Акафист в похвалу Пресвятой Богородицы, целовавшей (приветствовавшей) Елисавету

Кондак 1

Избранная Богоневесто, Владычице, благолепные еси солнца, сияние света присносущнаго, зерцало Божия действия, образ его благости и милосердия, державу всемирнаго имущая, избави нас от всяких горестей и печали, да с радостию взываем Тебе:

Радуйся, Благодатная, Господь с Тобою!

Икос 1

Архангельския чины Тебе служат; все силы небесныя покланяются и окружают, весь мир Тобою обновляется, все создания радуются и вопиют Тебе, Владычице:

Радуйся, пресвятая и трисвятая Дево;

Радуйся, возлюбленная Божия небес Царице.

Радуйся, дольний мир онебесившая;

Радуйся, землю хождением Твоим освятившая.

Радуйся, Божественная красото неувядаемая;

Радуйся, препрославленная, Духом Святым украшаемая.

Радуйся, сияющая лепотою;

Радуйся, Богообразная красотою.

Радуйся, миру мир даровавшая.

Радуйся, небесе небес, венец восприявшая;

Радуйся, по обетованию рожденная.

Радуйся, светом украшенная;

Радуйся, благодатная, Господь с Тобою!

Кондак 2

Видящи, Пречистая, пророчество о себе, Радуйся и веселися Дщи Сионя; зане се Аз гряду и вселюся посреде Тебе, глаголет Господь; темже Сотворшему исполнение поют: Аллилуиа.

Икос 2

Разум небесный имущи, Богоотроковице, шествовала еси в горняя; небесные веселились, земные радовались, стихии освящалися, небесное пение слышалось:

Радуйся, Дщерь Божия, славою украшенная;

Радуйся, неисповедимою добротою возвышенная.

Радуйся, солнцеобразная Божия колеснице;

Радуйся, преукрашенная велелепотою Владычице.

Радуйся, свете тихий, мир просвещающая;

Радуйся, образ Божественный изъявляющая.

Радуйся, преизбранная Дево несравненная;

Радуйся, прекрасная Богоотроковице прославленная.

Радуйся, вся земная благостию утешающая.

Радуйся, все Силы небесныя превосходящая;

Радуйся, заре Божественная, прекрасная.

Радуйся, молние тме и злобе ужасная;

Радуйся, благодатная, Господь с Тобою!

Кондак 3

Силою Вышняго осененная Богоневесто, Духом Святым предвозвещенная, едина голубице моя, совершенная моя, едина есть матери своей, избранна родившей ю, силы небесныя поют: Аллилуиа.

Икос 3

Имущи богоприятную утробу Богоотроковице, се бо еси пронареченна от праотца Давида, вся слава Дщери Царевы внутрь, рясны златыми одеянна и преиспещренна, и мы поюще взываем:

Радуйся, источниче благодати и утешения;

Радуйся, пресладкая надежда и избавление.

Радуйся, имя Твое пресвятое сердца очищает;

Радуйся, яко ум наш и мысли просвещает.

Радуйся, славы горния желающих сподобляющая;

Радуйся, всем блаженство устрояющая.

Радуйся, солнце Вышняго селения;

Радуйся, всех скорбящих утешение.

Радуйся, богообразная едина красота.

Радуйся, богоукрашенная едина доброта;

Радуйся, всем помощнице и спасение.

Радуйся, всего рода человеческаго прославление;

Радуйся, благодатная, Господь с Тобою!

Кондак 4

Буря греховная прейде, явилось светозарное светило, свет от света, солнце шествующая, в ней же Вышний имея селение, светится земля согреваема благодатию, облагоухается воздух, о сем поюще: Аллилуиа.

Икос 4

Слышавше Ангельские чины изреченное Духом Святым: гряди от Ливана невесто, гряди от Ливана, прииди и прейди из начала веры, от главы Санира и Хермона искренняя Божия, все освящаются Тобою и воспевают Владычицу:

Радуйся, небо на земли, прекрасная, сущее;

Радуйся, благодатная, Бога в себе имущая.

Радуйся, облаче легкий, землю осеняющий;

Радуйся, свете святый, дивно просвещающий.

Радуйся, святая, святаго рождшая;

Радуйся, святая, Богу в жилище освященная;

Радуйся, яко имя Твое всех просвещает.

Радуйся, яко призывающих блаженства исполняет;

Радуйся, кивоте святый, всех защищение.

Радуйся, к Тебе прибегающих спасение.

Радуйся, прекрасная лепото, всех красот краснейшая;

Радуйся, преизбранная, всех Святых святейшая.

Радуйся, благодатная, Господь с Тобою!

Кондак 5

Боготочная звезда, пресветлая, колеснице Божия, украшенная лепотами Божественными, древле на Синаи явивыйся, и в Тебе Пречистой вочеловечивыйся, все Тобою освятилось, чины небес поют: Аллилуиа.

Икос 5

Видевше Ангельския Силы величие Твое, Богоневесто, древле кивот образовавшая, пред Ним же море удалялось, Иордан возвращался вспять: Ты же одушевленная Божия святыня, вся тварь падает пред Тобою, покланяется величию Твоему, вопиющи:

Радуйся, чистая Дево, Матерь благословенная;

Радуйся, свято Богом внутрь исполненная.

