Акафист Пресвятой Богородице пред иконой «Трех радостей»
Память: 08 января (26 декабря ст. ст.)
Не утвержден для общецерковного использования.
Конда́к 1.
Взбра́нной Воево́де не умолчи́м никогда́ глаго́лати мы́ недосто́йнии, Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
И́кос 1.
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: Ра́дуйся, Благода́тная, Госпо́дь с Тобо́ю! Мы́ же гре́шнии нечи́стыми устна́ми дерза́ем вопи́ти Тебе́ си́це:
Ра́дуйся, благослове́нная в жена́х; ра́дуйся, Богоневе́сто.
Ра́дуйся, виногра́дная лозо́; ра́дуйся, в рождестве́ и по рождестве́ Де́во.
Ра́дуйся, цве́те неувяда́емый; ра́дуйся, чистоты́ сокро́вище.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та невече́рняго жили́ще.
Ра́дуйся, всего́ ми́ра очище́ние; ра́дуйся ду́ш на́ших освяще́ние.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 2.
Испо́лни весе́лия се́рдце мое́, утоли́ печа́ль мою́, Пресвята́я Де́во! Просвети́ све́том нетле́нныя ра́дости мою́ ско́рбную ду́шу, да взыва́ю Созда́телю моему́: Аллилу́иа.
И́кос 2.
Ра́зум челове́ческий не мо́жет уразуме́ти, ка́ко Ты́, неискусобра́чная Де́во, име́ла еси́ во утро́бе над все́ми Бо́га и родила́ еси́ безле́тнаго Сы́на, те́мже со стра́хом взыва́ем Ти́:
Ра́дуйся, земле́ ненасе́янная; ра́дуйся, Купино́ неопали́мая.
Ра́дуйся, Глубино́ неудобозри́мая; ра́дуйся, Мо́сте, к небесе́м преводя́й.
Ра́дуйся, Ле́ствице высо́кая, ю́же Иа́ков ви́де; ра́дуйся, Боже́ственная ста́мно Ма́нны.
Ра́дуйся, разреше́ние кля́твы; ра́дуйся, Ада́мово воззва́ние.
Ра́дуйся, врата́ а́довы сокруши́вшая; ра́дуйся, тьму́ грехо́вную разруши́вшая.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 3.
Ты́ еси́ предста́тельство и покро́в жи́зни моея́, наде́жда и утвержде́ние мое́, Всепе́тая, исцели́ мою́ ду́шу, пораже́нную прока́зою грехо́вною, да воспою́ Небе́сному Жениху́ во ве́ки: Аллилу́иа.
И́кос 3.
Всевы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость Богоро́дице зову́щим:
Ра́дуйся, чисте́йшая све́тлостей со́лнечных; ра́дуйся, пребыва́ние Творца́ не́ба и земли́.
Ра́дуйся, А́нгелов ра́досте; ра́дуйся, всечу́дное все́х к Бо́гу примире́ние.
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, стено́ и защище́ние на́ше от враго́в; ра́дуйся де́монов пораже́ние и ослепле́ние.
Ра́дуйся, две́ри ра́йския на́м отверза́ющая; ра́дуйся, Мари́е, Госпоже́ все́х на́с.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 4.
Уны́нием и мно́гими скорбьми́ испо́лнено се́рдце мое́, к кому́ возопию́, Влады́чице, к кому́ прибе́гну в го́рести мое́й, кому́ возвещу́ печа́ль мою́, кто́ пла́ч и воздыха́ние мое́ услы́шит, а́ще не Ты́, Богоро́дице, ро́ждшая на ра́дость Не́ба и земли́ Царя́ Христа́ Бо́га на́шего, Ему́же пою́т с на́ми Херуви́мы и Серафи́мы: Аллилу́иа.
И́кос 4.
Никогда́ не умолчи́м и не отсту́пим от Тебе́, Влады́чице, Твоя́ бо рабы́ спаса́еши при́сно от вся́ких лю́тых бе́д и скорбе́й, те́мже припа́даем к Тебе́ и с умиле́нием пое́м:
Ра́дуйся, все́х скорбя́щих Ра́досте; ра́дуйся, взыска́ние поги́бших.
Ра́дуйся, оби́димых Засту́пнице; ра́дуйся, а́лчущих пита́тельнице.
Ра́дуйся, стра́нных Утеше́ние; ра́дуйся обурева́емых Приста́нище.
Ра́дуйся, больны́х посеще́ние; ра́дуйся, немощны́х Покро́ве и Помо́щнице.
Ра́дуйся, же́зле ста́рости; ра́дуйся, Ма́ти Бо́га на́шего.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 5.
Засту́пнице ми́ра, возвесели́ все́х прибега́ющих к Тебе́, Ма́тери вы́сшей Ра́дости, покры́й на́с честны́м Твои́м омофо́ром от вся́ких бе́д, напа́стей, скорбе́й и боле́зней, да пое́м Бо́гу: Аллилу́иа.
И́кос 5.
Моле́ние кре́пкое, стено́ необори́мая, ми́лости исто́чниче, все́х правосла́вных прибе́жище, Богоро́дице Де́во! Приими́ от на́с а́нгельское пе́ние:
Ра́дуйся, ра́досте и сла́во ве́рующих; ра́дуйся, все́х святы́х непрело́жное упова́ние.
Ра́дуйся, ско́рое в беда́х избавле́ние; ра́дуйся, гото́вое в ну́ждах утеше́ние.
Ра́дуйся, Боговмести́мое жили́ще; ра́дуйся, бе́здно щедро́т и благосты́ни.
Ра́дуйся, одушевле́нный хра́ме; ра́дуйся, сиро́т и вдови́ц сла́достное весе́лие.
Ра́дуйся, неистощи́мое бога́тство; ра́дуйся, Неве́сто неневе́стная.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 6.
Во вре́мя живота́ моего́ не оста́ви мене́, Ма́ти Бо́жия, и коне́ц благи́й получи́ти мя́ сподо́би, да взыва́ю Спаси́телю Бо́гу: Аллилу́иа.
И́кос 6.
Искуше́ния вся́каго и страсте́й изба́ви мя́, Всенепоро́чная! Уще́дри, спаси́, возвесели́ мя́ и от лю́тых враго́в изба́ви и защити́, да вы́ну взыва́ю Тебе́:
Ра́дуйся, кре́пкое и непоколеби́мое упова́ние на́ше; ра́дуйся, все́х Цари́це и Влады́чице.
Ра́дуйся, всея́ вселе́нныя вели́кое сокро́вище; ра́дуйся, все́х ве́рных утвержде́ние.
Ра́дуйся, засту́пнице усе́рдная ро́да христиа́нскаго; ра́дуйся, ро́ждшая все́х святы́х святе́йшее Сло́во.
Ра́дуйся, небе́сный престо́ле; ра́дуйся, исто́чниче неистощи́мый Воды́ живы́я.
Ра́дуйся, огражде́ние и свяще́нное прибе́жище на Тя́ наде́ющихся; ра́дуйся, предста́тельство христиа́н непосты́дное.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 7.
