Акафист Пресвятой Богородице пред иконой «Всех скорбящих Радосте»

Взбра́ннѣй воево́дѣ побѣди́тельнаѧ, ꙗ҆́кѡ и҆зба́вльшесѧ ѿ вѣ́чныѧ сме́рти блгⷣтїю ѿ тебє̀ ро́ждшагѡсѧ хрⷭ҇та̀ бг҃а на́шегѡ и҆ твои́мъ мт҃рнимъ пред̾ ни́мъ хода́тайствомъ, бл҃года́рствєннаѧ восписꙋ́емъ тѝ, рабѝ твоѝ: ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ и҆ ско́рбныхъ ѡ҆бстоѧ́нїй свободѝ, зовꙋ́щихъ:

А҆́гг҃лъ предста́тель по́сланъ бы́сть съ нб҃сѐ рещѝ бцⷣѣ: ра́дꙋйсѧ, возвѣща́ѧ бжⷭ҇твеннымъ воплоще́нїемъ хрⷭ҇то́вымъ хотѧ́щꙋю роди́тисѧ ѿ неѧ̀ ра́дость всемꙋ̀ мі́рꙋ, въ ско́рби погиба́ющꙋ. Тѣ́мже и҆ мы̀, грѣхмѝ ѡ҆бремене́ннїи, наде́ждꙋ спⷭ҇нїѧ въ тебѣ̀ ᲂу҆лꙋчи́вше, ᲂу҆ми́льнѡ взыва́емъ тѝ:

Ви́дѧще то́ки чꙋде́съ, и҆злива́ємыѧ ѿ ст҃ы́ѧ твоеѧ̀ і҆кѡ́ны, бл҃га́ѧ бг҃ороди́тельнице, ꙗ҆́кѡ ты̀ є҆сѝ молѧ́щихсѧ бл҃га́ѧ помо́щница, ѡ҆би́димыхъ застꙋ́пница, ненадѣ́ющихсѧ наде́жда, печа́льныхъ ᲂу҆тѣше́нїе, а҆́лчꙋщихъ корми́тельница, наги́хъ ѡ҆дѣѧ́нїе, дѣ́вственныхъ цѣломⷣрїе, стра́нныхъ наста́вница, трꙋжда́ющихсѧ по́мощь, слѣпы́хъ прозрѣ́нїе, глꙋхи́хъ бл҃гослы́шанїе, больны́хъ и҆сцѣле́нїе, бл҃года́рственнѣ вопїе́мъ ѡ҆ тебѣ̀ бг҃ꙋ: А҆ллилꙋ́їа.

Ра́зꙋмъ недоразꙋмѣ́нный находѧ́щихъ на ны̀ лю́тыхъ скорбе́й разꙋмѣ́ти и҆́щꙋще, къ тебѣ̀ прибѣга́емъ, ѽ, мт҃и и҆ дв҃о, ᲂу҆тѣше́нїѧ тре́бꙋюще. Ты́ же, ꙗ҆́кѡ бл҃га́ѧ, наꙋчѝ ны̀ разꙋмѣ́ти въ ни́хъ бл҃га́гѡ сн҃а твоегѡ̀ млⷭ҇рдое промышле́нїе во спⷭ҇нїе дꙋ́шъ на́шихъ и҆ ѡ҆чище́нїе мно́гихъ согрѣше́нїй, да взыва́емъ тѝ ра́достнѡ:

Си́лою свы́ше ᲂу҆крѣпѝ мѧ̀, бл҃га́ѧ влⷣчце, недꙋ́гꙋюща тѣ́ломъ и҆ дꙋше́ю, и҆ посѣще́нїѧ твоегѡ̀ сподо́би и҆ промышле́нїѧ, мра́къ ᲂу҆ны́нїѧ и҆ ско́рби, ѡ҆блежа́щїй мѧ̀ ѿгонѧ́юще, да сп҃са́емый тобо́ю, непреста́нно вопїю̀ бг҃ꙋ: А҆ллилꙋ́їа.

