Акафист Пресвятой Богородице пред иконой «Умиление» Серафимо-Дивеевская

И҆збра́ннѣй ѿ всѣ́хъ родѡ́въ бж҃їей мт҃ри и҆ цр҃и́цѣ, ᲂу҆миле́ннѡ молѧ́щейсѧ за ны̀ ко гдⷭ҇ꙋ и҆ ѻ҆́бразъ ᲂу҆миле́нїѧ своегѡ̀ на́мъ дарова́вшей млⷭ҇тивѡ, похва́льное пѣ́нїе и҆ моле́нїе прино́симъ тѝ, бцⷣе. ты́ же, ꙗ҆́кѡ всемлⷭ҇тиваѧ на́ша застꙋ́пница и҆ всебл҃га́ѧ помо́щница, ѿ всѧ́кихъ бѣ́дъ на́съ и҆зба́ви, да зове́мъ тѝ:

А҆́гг҃лъ земны́й и҆ человѣ́къ нбⷭ҇ный, прпⷣбный ста́рецъ серафі́мъ і҆кѡ́нꙋ твою̀ ст҃ꙋ́ю, бцⷣе дв҃о, ꙗ҆́кѡ драгоцѣ́нное сокро́вище въ свое́й ке́ллїи стѧжа̀ и҆ пред̾ не́ю ᲂу҆сє́рдныѧ мл҃твы тебѣ̀ приносѧ̀, всепѣ́таѧ, во всѧ̑ дни̑ подви́жническагѡ житїѧ̀ своегѡ̀ бл҃гоꙋмиле́ннѡ, ра́достїю всѣ́хъ ра́достей тѧ̀ наименова̀, си́це тебѣ̀ взыва́ѧ:

Ви́дѣвъ себѐ болѣ́знїю ѕѣ́льною ѡ҆держи́ма, бл҃же́нный серафі́мъ ᲂу҆се́рднѡ молѧ́ше тѧ̀, бцⷣе дв҃о, ѡ҆ по́мощи и҆ и҆сцѣле́нїи, и҆ сѐ, а҆́бїе предста́ла є҆сѝ є҆мꙋ̀ во свѣ́тѣ нбⷭ҇нѣмъ со а҆пⷭ҇лома петро́мъ и҆ і҆ѡа́нномъ бг҃осло́вомъ, и҆ ре́кши: се́й ѿ ро́да на́шегѡ є҆́сть, и҆сцѣле́нїе ско́рѡ є҆мꙋ̀ дарова́ла є҆сѝ, да пое́тъ немо́лчнѡ сн҃ꙋ твоемꙋ̀ и҆ бг҃ꙋ хвале́бнꙋю пѣ́снь: А҆ллилꙋ́їа.

Разꙋмѣ́въ своѐ и҆сцѣле́нїе, твои́мъ посѣще́нїемъ бл҃года́тнымъ соверши́вшеесѧ, бл҃же́нный серафі́мъ прославлѧ́ше, бцⷣе, ве́лїю къ немꙋ̀ твою̀ млⷭ҇ть, і҆кѡ́нꙋ же ст҃ꙋ́ю бл҃гоговѣ́йнѡ почита́ше и҆ сїю̀ бл҃года́ти прича́стнꙋ и҆менова́ше, є҆́йже и҆ мы̀ ны́нѣ покланѧ́ющесѧ, си́це тебѣ̀ зове́мъ:

Си́ла бж҃їѧ дѣ́йствоваше чрез̾ ст҃ꙋ́ю і҆кѡ́нꙋ твою̀, ᲂу҆миле́нїе и҆менꙋ́емꙋю, бцⷣе пречⷭ҇таѧ, є҆гда̀ сїѧ̀ въ ке́ллїи прпⷣбнагѡ серафі́ма пребыва́ше и҆ и҆сцѣлє́нїѧ вѣ̑рнымъ и҆сточа́ше, и҆̀же ѿвсю́дꙋ къ немꙋ̀ прихожда́хꙋ и҆ ѿ тебє̀ мнѡ́гїѧ да́ры бл҃года̑тныѧ ᲂу҆лꙋча́хꙋ, бл҃года́рнѡ пою́ще бг҃ꙋ: А҆ллилꙋ́їа.