Радуйся, слава девам и украшение;

Радуйся, святейшее человеком благословение.

Радуйся, звездо пресвятая, нас озаряющая;

Радуйся, заря божественная, нас просвещающая;

Радуйся, всех красот изряднейшее украшение.

Радуйся, всех земных и небесных прославление;

Радуйся, вожделенная, Пророками предреченная.

Радуйся, Праотцами различно предъявленна.

Радуйся, в мирских горестях услаждение;

Радуйся, в пустынях живущим утверждение.

Радуйся, благодатная, Господь с Тобою!

Кондак 6

Проповедники Богоноснии Ангелы путетворят Царице шествию, воздух и земля Ею освященны; звери лютости не имеют, львы свирепость оставляют, тигры и прочии преклонив главы, идут; мир в мире, слышится песнь: Аллилуиа.

Икос 6

Возсияла еси Пречистая Дево, просветившая весь мир, яко утро добра, яко луна избранна, яко солнце, ужас вчиненный на противных врагов, приими пение:

Радуйся, добротою доброт Богом украшенная;

Радуйся, неисповедимо Богу возлюбленная.

Радуйся, землю лучами Божества озарившая;

Радуйся, святейшими стопами землю освятившая.

Радуйся, всех Ангелов Дево краснейшая;

Радуйся, всех святых Пречистая, Пресвятейшая;

Радуйся, красна невеста, Духом нареченна.

Радуйся, красна в писании изъявленна;

Радуйся, в рождестве пресвята рожденна.

Радуйся, свете Светом свыше превознесенна.

Радуйся, небес и земли примирение;

Радуйся, злобы и ада истребление.

Радуйся, благодатная, Господь с Тобою!

Кондак 7

Хотящу Пророку Захарии в сретение изыти, Елисавета услышала глас Богоотроковицы, радостию взыгрался младенец во чреве ея, исполнившись Духом Святым, возопила прославляя Богоневесту: Аллилуиа.

Икос 7

Новое показала еси смирение, Божественная Владычице, Дух Святый о Тебе рек: привлекла сестра моя, невесто, сердце наше, единым от очию Твоею, единым монистом выи Твоея, о сем поюще, славим:

Радуйся, дивное всегда имущая смирение;

Радуйся, умиленное имущи на всех воззрение.

Радуйся, облаче легкий, землю осеняющий;

Радуйся, вселенную всю всегда освещающий.

Радуйся, гора Божия усыренная;

Радуйся, скиния святая Божеством устроенная;

Радуйся, украшенная Божественною лепотою.

Радуйся, превосходящая всех красот красотою;

Радуйся, всех бед и напастей избавление.

Радуйся, Тобою получают райское селение.

Радуйся, солнце, нам свет вечный являющее;

Радуйся, святейшая луна, нашу тму просвещающая.

Радуйся, благодатная, Господь с Тобою!

Кондак 8

Странное смирение видевше, поклонимся Богоотроковице. Пречистая Богоневесто! Награди нас сею добродетелию, яко Вышний на смиренныя благоволит; небо престол Его, земля же подножие Ему, зрит милостиво на смиренных. О сем поют на небесах: Аллилуиа.

Икос 8

Весь бе в нижних и вышних неописанный Господь; в недрах Богоотроковицы, Владычицы, в вертограде красоты, се бо исполнилось. Внидох в вертоград Мой, сестра моя невеста, хлеб мой с медом моим, пих вино мое с млеком моим, и мы с любовию поем:

Радуйся, кивоте Божий всесияющий;

Радуйся, Бога внутрь себе вмещающий.

Радуйся, возлюбленное Вышнему святилище;

Радуйся, всего Божества сладчайшее хранилище.

Радуйся, Духом Святым осененная;

Радуйся, Божественною силою облеченная;

Радуйся, пресвятое всех утверждение.

Радуйся, пречистое всех наслаждение;

Радуйся, небо новое, Бога вместившее.

Радуйся, в пречистых чреслах Бога носившая.

Радуйся, прекрасная всем ко зрению;

Радуйся, милосердая к заступлению грешников.

Радуйся, благодатная, Господь с Тобою!

Кондак 9

Создание все удивися: видимо было шествие Твое, шествие Пресвятыя Богоневесты, Царицы небес. Земля цветами украшалась, горы и холмы озарились, ветры утихли, лики Ангелов воспели: Аллилуиа.

Икос 9

Витии многовещанные, восхвалити величия Твоего не могут, ниже разумеют; Ты бо велия еси Царица небес, светлейши еси солнца. Ни едино же может слово по достоянию воспети славу Твою. Ты же кроткая и милостивая приими усердие раба поющаго:

Радуйся, предъизбранная свыше, несравненная;

Радуйся, дивно Богом украшенная.

Радуйся, Богоневесто, во устах еси сладость;

Радуйся, Приснодево, всех радость.

Радуйся, помиловать всех желающая;

Радуйся, погибающих спасающая;

Радуйся, едина Богом избранная.