В ча́с кончи́ны моея́, Всеблага́я, предста́ни мне́ и убо́гую мою́ ду́шу во исхо́де от окая́ннаго те́ла моего́ обра́дуй, да воспою́ Победи́телю сме́рти и а́да: Аллилу́иа.
И́кос 7.
Лица́ Твоего́ ра́достнаго не отврати́ от мене́, Богороди́тельнице! Услы́ши мольбу́ мою́, и во́пль мо́й к Тебе́ да прии́дет, Де́во Пресвята́я! Во́ньже а́ще де́нь призову́ Тя́, ско́ро услы́ши мя́, да взыва́ю Ти́ си́це:
Ра́дуйся, торже́ственное пе́ние А́нгелов; ра́дуйся, Апо́столов похвало́.
Ра́дуйся, пресви́теров красото́; ра́дуйся страда́льцев венча́ние.
Ра́дуйся, сто́лпе де́вства; ра́дуйся, сле́з Е́виных избавле́ние.
Ра́дуйся, по́стников воздержа́ние; ра́дуйся, живота́ нетле́ннаго весе́лие.
Ра́дуйся, мона́хов умиле́ние; ра́дуйся, святи́телей удобре́ние.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 8.
Со све́тлою свеще́ю благоволи́ла еси́, Пречи́стая, изы́ти во сре́тение Жениха́ ду́ш на́ших, да́руй у́бо и мне́ бо́дренным се́рдцем и тре́звенною мы́слию настоя́щаго жития́ но́щь прейти́ и в ра́достный черто́г сла́вы Его́ вни́ти и пе́ти Судии́ все́х Бо́гу: Аллилу́иа.
И́кос 8.
Еди́на непоро́чная и чи́стая Де́во, небе́снаго весе́лия улучи́ти со все́ми святы́ми сподо́би все́х на́с и сро́дников на́ших, дру́ги и зна́емыя, да упоко́ит и́х Госпо́дь всеси́льными Твои́ми моли́твами, Пречи́стая, в ме́сте све́тле, иде́же не́сть боле́зни, ни печа́ли, ни воздыха́ния, но жи́знь безконе́чная. Да прости́т и́м Госпо́дь вся́кое согреше́ние, соде́янное и́ми от ю́ности до сме́ртнаго часа́ и́х, да взыва́ют и они́ с на́ми:
Ра́дуйся, во успе́нии Твое́м на́с не оста́вившая; ра́дуйся, Ма́ти Жи́зни.
Ра́дуйся, избавля́ющая от сме́рти ду́ши на́ша; ра́дуйся, в моли́твах неусыпа́ющая Богоро́дице.
Ра́дуйся, ра́йския ра́дости на́с приобща́ющая; ра́дуйся, Бо́га пло́тию ро́ждшая.
Ра́дуйся, от ро́ва поги́бели на́с спаса́ющая; ра́дуйся, ра́достное упокое́ние все́х в ве́ре и наде́жде сконча́вшихся.
Ра́дуйся, Наде́ждо ненаде́жных; ра́дуйся, милосе́рдия две́ри на́м отверза́ющая.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 9.
Изба́ви, Богороди́тельнице, на́с, гре́шных рабо́в Твои́х, гее́нны о́гненныя, тьмы́ несвети́мыя, му́ки а́дския и сподо́би жи́зни нестаре́ющияся, да пое́м всегда́ Сладча́йшему Иису́су: Аллилу́иа.
И́кос 9.
Пречи́стая Де́во, Твои́м хода́тайством пред престо́лом Всевы́шняго освяти́ мою́ ду́шу и те́ло, у́м и се́рдце, всего́ мя́ обнови́, украси́, уцелому́дри, просла́ви, спаси́, просвети́, и благослови́ Свои́м небе́сным и земны́м благослове́нием, да взыва́ю Ти́:
Ра́дуйся, неневе́стная Ма́ти и неискусобра́чная; ра́дуйся, я́ко Тобо́ю Сы́на Бо́жия позна́хом.
Ра́дуйся, неруши́мая стено́; ра́дуйся, всесоверше́нное спасе́ние ду́ш на́ших.
Ра́дуйся, Влады́чице и Ма́ти Изба́вителя от ве́чныя сме́рти; ра́дуйся, святы́х святе́йшая А́нгелов.
Ра́дуйся, я́ко вои́стину из Тебе́ Госпо́дь воцари́ся и в ле́поту облече́ся; ра́дуйся, грехо́вную отъе́млющая скве́рну.
Ра́дуйся, у́тра весе́нняго светле́йшая; ра́дуйся, свире́пую бу́рю души́ моея́ укроща́ющая.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 10.
Утверди́, Богоро́дице Де́во, в Правосла́вии все́х благове́рных ру́сских люде́й, покры́й и́х Твои́м честны́м омофо́ром от вся́каго зла́, да пою́т Бо́гу: Аллилу́иа.
И́кос 10.
Боголюби́вая Де́во Мари́е, Госпоже́ Богоро́дице безневе́стная, ве́рных спасе́ние и наде́ждо! Я́ко иму́щая мно́гое дерзнове́ние к Небе́сному Царю́, воплоти́вшемуся из Тебе́, изба́ви на́с от скорбе́й лю́тых и печа́ли го́рькия. Утеше́ния и ра́дости про́сим у Тебе́, Ра́досте на́ша, наипа́че же ве́чнаго спасе́ния, умиле́нно взыва́юще:
Ра́дуйся, Хле́бе жи́зни, Боже́ственнаго А́гнца, ро́ждшая; ра́дуйся, Лозо́ виногра́дная, возрасти́вшая на́м Пло́д живота́.
Ра́дуйся, вино́м небе́сныя ра́дости на́с напоя́ющая; ра́дуйся, святы́х, небе́сных, стра́шных, Боже́ственных и безсме́ртных, и животворя́щих Христо́вых Та́ин ве́рных сподобля́ющая.
Ра́дуйся, Све́та невече́рняго Таи́ннице неизрече́нная; ра́дуйся, све́те помраче́нныя моея́ души́.
Ра́дуйся, покро́ве и Наде́ждо моя́; ра́дуйся, прибе́жище мое́.
Ра́дуйся, утеше́ние мое́; ра́дуйся, ра́дование мое́.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 11.
Две́рь небе́сную ве́рным отверза́ющая, покая́ния две́ри отве́рзи ми́, Богоро́дице, да поми́лует мя́ пра́веднейший Судия́, да не объяви́т мои́х та́йных прегреше́ний и не посрами́т мене́ пред А́нгелы Свои́ми, да пою́ Ему́ во ве́ки: Аллилу́иа.
И́кос 11.
Очи́сти мя́, Пречи́стая, от вся́кия скве́рны пло́ти и ду́ха, отжени́ от мене́ уны́ние, просвети́ моя́ мы́сли серде́чныя, пода́ждь ми́ па́мять сме́ртную, сохрани́ се́рдце мое́ от по́хотей лука́вых и услы́ши мя́ вопию́щаго:
Ра́дуйся, Цари́це моя́ Преблага́я; ра́дуйся, Засту́пнице моя́ Преблагослове́нная.