И҆мѣ́ѧ вѣ́рꙋ и҆ любо́вь къ тебѣ̀, бцⷣе, прпⷣбный серафі́мъ по бз҃ѣ всю̀ наде́ждꙋ свою̀ на тѧ̀ возлага́ше, і҆кѡ́нꙋ же твою̀ ст҃ꙋ́ю бл҃гоговѣ́йнѡ почита́ше, свѣщи̑ и҆ є҆ле́й пред̾ не́ю возжига́ѧ и҆ те́плѣ молѧ́сѧ тебѣ̀, да бꙋ́деши є҆мꙋ̀ помо́щница во сп҃се́нїе. Ѡ҆ се́мъ и҆ мы́ тѧ мо́лимъ, пребл҃га́ѧ, и҆ со ᲂу҆се́рдїемъ пое́мъ:

Бꙋ́ри грѣхо́вныѧ и҆збѣжа́ти и҆ въ ти́хое приста́нище покаѧ́нїѧ прїитѝ помозѝ на́мъ, пречⷭ҇таѧ дв҃о, и҆скꙋпи́телѧ и҆ сп҃си́телѧ дꙋ́шъ на́шихъ ро́ждшаѧ и҆ мт҃рнее дерзнове́нїе къ немꙋ̀ и҆мꙋ́щаѧ: прострѝ къ немꙋ̀ бг҃оно́снѣи твоѝ рꙋ́цѣ и҆ ᲂу҆молѝ є҆гѡ̀ бл҃гость всѧ̑ ны̀ поми́ловати и҆ сп҃стѝ, да бл҃года́рнѣ пое́мъ є҆мꙋ̀ ѡ҆ тебѣ̀ славосло́вїѧ пѣ́снь: А҆ллилꙋ́їа.

Слы́шавше ѡ҆ премно́гихъ чꙋдесѣ́хъ твои́хъ, бцⷣе дв҃о, ѿ і҆кѡ́ны твоеѧ̀ ст҃ы́ѧ ꙗ҆вле́нныхъ и҆ присноѧвлѧ́емыхъ вѣ̑рнымъ, ра́дꙋемсѧ мы̀ грѣ́шнїи, ꙗ҆́кѡ дарова́ла є҆сѝ на́мъ таковы́й бл҃года́тный зало́гъ твоегѡ̀ къ на́мъ бл҃говоле́нїѧ, всебл҃га́ѧ, и҆ ѿ ра́достныхъ и҆ бл҃года́рныхъ ᲂу҆сте́нъ сицево́е прино́симъ тѝ пѣ́нїе:

Бг҃оте́чнаѧ ѕвѣзда̀, ст҃а́ѧ і҆кѡ́на твоѧ̀, бцⷣе дв҃о, лꙋчѝ бж҃їѧ бл҃года́ти неви́димѡ и҆спꙋща́етъ и҆ дꙋ́шы вѣ́рныхъ ѡ҆зарѧ́етъ. Сїю̀ и҆ мы̀ съ вѣ́рою и҆ бл҃гоговѣ́нїемъ лобыза́юще, въ ско́рбехъ ᲂу҆тѣше́нїе, въ болѣ́знехъ врачество̀ безме́здное ѿ тебє̀, влⷣчце, прїе́млемъ, и҆ славосло́вѧще многопѣ́тое и҆ пребл҃гослове́нное и҆́мѧ твоѐ, ра́достнѡ пое́мъ бг҃ꙋ: А҆ллилꙋ́їа.

Ви́дѣвъ тѧ̀, бцⷣе, прпⷣбный серафі́мъ въ пресла́вный де́нь бл҃говѣ́щенїѧ, прише́дшꙋю къ немꙋ̀ въ смире́ннꙋю є҆гѡ̀ ке́ллїю со а҆́гг҃лы, прⷣте́чею, бг҃осло́вомъ и҆ ли́комъ ст҃ы́хъ дѣ́въ, ра́дости премі́рныѧ и҆спо́лнисѧ, и҆ сїѧ́ше лицѐ є҆гѡ̀ ста́рческое красото́ю нбⷭ҇ною. Ты́ же, сла́вою бжⷭ҇твенною є҆го̀ ѡ҆зарѧ́ющи, млⷭ҇тивѡ бесѣ́довала є҆сѝ съ ни́мъ, ꙗ҆́коже со дрꙋ́гомъ при́снымъ, ѡ҆бѣтова̑нїи бл҃ги́ми возвеселѧ́ющи дꙋ́шꙋ є҆гѡ̀ и҆ си́ми подвиза́ющи на́съ вопи́ти тебѣ̀:

Проповѣ́дꙋемо и҆ вездѣ̀ похвалѧ́емо є҆́сть ѿ вѣ́рныхъ посѣще́нїе твоѐ, мт҃и бж҃їѧ, є҆гѡ́же прпⷣбнаго серафі́ма сподо́била є҆сѝ. Сїѐ посѣще́нїе твоѐ всебл҃го́е и҆ мы̀ дне́сь бл҃гоговѣ́йнѡ воспомина́юще, бл҃года́рствєнныѧ пѣ̑сни тебѣ̀ прино́симъ, пречⷭ҇таѧ, и҆ хвале́бнѡ восклица́емъ сн҃ꙋ твоемꙋ̀ и҆ бг҃ꙋ: А҆ллилꙋ́їа.

Возсїѧ̀ сїѧ́нїе сла́вы нбⷭ҇ныѧ въ смире́ннѣй ке́ллїи прпⷣбнагѡ серафі́ма, є҆гда̀ ѿ го́рнихъ высо́тъ пришла̀ є҆сѝ, бцⷣе, съ ли́комъ ст҃ы́хъ того̀ посѣти́ти. Сегѡ́ же не терпѧ́щи зрѣ́ти, дѣ́ва сотаи́нница бжⷭ҇твеннагѡ видѣ́нїѧ ни́цъ падѐ на зе́млю, но млⷭ҇тивѡ тꙋ̀ воздви́гла є҆сѝ, влⷣчце, и҆ премлⷭ҇тивыѧ глаго́лы твоѧ̑ є҆́й прорекла̀ є҆сѝ. Таково́мꙋ бл҃госнизхожде́нїю твоемꙋ̀ дивѧ́щесѧ, съ любо́вїю и҆ бл҃гоговѣ́нїемъ тебѣ̀ вопїе́мъ:

Хотѧ́щымъ на́мъ, влⷣчце, лобыза́ти ст҃ꙋ́ю и҆ всечтⷭ҇нꙋ́ю твою̀ і҆кѡ́нꙋ, не возбранѝ на́мъ сїѐ грѣхѡ́въ ра́ди на́шихъ, и҆ ꙗ҆́кѡ многобл҃гоꙋтро́бнаѧ мт҃и млⷭ҇тивагѡ бг҃а, не возгнꙋша́йсѧ на́шихъ нечи́стыхъ ᲂу҆сте́нъ, но прїимѝ на́съ млⷭ҇тивѡ, припа́дающихъ къ тебѣ̀ съ любо́вїю, да́ры бл҃года̑тныѧ ще́дрѡ на́мъ подава́ющи ѿ многочꙋде́снагѡ твоегѡ̀ ѻ҆́браза, да зове́мъ со ᲂу҆миле́нїемъ трїеди́номꙋ бг҃ꙋ: А҆ллилꙋ́їа.

Ди́внѡ и҆ ст҃ѡ сконча́тисѧ бл҃говоли́ла є҆сѝ, влⷣчце, и҆збра́нникꙋ твоемꙋ̀, бл҃же́нномꙋ серафі́мꙋ: то́й бо колѣнопреклоне́нный на мл҃твѣ пред̾ і҆кѡ́ною твое́ю ст҃о́ю предадѐ првⷣнꙋю дꙋ́шꙋ свою̀ въ рꙋ́цѣ бж҃їи, и҆ ѿи́де ѿ земны́хъ на гѡ́рнѧѧ созерца́ти сла́вꙋ твою̀ нбⷭ҇нꙋю и҆ вы́нꙋ зрѣ́ти тѧ̀, цр҃и́це а҆́гг҃лѡвъ, ю҆́же мы̀ земні́и немо́лчнѡ ᲂу҆бл҃жа́емъ и҆ пое́мъ тѝ ра́достнѡ:

Стра́нно є҆́сть ви́дѣти, ка́кѡ і҆кѡ́на твоѧ̀ ст҃а́ѧ, бцⷣе дв҃о, си́лою бж҃їею бл҃года́ти преисполнѧ́етсѧ и҆ ди̑внаѧ чꙋдеса̀ и҆сточа́етъ бл҃говоле́нїемъ твои́мъ, всебл҃га́ѧ. Сїю̀ и҆ мы̀ стѧжа́вше во ᲂу҆тѣше́нїе и҆ цѣльбꙋ̀, бл҃года́рственнѡ тѧ̀ сла́вимъ, влⷣчце пречⷭ҇таѧ, и҆ пое́мъ ро́ждшемꙋсѧ ѿ тебє̀ бг҃ꙋ сло́вꙋ а҆́гг҃льскꙋю пѣ́снь: А҆ллилꙋ́їа.