Радуйся, невеста Божия увенчанная;

Радуйся, всего мира хранение.

Радуйся, всей вселенней утверждение.

Радуйся, блаженство на земли явившая;

Радуйся, верных сердца просветившая.

Радуйся, благодатная, Господь с Тобою!

Кондак 10

Спасти хотя мир, иже украситель, Господь украси Тебе Пресвятую; Ты восходящая от сего мира прореченная, от пустыни яко стебло дыма кадящее смирну и ливан от всех благовоний Мироварца; едина ближняя Божия, едина совершенная. О сем воспели на небесах: Аллилуиа.

Икос10

Стена еси всем защищения, Богоневесто, яко столп Давидов выя Твоя, тысяща щитов висит на нем, вся стрелы сильных, защищение наше, Всесвятейшая, не остави поющих Тя:

Радуйся, таинство праотцами предъявленное;

Радуйся, лествице к небесам предреченная.

Радуйся, всея вселенныя воззвание;

Радуйся, всего человечества возстание.

Радуйся, всех благих подательнице;

Радуйся, безконечнаго царствия начальнице;

Радуйся, Вышняго освященное селение.

Радуйся, яко Тобою дадеся спасение;

Радуйся, возвеселившая небеса рождением.

Радуйся, освятившая землю примирением.

Радуйся, всех Пророков ожидание;

Радуйся, всех святых желание.

Радуйся, благодатная, Господь с Тобою!

Кондак 11

Пение всякое, Ангельских соборов и человеческих родов, не могут достойно восхвалити Тебе Владычицу; Ты спасение рода человеческаго, хвалимая Богом; се еси добра ближняя моя; се еси добра; очи Твои голубине. О сем небесные воспели: Аллилуиа.

Икос11

Светоприемное светило, сущим нам во тме возсиявшая, Пресвятая Богоневесто, облеченная в солнце, венец имеющая из звезд, луна светится под стопами Божественными Твоими, о Пресвятая, приими наше пение:

Радуйся, вход в небеса открывшая;

Радуйся, землю небом явившая.

Радуйся, многих в разум просвещающая;

Радуйся, простых мудрыми являюща.

Радуйся, Тобою всех печалей избавляемся;

Радуйся, Тобою райских веселий наслаждаемся;

Радуйся, Пречистая, благодатию просвещающая.

Радуйся, Божественная, благостию утешающая;

Радуйся, всея вселенныя хранительнице.

Радуйся, всех благих даровательнице.

Радуйся, вся доброты превосходящая лепотою;

Радуйся, всех небесных высшаячистотою.

Радуйся, благодатная, Господь с Тобою!

Кондак 12

Благодать дати восхотев, всех Зиждитель Бог, спасение человеческое, Тобою бо, Пречистая, приидут в вечный Сион с радостию, и радость вечная, хвала и веселие приимет их и воспоют вечно: Аллилуиа.

Икос12

Воспевая Твое величие, славим, покланяемся, Ты бо одушевленное святилище Божие, новое небо; ибо Творца небеси и земли во чреве пречистом вместила еси. О сем покланяющеся славим:

Радуйся, в Тебе Святейшей Божие пребывание;

Радуйся, исполнившая Святых ожидание.

Радуйся, всех красот краснейшая;

Радуйся, всей чистоты чистейшая.

Радуйся, Божиею силою освященная;

Радуйся, невеста Божия совершенная;

Радуйся, всему миру радость и благословение.

Радуйся, пресладкая надежда и избавление;

Радуйся, Пречистая небес высшая.

Радуйся, воплощеннаго Бога носившая.

Радуйся, источниче благодати и утверждение;

Радуйся, от грехов древних разрешение.

Радуйся, благодатная, Господь с Тобою!

Кондак 13

О Пресвятейшая святых, Приснодево, Богоневесто, Владычице, имущая державу вечную над всем созданием видимым и невидимым! от всякия нас избави беды, и сподоби получити радость вечную, вопиющих Тебе: Аллилуиа.

Трижды, посем Икос1 , Кондак 1.

Молитва ко Пресвятой, Пречистой Госпоже Владычице Богородице

О Пресвятая, Пречистая Дево, Госпоже, Владычице, Богородице, мысленно падаю пред святыми Твоими стопами; и прошу не оставить Твоим Божественным милосердием. Сподоби получити прощение всем моим прегрешениям, пред Сыном Твоим, Господом Богом нашим. Защити, спаси и помилуй, всемогущая Царице небесная. Сподоби провождати жизнь во исправлении заповедей Господних, удерживати язык от всякаго зла, иметь кроткое и смиренное сердце и любовь ко всем человекам, воспоминать горняя-небесная и презирать суетная-земная. О всесвятейшая Владычице! Да освящается сердце мое выну божественным Твоим именем; да будет свет моей души, просвещающий путь сей жизни. По кончине же сподобив внити в радость вечную, да всегда прославляю Отца и Сына и Святаго Духа и Твое предстательство, ныне и присно, и во веки веков. Аминь.

Источник: Библиотека ТСЛ.