И҆мꙋ́щи бога́тство млⷭ҇рдїѧ неизрече́нное, всѣ̑мъ скорбѧ́щымъ рꙋ́кꙋ по́мощи простира́еши, недꙋ́ги врачꙋ́ющи, стра̑сти и҆сцѣлѧ́ющи. Не пре́зри и҆ менѐ, бл҃га́ѧ влⷣчце, на ѻ҆дрѣ̀ не́мощи моеѧ̀ низлежа́ща и҆ вопїю́ща тѝ:

Бꙋ́рѧ мно́гихъ бѣ́дъ и҆ напа́стей ѡ҆бдержи́тъ мѧ̀, и҆ волне́нїѧ не ктомꙋ̀ терплю̀: ты́ же, ꙗ҆́кѡ млⷭ҇тиваѧ мт҃и сп҃са моегѡ̀ и҆ бг҃а, воздви́гни рꙋ́цѣ къ сн҃ꙋ твоемꙋ̀, молѧ́щи є҆го̀, да при́зритъ на лю́тꙋю ско́рбь се́рдца моегѡ̀ и҆ воздви́гнетъ мѧ̀ и҆з̾ пꙋчи́ны ѿча́ѧнїѧ, вопїю́щаго є҆мꙋ̀: А҆ллилꙋ́їа.

Слы́шащи, прест҃а́ѧ дв҃о и҆ мт҃и, сѷмеѡ́на првⷣнагѡ прорече́нїе: тебѣ̀ же само́й дꙋ́шꙋ про́йдетъ ѡ҆рꙋ́жїе, слага́ла є҆сѝ въ се́рдцѣ твое́мъ всѧ̑ глаго́лы сїѧ̑, разꙋмѣва́ющи, ꙗ҆́кѡ ра́дость мт҃рнѧгѡ се́рдца ѡ҆ ча́дѣхъ мно́гихъ печа́лей въ мі́рѣ се́мъ быва́етъ прича́стна. Тѣ́мже, ꙗ҆́кѡ и҆скꙋше́ннѣй по всѧ́чєскимъ и҆ спострада́ти мт҃рней ско́рби могꙋ́щей, взыва́емъ тѝ:

Бг҃ото́чнꙋю кро́вь сн҃а твоегѡ̀, на крⷭ҇тѣ̀ за спⷭ҇нїе на́ше и҆злива́емꙋю, зрѧ́щи, ꙗ҆́кѡ раба̀ гдⷭ҇нѧ, смире́ннѡ во́ли ѻ҆ц҃а̀, и҆́же на нбⷭ҇ѣ́хъ, повинꙋ́ющаѧсѧ, на́мъ ѡ҆́бразъ ѕлострада́нїѧ и҆ терпѣ́нїѧ ꙗ҆ви́ла є҆сѝ, да и҆ мы̀, въ пещѝ и҆скꙋше́нїй и҆ бѣ́дъ сꙋ́щїи, вопїе́мъ смире́ннѡ бг҃ꙋ: А҆ллилꙋ́їа.

Ви́дѧ тѧ̀ сн҃ъ тво́й и҆ бг҃ъ при крⷭ҇тѣ̀ стоѧ́щꙋю съ возлю́бленнымъ ᲂу҆ченико́мъ и҆ се́рдцемъ є҆мꙋ̀ сраспина́ющꙋюсѧ, глаго́лаше: же́но, сѐ сы́нъ тво́й, и҆ ᲂу҆ченикꙋ̀: сѐ, мт҃и твоѧ̀, всыновлѧ́ѧ тебѣ̀ всѧ̑ вѣ́рꙋющыѧ въ него̀. Мы́ же, ꙗ҆́кѡ ѡ҆́бщницы ско́рби и҆ страда́нїй сн҃а твоегѡ̀, и҆мѣ́юще въ тебѣ̀ бл҃гꙋ́ю мт҃рь, на тѧ̀ всѐ ᲂу҆пова́нїе въ ско́рби возлага́юще, вопїе́мъ тѝ:

Проповѣ́дꙋютъ млⷭ҇ти твоѧ̑, бг҃омт҃и, всѝ концы̀ вселе́нныѧ, и҆́бо чⷭ҇тны́мъ покро́вомъ твои́мъ покрыва́еши ве́сь ро́дъ хрⷭ҇тїа́нскїй, ѡ҆ не́мже непреста́нно мо́лишисѧ хрⷭ҇тꙋ̀ сп҃си́телю на́шемꙋ и҆ и҆збавлѧ́еши ѿ всѣ́хъ бѣ́дъ бл҃гонра̑вныѧ и҆ бг҃обоѧ́щыѧсѧ рабы̑, вѣ́рнѡ вопїю́щїѧ бг҃ꙋ: А҆ллилꙋ́їа.