Всѧ̑ дѡ́браѧ и҆ полє́знаѧ да́рꙋеши на́мъ, бцⷣе, ѿ всечⷭ҇тна́гѡ и҆ многочꙋде́снагѡ твоегѡ̀ ѻ҆́браза: ᲂу҆милѧ́еши дꙋ́шы на́шѧ и҆ врачꙋ́еши болѣ̑зни на́шѧ, ꙗ҆́кѡ вои́стиннꙋ многобл҃гоꙋтро́бнаѧ мт҃и ча̑дъ твои́хъ, ѡ҆ хрⷭ҇тѣ̀ бз҃ѣ. Тѣ́мже по достоѧ́нїю бл҃жи́ма є҆сѝ ѿ на́съ бл҃гохвалє́нїи таковы́ми:

Всѝ ро́ди хрⷭ҇тїа́нстїи и҆́мꙋтъ тѧ̀, влⷣчце, помо́щницꙋ и҆зрѧ́днꙋю: ꙗ҆́коже бо ѡ҆бѣща́ла є҆сѝ во всечⷭ҇тнѣ́мъ твое́мъ ᲂу҆спе́нїи не ѡ҆ста́вити на́съ си́рыхъ и҆ безпомо́щныхъ, та́кѡ и҆ до дне́сь сїѐ ѡ҆бѣтова́нїе всебл҃го́е и҆сполнѧ́еши въ цр҃кви хрⷭ҇то́вѣ на землѝ, бцⷣе дв҃о, ᲂу҆щедрѧ́ющи и҆ сп҃са́ющи лю́ди, вѣ́рнѡ тѧ̀ сла́вѧщыѧ и҆ правосла́внѡ пою́щыѧ бг҃ꙋ: А҆ллилꙋ́їа.

Вѣті́йство человѣ́ческое не мо́жетъ и҆зрещѝ ѻ҆би́лїе щедро́тъ и҆ млⷭ҇тей твои́хъ, мт҃и бж҃їѧ, сла́вити же тѧ̀ по достоѧ́нїю недоꙋмѣва́ютъ ᲂу҆́ми безпло́тнїи, ѻ҆ба́че бл҃га́ѧ сꙋ́щи, не возгнꙋша́йсѧ и҆ на́шихъ недосто́йныхъ похва́лъ, и҆̀хже любо́вїю тебѣ̀ прино́симъ и҆ дерза́емъ воспѣва́ти тѧ̀ си́це:

Сп҃си́телю бг҃ꙋ пло́ть взаимода́вшаѧ, нетлѣ́ннаѧ и҆ пречⷭ҇таѧ мт҃и бж҃їѧ, ѡ҆чи́сти на́съ, ѡ҆скверне́нныхъ грѣхи̑ мно́гими, ѵ҆ссѡ́помъ мл҃твъ твои́хъ ст҃ы́хъ, въ цѣломꙋ́дрїи и҆ чистотѣ̀ ᲂу҆твердѝ и҆ сподо́би бг҃оꙋго́днѡ и҆ првⷣнѡ препроводи́ти житїѐ сїѐ земно́е, да бл҃гоꙋгоди́вше хрⷭ҇тꙋ̀ бг҃ꙋ, ᲂу҆наслѣ́дꙋемъ црⷭ҇твїе є҆гѡ̀ нбⷭ҇ное и҆ со ст҃ы́ми воспое́мъ є҆мꙋ̀ побѣ́днꙋю пѣ́снь: А҆ллилꙋ́їа.