Ра́дуйся, тружда́ющихся помо́щнице; ра́дуйся, оби́димых Засту́пнице.
Ра́дуйся, отра́до и утеше́ние пла́чущих; ра́дуйся, утеше́ние в сме́рти мое́й.
Ра́дуйся, весе́лие души́ моея́; ра́дуйся, красото́ Це́ркви.
Ра́дуйся, просвеще́ние ума́ моего́; ра́дуйся, все́х христиа́н утеше́ние.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 12.
Во све́тлостех святы́х Твои́х ка́ко вни́ду недосто́йный а́з, Бо́же, Бо́же мо́й! А́ще бо дерзну́ совни́ти в черто́г, оде́жда мя́ облича́ет, я́ко не́сть бра́чна. Просвети́ одея́ние души́ моея́, Жизнода́вче, моли́твами Богоро́дицы, да пою́ Ти́: Аллилу́иа.
И́кос 12.
О небе́сный, о любе́зный, о сладча́йший Тво́й гла́с, веселя́щий сердца́ на́ша! С на́ми бо нело́жно обеща́лася еси́ бы́ти до сконча́ния ве́ка, Де́во Богоро́дице! Твои́ми бо моли́твами слепи́и ви́дят, глухи́я слы́шат, хроми́и хо́дят, прокаже́нныя очища́ются, а́лчущия пита́ются, нази́и одева́ются, вдови́цы утеша́ются, сироты́ ра́дуются, ни́щии веселя́тся, гре́шнии спаса́ются, убо́зии лику́ют, воспева́юще:
Ра́дуйся, одушевле́нный Бо́жий Киво́те; ра́дуйся, Боголюби́вая Цари́це и Влады́чице.
Ра́дуйся, от гла́да и губи́тельства, тру́са и пото́па на́с спаса́ющая; ра́дуйся, от огня́, меча́, наше́ствия иноплеме́нных и междоусо́бныя бра́ни на́с защища́ющая.
Ра́дуйся, бу́рныя во́лны жите́йскаго мо́ря укроща́ющая; ра́дуйся, вся́кую сле́зу от оче́с на́ших отира́ющая.
Ра́дуйся, я́ко вои́стину любо́вию матери́нскою на́с возлюби́вшая; ра́дуйся, пода́тельнице Боже́ственныя бла́гости.
Ра́дуйся, во чре́ве Свое́м Ра́дость ве́чную носи́вшая; ра́дуйся, я́ко ти́хое приста́нище душа́м на́шим гото́виши.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 13.
О, Всепе́тая Ма́ти, Пречи́стая Госпоже́ Де́во Богоро́дице! Приими́ сие́ ма́лое моле́ние на́ше, Засту́пнице кре́пкая су́щих в ско́рбех и печа́лех; умоля́ем Тя́ честны́м и животворя́щим кресто́м Сы́на Твоего́, Го́спода на́шего Иису́са Христа́: пода́ждь на́м ду́х сокруше́нный, се́рдце смире́нное, сле́зы умиле́ния, мно́гих согреше́ний на́ших проще́ние и ра́дость неувяда́емую, да пое́м в го́рнем Иерусали́ме Спаси́телю Бо́гу: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: Ра́дуйся, Благода́тная, Госпо́дь с Тобо́ю! Мы́ же гре́шнии нечи́стыми устна́ми дерза́ем вопи́ти Тебе́ си́це:
Ра́дуйся, благослове́нная в жена́х; ра́дуйся, Богоневе́сто.
Ра́дуйся, виногра́дная лозо́; ра́дуйся, в рождестве́ и по рождестве́ Де́во.
Ра́дуйся, цве́те неувяда́емый; ра́дуйся, чистоты́ сокро́вище.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та невече́рняго жили́ще.
Ра́дуйся, всего́ ми́ра очище́ние; ра́дуйся ду́ш на́ших освяще́ние.
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 1.
Взбра́нной Воево́де не умолчи́м никогда́ глаго́лати мы́ недосто́йнии, Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, Ра́досте на́ша, во объя́тиих Свои́х Ра́дость всего́ ми́ра носи́вшая.
Моли́тва.
О Пресвята́я Де́во, всеблага́го Сы́на Ма́ти всеблага́я, гра́да сего́ (святы́я оби́тели сея́) Покро́ве, все́м ве́рная Предста́тельнице и Засту́пнице. Не пре́зри моле́ния на́с, недосто́йных ра́б Твои́х, но умоли́ Сы́на Твоего́ и Бо́га на́шего, да все́м на́м, с ве́рою и умиле́нием пред чудотво́рным о́бразом Твои́м покланя́ющымся, по коего́ждо потре́бе ра́дость да́рует: гре́шником вседе́йственное вразумле́ние, покая́ние же и спасе́ние: су́щим в ско́рбех и печа́лех утеше́ние: в беда́х и озлобле́ниих пребыва́ющым соверше́нное си́х избы́тие: малоду́шным и ненаде́жным наде́жду и терпе́ние: в ра́дости и изоби́лии живу́щим непреста́нное Бо́гу благодаре́ние: су́щим в боле́зни исцеле́ние и укрепле́ние.
О Госпоже́ Пречи́стая! умилосе́рдися ко все́м чту́щым всечестно́е и́мя Твое́ и все́м яви́ всемо́щный Покро́в Тво́й и заступле́ние: от вра́г ви́димых и неви́димых лю́ди Твоя́ защити́ и сохрани́: супру́жества в любви́ и единомы́слии утверди́: младе́нцы воспита́й, ю́ныя уцелому́дри, отве́рзи и́м у́м к восприя́тию вся́каго поле́знаго уче́ния: от дома́шния сва́ры единокро́вныя лю́ди ми́ром и любо́вию огради́, и все́м на́м пода́ждь дру́г ко дру́гу любо́вь, ми́р и благоче́стие, и здра́вие со долгоде́нствием: да вси́ на небеси́ и на земли́ ве́дят Тя́, я́ко тве́рдую и непосты́дную Предста́тельницу ро́да христиа́нскаго и, сие́ ве́дуще, сла́вят Тя́ и Тобо́ю Сы́на Твоего́ со Безнача́льным Его́ Отце́м и Единосу́щным Его́ Ду́хом, ны́не и при́сно и во ве́ки веко́в. Ами́нь.
А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ тре́хъ ра́достей.
Конда́къ а҃.
Взбра́нной воево́дѣ не ᲂу҆молчи́мъ никогда̀ глаго́лати мы̀, недосто́йнїи, всест҃а́ѧ дв҃о, ро́ждшаѧ на сп҃се́нїе на́ше ра́дость вѣ́чнꙋю: всѧ́кое ᲂу҆ны́нїе и҆ печа́ль ѿженѝ ѿ на́съ, да зове́мъ тѝ:
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
І҆́косъ а҃.