Возсїѧ̀ блгⷣть свѣтоза́рнаѧ ѿ пречꙋ́дныѧ і҆кѡ́ны твоеѧ̀, бг҃омт҃и, пред̾ не́юже со слеза́ми припа́дающе, мо́лимъ тѝ сѧ̀: ѿженѝ ѡ҆́блакъ наше́дшихъ на ны̀ и҆скꙋше́нїй, да вопїе́мъ тѝ ра́достнѡ:

Хотѧ́щи ꙗ҆ви́ти то́ки чꙋде́съ ѿ своеѧ̀ і҆кѡ́ны, всѣ́хъ скорбѧ́щихъ ра́дости, повелѣ́ла є҆сѝ, влⷣчце, болѧ́щей є҆ѵфи́мїи молє́бнаѧ пѣ̑нїѧ пред̾ то́ю соверша́ти, и҆ полꙋчи́вши и҆сцѣле́нїе, всѣ̑мъ проповѣ́дати млⷭ҇ти, ра́ди тоѧ̀ і҆кѡ́ны ꙗ҆влє́нныѧ, да не сокры́тъ бꙋ́детъ и҆сто́чникъ блгⷣтныхъ и҆сцѣле́нїй всѣ̑мъ тре́бꙋющымъ. Тѣ́мже и҆ мы̀ не таи́мъ твои́хъ бл҃годѣѧ́нїй, но бл҃года́рственнѣ прославлѧ́юще бг҃а, вопїе́мъ є҆мꙋ̀: А҆ллилꙋ́їа.

Но́ваѧ кꙋпѣ́ль сїлѡа́мскаѧ па́че ѻ҆́ныѧ дре́внїѧ ꙗ҆ви́сѧ, пречⷭ҇таѧ влⷣчце, хра́мъ тво́й, въ не́мже покланѧ́емсѧ чꙋдотво́рнѣй і҆кѡ́нѣ твое́й: и҆́бо не є҆ди́ною въ лѣ́то и҆ то́кмѡ пе́рвѣе входѧ́щымъ здра́вїе тѣ́ла подае́ши, но всегда̀ всѧ́кїй недꙋ́гъ и҆ всѧ́кꙋю ꙗ҆́звꙋ дꙋше́внꙋю и҆ тѣле́снꙋю врачꙋ́еши съ вѣ́рою и҆ любо́вїю къ тебѣ̀ прибѣга́ющихъ. Сегѡ̀ ра́ди вопїе́мъ тѝ:

Стра́нницы и҆ прише́льцы всѝ є҆смы̀ на землѝ се́й, по глаго́лꙋ а҆пⷭ҇ловꙋ: бѣды̑ ѿ врагѡ́въ, бѣды̑ ѿ срѡ́дникъ, бѣды̑ ѿ лжебра́тїи терпѧ́ще въ лише́нїихъ мно́гихъ и҆ ско́рбехъ. Ты́ же, влⷣчце, ꙗ҆́кѡ бл҃га́ѧ ѻ҆диги́трїе, наста́ви на́съ къ ти́хомꙋ приста́нищꙋ, и҆ молѝ сн҃а твоегѡ̀ проще́нїю прегрѣше́нїй на́мъ пре́жде конца̀ дарова́тисѧ, да непреста́нно вопїе́мъ бг҃ꙋ: А҆ллилꙋ́їа.

Всѐ житїѐ на́ше на землѝ болѣ́зненнѡ и҆ печа́ли и҆спо́лнено ѿ клеветы̀, досажде́нїѧ, ᲂу҆коре́нїѧ и҆ и҆ны́хъ многови́дныхъ бѣ́дъ и҆ напа́стей: немощствꙋ́етъ бо тѣ́ло, и҆знемога́етъ и҆ дꙋ́хъ на́шъ. Къ тебѣ̀ ᲂу҆̀бо прибѣга́емъ, бг҃омт҃и, пред̾ пречⷭ҇тою і҆кѡ́ною твое́ю припа́дающе, и҆спо́лни ра́дости и҆ весе́лїѧ скѡ́рбнаѧ сердца̀ на̑ша, да вопїе́мъ тѝ:

Всѧ́каѧ жите́йскаѧ въ мі́рѣ се́мъ сла́дость печа́ли быва́етъ прича́стна: сла́ва не стои́тъ, бога́тство мимотече́тъ, лѣ́пота и҆ здра́вїе ᲂу҆вѧда́ютъ, дрꙋ́зи и҆ и҆́скреннїи сме́ртїю ѿ̾е́млютсѧ. Оу҆сладѝ ᲂу҆̀бо на́шѧ скѡ́рби, бл҃ги́хъ вино́внаѧ, твою̀ нетлѣ́ннꙋю даю́щи ра́дость на́мъ, вопїю́щымъ бг҃ꙋ: А҆ллилꙋ́їа.

