Акафист Пресвятой Богородице пред иконой «Спорительница хлебов»

И҆збра́ннѣй ѿ всѣ́хъ родѡ́въ бж҃їей мт҃ри и҆ влⷣчцѣ нб҃сѐ и҆ землѝ, и҆збавлѧ́ющей на́съ ѿ всѧ́кїѧ нꙋ́жды, бл҃года́рственное прино́симъ пѣ́нїе. Ты́ же, всемлⷭ҇тиваѧ гпⷭ҇жѐ бцⷣе, прїимѝ на́ше ᲂу҆се́рдное моле́нїе, сохранѝ на́съ ѿ гла́да и҆ па́гꙋбы, да́рꙋй землѝ на́шей плодоно́сїе, пита́тельнице и҆ спори́тельнице ни́въ и҆ хлѣбѡ́въ на́шихъ, да ра́дꙋющесѧ всегда̀ зове́мъ тѝ:

А҆́гг҃лѡвъ творе́цъ и҆збра̀ тѧ̀, влⷣчце, къ бл҃года́тномꙋ человѣ́кѡвъ сп҃се́нїю и҆ дарова̀ тѧ̀ помо́щницꙋ лю́демъ, и҆збавлѧ́ющꙋю на́съ ѿ гла́да и҆ всѧ́кихъ напа́стей, житїѐ на́ше до́брѣ ᲂу҆строѧ́ющꙋю въ ми́рѣ и҆ всѧ́комъ дово́льствѣ. Тѣ́мже со ᲂу҆миле́нїемъ взыва́емъ тѝ:

Ви́дѣвъ сн҃ъ тво́й, бг҃омт҃и, вели́кое твоѐ къ лю́демъ млⷭ҇рдїе, глаго́летъ тебѣ̀: просѝ, мт҃и моѧ̀, занѐ не ѿвращꙋ́сѧ тебє̀, но и҆спо́лню всѧ̑ прошє́нїѧ твоѧ̑. Мы́ же прославлѧ́юще сїѐ ди́вное промышле́нїе ѡ҆ ро́дѣ человѣ́честѣмъ, вопїе́мъ бг҃ꙋ: А҆ллилꙋ́їа.

Ра́зꙋмъ нбⷭ҇ный дарова́сѧ прпⷣбномꙋ ста́рцꙋ а҆мвро́сїю, є҆́же водрꙋзи́ти во ѻ҆би́тели, и҆́мъ созда́ннѣй, і҆кѡ́нꙋ прест҃ы́ѧ бцⷣы и҆ нарещѝ ю҆̀ спори́тельница хлѣбѡ́въ, ꙗ҆́кѡ ты̀, прест҃а́ѧ дв҃о, сп҃са́еши лю́ди твоѧ̑ ѿ гла́да, защища́еши ѧ҆̀ ѿ смертоно́снагѡ вре́да и҆ па́гꙋбы, да́рꙋеши землѝ плодоно́сїе, посыла́еши до́ждь ра́ннїй и҆ по́зднїй на ни̑вы и҆ полѧ̀ на́шѧ. Тѣ́мже вопїе́мъ тебѣ̀ такова̑ѧ:

Си́лою свы́ше ᲂу҆крѣпѝ на́съ, бл҃года́тнаѧ влⷣчце, во дни̑ гла́да и҆ па́гꙋбы, да не поги́бнемъ лю́тѣ без̾ покаѧ́нїѧ во ᲂу҆ны́нїи и҆ ѿча́ѧнїи, но ᲂу҆твердѝ и҆ наста́ви на́съ въ терпѣ́нїи и҆ бл҃гоꙋгожде́нїи бг҃ови, да разꙋмѣ́емъ въ напа́стехъ и҆ ско́рбехъ во́лю є҆гѡ̀ ст҃ꙋ́ю, бл҃гꙋ́ю и҆ соверше́ннꙋю, непреста́ннѡ взыва́юще къ немꙋ̀ хвале́бнымъ гла́сомъ: А҆ллилꙋ́їа.