Та́йнꙋ ѿ вѣ́ка ѿкрыва́ѧ тебѣ̀, пренепоро́чнаѧ дв҃о, гаврїи́лъ, безпло́тныхъ а҆рхїстрати́гъ, со стра́хомъ вопїѧ́ше: ра́дꙋйсѧ, блгⷣтнаѧ, гдⷭ҇ь съ тобо́ю. Мы́ же, грѣ́шнїи, нечи́стыми ᲂу҆стна́ми дерза́емъ вопи́ти тебѣ̀ си́це:
Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, бг҃оневѣ́сто.
Ра́дꙋйсѧ, вїногра́днаѧ лозо̀: ра́дꙋйсѧ, въ рождествѣ̀ и҆ по рождествѣ̀ дв҃о.
Ра́дꙋйсѧ, цвѣ́те неꙋвѧда́емый: ра́дꙋйсѧ, чⷭ҇тоты̀ сокро́вище.
Ра́дꙋйсѧ, кади́ло бл҃гово́нное: ра́дꙋйсѧ, мѵ́ро многоцѣ́нное.
Ра́дꙋйсѧ, ѡ҆дꙋшевле́ннаѧ трапе́зо: ра́дꙋйсѧ, свѣ́та невече́рнѧгѡ жили́ще.
Ра́дꙋйсѧ, всегѡ̀ мі́ра ѡ҆чище́нїе: ра́дꙋйсѧ, дꙋ́шъ на́шихъ ѡ҆сщ҃е́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ в҃.
И҆спо́лни весе́лїѧ се́рдце моѐ, ᲂу҆толѝ печа́ль мою̀, прест҃а́ѧ дв҃о. Просвѣтѝ свѣ́томъ нетлѣ́нныѧ ра́дости мою̀ ско́рбнꙋю дꙋ́шꙋ, да взыва́ю созда́телю моемꙋ̀: А҆ллилꙋ́їа.
І҆́косъ в҃.
Ра́зꙋмъ чл҃вѣ́ческїй не мо́жетъ ᲂу҆разꙋмѣ́ти, ка́кѡ ты̀, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнагѡ сн҃а, тѣ́мже со стра́хомъ взыва́емъ тѝ:
Ра́дꙋйсѧ, землѐ ненасѣ́ѧннаѧ: ра́дꙋйсѧ, кꙋпино̀ неѡпали́маѧ.
Ра́дꙋйсѧ, глꙋбино̀ неꙋдобозри́маѧ: ра́дꙋйсѧ, мо́сте, къ нб҃сє́мъ преводѧ́й.
Ра́дꙋйсѧ, лѣ́ствице высо́каѧ, ю҆́же і҆а́кѡвъ ви́дѣ: ра́дꙋйсѧ, бжⷭ҇твеннаѧ ста́мно ма́нны.
Ра́дꙋйсѧ, разрѣше́нїе клѧ́твы: ра́дꙋйсѧ, а҆да́мово воззва́нїе.
Ра́дꙋйсѧ, врата̀ а҆́довы сокрꙋши́вшаѧ: ра́дꙋйсѧ, тмꙋ̀ грѣхо́внꙋю разрꙋши́вшаѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ г҃.
Ты̀, предста́тельство и҆ покро́въ жи́зни моеѧ̀, наде́жда и҆ ᲂу҆твержде́нїе моѐ, всепѣ́таѧ, и҆сцѣлѝ мою̀ дꙋ́шꙋ, пораже́ннꙋю прока́зою грѣхо́вною, да воспою̀ нбⷭ҇номꙋ женихꙋ̀ во вѣ́ки: А҆ллилꙋ́їа.
І҆́косъ г҃.
Всевы́шнѧгѡ ѡ҆сщ҃е́нное бжⷭ҇твенное селе́нїе, ра́дꙋйсѧ, тобо́ю бо даде́сѧ ра́дость, бцⷣе, зовꙋ́щымъ:
Ра́дꙋйсѧ, чⷭ҇тѣ́йшаѧ свѣ́тлостей со́лнечныхъ: ра́дꙋйсѧ, пребыва́нїе творца̀ нб҃а и҆ землѝ.
Ра́дꙋйсѧ, а҆́гг҃лѡвъ ра́досте: ра́дꙋйсѧ, всечꙋ́дное всѣ́хъ къ бг҃ꙋ примире́нїе.
Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, стѣно̀ и҆ защище́нїе на́ше ѿ врагѡ́въ: ра́дꙋйсѧ, де́монѡвъ пораже́нїе и҆ ѡ҆слѣпле́нїе.
Ра́дꙋйсѧ, двє́ри ра́йскїѧ на́мъ ѿверза́ющаѧ: ра́дꙋйсѧ, мр҃і́е, гпⷭ҇жѐ всѣ́хъ на́съ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ д҃.
Оу҆ны́нїемъ и҆ мно́гими скорбьмѝ и҆спо́лнено се́рдце моѐ. Къ комꙋ̀ возопїю̀, влⷣчце; къ комꙋ̀ прибѣ́гнꙋ въ го́рести мое́й; комꙋ̀ возвѣщꙋ̀ печа́ль мою̀; кто̀ пла́чъ и҆ воздыха́нїе моѐ ᲂу҆слы́шитъ, а҆́ще не ты̀, бцⷣе, ро́ждшаѧ на ра́дость нб҃а и҆ землѝ цр҃ѧ̀ хрⷭ҇та̀ бг҃а на́шегѡ. Є҆мꙋ́же пою́тъ съ на́ми херꙋві́мы и҆ серафі́мы: А҆ллилꙋ́їа.
І҆́косъ д҃.
Никогда̀ не ᲂу҆молчи́мъ и҆ не ѿстꙋ́пимъ ѿ тебє̀, влⷣчце, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ бѣ́дъ и҆ скорбе́й. Тѣ́мже припа́даемъ къ тебѣ̀ и҆ съ ᲂу҆миле́нїемъ пое́мъ:
Ра́дꙋйсѧ, всѣ́хъ скорбѧ́щихъ ра́досте: ра́дꙋйсѧ, взыска́нїе поги́бшихъ.
Ра́дꙋйсѧ, ѻ҆би́димыхъ застꙋ́пнице: ра́дꙋйсѧ, а҆́лчꙋщихъ пита́тельнице.
Ра́дꙋйсѧ, стра́нныхъ ᲂу҆тѣше́нїе: ра́дꙋйсѧ, ѡ҆бꙋрева́емыхъ приста́нище.
Ра́дꙋйсѧ, больны́хъ посѣще́нїе: ра́дꙋйсѧ, немощны́хъ покро́ве и҆ помо́щнице.
Ра́дꙋйсѧ, же́зле ста́рости: ра́дꙋйсѧ, мт҃и бг҃а на́шегѡ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ є҃.