Вѣті̑ѧ многовѣща́ннїи недоꙋмѣ́ютъ, кі́ими словесы̀ скорбѧ́щыѧ ᲂу҆тѣша́ти, но сама̀, влⷣчце, возглаго́ли сердца́мъ на́шымъ ᲂу҆тѣше́нїе, блгⷣти твоеѧ̀ лꙋча́ми ѡ҆́блакъ ско́рби на́шеѧ и҆ мра́къ ᲂу҆ны́нїѧ разгонѧ́ющи, да взыва́емъ тѝ:

Сп҃стѝ хотѧ́й ро́дъ человѣ́ческїй ѿ вѣ́чныѧ мꙋ́ки и҆ непрестаю́щыѧ ско́рби, чл҃колю́бецъ гдⷭ҇ь въ приснодв҃ственнꙋю ᲂу҆тро́бꙋ твою̀ всели́сѧ и҆ тебѐ, мт҃рь свою̀, дарова̀ погиба́ющымъ въ по́мощь, покро́въ и҆ защище́нїе, да бꙋ́деши печа̑льнымъ ᲂу҆тѣше́нїе, скорбѧ́щымъ ра́дованїе, ѿча̑ѧннымъ наде́жда, вѣ́чныѧ мꙋ́ки свои́мъ хода́тайствомъ и҆збавлѧ́ющаѧ и҆ къ нбⷭ҇номꙋ весе́лїю приводѧ́щаѧ всѣ́хъ, вѣ́рнѡ вопїю́щихъ сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

Стѣна̀ є҆сѝ дѣ́вамъ, бцⷣе дв҃о, и҆ всѣ̑мъ къ твоемꙋ̀ покро́вꙋ прибѣга́ющымъ. Тѣ́мже мо́лимъ тѧ̀: застꙋпѝ, покры́й и҆ соблюдѝ всѣ́хъ си́рыхъ и҆ безпомо́щныхъ ѿ и҆скꙋше́нїй, ѡ҆ѕлобле́нїй и҆ бѣ́дъ, тебѣ̀ съ любо́вїю взыва́ющихъ:

Пѣ́нїе всеꙋмиле́нное прино́симъ тѝ, рабѝ твоѝ, бцⷣе, ꙗ҆́кѡ всеси́льнѣй застꙋ́пницѣ ро́да на́шегѡ: ᲂу҆толѝ болѣ́зни многовоздыха́ющихъ дꙋ́шъ на́шихъ, ᲂу҆кротѝ гнѣ́въ бж҃їй, пра́веднѡ на ны̀ дви́жимый грѣ̑хъ ра́ди на́шихъ, и҆зба́ви на́съ ѿ всѧ́кїѧ лю́тыѧ ско́рби и҆ болѣ́зни, вопїю́щихъ ѡ҆ тебѣ̀ бг҃ꙋ: А҆ллилꙋ́їа.

Свѣтопрїе́мнаѧ свѣща̀, ᲂу҆́глемъ блгⷣти бж҃їѧ возжже́ннаѧ, ꙗ҆ви́сѧ на́мъ пречⷭ҇тна́ѧ і҆кѡ́на твоѧ̀, влⷣчце, на ѡ҆сщ҃е́нїе на́ше и҆ ᲂу҆тѣше́нїе. Мы́ же, любо́вїю чтꙋ́ще ю҆̀ и҆ съ вѣ́рою припа́дающе къ не́й, вопїе́мъ тѝ:

Бл҃года́ти зало́гъ восхотѣ́вши да́ти ро́дꙋ на́шемꙋ, цѣльбоно́снꙋю і҆кѡ́нꙋ твою̀ ꙗ҆ви́ла є҆сѝ на́мъ, бг҃омт҃и, ѿ неѧ́же то́ки чꙋде́съ съ вѣ́рою приходѧ́щымъ и҆сточа́ютсѧ, недꙋ́зи врачꙋ́ютсѧ и҆ скѡ́рби ᲂу҆толѧ́ютсѧ. Сегѡ̀ ра́ди ра́достнѡ ѡ҆ тебѣ̀ вопїе́мъ бг҃ꙋ: А҆ллилꙋ́їа.