И҆мꙋ́щи любо́вь ве́лїю къ лю́демъ, и҆скꙋпле́ннымъ чтⷭ҇но́ю кро́вїю сн҃а твоегѡ̀ и҆ бг҃а, бг҃омт҃и пречⷭ҇таѧ, прїѧ́ла є҆сѝ ѿ негѡ̀ вла́сть ᲂу҆строѧ́ти и҆ покрыва́ти ро́дъ хрⷭ҇тїа́нскїй. Ты́ бо бѣ́дствꙋющымъ помо́щница є҆сѝ ско́раѧ, градѡ́мъ и҆ ве́семъ, се́ламъ и҆ ни́вамъ и҆ всемꙋ̀ мі́рꙋ покро́въ. Тебѣ̀, млⷭ҇рдой и҆ бг҃олюби́вой мт҃ри на́шей, ᲂу҆строѧ́ющей и҆ направлѧ́ющей ко сп҃се́нїю земнꙋ́ю жи́знь на́шꙋ, со смире́нїемъ глаго́лемъ:

Бꙋ́рѧ проти́вныхъ вѣ́трѡвъ, є҆гда̀ на́йдетъ на ны̀ внеза́пнѡ, гро́мы и҆ мѡ́лнїи, гра́дъ и҆ вода̀ мно́гаѧ ᲂу҆стремѧ́тсѧ на зе́млю, тогда̀, гпⷭ҇жѐ всемлⷭ҇тиваѧ, ᲂу҆скорѝ на по́мощь на́мъ безпомѡ́щнымъ, защитѝ и҆ и҆зба́ви на́съ ѿ дожде́внагѡ лїѧ́нїѧ, є҆гѡ́же сотвори́хомсѧ досто́йни грѣ̑хъ ра́ди на́шихъ, и҆ да бꙋ́дꙋтъ полѧ̀ и҆ ни́вы невреди̑мы ѿ си́хъ, и҆ да не потопи́тъ на́съ бꙋ́рѧ водна́ѧ. Тебе́ бо грѣ́шнїи и҆́мамы застꙋ́пницꙋ непосты́днꙋю, на тѧ̀ ᲂу҆пова́нїе на́ше возлага́емъ, и҆ прославлѧ́юще си́лꙋ мл҃твъ твои́хъ, ро́ждшемꙋсѧ ѿ тебє̀ сп҃сꙋ мі́ра зове́мъ: А҆ллилꙋ́їа.

Слы́шаще и҆ ви́дѧще твоѐ сострада́нїе, влⷣчце, къ бѣ́дствꙋющымъ и҆ ги́бнꙋщымъ лю́демъ, мы̀ грѣ́шнїи прибѣга́емъ къ тебѣ̀ и҆ мо́лимсѧ: ѽ прест҃а́ѧ дв҃о, ᲂу҆слы́ши на́съ, и҆ во дни̑, є҆гда̀ со́лнце и҆зсꙋши́тъ зе́млю и҆ ѿ сꙋ́хости зно́й бꙋ́детъ, и҆ прозѧбє́нїѧ земна̑ѧ начнꙋ́тъ ᲂу҆вѧда́ти, тогда̀, влⷣчце, ро́сꙋ бл҃года́ти твоеѧ̀ низпослѝ на тре́бꙋющыѧ и҆ просѧ́щыѧ млⷭ҇ти, возвеселѝ лицѐ землѝ люде́й ра́ди твои́хъ, и҆ младе́нєцъ и҆́хъ, и҆ скотѡ́въ, и҆ и҆ны́хъ всѣ́хъ, и҆̀же ча́ютъ къ бг҃ꙋ да́ти пи́щꙋ и҆̀мъ во бл҃го вре́мѧ, и҆ ѿ ст҃ы́ѧ і҆кѡ́ны твоеѧ̀ спори́тельницы ꙗ҆вѝ млⷭ҇рдїе твоѐ вопїю́щымъ тебѣ̀ такова̑ѧ:

Бг҃оте́чнаѧ ѕвѣзда̀ і҆кѡ́на твоѧ̀, бг҃омт҃и, лю́демъ, просѧ́щымъ хлѣ́ба насꙋ́щнагѡ, немерца́емѡ сїѧ́етъ. Покро́вомъ бо твоеѧ̀ млⷭ҇ти соблюда́еши полѧ̀ и҆ ни̑вы на́шѧ и҆ плодоноси́ти и҆̀хъ ᲂу҆строѧ́еши, подвиза́ющи вѣ̑рныѧ вопи́ти хрⷭ҇тꙋ̀ бг҃ꙋ: А҆ллилꙋ́їа.