Застꙋ́пнице мі́ра, возвеселѝ всѣ́хъ прибѣга́ющихъ къ тебѣ̀, мт҃ри вы́сшей ра́дости, покры́й на́съ чтⷭ҇ны́мъ твои́мъ ѡ҆мофо́ромъ ѿ всѧ́кихъ бѣ́дъ, напа́стей, скорбе́й и҆ болѣ́зней, да пое́мъ бг҃ꙋ: А҆ллилꙋ́їа.
І҆́косъ є҃.
Моле́нїе крѣ́пкое, стѣно̀ неѡбори́маѧ, млⷭ҇ти и҆сто́чниче, всѣ́хъ правосла́вныхъ прибѣ́жище, бцⷣе дв҃о, прїимѝ ѿ на́съ а҆́гг҃льское пѣ́нїе:
Ра́дꙋйсѧ, ра́досте и҆ сла́во вѣ́рꙋющихъ: ра́дꙋйсѧ, всѣ́хъ ст҃ы́хъ непрело́жное ᲂу҆пова́нїе.
Ра́дꙋйсѧ, ско́рое въ бѣда́хъ и҆збавле́нїе: ра́дꙋйсѧ, гото́вое въ нꙋ́ждахъ ᲂу҆тѣше́нїе.
Ра́дꙋйсѧ, бг҃овмѣсти́мое жили́ще. ра́дꙋйсѧ, бе́здно щедрѡ́тъ и҆ бл҃госты́ни.
Ра́дꙋйсѧ, ѡ҆дꙋшевле́нный хра́ме: ра́дꙋйсѧ, сирѡ́тъ и҆ вдови́цъ сла́достное весе́лїе.
Ра́дꙋйсѧ, неистощи́мое бога́тство. Ра́дꙋйсѧ, невѣ́сто неневѣ́стнаѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ ѕ҃.
Во вре́мѧ живота̀ моегѡ̀ не ѡ҆ста́ви менѐ, мт҃и бж҃їѧ, и҆ коне́цъ бл҃гі́й полꙋчи́ти мѧ̀ сподо́би, да взыва́ю сп҃си́телю бг҃ꙋ: А҆ллилꙋ́їа.
І҆́косъ ѕ҃.
И҆скꙋше́нїѧ всѧ́кагѡ и҆ страсте́й и҆зба́ви мѧ̀, всенепоро́чнаѧ. Оу҆ще́дри, сп҃сѝ, возвеселѝ мѧ̀ и҆ ѿ лю́тыхъ врагѡ́въ и҆зба́ви и҆ защитѝ, да вы́нꙋ взыва́ю тебѣ̀:
Ра́дꙋйсѧ, крѣ́пкое и҆ непоколеби́мое ᲂу҆пова́нїе на́ше: ра́дꙋйсѧ, всѣ́хъ цр҃и́це и҆ влⷣчце.
Ра́дꙋйсѧ, всеѧ̀ вселе́нныѧ вели́кое сокро́вище: ра́дꙋйсѧ, всѣ́хъ вѣ́рныхъ ᲂу҆твержде́нїе.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ: ра́дꙋйсѧ, ро́ждшаѧ всѣ́хъ ст҃ы́хъ ст҃ѣ́йшее сло́во.
Ра́дꙋйсѧ, нбⷭ҇ный прⷭ҇то́ле: ра́дꙋйсѧ, и҆сто́чниче неистощи́мый воды̀ живы́ѧ.
Ра́дꙋйсѧ, ѡ҆гражде́нїе и҆ сщ҃е́нное прибѣ́жище на тѧ̀ надѣ́ющихсѧ: ра́дꙋйсѧ, предста́тельство хрⷭ҇тїа́нъ непосты́дное.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ з҃.
Въ ча́съ кончи́ны моеѧ̀, всебл҃га́ѧ, предста́ни мнѣ̀ и҆ ᲂу҆бо́гꙋю мою̀ дꙋ́шꙋ во и҆схо́дѣ ѿ ѡ҆каѧ́ннагѡ тѣ́ла моегѡ̀ ѡ҆бра́дꙋй, да воспою̀ побѣди́телю сме́рти и҆ а҆́да: А҆ллилꙋ́їа.
І҆́косъ з҃
Лица̀ твоегѡ̀ ра́достнагѡ не ѿвратѝ ѿ менє̀, бг҃ороди́тельнице. Оу҆слы́ши мольбꙋ̀ мою̀, и҆ во́пль мо́й къ тебѣ̀ да прїи́детъ, дв҃о прест҃а́ѧ. Во́ньже а҆́ще де́нь призовꙋ̀ тѧ̀, ско́ро ᲂу҆слы́ши мѧ̀, да взыва́ю тѝ си́це:
Ра́дꙋйсѧ, торже́ственное пѣ́нїе а҆́гг҃лѡвъ: ра́дꙋйсѧ, а҆пⷭ҇лѡвъ похвало̀.
Ра́дꙋйсѧ, пресвѵ́терѡвъ красото̀: ра́дꙋйсѧ, страда́льцевъ вѣнча́нїе.
Ра́дꙋйсѧ, сто́лпе дѣ́вства: ра́дꙋйсѧ, сле́зъ є҆́ѵиныхъ и҆збавле́нїе.
Ра́дꙋйсѧ, по́стникѡвъ воздержа́нїе: ра́дꙋйсѧ, живота̀ нетлѣ́ннагѡ весе́лїе.
Ра́дꙋйсѧ, мона́хѡвъ ᲂу҆миле́нїе: ра́дꙋйсѧ, ст҃и́телей ᲂу҆добре́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ и҃.
Со свѣ́тлою свѣще́ю бл҃говоли́ла є҆сѝ, пречⷭ҇таѧ, и҆зы́ти во срѣ́тенїе жениха̀ дꙋ́шъ на́шихъ, да́рꙋй ᲂу҆̀бо и҆ мнѣ̀ бо́дреннымъ се́рдцемъ и҆ тре́звенною мы́слїю настоѧ́щагѡ житїѧ̀ но́щь прейтѝ и҆ въ ра́достный черто́гъ сла́вы є҆гѡ̀ вни́ти и҆ пѣ́ти сꙋдїѝ всѣ́хъ бг҃ꙋ: А҆ллилꙋ́їа.
І҆́косъ и҃.
Є҆ди́на непоро́чнаѧ и҆ чⷭ҇таѧ дв҃о, нбⷭ҇нагѡ весе́лїѧ ᲂу҆лꙋчи́ти со всѣ́ми ст҃ы́ми сподо́би всѣ́хъ на́съ и҆ сро́дникѡвъ на́шихъ, дрꙋ́ги и҆ зна́ємыѧ, да ᲂу҆поко́итъ и҆̀хъ гдⷭ҇ь всеси́льными твои́ми мл҃твами, пречⷭ҇таѧ, въ мѣ́стѣ свѣ́тлѣ, и҆дѣ́же нѣ́сть болѣ́зни, ни печа́ли, ни воздыха́нїѧ, но жи́знь безконе́чнаѧ. Да прости́тъ и҆̀мъ гдⷭ҇ь всѧ́кое согрѣше́нїе, содѣ́ѧнное и҆́ми ѿ ю҆́ности до сме́ртнагѡ часа̀ и҆̀хъ, да взыва́ютъ и҆ ѻ҆нѝ съ на́ми:
Ра́дꙋйсѧ, во ᲂу҆спе́нїи твое́мъ на́съ не ѡ҆ста́вившаѧ: ра́дꙋйсѧ, мт҃и жи́зни.