Пою́ще твоѧ̑ млⷭ҇ти и҆ чꙋдеса̀, бг҃ороди́тельнице, хва́лимъ тѧ̀ всѝ, ꙗ҆́кѡ тве́рдꙋю предста́тельницꙋ на́шꙋ, и҆ со ᲂу҆миле́нїемъ покланѧ́емсѧ тебѣ̀, молѧ́щейсѧ ѡ҆ на́съ, и҆ про́симъ: воздви́гни рꙋ́цѣ къ сн҃ꙋ твоемꙋ̀, да всегда̀ въ се́й жи́зни и҆ по сме́рти на́шей млⷭ҇рдїе є҆гѡ̀ неѿстꙋ́пнѡ бꙋ́детъ ѿ на́съ, взыва́ющихъ тѝ:

Ѽ, всепѣ́таѧ бг҃оѡбра́дованнаѧ мт҃и, ро́ждшаѧ на ра́дость нб҃ꙋ и҆ землѝ цр҃ѧ̀ хрⷭ҇та̀, бг҃а на́шегѡ! Оу҆слы́ши гла́съ скорбѧ́щихъ ра̑бъ твои́хъ, и҆ прїе́мши сїѐ ма́лое моле́нїе на́ше, и҆зба́ви на́съ ѿ всѧ́кихъ бѣ́дъ, скорбе́й и҆ напа́стей: недꙋ́ги на́ша и҆сцѣлѝ, напра́сныѧ клевєты̀ потребѝ, всѧ́кꙋ ѕло́бꙋ и҆ враждꙋ̀ ѿженѝ ѿ на́съ и҆ бꙋ́дꙋщыѧ и҆змѝ мꙋ́ки ѡ҆ тебѣ̀ вопїю́щихъ: А҆ллилꙋ́їа.

А҆́гг҃лъ предста́тель по́сланъ бы́сть съ нб҃сѐ рещѝ бцⷣѣ: ра́дꙋйсѧ, возвѣща́ѧ бжⷭ҇твеннымъ воплоще́нїемъ хрⷭ҇то́вымъ хотѧ́щꙋю роди́тисѧ ѿ неѧ̀ ра́дость всемꙋ̀ мі́рꙋ, въ ско́рби погиба́ющꙋ. Тѣ́мже и҆ мы̀, грѣхмѝ ѡ҆бремене́ннїи, наде́ждꙋ спⷭ҇нїѧ въ тебѣ̀ ᲂу҆лꙋчи́вше, ᲂу҆ми́льнѡ взыва́емъ тѝ:

Взбра́ннѣй воево́дѣ побѣди́тельнаѧ, ꙗ҆́кѡ и҆зба́вльшесѧ ѿ вѣ́чныѧ сме́рти блгⷣтїю ѿ тебє̀ ро́ждшагѡсѧ хрⷭ҇та̀ бг҃а на́шегѡ и҆ твои́мъ мт҃рнимъ пред̾ ни́мъ хода́тайствомъ, бл҃года́рствєннаѧ восписꙋ́емъ тѝ, рабѝ твоѝ: ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ и҆ ско́рбныхъ ѡ҆бстоѧ́нїй свободѝ, зовꙋ́щихъ:

Ѽ, прест҃а́ѧ влⷣчце бцⷣе, вы́шшаѧ херꙋві̑мъ и҆ честнѣ́йшаѧ серафі̑мъ, бг҃оизбра́ннаѧ ѻ҆трокови́це, всѣ́хъ скорбѧ́щихъ ра́досте. Пода́ждь ᲂу҆тѣше́нїе и҆ на́мъ, въ ско́рби сꙋ́щымъ: ра́звѣ бо тебѐ и҆но́гѡ прибѣ́жища и҆ по́мощи не и҆́мамы. Ты̀ є҆ди́на є҆сѝ ра́дости на́шеѧ хода́таица, и҆ ꙗ҆́кѡ мт҃рь бж҃їѧ и҆ мт҃и млⷭ҇рдїѧ, предстоѧ́щи ᲂу҆ прⷭ҇то́ла прест҃ы́ѧ трⷪ҇цы, мо́жеши на́мъ помощѝ: никто́же бо притека́ѧй къ тебѣ̀ посра́мленъ ѿхо́дитъ. Оу҆слы́ши ᲂу҆́бѡ и҆ на́съ, ны́нѣ въ де́нь ско́рби пред̾ твое́ю і҆кѡ́ною припа́дающихъ и҆ со слеза́ми тебѣ̀ молѧ́щихсѧ: ѿженѝ ѿ на́съ належа́щыѧ на на́съ ско́рби и҆ печа́ли въ се́й вре́меннѣй жи́зни, не лише́ны же ны̀ сотворѝ твои́мъ всеси́льнымъ хода́тайствомъ и҆ вѣ́чныѧ несконча́емыѧ ра́дости въ црⷭ҇твїи сн҃а твоегѡ̀ и҆ бг҃а на́шегѡ. А҆ми́нь.