Ви́дѧ тѧ̀ сн҃ъ тво́й при крⷭ҇тѣ̀ стоѧ́щꙋю съ возлю́бленнымъ ᲂу҆ч҃нко́мъ, глаго́летъ тебѣ̀: же́но, сѐ сы́нъ тво́й. И҆ ᲂу҆ч҃нкꙋ̀: сѐ мт҃и твоѧ̀: всыновлѧ́ѧ тебѣ̀ всѧ̑ вѣ́рꙋющыѧ въ него̀. Мы́ же ча̑да твоѧ̑ сꙋ́ще, на тво́й покро́въ надѣ́ющесѧ, тебѣ̀, ꙗ҆́кѡ мт҃ри на́шей, глаго́лати дерза́емъ:

Проповѣ́дꙋетъ цр҃ковь хрⷭ҇то́ва чꙋдеса̀ твоѧ̑, бг҃ороди́тельнице, ѿ востѡ́къ бо до за̑падъ хва́льно и҆́мѧ твоѐ, и҆ нѣ́сть гра́да и҆лѝ страны̀, и҆дѣ́же не ꙗ҆ви́шасѧ тобо́ю дѣ̑йства си́лы бж҃їѧ, во и҆збавле́нїе и҆ сп҃се́нїе, просвѣще́нїе и҆ и҆сцѣле́нїе люде́й хрⷭ҇тоимени́тыхъ, наипа́че же чрез̾ і҆кѡ̑ны твоѧ̑ ст҃ы̑ѧ ѡ҆бы́кла є҆сѝ чꙋдотвори́ти, и҆злива́ющи ѿ ни́хъ стрꙋи̑ млⷭ҇тей и҆ щедро́тъ бѣ́дствꙋющемꙋ и҆ тре́бꙋющемꙋ по́мощи человѣ́чествꙋ. Сегѡ̀ ра́ди славосло́вѧще тѧ̀, сн҃ꙋ твоемꙋ̀ и҆ бг҃ꙋ на́шемꙋ вопїе́мъ: А҆ллилꙋ́їа.

Возсїѧ́ла є҆сѝ ѿ и҆́стиннагѡ со́лнца зарѧ̀, дв҃о бг҃оѻтрокови́це, просвѣща́ющи дꙋ́шы всѣ́хъ томи́мыхъ гла́домъ дꙋше́внымъ, рече́ бо гдⷭ҇ь: не ѡ҆ хлѣ́бѣ є҆ди́нѣмъ жи́въ бꙋ́детъ человѣ́къ, но ѡ҆ всѧ́комъ глаго́лѣ, и҆сходѧ́щемъ и҆з̾ ᲂу҆́стъ бж҃їихъ. Ѻ҆ба́че помрачи́шасѧ ѻ҆́чи на́ши и҆ ѡ҆каменѣ́ша сердца̀ на̑ша, и҆ не ви́димъ ѻ҆чи́ма свои́ма и҆ не разꙋмѣ́емъ се́рдцемъ сꙋде́бъ бж҃їихъ. Томи́мїи же дꙋше́внымъ гла́домъ къ тебѣ̀ прибѣга́емъ, пречⷭ҇таѧ дв҃о, и҆ про́симъ сло́вомъ жи́зни ᲂу҆толи́ти гла́дъ дꙋше́вный на́съ, вопїю́щихъ тебѣ̀ такова̑ѧ:

Хотѧ́щи жа́ти сп҃се́нїе, ꙗ҆́кѡ село̀ сла́дкое показа́ласѧ є҆сѝ, влⷣчце, ѿ негѡ́же пита́ющесѧ, и҆́мамы пи́щꙋ вѣ́чнꙋю и҆ нетлѣ́ннꙋю. Мы́ же земні́и сꙋ́ще, мо́лимъ тѧ̀, пречⷭ҇таѧ дв҃о: покажѝ си́лꙋ твою̀ въ дни̑ жа́твы ни́въ и҆ поле́й на́шихъ, да всѧ́къ ѕла́къ и҆з̾ѡби́лꙋетъ на ᲂу҆тѣше́нїе на́съ, пою́щихъ бг҃ꙋ: А҆ллилꙋ́їа.