Ра́дꙋйсѧ, и҆збавлѧ́ющаѧ ѿ сме́рти дꙋ́ши на́ша: ра́дꙋйсѧ, въ мл҃твахъ неꙋсыпа́ющаѧ бцⷣе.
Ра́дꙋйсѧ, ра́йскїѧ ра́дости на́съ прїѡбща́ющаѧ: ра́дꙋйсѧ, бг҃а пло́тїю ро́ждшаѧ.
Ра́дꙋйсѧ, ѿ ро́ва поги́бели на́съ сп҃са́ющаѧ: ра́дꙋйсѧ, ра́достное ᲂу҆покое́нїе всѣ́хъ въ вѣ́рѣ и҆ наде́ждѣ сконча́вшихсѧ.
Ра́дꙋйсѧ, наде́ждо ненаде́жныхъ: ра́дꙋйсѧ, милосе́рдїѧ две́ри на́мъ ѿверза́ющаѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ ѳ҃.
И҆зба́ви, бг҃ороди́тельнице, на́съ, грѣ́шныхъ рабѡ́въ твои́хъ, гее́нны ѻ҆́гненныѧ, тмы̀ несвѣти́мыѧ, мꙋ́ки а҆́дскїѧ и҆ сподо́би жи́зни нестарѣ́ющїѧсѧ, да пое́мъ всегда̀ сладча́йшемꙋ і҆и҃сꙋ: А҆ллилꙋ́їа.
І҆́косъ ѳ҃
Пречⷭ҇таѧ дв҃о, твои́мъ хода́тайствомъ пред̾ прⷭ҇то́ломъ всевы́шнѧгѡ ѡ҆ст҃ѝ мою̀ дꙋ́шꙋ и҆ тѣ́ло, ᲂу҆́мъ и҆ се́рдце, всегѡ̀ мѧ̀ ѡ҆бновѝ, ᲂу҆красѝ, ᲂу҆цѣломꙋ́дри, просла́ви, сп҃сѝ, просвѣтѝ, и҆ бл҃гословѝ свои́мъ нбⷭ҇нымъ и҆ земны́мъ бл҃гослове́нїемъ, да взыва́ю тѝ:
Ра́дꙋйсѧ, неневѣ́стнаѧ мт҃и и҆ неискꙋсобра́чнаѧ: ра́дꙋйсѧ, ꙗ҆́кѡ тобо́ю сн҃а бж҃їѧ позна́хомъ.
Ра́дꙋйсѧ, нерꙋши́маѧ стѣно̀: ра́дꙋйсѧ, всесоверше́нное сп҃се́нїе дꙋ́шъ на́шихъ.
Ра́дꙋйсѧ, влⷣчце и҆ мт҃и и҆зба́вителѧ ѿ вѣ́чныѧ сме́рти: ра́дꙋйсѧ, ст҃ы́хъ ст҃ѣ́йшаѧ а҆́гг҃лѡвъ.
Ра́дꙋйсѧ, ꙗ҆́кѡ вои́стиннꙋ и҆з̾ тебѣ̀ гдⷭ҇ь воцари́сѧ и҆ въ лѣ́потꙋ ѡ҆блече́сѧ: ра́дꙋйсѧ, грѣхо́внꙋю ѿ̾е́млющаѧ скве́рнꙋ.
Ра́дꙋйсѧ, ᲂу҆́тра весе́ннѧгѡ свѣтлѣ́йшаѧ: ра́дꙋйсѧ, свирѣ́пꙋю бꙋ́рю дꙋшѝ моеѧ̀ ᲂу҆кроща́ющаѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ і҃.
Оу҆твердѝ, бцⷣе дв҃о, въ правосла́вїи всѣ́хъ бл҃говѣ́рныхъ рꙋ́сскихъ люде́й, покры́й и҆̀хъ твои́мъ чтⷭ҇ны́мъ ѡ҆мофо́ромъ ѿ всѧ́кагѡ ѕла̀, да пою́тъ бг҃ꙋ: А҆ллилꙋ́їа.
І҆́косъ і҃.
Бг҃олюби́ваѧ дв҃о мр҃і́е, гпⷭ҇жѐ бцⷣе безневѣ́стнаѧ, вѣ́рныхъ сп҃се́нїе и҆ наде́ждо. Ꙗ҆́кѡ и҆мꙋ́щаѧ мно́гое дерзнове́нїе къ нбⷭ҇номꙋ цр҃ю̀, воплоти́вшемꙋсѧ и҆з̾ тебѣ̀, и҆зба́ви на́съ ѿ скорбе́й лю́тыхъ и҆ печа́ли го́рькїѧ. Оу҆тѣше́нїѧ и҆ ра́дости про́симъ ᲂу҆ тебѣ̀, ра́досте на́ша, наипа́че же вѣ́чнагѡ сп҃се́нїѧ, ᲂу҆миле́ннѡ взыва́юще:
Ра́дꙋйсѧ, хлѣ́бе жи́зни, бжⷭ҇твеннагѡ а҆́гнца ро́ждшаѧ: ра́дꙋйсѧ, лозо̀ вїногра́днаѧ, возрасти́вшаѧ на́мъ пло́дъ живота̀.
Ра́дꙋйсѧ, вїно́мъ нбⷭ҇ныѧ ра́дости на́съ напоѧ́ющаѧ: ра́дꙋйсѧ, ст҃ы́хъ нбⷭ҇ныхъ, стра́шныхъ, бжⷭ҇твенныхъ и҆ безсме́ртныхъ, и҆ животворѧ́щихъ хрⷭ҇то́выхъ та́инъ вѣ́рныхъ сподоблѧ́ющаѧ.
Ра́дꙋйсѧ, свѣ́та невече́рнѧгѡ таи́ннице неизрече́ннаѧ: ра́дꙋйсѧ, свѣ́те помраче́нныѧ моеѧ̀ дꙋшѝ.
Ра́дꙋйсѧ, покро́ве и҆ наде́ждо моѧ̀: ра́дꙋйсѧ, прибѣ́жище моѐ.
Ра́дꙋйсѧ, ᲂу҆тѣше́нїе моѐ: ра́дꙋйсѧ, ра́дованїе моѐ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ а҃і.
Две́рь нбⷭ҇нꙋю вѣ́рнымъ ѿверза́ющаѧ, покаѧ́нїѧ две́ри ѿве́рзи мѝ, бцⷣе, да поми́лꙋетъ мѧ̀ пра́веднѣйшїй сꙋдїѧ̀, да не ѡ҆б̾ѧви́тъ мои́хъ та́йныхъ прегрѣше́нїй, и҆ не посрами́тъ менѐ пред̾ а҆́гг҃лы свои́ми, да пою̀ є҆мꙋ̀ во вѣ́ки: А҆ллилꙋ́їа.