Стѣна̀ є҆сѝ дѣ́вамъ, бцⷣе дв҃о, и҆ всѣ̑мъ дꙋша́мъ хрⷭ҇тїа̑нскимъ, ᲂу҆невѣ́стившымсѧ нбⷭ҇номꙋ женихꙋ̀, ꙗ҆̀же въ треволне́нїи страсте́й ѡ҆брѣта́ютъ всегда̀ крѣ́пкꙋю твою̀ по́мощь. Мо́лимъ тѧ̀, всебл҃га́ѧ, не попꙋстѝ и҆ на́мъ грѣ̑шнымъ поги́бнꙋти во бла́тѣ страсте́й, но прострѝ на́мъ держа́внꙋю десни́цꙋ твою̀ и҆ возста́ви на́съ на покаѧ́нїе и҆ цѣломꙋ́дренное житїѐ, да бл҃года́рнѡ тебѣ̀ зове́мъ:

Пѣ́нїе хвале́бное прино́симъ тѝ, бцⷣе пречⷭ҇таѧ, ст҃о́ю и҆ многочꙋде́сною і҆кѡ́ною твое́ю ѡ҆сѣнѧ́еми и҆ мл҃твами ста́рца серафі́ма ᲂу҆крѣплѧ́еми. Ѡ҆ держа́вномъ же застꙋпле́нїи твое́мъ ра́дꙋющесѧ, вопїе́мъ бг҃ꙋ: А҆ллилꙋ́їа.

Свѣ́тлыми лꙋча́ми чꙋде́съ твои́хъ, бг҃омт҃и влⷣчце, ѡ҆зарѧ́еши мра̑чныѧ на́шѧ дꙋ́шы средѝ сꙋевѣ́рїѧ и҆ невѣ́рїѧ на́шихъ дне́й. Зрѧ́ще же млⷭ҇ти и҆ щедрѡ́ты твоѧ̑, ѿ і҆кѡ́ны твоеѧ̀ на́мъ и҆сточа́ємыѧ, всебл҃га́ѧ, и҆ припа́дающе къ не́й, си́це тебѣ̀ вопїе́мъ:

Бл҃года́ть бж҃їѧ ѿ і҆кѡ́ны твоеѧ̀, бцⷣе дв҃о, и҆сходѧ́щаѧ, ѡ҆сѣнѧ́етъ ѻ҆би́тель дѣ́въ, и҆збра́нникомъ твои́мъ серафі́мѡмъ со́браннꙋю и҆ ᲂу҆стро́еннꙋю до́брѣ. Сїю̀ і҆кѡ́нꙋ твою̀, ꙗ҆́кѡ зало́гъ бл҃говоле́нїѧ твоегѡ̀, ди́внѡ стѧжа́вше, сла́вимъ и҆ велича́емъ тѧ̀, влⷣчце премлⷭ҇тиваѧ, и҆ ра́бски вопїе́мъ всѣ́хъ творцꙋ̀: А҆ллилꙋ́їа.

Пою́ще млⷭ҇рдїе твоѐ неисче́тное и҆ мнѡ́гаѧ твоѧ̑ чꙋдеса̀, дв҃о всепѣ́таѧ, ра́дꙋемсѧ мы̀ грѣ́шнїи, зрѧ́ще на і҆кѡ́нѣ ли́къ тво́й ст҃ы́й, ᲂу҆миле́нїѧ преиспо́лненный, и҆́же и҆ въ на́шѧ дꙋ́шы ᲂу҆миле́нїе влива́етъ и҆ къ мл҃твамъ ᲂу҆сє́рднымъ на́съ привлека́етъ, да си́це тебѣ̀ взыва́емъ:

Ѽ всепѣ́таѧ мт҃и! Ѽ цр҃и́це всемлⷭ҇тиваѧ! бцⷣе всебл҃га́ѧ! Оу҆молѝ сн҃а твоего̀, хрⷭ҇та̀ бг҃а на́шего, и҆зба́вити на́съ гее́нны ѻ҆́гненныѧ и҆ сподо́бити сп҃се́нныхъ ча́сти, да со и҆збра́нными воспое́мъ є҆мꙋ̀ во вѣ́ки: А҆ллилꙋ́їа.