Ди́внѡ просла́виласѧ є҆сѝ, бг҃омт҃и, въ защище́нїи люде́й правосла́вныхъ. Возстаю́щїи на бг҃а не познаю́тъ, ко́ль сильна̀ є҆́сть мл҃тва бж҃їѧ мт҃ре. Мы́ же ѡ҆ твое́мъ всемо́щнѣмъ застꙋпле́нїи, по́мощи и҆ бл҃гослове́нїи до́брѣ вѣ́дꙋще, си́це къ тебѣ̀ со ᲂу҆миле́нїемъ зове́мъ:

Ꙗ҆́коже дре́вле содѣ́йствовала є҆сѝ схожде́нїю на зе́млю сп҃си́телѧ мі́ра, си́це и҆ ны́нѣ, ꙗ҆́кѡ со́лнце свѣтоза́рное, восхо́диши над̾ созрѣва́ющею ни́вою, предше́ствꙋющи прихо́дꙋ гдⷭ҇и́на съ жа́тельми. Томꙋ̀ и҆ мы̀ со стра́хомъ вопїе́мъ: А҆ллилꙋ́їа.

Всѐ ᲂу҆пова́нїе на́ше на тѧ̀ возлага́емъ, мт҃и бж҃їѧ, и҆ въ ско́рбехъ на́шихъ ко ст҃ѣ́й і҆кѡ́нѣ твое́й ᲂу҆се́рднѡ притека́емъ, ча́юще полꙋчи́ти ѿ тебє̀ ᲂу҆тѣше́нїе бл҃года́тное и҆ вспоможе́нїе во ѡ҆скꙋдѣ́нїи и҆ нищетѣ̀ на́шей, сегѡ̀ ра́ди взыва́емъ тѝ:

Всѝ лю́дїе дивѧ́тсѧ вели́чїю чꙋде́съ твои́хъ, прест҃а́ѧ дв҃о, и҆злива́емыхъ тобо́ю ѿ ст҃ы́хъ твои́хъ і҆кѡ́нъ, ꙗ҆́кѡ всѣ̑мъ да́рꙋеши по коегѡ́ждо проше́нїю, ᲂу҆строѧ́еши до́мы на́шѧ, посыла́еши бл҃гослове́нїе землѝ дѣ́лателємъ и҆ дае́ши лю́демъ всѧ́кое дово́льство. Тѣ́мже вопїе́мъ сн҃ꙋ твоемꙋ̀: А҆ллилꙋ́їа.

Вѣті̑и многовѣща́ннїи не мо́гꙋтъ воспѣ́ти чꙋде́съ твои́хъ, бг҃омт҃и влⷣчце, ꙗ҆́кѡ всѣ̑мъ концє́мъ землѝ простира́еши рꙋ́кꙋ по́мощи и҆ низпосыла́еши вѣ̑рнымъ землѝ плодоно́сїе, бл҃горастворе́нїе воздꙋ́хѡвъ и҆ всѧ́кое и҆з̾ѻби́лїе плодѡ́въ и҆ бла̑гъ земны́хъ. Мы́ же во смире́нїи свое́мъ и҆сповѣ́дающе твоѐ вели́кое застꙋпле́нїе на́съ грѣ́шныхъ и҆ непреста́ннꙋю по́мощь въ нꙋ́ждахъ на́шихъ, вопїе́мъ тѝ:

Сп҃си́тельное прибѣ́жище въ ско́рбехъ и҆ напа́стехъ ты̀ є҆сѝ, бцⷣе: тѣ́мже и҆спросѝ ᲂу҆ сн҃а твоегѡ̀ и҆ бг҃а на́шегѡ млⷭ҇ти на́мъ грѣ̑шнымъ, пою́щымъ: А҆ллилꙋ́їа.

Стѣна̀ є҆сѝ похвалѧ́ющымъ чꙋдеса̀ твоѧ̑, бцⷣе дв҃о, и҆ всѣ̑мъ съ вѣ́рою притека́ющымъ и҆ покланѧ́ющымсѧ тебѣ̀ и҆ і҆кѡ́нѣ твое́й, спори́тельница хлѣбѡ́въ и҆менꙋ́емой, и҆ глаго́лющымъ:

Пѣ́нїе на́ше не пре́зри, прест҃а́ѧ дв҃о, и҆ сокро́вище любвѐ твоеѧ̀ не затворѝ ѿ на́съ: ще́дрꙋю рꙋ́кꙋ твоеѧ̀ по́мощи прострѝ на́мъ, да прославлѧ́юще млⷭ҇ти и҆ чꙋдеса̀ твоѧ̑, пое́мъ трїеди́номꙋ бг҃ꙋ: А҆ллилꙋ́їа.