І҆́косъ а҃і.
Ѡ҆чи́сти мѧ̀, пречⷭ҇таѧ, ѿ всѧ́кїѧ скве́рны пло́ти и҆ дꙋ́ха, ѿженѝ ѿ менє̀ ᲂу҆ны́нїе, просвѣтѝ моѧ̀ мы́сли серде́чныѧ, пода́ждь мѝ па́мѧть сме́ртнꙋю, сохранѝ се́рдце моѐ ѿ по́хотей лꙋка́выхъ и҆ ᲂу҆слы́ши мѧ̀, вопїю́щагѡ:
Ра́дꙋйсѧ, цр҃и́це моѧ̀ пребл҃га́ѧ: ра́дꙋйсѧ, застꙋ́пнице моѧ̀ пребл҃гослове́ннаѧ.
Ра́дꙋйсѧ, трꙋжда́ющихсѧ помо́щнице: ра́дꙋйсѧ, ѻ҆би́димыхъ застꙋ́пнице.
Ра́дꙋйсѧ, ѿра́до и҆ ᲂу҆тѣше́нїе пла́чꙋщихъ: ра́дꙋйсѧ, ᲂу҆тѣше́нїе въ сме́рти мое́й.
Ра́дꙋйсѧ, весе́лїе дꙋшѝ моеѧ̀: ра́дꙋйсѧ, красото̀ цр҃кви.
Ра́дꙋйсѧ, просвѣще́нїе ᲂу҆ма̀ моегѡ̀: ра́дꙋйсѧ, всѣ́хъ хрⷭ҇тїа́нъ ᲂу҆тѣше́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ в҃і.
Во свѣ́тлостехъ ст҃ы́хъ твои́хъ ка́кѡ вни́дꙋ, недосто́йный а҆́зъ, бж҃е, бж҃е мо́й. А҆́ще бо дерзнꙋ̀ совни́ти въ черто́гъ, ѻ҆де́жда мѧ̀ ѡ҆блича́етъ, ꙗ҆́кѡ нѣ́сть бра́чна. Просвѣтѝ ѡ҆дѣѧ́нїе дꙋшѝ моеѧ̀, жизнода́вче, мл҃твами бцⷣы, да пою̀ тѝ: А҆ллилꙋ́їа.
І҆́косъ в҃і.
Ѽ нбⷭ҇ный, ѽ любе́зный, ѽ сладча́йшїй тво́й гла́съ, веселѧ́щїй сердца̀ на́ша. Съ на́ми бо нело́жнѡ ѡ҆бѣща́ласѧ є҆сѝ бы́ти до сконча́нїѧ вѣ́ка, дв҃о бцⷣе. Твои́ми бо мл҃твами слѣпі́и ви́дѧтъ, глꙋхі̑ѧ слы́шатъ, хромі́и хо́дѧтъ, прокажє́нныѧ ѡ҆чища́ютсѧ, а҆́лчꙋщыѧ пита́ютсѧ, назі́и ѡ҆дѣва́ютсѧ, вдови́цы ᲂу҆тѣша́ютсѧ, сирѡты̀ ра́дꙋютсѧ, ни́щїи веселѧ́тсѧ, грѣ́шнїи сп҃са́ютсѧ, ᲂу҆бо́зїи ликꙋ́ютъ, воспѣва́юще:
Ра́дꙋйсѧ, ѡ҆дꙋшевле́нный бж҃їй кївѡ́те: ра́дꙋйсѧ, бг҃олюби́ваѧ цр҃и́це и҆ влⷣчце.
Ра́дꙋйсѧ, ѿ гла́да и҆ гꙋби́тельства, трꙋ́са и҆ пото́па на́съ сп҃са́ющаѧ: ра́дꙋйсѧ, ѿ ѻ҆гнѧ̀, меча̀, наше́ствїѧ и҆ноплеме́нныхъ и҆ междоꙋсо́бныѧ бра́ни на́съ защища́ющаѧ.
Ра́дꙋйсѧ, бꙋ́рныѧ во́лны жите́йскагѡ мо́рѧ ᲂу҆кроща́ющаѧ: ра́дꙋйсѧ, всѧ́кꙋю сле́зꙋ ѿ ѻ҆че́съ на́шихъ ѡ҆тира́ющаѧ.
Ра́дꙋйсѧ, ꙗ҆́кѡ вои́стиннꙋ любо́вїю матери́нскою на́съ возлюби́вшаѧ: ра́дꙋйсѧ, пода́тельнице бжⷭ҇твенныѧ бл҃гости.
Ра́дꙋйсѧ, во чре́вѣ свое́мъ ра́дость вѣ́чнꙋю носи́вшаѧ: ра́дꙋйсѧ, ꙗ҆́кѡ ти́хое приста́нище дꙋша́мъ на́шимъ гото́виши.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ г҃і.
Ѽ всепѣ́таѧ мт҃и, пречⷭ҇таѧ гпⷭ҇жѐ, дв҃о бцⷣе. Прїимѝ сїѐ ма́лое моле́нїе на́ше, застꙋ́пнице крѣ́пкаѧ сꙋ́щихъ въ ско́рбѣхъ и҆ печа́лѣхъ: ᲂу҆молѧ́емъ тѧ̀ чтⷭ҇ны́мъ и҆ животворѧ́щимъ крⷭ҇то́мъ сн҃а твоегѡ̀, гдⷭ҇а на́шегѡ і҆и҃са хрⷭ҇та̀: пода́ждь на́мъ дꙋ́хъ сокрꙋше́нный, се́рдце смире́нное, сле́зы ᲂу҆миле́нїѧ, мно́гихъ согрѣше́нїй на́шихъ проще́нїе и҆ ра́дость неꙋвѧда́емꙋю, да пое́мъ въ го́рнѣмъ і҆ерⷭ҇ли́мѣ сп҃си́телю бг҃ꙋ: А҆ллилꙋ́їа.
Се́й конда́къ чте́тсѧ три́жды. И҆ па́ки і҆́косъ а҃-й и҆ конда́къ а҃-й.
І҆́косъ а҃.
Та́йнꙋ ѿ вѣ́ка ѿкрыва́ѧ тебѣ̀, пренепоро́чнаѧ дв҃о, гаврїи́лъ, безпло́тныхъ а҆рхїстрати́гъ, со стра́хомъ вопїѧ́ше: ра́дꙋйсѧ, блгⷣтнаѧ, гдⷭ҇ь съ тобо́ю. Мы́ же, грѣ́шнїи, нечи́стыми ᲂу҆стна́ми дерза́емъ вопи́ти тебѣ̀ си́це:
Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, бг҃оневѣ́сто.
Ра́дꙋйсѧ, вїногра́днаѧ лозо̀: ра́дꙋйсѧ, въ рождествѣ̀ и҆ по рождествѣ̀ дв҃о.