А҆́гг҃лъ земны́й и҆ человѣ́къ нбⷭ҇ный, прпⷣбный ста́рецъ серафі́мъ і҆кѡ́нꙋ твою̀ ст҃ꙋ́ю, бцⷣе дв҃о, ꙗ҆́кѡ драгоцѣ́нное сокро́вище въ свое́й ке́ллїи стѧжа̀ и҆ пред̾ не́ю ᲂу҆сє́рдныѧ мл҃твы тебѣ̀ приносѧ̀, всепѣ́таѧ, во всѧ̑ дни̑ подви́жническагѡ житїѧ̀ своегѡ̀ бл҃гоꙋмиле́ннѡ, ра́достїю всѣ́хъ ра́достей тѧ̀ наименова̀, си́це тебѣ̀ взыва́ѧ:

И҆збра́ннѣй ѿ всѣ́хъ родѡ́въ бж҃їей мт҃ри и҆ цр҃и́цѣ, ᲂу҆миле́ннѡ молѧ́щейсѧ за ны̀ ко гдⷭ҇ꙋ и҆ ѻ҆́бразъ ᲂу҆миле́нїѧ своегѡ̀ на́мъ дарова́вшей млⷭ҇тивѡ, похва́льное пѣ́нїе и҆ моле́нїе прино́симъ тѝ, бцⷣе. ты́ же, ꙗ҆́кѡ всемлⷭ҇тиваѧ на́ша застꙋ́пница и҆ всебл҃га́ѧ помо́щница, ѿ всѧ́кихъ бѣ́дъ на́съ и҆зба́ви, да зове́мъ тѝ:

Ѽ прест҃а́ѧ дв҃о бцⷣе, хрⷭ҇та̀ цр҃ѧ̀ и҆ бг҃а на́шегѡ мт҃и, ᲂу҆миле́нїѧ сокро́вище и҆ млⷭ҇ти и҆сто́чниче, дꙋшесп҃си́тельныхъ дарѡ́въ бл҃га́ѧ пода́тельнице и҆ скорбѧ́щихъ дꙋ́шъ бл҃года́тнаѧ ᲂу҆тѣ́шительнице! Къ тебѣ̀ съ любо́вїю припа́даемъ и҆ пред̾ ст҃о́ю і҆кѡ́ною твое́ю смире́ннѡ мо́лимсѧ: ᲂу҆молѝ, влⷣчце, возлю́бленнаго сн҃а твоего̀, хрⷭ҇та̀ бг҃а на́шего, поми́ловати и҆ сп҃стѝ на́съ, погиба́ющихъ во грѣсѣ́хъ: вдохнѝ въ дꙋ́шы на́шѧ покаѧ́нїе и҆́скреннее и҆ ᲂу҆миле́нїе бг҃оꙋго́дное, пода́ждь мл҃твамъ на́шымъ сле́зы ѡ҆чисти́тєльныѧ: бл҃гопотрє́бнаѧ житїю̀ вре́менномꙋ и҆ вѣ́чномꙋ сп҃се́нїю млⷭ҇тивѡ, гпⷭ҇жѐ, на́мъ да́рꙋй: мі́ръ ᲂу҆мирѝ, ст҃ы́й хра́мъ се́й [и҆лѝ: ст҃ꙋ́ю ѻ҆би́тель сїю̀] до́брѣ сохранѝ, безмѧте́жїе и҆ и҆з̾ѻби́лїе плодѡ́въ земны́хъ на́мъ низпослѝ, и҆ при кончи́нѣ живота̀ на́шегѡ не лишѝ на́съ мт҃рнѧгѡ твоегѡ̀ застꙋпле́нїѧ и҆ по́мощи, да предста́тельствомъ твои́мъ безбѣ́днѡ пре́йдемъ мыта̑рства воздꙋ̑шнаѧ и҆ сподо́бимсѧ ᲂу҆наслѣ́довати црⷭ҇твїе нбⷭ҇ное. Є҆́й, цр҃и́це всебл҃га́ѧ, всѣ́хъ ра́достей ра́досте и҆ всегѡ̀ мі́ра хрⷭ҇тїа́нскагѡ ᲂу҆тѣше́нїе! Помозѝ на́мъ и҆ ны́нѣ, и҆ є҆гда̀ наипа́че по́мощи твоеѧ̀ ст҃ы́ѧ востре́бꙋемъ, и҆ сп҃сѝ на́съ мт҃рними мл҃твами твои́ми ко хрⷭ҇тꙋ̀ бг҃ꙋ, є҆мꙋ́же со ѻ҆ц҃е́мъ и҆ ст҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.