Свѣ́тлыми лꙋча́ми чꙋде́съ твои́хъ просвѣща́еши ве́сь мі́ръ хрⷭ҇тїа́нскїй и҆ застꙋпа́еши лю́ди правосла̑вныѧ, и҆скꙋплє́нныѧ кро́вїю сн҃а твоегѡ̀. Тѣ́мже припа́дающе ко ст҃о́мꙋ ѻ҆́бразꙋ твоемꙋ̀, на не́мже зри́мъ тѧ̀, бг҃омт҃и, на воздꙋ́сѣ над̾ полѧ́ми и҆ ни́вами на́шими, бл҃гословлѧ́ющꙋю сѡ́бранныѧ снопы̀ хлѣ́ба, мо́лимъ тѧ̀, всемлⷭ҇тиваѧ влⷣчце: ро́дъ человѣ́ческїй, ѡ҆сꙋжде́нный въ по́тѣ лица̀ своегѡ̀ снѣ́сти хлѣ́бъ, въ болѣ́знехъ роди́ти и҆ въ печа́лехъ пита́ти ча̑да своѧ̑, млⷭ҇тивнѡ пощадѝ и҆ застꙋпѝ. Да́рꙋй на́мъ здра́вїе и҆ бл҃гомо́щїе, да пита́емїи тобо́ю, ѿ си́лы въ си́лꙋ возраста́ти бꙋ́демъ и҆ всѝ и҆спо́лнимсѧ ра́дости и҆ ᲂу҆тѣше́нїѧ ѿ щедрода́тельныѧ десни́цы любвѐ твоеѧ̀, зовꙋ́ще тебѣ̀:

Бл҃года́тнꙋю по́мощь низпослѝ на́мъ, мт҃и бж҃їѧ, и҆ є҆гда̀ и҆зы́детъ сѣ́ѧй сѣ́ѧти, да не падꙋ́тъ сѣ́мена при пꙋтѝ, и҆лѝ посредѣ̀ те́рнїѧ, и҆лѝ на ка́мени, но на землѝ до́брѣй. Сотворѝ восхо́дъ и҆́хъ, да произрасти́тъ землѧ̀ пло́дъ стори́цею, и҆ мы̀ всѝ въ ра́дости се́рдца бл҃года́рными ᲂу҆сты̀ вопїе́мъ бг҃ꙋ: А҆ллилꙋ́їа.

Пою́ще чꙋдеса̀ твоѧ̑ и҆ млⷭ҇ти, влⷣчце бцⷣе, хва́лимъ тѧ̀ всѝ, ꙗ҆́кѡ вои́стиннꙋ є҆сѝ на́ша помо́щница, застꙋ́пница, пита́тельница и҆ домострои́тельница, житїѐ на́ше ко сп҃се́нїю ᲂу҆строѧ́ющаѧ. Тѣ́мже вопїе́мъ тѝ:

Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во! Ны́нѣшнее на́ше прїе́мши приноше́нїе, и҆зба́ви лю́ди, къ тебѣ̀ прибѣга́ющыѧ, ѿ всѧ́кїѧ нꙋ́жды, гла́да дꙋше́внагѡ и҆ тѣле́снагѡ, смертоно́сныхъ болѣ́зней и҆ всѧ́кагѡ ѕла̀ и҆ вѣ́чныѧ и҆змѝ мꙋ́ки, да съ ли̑ки а҆́гг҃льскими непреста́ннѡ пое́мъ бг҃ꙋ: А҆ллилꙋ́їа.