Ра́дꙋйсѧ, цвѣ́те неꙋвѧда́емый: ра́дꙋйсѧ, чⷭ҇тоты̀ сокро́вище.
Ра́дꙋйсѧ, кади́ло бл҃гово́нное: ра́дꙋйсѧ, мѵ́ро многоцѣ́нное.
Ра́дꙋйсѧ, ѡ҆дꙋшевле́ннаѧ трапе́зо: ра́дꙋйсѧ, свѣ́та невече́рнѧгѡ жили́ще.
Ра́дꙋйсѧ, всегѡ̀ мі́ра ѡ҆чище́нїе: ра́дꙋйсѧ, дꙋ́шъ на́шихъ ѡ҆сщ҃е́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ а҃.
Взбра́нной воево́дѣ не ᲂу҆молчи́мъ никогда̀ глаго́лати мы̀, недосто́йнїи, всест҃а́ѧ дв҃о, ро́ждшаѧ на сп҃се́нїе на́ше ра́дость вѣ́чнꙋю: всѧ́кое ᲂу҆ны́нїе и҆ печа́ль ѿженѝ ѿ на́съ, да зове́мъ тѝ:
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Мл҃тва.
Ѽ прест҃а́ѧ дв҃о, всебл҃га́гѡ сн҃а мт҃и всебл҃га́ѧ, гра́да сегѡ̀ (ст҃ы́ѧ ѻ҆би́тели сеѧ̀) покро́ве, всѣ́мъ вѣ́рнаѧ предста́тельнице и҆ застꙋ́пнице. Не пре́зри моле́нїѧ на́съ, недосто́йныхъ ра̑бъ твои́хъ, но ᲂу҆молѝ сн҃а твоего̀ и҆ бг҃а на́шего, да всѣ́мъ на́мъ, съ вѣ́рою и҆ ᲂу҆миле́нїемъ пред̾ чꙋдотво́рнымъ ѻ҆́бразомъ твои́мъ покланѧ́ющымсѧ, по коего́ждо потре́бѣ ра́дость да́рꙋетъ: грѣ́шникѡмъ вседѣ́йственное вразꙋмле́нїе, покаѧ́нїе же и҆ сп҃се́нїе: сꙋ́щимъ въ ско́рбѣхъ и҆ печа́лѣхъ ᲂу҆тѣше́нїе: въ бѣда́хъ и҆ ѡ҆ѕлобле́нїихъ пребыва́ющымъ соверше́нное си́хъ и҆збы́тїе: малодꙋ̑шнымъ и҆ ненадє́жнымъ наде́ждꙋ и҆ терпѣ́нїе: въ ра́дости и҆ и҆з̾ѻби́лїи живꙋ́щимъ непреста́нное бг҃ꙋ бл҃годаре́нїе: сꙋ́щимъ въ болѣ́зни и҆сцѣле́нїе и҆ ᲂу҆крѣпле́нїе.
Ѽ гпⷭ҇жѐ пречⷭ҇таѧ! Оу҆милосе́рдисѧ ко всѣ́мъ чтꙋ́щымъ всечтⷭ҇но́е и҆́мѧ твоѐ и҆ всѣ́мъ ꙗ҆вѝ всемо́щный покро́въ тво́й и҆ застꙋпле́нїе: ѿ вра̑гъ ви́димыхъ и҆ неви́димыхъ лю́ди твоѧ̑ защитѝ и҆ сохранѝ: сꙋпрꙋ̑жества въ любвѝ и҆ є҆диномы́слїи ᲂу҆твердѝ: младє́нцы воспита́й, ю҆́ныѧ ᲂу҆цѣломꙋ́дри, ѿве́рзи и҆̀мъ ᲂу҆́мъ къ воспрїѧ́тїю всѧ́кагѡ поле́знагѡ ᲂу҆че́нїѧ: ѿ дома́шнїѧ сва̑ры є҆динокрѡ́вныѧ лю́ди ми́ромъ и҆ любо́вїю ѡ҆градѝ, и҆ всѣ́мъ на́мъ пода́ждь дрꙋ́гъ ко дрꙋ́гꙋ любо́вь, ми́ръ и҆ бл҃гоче́стїе, и҆ здра́вїе со долгоде́нствїемъ: да всѝ на нб҃сѝ и҆ на землѝ вѣ́дѧтъ тѧ̀, ꙗ҆́кѡ тве́рдꙋю и҆ непосты́днꙋю предста́тельницꙋ ро́да хрⷭ҇тїа́нскагѡ и҆, сїѐ вѣ́дꙋще, сла́вѧтъ тѧ̀ и҆ тобо́ю сн҃а твоегѡ̀ со безнача́льнымъ є҆гѡ̀ ѻ҆ц҃е́мъ и҆ є҆диносꙋ́щнымъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
В начале XVIII столетия некий благочестивый живописец привез из Италии список с иконы, изображающей Святое Семейство. Этот образ он оставил в Москве у своего родственника, священника Троицкой, на Грязях, церкви. Впоследствии священник пожертвовал привезенный ему образ в свою приходскую церковь. Здесь икона была помещена на паперти, над входом в церковь.
Через сорок лет Божия благодать прославила икону дивными знамениями.
Предание гласит, что однажды на некую знатную женщину за короткий промежуток времени обрушилось сразу несколько несчастий — муж ее был оклеветан и отправлен в ссылку, имение отобрано в казну, а единственный любимый сын, опора и утешение несчастной женщины, во время войны попал в плен. Оказавшись в безвыходном положении, бедная женщина обратилась с горячей молитвой к Царице Небесной, прося Ее милостивого заступления. Владычица Небесная услышала слезные моления несчастной — однажды во сне женщина услышала голос, повелевающий ей отыскать икону Святого Семейства и помолиться перед ней. Долго искала скорбящая женщина образ по московским церквам и нашла его, наконец, на паперти Троицкой церкви на Покровке. Усердно помолившись Пресвятой Деве, она вскоре получила три радостных известия: муж ее был оправдан и возвращен из ссылки, сын освобожден из плена и имение возвращено из казны. Отсюда и пошло наименование иконы — «Трех Радостей».
На иконе Божия Матерь изображена с Предвечным Младенцем на коленях. По правую Ее руку стоит старец Иосиф, а слева — Иоанн Предтеча, взирающие на Богомладенца с любовью.
Помимо двух известных образов Божией Матери «Трех радостей» в церкви во имя Живоначальной Троицы, что на Грязех, в Москве чтимые списки с иконы пребывают в двух храмах: в честь Положения честной Ризы Пресвятой Богородицы во Влахерне и в домовой церкви Софринской бригады оперативного назначения МВД России.
В 1918 году в Ризоположенскую церковь в Леонове перешло значительное число икон и церковной утвари из Свято-Михайловской церкви Гродненской епархии. Среди них туда была отправлена и икона «Трех Радостей». До реставрации она находилась у правого клироса главного алтаря, а в настоящее время пребывает в левом приделе перед клиросом.
