ст҃и́телю и҆ и҆сповѣ́дниче лꙋко̀, врачꙋ̀ бл҃гі́й и҆ млⷭ҇тивый.
Конда́къ г҃і.
Ѽ вели́кїй и҆ пресла́вный ᲂу҆го́дниче бж҃їй, ст҃и́телю ѻ҆́тче на́шъ лꙋко̀, прїимѝ сїѐ похва́льное пѣ́нїе ѿ на́съ недосто́йныхъ, съ любо́вїю сыно́внею тебѣ̀ приноси́мое! Предста́тельствомъ твои́мъ ᲂу҆ прⷭ҇то́ла бж҃їѧ и҆ мл҃твами твои́ми всѣ́хъ на́съ въ вѣ́рѣ правосла́внѣй и҆ до́брыхъ дѣ́лѣхъ ᲂу҆твердѝ, ѿ всѧ́кихъ бѣ́дъ, скорбе́й, болѣ́зней и҆ напа́стей, въ се́й жи́зни находѧ́щихъ, сохранѝ, и҆ ѿ мꙋче́нїй въ бꙋ́дꙋщемъ вѣ́цѣ и҆зба́ви и҆ сподо́би въ вѣ́чнѣй жи́зни кꙋ́пнѡ съ тобо́ю и҆ со всѣ́ми ст҃ы́ми пѣ́ти творцꙋ̀ на́шемꙋ: А҆ллилꙋ́їа.
Се́й конда́къ глаго́ли три́жды, та́же і҆́косъ а҃-й, и҆ конда́къ а҃-й.
Моли́тва.
Ѽ всебл҃же́нный и҆сповѣ́дниче, ст҃и́телю ѻ҆́тче на́шъ лꙋко̀, вели́кїй ᲂу҆го́дниче хрⷭ҇то́въ! Со ᲂу҆миле́нїемъ прекло́ньше колѣ̑на серде́цъ на́шихъ, молѧ́щесѧ пред̾ ст҃ы́мъ ѻ҆́бразомъ твои́мъ [а҆́ще же пред̾ мощьмѝ глаго́леши: и҆ припа́дающе къ чтⷭ҇ны̑мъ и҆ многоцѣлє́бнымъ моще́мъ твои̑мъ], ꙗ҆́коже ча̑да ѻ҆тца̀, мо́лимъ тѧ̀ всеꙋсе́рднѡ: ᲂу҆слы́ши на́съ грѣ́шныхъ и҆ принесѝ мл҃твꙋ на́шꙋ къ млⷭ҇тивомꙋ чл҃вѣколю́бцꙋ бг҃ꙋ, є҆мꙋ́же ты̀ ны́нѣ въ ра́дости ст҃ы́хъ и҆ съ ли̑ки а҆́гг҃лъ предстои́ши. Вѣ́рꙋемъ бо, ꙗ҆́кѡ лю́биши ны̀ то́ю же любо́вїю, є҆́юже всѧ̀ бли̑жнїѧ возлюби́лъ є҆сѝ, на землѝ пребыва́ѧ.
И҆спросѝ ᲂу҆ хрⷭ҇та̀ бг҃а на́шегѡ, да ᲂу҆тверди́тъ во ст҃ѣ́й свое́й правосла́внѣй цр҃кви дꙋ́хъ пра́выѧ вѣ́ры и҆ бл҃гоче́стїѧ, па́стырємъ є҆ѧ̀ да да́стъ ре́вность ст҃ꙋ́ю и҆ попече́нїе ѡ҆ сп҃се́нїи па́ствы, ввѣ́ренныѧ и҆̀мъ: пра́вѡ вѣ́рꙋющыѧ соблюда́ти, сла̑быѧ и҆ немощны̑ѧ въ вѣ́рѣ ᲂу҆крѣплѧ́ти, невѣ́дꙋщыѧ наставлѧ́ти, проти̑вныѧ ѡ҆блича́ти. Всѣ̑мъ на́мъ пода́й да́ръ, коемꙋ́ждо бл҃гопотре́бенъ, и҆ всѧ̀, ꙗ҆̀же къ жи́зни вре́меннѣй и҆ къ вѣ́чномꙋ сп҃се́нїю полє́знаѧ: градѡ́въ на́шихъ ᲂу҆твержде́нїе, землѝ плодоно́сїе, ѿ гла́да и҆ па́гꙋбы и҆збавле́нїе, скорбѧ́щымъ ᲂу҆тѣше́нїе, недꙋ́гꙋющымъ и҆сцѣле́нїе, заблꙋ́ждшымъ на пꙋ́ть и҆́стины возвраще́нїе, роди́телємъ бл҃гослове́нїе, ча́дѡмъ въ стра́сѣ гдⷭ҇немъ воспита́нїе и҆ наꙋче́нїе, си̑рымъ и҆ ᲂу҆бѡ́гимъ по́мощь и҆ застꙋпле́нїе.
Пода́ждь всѣ́мъ на́мъ твоѐ а҆рхїпа́стырское ст҃о́е бл҃гослове́нїе, да тѣ́мъ ѡ҆сѣнѧ́еми, и҆зба́вимсѧ ѿ ко́зней лꙋка́вагѡ и҆ и҆збѣ́гнемъ всѧ́кїѧ вражды̀ и҆ нестрое́нїй, є҆ресе́й и҆ раско́лѡвъ.
Да́рꙋй на́мъ по́прище жи́зни вре́менныѧ бг҃оꙋго́днѡ прейтѝ, наста́ви на́съ на пꙋ́ть, ведꙋ́щїй въ селє́нїѧ првⷣныхъ, и҆зба́ви воздꙋ́шныхъ мыта́рствъ и҆ молѝ ѡ҆ на́съ всеси́льнаго бг҃а, да въ вѣ́чнѣй жи́зни съ тобо́ю непреста́ннѡ сла́вимъ ѻ҆ц҃а̀, и҆ сн҃а, и҆ ст҃а́го дх҃а, въ трⷪ҇цѣ сла́вимаго бг҃а, є҆мꙋ́же подоба́етъ всѧ́каѧ сла́ва, че́сть и҆ держа́ва во вѣ́ки вѣкѡ́въ. А҆ми́нь.