А҆́гг҃лѡвъ творе́цъ и҆збра̀ тѧ̀, влⷣчце, къ бл҃года́тномꙋ человѣ́кѡвъ сп҃се́нїю и҆ дарова̀ тѧ̀ помо́щницꙋ лю́демъ, и҆збавлѧ́ющꙋю на́съ ѿ гла́да и҆ всѧ́кихъ напа́стей, житїѐ на́ше до́брѣ ᲂу҆строѧ́ющꙋю въ ми́рѣ и҆ всѧ́комъ дово́льствѣ. Тѣ́мже со ᲂу҆миле́нїемъ взыва́емъ тѝ:

И҆збра́ннѣй ѿ всѣ́хъ родѡ́въ бж҃їей мт҃ри и҆ влⷣчцѣ нб҃сѐ и҆ землѝ, и҆збавлѧ́ющей на́съ ѿ всѧ́кїѧ нꙋ́жды, бл҃года́рственное прино́симъ пѣ́нїе. Ты́ же, всемлⷭ҇тиваѧ гпⷭ҇жѐ бцⷣе, прїимѝ на́ше ᲂу҆се́рдное моле́нїе, сохранѝ на́съ ѿ гла́да и҆ па́гꙋбы, да́рꙋй землѝ на́шей плодоно́сїе, пита́тельнице и҆ спори́тельнице ни́въ и҆ хлѣбѡ́въ на́шихъ, да ра́дꙋющесѧ всегда̀ зове́мъ тѝ:

Ѽ прест҃а́ѧ дв҃о бцⷣе, премлⷭ҇тиваѧ влⷣчце, цр҃и́це нб҃сѐ и҆ землѝ, всѧ́кагѡ до́ма и҆ семе́йства хрⷭ҇тїа́нскагѡ бл҃гоꙋстрои́тельнице, трꙋжда́ющихсѧ бл҃гослове́нїе, нꙋжда́ющихсѧ неистощи́мое бога́тство, си́рыхъ и҆ вдови́цъ и҆ всѣ́хъ люде́й корми́тельнице! Пита́тельнице на́ша, ро́ждшаѧ пита́телѧ вселе́нныѧ, и҆ спори́тельнице хлѣбѡ́въ на́шихъ, ты̀, влⷣчце, низпосыла́еши твоѐ мт҃рнее бл҃гослове́нїе градѡ́мъ на́шымъ, се́ламъ и҆ ни́вамъ и҆ коемꙋ́ждо до́мꙋ, на тѧ̀ ᲂу҆пова́нїе и҆мꙋ́щемꙋ. Тѣ́мже съ бл҃гоговѣ́йнымъ тре́петомъ и҆ сокрꙋше́ннымъ се́рдцемъ смире́ннѡ мо́лимъ тѧ̀: бꙋ́ди и҆ на́мъ, грѣ̑шнымъ и҆ недостѡ́йнымъ рабѡ́мъ твои̑мъ, мꙋ́драѧ домострои́тельница, житїѐ на́ше до́брѣ ᲂу҆строѧ́ющаѧ. Всѣ́хъ же прибѣга́ющихъ къ покро́вꙋ твоемꙋ̀, всѧ́кїй до́мъ и҆ семе́йство во бл҃гоче́стїи и҆ правосла́вїи, є҆диномы́слїи, послꙋша́нїи и҆ дово́льствѣ соблюдѝ. Ни́щыѧ и҆ неимꙋ́щыѧ пропита́й, ста́рость поддержѝ, младе́нцы воспита́й, всѣ́хъ вразꙋмѝ преи́скреннѣ взыва́ти ко гдⷭ҇ꙋ: хлѣ́бъ на́шъ насꙋ́щный да́ждь на́мъ дне́сь. Сохранѝ, пречⷭ҇таѧ мт҃и, лю́ди твоѧ̑ ѿ всѧ́кїѧ нꙋ́жды, болѣ́зни, гла́да, ѻ҆гнѧ̀, ѿ всѧ́кагѡ ѕла́гѡ ѡ҆бстоѧ́нїѧ и҆ всѧ́кагѡ нестрое́нїѧ. Ѻ҆би́тели [и҆лѝ: ве́си] на́шей [и҆лѝ: гра́дꙋ на́шемꙋ], домѡ́мъ и҆ семе́йствѡмъ, и҆ всѧ́кой дꙋшѝ хрⷭ҇тїа́нской, и҆ все́й странѣ̀ на́шей и҆схода́тайствꙋй ми́ръ и҆ ве́лїю млⷭ҇ть, да сла́вимъ тѧ̀, премлⷭ҇тивꙋю пита́тельницꙋ и҆ спори́тельницꙋ на́шꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.